Неделя о мытаре и фарисее. Начало Постной Триоди, глас 1. УТРЕНЯ.КАНОН Собор новомуч. Церкви Русской
5 февраля́ 2023 г. Недéля о мытарé и фарiсéе. Начáло Пóстной Трióди. Собóр новомýчеников и исповéдников Цéркви Рýсской. Глас 1. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени (канóн)
начало здесь ( великая вечéрня) и здесь ( утреня)
ВЕЛИЧАНИЕ НОВОМУЧЕННИКОВ ЦЕРКВИ РУССКОЙ
Хор: Величáем вас,/ святíи новомýченицы и исповéдницы Россíйстiи,/ и чтим честнáя страдáнiя вáша,/ я́же за Хрїстá// претерпéли естé.
(И далее хор продолжает чередовать стiхи Избранного псалма и Величанiе)
ПСАЛОМ ИЗБРАННЫЙ
Бог нам прибéжище и си́ла./ Помóщник в скóрбех обрéтших ны зелó:/ Сегó рáди не убои́мся, внегдá смущáется земля́./ Бóже, кто уподóбится Тебé: да не премолчи́ши, нижé укроти́ши Бóже./ Я́ко се врази́ Твои́ возшумéша, и ненави́дящiи тя воздвигóша главý:/ На лю́ди Твоя́ лукáвноваша вóлею, и совещáша на святы́я Твоя./ Положи́ша трýпiя рабóв Твои́х брáшно пти́цам небéсным:/ Плóти преподóбных Твои́х зверéм земны́м./ Пролiя́ша кровь их я́ко вóду./ Я́ко Тебé рáди умерщвля́еми есмы́ весь день./ Вмени́хомся я́ко óвцы заколéнiя./ Положи́л еси́ нас в при́тчу во язы́цех./ И бых я́звен весь день./ Разжéгл еси́ ны, я́коже разжизáется сребрó./ Проидóхом сквозé огнь и вóду, и извéл еси́ нас в покóй./ Весели́теся о Гóсподе, и рáдуйтеся прáведнiи./ Я́ко Госпóдь в рóде прáведных:/ И наслéдiе их в век бýдет./ Воззвáша прáведнiи, и Госпóдь услы́ша их./ Свет возсiя́ прáведнику, и прáвым сéрдцем весéлiе./ В пáмять вéчную бýдет прáведник./ Святы́м, и́же суть на земли́ егó, удиви́ Госпóдь вся хотéнiя Своя́ в них./ Ди́вен Бог во святы́х Свои́х./ Прáведник, я́ко фíнiкс, процветéт, я́ко кедр, и҆́же в Лiвáне, умнóжится./ Возвесели́тся прáведник о Гóсподе, и уповáет на Негó.// И похвáлятся вси прáвiи сéрдцем.
(При пенiи избранного псалма в воскресные дни заключительное «Слава, и ныне» и «Аллилуiя» не поется. Сразу после последнего стiха избранного псалма - величанiе и тропари воскресные «Ангельскiй собор...»)
Хор: Величáем вас,/ святíи новомýченицы и исповéдницы Россíйстiи,/ и чтим честнáя страдáнiя вáша,/ я́же за Хрїстá// претерпéли естé.
ТРОПАРИ ВОСКРЕСНЫЕ, ГЛАС 5
Благословéн есú, Гóсподи,/научú мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есú, Гóсподи,/научú мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел миронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есú, Гóсподи,/научú мя оправдáнiем Твоúм.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есú, Гóсподи,/научú мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебé Бóже. (3 раза)
Гóсподи, поми́луй. (3 раз)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоú воскрéсны, глас 1: Разбóйничо покая́нiе рай окрáде,/ плачь же мvронóсиц рáдость возвести́,/ я́ко воскрéсл еси́, Хрїстé Бóже,// подая́й мíрови вéлiю ми́лость.
СЕДАЛЬНЫ ПО ПОЛИЕЛЕИ
Глас 4 (по 1‑м стiхослóвiи): Новомýченицы Россíйстии,/ крóвiю своéю вéру запечатлéвшiи,/ Влады́ку всех моли́те/ Цéрковь Рýсскую в Правослáвiи утверди́ти,/ зéмлю нáшу от скверн очи́стити,/ лю́ди во благочéстiи сохрани́ти// во óбщее всех спасéнiе.
Глас 4 (по 2‑м стiхослóвiи): И́же в земли́ Россíйстей новомýченик и исповéдник Твои́х,/ я́ко багряни́цею и ви́ссом,/ кровьми́ Цéрковь Рýсская украси́вшися, Хрїстé Бóже, тéми вопiéт Ти:/ лю́дем щедрóты Твоя́ низпосли́,/ мир жи́тельству Твоемý дáруй// и душáм нáшим вéлiю ми́лость.
Слáва Отцý и Сыну и Святóму Дýху.
Седáлен новомýчеников по полiелéе, глас 6: Мужáйся, Хрiстóва Цéрковь,/ и держáвствуй над всýе борю́щими,/ Хрїстóви бо дрýзи о тебé пекýтся,/ и предстоя́ще, и обстоя́ще,/ ихже óбщiй прáздник// ны́не совершáеши свéтло.
И ныне и прúсно и во вéки векóв. Амúнь.
Богорóдичен из Минéи, глас 8: Я́ко Дéву и Еди́ну в женáх,/ Тя безсéменно рóждшую Бóга плóтiю,/ вси ублажáем, рóди человéчестiи:/ огнь бо всели́ся в Тя Божествá,/ и я́ко Млáденца, дои́ши Зижди́теля и Гóспода./ Тем áнгельскiй и человéческiй род,/ достóйно слáвим Пресвятóе Рождествó Твоé/ и соглáсно вопiéм Ти:/ моли́ Хрїстá Бóга согрешéнiй оставлéнiе даровáти// покланя́ющимся вéрою Пресвятóму Рождествý Твоемý.
СТЕПЕННА, ГЛАС 1
1 АНТИФОН
Хор: Внегдá скорбéти ми, услы́ши моя́ болéзни,// Гóсподи, Тебé зовý. (Двáжды)
Пусты́нным непрестáнное Божéственное желáнiе бывáет,// мíра сýщим сýетнаго кромé. (Двáжды)
Слáва Отцý и Сы́ну и Святóму Дýху.
Святóму Дýху честь и слáва,/ я́коже Отцý подобáет, кýпно же и Сы́ну,// сегó рáди да поéм Трóице Единодержáвiе.
И ны́не и прúсно и во вéки векóв. Амúнь.
Святóму Дýху честь и слáва,/ я́коже Отцý подобáет, кýпно же и Сы́ну,// сегó рáди да поéм Трóице Единодержáвiе.
2 АНТИФОН
На гóры Твоúх вознéсл есú мя закóнов,// добродéтельми просветú, Бóже, да пою́ Тя. (Двáжды)
Деснóю Твоéю рукóю прiи́м Ты, Слóве,/ сохрани́ мя, соблюди́,// да не огнь менé опали́т грехóвный. (Двáжды)
Слáва Отцý и Сы́ну и Святóму Дýху.
Святы́м Дýхом вся́кая тварь обновля́ется,/ пáки текýщи на пéрвое,// равномóщен бо есть Отцý и Слóву.
И ны́не и прúсно и во вéки векóв. Амúнь.
Святы́м Дýхом вся́кая тварь обновля́ется,/ пáки текýщи на пéрвое,// равномóщен бо есть Отцý и Слóву.
3 АНТИФОН
О рéкших мне, внúдем во дворы́ Госпóдни,// возвеселúся мой дух, срáдуется сéрдце. (Двáжды)
В домý Дави́дове страх вели́к:/ тáмо бо престóлом постáвленным,// сýдятся вся племенá земнáя, и язы́цы. (Двáжды)
Слáва Отцý и Сы́ну и Святóму Дýху.
Святóму Дýху, честь, поклонéнiе, слáву и держáву,/ я́коже Отцý достóит, и Сы́нови подобáет приноси́ти:// Еди́ница бо есть Трóица Естествóм, но не Ли́цы.
И ны́не и прúсно и во вéки векóв. Амúнь.
Святóму Дýху, честь, поклонéнiе, слáву и держáву,/ я́коже Отцý достóит, и Сы́нови подобáет приноси́ти:// Еди́ница бо есть Трóица Естествóм, но не Ли́цы.
ПРОКИМЕН
Чтец: Прокíмен, глас пéрвый, псалóм Давíдов. Ны́не воскреснý, глагóлет Госпóдь, положýся во Спасéнiе, не обиню́ся о нем. (Пс.11:6Б)
Хор: Ны́не воскреснý, глагóлет Госпóдь,/ положýся во Спасéнiе, не обиню́ся о нем.
Чтец: Словесá Госпóдня, словесá чи́ста.(Пс.11:7А)
Хор: Ны́не воскреснý, глагóлет Госпóдь,/ положýся во Спасéнiе, не обиню́ся о нем.
Чтец: Ны́не воскреснý, глагóлет Госпóдь.
Хор: Положýся во Спасéнiе, не обиню́ся о нем.
Чтец: Гóсподу помóлимся.
Хор: Гóсподи, помúлуй.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
От Матфéя Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Мф.зач.116): Во врéмя óно, единiинáдесять ученицы́ идóша в Галiлéю, в гóру, áможе повелé им Iисýс: И ви́девше Егó, поклони́шася Емý: óви же усумнéшася. И пристýпль Iисýс, речé им, глагóля: дадéся Ми вся́ка власть на небеси́ и на земли́: Шéдше научи́те вся язы́ки, крестя́ще их во и҆́мя Отцá, и Сына, и Святáго Духа, учáще их блюсти́ вся, ели́ка заповéдах вам. И се, Аз с вáми есмь во вся дни, до скончáнiя вéка. Ами́нь.
[Русский синодальный перевод]В то время одиннадцать учеников пошли в Галилею, на гору, куда повелел им Иисус, и, увидев Его, поклонились Ему, а иные усомнились. И приблизившись Иисус сказал им: дана Мне всякая власть на небе и на земле. Итак идите, научите все народы, крестя их во имя Отца и Сына и Святого Духа, уча их соблюдать всё, что Я повелел вам; и вот, Я с вами во все дни до скончания века. Аминь.(Мф.28:16-20)
Хор: Слáва Тебé, Гóсподи, слáва Тебé.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
Глас 8 (Трióди): Покая́нiя отвéрзи ми двéри Жизнодáвче,/ ýтренюет бо дух мой ко хрáму святóму Твоемý,/ храм нося́й телéсный весь осквернéн:/ но я́ко щедр, очи́сти// благоутрóбною Твоéю ми́лостiю.
И҆ ны́не и прúсно и во вéки векóв. Амúнь.
Богорóдичен (Трióди): На спасéнiя стези́ настáви мя Богорóдице,/ стýдными бо окаля́х дýшу грехми́,/ и в лéности все житié моé ижди́х:/ но Твои́ми моли́твами/ избáви мя от вся́кiя нечистоты́.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра (Трióди), глас 6: Мнóжества содéянных мнóю лю́тых, помышля́я окая́нный,/ трепéщу стрáшнаго дне сýднаго:/ но надéяся на ми́лость благоутрóбiя Твоегó,/ я́ко Давíд вопiю́ Ти:/ поми́луй мя Бóже// по вели́цей Твоéй ми́лости.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 1
(совмещенный с канóном Богорóдицы, глас 1; канóном Трióди, глас 6 и канóном новомученников, глас 6)
ПЕСНЬ 1
Iрмóс: Твоя́ победи́тельная десни́ца/ Боголéпно в крéпости прослáвися:/ та бо, Безсмéртне,/ я́ко всемогýщая, проти́вныя сотрé,// Iзрáильтяном путь глубины́ новосодéлавшая.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): И҆́же рукáма пречи́стыма от пéрсти/ богодéтельне испéрва создáв мя,/ рýце распростéрл еси́ на крестé,/ от земли́ взывáя тлéнное моé тéло,// éже от Дéвы прiя́л еси́.
Хор: Слáва, Гóсподи, Святóму Воскресéнiю Твоемý.
Чтец: Умерщвлéнiе подъя́л еси́ менé рáди,/ и дýшу смéрти прéдал еси́,/ И҆́же вдохновéнiем божéственным дýшу ми вложи́вый,/ и отреши́в вéчных уз, и совоскреси́в// нетлéнiем прослáвил еси́.
Хор: Пресвятáя Богорóдице, спасù нас.
Богорóдичен: Рáдуйся, благодáти истóчниче,/ рáдуйся лéствице, и двéре небéсная,/ рáдуйся свéщнице, и рýчко златáя, и горó несекóмая,// Я́же Жизнодáвца Хрїстá мíрови рóждшая.
Канон Богородицы, глас 1
Хор: Пресвятáя Богорóдице, спасù нас.
Чтец: Кýю Ти достóйную песнь нáше принесéт неможéнiе?/ тóчiю обрáдовательную,/ éйже нас Гаврiи́л тáйно научи́л есть:// рáдуйся, Богорóдице Дéво, Мáти Неневéстная.
Хор: Пресвятáя Богорóдице, спасù нас.
Чтец: Приснодéве и Мáтери Царя́ вы́шних сил,/ от чистéйша сéрдца, вéрнiи, духóвне возопiи́м:// рáдуйся, Богорóдице Дéво, Мáти Неневéстная.
Канон постной Триоди, глас 6
Хор: Помúлуй мя, Бóже, помúлуй мя.
Чтец: При́тчами вводя́й вся Хрiстóс,/ к житiя́ исправлéнiю,/ мытаря́ возвышáет от смирéнiя,// показáв фарiсéя возвышéнiем смиря́ема.
Хор: Помúлуй мя, Бóже, помúлуй мя.
Чтец: От смирéнiя честь высокотворя́щую,/ от возношéнiя же падéнiе ви́дя лю́тое,/ мытарéвым ревнýй дóбрым,// и фарiсéйскую злóбу возненави́ждь.
Хор: Помúлуй мя, Бóже, помúлуй мя.
Чтец: От возношéнiя испражня́ется вся́кое благóе,/ от смирéнiя же потребля́ется вся́кое злóе:/ éже облобызáим вéрнiи,// гнушáющеся я́ве óбраза тщеслáвнаго.
Хор: Помúлуй мя, Бóже, помúлуй мя.
Чтец: Смиренномýдрым бы́ти Свои́м ученикóм хотя́ всех Царь,/ наказýя учáше ревновáти// мытарéву воздыхáнiю и смирéнiю.
Канон новомученников, глас 6
Хор: Святíи новомýченицы и исповéдницы Цéркве Рýсскiя,/ молúте Бóга о нас.
Чтец: Гóсподи, Бóже наш, при́сно прославля́яй вся святы́я,/ ны́не и нас, недостóйных, сподóби сынóвне прослáвити святы́х срóдников нáших,// новомýчеников и исповéдников Россíйских.
Хор: Святíи новомýченицы и исповéдницы Цéркве Рýсскiя,/ молúте Бóга о нас.
Чтец: Кровьми вáшими, священномýченицы, я́ко в Чермнéм мóри, потопи́ли естé безбóжныя мучи́тели,/ Цéрковь же Рýсская, вáми крася́щися,// похвалы́ побéдныя, я́ко земля́ обетовáнная мед и млекó, вам источáет.
Слáва Ѻтцý и Сы́ну и Святóму Дýху.
Тропáрь: Егдá дадéся вам благодáть не тóчiю во Хрїстá вéровати,/ но и по Нем страдáти,/ немóкренно пучи́ну крóвных мук проидóсте, святíи мýченицы,/ вéрным сыновóм россíйским óбраз я́вльше,// и со дерзновéнным исповéданiем во вратá Небéсная внидóсте.
И ны́не и прúсно и во вéки векóв. Амúнь.
Богорóдичен: Прiими́ песнь хвалéбную, от недостóйных уст возноси́мую,// препрослáвленная Мáти Бóжiя.
Катавáсiя Срéтенiя (глас 3): Сýшу глубороди́тельную зéмлю/ сóлнце нашéствова иногдá:/ я́ко стенá бо, огустé обапóлы водá/ лю́дем пешомореходя́щим и Богоугóдно пою́щим:// пои́м, Гóсподеви, слáвно бо прослáвися.
ПЕСНЬ 3
Iрмóс: Еди́не вéдый человéческаго существá нéмощь/ и ми́лостивно в не вообрáжся,/ препоя́ши мя с высоты́ си́лою,/ éже вопи́ти Тебé, Святы́й,/ одушевлéнный хрáме// неизречéнныя слáвы Твоея́, Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Бог Сый мне, Блáже, пáдшаго ущéдрил еси́,/ и сни́ти ко мне благоволи́в, вознéсл мя еси́ распя́тiем,/ éже вопи́ти Тебé, Святы́й:// Хрáме одушевлéнный неизречéнныя Твоея́ слáвы, Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Живóт ипостáсный Хрїстé сый,/ в истлéвша мя, я́ко Милосéрдый Бог, обóлкся,/ в персть смéртную сошéд, Влады́ко,/ смéртную держáву разруши́л еси́,/ и мертв триднéвен воскрéс,// в нетлéнiе мя облéкл еси́.
Хор: Пресвятáя Богорóдице, спасù нас.
Богорóдичен: Бóга зачéнши во чрéве, Дéво, Дýхом Пресвяты́м,/ пребылá еси́ неопали́ма,/ понéже Тя купинá законополóжнику Моисéю,/ пали́мую нежегóмо, я́ве предвозвести́,// огнь нестерпи́мый прiéмшую.
Глас 1
Хор: Пресвятáя Богорóдице, спасù нас.
Чтец: Ѻ́блак Тя лéгкiй нелóжно, Дéво, именýем,/ прорóческим возслéдующе речéнiем:/ прiи́де бо на Тебé Госпóдь/ низложи́ти еги́петскiя прéлести рукотворéнiя,// и просвети́ти сим служáщiя.
Хор: Пресвятáя Богорóдице, спасù нас.
Чтец: Тя запечáтанный вои́стинну лик прорóческiй истóчник,/ и заключéнную дверь именовá, дéвства Твоегó, Всепéтая,/ я́вственне знáменiя нам пи́шуще:// éже сохрани́ла еси́ и по рождествé.
Глас 6
Хор: Помúлуй мя, Бóже, помúлуй мя.
Чтец: От гнóища ýбо страстéй смирéнный возношáется,/ от высоты́ же добродéтелей низпáдает лю́те всяк высокосéрдый:// егóже óбраза злóбы убежи́м.
Хор: Помúлуй мя, Бóже, помúлуй мя.
Чтец: Тщеслáвiе оттщетевáет богáтство прáвды,/ смирéнiе же расточáет страстéй мнóжество:// éже подражáющiя ны, чáсти покажи́ мытарéвы Спáсе.
Хор: Помúлуй мя, Бóже, помúлуй мя.
Чтец: Я́ко мытáрь и мы бiю́щеся в пéрси, умилéнiем вопiéм:/ очи́сти Бóже нас, грéшных,// я́ко да сегó прiи́мем оставлéнiе.
Хор: Помúлуй мя, Бóже, помúлуй мя.
Чтец: К рéвности прiи́дем вéрнiи, исправля́юще крóткое,/ смирéнiю соживýще в стенáнiи сéрдца, плáче же и моли́тве,// я́ко да и́мамы от Бóга прощéнiе.
Глас 6
Хор: Святíи новомýченицы и исповéдницы Цéркве Рýсскiя,/ молúте Бóга о нас.
Чтец: Егдá бýря нечéстiя на Цéрковь Рýсскую воздви́жеся,/ вы, святíи новомýченицы, страдáньми вáшими со тщáнiем укроти́сте ю́// и пóдвиги вáшими Правослáвiе утверди́сте.
Хор: Святíи новомýченицы и исповéдницы Цéркве Рýсскiя,/ молúте Бóга о нас.
Чтец: Мýки вéлiя за Цéрковь Хрїстóву претерпéсте, святíи новомýченицы,// моли́те утверди́тися ей незы́блемей и непоколеби́мей до скончáнiя вéка.
Слáва Ѻтцý и Сы́ну и Святóму Дýху.
Тропáрь: Страдáньми и исповéданiем Хрїстá, святíи срóдницы нáши,/ вшéдше в Небéсная селéнiя, я́ко дрéвле Iзрáиль в зéмлю обетовáнную,// отéчество вáше земнóе, Русь Святýю, в любви́ сохраня́йте моли́твами вáшими.
И ны́не и прúсно и во вéки векóв. Амúнь.
Богорóдичен: Небéсных кругóв вы́шшая/ и слáвою Божéственною преукрашéнная, Дéво Мáти Бóжiя,// спаси́ дýши нáша.
Катавáсiя Срéтенiя (глас 3): Утверждéнiе на Тя надéющихся,/ утверди́, Гóсподи, Цéрковь,/ ю́же стяжáл еси́// честнóю Твоéю Крóвiю.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк новомýчеников, глас 3: Днесь новомýченицы Россíйстии/ в ри́зах бéлых предстоя́т Áгнцу Бóжiю/ и со Áнгелы песнь побéдную воспевáют Бóгу:/ благословéнiе, и слáва, и премýдрость,/ и хвалá, и честь,/ и си́ла, и крéпость/ нáшему Бóгу// во вéки векóв. Ами́нь.
Íкос: Крáсный ли́че, светозáрнiи и божéственнiи свети́льницы,/ Свéту вели́кому предстоя́ще при́сно, богоблажéннiи мýченицы,/ и оттýду испущáемыми невечéрняго Божествá сiя́нiи всегдá просвещáеми и обожáеми,/ вéрою пáмять вáшу совершáющiя божéственную просвети́те/ и омрачéнiя, и страстéй, и бед, и злóбы избáвите,// моля́щеся непрестáнно о всех нас.
Седáлен новомýчеников, глас 2: Нóвiи страстотéрпцы Россíйстiи,/ мýченически пóприще земнóе скончáвшiи и страдáньми дерзновéнiе ко Гóсподу приобрéтшiи,/ моли́теся Емý, вас укрéпльшему,/ да и мы, егдá нáйдет на ны испытáнiя час,// мýжества дар Бóжiй воспрiи́мем.
Слáва Ѻтцý и Сы́ну и Святóму Дýху,
Седáлен Трióди, глас 4: Смирéнiе вознесé одержи́маго злы́ми, мытаря́ возстенáвша,/ и éже очи́сти, к Зижди́телю воззвáвша:/ возношéнiе же низложи́ от прáвды/ окая́ннаго фарiсéя велерéчующа./ Тéмже поревнýим дóбрым, злых отступáюще.
И ны́не и прúсно и во вéки векóв. Амúнь.
Ин седáлен Трióди, глас 4: Смирéнiе дрéвле вознесé мытаря́, плáчем возопи́вша: очи́сти, и оправди́ся. того́ подражáим вси́, во глубинý зол впáдшiи, возопiи́м Спáсу из глубины́ сéрдца: согрѣши́хом, очи́сти еди́не человѣколю́бче.
ПЕСНЬ 4
Iрмóс: Гóру Тя благодáтiю Бóжiею прiосенéнную,/ прозорли́выма Аввакýм/ усмотри́в очи́ма,/ из Тебе́ изы́ти Iзрáилеву провозглашáше Святóму,/ во Спасéнiе нáше// и обновлéнiе.
Хор: Слáва, Гóсподи, Святóму Воскресéнiю Твоемý.
Чтец: Кто сей Спас и҆́же из Едóма исходя́, венéц нося́ тернóвен,/ очервлéнну ри́зу имы́й, на дрéве ви́ся;/ Iзрáилев есть Сей Святы́й,// во Спасéнiе нáше и обновлéнiе.
Хор: Слáва, Гóсподи, Святóму Воскресéнiю Твоемý.
Чтец: Ви́дите лю́дiе непокори́вiи, и устыди́теся:/ Егóже бо я́ко злодéя вы вознести́ на крест у Пiлáта испроси́сте умоврéдне,// смéрти разруши́в си́лу, боголéпно воскрéс из грóба.
Хор: Пресвятáя Богорóдице, спасù нас.
Богорóдичен: Дрéво Тя, Дéво, жи́зни вéмы:/ не бо снéди плод смертонóсный человéком из Тебé прозябé,/ но животá присносýщнаго наслаждéнiе,// во Спасéнiе нас пою́щих Тя.
Глас 1
Хор: Пресвятáя Богорóдице, спасù нас.
Чтец: Слы́ши чудéс нéбо, и внушáй землé,/ я́ко Дщи пéрстнаго ýбо пáдшаго Адáма, Бóгу наречéна бысть,/ и Своемý Содéтелю Роди́тельница,// на Спасéнiе нáше и обновлéнiе.
Хор: Пресвятáя Богорóдице, спасù нас.
Чтец: Поéм вели́кое и стрáшное Твоé тáинство,/ преми́рных бо утаи́вся чиноначáлiй,/ на Тя И҆́же сый сни́де я́ко дождь на рунó, Всепéтая,// на Спасéнiе нас пою́щих Тя.
Глас 6
Хор: Помúлуй мя, Бóже, помúлуй мя.
Чтец: Изря́дный показá путь возношéнiя, смирéнiе,/ Слóво смири́вшееся дáже и до зрáка рáбiя:// Егóже подражáя вся́кiй, возношáется смиря́яся.
Хор: Помúлуй мя, Бóже, помúлуй мя.
Чтец: Вознесéся прáведник, и низпадé фарiсéй:/ во мнóжестве же зол отягчáемый смири́ся,// но вознесéся мытáрь, ненадéжно оправдáемый.
Хор: Помúлуй мя, Бóже, помúлуй мя.
Чтец: Нищеты́ ходáтай, от богáтства добродéтелей, безýмiе яви́ся:/ и богáтство áбiе смирéнiе оправдáнiя от крáйнiя нищеты́,// ю́же стя́жим.
Хор: Помúлуй мя, Бóже, помúлуй мя.
Чтец: Предрéкл еси́ Влады́ко, велемýдрствующим противостáти вся́чески,/ и смирéнным благодáть Твою́ подая́ Спáсе,// смири́вшимся ны́не нам Твою́ благодáть низпосли́.
Глас 6
Хор: Святíи новомýченицы и исповéдницы Цéркве Рýсскiя,/ молúте Бóга о нас.
Чтец: Всем концéм земли́ яви́ся чýдо смотрéнiя Твоегó, Влады́ко,/ крóвiю бо новомýченик, я́ко водóю, угаси́л еси́ в Россíйстей земли́ плáмень нечéстiя и развращéнiя// и спасл еси́ лю́ди Твоя́.
Хор: Святíи новомýченицы и исповéдницы Цéркве Рýсскiя,/ молúте Бóга о нас.
Чтец: Слáву Бóжiю унаслéдовасте, новомýченицы, просiя́вшiи в земли́ нáшей,/ отвéргшеся бо себé и страх смéртный препобеди́вше,// любóвь к Бóгу дáже до смéрти мýжественне сохрани́ли естé.
Слáва Ѻтцý и Сы́ну и Святóму Дýху.
Тропáрь: Пóдвигом дóбрым подвизáвшiися, святíи новомýченицы Россíйстiи,/ к покая́нiю и добродéтельному житiю́ подви́гните нас,// да и мы вáшими моли́твами сподóбимся прославля́ти Гóспода во Цáрствiи Егó.
И ны́не и прúсно и во вéки векóв. Амúнь.
Богорóдичен: На Твой надéющеся покрóв, Мáти Бóжiя,// со святы́ми новомýченики и исповéдники Россíйскими прославля́ем милосéрдiе Твоé.
Катавáсiя Срéтенiя (глас 3): Покры́ла есть небесá добродéтель Твоя́, Хрїстé,/ из кiвóта бо прошéд святы́ни Твоея́ нетлéнныя Мáтере,/ в хрáме слáвы Твоея́ яви́лся еси́/ я́ко младéнец руконоси́мь,// и испóлнишася вся́ Твоегó хвалéнiя.
ПЕСНЬ 5
Iрмóс: Просвети́вый сiя́нiем пришéствiя Твоегó, Хрїстé,/ и освети́вый Крестóм Твои́м/ мíра концы́,/ сердцá просвети́/ свéтом Твоегó Богоразýмiя,// правослáвно пою́щих Тя.
Хор: Слáва, Гóсподи, Святóму Воскресéнiю Твоемý.
Чтец: Пáстыря овцáм вели́каго и Гóспода,/ iудéи дрéвом крéстным умертви́ша:/ но Той я́ко óвцы, мéртвыя, во áде погребéнныя,// держáвы смéртныя избáви.
Хор: Слáва, Гóсподи, Святóму Воскресéнiю Твоемý.
Чтец: Крестóм Твои́м мiр благовести́в,/ и проповéдав плéнным, Спáсе мой, оставлéнiе,/ держáву имýщаго посрами́л еси́, Хрїстé:// нáга, обнищáвша показáвый Божéственным востáнiем Твои́м.
Хор: Пресвятáя Богорóдице, спасù нас.
Богорóдичен: Прошéнiя вéрно прося́щих, Всепéтая, не прéзри:/ но прiими́, и сiя́ доношáй Сы́ну Твоемý, Пречи́стая,/ Бóгу Еди́ному Благодéтелю,// Тебé бо Предстáтельницу стяжáхом.
Глас 1
Хор: Пресвятáя Богорóдице, спасù нас.
Чтец: Веселя́тся небéсныя си́лы зря́ще Тя:/ рáдуются с ни́ми человéков собрáнiя:/ Рождествóм бо Твои́м совокупи́шася, Дéво Богорóдице,// éже достóйно слáвим.
Хор: Пресвятáя Богорóдице, спасù нас.
Чтец: Да дви́жатся вси язы́цы человéчестiи и мы́сли,/ к похвалé человéческаго вои́стинну удобрéнiя,/ Дéва предстои́т я́ве слáвящи,// вéрою Тоя́ пою́щих чудесá.
Глас 6
Хор: Помúлуй мя, Бóже, помúлуй мя.
Чтец: Фарiсéевы добродéтели потщи́мся подражáти,/ и поревновáти мытарéву смирéнiю,/ во обою́ ненави́дяще безмéстное мнéнiе,// и пáгубу падéнiй.
Хор: Помúлуй мя, Бóже, помúлуй мя.
Чтец: Прáвды течéнiе тщéтное обличи́ся,/ сопря́г в нем фарiсéй мнéнiе:/ áбiе же мытáрь высокотвóрною добродéтелiю// стяжá спýтника, смирéнiе.
Хор: Помúлуй мя, Бóже, помúлуй мя.
Чтец: Колесни́чник в добродéтелех, мня́шеся тещи́ фарiсéй:/ но пéшiй, пáче лидíйскiя колесни́цы текíй, мытáрь дóбре предвари́,// припря́г щедрóте смирéнiе.
Хор: Помúлуй мя, Бóже, помúлуй мя.
Чтец: Мытарéву при́тчу вси уразумéвше умóм,/ прiиди́те поревнýим слезáм,/ дух сокрушéнный Бóгу принося́ще,// грехóв и́щуще оставлéнiя.
Глас 6
Хор: Святíи новомýченицы и исповéдницы Цéркве Рýсскiя,/ молúте Бóга о нас.
Чтец: Дерзновéнно, святíи, исповéдали естé Гóспода пред отстýпники и гони́тели:/ с нáми Бог, взывáюще, разумéйте и покаря́йтеся,// стрáха вáшего не убои́мся, нижé смути́мся, я́ко с нáми Бог.
Хор: Святíи новомýченицы и исповéдницы Цéркве Рýсскiя,/ молúте Бóга о нас.
Чтец: Уврачýйте моли́твами вáшими, святíи новомýченицы Россíйстии,/ лю́ди богобóрныя, враждóю и убíйствы дышущiя,// и мир странé нáшей и вéрным лю́дем дáруйте.
Слáва Ѻтцý и Сы́ну и Святóму Дýху.
Тропáрь: Предстоя́ще Хрїстý, власть имýщу суди́ти всемý мíру,/ святíи новомýченицы и исповéдницы Россíйстии,/ очи́стите нас от грехóв нáших моли́твами вáшими,// да не с мíром осуждéни бýдем.
И ны́не и прúсно и во вéки векóв. Амúнь.
Богорóдичен: Водворя́ет ны змiй во юдóль плáча и чáянiя злых,/ не мóжем терпéти скóрби своея́, взывáху новомýченицы,/ Ты же, Богороди́тельнице, простéрла еси́ им покрóв Свой// и спаслá еси от сетéй врáжiих.
Катавáсiя Срéтенiя (глас 3): Я́ко ви́де Исáiа обрáзно/ на Престóле превознесéна Бóга,/ от áнгел слáвы дориноси́ма,/ о окая́нный, вопiя́ше, аз:/ прови́дех бо воплощáема Бóга,// Свéта Невечéрня, и ми́ром влады́чествующа.
ПЕСНЬ 6
Iрмóс: Обы́де нас послéдняя бéздна,/ несть избавля́яй,/ вмени́хомся,/ я́ко óвцы заколéнiя,/ спаси́ лю́ди Твоя́, Бóже наш,// Ты бо крéпость немощствýющих и исправлéнiе.
Хор: Слáва, Гóсподи, Святóму Воскресéнiю Твоемý.
Чтец: Согрешéнiем первоздáннаго, Гóсподи, лю́те уязви́хомся,/ рáною же исцели́хомся Твоéю,/ éюже за ны уязви́лся еси́, Хрїстé:// Ты бо крéпость немощствýющих и исправлéнiе.
Хор: Слáва, Гóсподи, Святóму Воскресéнiю Твоемý.
Чтец: Возвéл ны еси́ из áда, Гóсподи,/ ки́та уби́в всея́дца, Всеси́льне,/ Твое́ю держáвою низложи́в тогó си́лу:// Ты бо Живóт, и Свет еси́, и Воскресéнiе.
Хор: Пресвятáя Богорóдице, спасù нас.
Богорóдичен: Веселя́тся о Тебé, Дéво Пречи́стая,/ рóда нáшего прáотцы, Едéм воспрiéмше Тобóю,/ егóже преступлéнiем погуби́ша:// Ты бо, Чи́стая, и прéжде Рождествá, и по Рождествé еси́.
Глас 1
Хор: Пресвятáя Богорóдице, спасù нас.
Чтец: Предстоя́т раболéпне Рождествý Твоемý чи́ни небéснiи,/ дивя́щеся достóйно Твоемý безсéменному Рождествý, Приснодéво:// Ты бо, Чи́стая, и прéжде Рождествá, и по Рождествé еси́.
Хор: Пресвятáя Богорóдице, спасù нас.
Чтец: Воплоти́ся прéжде сый Безплóтен, Слóво из Тебé, Пречи́стая,/ вся́ческая вóлею творя́й,// безтелéсных вóинства приведы́й от небытiя́, я́ко Всеси́лен.
Глас 6
Хор: Помúлуй мя, Бóже, помúлуй мя.
Чтец: Житiя́ пóприще мытáрь вкýпе и фарiсéй течáста:/ но ов ýбо высокоýмiем содержи́мь, срáмне утонý,// ов же смирéнiем спасéся.
Хор: Помúлуй мя, Бóже, помúлуй мя.
Чтец: Житiя́ бéдное преминýюще мы течéнiе,/ подражáим мытарéво ýбо мудровáнiе ревни́тельно:// бежи́м же кичéнiя мéрзкаго фарiсéя, и жи́ви бýдем.
Хор: Помúлуй мя, Бóже, помúлуй мя.
Чтец: Нрáвом поревнýим Спáса Iисýса, и Егó смирéнiю,/ желáюще непрестáнное рáдости селéнiе получи́ти,// во странé живýщих водворя́ющеся.
Хор: Помúлуй мя, Бóже, помúлуй мя.
Чтец: Показáл еси́ Влады́ко, Твои́м ученикóм высокотвóрное смирéнiе,/ лéнтiем препоя́сан по чрéслом, нóзе умы́л еси́,// и семý óбразу подражáти повелéл еси́.
Глас 6
Хор: Святíи новомýченицы и исповéдницы Цéркве Рýсскiя,/ молúте Бóга о нас.
Чтец: Вóлны безбóжнаго нечéстiя тщáхуся потопи́ти корáбль Цéркве Рýсскiя,/ Ты же, И́стинный Кóрмчiй, спасл еси шéствующiя на нем моли́твами страстотéрпцев Россíйских, вопiю́щих:// Гóсподи Сил, из смертонóсныя глубины́ возведи́ ны.
Хор: Святíи новомýченицы и исповéдницы Цéркве Рýсскiя,/ молúте Бóга о нас.
Чтец: Безбóжнiи Кáiновы внýцы святы́ни церкóвныя поругáнiю и огню́ предáша,/ оби́тели разори́ша, хрáмы я́ко овóщная храни́лища содéяша,/ хрiстолюби́выя лю́ди в темни́цы заключи́ша и умýчиша./ Вы же, страстотéрпцы, с любóвiю учи́ли естé:// сié бысть по грехóм нáшим, лю́дiе, покáйтеся.
Слáва Ѻтцý и Сы́ну и Святóму Дýху.
Тропáрь: Увы́ нам, увы́, вопiя́ху исповéдницы Россíйстiи,/ ви́дяще, я́ко безýмнiи богобóрцы святы́ни земли́ нáшея разори́ша,/ оби́тели я́ко узи́лища темни́чная содéяша,/ хрáмы Бóжiи в сквéрная и позóрищная местá обрати́ша/ и кровь хрiстiáнскую в них пролiя́ша./ Сегó рáди опустоши́шася сердцá нечести́вых// и живóт их áду приближися.
И ны́не и прúсно и во вéки векóв. Амúнь.
Богорóдичен: Изведи́ нас из рóва поги́бели/ и уврачýй нáша грехóвныя я́звы, Пресвятáя Мáти Дéво,// да неосуждéнно сподóбимся при́сно прославля́ти новомýченики Сы́на Твоегó и Бóга нáшего.
Катавáсiя Срéтенiя (глас 3): Возопи́ к Тебé ви́дев стáрец очи́ма спасéнiе,/ éже лю́дем прiи́де от Бóга,// Хрїстé, Ты Бог мой.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк Трióди, глас 3: Воздыхáнiя принесéм мытáрская Гóсподеви,/ и к Немý пристýпим грéшнiи я́ко Влады́це:/ хóщет бо спасéнiя всех человéков,/ оставлéнiе подаéт всем кáющимся./ Нас бо рáди воплоти́ся,// Бог сый Отцý собезначáльный.
Íкос: Сáми себé брáтiе вси смири́м воздыхáньми,/ рыдáньми побiéм сóвесть:/ да в судé тогдá вéчном тáмо яви́мся вéрнiи,/ непови́нни, получи́вше оставлéнiе./ Тáмо бо есть вои́стинну ослаблéнiе,/ éже ви́дети нам ны́не умóлим:/ тáмо болéзнь отбежé, печáль и из глубины́ воздыхáнiя,/ во Едéме ди́внем, егóже Хрїстóс Зижди́тель,// Бог сый Отцý собезначáльный.
ПЕСНЬ 7
Iрмóс: Тебé ýмную, Богорóдице, пещь/ разсмотря́ем, вéрнiи,/ я́коже бо óтроки спасé три Превозноси́мый,/ мiр обнови́,/ во чрéве Твоéм всецéл,// хвáльный отцéв Бог и препрослáвлен.
Хор: Слáва, Гóсподи, Святóму Воскресéнiю Твоемý.
Чтец: Убоя́ся земля́, сокры́ся сóлнце, и помéрче свет,/ раздрáся церкóвная божéственная завéса,/ кáменiе же разсéдеся:/ на крестé бо ви́сит Прáведный,// Хвáльный отцéв Бог, и препрослáвлен.
Хор: Слáва, Гóсподи, Святóму Воскресéнiю Твоемý.
Чтец: Ты быв áки безпомóщен,/ и уя́звен в мéртвых вóлею нас рáди/ превозноси́мый, вся свободи́л еси́,/ и держáвною рукóю совоскреси́л еси́,// хвáльный отцéв Бог, и препрослáвлен.
Хор: Пресвятáя Богорóдице, спасù нас.
Богорóдичен: Рáдуйся, истóчниче присноживы́я воды́./ Рáдуйся, раю́ пи́щный./ Рáдуйся, стенó вéрных./ Рáдуйся, Неискусобрáчная./ Рáдуйся, всемíрная Рáдосте,/ Éюже нам возсiя́// Хвáльный отцéв Бог, и препрослáвлен.
Продолжение здесь