Неделя 26 по Пятидесятнице. Прмч. Стефана Нового, глас 1. ВСЕНОЩНОЕ БДЕНИЕ. УТРЕНЯ. КАНОН.
11 декабря́ 2022 гóда. Недéля 26 по Пятидеся́тнице. Преподобномýченика Стефáна Нóваго. Глас 1. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени.
Начало зри здесь ( великая вечéрня) и здесь ( ýтреня)
ТРОПАРИ ВОСКРЕСНЫЕ, ГЛАС 5
Благословéн есú, Гóсподи,/научù мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есú, Гóсподи,/научù мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел миронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есú, Гóсподи,/научù мя оправдáнiем Твоúм.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есú, Гóсподи,/научù мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Чтец: Аллилýiа, аллилýiа, аллилýiа, слáва Тебé Бóже. (3 раза)
Гóсподи, поми́луй. (3 раз)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоú воскрéсны, глас 1: Разбóйничо покая́нiе рай окрáде,/ плачь же мvронóсиц рáдость возвести́,/ я́ко воскрéсл еси́, Хрiстé Бóже,// подая́й мíрови вéлiю ми́лость.
СТЕПЕННА, ГЛАС 1
1 АНТИФОН
Хор: Внегдá скорбéти ми, услы́ши моя́ болéзни,// Гóсподи, Тебé зовý. (Двáжды)
Пусты́нным непрестáнное Божéственное желáнiе бывáет,// мíра сýщим сýетнаго кромé. (Двáжды)
Слáва Отцý и Сы́ну и Святóму Дýху.
Святóму Дýху честь и слáва,/ я́коже Отцý подобáет, кýпно же и Сы́ну,// сегó рáди да поéм Трóице Единодержáвiе.
И ны́не и прúсно и во вéки векóв. Амúнь.
Святóму Дýху честь и слáва,/ я́коже Отцý подобáет, кýпно же и Сы́ну,// сегó рáди да поéм Трóице Единодержáвiе.
2 АНТИФОН
На гóры Твоúх вознéсл есú мя закóнов,// добродéтельми просветú, Бóже, да пою́ Тя. (Двáжды)
Деснóю Твоéю рукóю прiи́м Ты, Слóве,/ сохрани́ мя, соблюди́,// да не огнь менé опали́т грехóвный. (Двáжды)
Слáва Отцý и Сы́ну и Святóму Дýху.
Святы́м Дýхом вся́кая тварь обновля́ется,/ пáки текýщи на пéрвое,// равномóщен бо есть Отцý и Слóву.
И ны́не и прúсно и во вéки векóв. Амúнь.
Святы́м Дýхом вся́кая тварь обновля́ется,/ пáки текýщи на пéрвое,// равномóщен бо есть Отцý и Слóву.
3 АНТИФОН
О рéкших мне, внúдем во дворы́ Госпóдни,// возвеселúся мой дух, срáдуется сéрдце. (Двáжды)
В домý Дави́дове страх вели́к:/ тáмо бо престóлом постáвленным,// сýдятся вся племенá земнáя, и язы́цы. (Двáжды)
Слáва Отцý и Сы́ну и Святóму Дýху.
Святóму Дýху, честь, поклонéнiе, слáву и держáву,/ я́коже Отцý достóит, и Сы́нови подобáет приноси́ти:// Еди́ница бо есть Трóица Естествóм, но не Ли́цы.
И ны́не и прúсно и во вéки векóв. Амúнь.
Святóму Дýху, честь, поклонéнiе, слáву и держáву,/ я́коже Отцý достóит, и Сы́нови подобáет приноси́ти:// Еди́ница бо есть Трóица Естествóм, но не Ли́цы.
ПРОКИМЕН
Чтец: Проки́мен, глас пéрвый. Ны́не воскреснý, глагóлет Госпóдь, положýся во Спасéнiе, не обиню́ся о нем. (Пс.11:6Б)
Хор: Ны́не воскреснý, глагóлет Госпóдь,/ положýся во Спасéнiе, не обиню́ся о нем.
Чтец: Словесá Госпóдня, словесá чи́ста.(Пс.11:7А)
Хор: Ны́не воскреснý, глагóлет Госпóдь,/ положýся во Спасéнiе, не обиню́ся о нем.
Чтец: Ны́не воскреснý, глагóлет Госпóдь.
Хор: Положýся во Спасéнiе, не обиню́ся о нем.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ныне и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
От Луки́ Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Лк.зач.112): Во врéмя óно, во еди́ну от суббóт, зелó рáно, прiидóша жены́ на гроб, нося́ще я́же уготóваша аромáты, и другíя с ни́ми. Обретóша же кáмень отвалéн от грóба, и вшéдше, не обретóша телесé Гóспода Iисýса. И бысть не домышля́ющимся им о сем, и се мýжа два стáста в них в ри́зах блещáщихся. Пристрáшным же бы́вшим им, и поклóншим ли́ца на зéмлю, рекóста к ним: что и́щете живáго с мéртвыми? Несть зде, но востá. Помяни́те, я́коже глагóла вам, ещé сый в Галiлéи, глагóля, я́ко подобáет Сы́ну Человéческому прéдану бы́ти в рýце человéк грéшник, и прóпяту бы́ти, и в трéтiй день воскрéснути. И помянýша глагóлы Егó. И возврáщшася от грóба, возвести́ша вся сiя́ единомунáдесяте и всем прóчим. Бя́ше же Магдали́на Марíя, и Iоáнна, и Марíя Iáковля, и прóчiя с ни́ми, я́же глагóлаху ко апóстолом сiя́. И яви́шася пред ни́ми я́ко лжа глагóлы их, и не вéроваху им. Петр же востáв течé ко грóбу, и прини́к ви́де ри́зы еди́ны лежáща, и оты́де, в себé дивя́ся бы́вшему.
[Русский синодальный перевод]В то время, в первый же день недели, очень рано, неся приготовленные ароматы, пришли они ко гробу, и вместе с ними некоторые другие; но нашли камень отваленным от гроба. И, войдя, не нашли тела Господа Иисуса. Когда же недоумевали они о сем, вдруг предстали перед ними два мужа в одеждах блистающих. И когда они были в страхе и наклонили лица свои к земле, сказали им: что вы ищете живого между мертвыми? Его нет здесь: Он воскрес; вспомните, как Он говорил вам, когда был еще в Галилее, сказывая, что Сыну Человеческому надлежит быть предану в руки человеков грешников, и быть распяту, и в третий день воскреснуть. И вспомнили они слова Его; и, возвратившись от гроба, возвестили всё это одиннадцати и всем прочим. То были Магдалина Мария, и Иоанна, и Мария, мать Иакова, и другие с ними, которые сказали о сем Апостолам. И показались им слова их пустыми, и не поверили им. Но Петр, встав, побежал ко гробу и, наклонившись, увидел только пелены лежащие, и пошел назад, дивясь сам в себе происшедшему. (Лк 24:1-12)
Хор: Слáва Тебé, Гóсподи, слáва Тебé.
Воскресéнiе Хрiстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрiстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрiстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
Глас 2: Днесь храм одушевлéнный и Вели́каго Царя́/ в храм вхóдит/ Томý уготóватися в Божéственное жили́ще.// Лю́дiе, весели́теся.
И҆ ны́не и прúсно и во вéки векóв. Амúнь.
Днесь храм одушевлéнный и Вели́каго Царя́/ в храм вхóдит/ Томý уготóватися в Божéственное жили́ще.// Лю́дiе, весели́теся.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра прáздника, глас 4: Днесь Боговмести́мый храм, Богорóдица,/ в храм Госпóдень привóдится,/ и Захáрiя Сiю́ прiéмлет;/ днесь святáя святы́х рáдуются,/ и лик Áнгельскiй тáинственно торжествýет./ С ни́миже и мы, прáзднующе днесь,/ с Гаврiи́лом возопiи́м:/ рáдуйся, Благодáтная, Госпóдь с Тобóю,// имéяй вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 1
(совмещенный с канóном крестовоскрéсным (глас 1), Борóдицы (глас 1) и канóном прмч. Стефáна Нóваго, глас 6)
ПЕСНЬ 1
Iрмóс: Твоя́ победи́тельная десни́ца/ Боголéпно в крéпости прослáвися:/ та бо, Безсмéртне,/ я́ко всемогýщая, проти́вныя сотрé,// Iзрáильтяном путь глубины́ новосодéлавшая.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): И҆́же рукáма пречи́стыма от пéрсти/ богодéтельне испéрва создáв мя,/ рýце распростéрл еси́ на крестé,/ от земли́ взывáя тлéнное моé тéло,// éже от Дéвы прiя́л еси́.
Хор: Слáва, Гóсподи, Святóму Воскресéнiю Твоемý.
Чтец: Умерщвлéнiе подъя́л еси́ менé рáди,/ и дýшу смéрти прéдал еси́,/ И҆́же вдохновéнiем божéственным дýшу ми вложи́вый,/ и отреши́в вéчных уз, и совоскреси́в// нетлéнiем прослáвил еси́.
Хор: Пресвятáя Богорóдице, спасù нас.
Богорóдичен: Рáдуйся, благодáти истóчниче,/ рáдуйся лéствице, и двéре небéсная,/ рáдуйся свéщнице, и рýчко златáя, и горó несекóмая,// Я́же Жизнодáвца Хрiстá мíрови рóждшая.
Канон крестовоскресный, глас 1
Хор: Слáва, Гóсподи, Крестý Твоемý Честнóму и Воскресéнiю.
Чтец: Хрiстóс обожáет мя, воплощáяся,/ Хрiстóс мя вознóсит, смиря́яся,/ Хрiстóс безстрáстна мя содéловает,/ страждá Жизнодáвец естествóм плóти.// Тéмже воспевáю благодáрственную песнь: я́ко прослáвися.
Хор: Слáва, Гóсподи, Крестý Твоемý Честнóму и Воскресéнiю.
Чтец: Хрiстóс вознóсит мя, распинáемь,/ Хрiстóс совоскрешáет мя, умерщвля́емь,/ Хрiстóс жизнь мне дáрует./ Тéмже с весéлiем рукáма плещáя,// пою́ Спаси́телю побéдную песнь: я́ко прослáвися.
Канон Богородицы, глас 1
Хор: Пресвятáя Богорóдице, спасù нас.
Чтец: Кýю Ти достóйную песнь нáше принесéт неможéнiе?/ тóчiю обрáдовательную,/ éйже нас Гаврiи́л тáйно научи́л есть:// рáдуйся, Богорóдице Дéво, Мáти Неневéстная.
Хор: Пресвятáя Богорóдице, спасù нас.
Чтец: Приснодéве и Мáтери Царя́ вы́шних сил,/ от чистéйша сéрдца, вéрнiи, духóвне возопiи́м:// рáдуйся, Богорóдице Дéво, Мáти Неневéстная.
Канон преподобномученика Стефана, глас 6
Хор: Святы́й преподобномýчениче Стефáне, молù Бóга о нас.
Чтец: Рáдостно ты прошéд тéсную стезю́ постá,/ мучéнiя широтóю врáжiя попали́л еси́ стремлéнiя// и прострáнную жизнь, блажéнне, наслéдовал еси́. (Двáжды)
Хор: Святы́й преподобномýчениче Стефáне, молù Бóга о нас.
Чтец: Кóрень тя, неплóдный прéжде, плóдствует Áнны тезоимени́тый,/ я́ко дрéвле Самуи́ла, и дáвшему тя даéт Бóгу,// житiя́ твоегó, мýдре, благодáть знáменающи.
Хор: Святы́й преподобномýчениче Стефáне, молù Бóга о нас.
Чтец: В свящéннейшiй Божéственный монáхов пришéд чин,/ я́ко светлéйшая звездá, добродéтельми возсiя́л еси́,// вéрныя озаря́я тáинственно, преподóбне Стефáне.
Слáва Отцý и Сы́ну и Святóму Дýху.
Тропáрь: Стесни́в тéло заключéнiем тéснаго дóму,/ впери́л еси́ ум к небéсным, мýдре,// восхождéнiи дóбре распространя́яся.
И ны́не и прúсно и во вéки векóв. Амúнь.
Богорóдичен: Непрохóдную дверь, чи́стый чистоты́ храм,/ дóбрую в женáх, Святýю Влады́чицу// глáсы свящéнными, свящéннiи лю́дiе, прослáвим.
Катавáсiя Рождествá (глас 1): Хрiстóс раждáется - слáвите,/ Хрiстóс с Небéс - сря́щите./ Хрiстóс на земли́ - возноси́теся./ Пóйте Гóсподеви, вся земля́,/ и весéлiем воспóйте, лю́дiе,/ я́ко прослáвися.
ПЕСНЬ 3
Iрмóс: Еди́не вéдый человéческаго существá нéмощь/ и ми́лостивно в не вообрáжся,/ препоя́ши мя с высоты́ си́лою,/ éже вопи́ти Тебé, Святы́й,/ одушевлéнный хрáме// неизречéнныя слáвы Твоея́, Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Бог Сый мне, Блáже, пáдшаго ущéдрил еси́,/ и сни́ти ко мне благоволи́в, вознéсл мя еси́ распя́тiем,/ éже вопи́ти Тебé, Святы́й:// Хрáме одушевлéнный неизречéнныя Твоея́ слáвы, Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Живóт ипостáсный Хрiстé сый,/ в истлéвша мя, я́ко Милосéрдый Бог, обóлкся,/ в персть смéртную сошéд, Влады́ко,/ смéртную держáву разруши́л еси́,/ и мертв триднéвен воскрéс,// в нетлéнiе мя облéкл еси́.
Хор: Пресвятáя Богорóдице, спасù нас.
Богорóдичен: Бóга зачéнши во чрéве, Дéво, Дýхом Пресвяты́м,/ пребылá еси́ неопали́ма,/ понéже Тя купинá законополóжнику Моисéю,/ пали́мую нежегóмо, я́ве предвозвести́,// огнь нестерпи́мый прiéмшую.
Глас 1
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же на своé рáмо заблуждáемое овчá взéмшему,/ и низложи́вшему дрéвом егó грех,/ Хрiстý Бóгу возопiи́м:// воздви́гнувый рог наш, свят еси́, Гóсподи.
Хор: Слáва, Гóсподи, Крестý Твоемý Честнóму и Воскресéнiю.
Чтец: Возвéдшему Пáстыря Вели́каго из áда Хрiстá,/ и священноначáлiем Егó апóстолы я́ве язы́ки упáсшему,// и҆́стиною и Божéственным вéрнiи Дýхом да послýжим.
Глас 1
Хор: Пресвятáя Богорóдице, спасù нас.
Чтец: Ѻ́блак Тя лéгкiй нелóжно, Дéво, именýем,/ прорóческим возслéдующе речéнiем:/ прiи́де бо на Тебé Госпóдь/ низложи́ти еги́петскiя прéлести рукотворéнiя,// и просвети́ти сим служáщiя.
Хор: Пресвятáя Богорóдице, спасù нас.
Чтец: Тя запечáтанный вои́стинну лик прорóческiй истóчник,/ и заключéнную дверь именовá, дéвства Твоегó, Всепéтая,/ я́вственне знáменiя нам пи́шуще:// éже сохрани́ла еси́ и по рождествé.
Глас 6
Хор: Святы́й преподобномýчениче Стефáне, молù Бóга о нас.
Чтец: Ум твой, зрéнiем к Бóгу удобря́емь, óтче, краснéйшiй яви́ся,/ и благодáти вся́кiя испóлнен вои́стинну,// и Божéственныя свéтлости причáстник. (Двáжды)
Хор: Святы́й преподобномýчениче Стефáне, молù Бóга о нас.
Чтец: Честнéй iкóне Хрiстóве/ и Тогó Рóждшiя покланя́яся, блажéнне,// царя́ злочести́ваго повелéнiе мéрзское возненави́де си́лою Божéственнаго Дýха.
Хор: Святы́й преподобномýчениче Стефáне, молù Бóга о нас.
Чтец: Желéзы тебé, желéзно имýща сéрдце,/ пребезýмный, связáв, отсылáет в темни́цу// я́ко храни́теля Хрiстóвых догмáт, Стефáне всеблажéнне.
Слáва Отцý и Сы́ну и Святóму Дýху.
Тропáрь: Твоя́ крáсныя я́вственно имéл еси́, преподóбне, нóги,/ мучéнiя к стезя́м ступáющiя свéтло// и главы́ врáжiя сокрушáющiя, Стефáне многострадáльне.
И ны́не и прúсно и во вéки векóв. Амúнь.
Богорóдичен: Из Тебé, еди́ныя Чи́стыя, Пребожéственное Слóво воплоти́ся, я́ко весть,/ и спасé ны от тли,// покланя́ющiяся за милосéрдiе Божéственному Егó снизхождéнiю.
Катавáсiя Рождествá (глас 1): Прéжде век от Отцá рождéнному нетлéнно Сы́ну/ и в послéдняя от Дéвы/ воплощéнному безсéменно,/ Хрiстý Бóгу возопiи́м:/ вознесы́й рог наш,// свят еси́, Гóсподи.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк прмч. Стефáна, глас 3: Из неплóдна, преподóбне, кóрене/ возрастé ветвь/ первострадáльцу тезоимени́те,/ монáхов настáвник вели́к, óтче, яви́лся еси́/ и, я́рости не убоя́вся царя́,/ не хотя́ща Хрiстóв чествовáти óбраз,/ сегó рáди скончáвся,// мýченическiй венéц прiя́л еси́, Стефáне.
Íкос: И҆́же зáвисти отéц и Бóга чуждь,/ искушéнiя тебé мнóга и треволнéнiя воздви́же,/ не терпя́ зрéти твоегó Божéственнаго житiя́/ и прáваго твоегó непреткновéннаго шéствiя./ Мéрзскiй лукáвствiя на тя сшивáет, мнéвся бы́ти учени́к, я́коже Iýда прéжде,/ и тебé в рýки беззакóнных, óтче, потщáся вложи́ти,/ Хрiстá проповéдающа свéтло и Тогó óбразу любóвiю клáняющася,// Тогó рáди мýченическiй венéц прiя́л еси́, Стефáне.
Ин кондáк прмч. Стефáна, глас 8: Трóицы рачи́теля и Божéственнаго Стефáна/ восхвáлим вéрно пéсньми, празднолю́бцы, от сéрдца,/ я́ко почествовáвша начертáнiе крáсное Влады́ки и Мáтере Егó,/ и соглáсно ны́не от любвé возопiи́м емý, рáдующеся:// рáдуйся, óтче приснослáвне.
Седáлен прмч. Стефáна, глас 1: Кровь твоя́, мýдре, тáйно зовéт от земли́ к Бóгу,/ я́коже Áвелева, Богомýдре,/ я́сно бо проповéда Хрiстóво вочеловéченiе./ Тéмже посрами́л еси́ iконорáтных прéлесть и прешéл еси́ в Небéсныя чертóги,// моли́ спасти́ нас.
Слáва Ѻтцý и Сы́ну и Святóму Дýху.
Ин седáлен прмч. Стефáна, глас 1: Пощéнiем просвети́вся, я́ко злáто в горни́ле,/ облистáл еси́, мýдре, закóнным страдáнiем/ и венéц прiя́л еси́, твоемý звáнiю подóбен./ Тем, рáдующеся, всесвятýю твою́ пáмять прáзднуем,// твоя́ пóдвиги почитáюще, приснопáмятне Стефáне.
И ны́не и прúсно и во вéки векóв. Амúнь.
Богорóдичен из Минéи, глас 1: Безневéстная Чи́стая Богорóдице Дéво,/ еди́на вéрных предстáтельнице и покрóве,/ бед, и скорбéй, и лю́тых обстоя́нiй вся избáви,/ на Тя уповáнiе, Отрокови́це, имýщiя,// и дýши нáша спаси́ Божéственными моли́твами Твои́ми.
ПЕСНЬ 4
Iрмóс: Гóру Тя благодáтiю Бóжiею прiосенéнную,/ прозорли́выма Аввакýм/ усмотри́в очи́ма,/ из Тебе́ изы́ти Iзрáилеву провозглашáше Святóму,/ во Спасéнiе нáше// и обновлéнiе.
Хор: Слáва, Гóсподи, Святóму Воскресéнiю Твоемý.
Чтец: Кто сей Спас и҆́же из Едóма исходя́, венéц нося́ тернóвен,/ очервлéнну ри́зу имы́й, на дрéве ви́ся;/ Iзрáилев есть Сей Святы́й,// во Спасéнiе нáше и обновлéнiе.
Хор: Слáва, Гóсподи, Святóму Воскресéнiю Твоемý.
Чтец: Ви́дите лю́дiе непокори́вiи, и устыди́теся:/ Егóже бо я́ко злодéя вы вознести́ на крест у Пiлáта испроси́сте умоврéдне,// смéрти разруши́в си́лу, боголéпно воскрéс из грóба.
Хор: Пресвятáя Богорóдице, спасù нас.
Богорóдичен: Дрéво Тя, Дéво, жи́зни вéмы:/ не бо снéди плод смертонóсный человéком из Тебé прозябé,/ но животá присносýщнаго наслаждéнiе,// во Спасéнiе нас пою́щих Тя.
Глас 1
Хор: Слáва, Гóсподи, Крестý Твоемý Честнóму и Воскресéнiю.
Чтец: Кто Сей красéн из Едóма,/ и Сегó очервлéнiе ри́зное, от виногрáда восóрска,/ красéн я́ко Бог,/ я́ко человéк же, крóвiю плóти ри́зу очервлéну нося́;/ Емýже поéм вéрнiи:// слáва си́ле Твоéй, Гóсподи.
Хор: Слáва, Гóсподи, Крестý Твоемý Честнóму и Воскресéнiю.
Чтец: Хрiстóс бýдущих благ я́влься Архiерéй,/ грех наш разори́л есть:/ и показáв стрáнен путь Своéю крóвiю,/ в лýчшую и совершéннейшую вни́де ски́нiю,// Предтéча наш во святáя.
Глас 1
Хор: Пресвятáя Богорóдице, спасù нас.
Чтец: Слы́ши чудéс нéбо, и внушáй землé,/ я́ко Дщи пéрстнаго ýбо пáдшаго Адáма, Бóгу наречéна бысть,/ и Своемý Содéтелю Роди́тельница,// на Спасéнiе нáше и обновлéнiе.
Хор: Пресвятáя Богорóдице, спасù нас.
Чтец: Поéм вели́кое и стрáшное Твоé тáинство,/ преми́рных бо утаи́вся чиноначáлiй,/ на Тя И҆́же сый сни́де я́ко дождь на рунó, Всепéтая,// на Спасéнiе нас пою́щих Тя.
Глас 6
Хор: Святы́й преподобномýчениче Стефáне, молù Бóга о нас.
Чтец: Свéтом Дýха просвещáемь,/ мольбáми Божéственными слепы́м свет, óтче, пóдал еси́,// твоегó Влады́ку и Бóга подражáв, Богодохновéнне. (Двáжды)
Хор: Святы́й преподобномýчениче Стефáне, молù Бóга о нас.
Чтец: Ви́ден был еси́ издалéча плáвающими в мóри,/ окормля́я ты́я, блажéнне, к ти́хому пристáнищу Божéственною благодáтiю,// призывáющiя твоé вéрно, óтче Стефáне, и҆́мя.
Хор: Святы́й преподобномýчениче Стефáне, молù Бóга о нас.
Чтец: Священнодéйствуемь,/ я́коже заколéнiе свящéнное принéслся еси́ тебé рáди Пожрéнному, Стефáне,// и перворождéнных во оби́телех воспочи́л еси́, рáдуяся.
Слáва Отцý и Сы́ну и Святóму Дýху.
Тропáрь: Честны́м твои́м глагóлом прéжде на пóлы сухíй здрав яви́ся весь,/ удиви́вся, мýчениче, дáнной ти благодáти с высоты́ оби́льно// человéков на исправлéнiе.
И ны́не и прúсно и во вéки векóв. Амúнь.
Богорóдичен: На Тя, Пренепорóчная, спасéнiя моегó надéжды возложи́х,/ к Твоемý покрóву прибегóх,// бýди ми, Отрокови́це, помóщница, лю́тых избавля́ющи мя.
Катавáсiя Рождествá (глас 1): Жезл из кóрене Iессéева/ и цвет от негó, Хрiстé,/ от Дéвы прозя́бл еси́,/ из горы́, Хвáльный, приосенéнныя чáщи,/ пришéл еси́, воплóщся от Неискусомýжныя,/ Невещéственный и Бóже:// слáва си́ле Твоéй, Гóсподи.
ПЕСНЬ 5
Iрмóс: Просвети́вый сiя́нiем пришéствiя Твоегó, Хрiстé,/ и освети́вый Крестóм Твои́м/ мíра концы́,/ сердцá просвети́/ свéтом Твоегó Богоразýмiя,// правослáвно пою́щих Тя.
Хор: Слáва, Гóсподи, Святóму Воскресéнiю Твоемý.
Чтец: Пáстыря овцáм вели́каго и Гóспода,/ iудéи дрéвом крéстным умертви́ша:/ но Той я́ко óвцы, мéртвыя, во áде погребéнныя,// держáвы смéртныя избáви.
Хор: Слáва, Гóсподи, Святóму Воскресéнiю Твоемý.
Чтец: Крестóм Твои́м мiр благовести́в,/ и проповéдав плéнным, Спáсе мой, оставлéнiе,/ держáву имýщаго посрами́л еси́, Хрiстé:// нáга, обнищáвша показáвый Божéственным востáнiем Твои́м.
Хор: Пресвятáя Богорóдице, спасù нас.
Богорóдичен: Прошéнiя вéрно прося́щих, Всепéтая, не прéзри:/ но прiими́, и сiя́ доношáй Сы́ну Твоемý, Пречи́стая,/ Бóгу Еди́ному Благодéтелю,// Тебé бо Предстáтельницу стяжáхом.
Глас 1
Хор: Слáва, Гóсподи, Крестý Твоемý Честнóму и Воскресéнiю.
Чтец: О богáтство, и глубинó премýдрости Бóжiя!/ Премýдрыя объéмляй Госпóдь,/ от сих ковáрства избáвил есть нас:/ пострадáв бо вóлею нéмощiю плотскóю,/ Своéю крéпостiю, животворя́й мéртвыя воскреси́л есть.
Хор: Слáва, Гóсподи, Крестý Твоемý Честнóму и Воскресéнiю.
Чтец: Бог сый соединя́ется плóти нас рáди:/ и распинáется, и умирáет: погребáется, и пáки воскресáет,/ и восхóдит свéтло с плóтiю Своéю Хрiстóс ко Отцý:// с нéюже прiи́дет, и спасéт благочéстно Томý служáщiя.
Глас 1
Хор: Пресвятáя Богорóдице, спасù нас.
Чтец: Веселя́тся небéсныя си́лы зря́ще Тя:/ рáдуются с ни́ми человéков собрáнiя:/ Рождествóм бо Твои́м совокупи́шася, Дéво Богорóдице,// éже достóйно слáвим.
Хор: Пресвятáя Богорóдице, спасù нас.
Чтец: Да дви́жатся вси язы́цы человéчестiи и мы́сли,/ к похвалé человéческаго вои́стинну удобрéнiя,/ Дéва предстои́т я́ве слáвящи,// вéрою Тоя́ пою́щих чудесá.
Глас 6
Хор: Святы́й преподобномýчениче Стефáне, молù Бóга о нас.
Чтец: Мýченическими венчá почестьми́/ пóстническiя твоя́ труды́ и҆́стинно, преподóбне Стефáне,// подвигополóжник еди́н Бог наш, на убíйцы укрепи́вый тя. (Двáжды)
Хор: Святы́й преподобномýчениче Стефáне, молù Бóга о нас.
Чтец: Подвизáяся благослáвно,/ со мнóжеством мýченик в темни́цах приобщáяся, мýчениче, обрéлся еси́,// тя бо, я́ко звéзды незаходи́мое сóлнце, обстоя́ще, пребóльше просвещáхуся.
Хор: Святы́й преподобномýчениче Стефáне, молù Бóга о нас.
Чтец: Глагóлы Божéственными свящéнныя исповéдники/ и подражáтели Божéственных страстéй/ ублажáем, три ста и четы́редесять и два,// безбóжных порáтовавшiя.
Слáва Отцý и Сы́ну и Святóму Дýху.
Тропáрь: Власóв отъя́тiе ругáтельно,/ ушéс отрéзанiе и рук, удéс же Божéственных пожжéнiе// по iкóне Хрiстóве подъя́ше мнóжество преподóбных благослáвнейшее.
И ны́не и прúсно и во вéки векóв. Амúнь.
Богорóдичен: Пресвятáя, Я́же Бóга еди́на на земли́ я́ко и҆́стинно Пресвятáго рóждшая,/ Тя, Богорóдицу, при́сно проповéдающiя освяти́/ и спаси́ ходáтайством Твои́м.
Катавáсiя Рождествá (глас 1): Бог сый ми́ра, Отéц щедрóт,/ Вели́каго Совéта Твоегó Áнгела,/ мир подавáюща, послáл еси́ нам:/ тем, Богоразýмiя к свéту настáвльшеся,/ от нóщи ýтренююще,// славослóвим Тя, Человеколю́бче.
ПЕСНЬ 6
Iрмóс: Обы́де нас послéдняя бéздна,/ несть избавля́яй,/ вмени́хомся,/ я́ко óвцы заколéнiя,/ спаси́ лю́ди Твоя́, Бóже наш,// Ты бо крéпость немощствýющих и исправлéнiе.
Хор: Слáва, Гóсподи, Святóму Воскресéнiю Твоемý.
Чтец: Согрешéнiем первоздáннаго, Гóсподи, лю́те уязви́хомся,/ рáною же исцели́хомся Твоéю,/ éюже за ны уязви́лся еси́, Хрiстé:// Ты бо крéпость немощствýющих и исправлéнiе.
Хор: Слáва, Гóсподи, Святóму Воскресéнiю Твоемý.
Чтец: Возвéл ны еси́ из áда, Гóсподи,/ ки́та уби́в всея́дца, Всеси́льне,/ Твое́ю держáвою низложи́в тогó си́лу:// Ты бо Живóт, и Свет еси́, и Воскресéнiе.
Хор: Пресвятáя Богорóдице, спасù нас.
Богорóдичен: Веселя́тся о Тебé, Дéво Пречи́стая,/ рóда нáшего прáотцы, Едéм воспрiéмше Тобóю,/ егóже преступлéнiем погуби́ша:// Ты бо, Чи́стая, и прéжде Рождествá, и по Рождествé еси́.
Глас 1
Хор: Слáва, Гóсподи, Крестý Твоемý Честнóму и Воскресéнiю.
Чтец: Ум сый безстрáстен и невещéствен,/ примешáется Хрiстóс Бог человéческому умý,/ ходáтайствующему Божéственным естествóм, плóти же дебельствóм,/ и всемý мне непрелóжен весьмá соедини́ся:// да Спасéнiе всемý мне пáдшему подáст распинáемь.
Хор: Слáва, Гóсподи, Крестý Твоемý Честнóму и Воскресéнiю.
Чтец: Пáдает прельсти́вся Адáм, и запя́выйся сокрушáется,/ надéждою обóлган сый дрéвле обожéнiя:/ но востаéт соединéнiем Слóва обожáемь,/ и стрáстiю безстрáстiе прiéмлет,/ на престóле я́ко Сын слáвится,// седя́й со Отцéм же и Дýхом.
Глас 1
Хор: Пресвятáя Богорóдице, спасù нас.
Чтец: Предстоя́т раболéпне Рождествý Твоемý чи́ни небéснiи,/ дивя́щеся достóйно Твоемý безсéменному Рождествý, Приснодéво:// Ты бо, Чи́стая, и прéжде Рождествá, и по Рождествé еси́.
Хор: Пресвятáя Богорóдице, спасù нас.
Чтец: Воплоти́ся прéжде сый Безплóтен, Слóво из Тебé, Пречи́стая,/ вся́ческая вóлею творя́й,// безтелéсных вóинства приведы́й от небытiя́, я́ко Всеси́лен.
Глас 6
Хор: Святы́й преподобномýчениче Стефáне, молù Бóга о нас.
Чтец: Словéс твои́х си́лы злóбы обретáтель претерпéти не возмóже,/ тéмже ю́зам тя, Стефáне, и рáнам,// смéрти же нýждней сурóво льстец предадé. (Двáжды)
Хор: Святы́й преподобномýчениче Стефáне, молù Бóга о нас.
Чтец: Я́ко хлеб, пекóмь огнéм и за нóзе неми́лостивно повéшаемь,/ всесожéглся еси́, Пáвле,// и Бóгу жéртва принéслся еси́, соводворéнiя мýченик сподобля́емь.
Хор: Святы́й преподобномýчениче Стефáне, молù Бóга о нас.
Чтец: Закóнно пострадáвше заключéни/ и удавлéнiем житié остáвльше/ во Ефéсе преподóбнiи монáси, осмь к три́десятим,// и́же вéрою и любóвiю ублажáем.
Слáва Отцý и Сы́ну и Святóму Дýху.
Тропáрь: Крéпко судя́щему проти́вился еси́,/ и рáнами рани́му твоемý тéлу,/ умрéти извóлил еси́ за Хрiстá еди́наго безсмéртнаго,// достослáвне Пéтре великоимени́тый.
И ны́не и прúсно и во вéки векóв. Амúнь.
Богорóдичен: Еди́ну Всепéтую и дóбрую в женáх Богороди́тельницу,/ хрiстiáн стéну необори́мую, пречи́стую Влады́чицу// несомнéнным сéрдцем ублажáем.
Катавáсiя Рождествá (глас 1): Из утрóбы Ióну младéнца изблевá морскíй зверь,/ яковá прiя́т,/ в Дéву же всéльшееся Слóво/ и плоть прiéмшее прóйде сохрáншее нетлéнну./ Егóже бо не пострадá истлéнiя,// Рóждшую сохрани́ невреждéнну.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 1: Воскрéсл еси́, я́ко Бог, из грóба во слáве,/ и мiр совоскреси́л еси́;/ и естествó человéческое я́ко Бóга воспевáет Тя, и смерть исчезé;/ Адáм же ликýет, Влады́ко;/ Éва ны́не от уз избавля́ема рáдуется, зовýщи:// Ты еси́, И҆́же всем подая́, Хрiстé, воскресéнiе.
Íкос: Воскрéсшаго триднéвно воспои́м я́ко Бóга Всеси́льна,/ и вратá áдова стéршаго,/ и я́же от вéка из грóба воздви́гшаго,/ миронóсицам я́вльшагося, я́коже благоизвóлил есть,/ прéжде сим éже рáдуйтеся, рекíй:/ и апóстолом рáдость возвещáя, я́ко Еди́н Жизнодáвец./ Тéмже вéрою жены́ ученикóм знáменiя побéды благовествýют,/ и ад стенéт, и смерть рыдáет:/ мiр же весели́тся, и вси с ним рáдуются.// Ты бо пóдал еси́, Хрiстé, всем Воскресéнiе.
ПЕСНЬ 7
Iрмóс: Тебé ýмную, Богорóдице, пещь/ разсмотря́ем, вéрнiи,/ я́коже бо óтроки спасé три Превозноси́мый,/ мiр обнови́,/ во чрéве Твоéм всецéл,// хвáльный отцéв Бог и препрослáвлен.
Хор: Слáва, Гóсподи, Святóму Воскресéнiю Твоемý.
Чтец: Убоя́ся земля́, сокры́ся сóлнце, и помéрче свет,/ раздрáся церкóвная божéственная завéса,/ кáменiе же разсéдеся:/ на крестé бо ви́сит Прáведный,// Хвáльный отцéв Бог, и препрослáвлен.
Хор: Слáва, Гóсподи, Святóму Воскресéнiю Твоемý.
Чтец: Ты быв áки безпомóщен,/ и уя́звен в мéртвых вóлею нас рáди/ превозноси́мый, вся свободи́л еси́,/ и держáвною рукóю совоскреси́л еси́,// хвáльный отцéв Бог, и препрослáвлен.
Хор: Пресвятáя Богорóдице, спасù нас.
Богорóдичен: Рáдуйся, истóчниче присноживы́я воды́./ Рáдуйся, раю́ пи́щный./ Рáдуйся, стенó вéрных./ Рáдуйся, Неискусобрáчная./ Рáдуйся, всемíрная Рáдосте,/ Éюже нам возсiя́// Хвáльный отцéв Бог, и препрослáвлен.
Глас 1
Хор: Слáва, Гóсподи, Крестý Твоемý Честнóму и Воскресéнiю.
Чтец: Дрéвле ýбо проклятá бысть земля́/ Áвелевою очервлени́вшися крóвiю, братоубíйственною рукóю:/ боготóчною же Твоéю крóвiю благослови́ся окроплéна,/ и взыгрáющи вопiéт:// отцéв Бóже, благословéн еси́.
Хор: Слáва, Гóсподи, Крестý Твоемý Честнóму и Воскресéнiю.
Чтец: Да рыдáют iудéйстiи богопроти́внiи лю́дiе,/ дéрзости убiéнiя Хрiстóва:/ язы́цы же да веселя́тся,/ и рукáми да восплéщут, и вопiю́т:// отцéв Бóже, благословéн еси́.
Глас 1
Хор: Пресвятáя Богорóдице, спасù нас.
Чтец: Тя, Богорóдице, лéствицу Iáков прорóчески разумевáет:/ Тобóю бо Превозноси́мый на земли́ яви́ся,/ и с человéки поживé, я́ко благоволи́,// Хвáльный отцéв Бог и Препрослáвлен.
Хор: Пресвятáя Богорóдице, спасù нас.
Чтец: Рáдуйся, Чи́стая, из Тебé прóйде Пáстырь,/ И́же во Адáмову кóжу обóлкся вои́стинну Превозноси́мый,/ во всегó мя человéка, за благоутрóбiе непости́жное:// Хвáльный отцéв Бог и Препрослáвлен.
Глас 6
Хор: Святы́й преподобномýчениче Стефáне, молù Бóга о нас.
Чтец: Возвести́ся тебé конéц, блажéнне, вседéтельным хотéнiем,/ тéмже бóльшему постý вдал еси́ себé/ и от слáвы в слáву прехóдиши,// убiéн за Хрiстá, сýщаго над всéми Бóга. (Двáжды)
Хор: Святы́й преподобномýчениче Стефáне, молù Бóга о нас.
Чтец: Тезоимéнно первострадáльцу спрослáвился еси́,/ и́бо каменýемь неми́лостивно, и влачи́мь, и бiéмь,// кровьми́ испóлнил еси́ зéмлю и дýшу твою́ Гóсподу, рáдуяся, прéдал еси́. (Двáжды)
Слáва Отцý и Сы́ну и Святóму Дýху.
Тропáрь: На стóгнах, мýчениче Стефáне, грáдских неми́лостивно влачи́мь,/ углáдил еси́ мучéнiя стезю́ вéрным,// на ню́же наступáющiи крéпко к Небéсному грáду я́ве доидóша.
И ны́не и прúсно и во вéки векóв. Амúнь.
Богорóдичен: Свящéннейшiи прорóцы провозвести́ша, Чи́стая,/ явлéннейше тáинство честнáго Твоегó Рождествá,// и ны́не мы, сбытié свéтло разумéюще, благочéстно Тя ублажáем.
Катавáсiя Рождествá (глас 1): Óтроцы, благочéстiю совоспитáни,/ злочести́ваго велéнiя небрéгше,/ óгненнаго прещéнiя не убоя́шася,/ но, посредé плáмени стоя́ще, поя́ху:// отцéв Бóже, благословéн еси́.
Продолжение здесь