НЕДЕЛЯ О БЛУДНОМ СЫНЕ Собор трех святителей, глас 2 ВСЕНОЩНОЕ БДЕНИЕ ВЕЛИКАЯ ВЕЧЕРНЯ. Триодь постная
12 февраля́ 2023 г. Недéля о блýдном сы́не. Собóр вселéнских учúтелей и святúтелей Васíлiя Велúкаго, Григóрiя Богослóва и Iоáнна Златоýстаго. Глас 2. Всeнóщное бдéнiе для домáшнего (келéйнаго) совершéнiя состоúт из Велúкой вечéрни, ýтрени, тáкже канóна и пéрваго чáса. Слýжба мiрскúм чúном.
ВЕЛИКАЯ ВЕЧЕРНЯ
Моли́твами святы́х отéц нáших, Гóсподи Iисýсе Хрїстé, Бóже наш, поми́луй нас, ами́нь.
Слáва Тебé, Бóже наш, слáва Тебé.
Царю́ Небéсный, Утéшителю, Дýше И҆́стины, И҆́же вездé сый и вся исполня́яй, Сокрóвище благи́х и жи́зни Подáтелю, прiиди́ и всели́ся в ны, и очи́сти ны от вся́кiя сквéрны, и спаси́, Блáже, Дýши нáша.
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сы́не Бóжїй, поми́луй нас. Ами́нь.
Гóсподи, поми́луй, (12 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Прїиди́те, поклони́мся Царéви нáшему Бóгу.
Прїиди́те, поклони́мся и припадéм Хрїстý, Царéви нáшему Бóгу.
Прїиди́те, поклони́мся и припадéм Самомý Хрїстý, Царéви и Бóгу нáшему.
Псалом 103, предначинáтельный
Стiхú избрáннiи: Благословѝ, душé моя́, Гóспода./ Благословéн есѝ, Гóсподи./ Гóсподи, Бóже мой, возвели́чился еси́ зелó./ Благословéн есѝ, Гóсподи./ Во исповéданiе и в велелéпоту/ облéклся есѝ. Благословéн есѝ, Гóсподи./ Посредé гор прóйдут вóды./ Ди́вна делá Твоя́, Гóсподи./ Вся премýдростiю сотвори́л есѝ./ Слáва Ти, Гóсподи, сотвори́вшему вся.
[Псалом полностью]Благослови, душé моя, Гóспода, Бóже мой, возвеличился есѝ зелó. Во исповéданiе и в велелéпоту облéклся есѝ. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя́, полагáяй óблаки на восхождéнiе Своé, ходя́й на крилý вéтреню. Творя́й Áнгелы Своя дýхи и слугѝ Своя плáмень óгненный. Основáяй зéмлю на твéрди ея́, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегó побéгнут, от глáса грóма Твоегó убоя́тся. Восхóдят гóры и нисхóдят поля́ в мéсто, éже основáл есѝ им. Предéл положи́л есѝ, eгóже не прéйдут, нижé обратя́тся покры́ти зéмлю. Посылáяй истóчники в дéбрех, посредé гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды́ кáменiя дадя́т глас. Напая́яй гóры от превы́спренних Свои́х, от плодá дел Твоих насы́тится земля́. Прозябáяй травý скотóм, и злак на слýжбу человéком, известѝ хлеб от землѝ. И винó весели́т сéрдце человéка, умáстити лицé елéем, и хлеб сéрдце человéка укрепи́т. Насы́тятся древá польскáя, кéдри Ливáнстiи, и҆́хже еси насади́л. Тáмо пти́цы вогнездя́тся, еродíево жили́ще предводи́тельствует и҆́ми. Гóры высóкiя елéнем, кáмень прибéжище зáяцем. Сотвори́л есть лунý во временá, сóлнце познá зáпад свой. Положи́л есѝ тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себé. Возсiя́ сóлнце и собрáшася и в лóжах свои́х ля́гут. Изы́дет человéк на дéло своé и на дéланiе своé до вéчера. Яко возвели́чишася делá Твоя, Гóсподи, вся премýдростiю сотвори́л есѝ, испóлнися земля́ твáри Твоея́. Сié мóре вели́кое и прострáнное, тáмо гáди, и҆́мже несть числá, живóтная мáлая с вели́кими, тáмо кораблѝ преплáвают, змiй сей, eгóже создáл есѝ ругáтися eмý. Вся к Тебé чáют, дáти пи́щу им во блáго врéмя. Дáвшу Тебé им соберýт, отвéрзшу Тебé рýку вся́ческая испóлнятся блáгости, отврáщшу же Тебé лицé, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегó, и сози́ждутся, и обнови́ши лицé землѝ. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животé моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от землѝ, и беззакóнницы, я́коже не бы́ти им. Благословѝ, душé моя́, Гóспода. Сóлнце познá зáпад свой. Положи́л еси тму, и бысть нощь. Яко возвели́чишася делá Твоя, Гóсподи, вся премýдростiю сотвори́л есѝ.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Первая кафизма
Читáем лúбо кафíсму 1-ю (1-ю cтатiю(«Блажéн муж» - 1-й антiфóн.)
[Псалом 1]Блажéн муж, и҆́же не и҆́де на совéт нечести́вых и на путѝ грéшных не ста, и на седáлищи губи́телей не сéде, но в закóне Госпóдни вóля eгó, и в закóне Егó поучи́тся день и нощь. И бýдет яко дрéво насаждéнное при исхóдищих вод, éже плод свой даст во врéмя своé, и лист eгó не отпадéт, и вся, ели́ка áще твори́т, успéет. Не тáко нечести́вiи, не тáко, но яко прах, eгóже возметáет ветр от лицá землѝ. Сегó рáди не воскрéснут нечести́вiи на суд, нижé грéшницы в совéт прáведных. Яко весть Госпóдь путь прáведных, и путь нечести́вых поги́бнет.
[Псалом 2]Вскýю шатáшася язы́цы, и лю́дiе поучи́шася тщéтным? Предстáша цáрiе зéмстiи, и кня́зи собрáшася вкýпе на Гóспода и на Хрїстá Егó. Растóргнем ýзы их и отвéржем от нас и҆́го их. Живы́й на Небесéх посмеéтся им, и Госпóдь поругáется им. Тогдá возглагóлет к ним гнéвом свои́м и я́ростiю Своéю смятéт я́. Аз же постáвлен есмь Царь от Негó над Сióном, горóю святóю Егó, возвещáяй повелéнiе Госпóдне. Госпóдь речé ко Мне: Сын Мой еси Ты, Аз днесь роди́х Тя. Просѝ от Менé, и дам Ти язы́ки достоя́нiе Твоé, и одержáнiе Твоé концы́ землѝ. Упасéши я́ жезлóм желéзным, я́ко сосýды скудéльничи сокруши́ши я́. И ны́не, цáрiе, разумéйте, накажи́теся вси судя́щiи землѝ. Рабóтайте Гóсподеви со стрáхом и рáдуйтеся Емý с трéпетом. Прiими́те наказáнiе, да не когдá прогнéвается Госпóдь и поги́бнете от путѝ прáведнаго, егдá возгори́тся вскóре я́рость Егó. Блажéни вси надéющiися Нань.
[Псалом 3]Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгó. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы́ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоé.
Лúбо поéм стiхú избрáннiи
БЛАЖЕН МУЖ
Чтец (или хор): Блажéн муж, и҆́же не и҆́де на совéт нечести́вых.
Хор: Аллилýїа, аллилýїа, аллилýїа.
Чтец (или хор): Яко весть Госпóдь путь прáведных, и путь нечести́вых поги́бнет.
Хор: Аллилýїа, аллилýїа, аллилýїа.
Чтец (или хор): Рабóтайте Гóсподеви со стрáхом и рáдуйтеся Емý с трéпетом.
Хор: Аллилýїа, аллилýїа, аллилýїа.
Чтец (или хор): Блажéни вси надéющiися Нань.
Хор: Аллилýїа, аллилýїа, аллилýїа.
Чтец (или хор): Воскреснѝ, Гóсподи, спасѝ мя, Бóже мой.
Хор: Аллилýїа, аллилýїа, аллилýїа.
Чтец (или хор): Госпóдне есть спасéнiе, и на лю́дех Твои́х благословéнiе Твоé.
Хор: Аллилýїа, аллилýїа, аллилýїа.
Чтец: Слáва Ѻтцý и Сы́ну и Святóму Дýху.
Хор: Аллилýїа, аллилýїа, аллилýїа.
Хор: И ны́не и при́сно и во вéки векóв, ами́нь.
Хор: Аллилýїа, аллилýїа, аллилýїа.
Аллилýїа, аллилýїа, аллилýїа, слáва Тебé Бóже. (трúжды)
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
ГОСПОДИ ВОЗЗВАХ, ГЛАС 2
Хор: Гóсподи, воззвáх к Тебé, услы́ши мя./ Услы́ши мя, Гóсподи./ Гóсподи, воззвáх к Тебé, услы́ши мя:/ вонми́ глáсу молéнія моегó,/ внегдá воззвáти ми к Тебé./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ніе рукý моéю/ - жéртва вечéрняя./ Услы́ши мя, Гóсподи.
[В приходской практике пропускается до стихир]Положѝ, Гóсподи, хранéнiе устóм мои́м, и дверь ограждéнiя о устнáх мои́х. Не уклонѝ сéрдце моé в словесá лукáвствiя, непщевáти вины́ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы́ моея́, я́ко ещé и моли́тва моя́ во благоволéнiих их. Пожéрты бы́ша при кáмени судiѝ их: услы́шатся глагóли моѝ, я́ко возмогóша. Я́ко тóлща землѝ просéдеся на землѝ, расточи́шася кóсти и҆́х при áде. Я́ко к Тебé, Гóсподи, Гóсподи, óчи моѝ: на Тя уповáх, не отымѝ дýшу мою́. Сохранѝ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
[В приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моé, печáль мою́ пред Ним возвещý. Внегдá исчезáти от менé дýху моемý: и Ты познáл есѝ стезѝ моя́: на путѝ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менé: поги́бе бéгство от менé, и несть взыскáяй дýшу мою́. Воззвáх к Тебé, Гóсподи, рех: Ты есѝ уповáнiе моé, часть моя́ есѝ на землѝ живы́х. Вонмѝ молéнiю моемý, я́ко смири́хся зелó, избáви мя от гоня́щих мя, я́ко укрепи́шася пáче менé.
На 10 Чтец: Изведù из темнúцы дýшу мою́,// исповéдатися и҆́мени Твоемý.
Стiхúры воскрéсные, глас 2: Прéжде век от Ѻтцá Рóждшемуся Бóжiю Слóву,/ Воплóщшемуся от Дéвы Марíи,/ прiиди́те, поклони́мся: крест бо претерпéв,/ погребéнiю предадéся, яко Сам восхотé:/ и воскрéсе из мéртвых,// спасé мя заблуждáющаго человéка.
Менé ждут прáведницы,// дóндеже воздáси мне.
Стiхúра: Хрїстóс Спас наш,/ éже на ны рукописáнiе пригвозди́в на Крестé заглáди,/ и смéрную держáву упразднѝ:// поклоня́емся Егó Триднéвному Воскресéнiю.
На 8. Стiх: Из глубины́ воззвáх к Тебé, Гóсподи,// Гóсподи, услы́ши глас мой.
Стiхúра: Со Архáнгелы воспои́м Хрїстóво Воскресéнiе:/ Той бо есть Избáвитель и Спас душ нáших,/ и в слáве стрáшней и крéпцей си́ле,// пáки грядéт суди́ти мíру, егóже создá.
Да бýдут ýши Твоú// внéмлюще глáсу молéнiя моегó.
Стiхúры Трióди, глас 1:В безгрéшную странý и живóтную ввéрихся,/ посéяв грех, серпóм пожáв клáсы лéности,/ и рукоя́тiем связáв дея́нiй мои́х снопы́,/ я́же и постлáх не на гумнé покая́нiя:/ но молю́ Тя превéчнаго дéлателя нáшего Бóга,/ вéтром Твоегó любоблагоутрóбiя развéй плéву дел мои́х,/ и пшени́цу даждь души́ моéй оставлéнiе,// в небéсную Твою́ затворя́я мя жи́тницу, и спаси́ мя.
На 6. Стiх: Áще беззакóнiя нáзриши, Гóсподи, Гóсподи, кто постоúт?// Яко у Тебé очищéнiе есть.
Стiхúра: В безгрéшную странý и живóтную ввéрихся,/ посéяв грех, серпóм пожáв клáсы лéности,/ и рукоя́тiем связáв дея́нiй мои́х снопы́,/ я́же и постлáх не на гумнé покая́нiя:/ но молю́ Тя превéчнаго дéлателя нáшего Бóга,/ вéтром Твоегó любоблагоутрóбiя развéй плéву дел мои́х,/ и пшени́цу даждь души́ моéй оставлéнiе,// в небéсную Твою́ затворя́я мя жи́тницу, и спаси́ мя.
И҆́мене рáди Твоегó потерпéх Тя, Гóсподи, потерпé душá моя́ в слóво Твоé,// уповá душá моя на Гóспода.
Стiхúра: Познáим брáтiе, тáинства си́лу,/ от грехá бо ко отéческому дóму востéкшаго блýднаго сы́на/ преблаги́й отéц предустрéт лобзáет,/ и пáки своея́ слáвы познáнiе дáрует:/ и тáинственное вы́шним совершáет весéлiе,/ закалáя тельцá упитáннаго,/ да мы достóйно сожи́тельствуем,/ заклáвшему же человеколю́бному Отцý и слáвному заколéнiю,// Спáсу душ нáших.
На 4. Стiх: От стрáжи ýтреннiя до нóщи, от стрáжи ýтреннiя,// да уповáет Iзрáиль на Гóспода.
Стiхúры святи́телей, глас 4: Благодáти оргáны,/ гýсли Дýха,/ благознамени́тыя трýбы проповéданiя,/ стрáшныя и достослы́шанныя,/ с высоты́ шумя́щiя грóмы,/ и слáву Бóжiю сказýющiя концéм/ три проповéдники вели́кiя Трóицы,/ Iоáнна и Васи́лiя// достóйно с Григóрiем прослáвим.
Яко у Гóспода мúлость, и мнóгое у Негó избавлéнiе,// и Той избáвит Iзрáиля от всех беззакóнiй eгó.
Стiхúра: Трóицы побóрницы,/ благочéстiя забрáла,/ и́же по дванáдесятих трié апóстоли,/ из Едéма точáщiя вóду живýщую рéки/ и лицé земли́ животóчными напая́ющiя/ Божéственными струя́ми,/ вели́кiя стихи́и,/ вéру, я́коже тварь, состáвльшiя,// достодóлжно да почтýтся.
На 2. Стiх: Хвалúте Гóспода вси язы́цы, похвалúте Егó вси лю́дiе.
Стiхúра: Не суть рéчи, глагóлет,/ нижé словесá глагóлема,/ и́хже не слы́шатся глáси их:/ во всю зéмлю бо и мóре/ вещáнiе протечé/ Божéственных и мýдрых учи́телей твáри./ Отонýдуже изря́днейшiя/ тех Божéственными закóны содержáтся и собирáются// во еди́но Правослáвiе концы́.
Яко утвердúся мúлость Егó на нас,// и и҆́стина Госпóдня пребывáет во век.
Стiхúра: Оргáны Дýха Святáго,/ и́стинныя трубы́,/ ри́торы Слóва/ восхвáлим пéсненными глáсы,/ догмáтом их возслéдующiи,/ моля́щеся им,/ я́ко дерзновéнiе имýщим ко Гóсподу,/ даровáти мир крéпкiй ýбо при́сно вселéнней,// нам же всем прощéнiе.
Слáва Отцý и Сыну и Святóму Дýху.
Стiхúра Трióди, глас 2: О, коли́ких благ окая́нный себé лиши́х!/ О, каковá Цáрствiя отпадóх стрáстный аз!/ Богáтство изнури́в, éже прiя́х зáповедь преступи́х./ Увы́ мне, стрáстная душé!/ Огню́ вéчному прóчее осýдишися./ Тéмже прéжде концá возопи́й Хрїстý Бóгу// я́ко блýднаго прiими́ мя сы́на, Бóже, и поми́луй мя.
И ны́не и прúсно и во вéки векóв, амúнь.
Догмáтик. Глас 2: Прéйде сень закóнная,/ благодáти пришéдши:/ я́коже бо купинá не сгарáше опаля́ема,/ тáко Дéво родилá есѝ,/ и Дéва пребылá есѝ./ Вмéсто столпá óгненнаго, прáведное возсія Сóлнце:/ вмéсто Моисéя, Хрїстóс,// спасéніе душ нáших.
СВЕТЕ ТИХИЙ
Хор: Свéте Ти́хiй святы́я слáвы Безсмéртнаго Ѻтцá Небéснаго, Святáго, Блажéннаго, Iисýсе Хрїстé! Пришéдше на зáпад сóлнца, ви́девше свет вечéрнiй, поéм Ѻтцá, Сы́на и Святáго Дýха, Бóга. Достóин есѝ во вся временá пет бы́ти глáсы преподóбными, Сы́не Бóжiй, живóт дая́й; тéмже мiр Тя слáвит.
ПРОКИМЕН ВОСКРЕСНЫЙ
Чтец: Прокíмен, глас шесты́й: Госпóдь воцари́ся, в лéпоту облечéся.
Хор: Госпóдь воцарúся,/ в лéпоту облечéся. (Пс.92:1А)
Чтец: Облечéся Госпóдь в си́лу и препоя́сася. (Пс.92:1Б)
Хор: Госпóдь воцарúся,/ в лéпоту облечéся.
Чтец: И҆́бо утверди́ вселéнную, я́же не подви́жится. (Пс.92:1В)
Хор: Госпóдь воцарúся,/ в лéпоту облечéся.
Чтец: Дóму Твоемý подобáет святы́ня, Гóсподи, в долготý днiй.(Пс.92:2Б)
Хор: Госпóдь воцарúся,/ в лéпоту облечéся.
Чтец: Госпóдь воцари́ся.
Хор: В лéпоту облечéся.
ПАРЕМИИ СВЯТИТЕЛЕЙ
Чтец: Вторáго закóна чтéнiе.
(Из главы 1): Во днех óнех речé Моисéй к сынóм Iзрáилевым: ви́дите, предáх пред лицéм вáшим зéмлю, вшéдше, наслéдуйте зéмлю, éюже кля́тся Госпóдь отцéм вáшим, Авраáму, и Iсаáку, и Iáкову, дáти им и сéмени их по них. И рекóх к вам во врéмя óно, глагóля: не возмогý еди́н води́ти вас. Госпóдь Бог ваш умнóжил вы есть, и се естé днесь, я́ко звéзды небéсныя, мнóжеством. Госпóдь Бог отéц нáших да приложи́т вам, я́ко да бýдете ты́сящами сугýбо, и да благослови́т вас, я́коже глагóла вам. И взях от вас мýжи мýдры, и свéдомы, и смы́слены, и постáвих их владéти над вáми, тысященачáльники, и стоначáльники, и пятьдесятоначáльники, и десятоначáльники, и письмовводи́тели судiя́м вáшим. И заповéдах судiя́м вáшим во врéмя óно, глагóля: разслýшайте посредé брáтiй вáших и суди́те прáведно посредé мýжа, и посредé брáта егó, и посредé пришéльца егó. Да не познáете лицá в судé, мáлому и вели́кому сýдиши и не устыди́шися лицá человéческа, я́ко суд Бóжiй есть.
[Русский синодальный перевод]В те дни сказал Моисей сынам Израилевым: Господь, Бог наш, говорил нам: «Вот, Я даю вам землю сию, пойдите, возьмите в наследие землю, которую Господь с клятвою обещал дать отцам вашим, Аврааму, Исааку и Иакову, им и потомству их». И я сказал вам в то время: не могу один водить вас; Господь, Бог ваш, размножил вас, и вот, вы ныне многочисленны, как звезды небесные; Господь, Бог отцов ваших, да умножит вас в тысячу крат против того, сколько вас теперь, и да благословит вас, как Он говорил вам. И взял я главных из колен ваших, мужей мудрых, разумных и испытанных, и сделал их начальниками над вами, тысяченачальниками, стоначальниками, пятидесятиначальниками, десятиначальниками и надзирателями по коленам вашим. И дал я повеление судьям вашим в то время, говоря: выслушивайте братьев ваших и судите справедливо, как брата с братом, так и пришельца его; не различайте лиц на суде, как малого, так и великого выслушивайте: не бойтесь лица человеческого, ибо суд - дело Божие.(Втор.1:8-11,15-17)
Чтец: Вторáго закóна чтéнiе.
(Из главы 10) Во днех óнех речé Моисéй к сынóм Iзрáилевым: се Гóспода Бóга твоегó нéбо и нéбо небесé, земля́ и вся, ели́ка суть на ней. Обáче отцы́ вáша произвóли Госпóдь люби́ти я́ и избрá сéмя их по них, вас, пáче всех язы́к, в день сей. И обрéжите жестокосéрдiе вáше, и вы́и вáшея не ожесточи́те ктомý. И҆́бо Госпóдь Бог ваш, Сей Бог богóв и Госпóдь господéй, Бог вели́кiй, и крéпкiй, и стрáшный, И҆́же не диви́тся лицý, нижé взéмлет дар. Творя́й суд пришéльцу, и сиротé, и вдовé и лю́бит пришéльца, дáти емý хлеб и ри́зу. И возлюби́те пришéльца, пришéльцы бо бéсте в земли́ Еги́петстей. Гóспода Бóга твоегó да убои́шися, и Томý еди́ному послýжиши, и к Немý прилепи́шися, и И҆́менем Егó кленéшися. Той хвалá твоя́, и Той Бог твой, и́же сотвори́л ти есть вели́кая и слáвная сiя́, я́же ви́десте óчи твои́.
[Русский синодальный перевод]В те дни сказал Моисей сынам Израилевым: вот у Господа, Бога твоего, небо и небеса небес, земля и всё, что на ней; но только отцов твоих принял Господь и возлюбил их, и избрал вас, семя их после них, из всех народов, как ныне видишь. Итак обрежьте крайнюю плоть сердца вашего и не будьте впредь жестоковыйны; ибо Господь, Бог ваш, есть Бог богов и Владыка владык, Бог великий, сильный и страшный, Который не смотрит на лица и не берёт даров, Который дает суд сироте и вдове, и любит пришельца, и дает ему хлеб и одежду. Любите и вы пришельца, ибо сами были пришельцами в земле Египетской. Господа, Бога твоего, бойся и Ему одному служи, и к Нему прилепись и Его именем клянись: Он хвала твоя и Он Бог твой, Который сделал с тобою те великие и страшные дела, какие видели глаза твои.(Втор.10:14-18,20-21)
Чтец: Премýдрости Соломóни чтéнiе.
(Из главы 3) Прáведных дýши в руцé Бóжiей, и не прикóснется их мýка. Непщевáни бы́ша во очесéх безýмных умрéти, и вмени́ся озлоблéнiе исхóд их. И éже от нас шéствiе сокрушéнiе, они́ же суть в ми́ре. И҆́бо пред лицéм человéческим, áще и мýку прiи́мут, уповáнiе их безсмéртiя испóлнено. И в мáле накáзани бы́вше, вели́кими благодéтельствовани бýдут: я́ко Бог искуси́ я́, и обрéте их достóйны Себé. Я́ко злáто в горни́ле искуси́ их: и я́ко всеплóдiе жéртвенное прiя́т я́. И во врéмя посещéнiя их возсiя́ют, и я́ко и́скры по стéблiю потекýт. Сýдят язы́ком и обладáют людьми́, и воцари́тся Госпóдь в них во вéки. Надéющiися Нань разумéют и҆́стину, и вéрнiи в любви́ пребýдут Емý. Я́ко благодáть и ми́лость в преподóбных Егó, и посещéнiе во избрáнных Егó.
