Неделя 24 по Пятидесятнице. Апостола Филиппа, глас 7 ВСЕНОЩНОЕ БДЕНИЕ. УТРЕНЯ(окончание) ЧАС ПЕРВЫЙ.
27 ноября́ 2022 гóда. Недéля 24 по Пятидеся́тнице. Апóстола Фiлíппа. Глас 7. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени. Слýжба мiрскúм чúном. Заговéнiе на Рождéственскiй (Фiлíппов) пост.
Окончáние всенóщного бдéния. Начáло здесь ( великая вечéрня), здесь ( ýтреня) здесь ( продолжéние ýтрени с канóном)
ПЕСНЬ 8
Iрмóс: Неопáльная огню́ в Сiнáи причáщшаяся Купинá,/ Бóга яви́ медленоязы́чному и гугни́вому Моисéови,/ и óтроки рéвность Бóжiя/ три непребори́мыя во огни́ певцы́ показá:/ вся делá Госпóдня Гóспода пóйте,// и превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Пречи́стый Áгнец словéсный за мiр заклáн быв,/ престáви я́же по закóну приноси́мая,/ очи́стив сегó кромé прегрешéнiй я́ко Бог, при́сно зовýща:// вся делá Госпóдня, Гóспода пóйте, и превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Нетлéнна не сýщи прéжде стрáсти,/ воспрiя́тая от Создáтеля плоть нáша,/ по стрáсти и воскресéнiи неприкосновéнна тлéнiю устрóися,/ и смéртныя обновля́ет, зовýщiя:/ вся делá Госпóдня Гóспода пóйте,// и превозноси́те во вся вéки.
Хор: Пресвятáя Богорóдице, спасù нас.
Богорóдичен: Твоé чистóтное и всенепорóчное, Дéво,/ сквéрное и мéрзское вселéнныя очи́сти,/ и былá еси́ нáшего примирéнiя к Бóгу винá, Пречи́стая:/ тéмже Тя, Дéво, вся делá благослови́м,// и превознóсим во вся вéки.
Глас 7
Хор: Слáва, Гóсподи, Крестý Твоемý Честнóму и Воскресéнiю.
Чтец: Претерпéвшаго стрáсти вóлею,/ и на крестé пригвождéна хотéнiем,/ и разрýшшаго си́лы áдовы,// пóйте свящéнницы, лю́дiе превозноси́те во вся вéки.
Хор: Слáва, Гóсподи, Крестý Твоемý Честнóму и Воскресéнiю.
Чтец: Упраздни́вшаго смéрти держáву,/ и от грóба воскрéсшаго со слáвою,/ и спáсшаго человéческiй род,// пóйте свящéнницы, лю́дiе превозноси́те во вся вéки.
Глас 7
Хор: Пресвятáя Богорóдице, спасù нас.
Чтец: Свéтом рождествá Твоегó,/ страннолéпно вселéнную просвети́ла еси́, Богороди́тельнице,/ сýща бо вои́стинну Бóга на объя́тiях нóсиши Твои́х,/ просвещáюща вéрныя при́сно зовýщiя:/ вся делá Госпóдня Гóспода пóйте,// и превозноси́те во вся вéки.
Хор: Пресвятáя Богорóдице, спасù нас.
Чтец: Поéм, Чи́стая, благочéстно Твоé чрéво,/ Бóга вмести́вшее несказáнно воплощáема,/ дáвшаго всем вéрным богоразýмiя просвещéнiе, при́сно зовýщим:/ вся делá Госпóдня Гóспода пóйте,// и превозноси́те во вся вéки.
Глас 6
Хор: Святы́й апóстоле Фiлíппе, молù Бóга о нас.
Чтец: Свéта тя мíра соверши́ Отéчь Свет, Слóво Ипостáсное,/ избрáвый апóстола от мíра, треблажéнне,/ и, вооружи́в Божéственною си́лою Своéю,/ послá, я́ко орýжника непобеди́ма, вопiю́ща:// Гóспода пóйте делá и превозноси́те во вся вéки. (Двáжды)
Хор: Святы́й апóстоле Фiлíппе, молù Бóга о нас.
Чтец: Си́лою Божéственною укрепля́емь, апóстоле,/ проти́вныя полки́ победи́л еси́,/ свирéпое ополчéнiе тех разруши́в,/ мир бо неотъя́тный жрéбiй взем,/ ми́рное устроéнiе насади́л еси́ мíру,/ Гóспода воспевáйте делá, вопiя́,// и превозноси́те во вся вéки. (Двáжды)
Благословúм Отцá, и Сы́на, и Святáго Дýха, Гóспода.
Тропáрь: Всéю любóвiю прилепи́лся еси́ воплощéнному Слóву Бóжiю, апóстоле,/ учени́к Тогó быв, и Бóжiй слугá, и тайноглагóльник,/ отонýдуже от Негó пóслан во язы́ки,/ проповéдал еси́ Егó пришéствiе,/ Гóспода пóйте, вопiя́,/ и превозноси́те во вся вéки.
И ны́не и прúсно и во вéки векóв. Амúнь.
Богорóдичен: Весь соедини́ся пáче рáзума неизмéнно всемý человéчеству/ Пребожéственный во утрóбе Твоéй, Всесвятáя Дéво./ Тéмже во дву естествý знáется Хрїстóс, еди́н сый обоé./ Емýже, пою́ще, вопiéм:/ Гóспода пóйте делá// и превозноси́те во вся вéки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 4): Ѻ́троки благочести́выя в пéщи/ Рождествó Богорóдичо спаслó есть;/ тогдá ýбо образýемое,/ ны́не же дéйствуемое,/ вселéнную всю воздвизáет пéти Тебé:/ Гóспода пóйте, делá,// и превозноси́те Егó во вся вéки.
Возглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стих)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Нетлéнiя искушéнiем рóждшая,/ и всехитрецý Слóву плоть взаимодáвшая,/ Мáти неискусомýжная Дéво Богорóдице,/ Прiя́телище Нестерпи́маго,/ Селó Невмести́маго Зижди́теля Твоегó,// Тя величáем.
Хор: Слáва, Гóсподи, Святóму Воскресéнiю Твоемý.
Чтец: И҆́же божествý страсть прилагáющiи,/ заусти́теся вси чуждемýдреннiи:/ Гóспода бо слáвы плóтiю распя́та,/ не распя́та же естествóм божéственным,// я́ко во двою́ естествý Еди́наго величáем.
Хор: Слáва, Гóсподи, Святóму Воскресéнiю Твоемý.
Чтец: И҆́же телесéм востáнiю невéрующiи,/ ко Хрїстóву шéдше грóбу, научи́теся:/ я́ко умерщвлéна бысть, и воскрéсе пáки плоть Жизнодáвца,// во уверéнiе послéдняго воскресéнiя, на нéже уповáем.
Хор: Пресвятáя Богорóдице, спасú нас.
Богорóдичен: Не божéств Трóицу, но Ипостáсей,/ нижé еди́ницу Лиц, но Божествá чтýще,/ ссецáем же Сiю́ деля́щих:// сливáем же пáки, слiя́нiе дерзáющих на Сiю́, Ю́же величáем.
Глас 7
Хор: Слáва, Гóсподи, Крестý Твоемý Честнóму и Воскресéнiю.
Чтец: Свет от Свéта, Ѻ́тчее сiя́нiе слáвы безлéтно осiя́вый,/ я́коже во тьме человéческому житiю́ Хрїстóс возсiя́,/ и гоня́щую прогнá тьму:// егóже непрестáнно вéрнiи величáем.
Хор: Слáва, Гóсподи, Крестý Твоемý Честнóму и Воскресéнiю.
Чтец: Стрáсти плотскíя, и крéпость божествá, во Хрїстé ви́дяще,/ мýдрствующiи еди́но слóжное естествó, да посрáмятся:/ той бо я́ко человéк ýбо умирáет,// я́коже всегó Содéтель востаéт.
Глас 7
Хор: Пресвятáя Богорóдице, спасù нас.
Чтец: Рáдости нам вéчныя ходáтаица и весéлiя яви́лася еси́/ Приснодéво Отрокови́це, Избáвителя рóждши,/ и҆́стиною и Дýхом божéственным Тогó чтущих,// я́ко Бóга избавляющаго.
Хор: Пресвятáя Богорóдице, спасù нас.
Чтец: Поя́ Давíд, Твой прáотец, Пречи́стая, Тя/ ковчéг именýет Святы́ни божéственныя,/ преестéственне Бóга вмести́вшую,/ во Отéческих Седя́щаго нéдрех,// Егóже непрестáнно вéрнiи величáем.
Глас 6
Хор: Святы́й апóстоле Фiлíппе, молù Бóга о нас.
Чтец: Ны́не неизречéнныя слáвы и свéта невечéрняго сподóбився,/ идéже неизглагóланное есть весéлiе,/ идéже рáдость непрестáнная в Цéркви перворождéнных,/ идéже прáведных селéнiя,// за вся хрiстiáны моли́ся, Фiлíппе всемýдре.(Двáжды)
Хор: Святы́й апóстоле Фiлíппе, молù Бóга о нас.
Чтец: Укрáшен добрóтою ýмнаго благолéпiя/ и цáрствiя венцéм обложéн, Богомýдре,/ и богáтыми светодая́нiи, Фiлíппе, просвещáемь пресýщественнаго Свéта сiя́ньми,// рáдуяся Влады́ки твоегó Престóлу, блажéнне, предстои́ши. (Двáжды)
Слáва Ѻтцý и Сы́ну и Святóму Дýху.
Тропáрь: Со апóстолы всéми честны́ми, и прорóки, и страстотéрпцы, Фiлíппе,/ преподóбными, iерáрхи и прáведными,/ с Богорóдицею моли́ разрешéнiе грехóв мнóгих и прегрешéнiй дáти очищéнiе// вéрою светонóсную и Божéственную пáмять совершáющим твою́.
И ны́не и прúсно и во вéки векóв. Амúнь.
Богорóдичен: Воплощéнно Слóво, прéжде безплóтно сýщо,/ Дéво Мáти, родилá еси́./ Сегó рáди Тя, госпóдьственно Богорóдицу, вси благочéстно слáвим,/ и́стиннейшее Тебé нарицáнiе принося́ще, Чи́стая,// Ты бо вéрных спасéнiя кóрень пребывáеши.
Катавáсiя (глас 4): Всяк земнорóдный/ да взыгрáется, Дýхом просвещáемь,/ да торжествýет же Безплóтных умóв естествó,/ почитáющее свящéнное торжествó Богомáтере,/ и да вопiéт:/ рáдуйся, Всеблажéнная,// Богорóдице, Чи́стая Приснодéво.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостiлáрiй воскрéсный вторы́й: Кáмень узрéвша отвалéн, миронóсицы рáдовахуся,/ ви́деша бо ю́ношу седя́ща во грóбе,/ и той тем речé: се Хрїстóс востáл есть,/ рцы́те с Петрóм ученикóм:/ на гóру приспéйте Галiлéйскую, тáмо вам яви́тся,// я́коже предречé другóм.
Слáва Ѻтцý и Сы́ну и Святóму Дýху.
Светúлен ап. Фiлíппа: Течéнiе крáсных твои́х ног, Фiлíппе, возврати́в,/ к шéствiю Небéсному возшéл еси́, рáдуяся,/ и, Трóице предстáв, во Отцé ви́диши Сы́на и Дýха Божéственнаго.// Сегó рáди вéрою всесвящéнную твою́ и Божéственную прáзднуем пáмять.
И҆ ны́не и прúсно и во вéки векóв. Амúнь.
Богорóдичен воскрéснаго Ексапостiлáрiя: Áнгел ýбо принесé Дéве, éже рáдуйся,/ прéжде Твоегó зачáтiя, Хрїстé,/ Áнгел же кáмень отвали́ грóба Твоегó,/ вмéсто печáли ов ýбо рáдости неизречéнныя знáменiя,/ ов же в смéрти мéсто подáтеля Тя жи́зни проповéдуя и величáя,// и глагóля воскресéнiе женáм, и таи́нником.
ХВАЛИТНЫ
Хор, глас 7: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéние положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 7: Воскрéсе Хрїстóс из мéртвых,/ разрýш смéртныя ýзы:/ благовести́ землé, рáдость вéлiю,// пóйте Небесá Бóжiю слáву.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Воскресéнiе Хрїстóво ви́девше,/ поклони́мся святóму Гóсподу Iисýсу:// еди́ному безгрéшному.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Хрiстóву воскресéнiю клáняющеся не престáем:/ Той бо спасл есть нас от беззакóнiй нáших,/ Святы́й Госпóдь Iисýс,// явлéй воскресéнiе.
Хвалúте Егó во глáсе трýбнем, хвалúте Егó во псалтúри и гýслех.
Стихúра: Что воздáмы Гóсподеви о всех, я́же воздадé нам?/ Нас рáди Бог в человéцех,/ за истлéвшее естествó Слóво плоть бысть,/ и всели́ся в ны, к неблагодáрным, Благодéтель:/ к плéнником, Свободи́тель:/ ко и҆́же во тьме седя́щим, Сóлнце Прáвды:/ на Крестé, безстрáстный: во áде, свет:/ в смéрти, живóт: воскресéнiе, пáдших рáди./ К Немýже возопiи́м:// Бóже наш, слáва Тебé.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúры ап. Фiлíппа, глас 8: О, преслáвнаго чудесé!/ Ры́бы иногдá ловя́й апóстол,/ человéков ловéц бысть Богопроизведéнный,/ словéс мрéжею язы́ки улови́,/ крéста ýдицею мир возвлечé./ О, каковý лови́тву Бóгу принесé Богодéлатель!// Егóже пáмять ны́не прáзднуем.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: О, преслáвнаго чудесé!/ От Бóга пóслан, посредé волкóв, я́ко овчá,/ небоя́зненно прохождáше апóстол Фiлíпп,/ звéри áгнцы вéрою яви́,/ мир Божéственно престихíйствова./ О, дел вéры! О, сил изя́щнейших!/ Егóже моли́твами, Хрїстé,// спаси́ дýши нáша, я́ко еди́н Благоутрóбен.
Во всю зéмлю изы́де вещáнiе их/ и в концы́ вселéнныя глагóлы их.(Пс.18:5А)
Глас 2: Небéсная чáша яви́лся еси́ мýдрости,/ Дýха бо показáлся еси́ оби́тель крáсная/ и изрéкл еси́ добродéтелей и́стину,/ земны́я улови́в ýмною ýдицею мýдрости Бóжiя./ Тем мóлим тя, апóстоле Фiлíппе,// моли́ся о душáх нáших.
Небесá повéдают слáву Бóжiю,/ творéнiе же рукý Егó возвещáет твердь. (Пс.18:2)
Глас 3: Рыб лови́тву в человéчу лови́тву преложи́в, / сýщiя во глубинé прéлести / нéводом извлéк тáинственным, / Фiлíппе апóстоле, / весь мір улови́л еси́ / и учи́телю твоемý, Хрiстý, привéл еси́. / Тем мóлим тя: / моли́ся Емý непрестáнно / спасти́ дýши нáша, // вéрно творя́щих всечестнýю пáмять твою́.
Слáва Ѻтцý и Сы́ну и Святóму Дýху.
Стiхúра евáнгельская вторáя, глас 2: С ми́ры пришéдшим я́же с Марíею женáм,/ и недоумевáющимся,/ кáко бýдет им улучи́ти желáнiе,/ яви́ся кáмень взят,/ и Божéственный ю́ноша утоля́я мятéж душ их,/ востá бо, глагóлет, Iисýс Госпóдь./ Тéмже проповéдите проповéдником Егó,/ ученикóм в Галилéю тещи́,/ и ви́дети Егó воскрéсша из мéртвых,// я́ко Жизнодáвца и Гóспода.
И ны́не и прúсно и во вéки векóв. Амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебé.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстé, и Святы́й Дýше. Гóсподи Бóже, Áгнче Бóжїй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя. (Пс.32:22)
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 1: Днесь Спасéнiе мíру бысть,/ поéм Воскрéсшему из грóба,/ и Начáльнику жи́зни нáшея:/ разруши́в бо смéртiю смерть,// побéду дадé нам и вéлiю ми́лость.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Гóсподи поми́луй (12раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных хрiстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
ОТПУСТ
Гóсподи, Iисýсе Хрїстé, Сыне Бóжїй, моли́твами пречи́стыя Своея́ Мáтере и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 7: Разруши́л еси́ Крестóм Твои́м смерть, отвéрзл еси́ разбóйнику рай; мvронóсицам плач преложи́л еси́ и Апóстолом проповéдати повелéл еси́, я́ко воскрéсл еси́, Хрїстé Бóже, дáруяй мíрови вéлiю ми́лость.
Слáва Ѻтцý и Сы́ну и Святóму Дýху.
Тропáрь ап. Фiлíппа, глас 3: Апóстоле святы́й Фiлíппе, моли́ Ми́лостивого Бóга, да прегрешéнiй оставлéнiе подáст душáм нáшим.
И҆ ны́не и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сыне Бóжїй, поми́луй нас. Ами́нь.
КОНДАК
Кондáк апóстола, глас 8: Учени́к, и друг Твой, и подражáтель стрáсти Твоея́ вселéнней Бóга Тя проповéда Богоглагóливый Фiлíпп; тогó моли́твами от врагóв пребеззакóнных Цéрковь Твою́ и всяк град Твой Богорóдицею соблюди́, Многоми́лостиве.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстé, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 раза)
Гóсподи, благословᴎ́.
Гóсподи, Iисýсе Хрїстé, Сыне Бóжїй, моли́твами пречи́стыя Своея́ Мáтере, святы́х слáвных и всехвáльных Апóстол, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу