Неделя 28 по Пятидесятнице,святых праотец.Глас 3.ВСЕНОЩНОЕ БДЕНИЕ. УТРЕНЯ.КАНОН Служба мирским чином
25 декабря́ 2022 гóда. Недéля 28 по Пятидеся́тнице, святы́х прáотцев. Глас 3. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени.
Начало зри здесь ( великая вечéрня) и здесь ( ýтреня)
ТРОПАРИ ВОСКРЕСНЫЕ, ГЛАС 5
Благословéн есú, Гóсподи,/научù мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есú, Гóсподи,/научù мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел миронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есú, Гóсподи,/научù мя оправдáнiем Твоúм.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есú, Гóсподи,/научù мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Чтец: Аллилýiа, аллилýiа, аллилýiа, слáва Тебé Бóже. (3 раза)
Гóсподи, поми́луй. (3 раз)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоú воскрéсны, глас 3: Удивля́я видéнiем,/ орошáя глагóланiи,/ блистáяйся Áнгел миронóсицам глагóлаше:/ что живáго и́щете во грóбе;/ востá истощи́вый грóбы./ Тли Премени́теля разумéйте Непремéннаго./ Рцы́те Бóгови: коль стрáшна делá Твоя́,// я́ко род спасл еси́ человéческiй!
СЕДАЛЬНЫ
Седáлен прáотцев по полiелéе, глас 8: Авраáма, Iсаáка же и Iáкова восхвáлим вси пéсненно,/ Дави́да кро́ткаго, Iисýса и дванáдесять патрiáрхи/ кýпно с треми́ ю́ношами, угаси́вшими о́гненный плáмень си́лою духо́вною,/ рáдуйтеся, - вопiю́ще к ним, - прéлесть до́блественне обличи́вше царя́ безýмнаго,/ и Хрiстý моли́теся// согрешéнiй оставлéнiе даровáти прáзднующим любо́вью святýю пáмять вáшу.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Богорóдичен из Минéи, глас 8: Благодáрственное похвалéнiе до́лжно,/ я́коже вдови́ца о́ная два лéпта,/ приношý Тебé, Влады́чице, о всех даровáнiих Твои́х:/ Ты бо яви́лася еси́ покро́в, кýпно и по́мощь,/ напáстей и скорбéй при́сно мя изымáющи./ Тéмже, я́ко от среды́ горя́щiя пéщи, избáвлься оскорбля́ющих мя,/ от сéрдца взывáю Тебé:/ Богоро́дице, помози́ ми,/ моля́щи Хрiстá Бо́га согрешéнiй оставлéнiе дáти мне,// Тя бо имéю надéжду, раб Твой.
СТЕПЕННА, ГЛАС 3
1 АНТИФОН
Плен Сióнь Ты изъя́л есú от Вавилóна:// и менé от страстéй к животý привлецы́, Слóве. (Дважды)
В юг сéющии слезáми Божéственными,// жнут клáсы рáдостiю присноживóтiя. (Дважды)
Слáва Ѻтцý и Сы́ну и Святóму Дýху.
Святóму Дýху вся́кое благодáрiе,/ я́коже Отцý и Сы́ну сооблистáет,// в Нéмже вся живýт и дви́жутся.
И ны́не и прúсно и во вéки векóв. Амúнь.
Святóму Дýху вся́кое благодáрiе,/ я́коже Отцý и Сы́ну сооблистáет,// в Нéмже вся живýт и дви́жутся.
2 АНТИФОН
Аще не Госпóдь созúждет дом добродéтелей, всýе труждáемся:// дýшу же покрывáющу, никтóже наш разорúт град. (Дважды)
Плодá чрéвна Дýхом сынотворéное// Тебé, Хрiстý, я́коже и Отцý, святíи всегдá суть. (Дважды)
Слáва Ѻтцý и Сы́ну и Святóму Дýху.
Святы́м Дýхом прозри́тся вся́кая святы́ня, премýдрость:/ осуществýет бо вся́кую тварь: Томý послýжим:// Бог бо, я́ко Отцý же и Слóву.
И ны́не и прúсно и во вéки векóв. Амúнь.
Святы́м Дýхом прозри́тся вся́кая святы́ня, премýдрость:/ осуществýет бо вся́кую тварь: Томý послýжим:// Бог бо, я́ко Отцý же и Слóву.
3 АНТИФОН
Боя́щiися Гóспода блажéни, в путù ходя́ще зáповедей:// снедя́т бо живóтное всеплóдiе. (Дважды)
Ѻ́крест трапéзы Твоея́ возвесели́ся,// зря Твоя́, Пастыреначáльниче, исчáдiя, нося́ща вéтви благодéланiя. (Дважды)
Слáва Ѻтцý и Сы́ну и Святóму Дýху.
Святы́м Дýхом вся́кое богáтство слáвы,/ от Негóже благодáть, и живóт вся́кой твáри:// со Отцéм бо воспевáемь есть, и с Слóвом.
И ны́не и прúсно и во вéки векóв. Амúнь.
Святы́м Дýхом вся́кое богáтство слáвы,/ от Негóже благодáть, и живóт вся́кой твáри:// со Отцéм бо воспевáемь есть, и с Слóвом.
ПРОКИМЕН
Чтец: Прокíмен, глас трéтiй, псалóм Давíдов. Рцы́те во язы́цех, я́ко Госпóдь воцари́ся, и҆́бо испрáви вселéнную, я́же не подви́жится. (Пс.95:10А)
Хор: Рцы́те во язы́цех, я́ко Госпóдь воцарúся,/ и҆́бо испрáви вселéнную, я́же не подвúжится.
Чтец: Воспóйте Гóсподеви песнь нóву, воспóйте Гóсподеви вся земля́. (Пс.95:1)
Хор: Рцы́те во язы́цех, я́ко Госпóдь воцарúся,/ и҆́бо испрáви вселéнную, я́же не подвúжится.
Чтец: Рцы́те во язы́цех, я́ко Госпóдь воцари́ся,
Хор: И҆́бо испрáви вселéнную, я́же не подвúжится.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Луки́ Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Лк.зач.114): Во врéмя óно, воскрéс Iисýс от мéртвых, ста посредé учени́к свои́х, и глагóла им: мир вам. Убоя́вшеся же и пристрáшни бы́вше, мня́ху дух ви́дети. И речé им: что смущéни естé? И почтó помышлéнiя вхóдят в сердцá вáша? Ви́дите рýце Моѝ и нóзе Моѝ, я́ко Сам Аз есмь: осяжи́те Мя и ви́дите: я́ко дух плóти и кóсти не и҆́мать, я́коже Менé ви́дите имýща. И сié рек, показá им рýце и нóзе. Ещé же не вéрующим им от рáдости и чудя́щимся, речé им: и҆́мате ли что снéдно зде? Онѝ же дáша Емý ры́бы печены́ часть и от пчел сот. И взем пред ни́ми ядé. Речé же им: сiя́ суть словесá, я́же глагóлах к вам ещé сый с вáми, я́ко подобáет скончáтися всем напи́санным в закóне Моисéове и прорóцех и псалмéх о Мне. Тогдá отвéрзе им ум разумéти Писáнiя. И речé им, я́ко тáко пи́сано есть, и тáко подобáше пострадáти Хрiстý, и воскрéснути от мéртвых в трéтiй день, и проповéдатися во и҆́мя Егó покая́нiю и отпущéнiю грехóв во всех язы́цех, начéнше от Iерусали́ма. Вы же естé свидéтелiе сим. И се Аз послю́ обетовáнiе Ѻтцá Моегó на вы: вы же седи́те во грáде Iерусали́мсте, дóндеже облечéтеся си́лою свы́ше. Извéд же их вон до Вифáнiи, и воздви́г рýце Своѝ, и благословѝ их. И҆ бысть егдá благословля́ше их, отступѝ от них, и возношáшеся на нéбо. И тíи поклони́шася Емý, и возврати́шася во Iерусали́м с рáдостiю вели́кою: и бя́ху вы́ну в цéркви, хвáляще и благословя́ще Бóга. Ами́нь.
[Русский синодальный перевод]Когда они говорили о сем, Сам Иисус стал посреди них и сказал им: мир вам. Они, смутившись и испугавшись, подумали, что видят духа. Но Он сказал им: что смущаетесь, и для чего такие мысли входят в сердца ваши? Посмотрите на руки Мои и на ноги Мои; это Я Сам; осяжите Меня и рассмотри́те; ибо дух плоти и костей не имеет, как видите у Меня. И, сказав это, показал им руки и ноги. Когда же они от радости еще не верили и дивились, Он сказал им: есть ли у вас здесь какая пища? Они подали Ему часть печеной рыбы и сотового меда. И, взяв, ел пред ними. И сказал им: вот то, о чем Я вам говорил, еще быв с вами, что надлежит исполниться всему, написанному о Мне в законе Моисеевом и в пророках и псалмах. Тогда отверз им ум к уразумению Писаний. И сказал им: так написано, и так надлежало пострадать Христу, и воскреснуть из мертвых в третий день, и проповедану быть во имя Его покаянию и прощению грехов во всех народах, начиная с Иерусалима. Вы же свидетели сему. И Я пошлю обетование Отца Моего на вас; вы же оставайтесь в городе Иерусалиме, доколе не облечетесь силою свыше. И вывел их вон из города до Вифании и, подняв руки Свои, благословил их. И, когда благословлял их, стал отдаляться от них и возноситься на небо. Они поклонились Ему и возвратились в Иерусалим с великою радостью. И пребывали всегда в храме, прославляя и благословляя Бога. Аминь.(Лк.24:36-53)
Хор: Слáва Тебé, Гóсподи, слáва Тебé.
Воскресéнiе Хрiстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрiстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрiстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра, глас 6: Воскрéс Iисýс от грóба,/ я́коже проречé,/ дадé нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 3
(совмещенный с канóном óтроков (глас 8) и канóном прáотцев, глас 1)
ПЕСНЬ 1
Iрмóс: Вóды дрéвле/ мáнiем Божéственным/ во еди́но сóнмище совокупи́вый/ и раздели́вый мóре Iзрáильтеским лю́дем,/ Сей Бог наш/ препрослáвлен есть.// Томý Еди́ному пои́м, я́ко прослáвися.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): И҆́же зéмлю осуди́в,/ престýпльшему пóтом изнести́ плодá тéрнiе,/ от тéрнiя венéц из руки́ законопрестýпныя,/ Сей Бог наш, плóтски прiéмый,// кля́тву разруши́л есть, я́ко прослáвися.
Хор: Слáва, Гóсподи, Святóму Воскресéнiю Твоемý.
Чтец: Победи́тель и Одолéтель смéрти,/ и҆́же смéрти убоя́вся, яви́ся:/ стрáстную бо плоть одушевлéнную прiéм,/ Сей Бог наш, и брáвся с мучи́телем,// вся совоскреси́, я́ко прослáвися.
Хор: Пресвятáя Богорóдице, спасú нас.
Богорóдичен: И҆́стинную Богорóдицу вси язы́цы слáвят Тя, без сéмене рóждшую:/ сошéд бо во утрóбу освящéнную Твою́,/ Сей Бог наш, Éже по нам осуществовáся,// Бог же и Человéк из Тебé роди́ся.
Канон святых триех отроков, глас 8
Хор: Святíи óтроцы, молúте Бóга о нас.
Чтец: Безначáльное Слóво,/ из Отцá прéжде всех векóв рождéнно боголéпно,// в пещи́ ю́ношам обрáзно ви́дено бы́вшее, прослáвим.
Хор: Святíи óтроцы, молúте Бóга о нас.
Чтец: Глагóлы мучи́теля злочести́ваго/ благорóднiи óтроцы оплевáвше терпели́вно,// снéдьми беззакóнных оскверни́тися халдéйски не восхотéша.
Хор: Святíи óтроцы, молúте Бóга о нас.
Чтец: Питáстеся ýбо слóвом душéвне,/ снéдьми же саморáсленными плóтски,/ пáче питáющихся дебéлыми снéдьми,// царю́ краснéйшiи ли́цы яви́стеся.
Богорóдичен: Пресвятáя Богорóдице, спасù нас.
Чтец: Яд змiи́н, в слýхи гóрько излiя́вшiйся Éвины,/ я́же из Давíда возрáстшая, Отрокови́це, исцеля́еши,// Избáвителя рóждши.
Канон святых праотцев, глас 1
Хор: Святíи прáотцы, молúте Бóга о нас.
Чтец: Отцéм пéнiе принесéм, прéжде закóна и в закóне возсiя́вшим,/ и из Дéвы возсiя́вшему Гóсподу и Влады́це вóлею прáвою угоди́вшим,// и незаходи́маго просвещéнiя ны́не наслаждáющимся. (Двáжды)
Хор: Святíи прáотцы, молúте Бóга о нас.
Чтец: Адáма пéрваго почти́м, рукóю почтéннаго Зижди́теля,/ и всех нас прáотца ужé бы́вшаго,// и в ски́ниях Небéсных со всéми избрáнными почивáюща.(Двáжды)
Слáва Ѻтцý и Сы́ну и Святóму Дýху.
Тропáрь: Áвеля, дáры принéсшаго душéю благорóднейшею,/ прiя́т всех Бог и Госпóдь;/ сегó же пáки, скверноуби́йственною рукóю умерщвлéна,// принесé к свéту я́ко Божéственна мýченика.
И ны́не и прúсно и во вéки векóв. Амúнь.
Богорóдичен: Речéнiй Божéственных услы́шим, вопiю́щих Хрiстóво явлéнiе:/ се бо в вертéпе раждáется из Отрокови́цы Неискусомýжныя,// Егóже стрáшное Рождествó провозвещáет звездослóвцем звездá я́вльшаяся.
Катавáсiя Рождествá (глас 1): Хрiстóс раждáется - слáвите,/ Хрiстóс с Небéс - сря́щите./ Хрiстóс на земли́ - возноси́теся./ Пóйте Гóсподеви, вся земля́,/ и весéлiем воспóйте, лю́дiе,/ я́ко прослáвися.
ПЕСНЬ 3
Iрмóс: И҆́же от несýщих вся Приведы́й,/ Слóвом созидáемая,/ совершáемая Дýхом,/ Вседержи́телю Вы́шнiй,// в любви́ Твоéй утверди́ менé.
Хор: Слáва, Гóсподи, Святóму Воскресéнiю Твоемý.
Чтец: Крестóм Твои́м постыдéся нечести́вый,/ содéла бо я́му, ю́же ископá, впадé:/ смирéнных же вознесéся, Хрiстé, рог,// во Твоéм воскресéнiи.
Хор: Слáва, Гóсподи, Святóму Воскресéнiю Твоемý.
Чтец: Благочéстiя проповéданiе язы́ком,/ я́ко водá покры́ моря́, Человеколю́бче:// воскрéс бо от грóба, Трóическiй откры́л еси́ свет.
Хор: Пресвятáя Богорóдице, спасù нас.
Богорóдичен: Преслáвная глагóлана бы́ша о Тебé,/ Грáде Одушевлéнный при́сно Цáрствующаго:// Тобóю бо, Влады́чице, сýщим на земли́ Бог спожи́л есть.
Глас 8
Хор: Святíи óтроцы, молúте Бóга о нас.
Чтец: Рáзум стяжáвше Богонаучéнный, Влады́ко, óтроцы Давíдовы// закóны отéческiя богомýдренно соблюдóша.
Хор: Святíи óтроцы, молúте Бóга о нас.
Чтец: Огнь не опали́ чистéйшая телесá благочести́вых:// постóм бо душепитатéльным напая́хуся.
Хор: Святíи óтроцы, молúте Бóга о нас.
Чтец: Хвалý всемíрную и многопéтую пою́т óтроцы трié,// посредé пéщи чýдно орошáеми.
Богорóдичен: Пресвятáя Богорóдице, спасú нас.
Чтец: Да рождествó, Влады́ко, из дéвствующаго телесé покáжеши нам,// спасáеши в пещи́ дéвствующая телесá.
Глас 1
Хор: Святíи прáотцы, молúте Бóга о нас.
Чтец: Поéтся в мíре Си́фово к Зижди́телю разжжéнiе,/ и́бо в непорóчнем жи́тельстве и душéвней любви́ Томý и́стинно угоди́,/ и ны́не во странé живы́х вопiéт:// Свят еси́, Гóсподи. (Двáжды)
Хор: Святíи прáотцы, молúте Бóга о нас.
Чтец: Усты́, и язы́ком, и сéрдцем Енóс чýдный/ призвáти богомýдренно Влады́ку всех и Бóга надéяшеся в Дýсе// и, благоугóдно пожи́в на земли́, слáву воспрiя́т.(Двáжды)
Слáва Ѻтцý и Сы́ну и Святóму Дýху.
Тропáрь: Священнослóвiи свящéнными Енóха ублажи́м,/ благоугоди́в бо Гóсподу, престáвися в слáве,/ яви́вся лýчши смéрти, я́коже писáся,// и́мже Бóжiй быв раб и́скреннейшiй.
И ны́не и прúсно и во вéки векóв. Амúнь.
Богорóдичен: Ны́не чáянiе язы́ков от Дéвы предгрядéт,/ и Вифлеéм заключéнный отверзáет свéтло Едéма,// Слóво воплощáемое прiéмля, и в я́слех плóтiю возлéгшаго.
Катавáсiя Рождествá (глас 1): Прéжде век от Отцá рождéнному нетлéнно Сы́ну/ и в послéдняя от Дéвы/ воплощéнному безсéменно,/ Хрiстý Бóгу возопiи́м:/ вознесы́й рог наш,// свят еси́, Гóсподи.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Ипакоú прáотцев, глас 2: В рóсу дéтем огнь прелагáшеся,/ плач в рáдость женáм пременя́шеся:/ Áнгел бо во обои́х служáше чудесéх,/ óвым ýбо во упокоéнiе претвори́вый пещь,/ сим же Воскресéнiе возвести́вый триднéвное.// Начáльниче жи́зни нáшея, Гóсподи, слáва Тебé.
ПЕСНЬ 4
Iрмóс: Положи́л еси́ к нам твéрдую любóвь, Гóсподи,/ Единорóднаго бо Твоегó Сы́на за ны на смерть дал еси́./ Тéмже Ти зовéм, благодаря́ще:// слáва си́ле Твоéй, Гóсподи.
Хор: Слáва, Гóсподи, Святóму Воскресéнiю Твоемý.
Чтец: Я́звы, Хрiстé, и рáны ми́лостивно подъя́л еси́,/ досáду по лани́тома ударéнiй терпя́, и долготерпели́вне оплевáнiя нося́,/ и҆́миже содéлал еси́ мне Спасéнiе:// слáва си́ле Твоéй, Гóсподи.
Хор: Слáва, Гóсподи, Святóму Воскресéнiю Твоемý.
Чтец: Тéлом смéртным, Животé, смéрти причасти́лся еси́,/ стрáсти рáди ни́щих, и воздыхáнiя убóгих Твои́х,/ и растли́в тлéющаго, Препрослáвленне,// всех совоскреси́л еси́, я́ко прослáвися.
Хор: Пресвятáя Богорóдице, спасù нас.
Богорóдичен: Помяни́, Хрiстé, éже стяжáл еси́ стáдо стрáстiю Твоéю:/ Препрослáвленныя Твоея́ Мáтере ми́лостивныя мольбы́ прiéм,/ и посети́в озлóбленное,// избáви си́лою Твоéю, Гóсподи.
Глас 8
Хор: Святíи óтроцы, молúте Бóга о нас.
Чтец: Данiи́л мудрéйшiй, Божéственне умóм просвещáемь,// сóнiя разреши́ самодéржцев Божéственною благодáтiю.
Хор: Святíи óтроцы, молúте Бóга о нас.
Чтец: Облистáет чудесми́, éже в пещи́, отрокóв страдáнiе:// мучи́теля бо улови́ша к познáнiю Твоемý, Всеси́льне.
Хор: Святíи óтроцы, молúте Бóга о нас.
Чтец: Соглáсiя оргáны и мусiкíи пéсни/ всесли́чныя дóблественных не привлекóша// и златóму óбразу не подклони́ша.
Богорóдичен: Пресвятáя Богорóдице, спасú нас.
Чтец: Пéсньми, Всепéтая,/ и́же в Вавилóне дéти почитáют Сы́на Твоегó Пребожéственнаго,// Егóже в пещи́ познáша.
Глас 1
Хор: Святíи прáотцы, молúте Бóга о нас.
Чтец: Хвалý принесéм Бóгу,/ чтýще пéсньми Нóя, вои́стинну сýща прáведнаго:/ во всех бо зáповедех Божéственных украшáемь яви́ся, Хрiстý благоугоди́в,/ Емýже песнопоéм, вéрнiи:// слáва си́ле Твоéй, Гóсподи. (Двáжды)
Хор: Святíи прáотцы, молúте Бóга о нас.
Чтец: Ви́дев твоé Бог благорóдное нрáва, и простóе,/ и по всемý, Нóе, совершéна, вторáго мíра я́ве началовождя́ тя показýет,/ спáсшаго томý вся́каго рóда от потóпа чýвственнаго сéмя,// я́коже Сам повелé.
Хор: Святíи прáотцы, молúте Бóга о нас.
Чтец: Нóя, сохрáньшаго Бóжiй закóн невреди́мь,/ и обрéтшася тогдá прáведна в рóде своéм,/ и дрéвяным спáсша дрéвле ковчéгом безсловéсных рóды повелéнiем Вседéтельным,// пéсньми благочéстно ублажи́м.
Слáва Ѻтцý и Сы́ну и Святóму Дýху.
Тропáрь: Винó умилéнiя нам тóчит,/ чтýщим тя, Нóе блажéнне, пáмять твоя́, веселя́щее и дýши, и сердцá всегдá// чи́сте блажáщих нрáвы твоя́ честны́я и жи́тельство Божéственное.
И ны́не и прúсно и во вéки векóв. Амúнь.
Богорóдичен: Ны́не Избавлéнiе нáше в я́слех возлегáет/ и пеленáми повивáется, я́коже Младéнец./ И волсви́, востóчнiи цáрiе, прихóдят/ Сегó я́ко Бóга и Царя́ рóждшагося от Чи́стыя, ви́дети// и поклони́тися с дáры вéрно.
Катавáсiя Рождествá (глас 1): Жезл из кóрене Iессéева/ и цвет от негó, Хрiстé,/ от Дéвы прозя́бл еси́,/ из горы́, Хвáльный, приосенéнныя чáщи,/ пришéл еси́, воплóщся от Неискусомýжныя,/ Невещéственный и Бóже:// слáва си́ле Твоéй, Гóсподи.
ПЕСНЬ 5
Iрмóс: К Тебé ýтреннюю, всех Творцý,/ преимýщему всяк ум мíрови,/ занé свет повелéнiя Твоя́,// в ни́хже настáви мя.
Хор: Слáва, Гóсподи, Святóму Воскресéнiю Твоемý.
Чтец: Судiи́ непрáведному,/ еврéйскою зáвистiю прéдан быв, Всеви́дче,/ и всей прáведне судя́й земли́,// Адáма дрéвняго избáвил еси́ осуждéнiя.
Хор: Слáва, Гóсподи, Святóму Воскресéнiю Твоемý.
Чтец: Твой мир цéрквам Твои́м, Хрiстé,/ непобеди́мою си́лою Крестá Твоегó,// из мéртвых воскресы́й, подáждь, и спаси́ дýши нáша.
Хор: Пресвятáя Богорóдице, спасú нас.
Богорóдичен: Ски́нiя Святáя, и прострáннейши небéс,/ я́ко И҆́же во всей твáри Невмести́маго Слóва Бóжiя прiéмши,// Еди́на яви́лася еси́, Приснодéво.
Глас 8
Хор: Святíи óтроцы, молúте Бóга о нас.
Чтец: Научи́вшеся закóну, Спáсе,/ не отвергóшася Твои́ угóдницы,/ Данiи́л вели́кiй с треми́ ю́ношами Богомýдрыми,/ но, крéпость прiéмше от Тебé, Благодéтеля,// мучи́тели мýжески победи́ша.
Хор: Святíи óтроцы, молúте Бóга о нас.
Чтец: Мы́сленно научáшеся Данiи́л, Человеколю́бче, Твои́м тáйнам:/ на óблаце бо я́ко Сы́на Тя Человéча грядýща,// язы́ков всех я́ко Судiю́ и Царя́ зря́ше умá чистотóю.
Хор: Святíи óтроцы, молúте Бóга о нас.
Чтец: Украси́ся, о дéти! пáче кáмене сапфи́ра вáше совокуплéнiе,/ я́ко заря́ златáя, благочéстiя рéвностiю распáльшеся,// ходя́ще рáдостно в пещи́ и собирáюще ликовáнiе всемíрное.
Богорóдичен: Пресвятáя Богорóдице, спасù нас.
Чтец: Данiи́л Тя, Дéво, гóру прописá я́ве Божéственный,/ трié же óтроцы, ви́девше плáмень орошáющь,/ Твоé Божéственное Рождествó песнопéсненно восхваля́ют// я́ко Спáса, и Зижди́теля, и Гóспода.
Глас 1
Хор: Святíи прáотцы, молúте Бóга о нас.
Чтец: Хвалáми Божéственными да почти́тся Сим,/ отéческое благословéнiе приплоди́в,/ и, пред Бóгом благоугóден я́влься,/ к прáотеческим ликóм причтéся,// и во странé живы́х рáдостно почивáет. (Двáжды)
Хор: Святíи прáотцы, молúте Бóга о нас.
Чтец: Хвалáми Божéственными да почти́тся Сим,/ отéческое благословéнiе приплоди́в,/ и, пред Бóгом благоугóден я́влься,/ к прáотеческим ликóм причтéся,// и во странé живы́х рáдостно почивáет.(Двáжды)
Слáва Ѻтцý и Сы́ну и Святóму Дýху.
Тропáрь: Ви́дел еси́, я́коже есть мóщно человéку ви́дети, Трóицу/ и Тýю угости́л еси́, я́ко друг при́сный, преблажéнне Авраáме;/ тéмже мзду прiя́л еси́ стрáннаго гощéнiя,// éже бы́ти тебé безчи́сленных язы́ков отцý вéрою.
И ны́не и прúсно и во вéки векóв. Амúнь.
Богорóдичен: Пóлный истощавáется плóтiю нас рáди,/ и начáло Безначáльный прiéмлет;/ обнищевáет же Богáтый,/ и Слóво - Сый Бог - в я́слех безсловéсных возлежи́т, я́ко Младéнец,// воззвáнiе всех сýщих от вéка содéловая.
Катавáсiя Рождествá (глас 1): Бог сый ми́ра, Отéц щедрóт,/ Вели́каго Совéта Твоегó Áнгела,/ мир подавáюща, послáл еси́ нам:/ тем, Богоразýмiя к свéту настáвльшеся,/ от нóщи ýтренююще,// славослóвим Тя, Человеколю́бче.
ПЕСНЬ 6
Iрмóс: Бéздна послéдняя грехóв обы́де мя,/ и исчезáет дух мой;/ но простры́й, Влады́ко, высóкую Твою́ мы́шцу,// я́ко Петрá, мя, Упрáвителю, спаси́.
Хор: Слáва, Гóсподи, Святóму Воскресéнiю Твоемý.
Чтец: Бéздна ми́лости и щедрóт обы́де мя,/ благоутрóбным сни́тiем Твои́м:/ воплóщься бо, Влады́ко,// и быв в рáбiи зрáце, обожи́л еси́, с Собóю сопрослáвив.
Хор: Слáва, Гóсподи, Святóму Воскресéнiю Твоемý.
Чтец: Умерщвлéнiе подъя́т умертви́тель,/ умерщвлéнаго оживлéнно ви́дя:/ Твоегó воскресéнiя сíи суть, Хрiстé, óбразы,// и стрáсти Твоея́ пречи́стыя победи́тельная.
Хор: Пресвятáя Богорóдице, спасù нас.
Богорóдичен: Пречи́стая, я́же Еди́на Создáтелю и человéком, пáче умá исходáтаившая,// Сы́на Твоегó ми́лостива прегрéшшим рабóм Твои́м, и побóрника бы́ти, помоли́ся.
Глас 8
Хор: Святíи óтроцы, молúте Бóга о нас.
Чтец: Обладáвше душéвными страстьми́ си́лою слóва,/ страны́ язы́к халдéйских влáстели бы́сте,/ весть бо добродéтель честь даровáти стяжáвшим ю,// о Дави́довы мýдрiи внýцы!(Двáжды)
Хор: Святíи óтроцы, молúте Бóга о нас.
Чтец: В мéртвость Данiи́л живонóсную одéявся дрéвле,/ я́ко Бóга, халдéем злочести́вно мни́маго,/ убивáет снéдiю зми́я злéйшаго.// Свящéнники же злочести́выя мýдре уби́л есть.
Богорóдичен: Пресвятáя Богорóдице, спасù нас.
Чтец: Ми́лостива ми Судiю́, Сы́на Твоегó, Богорóдице Дéво,/ Твои́ми моли́твами бы́ти в день Судá/ Избáвителя же лю́тых, Мáти, умоли́:// на Тя бо еди́ну надéжду мою́ возлагáю.
Глас 1
Хор: Святíи прáотцы, молúте Бóга о нас.
Чтец: Óбраз Хрiстóвы смéрти был еси́ я́ве, Iсаáче преблажéнне,/ возводи́мь óтчим благопокорéнiем, éже закалáтися./ Сегó рáди ублажи́лся еси́ и раб Бóжiй вои́стинну яви́лся еси́ бли́жнiй,// со всéми прáведными вселя́яся. (Двáжды)
Хор: Святíи прáотцы, молúте Бóга о нас.
Чтец: Яви́ся Iáков угóдник, вéрнейшiй всех Бóга;/ тéмже и брáся со А́нгелом, ум зря Бóга наречéся/ и, спя, Божéственную лéствицу ви́де,// на нéйже Бог утверждáшеся, плóтiю обложи́выйся за благосты́ню.(Двáжды)
Слáва Ѻтцý и Сы́ну и Святóму Дýху.
Тропáрь: Любя́ Ióсиф ко отцý благопокорéнiе,/ в ров ввéржен, продадéся/ во óбраз заклáннаго и в рóве положéннаго Хрiстá;/ пшеницодáвец же Еги́пта бысть, целомýдр быв и прáведен,// царь же страстéй и́стиннейшiй.
И ны́не и прúсно и во вéки векóв. Амúнь.
Богорóдичен: Млáдо на земли́ Отрочá познавáется,/ Сый со Отцéм при́сно и Дýхом,/ пеленáми же повивáется, И́же зéмлю повивáяй мглóю я́ве,/ и в я́слех безсловéсных возлежи́т.// Сегó ны́не предпрáзднуем, рáдующеся, безсéменное рождествó.
Катавáсiя Рождествá (глас 1): Из утрóбы Ióну младéнца изблевá морскíй зверь,/ яковá прiя́т,/ в Дéву же всéльшееся Слóво/ и плоть прiéмшее прóйде сохрáншее нетлéнну./ Егóже бо не пострадá истлéнiя,// Рóждшую сохрани́ невреждéнну.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк прáотцев, глас 6: Рукопи́саннаго óбраза не почéтше,/ но Неопи́санным Существóм защити́вшеся, треблажéннии,/ в пóдвизе огня́ прослáвистеся,/ средé же плáмене нестерпи́маго стоя́ще, Бóга призвáсте:/ ускори́, о Щéдрый, и потщи́ся, я́ко Ми́лостив, в пóмощь нáшу,// я́ко мóжеши хотя́й.
Íкос: Простри́ Твою́ рýку,/ éюже дрéвле прiя́ша искушéнiе еги́птяне борю́щiи и еврéе бори́мiи./ Не остáви нас, да не пожрéт нас смерть, жáждущая нас,/ и сатанá, ненави́дяй нас,/ но прибли́жися нам и пощади́ дýши нáша,/ я́коже пощади́л еси́ иногдá óтроки Твоя́,/ сýщiя в Вавилóне, непрестáнно слáвящiя Тя,/ и ввéрженныя Тебé рáди в пещь,/ и от сея́ вопiю́щiя Ти:/ ускори́, Щéдрый, и потщи́ся, я́ко Ми́лостив, на пóмощь нáшу,// я́ко мóжеши хотя́й.
ПЕСНЬ 7
Iрмóс: Я́коже дрéвле/ благочести́выя три óтроки ороси́л еси́/ в плáмени халдéйстем,/ свéтлым Божествá огнéм/ и нас озари́,/ благословéн еси́, взывáющiя,// Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Раздрáся церкóвная свéтлая катапетáсма, в распя́тiи Содéтеля,/ сокровéнную в Писáнiи явля́ющи вéрным и҆́стину,// благословéн еси́, зовýщим, Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Прободéнным Твои́м рéбром,/ кáплями Боготóчныя Животворя́щiя Крóве, Хрiстé,/ смотри́тельно кáплющiя на зéмлю,/ сýщих от земли́ возсоздáл еси́,// благословéн еси́, зовýщих, Бóже отéц нáших.
Хор: Пресвятáя Трóице, Бóже наш, слáва Тебé.
Трóичен: Дýха Благáго со Отцéм прослáвим, и с Сы́ном Единорóдным,/ Еди́но в Трiéх вéрнiи чтýще Начáло, и Еди́но Божествó:// благословéн еси́, зовýще, Бóже отéц нáших.
Глас 8
Хор: Святíи óтроцы, молúте Бóга о нас.
Чтец: Глас Боголюбéзен поя́шеся из среды́ огня́ Вседержи́телю,/ Азáрiя бо, Божéственный лик состáвив,/ песнь воспевáя, глагóлаше:// благословéн Бог отéц нáших.
Хор: Святíи óтроцы, молúте Бóга о нас.
Чтец: Цевни́ца ю́ношей богослóвствует всех Бóга и Вседержи́теля,/ тем в пещи́ я́сно я́вльшагося,/ и песнь воспевáху, глагóлюще:// благословéн Бог отéц нáших.
Хор: Святíи óтроцы, молúте Бóга о нас.
Чтец: Три, в пещь ввéрженныя, ви́дев царь,/ я́ко узрé четвéртаго вид,/ Сы́на пронаречé Бóжiя и всем возопи́:// благословéн Бог отéц нáших.
Богорóдичен: Пресвятáя Богорóдице, спасù нас.
Чтец: Имéя просвещéн Божéственною зарéю ум, Данiи́ле Богоблажéнне,/ Дéвы рождествó я́ве предвид́ел еси́, тáинственными óбразы образýемо,// благословéн, - вопiя́, - Бóже отéц нáших.
Глас 1
Хор: Святíи прáотцы, молúте Бóга о нас.
Чтец: Да воспоéтся Анáнiя, Азáрiя, Мiсаи́л с Данiи́лом,/ пещь угаси́вше óгненную, и львóв обуздáвше стремлéнiя,/ и Хрiстý соглáсно пою́ще:// отцéв Бóже, благословéн еси́. (Двáжды)
Хор: Святíи прáотцы, молúте Бóга о нас.
Чтец: Закóнно пострадáв в напáстех и неослáбных скóрбех,/ угóдник наречéся Íов Бóжiй всеи́стиннейший,/ крóток, незлóбив, прав, совершéн, непорóчен, вопiя́:// отцéв Бóже, благословéн еси́.(Двáжды)
Слáва Ѻтцý и Сы́ну и Святóму Дýху.
Тропáрь: Вéрою Моисéя, Аарóна же и Óра почти́м,/ восхваля́юще Iисýса и Левíю свящéннейшаго,/ Гедеóна же и Сампсóна, и взывáем:// отцéв Бóже, благословéн еси́.
И ны́не и прúсно и во вéки векóв. Амúнь.
Богорóдичен: Се, я́коже проречé прорóк,/ во чрéве зачá Неискусобрáчная Бóга/ и роди́ти я́ве и́дет в вертéпе Вифлеéмле./ Емýже вси поéм:// отцéв Бóже, благословéн еси́.
Катавáсiя Рождествá (глас 1): Óтроцы, благочéстiю совоспитáни,/ злочести́ваго велéнiя небрéгше,/ óгненнаго прещéнiя не убоя́шася,/ но, посредé плáмени стоя́ще, поя́ху:// отцéв Бóже, благословéн еси́.
ПЕСНЬ 8
Iрмóс: Нестерпи́мому огню́ соедини́вшеся,/ Богочéстiя предстоя́ще, ю́ноши,/ плáменем же невреждéни,/ Божéственную песнь поя́ху:/ благослови́те, вся делá Госпóдня, Гóспода// и превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Раздрáся церкóвная свéтлость,/ егдá крест Твой водрузи́ся на лóбнем,/ и тварь преклоня́шеся стрáхом, воспевáющи:/ благослови́те вся делá Госпóдня, Гóспода,// пóйте и превозноси́те Егó во вéки.
Хор: Слáва, Гóсподи, Святóму Воскресéнiю Твоемý.
Чтец: Воскрéсл еси́ Хрiстé из грóба,/ и пáдшаго прельщéнiем, дрéвом испрáвил еси́ Божéственною си́лою, зовýща и глагóлюща:/ благослови́те вся делá Госпóдня, Гóспода,// пóйте и превозноси́те Егó во век.
Хор: Пресвятáя Богорóдице, спасù нас.
Богорóдичен: Храм Бóжiй яви́лася еси́ Вмести́лище одушевлéнное, и Ковчéг:/ Творцá бо человéком, Богороди́тельнице Пречи́стая, примири́ла еси́,/ и достóйно вся делá поéм Тя,// и превознóсим во вся вéки.
Глас 8
Хор: Святíи óтроцы, молúте Бóга о нас.
Чтец: Авраáмово благорóдiе сохрани́ти тщáщеся,/ свóйственное к немý стяжáсте основáнiе вéры и надéжды, преподóбнiи,/ терпéнiе и напáстем пождáнiе, вопиiю́ще:/ благослови́те, свящéнницы, Влады́ку,// лю́дiе, превозноси́те Егó во вéки.
Хор: Святíи óтроцы, молúте Бóга о нас.
Чтец: Я́ко свети́ла просiя́вше, и зéмлю онебеси́вше,/ и благочéстiя просвещéнiем осiя́вшеся,/ всемíрное состáвльше ликостоя́нiе, пою́т от напáстей спáсшему Влады́це:/ óтроцы, благослови́те, свящéнницы воспóйте,// лю́дiе, превозноси́те во вся вéки.
Хор: Святíи óтроцы, молúте Бóга о нас.
Чтец: Ю́ношески погаси́вше распали́мую пещь/ и львов чéлюсти загрáждше, Давíдовы внýцы,/ ны́не рáдующеся, пою́т Тя, Благодéтеля, Царя́ всех:/ óтроцы, благослови́те, свящéнницы, воспóйте,// лю́дiе, превозноси́те во вся вéки.
Богорóдичен: Пресвятáя Богорóдице, спасù нас.
Чтец: Тайнонаучáет, Пречи́стая, Данiи́л мудрéйшiй,/ и предживописýют óтроцы трié Рождествó Твоé, Богомýдреннiи,/ óбразы зря́ще из утрóбы Твоея́ Прошéдшаго несказáнно;/ Егóже дéти благословя́т, свящéнницы воспевáют,// лю́дiе превознóсят во вся вéки.
Продолжение здесь