Неделя 19 по Пятидесятнице. Святых отцов VII вселенского собора, ВСЕНОЩНОЕ БДЕНИЕ. УТРЕНЯ.КАНОН
23 октября́ 2022 гóда. Недéля 19 по Пятидеся́тнице. Пáмять святы́х отцéв VII Вселéнскаго Собóра. Глас 2. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени.
Начало зри здесь ( великая вечéрня) и здесь ( ýтреня)
ТРОПАРИ ВОСКРЕСНЫ ГЛАС 5
Благословéн есú, Гóсподи,/научú мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есú, Гóсподи,/научú мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есú, Гóсподи,/научú мя оправдáнiем Твоúм.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есú, Гóсподи,/научú мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И҆ ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Чтец: Аллилýiа, аллилýiа, аллилýiа, слáва Тебé Бóже. (3 раза)
Гóсподи, поми́луй. (3 раз)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоú воскрéсны, глас 2: По стрáсти шéдша во гроб жены́,/ во éже помáзати тéло Твоé, Хрїстé Бóже,/ ви́деша áнгелы во грóбе, и ужасóшася:/ глас бо слы́шаху от них, яко воскрéсе Госпóдь,// дáруя мíрови вéлiю ми́лость.
СТЕПЕННА, ГЛАС 2
1 АНТИФОН
Хор: На нéбо óчи пущáю моего сéрдца, к Тебé, Спасé,// спасú мя Твоúм осiя́нiем. (Двáжды)
Поми́луй нас согрешáющих Тебé мнóго,/ на вся́кiй час, о Хрїстé мой,// и даждь óбраз прéжде концá покáятися Тебé. (Двáжды)
Слáва Ѻтцý и Сы́ну и Святóму Дýху.
Святóму Дýху, Éже цáрствовати подобáет,/ освящáти, подвизáти тварь:// Бог бо есть, Единосýщен Ѻтцý и Слóву.
И ны́не и прúсно и во вéки векóв. Амúнь.
Святóму Дýху, Éже цáрствовати подобáет,/ освящáти, подвизáти тварь:// Бог бо есть, Единосýщен Ѻтцý и Слóву.
2 АНТИФОН
Áще не Госпóдь бы был в нас,/ кто довóлен цел сохранéн бы́ти от врагá,// кýпно и человекоубíйцы? (Двáжды)
Зубóм их не предáждь, Спáсе, Твоегó рабá:// и҆́бо львóвым óбразом на мя подвизáются вразѝ мои. (Двáжды)
Слáва Ѻтцý и Сы́ну и Святóму Дýху.
Святóму Дýху живоначáлiе и честь:/ вся бо создáнная,/ я́ко Бог сый си́лою,// соблюдáет во Ѻтцé, Сы́ном же.
И ны́не и прúсно и во вéки векóв. Амúнь.
Святóму Дýху живоначáлiе и честь:/ вся бо создáнная,/ я́ко Бог сый си́лою,// соблюдáет во Ѻтцé, Сы́ном же.
3 АНТИФОН
Надéющiися на Гóспода, уподóбишася горé святéй:// и҆́же никáкоже двúжутся прилóги врáжiими. (Двáжды)
В беззакóнiи рук свои́х, да не прóструт божéственне живýщiи:// не оставля́ет бо Хрїстóс жезлá на жрéбiи Своéм. (Двáжды)
Слáва Ѻтцý и Сы́ну и Святóму Дýху.
Святы́м Дýхом тóчится вся́ка премýдрость:/ отсю́ду благодáть апóстолом,// и страдáльчествы венчáются мýченицы, и прорóцы зрят.
И ны́не и прúсно и во вéки векóв. Амúнь.
Святы́м Дýхом тóчится вся́ка премýдрость:/ отсю́ду благодáть апóстолом,// и страдáльчествы венчáются мýченицы, и прорóцы зрят.
ПРОКИМЕН
Чтец: Прокíмен, глас вторы́й. Востáни, Гóсподи, Бóже мой, повелéнiем, и҆́мже заповéдал есѝ, и сонм людéй обы́дет Тя. (Пс.7:7Б-8А)
Хор: Востáни, Гóсподи, Бóже мой, повелéнiем, и҆́мже заповéдал есú,/ и сонм людéй обы́дет Тя.
Чтец: Гóсподи Бóже мой, на Тя уповáх, спасѝ мя. (Пс.7:2А)
Хор: Востáни, Гóсподи, Бóже мой, повелéнiем, úмже заповéдал есú,/ и сонм людéй обы́дет Тя.
Чтец: Востáни, Гóсподи, Бóже мой, повелéнiем, и҆́мже заповéдал есѝ.
Хор: И сонм людéй обы́дет Тя.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: Чтец: От Iоáнна Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Ин.зач.64): Во врéмя óно, Марíя стоя́ше у грóба вне плáчущи. Я́коже плáкашеся, прини́че во гроб и ви́де два Áнгела в бéлых ри́зах седя́ща, еди́наго у главы́ и еди́наго у ногý, идéже бе лежáло тéло Iисýсово. И глагóласта ей óна: жéно, что плáчешися? Глагóла и҆́ма: я́ко взя́ша Гóспода моегó, и не вем, где положи́ша Егó. И сiя́ рéкши обрати́ся вспять и ви́де Iисýса стоя́ща, и не вéдяше, я́ко Iисýс есть. Глагóла ей Iисýс: жéно, что плáчеши, когó и҆́щеши? Онá же мня́щи, я́ко вертогрáдарь есть, глагóла Емý: гóсподи, áще ты еси́ взял Егó, повéждь ми, где еси́ положи́л Егó, и аз возмý Егó. Глагóла ей Iисýс: Марíе. Онá же обрáщшися глагóла Емý: Раввуни́, éже глагóлется, Учи́телю. Глагóла ей Iисýс: не прикасáйся Мне, не у бо взыдóх ко Отцý Моемý: иди́ же ко брáтiи Моéй и рцы им: восхождý ко Отцý Моемý и Отцý вáшему, и Бóгу Моемý и Бóгу вáшему. Прiи́де же Марíя Магдали́на повéдающи ученикóм, я́ко ви́де Гóспода, и сiя́ речé ей.
[Русский синодальный перевод]В то время, Мария стояла у гроба и плакала. И, когда плакала, наклонилась во гроб, и видит двух Ангелов, в белом одеянии сидящих, одного у главы и другого у ног, где лежало тело Иисуса. И они говорят ей: жена! Что ты плачешь? Говорит им: унесли Господа моего, и не знаю, где положили Его. Сказав сие, обратилась назад и увидела Иисуса стоящего; но не узнала, что это Иисус. Иисус говорит ей: жена! что ты плачешь? кого ищешь? Она, думая, что это садовник, говорит Ему: господин! если ты вынес Его, скажи мне, где ты положил Его, и я возьму Его. Иисус говорит ей: Мария! Она, обратившись, говорит Ему: Раввунú! - что значит: Учитель! Иисус говорит ей: не прикасайся ко Мне, ибо Я еще не восшел к Отцу Моему; а иди к братьям Моим и скажи им: восхожу к Отцу Моему и Отцу вашему, и к Богу Моему и Богу вашему. Мария Магдалина идет и возвещает ученикам, что видела Господа и что Он это сказал ей. (Ин.20:11-18)
Хор: Слáва Тебé, Гóсподи, слáва Тебé.
Воскресéнiе Хрiстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрiстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрiстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И҆ ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра, глас 6: Воскрéс Iисýс от грóба,/ я́коже проречé,/ дадé нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 2
(совмещенный с канóном крестовоскрéсным (глас 2), Борóдицы (глас 2) и канóном св. прав. Áнны, глас 8)
ПЕСНЬ 1
Iрмóс: Во глубинé постлá иногдá/ фараони́тское всевóинство преоружéнная си́ла;/ воплóщшееся же Слóво всезлóбный грех потреби́ло есть,/ препрослáвленный Госпóдь,// слáвно бо прослáвися.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Мiрскíй князь Блáже, емýже написáхомся,/ зáповеди Твоея́ не послýшавше, крестóм Твои́м осуди́ся:/ прирази́ся бо Ти я́ко смéртну:/ отпадé же влáсти Твоея́ держáвою,// и немощны́й обличи́ся.
Хор: Слáва, Гóсподи, Святóму Воскресéнiю Твоемý.
Чтец: Избáвитель рóда человéческаго,/ и нетлéнному животý Начáльник/ в мiр пришéл еси́:/ Воскресéнiем бо Твои́м раздрáл еси́ смéртныя пелены́,// Éже славослóвим вси: слáвно бо прослáвися.
Хор: Пресвятáя Богорóдице, спасú нас.
Богорóдичен: Превы́шши яви́лася еси́, Чи́стая Приснодéво,/ вся́кiя неви́димыя же и ви́димыя твáри:/ Зижди́теля бо родилá еси́,/ я́ко благоволи́ воплоти́тися во утрóбе Твоéй,// Егóже со дерзновéнiем моли́, спасти́ дýши нáша.
Канон крестовоскресен, глас 2
Хор: Слáва, Гóсподи, Крестý Твоемý Честнóму и Воскресéнiю.
Чтец: Си́ла немощны́х, Воскресéнiе пáдших, и нетлéнiе умéрших/ был еси́, Хрiстé, плóти Твоея́ стрáстiю:// я́ко прослáвися. (Двáжды)
Хор: Слáва, Гóсподи, Крестý Твоемý Честнóму и Воскресéнiю.
Чтец: Ущéдри пáдшiй , и воскреси́ сокрушéнный,/ Содéтель Бог и Обнови́тель/ умерщвлéн быв всех оживи́:// я́ко прослáвися.
Канон Богородицы, глас 2
Хор: Пресвятáя Богорóдице, спасú нас.
Чтец: Невещéственная дрéвле лéствица,/ и стрáнно оледенéвшiй путь мóря,/ Твоé явля́ше Рождествó, Чи́стая,// éже поéм вси: я́ко прослáвися.
Хор: Пресвятáя Богорóдице, спасú нас.
Чтец: Си́ла Вы́шняго, Ипостáсь Совершéнная, Бóжiя Мýдрость,/ воплóщшися, Пречи́стая, из Тебé,// к человéком бесéдова: я́ко прослáвися.
Хор: Пресвятáя Богорóдице, спасú нас.
Чтец: Прóйде сквозé дверь непрохóдную,/ заключéнныя утрóбы Твоея́,/ прáвды Сóлнце, Чи́стая,// и мíрови возсiя́: я́ко прослáвися.
Канон святых отцов VII вселенского собора, глас 8
Хор: Святíи отцы́, молúте Бóга о нас.
Чтец: Песнослóвити Седмóе Собрáнiе желáющему ми ны́не,/ седми́х даровáнiй собóр/ даждь ми Паракли́та, Гóсподи,/ умудри́вшаго сей огненноязы́чне// и хýльное все языковрéдiе умолчáти сотвóршаго. (Двáжды)
Хор: Святíи отцы́, молúте Бóга о нас.
Чтец: Бóльшее из начáла числ седмóе:/ и҆́бо создáнiя Божéственнаго/ всегó первообрáзно бысть,/ всесовершéнное престáнiе в седмы́й день;/ и ны́не всех ересéй конéц// в Собóре равночи́сленном. (Двáжды)
Слáва Ѻтцý и Сы́ну и Святóму Дýху.
Тропáрь: Победи́в богобóрнаго Áрiя в Нiкéи/ дрéвле пáстырским жезлóм,/ правослáвными шéствовати Цéрковь учéнiи лик отцéв,/ и ны́не о сем посрами́л есть образобóрцы// я́ко побóрник.
И ныне и прúсно и во вéки векóв. Аминь.
Богорóдичен: Я́коже отцы́ благочéстно научи́ша,/ исповéдующе вéрно Деви́ческую утрóбу,/ безболéзненно рóждшую плóтiю Безплóтнаго:// покланя́емся же Семý, столпопи́шуще изображéнiе, и чéстне облобызáем.
Катавáсiя (глас 4): Отвéрзу устá моя́,/ и напóлнятся Дýха,/ и слóво отры́гну Цари́це Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéнiе.
ПЕСНЬ 3
Iрмóс: Процвелá есть пусты́ня, я́ко крíн, Гóсподи,/ язы́ческая неплодя́щая цéрковь,/ пришéствiем Твои́м,// в нéйже утверди́ся моé сéрдце.
Хор: Слáва, Гóсподи, Святóму Воскресéнiю Твоемý.
Чтец: Тварь в стрáсти Твоéй изменя́шеся,/ зря́щи Тя в нищéтне óбразе от беззакóнных поругáема,// основáвшаго вся Божéственным мановéнiем.
Хор: Слáва, Гóсподи, Святóму Воскресéнiю Твоемý.
Чтец: От пéрсти по óбразу мя рукóю Твоéю создáл еси́:/ и сокрушéнна пáки в персть смéртную за грех,// Хрiстé сошéд во ад, совоскреси́л еси́.
Хор: Пресвятáя Богорóдице, спасú нас.
Богорóдичен: Чи́ни удиви́шася áнгельстiи, Пречи́стая,/ и человéческая устраши́шася сердцá о Рождествé Твоéм:// тéмже Тя, Богорóдицу, вéрою чтим.
Глас 2
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же всех вы́шши Хрiстóс,// умáлися мáлым чим, стрáстiю плотскóю, áнгельскаго естествá.
Хор: Слáва, Гóсподи, Крестý Твоемý Честнóму и Воскресéнiю.
Чтец: Мертв со беззакóнными вмени́вся,/ сiя́я женáм венцéм слáвы, Хрiстé,// яви́лся еси́ от Воскресéнiя.
Глас 2
Хор: Пресвятáя Богорóдице, спасú нас.
Чтец: И҆́же врéмене превы́шшiй вся́каго,/ я́ко врéменем Творéц,// из Тебé, Дéво, вóлею Младéнец создáся.
Хор: Пресвятáя Богорóдице, спасú нас.
Чтец: Чрéво прострáннейшее небéс воспои́м,// и҆́мже Адáм на небесéх рáдуяся, живéт.
Глас 8
Хор: Святíи отцы́, молúте Бóга о нас.
Чтец: Не поколебáтися Хрiстóве неруши́мей Цéркви,/ от Негó тайнонаучáеми, Божéственнiи пастыреначáльницы,/ и҆́же сiю́ поколебáти хотя́щiя,/ я́коже антíхрiстовы чáсти,// от благочести́вых отри́нуша. (Двáжды)
Хор: Святíи отцы́, молúте Бóга о нас.
Чтец: Очищáет мýтныя и ти́нный потóки,/ от истóчник спасéнiя почéрп,/ и жáждущiя лю́ди Хрiстóвы// насыщáет учéнiй струя́ми отцéв сослóвiе. (Двáжды)
Слáва Ѻтцý и Сы́ну и Святóму Дýху.
Тропáрь: На ненави́дящих и҆́стинно/ и хрiстiанооглагóльников Собрáнiе хрiстолю́бных Седмóе в свéтлем грáде Нiкéйстем бысть,// егóже цáрiе Iри́на и Константíн защи́тницы.
И ныне и прúсно и во вéки векóв. Аминь.
Богорóдичен: Всяк да отстýпит нечести́вый,/ не почитáяй iкóну честнýю Богорóдицы/ и Сiю́ не проповéдуяй, Хрiстá Богомýжно рóждшую,/ и во огнь да отшлéтся// сгарáти несожжéнно.
Катавáсiя (глас 4): Твоя́ песнослóвцы, Богорóдице,/ живы́й и незави́стный Истóчниче,/ лик себé совокýпльшiя, духóвно утверди́,/ в Божéственней пáмяти Твоéй// венцéв слáвы сподóби.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 2: Воскрéсл еси́ от грóба, Всеси́льне Спáсе,/ и ад, ви́дев чýдо, ужасéся,/ и мéртвiи востáша;/ тварь же ви́дящи срáдуется Тебé,/ и Адáм свесели́тся,// и мiр, Спáсе мой, воспевáет Тя при́сно.
Íкос: Ты еси́ Свет омрачéнным,/ Ты еси́ Воскресéнiе всех, и Живóт человéков,/ и всех совоскреси́л еси́,/ смéртную держáву, Спáсе, разóрь,/ и áдова вратá сокруши́вый, Слóве:/ и мéртвiи ви́девше чýдо, чудя́хуся,/ и вся́ка тварь срáдуется о Воскресéнiи Твоéм, Человеколю́бче./ Тéмже и вси слáвим и поéм Твоé снизхождéнiе,// и мiр, Спáсе мой, воспевáет Тя при́сно.
Седáлен св. отцéв, глас 4: Свети́льницы пресвéтлiи и҆́стины Хрiстóвы мíру яви́стеся на земли́,/ вои́стинну блажéннейшiй, отцы́ Боговещáннiи,/ изсуши́вше éреси хýльных языковрéдiй/ и угаси́вше пламенови́дная злослáвных смущéнiя:// тéмже, я́ко святи́телiе Хрiстóвы, моли́теся спасти́ся нам. (Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Богорóдичен из минéи, глас 4: Скóро нас предвари́, Дéво Мáти Чи́стая;/ от враг нас исхити́, хýлящих на Тя,/ сокруши́ языкобóлiя ересéй вся,/ разреши́ крéпостiю Твоéю стремлéнiя тех,/ да разумéют, я́ко еди́на Богомáти еси́,// моли́твами Твои́ми правослáвных совокуплéнiе спасáющая.
ПЕСНЬ 4
Iрмóс: Пришéл еси́ от Дéвы, не ходáтай, ни Áнгел,/ но Сам, Гóсподи, воплóщься,/ и спасл еси́ всегó мя человéка./ Тем зовý Ти:// слáва си́ле Твоéй, Гóсподи.
Хор: Слáва, Гóсподи, Святóму Воскресéнiю Твоемý.
Чтец: Предстои́ши суди́щу я́ко суди́мь, Бóже мой,/ не вопiя́ Влады́ко, суд износя́ язы́ком:/ и́мже стрáстiю Твоéю, Хрiстé// вселéнней содéлал еси́ Спасéнiе.
Хор: Слáва, Гóсподи, Святóму Воскресéнiю Твоемý.
Чтец: Стрáстiю Твоéю, Хрiстé,/ врагý оскудéша орýжiя,/ проти́вным же éже во ад схождéнiем Твои́м, грáды разруши́шася,// и мучи́телева дéрзость низложéна бысть.
Хор: Пресвятáя Богорóдице, спасú нас.
Богорóдичен: Тя пристáнище спасéнiя, и стéну недви́жиму,/ Богорóдице Влады́чице, вси вéрнiи свéмы:// Ты бо моли́твами Твои́ми избавля́еши от бед дýши нáша.
Глас 2
Хор: Слáва, Гóсподи, Крестý Твоемý Честнóму и Воскресéнiю.
Чтец: Ви́девши на дрéве Тя, Хрiстé пригвождéна, Дéва,/ Я́же неболéзненно Тя рóждшая,// мáтерски болéзни претерпé.
Хор: Слáва, Гóсподи, Крестý Твоемý Честнóму и Воскресéнiю.
Чтец: Побеждéна бысть смерть,/ мертв пленя́ет áдова вратá:/ всея́дцу бо разóршуся,// я́же пáче естествá вся ми даровáшася.
Глас 2
Хор: Пресвятáя Богорóдице, спасú нас.
Чтец: Се превознесéся Божéственная Горá дóму Госпóдня,// превы́шше сил, Богомáтерь я́вственнейше.
Хор: Пресвятáя Богорóдице, спасú нас.
Чтец: Закóнов естéственных кромé,/ Еди́на Дéво рóждши влады́чествующаго твáрiю,// сподóбилася еси́ Божéственнаго звáнiя.
Глас 8
Хор: Святíи отцы́, молúте Бóга о нас.
Чтец: Глагóл Бóжiй имýще, стрелý и меч,/ вся кýпно ты́я закалáют злоýмныя/ óбразом Крéстным,/ не чтýщiя рáвно изображéнiя Хрiстóва, Богорóдицы и всех святы́х,// отцы́ Богови́днейшiи. (Двáжды)
Хор: Святíи отцы́, молúте Бóга о нас.
Чтец: Я́коже сéдмiю трубáми/ Iерiхóнскiя стéны в седмóм обхождéнiи падóша;/ тáко си́ми сéдмiю Собóры/ весь сонм, на Бóга вознося́щiйся, низведéн в бéздну// в Собрáнiи Седмóм благоглáсных труб Дýха. (Двáжды)
Слáва Ѻтцý и Сы́ну и Святóму Дýху.
Тропáрь: Ю́ношеское настоя́нiе показýя/ и Божéственною рéвностiю распаля́емо,/ отéческое мнóжество,/ я́коже Илiя́, стýдныя свящéнники умертви́ло есть./ Тем со дерзновéнiем Хрiстóве iкóне// любéзно покланя́тися научи́ло есть.
И ныне и прúсно и во вéки векóв. Аминь.
Богорóдичен: Ты моя́ надéжда, Всечи́стая, Ты моé и пéнiе,/ Ты моé пристáнище, Ты моé исправлéнiе, я́же Бóга Слóва Ѻ́тча Воплóщшагося несочтáнно родилá еси́./ Тéмже Твоéй несомнéнно покланя́юся iкóне,// крéпостiю Твоéю укрепля́емь.
Катавáсiя (глас 4): Седя́й в Слáве/ на Престóле Божествá/ во óблаце лéгце,/ прiи́ди Iисýс Пребожéственный,/ Нетлéнною Длáнiю/ и спасé зовýщiя:// слáва, Хрiстé, си́ле Твоéй.
ПЕСНЬ 5
Iрмóс: Ходáтай Бóгу и человéком был еси́, Хрiстé Бóже;/ Тобóю, бо Влады́ко, к Светоначáльнику, Ѻтцý Твоемý,/ от нóщи невéденiя// приведéнiе и́мамы.
Хор: Слáва, Гóсподи, Святóму Воскресéнiю Твоемý.
Чтец: Я́ко кéдры, Хрiстé, язы́ков шатáнiе сокруши́л еси́ вóлею, Влады́ко:/ я́ко извóлил еси́ на кипари́се, и на пéвке, и кéдре,// плóтiю совозвышáемь.
Хор: Слáва, Гóсподи, Святóму Воскресéнiю Твоемý.
Чтец: В рóве, Хрiстé, преиспóднем положи́ша Тя бездыхáнна мéртва:/ но Твоéю я́звою забвéнныя мéртвыя, и́же во гробéх спя́щiя, уя́звен// с Собóю воскреси́л еси́.
Хор: Пресвятáя Богорóдице, спасú нас.
Богорóдичен: Моли́ Сы́на Твоегó и Гóспода, Дéво Чи́стая,/ на Тя уповáющим мир даровáти, пленéнным избавлéнiе,// от сопроти́вных настоя́нiй.
Глас 2
Хор: Слáва, Гóсподи, Крестý Твоемý Честнóму и Воскресéнiю.
Чтец: Пости́ти отверги́йся Адáм,/ вкушáет смертонóснаго дрéва пéрвый:// но сегó грех потребля́ет, распны́йся Вторы́й.
Хор: Слáва, Гóсподи, Крестý Твоемý Честнóму и Воскресéнiю.
Чтец: Естествóм человéческим стрáстен же и смéртен был еси́,/ И҆́же безстрáстный невещéственным Божествóм,/ обезтли́вый умерщвлéнныя, Хрiстé,// от преиспóдних áдовых воскреси́л еси́.
Глас 2
Хор: Пресвятáя Богорóдице, спасú нас.
Чтец: Ѻ́блацы весéлiя слáдость кропи́те сýщим на земли́:/ я́ко Отрочá дадéся,/ И҆́же сый прéжде век,// от Дéвы воплóщься Бог наш.
Хор: Пресвятáя Богорóдице, спасú нас.
Чтец: Житiю́ и плóти моéй свет возсiя́,/ и дря́хлость грехá разруши́:// напослéдок от Дéвы без сéмене воплóщься Вы́шнiй.
Глас 8
Хор: Святíи отцы́, молúте Бóга о нас.
Чтец: Высóкою мы́слiю сразсмотри́вше,/ анáфеме образобóрцев предáша,/ я́ко чуждáя сих мýдрствовавших, честнíи отцы́;/ и честь Хрiстóве iкóне, я́коже лéпо,// воздая́ти повелéша. (Трúжды)
Хор: Святíи отцы́, молúте Бóга о нас.
Чтец: Ны́не врéмя весéлiя,/ ны́не день спасéнiя яви́ся,/ возвесели́мся ýбо и Хрiстý рáдостно возопiи́м:/ мир даждь нам Твой// моли́твами отцéв Седмáго Собóра, Человеколю́бче.
Слáва Ѻтцý и Сы́ну и Святóму Дýху.
Тропáрь: Ны́не врéмя весéлiя,/ ны́не день спасéнiя яви́ся,/ возвесели́мся ýбо и Хрiстý рáдостно возопiи́м:/ мир даждь нам Твой// моли́твами отцéв Седмáго Собóра, Человеколю́бче.
И ныне и прúсно и во вéки векóв. Аминь.
Богорóдичен: Благоутрóбiя рáди ми́лости,/ от Дéвы роди́ся Сын Бóжiй неврáщно,/ чýждее нося́, я́ко Своé,/ и зрáком сим опи́санный, зри́тся вóлею,// по Существý Сый Неопи́сан.
Катавáсiя (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла еси́ во утрóбе над всéми Бóга/ и родилá еси́ Безлéтнаго Сы́на,/ всем, воспевáющим Тя,// мир подавáющая.
ПЕСНЬ 6
Iрмóс: В бéздне грехóвней валя́яся,/ неизслéдную милосéрдiя Твоегó призывáю бéздну:// от тли Бóже, мя возведи́.
Хор: Слáва, Гóсподи, Святóму Воскресéнiю Твоемý.
Чтец: Я́ко злодéй Прáведник осуди́ся/ и со беззакóнными на дрéве пригвозди́ся,// пови́нным оставлéнiе Своéю дáруя крóвiю.
Хор: Слáва, Гóсподи, Святóму Воскресéнiю Твоемý.
Чтец: Еди́нем ýбо человéком,/ пéрвым Адáмом дрéвле в мiр вни́де смерть,// и Еди́нем Воскресéнiе Сы́ном Бóжiим яви́ся.
Хор: Пресвятáя Богорóдице, спасú нас.
Богорóдичен: Неискусомýжно, Дéво, родилá еси́,/ и вéчнуеши Дéва, явля́ющи И҆́стиннаго Божествá,// Сы́на и Бóга Твоегó óбразы.
Глас 2
Хор: Слáва, Гóсподи, Крестý Твоемý Честнóму и Воскресéнiю.
Чтец: Блюсти́тели положи́л еси́ пáдшему,/ херувíмы дрéва живóтнаго,/ но ви́девше Тя, двéри отверзóшася:// яви́лася бо еси́, путетворя́ разбóйнику в рай.
Хор: Слáва, Гóсподи, Крестý Твоемý Честнóму и Воскресéнiю.
Чтец: Пуст ад и испровéржен бысть смéртiю Еди́наго:/ éже бо мнóгое богáтство сокрóвиществова,// Еди́н о всех нас Хрiстóс истощи́л есть.
Глас 2
Хор: Пресвятáя Богорóдице, спасú нас.
Чтец: Естествó человéческое рабóтающее грехý,/ Влады́чице Чи́стая, Тобóю свобóду улучи́:// Твой бо Сын, я́ко áгнец, за всех закалáется.
Хор: Пресвятáя Богорóдице, спасú нас.
Чтец: Вопiéм Ти вси, и҆́стинней Богомáтери,/ прогнéвавшiя рабы́ избáви:// Еди́на бо дерзновéнiе к Сы́ну и҆́маши.
Глас 8
Хор: Святíи отцы́, молúте Бóга о нас.
Чтец: Да кáплют слáдость гóры и рáдость:/ ерети́ческое бо мнóжество изгнáся,/ гóрькiй изливáющее яд,// святы́х iкóн отвержéнiе. (Трúжды)
Хор: Святíи отцы́, молúте Бóга о нас.
Чтец: Нéбо и земля́ соглáсно да прáзднуют/ Дщéре Бóжiя вели́чiе:// и҆́бо величáется, отметáющи Сiю́ умаля́ющiя.
Слáва Ѻтцý и Сы́ну и Святóму Дýху.
Тропáрь: Нéбо и земля́ соглáсно да прáзднуют/ Дщéре Бóжiя вели́чiе:// и҆́бо величáется, отметáющи Сiю́ умаля́ющiя.
И ныне и прúсно и во вéки векóв. Аминь.
Богорóдичен: Ма́тернiй Сын, И҆́же Ѻ́тчiй пéрвее безмáтерен,/ безóтчiй же Боголéпно роди́вся/ и возроди́в мя;// тéмже Рóждшую с Рождéнным образýя, облобызáю.
Катавáсiя (глас 4): Божéственное сié и всечестнóе/ совершáюще прáзднество,/ Богомýдрiи, Богомáтере,/ прiиди́те, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк отцéв, глас 8: И҆́же из Ѻтцá возсiя́в, Сын неизречéнно/ из Жены́ роди́ся, сугýб естествóм,/ Егóже ви́дяще, не отметáемся зрáка изображéнiя,/ но, сié благочéстно начертáюще,/ почитáем вéрно./ И сегó рáди и҆́стинную вéру Цéрковь держáщи,// лобызáет iкóну вочеловéченiя Хрiстóва.
Íкос: Хотя́й Всещéдрый Бог нас воздвизáти при́сно/ к пáмяти совершéнней Своегó вочеловéченiя,/ подлóг сей предадé человéком,/ шародéланьми iкóн честны́й возображáти зрак;/ я́ко да сiя́ во зрéнiих ви́дяще,/ вéруем, я́же слóвом слы́шахом,/ разумéюще я́ве дея́нiе и и҆́мя,/ начертáнiе и страдáнiя святы́х мужéй,/ и Хрiстá Венцодáвца,/ венцы́ подаю́ща святы́м, страдáльцем же и мýчеником.// И҆́хже рáди яснéйше и҆́стинную вéру держáщи, Цéрковь лобызáет iкóну вочеловéченiя Хрiстóва.
ПЕСНЬ 7
Iрмóс: Богопроти́вное велéнiе/ беззакóннующаго мучи́теля/ высóк плáмень вознеслó есть;/ Хрiстóс же прострé Богочести́вым отрокóм рóсу духóвную,// Сый благословéн и препрослáвлен.
Хор: Слáва, Гóсподи, Святóму Воскресéнiю Твоемý.
Чтец: Не терпéл еси́, Влады́ко, за благоутрóбiе/ смéртiю человéка зрéти мýчима,/ но пришéл и спасл еси́ Твоéю крóвiю, человéк быв:// Сый благословéн и Препрослáвлен, Бог отец нáших.
Хор: Слáва, Гóсподи, Святóму Воскресéнiю Твоемý.
Чтец: Ви́девше Тя, Хрiстé, оболчéна во одéжду отмщéнiя,/ ужасóшася врáтницы áдовы:/ безýмнаго бо мучи́теля рабá, Влады́ко, пришéл еси́ уби́ти:// Сый благословéн и Препрослáвлен, Бог отéц нáших.
Хор: Пресвятáя Богорóдице, спасú нас.
Богорóдичен: Святы́х Святéйшую Тя разумéем,/ я́ко Еди́ну рóждшую Бóга Непремéннаго,/ Дéво Несквéрная, Мáти Безневéстная:/ всем бо вéрным источи́ла еси́ нетлéнiе,// Божéственным Рождествóм Твои́м.
Глас 2
Хор: Слáва, Гóсподи, Крестý Твоемý Честнóму и Воскресéнiю.
Чтец: Осуди́ прáотца дрéвле во Едéме преслушáнiе:/ но вóлею суди́мь бысть,/ престýпльшему разрешáя прегрешéнiя,// Пребожéственный отцéв Бог, и Препрослáвлен.
Хор: Слáва, Гóсподи, Крестý Твоемý Честнóму и Воскресéнiю.
Чтец: Спасл еси́ уя́звеннаго язы́ком, зáвистiю человекоубíйцы,/ во Едéме вóльным угрызéнiем,/ вóльною бо стрáстiю исцели́л еси́,// Пребожéственный отцéв Бог, и Препрослáвлен.
Глас 2
Хор: Пресвятáя Богорóдице, спасú нас.
Чтец: Зря́ще в нощи́ ýбо Iáков,/ я́ко в гадáнiи Бóга воплощéнна,/ из Тебé же свéтлостiю яви́ся пою́щим:// Пребожéственный отцéв Бог, и Препрослáвлен.
Хор: Пресвятáя Богорóдице, спасú нас.
Чтец: Знáменiя я́же в Тебé, неизречéннаго проявля́я сня́тiя, со Iáковом бóрется:/ и҆́мже вóлею соедини́ся человéком, Чи́стая:// Пребожéственный отцéв Бог, и Препрослáвлен.
Глас 8
Хор: Святíи отцы́, молúте Бóга о нас.
Чтец: Побеждáются догмáтами/ Богоглагóливых мужéй ересеначáльницы,/ образóв честь первообрáзным изобразýющих прáво,/ я́коже речé Вели́кiй Васíлiй:// благословéн Бог отéц нáших. (Двáжды)
Хор: Святíи отцы́, молúте Бóга о нас.
Чтец: Хрáми удобря́ются, свéтлыми iкóнами украшáемiи днесь;/ сегó рáди мир в цéрквах, пáче всех человéк краснéйшему добрóтою,/ совоспевáет пою́щему:// благословéн Бог отéц нáших. (Двáжды)
Слáва Ѻтцý и Сы́ну и Святóму Дýху.
Тропáрь: Свет облистá, далéче тьма, нечести́вiи отгнáны./ Сегó рáди вся́ческая свéта испóлнишася,/ Светодáтеля Хрiстá с весéлiем пою́т и глагóлют:// благословéн Бог отéц нáших.
И ныне и прúсно и во вéки векóв. Аминь.
Богорóдичен: Пречи́стая Влады́чица, еди́на всех спасéнiя надéжда,/ я́же стрáшно рóждшая Царя́ царéй Хрiстá,/ на рукáх Свои́х Сегó Младéнца нося́щи,// спокланя́ема есть опи́санне, я́коже отцы́ глагóлют.
Катавáсiя (глас 4): Не послужи́ша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн еси́.
ПЕСНЬ 8
Iрмóс: Пещь иногдá óгненная в Вавилóне дéйства разделя́ше,/ Бóжiим велéнiем халдéи опаля́ющая,/ вéрныя же орошáющая, пою́щiя:// благослови́те вся делá Госпóдня, Гóспода.
Хор: Слáва, Гóсподи, Святóму Воскресéнiю Твоемý.
Чтец: Крóвiю Твоéю, Хрiстé,/ очервлéно плóти Твоея́ зря́ще одея́нiе,/ трéпетом ужасáхуся мнóгому Твоемý долготерпéнiю áнгельстiи чи́ни, зовýще:// благослови́те вся делá Госпóдня, Гóспода.
Хор: Слáва, Гóсподи, Святóму Воскресéнiю Твоемý.
Чтец: Ты моé смéртное одéял еси́, Щéдре,/ в безсмéртiе востáнiем Твои́м./ Тéмже веселя́щеся благодáрственно воспевáют Тя/ избрáннiи лю́дiе, Хрiстé, зовýще Тебé:// пожéрта бысть вои́стинну смерть побéдою.
Хор: Пресвятáя Богорóдице, спасú нас.
Богорóдичен: Ты, И҆́же Отцý неразлýчнаго,/ во утрóбе богомýжно пожи́вша безсéменно зачалá еси́,/ и неизречéнно родилá еси́, Богороди́тельнице Пречи́стая:// тéмже Тя спасéнiе всех нас свéмы.
Глас 2
Хор: Слáва, Гóсподи, Крестý Твоемý Честнóму и Воскресéнiю.
Чтец: Ви́ден был еси́ на крестé пригвождáемь,/ И҆́же богáтый в ми́лости,/ вóлею погрéблся еси́:/ и триднéвно воскрéсл еси́,/ и избáвил еси́ вся человéки, Человеколю́бче, вéрою пою́щiя:// да поéт Гóспода вся тварь, и превознóсит во вся вéки.
Хор: Слáва, Гóсподи, Крестý Твоемý Честнóму и Воскресéнiю.
Чтец: Избáвити от истлéнiя, сошéд в преиспóдняя, Слóве Бóжiй,/ егóже создáл еси́, Хрiстé, си́лою Твоéю Божéственною,/ и без истлéнiя сотвóрь, слáвы присносýщныя Твоея́ причáстника содéлал еси́,// да поéт, зовýщи, вся тварь, и превознóсит Хрiстá вéки.
Глас 2
Хор: Пресвятáя Богорóдице, спасú нас.
Чтец: Ви́ден бысть на земли́ Тобóю, и с человéки поживé,/ И҆́же блáгостiю несравнéнный и си́лою,/ Емýже пою́ще вси вéрнiи зовéм:/ осуществовáнная да поéт Гóспода вся тварь,// и превознóсит во вся вéки.
Хор: Пресвятáя Богорóдице, спасú нас.
Чтец: Вои́стинну Тя, Чи́стую проповéдающе, слáвим Богорóдицу:/ Ты бо еди́на родилá еси́ от Трóицы воплощéнна,/ Емýже со Отцéм и Дýхом вси поéм:/ да поéт Гóспода вся тварь,// и превознóсит во вся вéки.
Глас 8
Хор: Святíи отцы́, молúте Бóга о нас.
Чтец: Законополагáет ýбо изя́щнейше отцéв сослóвiе,/ Богочести́вым имстви́тельное поклонéнiе/ и возставлéнiе свящéнныя iкóны Хрiстóвы;/ любоблагочести́вiи же лéтнюю пáмять я́ко чáда совершáем благопослушли́вая óных,// и любóвiю óбраз Хрiстóв лобызáем. (Двáжды)
Хор: Святíи отцы́, молúте Бóга о нас.
Чтец: Седмокрáтно преклоня́ху смирéнных высокомýдреннiи/ и любодобродéтельных стремлéнiя пресецáху,/ и҆́миже оглагóловаху Божéственная дея́нiя их;/ но и҆́же Седмáго Собóра сошéдшiися отцы́ в Нiкéи// горды́ню óных áбiе истерзáша седмокрáтнейше. (Двáжды)
Благословúм Отцá, и Сы́на, и Святáго Дýха, Гóспода.
Тропáрь: Стрéлы младéнец бывáют псалóмски старомýдрствующим младомýдренных я́звы и рáны;/ Божéственною же си́лою изнемогáют язы́цы мнóзи,/ хулы́ на высотý глагóлющих;/ и всяк, кто Отцá, Сы́на и Дýха, Бóга Еди́наго, не весть,// Всевинóвнаго и Еди́наго.
И ны́не и прúсно и во вéки векóв. Амúнь.
Продолжение здесь