Неделя 26 по Пятидесятнице. Прмч. Стефана Нового, глас 1. ВСЕНОЩНОЕ БДЕНИЕ УТРЕНЯ (окон.) ЧАС ПЕРВЫЙ
11 декабря́ 2022 гóда. Недéля 26 по Пятидеся́тнице. Преподобномýченика Стефáна Нóваго. Глас 1. Воскрéсная прáздничная слýжба для домáшнего (келéйнаго) совершéнiя.
Окончáние всенóщного бдéния. Начáло здесь ( великая вечéрня), здесь ( ýтреня) здесь ( продолжéние ýтрени с канóном)
ПЕСНЬ 8
Iрмóс: В пещи́ óтроцы Iзрáилевы,/ я́коже в горни́ле,/ добрóтою благочéстiя чистéе злáта блещáхуся, глагóлюще:/ благослови́те, вся делá Госпóдня, Гóспода,// пóйте и превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: И҆́же вóлею вся творя́й, и претворя́яй,/ обращáяй сень смéртную в вéчную жизнь,/ стрáстiю Твоéю, Слóве Бóжiй,/ Тебé непрестáнно вся делá Госпóдня,// Гóспода пои́м, и превознóсим во вся вéки.
Хор: Слáва, Гóсподи, Святóму Воскресéнiю Твоемý.
Чтец: Ты разори́л еси́ сокрушéнiе, Хрiстé, и окая́нство,/ во вратéх и тверды́нях áдовых,/ воскрéс из грóба триднéвен./ Тебé непрестáнно вся делá, я́ко Гóспода, пою́т,// и превознóсят во вся вéки.
Хор: Пресвятáя Богорóдице, спасú нас.
Богорóдичен: Я́же без сéмене и преестéственне от облистáнiя Божéственнаго/ Рóждшую би́сера многоцéннаго Хрiстá, воспои́м глагóлюще:/ благослови́те вся делá Госпóдня, Гóспода,// пóйте и превозноси́те Егó во вся вéки.
Глас 1
Хор: Слáва, Гóсподи, Крестý Твоемý Честнóму и Воскресéнiю.
Чтец: Прiиди́те, лю́дiе, поклони́мся мéсту,/ на нéмже стоя́сте пречи́стеи нóзе,/ и на дрéве божéственнеи Хрiстóве длáни животворя́щiи прострóстеся,/ на Спасéнiе всех человéков,/ и гроб живóтный обстоя́ще, пои́м:/ да благослови́т тварь вся́кая Гóспода,// и превознóсит во вся вéки.
Хор: Слáва, Гóсподи, Крестý Твоемý Честнóму и Воскресéнiю.
Чтец: Обличи́ся богоубíйц iудéов пребеззакóнное оклеветáнiе:/ Егóже бо лестцá нарекóша, востá, я́ко Си́лен,/ наругáвся безýмным печáтем./ Тéмже рáдующеся, воспои́м:/ да благослови́т тварь вся́кая Гóспода,// и превознóсит во вся вéки.
Глас 1
Хор: Пресвятáя Богорóдице, спасú нас.
Чтец: Чертóг светови́дный, из негóже всех Влады́ка,/ я́ко Жени́х произы́де Хрiстóс,/ воспои́м вси вопiю́ще:/ вся делá Госпóдня, Гóспода пóйте,// и превозноси́те во вся вéки.
Хор: Пресвятáя Богорóдице, спасú нас.
Чтец: Рáдуйся, Престóле слáвный Бóжiй,/ рáдуйся, вéрных стенó,/ Éюже сýщим во тьме возсiя́ свет Хрiстóс,/ Тебé блажáщим, и вопiю́щим:/ вся делá Госпóдня, Гóспода пóйте,// и превозноси́те во вся вéки.
Глас 6
Хор: Святы́й преподобномýчениче Стефáне, молù Бóга о нас.
Чтец: Свирéпейше, я́коже звéрiе, восхи́тиша Хрїстóва áгнца бiю́щiи, убивáюще/ и с мýжи беззакóнными спогребáюще,// пребеззакóнiем живýщiи. (Двáжды)
Хор: Святы́й преподобномýчениче Стефáне, молù Бóга о нас.
Чтец: Неми́лостивно твою́ главý враг сокруши́,/ ю́же Бог в высочáйших венцéм венчá победи́тельным, венéчниче многострадáльне,// слáва мýчеников и всех преподóбных.
Хор: Святы́й преподобномýчениче Стефáне, молù Бóга о нас.
Чтец: Терпели́вно мучи́телю противля́яся, Богомýдрый Андрéй/ рáнами раздробля́ется, и неми́лостивно умерщвля́ется прáведный,// поя́ Влады́це Хрiстý во вéки.
Благословúм Отцá, и Сы́на, и Святáго Дýха, Гóспода.
Тропáрь: Святéйшiй дом ужé быв,/ и҆́же над всéми святы́ми Воспочивáющаго,// во твоéм имéл еси́ сéрдцы живýща, многострадáльне Стефáне, во вся вéки.
И ны́не и прúсно и во вéки векóв. Амúнь.
Богорóдичен: Кроплéнiем Божéственныя Крóве, Богоблагодáтная,/ из ребр истощéныя Сы́на Твоегó и Бóга,// лукáвым грехóм прибы́вшую мне сквéрну, - молю́ся Тебé, - омы́й, Дéво.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя Рождествá (глас 1): Чýда преестéственнаго/ росодáтельная изобрази́ пещь óбраз:/ не бо, я́же прiя́т, пали́т ю́ныя,/ я́ко нижé огнь Божествá Дéвы,/ в Ню́же вни́де утрóбу./ Тем воспевáюще, воспоéм:/ да благослови́т тварь вся Гóспода// и превознóсит во вся вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На кáждый стiх)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Ѻ́браз чи́стаго рождествá Твоегó,/ огнепали́мая купинá/ показá неопáльная;/ и ны́не на нас/ напáстей свирéпеющую угаси́ти, мóлимся, пещь,/ да Тя, Богорóдице,// непрестáнно величáем.
Хор: Слáва, Гóсподи, Святóму Воскресéнiю Твоемý.
Чтец: О кáко, лю́дiе беззакóннiи и непокори́вiи,/ лукáвая совещáвше,/ гóрдаго и нечести́ваго оправди́ша:/ Прáведнаго же на дрéве осуди́ша Гóспода слáвы,// Егóже достóйно величáем!
Хор: Слáва, Гóсподи, Святóму Воскресéнiю Твоемý.
Чтец: Спáсе Áгнче Непорóчне,/ И҆́же мíра грехи́ взéмый,/ Тебé слáвим воскрéсшаго триднéвно,/ со Отцéм и Божéственным Твои́м Дýхом,/ и Гóспода слáвы:// Егóже богослóвяще, величáем.
Хор: Пресвятáя Богорóдице, спасú нас.
Богорóдичен: Спаси́ лю́ди Твоя́, Гóсподи,/ и҆́хже стяжáл еси́ честнóю Твоéю крóвiю,/ цéрквам Твои́м подая́ мир, Человеколю́бче,// Богорóдицы моли́твами.
Глас 1
Хор: Слáва, Гóсподи, Крестý Твоемý Честнóму и Воскресéнiю.
Чтец: Прослáвися неизречéнною си́лою Твоéю/ крест Твой, Гóсподи,/ немощнóе бо Твоé пáче си́лы всем яви́ся:/ и҆́мже си́льнiи ýбо низложéни бы́ша на зéмлю,// и ни́щiи к небеси́ возводи́ми бывáют.
Хор: Слáва, Гóсподи, Крестý Твоемý Честнóму и Воскресéнiю.
Чтец: Умертви́ся мéрзкая нáша смерть, из мéртвых Воскресéнiем:/ Ты бо яви́вся сýщим во áде Хрїстé,/ живóт даровáл еси́.// Тéмже Тя, я́ко жизнь и воскресéнiе и свет Ипостáсный пою́ще, величáем.
Глас 1
Хор: Пресвятáя Богорóдице, спасú нас.
Чтец: Из кóрене Давíдова прозяблá еси́ прорóческаго, Дéво, и богоотéческаго:/ но и Давíда я́ко вои́стинну Ты прослáвила еси́,/ я́ко рóждши прорóчествованнаго Гóспода слáвы:// Егóже достóйно величáем.
Хор: Пресвятáя Богорóдице, спасú нас.
Чтец: Всяк похвáльный, Пречи́стая, закóн/ побеждáется вели́чеством слáвы Твоея́./ Но о, Влады́чице, от раб Твои́х недостóйных,/ от любвé Тебé приноси́мое прiими́, Богорóдице,// со усéрдiем пéнiе похвáльное.
Глас 6
Хор: Святы́й преподобномýчениче Стефáне, молù Бóга о нас.
Чтец: Ви́дев, рáдуяся, Áнгелов чи́ны,/ патрiáрхов, преподóбных,/ прорóков, страдáльцев, апóстолов же и прáведных всех, Богодохновéнне,// с ни́миже совокупля́яся, помяни́, заступи́ на земли́ чи́сте ублажáющих тя. (Двáжды)
Хор: Святы́й преподобномýчениче Стефáне, молù Бóга о нас.
Чтец: Я́ко свет, я́ко ýтро, я́ко вели́кое сóлнце,/ я́ко нéбо, назвéзденое чудéс светлостьми́ и я́звами святы́ми был еси́,/ всех помышлéнiя, благохвáлящих тя, Стефáне, украшáя и҆́стинно,// мýчениче многострадáльне.
Хор: Святы́й преподобномýчениче Стефáне, молù Бóга о нас.
Чтец: Твéрдыми пóстничества подви́ги низложи́в тьмы начáла, óтче, прéжде/ и в послéдняя пострадáв крéпко,/ всеконéчней пáгубе сiя́ предáв, Стефáне,// мýчеников добрóто и преподóбных похвалó.
Слáва Отцý и Сы́ну и Святóму Дýху.
Тропáрь: Твоя́ преслáвная пáмять днесь/ пресвéтлыми заря́ми дарóв Дýха озаря́ет земнáя исполнéнiя,/ ю́же рáдостно ны́не прáзднующiя просвети́// и освяти́ ны, Богоблажéнне Стефáне.
И ны́не и прúсно и во вéки векóв. Амúнь.
Богорóдичен: Свéта прiя́телище, Богорáдованная,/ священномýчеников и҆́стинно утверждéнiе и преподóбных всех похвалó,// спаси́ ны от бед и обстоя́нiй, и врагóв нашéствiя, воспевáющiя Тя.
Катавáсiя Рождествá (глас 1): Тáинство стрáнное ви́жу и преслáвное:/ Нéбо - вертéп, Престóл Херувíмский - Дéву,/ я́сли - вмести́лище,/ в ни́хже возлежé Невмести́мый - Хрiстóс Бог,// Егóже, воспевáюще, величáем.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостилáрiй воскрéсный четвéртый: Добродéтельми блистáвшеся,/ ви́дим предстоя́ща в живонóснем грóбе/ мýжа в блещáщихся ри́зах:/ миронóсицам преклóньшим ли́ца на зéмлю,/ небесы́ Влады́чествующаго воскресéнiю да научи́мся,/ и к Животá грóбу с Петрóм притецéм,/ и содéянному уди́вльшеся,// пребýдем Хрiстá ви́дети.
Слáва Ѻтцý и Сы́ну и Святóму Дýху.
Светúлен прмч. Стефáна: Болéзньми пóстническими началозлóбнаго змíя до концá умертви́л еси́,/ на концé же венéц мучéнiя взем, Стефáне всехвáльне,/ поклонéнiе подая́ честны́м образóм,// я́ко вéдый на первообрáзное я́ве преходи́ти, всеблажéнне.
И҆ ны́не и прúсно и во вéки векóв. Амúнь.
Богорóдичен воскрéснаго Ексапостiлáрiя: Рáдоватися вещáвый, претвори́л еси́/ печáль прароди́телей, Гóсподи,/ рáдость внося́ востáнiя Твоегó в мíре:/ тогó ýбо Живодáвче, Рóждшею Тя,/ свет просвещáющ сердцá,/ свет щедрóт Твои́х низпосли́,/ éже вопи́ти Тебé:/ человеколю́бче Богочеловéче,// слáва Твоемý востáнiю.
ХВАЛИТНЫ
Хор, глас 1: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéние положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 1: Поéм Твою́, Хрїстé, спаси́тельную страсть,// и слáвим Твоé Воскресéнiе.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Крест претерпéвый, и смерть упраздни́вый,/ и воскресы́й из мéртвых,/ умири́ нáшу жизнь, Гóсподи,// я́ко еди́н Всеси́лен.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Áда плени́вый, и человéка воскреси́вый,/ Воскресéнiем Твои́м, Хрiстé,/ сподóби нас чи́стым сéрдцем// Тебé пéти и слáвити.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Боголéпное Твоé снисхождéнiе слáвяще,/ поéм Тя, Хрїстé./ Роди́лся еси́ от Дéвы,/ и не разлучéн был еси́ от Отцá,/ пострадáл еси́, я́ко человéк,/ и вóлею претерпéл еси́ Крест,/ воскрéсл еси́ от грóба, я́ко от чертóга произшéд,/ да спасéши мiр,// Гóсподи слáва Тебé.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúра: Егдá пригвозди́лся еси́ на дрéве крéстнем,/ тогдá умертви́ся держáва врáжiя:/ тварь поколебáся стрáхом Твои́м:/ и ад пленéн бысть держáвою Твоéю:/ мéртвыя от гроб воскреси́л еси́,/ и разбóйнику рай отвéрзл еси́:// Хрїстé Бóже наш, слáва Тебé.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Рыдáюща со тщáнiем/ грóба Твоегó дошéдша честны́я жены́,/ обрéтша же гроб отвéрст,/ и увéдевша от Áнгела нóвое и преслáвное чýдо,/ возвести́ша апóстолом: я́ко воскрéсе Госпóдь,// дáруяй мíрови вéлiю ми́лость.
Воскреснú, Гóсподи Бóже мой, да вознесéтся рукá Твоя́,// не забýди убóгих Твоúх до концá. (Пс.9:33)
Стiхúра: Страстéй Твои́х Божéственным я́звам/ покланя́емся, Хрїстé Бóже,/ и éже в Сióне Влады́чнему священнодéйствiю,/ на конéц векóв богоявлéнне бы́вшему:/ и́бо во тьме спя́щiя, Сóлнце просвети́ прáвды,/ к невечéрнему наставля́я сiя́нiю:// Гóсподи, слáва Тебé.
Исповéмся Тебé, Гóсподи, всем сéрдцем моúм,/ повéм вся чудесá Твоя́. (Пс.9:2)
Любомятéжный рóде еврéйскiй, внуши́те,/ где суть, и́же к Пiлáту пришéдшiи:/ да рекýт стрегýщiи вóини:/ где суть печáти грóбныя;/ где преложéн бысть Погребéнный;/ где прóдан бысть Непродáнный;/ кáко укрáдено бысть Сокрóвище;/ что оклеветýете Спáсово востáнiе/ пребеззакóнiи iудéи?/ Воскрéсе, И́же в мéртвых свобóдь,// и подаéт мíрови вéлiю ми́лость.
Слáва Отцý и Сыну и Святóму Дýху.
Стiхúра евáнгельская четвéртая, глас 4: У́тро бе глубокó,/ и жены́ прiидóша на гроб Твой, Хрїстé,/ но Тéло не обрéтеся желáемое и́ми./ Тéмже недоумевáющимся,/ и́же в ри́зах блещáщихся предстáвшiи глагóлаху:/ что живáго с мéртвыми и́щете;/ востá, я́коже предречé,/ что не пóмните глагóл Егó?/ И́мже вéровавша, ви́денная проповéдаху,/ но мня́хуся лжа благовéщенiя:/ тáко бы́ша ещé кóсни ученицы́./ Но Петр течé, и ви́дев// прослáви Твоя́ в себé чудесá.
И ныне и прúсно и во вéки векóв, амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вши тáко, слáва Тебé.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстé, и Святы́й Дýше. Гóсподи Бóже, Áгнче Бóжїй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 1: Днесь Спасéнiе мíру бысть,/ поéм Воскрéсшему из грóба,/ и Начáльнику жи́зни нáшея:/ разруши́в бо смéртiю смерть,// побéду дадé нам и вéлiю ми́лость.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Гóсподи поми́луй (12раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных христiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
ОТПУСТ
Хрїстóс, и҆́стинный Бог наш, моли́твами пречи́стыя Своея́ Мáтере, святы́х слáвных и всехвáльных Апóстол, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 1: Кáмени запечáтану от iудéй и вóином стрегýщим Пречи́стое Тéло Твоé, воскрéсл еси триднéвный, Спáсе, дáруяй мíрови жизнь. Сегó рáди си́лы небéсныя вопiя́ху Ти, Жизнодáвче: слáва Воскресéнiю Твоемý, Хрїстé, слáва Цáрствiю Твоемý, слáва смотрéнiю Твоемý, еди́не Человеколю́бче.
Слáва Отцý и Сы́ну и Святóму Дýху.
Тропáрь прмч. Стефáна Нóваго, глас 4: Пóстнически предподвизáвся на горé, ýмная врагóв ополчéнiя всеорýжiем Крестá погуби́л еси́, всеблажéнне, пáки же ко страдáльчеству мýжески вооружи́лся еси́, уби́в Копрони́ма мечéм вéры, и обои́х рáди венчáлся еси́ от Бóга, преподобномýчениче Стефáне приснопáмятне.
И ны́не и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сыне Бóжїй, поми́луй нас. Ами́нь.
КОНДАК
Кондáк воскрéсный, глас 1: Воскрéсл еси́, я́ко Бог, из грóба во слáве, и мiр совоскреси́л есѝ; и естествó человéческое я́ко Бóга воспевáет Тя, и смерть исчезé; Адáм же ликýет, Влады́ко; Éва ны́не от уз избавля́ема рáдуется, зовýщи: Ты есѝ, И҆́же всем подая́, Хрїстé, воскресéнiе.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстé, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Отцý и Сыну и Святóму Дýху, и ны́не и при́сно и во вéки векóв, аминь.
Гóсподи, поми́луй. (3 раза)
Гóсподи, благословѝ.
Гóсподи, Iисýсе Хрїстé, Сыне Бóжїй, моли́твами пречи́стыя Своея́ Мáтере, святы́х слáвных и всехвáльных Апóстол, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу