Неделя 28 по Пятидесятнице, святых праотец. Глас 3. УТРЕНЯ(окон-ие).ЧАС ПЕРВЫЙ. Служба мирским чином
25 декабря́ 2022 гóда. Недéля 28 по Пятидеся́тнице, святы́х прáотцев. Глас 3. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени (окончанiе).
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéние ýтрени с канóном)
Глас 1
Хор: Святíи прáотцы, молúте Бóга о нас.
Чтец: Днесь сýщих от вéка Божéственную пáмять совершáем честны́х отéц,/ Адáма, А́веля же, Си́фа, и Нóя,/ и Енóса, и Енóха, и Авраáма,/ Мелхiседéка и Íова, Iсаáка и вéрнаго Iáкова,/ да благослови́т тварь, вопiю́ще, Гóспода// и превознóсит во вся вéки.(Двáжды)
Хор: Святíи прáотцы, молúте Бóга о нас.
Чтец: Полк Богокрáсный Божéственных отéц да восхвáлим,/ Варáка, и Нафáна, и Елеазáра,/ Iосíю и Давíда, Iеффа́я, Самуи́ла же,/ прéдняя зря́ща чéстне и взывáюща:/ да благослови́т тварь вся Гóспода// и превознóсит Егó во вéки.
Хор: Святíи прáотцы, молúте Бóга о нас.
Чтец: Похвалý песнопéсненно да принесéм Бóжiим прорóком,/ восхваля́юще Iосíю и Михéя, Софóнiя и Аввакýма,/ Захáрiю и Ióну, Аггéя же и Амóса/ и со Авдíем Малахíю и Наýма,/ Исáiю, и Iеремíю, и Iезекíиля,// кýпно Данiи́ла, Илiю́ и Елiссéя.
Благословúм Отцá, и Сы́на, и Святáго Дýха, Гóспода.
Тропáрь: Глагóлы Трóическими Всесвятýю воспоéм, вéрнiи, Трóицу,/ Отцá Безначáльнаго, Сы́на же и Прáваго Дýха Святáго - Еди́ницу Трiипостáсную,/ Ю́же вся́кое дыхáнiе слáвит, зовýще:/ да благослови́т тварь вся Гóспода// и превознóсит Егó во вéки.
И ны́не и прúсно и во вéки векóв. Амúнь.
Богорóдичен: Яви́лся еси́ от дéвственных, Хрiстé, кровéй,/ воплощáемь неизречéнным слóвом/ и я́ко Младéнец совершéн в вертéпе премнóжеством благоутрóбiя, Iисýсе, раждáяся;/ звездá же Тя издалéча возвести́ звездослóвцем,// пóйте, вéрою зовýщим, и превозноси́те Хрiстá во вéки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя Рождествá (глас 1): Чýда преестéственнаго/ росодáтельная изобрази́ пещь óбраз:/ не бо, я́же прiя́т, пали́т ю́ныя,/ я́ко нижé огнь Божествá Дéвы,/ в Ню́же вни́де утрóбу./ Тем воспевáюще, воспоéм:/ да благослови́т тварь вся Гóспода// и превознóсит во вся вéки.
Возглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Нóвое чýдо и Боголéпное:/ деви́ческую бо дверь затворéнную/ я́ве прохóдит Госпóдь,/ наг во вхóде,/ и плотонóсец яви́ся во исхóде Бог,/ и пребывáет дверь затворéна./ Сiю́ неизречéнно// я́ко Богомáтерь, величáем.
Хор: Слáва, Гóсподи, Святóму Воскресéнiю Твоемý.
Чтец: Стрáшно есть зрéти Тебé, Творцá/ на дрéве воздви́жена, Слóве Бóжiй,/ плóтски же стрáждуща Бóга за рабы́,/ и во грóбе бездыхáнна лежáща,/ мéртвыя же из áда разреши́вша:// тéмже Тя, Хрiстé, я́ко Всеси́льна, величáем.
Хор: Слáва, Гóсподи, Святóму Воскресéнiю Твоемý.
