Неделя 19 по Пятидесятнице. Святых отцов VII вселенского собора, глас 2 УТРЕНЯ (ок-ние.) ЧАС ПЕРВЫЙ
23 октября́ 2022 гóда. Недéля 19 по Пятидеся́тнице. Пáмять святы́х отцéв VII Вселéнскаго Собóра. Глас 2. Воскрéсная прáздничная слýжба для домáшнего (келéйнаго) совершéнiя. Окончáнiе ýтрени.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Богорóдичен: Зи́ждется Младéнец самовóльне ми́лости рáди, Зижди́тель от чи́стых кровéй Твои́х,/ соблюдáяй Тя по рождествé Преочищéнну всю Чи́стую/ и очищáяй осквернéнный óбраз./ Тéмже на iкóнах соизображáется Тебé,// естествóм быв Человéк, Бог Сый естествóм.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 4): Óтроки благочести́выя в пéщи/ Рождествó Богорóдичо спаслó есть;/ тогдá ýбо образýемое,/ ны́не же дéйствуемое,/ вселéнную всю воздвизáет пéти Тебé:/ Гóспода пóйте, делá,// и превозноси́те Егó во вся вéки.
Возглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Безначáльна Роди́теля Сын, Бог и Госпóдь,/ воплóщься от Дéвы, нам яви́ся,/ омрачéнная просвети́ти,/ собрáти расточéнная,// тем Всепéтую Богорóдицу величáем.
Хор: Слáва, Гóсподи, Святóму Воскресéнiю Твоемý.
Чтец: Я́ко в раи́ насаждéно на лóбнем, Спáсе,/ требогáтое дрéво Твоегó пречи́стаго Крестá,/ крóвiю и водóю Божéственною,/ я́ко от истóчника Божéственнаго,/ ребрá Твоегó, Хрiстé, напоя́емо,// живóт нам прозяблó есть.
Хор: Слáва, Гóсподи, Святóму Воскресéнiю Твоемý.
Чтец: Низложи́л еси́ си́льныя, распны́йся, Всеси́льне,/ и éже ни́зу лежáщее во áдове тверды́ни,/ естествó человéческое вознéс,/ на Ѻ́тчем посади́л еси́ престóле.// С Ни́мже Тебé грядýщу покланя́ющеся, величáем.
Хор: Пресвятáя Трóице, Бóже наш, слáва Тебé.
Трóичен: Еди́ницу Тричи́сленную, Трóицу Единосýщную/ правослáвно пою́ще вéрнiи, слáвим:/ непресекóмо Пребожéственное Естествó,/ трисвéтлую, невечéрнюю зарю́,// Еди́ну нетлéнную нам свет возсiя́вшую.
Глас 2
Хор: Слáва, Гóсподи, Крестý Твоемý Честнóму и Воскресéнiю.
Чтец: Посредé осуждéнных,/ я́ко Áгнец возвы́шен был еси́, Хрiстé, на крестé,/ на лóбнем копiéм в ребрó прободáемь,/ живóт даровáл еси́ нам пéрстным я́ко благ,// вéрою чтýщим Божéственное Твоé Воскресéнiе.
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же Своéю смéртiю,/ смéрти держáву си́лою упраздни́вшему Бóгу/ вси вéрнiи поклони́мся,/ я́ко и҆́же от вéка мéртвыя совоскреси́,// и всем подаéт живóт и Воскресéнiе.
Глас 2
Хор: Пресвятáя Богорóдице, спасú нас.
Чтец: Жезл крéпости дадéся естествý тлéнному,/ Слóво Бóжiе во утрóбе Твоéй, Чи́стая:/ и сié воскреси́, до áда попóлзшееся.// Тéмже Тя, Всечи́стая, я́ко Богорóдицу, величáем.
Хор: Пресвятáя Богорóдице, спасú нас.
Чтец: Ю́же извóлил еси́, Влады́ко,/ прiими́ ми́лостивно Моли́твенницу,/ Мáтерь Твою́, о нас,/ и Твоея́ блáгости вся́ческая испóлняется:// да Тя вси, я́ко Благодéтеля, величáем.
Глас 8
Хор: Святíи отцы́, молúте Бóга о нас.
Чтец: Вéлiй крéпостiю и совéтом вся содержáй,/ Непостижи́ме Еди́не Бóже,/ держáвнейше Всеначáльниче, Всецарю́,/ Цéрковь утверди́, в правослáвiи Твоéм соблюдáя,/ отцéв всеслáвных, изобличáющих злослáвiе, мольбáми.(Двáжды)
Хор: Святíи отцы́, молúте Бóга о нас.
Чтец: Вели́ких чéстей сподóбистеся на земли́,/ Небомýдренiи святíи,/ я́ко Хрiстóво изображéнiе любéзно почтóсте./ И ны́не сень отложи́вше, и покрывáло плóти,/ самоли́чно Сегó в Лицé зритé,// и бóльших сподобля́еми. (Двáжды)
Слáва Ѻтцý и Сы́ну и Святóму Дýху.
Тропáрь: Да накáжемся всевóинством вáрварскаго безсловéсiя,/ éже попусти́л еси́ на ны;/ тех стремлéнiе и дéрзость Сам сокруши́/ и вéрным спобóрствуй, надéющимся на Тя, Вседéтелю,/ благодерзновéнными моли́твами святы́х отéц,// и҆́хже совершáем пáмять.
И ныне и прúсно и во вéки векóв. Аминь.
Богорóдичен: Разумéти тáйну стрáшнаго Твоегó Рождествá никáкоже мóжет ум человéческiй, но нижé А́нгельский высокоýмный,/ я́ко Бóга Ты родилá еси́ Воплощéннаго, пáче естествá.// Тем Тя, Богорóдицу, вéдуще и со Ѻ́нем написýюще, величáем.
Катавáсiя (глас 4): Всяк земнорóдный/ да взыгрáется, Дýхом просвещáемь,/ да торжествýет же Безплóтных умóв естествó,/ почитáющее свящéнное торжествó Богомáтере,/ и да вопiéт:/ рáдуйся, Всеблажéнная,// Богорóдице, Чи́стая Приснодéво.
Гóсподи, помилуй. (3 раза)
Слáва Отцý и Сыну и Святóму Дýху, и ныне и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостiлáрiй воскрéсный oсьмы́й: Два Áнгела ви́девши внутрь грóба, Марíя удивля́шеся,/ и Хрiстá не знáющи, я́ко вертогрáдаря вопрошáше:/ гóсподи, где положи́л еси́ тéло Iисýса моегó?/ Звáнiем же Тогó познáвши бы́ти Самогó Спáса,/ слы́ша: не прикасáйся Мне, ко Отцý отхождý,// рцы брáтiи Моéй.
Слáва Ѻтцý и Сы́ну и Святóму Дýху.
Светúлен отцéв: Отцы́ Небомýдреннiи, на Седмóм Собóре собрáвшiися,/ моли́тву прилéжну Трóице принеси́те,/ éже избáвитися от вся́кiя éреси и судá вéчнаго,/ Цáрствiе же получи́ти нам Небéсное,// ваш Собóр Божéственный воспевáющим.
И ны́не и прúсно и во вéки векóв. Амúнь.
Богорóдичен из Минéи: Мольбáми, Преблаги́й Гóсподи, Мáтере Твоея́ / и и҆́же на Седми́ Собóрех собрáвшихся отцéв / Цéрковь утверди́ и вéру укрепи́, / и Цáрствiя Небéснаго вся покажи́ причáстники, / егдá прiи́деши на зéмлю суди́ти всю тварь.
ХВАЛИТНЫ
Хор, глас 2: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéние положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 2: Вся́кое дыхáнiе и вся тварь,/ Тя слáвит, Гóсподи,/ я́ко Крестóм смерть упраздни́л есѝ,/ да покáжеши лю́дем, éже из мéртвых Твоé Воскресéнiе,// я́ко еди́н Человеколю́бец.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Да рекýт iудéе,/ кáко вóини погуби́ша стрегýщiи Царя́;/ почтó бо кáмень не сохрани́ кáмене жи́зни;/ или́ погребéннаго да дадя́т,/ или́ воскрéсшему да поклóнятся,/ глагóлюще с нáми:// слáва мнóжеству щедрóт твои́х, Спáсе наш, слáва тебѣ́.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Рáдуйтеся лю́дiе и весели́теся,/ áнгел сѣдя́й на кáмени грóбнѣм,/ той нам благовѣсти́, рек:/ Хрiстóс воскрéсе из мéртвых, Спас мíра,/ и испóлни вся́ческая благоухáнiя:// рáдуйтеся лю́дiе и весели́теся.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Áнгел ýбо éже рáдуйся,/ прéжде твоего зачáтiя Гóсподи, благодáтнѣй принесé:/ áнгел же кáмень слáвнаго твоегó грóба/ в твоé воскресéнiе отвалѝ:/ ѻ́в ýбо в печáли мѣ́сто,/ весéлiя óбразы возвѣщáя:/ сей же въ смéрти мѣ́сто,/ Влады́ку жизнодáвца проповѣ́дуя нам,/ тѣ́мже вопiéм ти:// благодѣ́телю всѣх, Гóсподи слáва тебѣ́.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúры св. отцéв, глас 6: Все собрáвше душéвное худóжество,/ и Божéственным Дýхом сразсмотри́вше,/ небéсный и честны́й Симвóл вéры,/ честнíи отцы́ богопи́санне начертáша:/ в нéмже я́вственнейше Рóждшему собезначáльнаго Слóва научáют,/ и всеи́стинно единосýщнаго,/ апóстольским послéдующе проявлéнно учéнiем,/ благослáвнiи и пребогáтiи// вои́стинну и богомýдрiи.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Все собрáвше душéвное худóжество,/ и Божéственным Дýхом сразсмотри́вше,/ небéсный и честны́й Симвóл вéры,/ честнíи отцы́ богопи́санне начертáша:/ в нéмже я́вственнейше Рóждшему собезначáльнаго Слóва научáют,/ и всеи́стинно единосýщнаго,/ апóстольским послéдующе проявлéнно учéнiем,/ благослáвнiи и пребогáтiи// вои́стинну и богомýдрiи.
Благословéн есú, Гóсподи Бóже отéц нáших,/ и хвáльно и прослáвлено И҆́мя Твоé во вéки.
Стiхúра: Все прiéмше ýмное сiя́нiе Святáго Дýха,/ преестéственнейшее благослóвiе,/ крáткими глагóлы, и мнóгим рáзумом/ богодухновéнно провещáша:/ я́ко Хрiстóвы проповéдницы,/ евáнгельских предстáтелiе учéнiй блажéннiи,/ и благочести́вых предáнiй,/ свы́ше прiéмше сих откровéнiе я́ве, и просвéщшеся,// изложи́ша вéру богонаучéнную.
Соберúте Емý/ преподóбныя Егó.
Стiхúра: Все собрáвше пáстырское искýсство,/ и я́рость подви́гше ны́не прáведнейшую,/ отмсти́тельне тя́жкiя отгнáша и пáгубныя вóлки,/ прáщею Дýха извéргше от церкóвнаго исполнéнiя,/ пáдшiя я́ко к смéрти, и я́ко неисцéльно недýговавшiя/ божéственнiи пáстырiе,/ и я́ко раби́ и́стиннейшiи Хрiстóвы,// и божéственнаго проповéданiя таи́нницы свящéннейшiи.
Слáва Ѻтцý и Сы́ну и Святóму Дýху.
Стiхúра св. отцéв, глас 8: Святы́х отцéв лик,/ от конéц вселéнныя стéкшiйся,/ Отцá и Сы́на и Дýха Святáго,/ еди́но Существó научи́ша и Естествó,/ и тáйну богослóвiя я́сно предáша Цéркви:/ и҆́хже похваля́юще вéрою ублажи́м, глагóлюще:/ о божéственный пóлче,/ богоглагóливiи орýжницы ополчéнiя Госпóдня,/ звéзды многосвéтлыя мы́сленныя твéрди,/ тáинственнаго Сióна необори́мiи столпи́,/ миродохновéннiи цвéти рáйстiи,/ всезлатáя устá Слóва,/ Нiкéйская похвалó, вселéнныя украшéнiе,// прилéжно моли́теся о душáх нáших.
И҆ ны́не и прúсно и во вéки векóв. Амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрiстóс Бог,// благоволи́вый тáко, слáва Тебé.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Óтче Вседержи́телю, Гóсподи Сы́не Единорóдный, Iисýсе Хрiстé, и Святы́й Дýше. Гóсподи Бóже, Áгнче Бóжiй, Сы́не Отéчь, взéмляй грех мíра, помилуй нас. Взéмляй грехѝ мíра, прiимѝ молитву нáшу. Седя́й одеснýю Отцá, помилуй нас. Яко Ты есѝ Един Свят; Ты есѝ Един Госпóдь, Iисýс Хрiстóс, в слáву Бóга Отцá, ами́нь.
На всяк день благословлю́ Тя и восхвалю́ имя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено имя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 2: Воскрéс из грóба и ýзы растерзáл еси áда,/ разруши́л еси осуждéнiе смéрти, Гóсподи,/ вся от сетéй врагá избáвивый;/ яви́вый же Себé апóстолом Твоим,/ послáл еси я на прóповедь,/ и тéми мир Твой пóдал еси вселéнней,// Еди́не Многоми́лостиве.
Гóсподи поми́луй (40 раз)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Гóсподи поми́луй (12раз)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных христiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
ОТПУСТ
Хрiстóс, и҆́стинный Бог наш, моли́твами пречи́стыя Своея́ Мáтере, святы́х слáвных и всехвáльных Апóстол, отéц VII Вселéнскаго Собóра, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Стiхúра евáнгельская осьмáя, глас 8: Марíины слéзы не всýе проливáются тéпле,/ се бо сподóбися и учáщих Áнгелов,/ и видéнiя Самогó Iисýса./ Но ещé земнáя мýдрствует, я́ко женá немощнáя:/ тéмже и отсылáется не прикасáтися Хрiстý./ Но обáче проповéдница посылáется Твои́м ученикóм,/ и҆́мже благовествовáнiе нося́щи,/ éже ко Отéческому жрéбiю восхóд возвещáющи.// С нéюже сподóби и нас явлéнiя Твоегó, Влады́ко Гóсподи.
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрiстý, Царéви нáшему Бóгу.
Прiиди́те, поклони́мся и припадéм Самомý Хрiстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 2: Егдá снизшéл еси́ к смéрти, Животé Безсмéртный, тогдá ад умертви́л еси́ блистáнiем Божествá. Егдá же и умéршыя от преиспóдних воскреси́л еси́, вся Си́лы Небéсныя взывáху: Жизнодáвче, Хрiстé Бóже наш, слáва Тебé.
Слáва Ѻтцý и Сы́ну и Святóму Дýху.
Тропáрь отцéв, глас 8: Препрослáвлен еси́, Хрiстé Бóже наш, свети́ла на земли́ отцы́ нáша основáвый, и тéми ко и҆́стинней вéре вся ны настáвивый, Многоблагоутрóбне, слáва Тебé.
И҆ ны́не и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрiстé, Сыне Бóжiй, поми́луй нас. Ами́нь.
КОНДАК
Кондáк воскрéсный, глас 2: Воскрéсл еси́ от грóба, Всеси́льне Спáсе, и ад, ви́дев чýдо, ужасéся, и мéртвiи востáша; тварь же ви́дящи срáдуется Тебé, и Адáм свесели́тся, и мiр, Спáсе мой, воспевáет Тя при́сно.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрiстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрiстé, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Гóсподи, поми́луй. (3 раза)
Гóсподи, благословѝ.
Хрiстóс, и҆́стинный Бог наш, моли́твами пречи́стыя Своея́ Мáтере, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу