Неделя о мытаре и фарисее. Начало Постной Триоди, глас 1. УТРЕНЯ (окончание) Первый час
5 февраля́ 2023 г. Недéля о мытарé и фарiсéе. Начáло Пóстной Трióди. Собóр новомýчеников и исповéдников Цéркви Рýсской. Глас 1. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени (окончанiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Глас 1
Хор: Пресвятáя Богорóдице, спасù нас.
Чтец: Тя, Богорóдице, лéствицу Iáков прорóчески разумевáет:/ Тобóю бо Превозноси́мый на земли́ яви́ся,/ и с человéки поживé, я́ко благоволи́,// Хвáльный отцéв Бог и Препрослáвлен.
Хор: Пресвятáя Богорóдице, спасù нас.
Чтец: Рáдуйся, Чи́стая, из Тебé прóйде Пáстырь,/ И́же во Адáмову кóжу обóлкся вои́стинну Превозноси́мый,/ во всегó мя человéка, за благоутрóбiе непости́жное:// Хвáльный отцéв Бог и Препрослáвлен.
Глас 6
Хор: Помúлуй мя, Бóже, помúлуй мя.
Чтец: Оправда́нiя дéлы возвыша́емый,/ сетьми́ тщесла́вiя лю́те превознесéся фарiсéй, безмéрно хваля́ся:// мыта́рь же ле́гким крило́м смирéнiя вознéсся, Бо́гу прибли́жися.
Хор: Помúлуй мя, Бóже, помúлуй мя.
Чтец: Смирéнiя а́ки лéствицею употреби́вся о́бразом мыта́рь,/ к небéсней высотé возвы́сися:/ горды́нею же гнило́ю и безу́мiем окая́нный вознéсся фарiсéй,// сни́де до а́да преиспо́дняго.
Хор: Помúлуй мя, Бóже, помúлуй мя.
Чтец: Пра́ведных ловя́ у́бо лука́вый,/ образми́ тщесла́вiя кра́дет:/ грéшных же сетьми́ отча́янiя связу́ет.// Но у́бо от обои́х зол мытаря́ ревни́телiе, изба́витися потщи́мся.
Хор: Помúлуй мя, Бóже, помúлуй мя.
Чтец: Моли́твою Бо́гу на́шему припадéм,/ слеза́ми и тéплыми воздыха́нiи,/ подража́юще мытарéво высокотво́рное смирéнiе, пою́ще вéрнiи:// благословéн еси́ Бо́же отéц на́ших.
Глас 6
Хор: Святíи новомýченицы и исповéдницы Цéркве Рýсскiя,/ молúте Бóга о нас.
Чтец: О́троцы в Вавило́не дрéвле, я́ко основа́нiе,/ новому́ченицы же Росси́йстии ны́не, я́ко увенча́нiе,/ с ли́ки страстотéрпец при́сно взыва́ют:// благословéн еси́, Го́споди, Бо́же отéц на́ших.
Хор: Святíи новомýченицы и исповéдницы Цéркве Рýсскiя,/ молúте Бóга о нас.
Чтец: О́троцы в Вавило́не пéщнаго пла́мене не убоя́шася,/ новому́ченицы же Росси́йстии, тем подража́юще,/ гонéнiя безбо́жных в ничто́же вмени́ша,/ тéмже ны́не согла́сно с ни́ми воспева́ют:// благословéн еси́, Го́споди, Бо́же отéц на́ших.
Слáва Ѻтцý и Сы́ну и Святóму Дýху.
Тропáрь: Днесь торжеству́ет Цéрковь Ру́сская,/ святи́и бо новому́ченицы, сро́дницы на́ши,/ к ликостоя́нiем святы́х, от вéка Бо́гу благоугоди́вших, присовокупи́вшеся,/ согла́сно с ни́ми воспева́ют хвалéбную песнь:// благословéн еси́, Бо́же отéц на́ших.
И ны́не и прúсно и во вéки векóв. Амúнь.
Богорóдичен: Предстоя́щи Ти Кресту́ Сы́на Твоего́, Богома́ти,/ ору́жiе про́йде ду́шу Твою́,/ тéмже и попечéнiе сугу́бое о возлюби́вших Его́ прiя́ла еси́,/ и́же Тя сыно́вне велича́ют:// благословéна Ты в жена́х еси́, Всенепоро́чная Влады́чице.
Катавáсiя Срéтенiя (глас 3): Тебé во огни́ ороси́вшаго óтроки богослóвившiя,/ и в Дéву Нетлéнну всéльшагося Бóга Слóва пои́м,/ благочéстно пою́ще:// благословéн Бог отéц нáших.
ПЕСНЬ 8
Iрмóс: В пещи́ óтроцы Iзрáилевы,/ я́коже в горни́ле,/ добрóтою благочéстiя чистéе злáта блещáхуся, глагóлюще:/ благослови́те, вся делá Госпóдня, Гóспода,// пóйте и превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: И҆́же вóлею вся творя́й, и претворя́яй,/ обращáяй сень смéртную в вéчную жизнь,/ стрáстiю Твоéю, Слóве Бóжiй,/ Тебé непрестáнно вся делá Госпóдня,// Гóспода пои́м, и превознóсим во вся вéки.
Хор: Слáва, Гóсподи, Святóму Воскресéнiю Твоемý.
Чтец: Ты разори́л еси́ сокрушéнiе, Хрiстé, и окая́нство,/ во вратéх и тверды́нях áдовых,/ воскрéс из грóба триднéвен./ Тебé непрестáнно вся делá, я́ко Гóспода, пою́т,// и превознóсят во вся вéки.
Хор: Пресвятáя Богорóдице, спасú нас.
Богорóдичен: Я́же без сéмене и преестéственне от облистáнiя Божéственнаго/ Рóждшую би́сера многоцéннаго Хрiстá, воспои́м глагóлюще:/ благослови́те вся делá Госпóдня, Гóспода,// пóйте и превозноси́те Егó во вся вéки.
Глас 1
Хор: Пресвятáя Богорóдице, спасú нас.
Чтец: Чертóг светови́дный, из негóже всех Влады́ка,/ я́ко Жени́х произы́де Хрiстóс,/ воспои́м вси вопiю́ще:/ вся делá Госпóдня, Гóспода пóйте,// и превозноси́те во вся вéки.
Хор: Пресвятáя Богорóдице, спасú нас.
Чтец: Рáдуйся, Престóле слáвный Бóжiй,/ рáдуйся, вéрных стенó,/ Éюже сýщим во тьме возсiя́ свет Хрiстóс,/ Тебé блажáщим, и вопiю́щим:/ вся делá Госпóдня, Гóспода пóйте,// и превозноси́те во вся вéки.
Глас 6
Хор: Помúлуй мя, Бóже, помúлуй мя.
Чтец: Смиренному́дренным нрáвом/ ми́лостива Го́спода мытáрь воздохну́в обрéте, и спасéн бысть:/ о́бразом же лю́тым язы́ка велерéчиваго,// прáвды отпадé фарiсéй.
Хор: Помúлуй мя, Бóже, помúлуй мя.
Чтец: Фарiсéева кичéнiя произволéнiя,/ и именовáнiя чистоты́, бежи́м вéрнiи:/ ревну́юще мытарéву до́бре// поми́лованному смирéнiю и нрáву.
Хор: Помúлуй мя, Бóже, помúлуй мя.
Чтец: Глáсы мытарéвы вéрнiи вещáим в цéркви святéй:/ Бо́же очи́сти, да с ним улучи́м прощéнiе,// пáгубы велехвáльнаго избáвльшеся фарiсéя.
Хор: Помúлуй мя, Бóже, помúлуй мя.
Чтец: Воздыхáнiю мытарéву вси поревну́им,/ и Бо́гу бесéдующе, тéплыми слéзами возопiи́м Ему́:/ Человеколю́бче, согреши́хом,// благоутро́бне Щéдрый, очи́сти и спаси́.
Глас 6
Хор: Святíи новомýченицы и исповéдницы Цéркве Рýсскiя,/ молúте Бóга о нас.
Чтец: Зако́ны Хрiсто́вы возлюби́ша новому́ченицы и исповéдницы Росси́йстии,/ безбо́жная же повелéнiя отри́нуша/ и, рéвностiю о Бо́зе связу́емiи,/ Бо́гу побéдную песнь воспевáху:// да благослови́т Го́спода Русь Святáя и превозно́сит Его́ во вéки.
Хор: Святíи новомýченицы и исповéдницы Цéркве Рýсскiя,/ молúте Бóга о нас.
Чтец: Егдá земля́ Росси́йская тьмо́ю безбо́жiя и Кáiновым озлоблéнiем объя́та бысть,/ тогдá мно́зи хрiстолюби́вiи лю́дiе на го́рькiя рабо́ты изгнáни бы́ша/ и глад, мраз, зной и смерть лю́тую му́жественне претерпéша,/ вéрою же, надéждею и любо́вiю совоку́плени,/ досто́йную воспевáху песнь:// да благослови́т Го́спода Русь Святáя и превозно́сит Его́ во вéки.
Благословúм Отцá, и Сы́на, и Святáго Дýха, Гóспода.
Тропáрь: А́нгелов хвалу́ и новому́чеников славосло́вiе ми́лостивно прiéмляй,/ не отри́ни, Трiипостáсный Бо́же, от со́нма их и нас, недосто́йных,/ но сподо́би вку́пе с ни́ми воспевáти:// да благослови́т Го́спода Русь Святáя и превозно́сит Его́ во вéки.
И ны́не и прúсно и во вéки векóв. Амúнь.
Богорóдичен: Зря́щи поругáнiе святáго удéла Своего́,/ скорбя́ше Пречи́стая Мáти и держáвную по́мощь вéрным лю́дем простирáше,/ Сы́на же Своего́ усéрдно моля́ше, взывáющи:// да благослови́т Го́спода Русь Святáя и превозно́сит Его́ во вéки.
Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя Срéтенiя (глас 3): Нестерпи́мому огню́ соедини́вшеся,/ Богочéстiя предстоя́ще, ю́ноши,/ плáменем же невреждéни,/ Божéственную песнь поя́ху:/ благослови́те, вся делá Госпóдня, Гóспода// и превозноси́те во вся вéки.
Возглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Ѻ́браз чи́стаго рождествá Твоегó,/ огнепали́мая купинá/ показá неопáльная;/ и ны́не на нас/ напáстей свирéпеющую угаси́ти, мóлимся, пещь,/ да Тя, Богорóдице,// непрестáнно величáем.
Хор: Слáва, Гóсподи, Святóму Воскресéнiю Твоемý.
Чтец: О кáко, лю́дiе беззакóннiи и непокори́вiи,/ лукáвая совещáвше,/ гóрдаго и нечести́ваго оправди́ша:/ Прáведнаго же на дрéве осуди́ша Гóспода слáвы,// Егóже достóйно величáем!
Хор: Слáва, Гóсподи, Святóму Воскресéнiю Твоемý.
Чтец: Спáсе Áгнче Непорóчне,/ И҆́же мíра грехи́ взéмый,/ Тебé слáвим воскрéсшаго триднéвно,/ со Отцéм и Божéственным Твои́м Дýхом,/ и Гóспода слáвы:// Егóже богослóвяще, величáем.
Хор: Пресвятáя Богорóдице, спасú нас.
Богорóдичен: Спаси́ лю́ди Твоя́, Гóсподи,/ и҆́хже стяжáл еси́ честнóю Твоéю крóвiю,/ цéрквам Твои́м подая́ мир, Человеколю́бче,// Богорóдицы моли́твами.
Глас 1
Хор: Пресвятáя Богорóдице, спасú нас.
Чтец: Из кóрене Давíдова прозяблá еси́ прорóческаго, Дéво, и богоотéческаго:/ но и Давíда я́ко вои́стинну Ты прослáвила еси́,/ я́ко рóждши прорóчествованнаго Гóспода слáвы:// Егóже достóйно величáем.
Хор: Пресвятáя Богорóдице, спасú нас.
Чтец: Всяк похвáльный, Пречи́стая, закóн/ побеждáется вели́чеством слáвы Твоея́./ Но о, Влады́чице, от раб Твои́х недостóйных,/ от любвé Тебé приноси́мое прiими́, Богорóдице,// со усéрдiем пéнiе похвáльное.
Глас 6
Хор: Помúлуй мя, Бóже, помúлуй мя.
Чтец: Путь возноше́ния смире́ние,/ от Христа́ взе́мше спасе́ния о́браз,/ мытаре́ву обы́чаю поревну́им,/ киче́ние возноше́ния дале́че отмета́юще,// нра́вом же смиренному́дрия Бо́га умоля́юще.
Хор: Помúлуй мя, Бóже, помúлуй мя.
Чтец: Душе́вную горды́ню отве́ржим,/ нрав пра́вый смиренному́дрия стя́жим,/ себе́ оправда́ти не тщи́мся,/ тщесла́вия киче́ние возненави́дим,// и с мытаре́м Бо́га умо́лим.
Хор: Помúлуй мя, Бóже, помúлуй мя.
Чтец: Моли́твы Соде́телю ми́лости принесе́м мыта́рския,/ фарисе́йских отвраща́ющеся неблагода́рных моли́тв, и велехва́льных гласо́в,/ и́же на бли́жняго суд возво́дят,// да Бо́га ми́лостива и свет привлече́м.
Хор: Помúлуй мя, Бóже, помúлуй мя.
Чтец: Мно́гим прегреше́ний собра́нием отягче́н,/ изоби́лием зло́бы мытаря́ преидо́х,/ и фарисе́ево велехва́льное киче́ние притяжа́х,/ отвсю́ду пуст всех быв благи́х:// Го́споди, пощади́ мя.
Глас 6
Хор: Святíи новомýченицы и исповéдницы Цéркве Рýсскiя,/ молúте Бóга о нас.
Чтец: Безсме́ртныя трапе́зы и жи́зни ве́чныя во Ца́рствии Бо́жием/ наслажда́ются ны́не новому́ченицы и испове́дницы Росси́йстии,/ испо́лнися бо на них обетова́ние Госпо́дне:// побежда́ющим дам се́сти со Мно́ю на Престо́ле Мое́м.
Хор: Святíи новомýченицы и исповéдницы Цéркве Рýсскiя,/ молúте Бóга о нас.
Чтец: Да просла́вятся с ли́ки новому́чеников и испове́дников Росси́йских жены́ богому́дрыя земли́ на́шея,/ я́же, мироно́сиц восприе́мша чин и му́жески Христу́ после́довавша,/ страда́ния за и́мя Его́ претерпе́ша/ и ве́рно отце́м, муже́м и бра́тиям на́шим, Христа́ ра́ди му́чимым, послужи́ша./ Сего́ ра́ди ны́не в жи́зни ве́чней вку́пе с ни́ми// трапе́зы безсме́ртныя наслажда́ются.
Слáва Ѻтцý и Сы́ну и Святóму Дýху.
Тропáрь: Жизнода́вче Го́споди,/ моли́твами новому́чеников и испове́дников Росси́йских/ упоко́й со все́ми пра́ведными ве́рныя рабы́ Твоя́, за и́мя Твое́ пострада́вшия:/ святи́тели и иере́и, мона́хи и мирски́я,/ ста́рыя, ю́ныя и всяк во́зраст, имену́емыя и неимену́емыя,// я́ко и́стинныя сы́ны и дру́ги Бо́жия.
И ны́не и прúсно и во вéки векóв. Амúнь.
Богорóдичен: Я́ко взбра́нная Воево́да во́инства новому́чеников и испове́дников Росси́йских,/ держа́вный покро́в и ми́лостивное заступле́ние яви́ла еси́, Пресвята́я Де́во, земли́ на́шей,/ опустоша́емей ско́рбными и безбо́жными наведе́нии./ Сего́ ра́ди ны́не мо́лим Тя:// прости́ лю́ди согре́шшия и сохрани́ Святу́ю Русь.
Катавáсiя Срéтенiя (глас 3): В закóне сéни и писáнiй/ óбраз ви́дим, вéрнiи:/ всяк мýжескiй пол, ложеснá разверзáя, свят Бóгу./ Тем перворождéнное Слóво,/ Отцá Безначáльна,/ Сы́на Первородя́щася Мáтерiю неискусомýжно,// величáем.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостiлáрiй воскрéсный пéрвый: Со ученики́ взы́дем на гóру Галiлéйскую,/ вéрою Хрiстá ви́дети/ глагóлюща власть прiя́ти вы́шних и ни́жних, научи́мся:/ кáко учи́т крещáти во и҆́мя Отцá, и Сы́на, и Святáго Дýха, язы́ки вся,// и пребывáти с таи́нники, я́коже обещáся, до скончáнiя вéка.
Слáва Ѻтцý и Сы́ну и Святóму Дýху.
Светúлен новомýчеников: Я́ко отре́бие ми́ру бы́ша святи́и новому́ченицы и испове́дницы Росси́йстии,/ ка́мением побие́ни бы́ша, претре́ни бы́ша,/ искуше́ни бы́ша, уби́йством меча́ умро́ша,// свиде́тельствующе о Све́те И́стиннем, Иису́се Христе́, Го́споде на́шем.
И ны́не и прúсно и во вéки векóв. Амúнь.
Светúлен Трióди, глас 1: Высокоре́чия убежи́м фарисе́ева зле́йшаго,/ смире́нию же навы́кнем мытаре́ву изря́днейшему,/ да вознесе́мся вопию́ще к Бо́гу со о́нем:/ очи́сти рабы́ Твоя́,/ роди́выйся от Де́вы Христе́ Спа́се во́лею,/ и Крест претерпе́вый,// совоздви́гнувый мир Твои́м Боже́ственным могу́тством.
ХВАЛИТНЫ
Хор, глас 1: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéние положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 1: Поéм Твою́, Хрїстé, спаси́тельную страсть,// и слáвим Твоé Воскресéнiе.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Крест претерпéвый, и смерть упраздни́вый,/ и воскресы́й из мéртвых,/ умири́ нáшу жизнь, Гóсподи,// я́ко еди́н Всеси́лен.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Áда плени́вый, и человéка воскреси́вый,/ Воскресéнiем Твои́м, Хрiстé,/ сподóби нас чи́стым сéрдцем// Тебé пéти и слáвити.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Боголéпное Твоé снисхождéнiе слáвяще,/ поéм Тя, Хрїстé./ Роди́лся еси́ от Дéвы,/ и не разлучéн был еси́ от Отцá,/ пострадáл еси́, я́ко человéк,/ и вóлею претерпéл еси́ Крест,/ воскрéсл еси́ от грóба, я́ко от чертóга произшéд,/ да спасéши мiр,// Гóсподи слáва Тебé.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúры новомýчеников, глас 8: О, пресла́внаго чудесе́!/ В после́дняя времена́ возсiява́ют му́ченицы/ и пре́лести мрак отгоня́ют,/ ве́ра хрiстiа́нская ны́не возвыша́ется/ и па́дает нече́стiе,/ ра́дуются ве́рнiи/ и пра́здник новоявле́нным составля́ют,/ вопию́ще Хрїсту́ Бо́гу:// му́чеников похвала́ и побе́да Ты еси́, Всеси́льне.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Ве́ры броня́ми,/ и щито́м благода́ти,/ и креста́ копiе́м вооружи́вшеся,/ сопроти́вным си́лам непобеди́ми бы́сте/ и, я́ко Боже́ственнiи храбо́рницы,/ де́монская ополче́нiя победи́вше,/ со А́нгелы лику́ете,/ ве́рныя же заступа́ете, и освяща́ете,// и спаса́ете, призыва́емии.
Гóсподи, Госпóдь наш,/ я́ко чýдно úмя Твоé по всей землú. (Пс.8:2А)
Стiхира: О, пресла́внаго чудесе́!/ Чуде́с светлостьми́/ со́лнца светле́йше/ при́сно святи́и сро́дницы на́ши/ све́тят конце́м Ру́сскiя земли́,/ от невече́рняго Све́та облиста́еми,/ и́хже сiя́нiи/ о́блацы от страны́ на́шея отгоня́ются ва́рварстiи// и де́мони побежда́ются.
Святы́м, úже суть на землú Егó,/ удивú Госпóдь вся хотéнiя Своя́ в них. (Пс.15:3)
Глас 6: Новоявле́нныя зве́зды днесь/ на церко́вней показа́шася тве́рди,/ во мно́зех ме́стех бы́вшии му́ченицы Хрїсто́вы,/ и́хже ублажа́юще, мучениколю́бцы,/ по до́лгу им прирце́м, глаго́люще:/ ра́дуйтеся, благоче́стiя утвержде́нiе и нече́стiя обузда́нiе;/ ра́дуйтеся, Росси́йскiя Це́ркве сла́во и безбо́жных посрамле́ние;/ ра́дуйтеся, о́брази терпе́ния и за Хрїста́ страда́нiя./ Ста́ните, непобеди́мiи, посреде́ нас у́мне,/ от бед и искуше́нiй избавля́юще,// и моли́теся о спасе́нiи душ на́ших.
Слáва Ѻтцý и Сы́ну и Святóму Дýху.
Стiхúра Трióди, глас 8: От дел похвале́ньми,/ фарiсе́я оправда́юща себе́ осуди́л еси́ Го́споди,/ и мытаря́ смири́вшася,/ и воздыха́ньми очище́нiя прося́ща оправда́л еси́:/ не внима́еши бо велему́дренным помысло́м,/ и сокруше́нная сердца́ не уничижа́еши./ Те́мже и мы Тебе́ припа́даем во смире́нiи,/ пострада́вшему нас ра́ди:// пода́ждь оставле́нiе и ве́лiю ми́лость.
И ны́не и прúсно и во вéки векóв. Амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебé.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстé, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 1: Днесь Спасéнiе мíру бысть,/ поéм Воскрéсшему из грóба,/ и Начáльнику жи́зни нáшея:/ разруши́в бо смéртiю смерть,// побéду дадé нам и вéлiю ми́лость.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Гóсподи поми́луй (12раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных хрiстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
ОТПУСТ
Гóсподи, Iисýсе Хрїстé, Сыне Бóжiй, моли́твами пречи́стыя Своея́ Мáтере, святы́х слáвных и всехвáльных Апóстол, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Стiхúра евáнгельская пéрвая, глас 1: На гóру ученикóм идýщим за земнóе вознесéнiе,/ предстá Госпóдь, и поклони́вшеся Емý,/ и дáнныя влáсти вездé научи́вшеся,/ в поднебéсную посылáхуся/ проповéдати éже из мéртвых воскресéнiе,/ и éже на небесá возшéствiе:/ и҆́мже и во вéки спребывáти нелóжный обещáся Хрїстóс Бог,/ и Спас душ нáших.
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 1: Кáмени запечáтану от iудéй и вóином стрегýщим Пречи́стое Тéло Твоé, воскрéсл еси триднéвный, Спáсе, дáруяй мíрови жизнь. Сегó рáди си́лы небéсныя вопiя́ху Ти, Жизнодáвче: слáва Воскресéнiю Твоемý, Хрїстé, слáва Цáрствiю Твоемý, слáва смотрéнiю Твоемý, еди́не Человеколю́бче.
Слáва Отцý и Сы́ну и Святóму Дýху.
Тропáрь новомýчеников, глас 4: Днесь рáдостно ликýет Цéрковь Рýсская, прославля́ющи новомýченики и исповéдники своя́: святи́тели и iерéи, цáрственныя страстотéрпцы, благовéрныя кня́зи и княги́ни, преподóбныя мýжи и жены́ и вся правослáвныя хрiстiáны, во дни гонéнiя безбóжнаго жизнь свою́ за вéру во Хрiстá положи́вшiя и кровьми́ и́стину соблю́дшiя. Тех предстáтельством, долготерпели́ве Гóсподи, странý нáшу в Правослáвiи сохрани́ до скончáнiя вéка.
И ны́не и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сыне Бóжїй, поми́луй нас. Ами́нь.
КОНДАК
Кондáк воскрéсный, глас 1: Воскрéсл еси́, я́ко Бог, из грóба во слáве, и мiр совоскреси́л есѝ; и естествó человéческое я́ко Бóга воспевáет Тя, и смерть исчезé; Адáм же ликýет, Влады́ко; Éва ны́не от уз избавля́ема рáдуется, зовýщи: Ты есѝ, И҆́же всем подая́, Хрїстé, воскресéнiе.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстé, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 раза)
Гóсподи, благословᴎ́.
Гóсподи, Iисýсе Хрїстé, Сыне Бóжїй, моли́твами пречи́стыя Своея́ Мáтере, святы́х слáвных и всехвáльных Апóстол, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу