Неделя 24 по Пятидесятнице. Апостола Филиппа, глас 7. ВСЕНОЩНОЕ БДЕНИЕ. УТРЕНЯ. КАНОН
27 ноября́ 2022 гóда. Недéля 24 по Пятидеся́тнице. Апóстола Фiлíппа. Глас 7. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени.
Начало зри здесь ( великая вечéрня) и здесь ( ýтреня)
ПСАЛОМ ИЗБРАННЫЙ
Небесá повéдают слáву Бóжiю, творéнiе же рукý Егó возвещáет твердь./ Исповéдят Небесá чудесá Твоя́, Гóсподи./ Вмéсто отéц Твои́х бы́ша сы́нове Твои́./ Постáвиши я́ кня́зи по всей земли́./ Бог богóв Госпóдь глагóла и призвá зéмлю./ От востóк сóлнца до зáпад хвáльно И҆́мя Госпóдне./ Освети́ша мóлнiя Егó вселéнную,/ возвести́ша Небесá прáвду Егó,/ и ви́деша вси лю́дiе слáву Егó./ Кня́зи Iýдовы влады́ки их./ Воцари́ся Бог над язы́ки./ Бог прославля́емь в совéте святы́х./ Вéлiй и стрáшен есть над все́ми окрéстными Егó./ Рцы́те во язы́цех, я́ко Госпóдь воцари́ся./ Возвести́те во язы́цех слáву Егó, во всех лю́дех чудесá Егó./ Во всю зéмлю изы́де вещáнiе их,/ и в концы́ вселéнныя глагóлы их./ Покори́ лю́ди нам и язы́ки под нóги нáша./ Вéлiй Госпóдь наш и вéлiя крéпость Егó.// Той даст си́лу и держáву лю́дем Свои́м: благословéн Бог.
Хор: Величáем тя,/ апóстоле Хрiстóв, Фiлíппе,/ и чтим болéзни и труды́ твоя́,/ úмиже трудúлся есú// во благовéстiи Хрiстóве.
ТРОПАРИ ВОСКРЕСНЫЕ, ГЛАС 5
Благословéн есú, Гóсподи,/научú мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есú, Гóсподи,/научú мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел миронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есú, Гóсподи,/научú мя оправдáнiем Твоúм.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есú, Гóсподи,/научú мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Чтец: Аллилýiа, аллилýiа, аллилýiа, слáва Тебé Бóже. (3 раза)
Гóсподи, поми́луй. (3 раз)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоú воскрéсны, глас 7: И҆́же наш зрак воспрiéмый,/ и претерпéвый Крест плóтски,/ спаси́ мя воскресéнiем Твои́м Хрiстé Бóже,// я́ко Человеколю́бец.
СЕДАЛЬНЫ ПО ПОЛИЕЛЕИ
Глас 1 (по 1‑м стiхослóвiи): Апóстоле Хрiстóв, и самови́дче,/ и мýчениче, Фiлíппе премýдре,/ дрýже Бóжiй блажéнне,/ и́же вéрою прáзднующiя честнýю твою́ пáмять/ свободи́ от обдержáщих прегрешéнiй моли́твами твои́ми// и Небéсное наслéдiе получи́ти сподóби.
Глас 5 (по 2‑м стiхослóвiи): Учени́к Словесé, и́стины проповéдник,/ я́ко стрелá, пóслан был еси́, просвещáя сýщiя во тьме лю́тей, свя́те апóстоле,/ и безбóжiя мглу отгоня́ от земли́,// и вся благовéрующiя сы́ны дне показáл еси́, Хрiстóв ви́дче, свя́те Фiлíппе.
Слáва Ѻтцý и Сы́ну и Святóму Дýху,
Седáлен прáздника по полiелéе, глас 8: Íдольскую лесть низложи́л еси́,/ Спáсовы стрáсти возжелéв, Фiлíппе слáвне,/ яви́лся еси́ мíру, Небéсная всем источáя чудесá/ и язы́ков быв, всеблажéнне, апóстол./ Тем твою́ пáмять достóйно чтим, песнослóвяще:/ Госпóдень апóстоле,/ моли́ Хрiстá Бóга грехóв оставлéнiе даровáти// прáзднующим любóвiю святýю пáмять твою́.
И ны́не и прúсно и во вéки векóв, амúнь.
Богорóдичен из минéи: В напáсти многоплетéнныя впад от враг ви́димых и неви́димых,/ бýрею одержи́мь безчи́сленных согрешéнiй мои́х,/ и, я́ко к тéплому заступлéнiю и покрóву моемý, Чи́стая,/ ко пристáнищу притекáю Твоея́ блáгости./ Тéмже, Пречи́стая,/ из Тебé Воплощéнному безсéменно моли́ся прилéжно о всех рабéх Твои́х,/ непрестáнно моля́щихтися, Богорóдице Пречи́стая,/ моля́щи Егó при́сно согрешéнiй оставлéнiе даровáти// воспевáющим достóйно слáву Твою́.
СТЕПЕННА, ГЛАС 7
1 АНТИФОН
Хор: Плен Сióнь от лéсти обрати́в,/ и менé Спáсе, оживи́,// изимáя рабóтныя стрáсти. (Двáжды)
В юг сéяй скóрби пóстныя со слéзами,// сей рáдостныя пóжнет рукоя́ти присноживопитáнiя. (Двáжды)
Слáва Ѻтцý и Сы́ну и Святóму Дýху.
Святы́м Дýхом истóчник Божéственных сокрóвищ,/ от Негóже премýдрость, рáзум, страх:// Томý хвалá и слáва, честь и держáва.
И ны́не и прúсно и во вéки векóв. Амúнь.
Святы́м Дýхом истóчник Божéственных сокрóвищ,/ от Негóже премýдрость, рáзум, страх:// Томý хвалá и слáва, честь и держáва.
2 АНТИФОН
Áще не Госпóдь сози́ждет дом душéвный, всýе труждáемся:// рáзве бо Тогó ни дея́нiе, ни слóво совершáется. (Двáжды)
Плодá чрéвна, святíи духодви́жно прозябáют// отéческая предáнiя, сыноположéнiя. (Двáжды)
Слáва Ѻтцý и Сы́ну и Святóму Дýху.
Святы́м Дýхом, вся́ческая éже бы́ти и҆́мут:/ прéжде бо всех Бог, всех Госпóдьство,// свет непристýпен, живóт всех.
И ны́не и прúсно и во вéки векóв. Амúнь.
Святы́м Дýхом, вся́ческая éже бы́ти и҆́мут:/ прéжде бо всех Бог, всех Госпóдьство,// свет непристýпен, живóт всех.
3 АНТИФОН
Боя́щiися Гóспода, пути́ животá обрéтше,// ны́не и при́сно ублажáются слáвою нетлéнною. (Двáжды)
Óкрест трапéзы твоея́, я́ко стéблiе ви́дя исчáдiя твоя́,// рáдуйся и весели́ся, приводя́ сiя́ Хрiстóви пастыреначáльнику. (Двáжды)
Слáва Ѻтцý и Сы́ну и Святóму Дýху.
Святы́м Дýхом глубинá даровáнiй,/ богáтство слáвы, судéб глубинá вéлiя:// единослáвен Отцý, и Сы́ну, служи́мь бо.
И ны́не и прúсно и во вéки векóв. Амúнь.
Святы́м Дýхом глубинá даровáнiй,/ богáтство слáвы, судéб глубинá вéлiя:// единослáвен Отцý, и Сы́ну, служи́мь бо.
ПРОКИМЕН
Чтец: Прокíмен, глас седьмы́й, псалóм Давíдов: Воскресни́, Гóсподи Бóже мой, да вознесéтся рукá Твоя́, не забýди убóгих Твои́х до концá. (Пс.9:33)
Хор: Воскреснù, Гóсподи Бóже мой, да вознесéтся рукá Твоя́,// не забýди убóгих Твоúх до концá.
Чтец: Исповéмся Тебé Гóсподи всем сéрдцем мои́м, повéм вся чудесá Твоя́.(Пс.9:2А/Пс.110:1А)
Хор: Воскреснù, Гóсподи Бóже мой, да вознесéтся рукá Твоя́,// не забýди убóгих Твоúх до концá.
Чтец: Воскресни́, Гóсподи Бóже мой, да вознесéтся рукá Твоя́.
Хор: Не забýди убóгих Твоúх до концá.
Чтец: Гóсподу помóлимся.
Хор: Гóсподи, поми́луй.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Мáрка Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Мк.зач.70): Во врéмя óно, минýвши суббóте, Марíа Магдали́на и Марíа Iáковля и Саломíа купи́ша аромáты, да пришéдша помáжут Iисýса. И зелó заýтра во еди́ну от суббóт прiидóша на гроб, возсiя́вшу сóлнцу, и глагóлаху к себé: кто отвали́т нам кáмень от двéрiй грóба? И воззрéвша ви́деша, я́ко отвалéн бе кáмень: бе бо вéлiй зелó. И вшéдша во гроб, ви́деша ю́ношу седя́ща в десны́х, одéяна во одéжду белý: и ужасóшася. Он же глагóла им: не ужасáйтеся: Iисýса и҆́щете Назаряни́на распя́таго: востá, несть зде: се, мéсто, и҆дéже положи́ша Егó: но иди́те, рцы́те ученикóм Егó и Петрóви, я́ко варя́ет вы в Галiлéи: тáмо Егó ви́дите, я́коже речé вам. И изшéдша бежáша от грóба: имя́ше же их трéпет и ýжас: и ни комýже ничтóже рéша: боя́хубося.
[Русский синодальный перевод]По прошествии субботы Мария Магдалина и Мария Иаковлева и Саломия купили ароматы, чтобы идти помазать Его. И весьма рано, в первый день недели, приходят ко гробу, при восходе солнца, и говорят между собою: кто отвалит нам камень от двери гроба? И, взглянув, видят, что камень отвален; а он был весьма велик. И, войдя во гроб, увидели юношу, сидящего на правой стороне, облеченного в белую одежду; и ужаснулись. Он же говорит им: не ужасайтесь. Иисуса ищете Назарянина, распятого; Он воскрес, Его нет здесь. Вот место, где Он был положен. Но идите, скажите ученикам Его и Петру, что Он предваряет вас в Галилее; там Его увидите, как Он сказал вам. И, выйдя, побежали от гроба; их объял трепет и ужас, и никому ничего не сказали, потому что боялись.
Хор: Слáва Тебé, Гóсподи, слáва Тебé.
Воскресéнiе Хрiстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрiстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрiстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И҆ ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра, глас 6: Воскрéс Iисýс от грóба,/ я́коже проречé,/ дадé нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 7
(совмещенный с канóном крестовоскрéсным (глас 7), Богорóдицы (глас 7) и канóном Апóстола Фiлíппа, глас 6)
ПЕСНЬ 1
Iрмóс: Мáнiем Твои́м/ на земны́й óбраз преложи́ся/ прéжде удоборазливáемое/ воднóе естествó, Гóсподи./ Тéмже немóкренно пешешéствовав Iзрáиль,// поéт Тебé песнь побéдную.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Осуди́ся смéртное мучи́тельство дрéвом,/ непрáведною смéртiю осуждéну Ти, Гóсподи:/ отню́дуже князь тьмы Тебé не одолéв,// прáведно изгнáн бысть.
Хор: Слáва, Гóсподи, Святóму Воскресéнiю Твоемý.
Чтец: Ад Тебé прибли́жися,/ и зубы́ не возмóг стéрти тéло Твоé,/ челюстьми́ сокруши́ся./ Отню́дуже Спáсе, болéзни разрýш смéртныя,// воскрéсл еси́ триднéвен.
Хор: Пресвятáя Богорóдице, спасù нас.
Богорóдичен: Разреши́шася болéзни прамáтере Éвы:/ болéзни бо избежáвше, неискусомýжно родилá еси́.// Отню́дуже я́ве Богорóдицу, Пречи́стая, вéдуще Тя, вси слáвим.
Канон крестовоскресный, глас 7
Хор: Слáва, Гóсподи, Крестý Твоемý Честнóму и Воскресéнiю.
Чтец: Два истóчника нам на крестé источи́ Спас живонóсная/ от Своегó прободéннаго ребрá.// Пои́м Емý: я́ко прослáвися.
Хор: Слáва, Гóсподи, Крестý Твоемý Честнóму и Воскресéнiю.
Чтец: Во гроб всели́вся, и воскрéс триднéвен,/ нетлéнiе подадé, чáянiе Хрiстóс смéртным.// Пои́м Емý: я́ко прослáвися.
Канон Богородицы, глас 7
Хор: Пресвятáя Богорóдице, спасù нас.
Чтец: Бéздну рóждшая благоутрóбiя, Дéво,/ дýшу мою́ озари́ светонóсным Твои́м сiя́нiем,// я́ко да достóйно воспою́ твои́х чудéс бéздну.
Хор: Пресвятáя Богорóдице, спасù нас.
Чтец: Стрелóю грехóвною уя́звлены нас Слóво ви́дев,/ я́ко Благодéтель ущéдри:/ отню́дуже несказáнно соедини́ся, Всечи́стая, плóтiю,// и҆́же из Тебé Пребожéственный.
Канон апостола Филиппа, глас 6
Хор: Святы́й апóстоле Фiлíппе, молú Бóга о нас.
Чтец: Пресвéтлыми лучáми Хрiстóвы Божéственныя свéтлости наслаждáяся я́сно,/ Богопроповéдниче Фiлíппе,// твои́ми по причáстiю заря́ми нас просвети́.(Двáжды)
Хор: Святы́й апóстоле Фiлíппе, молú Бóга о нас.
Чтец: Óтчую тебé слáву собóю показáвый, Фiлíппе,/ ли́ку ученикóв тя Хрiстóс вчини́,// твою́ провéдый добродéтель, Богоблажéнне.(Двáжды)
Слáва Ѻтцý и Сы́ну и Святóму Дýху.
Тропáрь: Ны́не не в гадáнiих зри́ши, нижé сéнех,/ нижé зерцáлех, всемýдре, Истóчника благи́х,/ желáнiй конéчное, Хрiстá,// но лицéм зри́ши я́вственно к лицý.
И ны́не и прúсно и во вéки векóв. Амúнь.
Богорóдичен: Оскудéвшим начáльником от колéна Iýдова, Пречи́стая,/ Сын Твой и Бог пришéд,// вождь земли́ концéм и҆́стинно ны́не воцари́ся.
Катавáсiя (глас 4): Отвéрзу устá моя́,/ и напóлнятся Дýха,/ и слóво отры́гну Цари́це Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéнiе.
ПЕСНЬ 3
Iрмóс: В начáле Небесá/ всеси́льным Слóвом Твои́м утверждéй Гóсподи Спáсе,/ и Вседéтельным и Бóжiим Дýхом,/ всю си́лу их,/ на недви́жимем мя кáмени// исповéданiя Твоегó утверди́.
Хор: Слáва, Гóсподи, Святóму Воскресéнiю Твоемý.
Чтец: Ты возшéд на дрéво,/ о нас болéзнуеши вóлею, благоутрóбне Спáсе,/ и терпи́ши я́зву, примирéнiя ходáтайственну, и спасéнiя вéрным:// éюже Твоемý, Ми́лостиве, вси примири́хомся Роди́телю.
Хор: Слáва, Гóсподи, Святóму Воскресéнiю Твоемý.
Чтец: Ты мя очи́стив от я́звы,/ душéю уя́звленнаго змíевым угрызéнiем, Хрiстé,/ и показáл еси́ свет, во тьме дрéвле мне слежáщу и во тлéнiи:// Крестóм бо во ад сошéд, менé совоскреси́л еси́.
Хор: Пресвятáя Богорóдице, спасú нас.
Богорóдичен: Неискусомýжныя Твоея́ Мáтере мольбáми/ мир мíрови подáждь, Спáсе,// и несказáнныя Твоея́ слáвы славослóвящiя Тя сподóби.
Глас 7
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же на крестé стрáсти претерпéвый,/ и разбóйнику рай отвéрзый, я́ко благодéтель и Бог,// утверди́ мой ум в вóлю Твою́, еди́не Человеколю́бче.
Хор: Слáва, Гóсподи, Крестý Твоемý Честнóму и Воскресéнiю.
Чтец: Воскресы́й триднéвен из грóба,/ и живóт мíрови возсiявый, я́ко Жизнодáвец и Бог,// утверди́ мой ум в вóлю Твою́, еди́не Человеколю́бче.
Глас 7
Хор: Пресвятáя Богорóдице, спасù нас.
Чтец: Змiй поползы́й из Едéма,/ менé обожéнiя желáнiем прельсти́в, вéрже в зéмлю:/ но И҆́же ми́лостив, и естествóм благоутрóбен, ущéдрив богосодéла,// во чрéво Твоé всéлься, и подóбен мне быв, Мáти Дéво.
Хор: Пресвятáя Богорóдице, спасù нас.
Чтец: Благословéн плод Твоегó чрéва, Дéво Богорóдице, всех рáдосте,/ рáдость бо всемý мíру родилá еси́, и весéлiе вои́стинну// разгоня́ющее печáль грехóвную, Богоневéсто.
Глас 6
Хор: Святы́й апóстоле Фiлíппе, молù Бóга о нас.
Чтец: Ты, испóлнен свéта дéятельнаго видéнiя,/ Свéту вели́кому, бы́вшу с нáми, сподóбился еси́ Хрiстý служи́ти,// Фiлíппе Богоглагóливе. (Двáжды)
Хор: Святы́й апóстоле Фiлíппе, молù Бóга о нас.
Чтец: Степéнь догмáтов благочести́вых твоé тайновóдствiе благочести́во яви́ся,/ тем бо Сы́на познáхом соестéственна// и соединéнна сýща Роди́телю. (Двáжды)
Слáва Ѻтцý и Сы́ну и Святóму Дýху.
Тропáрь: Свéщник был еси́ злат,/ сiя́я человéком присносýщный свет/ и просвещáющ им вселéнную я́ве познáнiем,// Фiлíппе всеизя́щнейше.
И ны́не и прúсно и во вéки векóв. Амúнь.
Богорóдичен: На Тя, Пресвятáя Чи́стая, надéявся,/ да не отпадý Твоегó чáянiя,/ но, я́ко Мáти ми́лостивная человеколюби́ваго Бóга,// сетéй мя врагá избáви.
Катавáсiя (глас 4): Твоя́ песнослóвцы, Богорóдице,/ живы́й и незави́стный Истóчниче,/ лик себé совокýпльшiя, духóвно утверди́,/ в честнéм вхождéнiи Твоéм// венцéв слáвы сподóби.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк апóстола, глас 8: Учени́к, и друг Твой, и подражáтель стрáсти Твоея́/ вселéнней Бóга Тя проповéда Богоглагóливый Фiлíпп;/ тогó моли́твами от врагóв пребеззакóнных/ Цéрковь Твою́ и всяк град Твой// Богорóдицею соблюди́, Многоми́лостиве.
Íкос: Струю́ слóва подáждь ми, Гóсподи,/ воднóе естествó содéявый,/ сéрдце моé укрепи́, Благоутрóбне,/ и҆́же зéмлю утверди́вый слóвом Твои́м,/ и просвети́ моé помышлéнiе,/ свéтом, я́ко ри́зою, одевáяйся,/ да глагóлю и пою́ подобáющая// и достóйно восхвалю́ Твоего́ угóдника, Многоми́лостиве.
Ин седáлен апóстола, глас 8: Тученóсен óблак духóвный и҆́стинно показáлся еси́ сýщим на земли́,/ напая́я, я́ко ни́ву, тáинственно сердцá нáша;/ протéк слóвом, напая́еши концы́/ и дождь проливáеши ми́ра от рáки./ Тем, дохнýв невéрным сердцáм воню́ Дýха,/ в ни́хже сокрóвищствовал еси́, апóстоле Фiлíппе,/ моли́ся Хрiстý Бóгу грехóв оставлéнiе даровáти// прáзднующим любóвiю святýю пáмять твою́.
Слáва Ѻтцý и Сы́ну и Святóму Дýху.
Седáлен апóстола, глас 8: И́дольскую лесть низложи́л еси́,/ Спáсовы стрáсти возжелéв, Фiлíппе, слáвне,/ яви́лся еси́ мíру, Небéсная всем источáя чудесá/ и язы́ков быв, всеблажéнне, апóстол./ Тем твою́ пáмять достóйно чтим, песнослóвяще:/ Госпóдень апóстоле,/ моли́ Хрiстá Бóга грехóв оставлéнiе даровáти// прáзднующим любóвiю святýю пáмять твою́.
И ны́не и прúсно и во вéки векóв. Амúнь.
Богорóдичен из минéи: В напáсти многоплетéнныя впад от враг ви́димых и неви́димых,/ бýрею одержи́мь безчи́сленных согрешéнiй мои́х,/ и, я́ко к тéплому заступлéнiю и покрóву моемý, Чи́стая,/ ко пристáнищу притекáю Твоея́ блáгости./ Тéмже, Пречи́стая,/ из Тебé Воплощéнному безсéменно моли́ся прилéжно о всех рабéх Твои́х,/ непрестáнно моля́щихтися, Богорóдице Пречи́стая,/ моля́щи Егó при́сно согрешéнiй оставлéнiе даровáти// воспевáющим достóйно слáву Твою́.
ПЕСНЬ 4
Iрмóс: Óтча нéдра не остáвль,/ и сошéд на зéмлю, Хрiстé Бóже,/ тáйну услы́шах смотрéнiя Твоегó,// и прослáвих Тя, Еди́не Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Своя́ плещи́ дав, и҆́же от Дéвы воплóщься, на рáны, рабý прегреши́вшу,/ бiéн бывáет Влады́ка непови́нен,// разрешáя моя́ согрешéнiя.
Хор: Слáва, Гóсподи, Святóму Воскресéнiю Твоемý.
Чтец: Предстоя́в суди́щу судíй законопрестýпных,/ я́ко осуди́мый пови́нен бывáет, и заушáется брéнною рукóю,// создáвый человéка я́ко Бог, и судя́й прáведно земли́.
Хор: Пресвятáя Богорóдице, спасù нас.
Богорóдичен: Я́ко вои́стинну Мáти Бóжiя, Творцá Твоегó и Сы́на моли́,// к спаси́тельному напрáвити мя пристáнищу, Всенепорóчная, слáвнаго Егó хотéнiя.
Глас 7
Хор: Слáва, Гóсподи, Крестý Твоемý Честнóму и Воскресéнiю.
Чтец: Не вéдый грехá, и егó рáди быв Гóсподи, éже не был еси́ воображáешися,/ прiéм чýждее, да спасéши мiр,// и убiéши прельсти́в мучи́теля.
Хор: Слáва, Гóсподи, Крестý Твоемý Честнóму и Воскресéнiю.
Чтец: На Крестé воздви́жен был еси́,/ и прáотца Адáма разреши́л еси́ грех/ [егóже рáди Твою́ услы́шах си́лу:]// я́ко вся спасти́ помáзанныя Твоя́ пришéл еси́.
Глас 7
Хор: Пресвятáя Богорóдице, спасù нас.
Чтец: Избрáнная вся и дóбрая,/ я́вльшися Бóгу прéжде создáнiя свéтлостiю, Всепéтая,// светоли́тiем Твои́м пою́щiя Тя просвети́.
Хор: Пресвятáя Богорóдице, спасù нас.
Чтец: Бóга человéком родилá еси́, Чи́стая,/ воплощéнна от чи́стых кровéй Твои́х,/ избавля́юща согрешéнiй мнóгих,// любóвiю слáвящiя и почитáющiя Тя, Мáти Дéво.
Глас 6
Хор: Святы́й апóстоле Фiлíппе, молú Бóга о нас.
Чтец: Сóлнца селéнiе, Хрiстá, сýщаго Свéта,/ и храм показáлся еси́ вмести́телен Тогó свéтлости,// и Нéбо, слáву Бóжiю человéком повéдая. (Двáжды)
Хор: Святы́й апóстоле Фiлíппе, молú Бóга о нас.
Чтец: Во истлéвшее страстьми́ человéчество ты вложéн, Бóжiя соль, от Хрiстá,/ тогó изсуши́ гни́лость лю́тую,// Боговещáтелю достослáвне. (Двáжды)
Слáва Ѻтцý и Сы́ну и Святóму Дýху.
Тропáрь: Си́лою, Фiлíппе, Хрiстóвою укрепля́емь,/ дéмонскаго полкá и зловéрных яви́лся еси́ си́льншiй,// сýщим на земли́ вопiя́ жи́зни Божéственныя благовéстiе.
И ны́не и прúсно и во вéки векóв. Амúнь.
Богорóдичен: Пристáнище благоти́хое Хрiстóс яви́ вéрою и любóвiю Тя,/ и́стинную Влады́чицу Всенепорóчную,// от сóвести чи́стыя Богорóдицу проповéдающим.
Катавáсiя (глас 4): Седя́й в Слáве/ на Престóле Божествá/ во óблаце лéгце,/ прiи́ди Iисýс Пребожéственный,/ Нетлéнною Длáнiю/ и спасé зовýщiя:// слáва, Хрiстé, си́ле Твоéй.
ПЕСНЬ 5
Iрмóс: Нощь не светлá невéрным Хрiстé,/ вéрным же просвещéнiе в слáдости словéс Твои́х./ Сегó рáди к Тебé ýтренюю,// и воспевáю Твоé Божествó.
Хор: Слáва, Гóсподи, Святóму Воскресéнiю Твоемý.
Чтец: За Твоя́ рабы́ продаéшися, Хрiстé,/ и по лани́те ударéнiе терпи́ши,/ свобóде ходáтайственно пою́щим:// к Тебé ýтренюю, и воспевáю Твоé Божествó.
Хор: Слáва, Гóсподи, Святóму Воскресéнiю Твоемý.
Чтец: Божéственною Твоéю си́лою, Хрiстé,/ нéмощiю плотскóю крéпкаго низложи́л еси́,// и победи́теля мя смéрти, Спáсе, воскресéнiем показáл еси́.
Хор: Пресвятáя Богорóдице, спасù нас.
Богорóдичен: Бóга родилá еси́ Мáти чи́стая,/ воплощéннаго из Тебé боголéпно, Всепéтая:/ понéже не познáла еси́ мýжеска пóла,// но от Святáго раждáеши Дýха.
Глас 7
Хор: Слáва, Гóсподи, Крестý Твоемý Честнóму и Воскресéнiю.
Чтец: Егдá со беззакóнными вмени́вся, вознéслся еси́ на лóбнем,/ свети́ла сокрывáхуся, и земля́ колебáшеся, и церкóвная свéтлость раздрáся,// еврéйское явля́ющи отпадéнiе.
Хор: Слáва, Гóсподи, Крестý Твоемý Честнóму и Воскресéнiю.
Чтец: Тебé разруши́вшаго мучи́телеву всю си́лу/ крéпостiю непостижи́маго Твоегó Божествá,// и мéртвыя Твои́м воскресéнiем воздви́гшаго пе́сньми слáвим.
Глас 7
Хор: Пресвятáя Богорóдице, спасù нас.
Чтец: Лéствицу узрéв Iáков, к высотé утверждéну,/ óбразу научи́ся, неискусобрáчная Тебé:// Тобóю бо Бог человéком приобщи́ся, Всечи́стая Влады́чице.
Хор: Пресвятáя Богорóдице, спасù нас.
Чтец: Избавлéнiе вéчное Тобóю, Дéво, ны́не обрéтше/ усéрдно зовéм Ти: éже рáдуйся, Богоневéстная:// и Твои́м свéтом возрáдовавшеся, Всепéтая, пéсньми Тя поéм.
Глас 6
Хор: Святы́й апóстоле Фiлíппе, молú Бóга о нас.
Чтец: Я́да душегуби́тельнаго врáжiя врачéбными твои́ми длáньми, Богоглагóливе, изсуши́в,// смертонóсною глубинóю держи́мыя лю́тыя болéзни избавля́я. (Двáжды)
Хор: Святы́й апóстоле Фiлíппе, молú Бóга о нас.
Чтец: Огнедохновéнен весь яви́лся еси́ Паракли́товым нашéствiем и благодáтiю, Фiлíппе:// иззя́бшiя безбóжiя зимóю, теплотóю вéры оживотвори́л еси́. (Двáжды)
Слáва Ѻтцý и Сы́ну и Святóму Дýху.
Тропáрь: Близ был еси́ Хрiстá,/ даéмыя ти зари́ несрéдственно прiéмля,/ просвещáя к тебé притекáющiя// и приводя́ ты́я Содéтелю Твоемý.
И ны́не и прúсно и во вéки векóв. Амúнь.
Богорóдичен: Слóвом вся содéтельствуя/ и мýдрым Прóмыслом окормля́я еди́н, я́ко хóщет, Госпóдь,/ за благоутрóбiе зи́ждется из Тебé// и плоть несказáнно, Пречи́стая, бывáет.
Катавáсiя (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла еси́ во утрóбе над всéми Бóга/ и родилá еси́ безлéтнаго Сы́на,/ всем воспевáющим Тя// мир подавáющая.
ПЕСНЬ 6
Iрмóс: Плáвающаго в молвé житéйских попечéнiй,/ с кораблéм потопля́ема грехи́,/ и душетлéнному звéрю приметáема,/ я́ко Ióна, Хрiстé, вопiю́ Ти:// из смертонóсныя глубины́ возведи́ мя.
Хор: Слáва, Гóсподи, Святóму Воскресéнiю Твоемý.
Чтец: Воспоминáху Тя заключéнныя во áде дýши, и остáвльшiяся прáведных,/ и от Тебé спасéнiя моля́хуся:/ éже Крестóм, Хрiстé, пóдал еси́ преиспóдним,// пришéд я́ко благоутрóбен.
Хор: Слáва, Гóсподи, Святóму Воскресéнiю Твоемý.
Чтец: Ко одушевлéнному Твоемý и нерукотворéнному хрáму,/ разрушéну бы́вшу страдáньми,/ воззрéти пáки лик апóстольскiй отчáяся:/ но пáче надéжды поклóнься,// воскрéсша повсю́ду проповéда.
Хор: Пресвятáя Богорóдице, спасù нас.
Богорóдичен: Неизречéннаго рождествá Твоегó всенепорóчнаго óбраз,/ Дéво богоневéстная, и҆́же нас рáди,/ кто от человéк сказáти возмóжет?/ Я́ко Бог неопи́санне, Слóво соедини́вся Тебé,// плоть из Тебé бысть.
Глас 7
Хор: Слáва, Гóсподи, Крестý Твоемý Честнóму и Воскресéнiю.
Чтец: На крестé вознéсся, Спáсе вóлею,/ врáжiю плени́л еси́ держáву,// на сем пригвозди́в грехóвное, Блáже, рукописáнiе.
Хор: Слáва, Гóсподи, Крестý Твоемý Честнóму и Воскресéнiю.
Чтец: Из мéртвых воскрéс Спáсе влáстiю,/ совоздви́гл еси́ человéческiй род,// живóт и нетлéнiе даровáвый нам, я́ко Человеколюбец.
Глас 7
Хор: Пресвятáя Богорóдице, спасù нас.
Чтец: Закóннiи Тя óбразы, и прорóческая проречéнiя я́ве предвозвещáху,/ хотя́щую роди́ти Благодéтеля, Чи́стая, всея́ твáри,/ многочáстне и многообрáзне благодéйствовавшаго// вéрно воспевáющих Тя.
Хор: Пресвятáя Богорóдице, спасù нас.
Чтец: Устрáншагося дрéвле навéтом человекоубíйцы, Адáма первоздáннаго/ рáйскiя божéственныя слáдости,/ Неискусобрáчная, пáки возвелá еси́,// рóждши и҆́же от преступлéнiя нас избáвившаго.
Глас 6
Хор: Святы́й апóстоле Фiлíппе, молù Бóга о нас.
Чтец: Одержáщу и губя́щую зря прéлесть врáжiю человéческий род,/ Твоя́ стрéлы, изощрéнныя апóстолы, напря́г, испусти́л еси́/ и развéрзл еси́ брéнная устá змíева,/ всех от тогó врéда и тли, Спáсе, исцеля́я.(Двáжды)
Хор: Святы́й апóстоле Фiлíппе, молù Бóга о нас.
Чтец: Вы́шним сiя́нiем блистáя, яви́лся еси́,/ я́коже мóлнiя, вселéнней светя́,/ и я́ко горá, слáдость искáпающая,/ я́ко росá Божéственная, с Небесé пáдающая,/ я́ко апóстол избрáн, дванадесяточи́сленный полк исполня́я// ученикóв Хрiстóвых, всеблажéнне. (Двáжды)
Слáва Ѻтцý и Сы́ну и Святóму Дýху.
Тропáрь: Научи́вся Твоея́ тáйны глубинé,/ Божéственный учени́к, я́ко рекý мíра, наводня́ющу слáдости потóк,/ я́ко потопля́ющую вóлну, слáву язы́ков, Тя проповéда велеглáсно/ и Твоé слáвное истощáнiе, Блáже,// éже о нас благовести́.
И ны́не и прúсно и во вéки векóв. Амúнь.
Богорóдичен: Умерщвля́емыя и ги́бнующiя вся смéртiю человéки/ Ты, Хрiстá рóждши - Нетлéнное Безсмéртiе,/ призвáла еси́ к жи́зни вéчней,/ и просвети́ла еси́ омрачéнныя, и свободи́ла еси́,// разреши́вши ýзы отведéнiя нáшего, Всепéтая.
Катавáсiя (глас 4): Божéственное сié и всечестнóе/ совершáюще прáзднество,/ Богомýдрiи, Богомáтере,/ прiиди́те, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 7: Не ктомý держáва смéртная/ возмóжет держáти человéки:/ Хрiстóс бо сни́де, сокрушáя и разоря́я си́лы ея́./ Связýем бывáет ад,/ прорóцы соглáсно рáдуются:/ предстá, глагóлюще, Спас сýщим в вéре,// изыди́те, вéрнiи, в воскресéнiе.
Íкос: Вострепетáша дóле преиспóдняя днесь,/ ад и смерть Еди́наго от Трóицы:/ земля́ поколебáся, врáтницы же áдовы ви́девше Тя, ужасóшася:/ вся же тварь со прорóки рáдующися поéт Тебé побéдную песнь,/ избáвителю Бóгу нáшему,/ разруши́вшему ны́не смéртную си́лу./ Да воскли́кнем и возопiи́м ко Адáму, и к сýщим из Адáма:/ дрéво сегó пáки введé.// Изыди́те, вéрнiи, в воскресéнiе.
ПЕСНЬ 7
Iрмóс: Пещь óтроцы огнепáльну/ дрéвле росоточáщу показáша,/ Еди́наго Бóга воспевáюще и глагóлюще:/ превозноси́мый отцéв Бог// и препрослáвлен.
Хор: Слáва, Гóсподи, Святóму Воскресéнiю Твоемý.
Чтец: Дрéвом умерщвля́ется Адáм, вóлею преслушáнiе содéлав:/ послушáнiем же Хрiстóвым пáки обновля́емь есть.// Менé бо рáди распинáется Сын Бóжiй, препрослáвленный.
Хор: Слáва, Гóсподи, Святóму Воскресéнiю Твоемý.
Чтец: Тебé воскрéсшаго, Хрiстé, из грóба, тварь вся воспé:/ Ты бо жизнь сýщим во áде процвéл еси́,/ мéртвым воскресéнiе,// и́же во тьме, свет препрослáвленный.
Хор: Пресвятáя Богорóдице, спасù нас.
Богорóдичен: Рáдуйся, Дщи Адáма тлéннаго./ Рáдуйся, еди́на Богоневéсто./ Рáдуйся, éюже тля изгнáна бысть, я́же Бóга рóждши:// Егóже моли́, Чи́стая, спасти́ся всем нам.
Глас 7
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же на дрéве крéстнем грехóвное жáло притупи́в,/ и Адáмова преступлéнiя рукописáнiе разруши́в копiéм ребрá Твоегó,// благословéн еси́, Гóсподи Бóже отéц нáших.
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же в ребрó прободéн быв,/ и кроплéньми крóве божéственныя зéмлю очи́стив,/ кровьми́ идолобéсiя осквернéнную,// благословéн еси́, Гóсподи Бóже отéц нáших.
Глас 7
Хор: Пресвятáя Богорóдице, спасù нас.
Чтец: Преиспещрéну, позлащéну ýтварь Тя имýщу/ возлюби́ Создáтель Твой, Дéво, и Госпóдь:// превозноси́мый отцéв Бог и препрослáвлен.
Хор: Пресвятáя Богорóдице, спасù нас.
Чтец: Очищáется, Отрокови́це, угль дрéвле Исáiа прiéм:/ знаменáтельне Твоé рождествó ви́дев,// превозноси́маго отцéв Бóга, и препрослáвлена.
Глас 6
Хор: Святы́й апóстоле Фiлíппе, молù Бóга о нас.
Чтец: Я́ко свет послáлся еси́ стрелы́ подóбiем, апóстоле,/ светозáрными блистáнiи просвещáя вéрою зовýщiя:// благословéн еси́, Гóсподи, Бóже отéц нáших. (Двáжды)
Хор: Святы́й апóстоле Фiлíппе, молù Бóга о нас.
Чтец: Богáтыми светоли́тiи Божéственнаго, блажéнне, проповéданiя сiя́я свéтло,/ во тьме сýщiя песнопéти просвети́л еси́:// благословéн еси́, Гóсподи, Бóже отéц нáших. (Двáжды)
Слáва Ѻтцý и Сы́ну и Святóму Дýху.
Тропáрь: Витíйская буеслóвiя/ и словéсную всю лю́тость крéпким слóвом вéры победи́в, пел еси́:/ благословéн еси́, Гóсподи, Бóже отéц нáших.
И ны́не и прúсно и во вéки векóв. Амúнь.
Богорóдичен: В естествáх пресýщественно, Дéво, двух/ родилá есᴎ́ соединéнных, Чи́стая, неслiя́нно Хрiстá, Емýже зовéм:// благословéн еси́, Гóсподи, Бóже отéц нáших.
Катавáсiя (глас 4): Не послужи́ша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн есᴎ́.
Продолжение здесь