[Русский синодальный перевод]Души праведных в руке Божией, и мучение не коснется их. В глазах неразумных они казались умершими, и исход их считался погибелью, и отшествие от нас - уничтожением; но они пребывают в мире. Ибо, хотя они в глазах людей и наказываются, но надежда их полна бессмертия. И немного наказанные, они будут много облагодетельствованы, потому что Бог испытал их и нашел их достойными Его. Он испытал их как золото в горниле и принял их как жертву всесовершенную. Во время воздаяния им они воссияют как искры, бегущие по стеблю. Будут судить племена и владычествовать над народами, а над ними будет Господь царствовать вовеки. Надеющиеся на Него познают истину, и верные в любви пребудут у Него; ибо благодать и милость со святыми Его и промышление об избранных Его. (Прем.3:1-9)
Гóсподи, поми́луй. (40 раз)
Слáва Отцý и Сыну и Святóму Дýху, и ныне и присно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехá сохрани́тися нам./ Благословéн есѝ, Гóсподи Бóже ѻтéц нáших,/ и хвáльно и прослáвлено и҆́мя Твоé во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн есѝ, Гóсподи, научѝ мя оправдáнiем Твои́м./ Благословéн есѝ, Влады́ко, вразумѝ мя оправдáнiем Твои́м./ Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя́ во век, дел рукý Твоéю не прéзри./ Тебé подобáет хвалá. Тебé подобáет пéнiе,/ Тебé слáва подобáет, Ѻтцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
ЛИТИЯ
Стiхúры Трióди, глас 2: Блýднаго глас приношáю Ти, Го́споди:/ согреши́х пред очи́ма Твои́ма Благи́й,/ расточи́х богáтство Твои́х даровáнiй.// Но прiими́ мя кáющася Спáсе, и спаси́ мя.
Глас 8: Ижди́х блýдно/ Оте́ческаго име́нiя богáтство, и расточи́в, пуст бых,/ в странý всели́вся лукáвых грáждан,/ и ктомý не терпя́ с ни́ми сожи́тельства,/ обрáщься вопiю́ Ти ще́дрому Отцý:/ согреши́х на не́бо и пред Тобо́ю,/ и несмь досто́ин нарещи́ся сын Твой./ Сотвори́ мя я́ко еди́наго от нае́мник Твои́х Бо́же,// и поми́луй мя.
Слáва Отцý и Сыну и Святóму Дýху.
Стiхúра святи́телей, глас 6: Святи́тели Хрiстóвы и отце́в слáву,/ столпы́ ве́ры и ве́рных учи́тели и храни́тели,/ соше́дшеся, о празднолю́бцы,/ пе́сненными похвалáми воспои́м, глагóлюще:/ рáдуйся, Церкóвное свети́ло,/ Васи́лiе премýдре, и стóлпе непреврáтный;/ рáдуйся, ýме Небе́сный,/ архiере́ю превеличáйшiй, Богослóве Григóрiе;/ рáдуйся, о Златослóве, всезлаты́й Iоáнне,/ покая́нiя я́сный пропове́дниче./ Но, о отцы́ пребогáтiи!/ Не престáйте при́сно моли́тися Хрiстý/ о ве́рою и любóвiю совершáющих// вáше всесвяще́нное и Боже́ственное торжествó.
И ны́не и прúсно и во вéки векóв, амúнь.
Стiхúра Трióди, глас 4: Я́ко блýдный сын прiидóх и аз Ще́дре,/ житiе́ все ижди́вый во отше́ствiи./ Расточи́х богáтство, е́же дал еси́ мне О́тче:// прiими́ мя кáющася Бóже, и поми́луй мя.
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СТИХИРЫ НА СТИХОВНЕ
Чтец (Стiхúры воскрéсные, глас 2): Воскресéніе Твоé, Хрiстé Спáсе,/ всю просветѝ вселéнную,/ и призвáл есѝ Твоé создáніе,// Всеси́льне Гóсподи, слáва Тебé.
Стiх: Госпóдь воцарúся,/ в лéпоту облечéся.
Дрéвом, Спáсе, упраздни́л есѝ,/ ю́же от дрéва кля́тву,/ держáву смéрти погребéнiем Твои́м умертви́л есѝ,/ просвети́л же есѝ род наш востáнiем Твои́м./ Тéмже вопiéм Тебé:// Животодáвче Хрiстé Бóже наш, слáва Тебé.
Стiх: И҆́бо утвердú вселéнную,/ я́же не подвúжется.
На крестé я́влься, Хрiстé, пригвождáемь,/ измени́л есѝ добрóту здáнiй:/ и безчеловéчiе ýбо вóини показýюще,/ копiéм рéбра Твоя́ прободóша,/ еврéи же печáтати грóба проси́ша,/ Твоея́ влáсти не вéдуще./ Но за милосéрдiе утрóб Твои́х,/ прiéмый погребéнiе, и триднéвен воскресы́й// Гóсподи, слáва Тебé.
Стiх: Дóму Твоемý подобáет святы́ня, Гóсподи,/ в долготý днiй.
Животодáвче Хрiстé, вóлею страсть претерпéвый смéртных рáди,/ во ад же снизшéд я́ко си́лен,/ тáмо Твоегó пришéствiя ожидáющiя,/ исхи́тив я́ко от звéря крéпкаго,/ рай вмéсто áда жи́ти даровáл есѝ./ Тéмже и нам слáвящим триднéвное Твоé востáнiе,/ дáруй очищéнiе грехóв,// и вéлiю ми́лость.
Слáва Отцý и Сыну и Святóму Дýху.
Стiхúра святи́телей, глас тóйже: Днесь дýши земнорóдных вознóсятся от земны́х,/ днесь Небе́сныя бывáют в пáмяти святы́х,/ и́бо вратá Небе́сная взе́млются,/ и нам Влады́чня сказýема бывáют,/ Слóва словесá пропове́дуют,/ и язы́ки чудесá пою́т./ Мы же ко Спáсу возопiе́м:/ слáва Тебе́, Хрiсте́ Бóже,// ве́рным бо мир те́ми бысть.
И ны́не и прúсно и во вéки векóв, амúнь.
Стiхúра Трióди, глас 6 (самоглáсна): Оте́ческаго дáра расточи́в богáтство,/ с безслове́сными скоты́ пасóхся окая́нный,/ и тех желáя пи́щи, глáдом тáях не насыщáяся,/ но возврати́вся к благоутрóбному Отцý,/ взывáю со слезáми:/ прiими́ мя я́ко нае́мника// припáдающа человеколю́бiю Твоемý и спаси́ мя.
Молитва святаго Симеона Богоприимца
Ны́не отпущáеши рабá Твоегó, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоé,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.
Трисвятое по Отче наш
Святы́й Бóже, Святы́й Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнія нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сы́не Бóжiй, поми́луй нас. Ами́нь.
Тропáрь, глас 4: Богорóдице Дéво, рáдуйся,/ Благодáтная Марíе, Госпóдь с Тобóю:/ благословéна Ты в женáх/ и благословéн Плод чрéва Твоегó,// яко Спáса родилá есѝ душ нáших. (Двáжды)
Тропáрь святи́телей, глас 4: Я́ко апóстолов единонрáвнiи,/ и вселéнныя учи́телiе,/ Влады́ку всех моли́те,/ мир вселéнней даровáти,// и душáм нáшим вéлiю ми́лость.
Бýди и҆́мя Госпóдне благословéно от ны́не и до вéка. (Трúжды)
Псалом 33
Благословлю́ Гóспода на вся́кое врéмя,/ вы́ну хвалá Егó во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасé и҆̀./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егó,/ яко несть лишéнiя боя́щымся Егó./ Богáтiи обнищáша и взалкáша,/ взыскáющiи же Гóспода не лишáтся вся́каго блáга.[В приходской практитке пропускается]/Прiиди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнé твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Ѻ́чи Госпóдни на прáведныя,/ и ýши Егó в моли́тву их./ Лицé же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я́ Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Своих,/ и не прегрешáт вси уповáющiи на Негó.
И глаголи ýтреню