Чтец: Из тли смéртныя спасл еси́, Хрiстé, прáотцы,/ положéн быв во грóбе мертв,/ и живóт процвéл еси́, мéртвыя воскреси́в,/ руководи́в естествó человéческое ко свéту,/ и в Божéственное облéк нетлéнiе.// Тéмже истóчника Тя свéта при́сно живáго величáем.
Хор: Пресвятáя Богорóдице, спасú нас.
Богорóдичен: Храм и Престóл яви́лася еси́ Бóжiй,/ вóньже всели́ся И҆́же в вы́шних сый,/ рождéйся неискусомýжно, Всечи́стая,/ плóти Твоея́ не отвéрз вся́чески вратá./ Тéмже непрестáнными, Чи́стая, моли́твами Твои́ми,// язы́ки вáрварскiя скóро до концá покори́.
Глас 8
Хор: Святíи óтроцы, молúте Бóга о нас.
Чтец: Достигóсте кончи́ну желáемую/ и желáнiй Крáйнейшему предстоитé в Небéсных чертóзех,// óтроцы всеблажéннiи.
Хор: Святíи óтроцы, молúте Бóга о нас.
Чтец: Рáдующеся, рукоя́тiе, éже от слез, дóбраго вáшего земледéланiя прiя́сте,// нетлéнiя клас плодоноси́вше.
Хор: Святíи óтроцы, молúте Бóга о нас.
Чтец: Возсiя́ свéтлость ны́не вам достóйно,/ и весéлiе сéрдца процветé:// отонýдуже бо отбежé печáль, всели́стеся.
Богорóдичен: Пресвятáя Богорóдице, спасú нас.
Чтец: Пáжить смéртную устáвила еси́, Дéво,/ Жизнодáвца рóждши и Гóспода,// животворя́щаго вéрою величáющiя Тя.
Глас 1
Хор: Святíи прáотцы, молúте Бóга о нас.
Чтец: Крéпостiю Твоéю дрéвле си́лы сотвори́ша дщéри, Гóсподи,/ А́нна, и Iудíфь, и Девóра, Олдá, Iаи́ль же,/ Есфи́рь, Сáрра, Марiáм же Моисéева,// Рахи́ль, и Ревéкка, и Руфь, велемýдрыя.(Двáжды)
Хор: Святíи прáотцы, молúте Бóга о нас.
Чтец: Я́ко угаси́вшiя óтроки святы́я пещь свящéнно почти́м/ кýпно с Данiи́лом прорóком и всéми прáведными я́ве,/ прéжде закóна облистáвшими дóбре// и в закóне Влады́це угоди́вшими.
Хор: Святíи прáотцы, молúте Бóга о нас.
Чтец: Премýдрiи Божéственнiи прорóцы бы́вше Авраáмовы внýцы,/ Е́же от Авраáма и Iýды рóждшееся Слóво Бóжiе провозвести́ша Дýхом,// тех мольбáми, Iисýсе, вся ущéдри.
Слáва Ѻтцý и Сы́ну и Святóму Дýху.
Тропáрь: Освяти́ся вся тварь пáмятiю вáшею/ и, торжествýющи, зовéт, рáбски вопiю́щи:/ мольбý Гóсподу при́сно принеси́те, блажéннiи,// улучи́ти вéчных благ благохвáлящим вас.
И ны́не и прúсно и во вéки векóв. Амúнь.
Богорóдичен: Облеки́йся в мя, от Дéвы предгрядéт,/ и в вертéпе раждáется Слóво О́тчее несли́тно:/ ликýй, тварь, глáсы благодáрственными величáющи// Тогó éже за милосéрдiе всесвятóе снизшéствiе.
Катавáсiя Рождествá (глас 1): Тáинство стрáнное ви́жу и преслáвное:/ Нéбо - вертéп, Престóл Херувíмскiй - Дéву,/ я́сли - вмести́лище,/ в ни́хже возлежé Невмести́мый - Хрiстóс Бог,// Егóже, воспевáюще, величáем.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостилáрiй воскрéсный шесты́й: Показýя, я́ко человéк еси́ Спáсе, по существý,/ посредé став воскрéс от грóба,/ и брáшна сопричасти́лся еси́,/ учи́л еси́ крещéнiю покая́нiя./ Áбiе же к Небéсному вознéслся еси́ Ѻтцý,/ и ученикóм Утéшителя послáти обещáл еси́, Пребожéственный Богочеловéче.// Слáва Твоемý востáнiю.
Слáва Ѻтцý и Сы́ну и Святóму Дýху.
Светúлен прáотцев: Адáма восхвáлим,/ А́веля, Си́фа и Енóса, Енóха и Нóя,/ Авраáма, Iсаáка и Iáкова,/ Моисéя, Íова и Аарóна, Елеазáра и Iисýса,/ Варáка, Сампсóна и Iеффáя,// Давíда и Соломóна.
И҆ ны́не и прúсно и во вéки векóв. Амúнь.
Богорóдичен из Минéи: Сóлнце вели́кое - Создáтель - от Неискусомýжныя Дéвы,/ я́же от Адáма просвети́ти в Вифлеéм тщи́тся.// Тéмже возвещáет чýдо прáотец всесветлéйшая пáмять.
ХВАЛИТНЫ
Хор, глас 3: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéние положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 3: Прiиди́те вси язы́цы,/ уразумéйте стрáшныя тáйны си́лу:/ Хрiстóс бо Спас наш, Éже в начáле Слóво,/ распя́тся нас рáди, и вóлею погребéся,/ и воскрéсе из мéртвых, éже спасти́ вся́ческая:// Томý поклони́мся.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Повéдаша вся чудесá/ стрáжiе Твои́, Гóсподи,/ но собóр суеты́ испóлни мздóю десни́цу их,/ скры́ти мня́ше воскресéнiе Твоé,// éже мiр слáвит: поми́луй нас.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Рáдости вся испóлнишася/ воскресéнiя искýс прiи́мша:/ Марíя бо Магдали́на ко грóбу прiи́де,/ обрéте Áнгела на кáмени седя́ща,/ ри́зами блистáющася и глагóлюща:/ что и҆́щете живáго с мéртвыми?/ Несть зде, но востá, я́коже речé,// предваря́я вы в Галiлéи.
Хвалúте Егó во глáсе трýбнем, хвалúте Егó во псалтúри и гýслех.
Стшхúра: Во свéте Твоéм, Влады́ко,/ ýзрим свет, Человеколю́бче:/ воскрéсл бо еси́ из мéртвых,/ Спасéнiе рóду человéческому дáруя:/ да Тя вся тварь славослóвит Еди́наго Безгрéшнаго,// поми́луй нас.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúры прáотцев, глас 2: Вси честны́х ны́не прáотец пáмять совершáем,/ пою́ще Богоугóдное сих житié,// егóже рáди возвели́чишася.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Вси честны́х ны́не прáотец пáмять совершáем,/ пою́ще Богоугóдное сих житié,// егóже рáди возвели́чишася.
Благословéн есù, Гóсподи Бóже отéц нáших,/ и хвáльно, и прослáвлено И҆́мя Твоé во вéки. (Дан.3:26)
Стiхúра: Угаси́ша си́лу óтроцы óгненную,/ ликýюще посредé пéщи// и пою́ще Бóга всеси́льнаго
Я́ко прáведен есù о всех,/ я́же сотворúл есù нам. (Дан.3:27)
Глас 6: В рóве заключéн, зверéм сообитáтель,/ Данiи́л прорóк// непричáстен сих показáся озлоблéнiя.
Слáва Ѻтцý и Сы́ну и Святóму Дýху.
Глас 7: Прiиди́те вси, вéрно торжествýим/ прéжде закóна отéц,/ Авраáма и сýщих с ним лéтнюю пáмять./ Iýдово плéмя достóйно почти́м,/ и́же в Вавилóне óтроки, угаси́вшiя пéщный плáмень,/ я́ко Трóицы óбраз с Данiи́лом восхвáлим,/ прорóческая проречéнiя извéстно держáще,/ со Исáiем велеглáсно возопiи́м:/ се Дéва во чрéве прiи́мет/ и роди́т Сы́на Емманýила,// И́же есть с нáми Бог.
И ны́не и прúсно и во вéки векóв. Амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрiстóс Бог,// благоволи́вый тáко, слáва Тебé.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Óтче Вседержи́телю, Гóсподи Сы́не Единорóдный, Iисýсе Хрiстé, и Святы́й Дýше. Гóсподи Бóже, Áгнче Бóжiй, Сы́не Отéчь, взéмляй грех мíра, помилуй нас. Взéмляй грехѝ мíра, прiимѝ молитву нáшу. Седя́й одеснýю Отцá, помилуй нас. Яко Ты есѝ Един Свят; Ты есѝ Един Госпóдь, Iисýс Хрiстóс, в слáву Бóга Отцá, ами́нь.
На всяк день благословлю́ Тя и восхвалю́ имя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено имя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 1: Днесь Спасéнiе мíру бысть,/ поéм Воскрéсшему из грóба,/ и Начáльнику жи́зни нáшея:/ разруши́в бо смéртiю смерть,// побéду дадé нам и вéлiю ми́лость.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Гóсподи поми́луй (12раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных христiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
ОТПУСТ
Гóсподи, Iисýсе Хрiстé, Сыне Бóжiй, моли́твами пречи́стыя Своея́ Мáтере, святы́х слáвных и всехвáльных Апóстол, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Стiхúра евáнгельская шестáя, глас 6: И҆́стинный мир Ты, Хрiстé, к человéком Бóжiй,/ мир Твой дая́, по востáнiи ученикóм,/ пристрáшны показáл еси́ я́,/ мня́щiя дух ви́дети:/ но ути́шил еси́ мятéж души́ их,/ показáвый рýце и нóзе Твои́./ Обáче не вéрующим ещé,/ брáшен причащéнiем, и учéнiй воспоминáнiем,/ отвéрзл еси́ их ум, éже разумéти Писáнiя:/ и҆́мже и Ѻ́тческое обетовáнiе обещáв, и благослови́в я́,/ отступи́л еси́ на нéбо./ Тéмже с ни́ми покланя́емся Тебé,// Гóсподи, слáва Тебé.
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 3: Да веселя́тся небéсная, да рáдуются земнáя; я́ко сотворѝ держáву мы́шцею Своéю Госпóдь, попрá смéртiю смерть,пéрвенец мéртвых бысть; из чрéва áдова избáви нас, и҆ подадé мíрови вéлiю ми́лость.
Слáва Отцý и Сы́ну и Святóму Дýху.
Тропáрь прáотцев, глас 2: Вéрою прáотцы оправдáл еси́, от язы́к тéми предобручи́вый Цéрковь: хвáлятся в слáве святíи, я́ко от сéмене их есть Плод благослáвен, без сéмене Рóждшая Тя. Тех моли́твами, Хрiстé Бóже, поми́луй нас.
И ны́не и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сыне Бóжїй, поми́луй нас. Ами́нь.
КОНДАК
Кондáк прáотцев, глас 6: Рукопи́саннаго óбраза не почéтше, но Неопи́санным Существóм защити́вшеся, треблажéннии, в пóдвизе огня́ прослáвистеся, средé же плáмене нестерпи́маго стоя́ще, Бóга призвáсте: ускори́, о Щéдрый, и потщи́ся, я́ко Ми́лостив, в пóмощь нáшу, я́ко мóжеши хотя́й.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстé, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 раза)
Гóсподи, благословᴎ́.
Гóсподи, Iисýсе Хрїстé, Сыне Бóжїй, моли́твами пречи́стыя Своея́ Мáтере, святы́х слáвных и всехвáльных Апóстол, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу