Рождество Пресвятой Владычицы нашей Богородицы и Приснодевы Марии. ВСЕНОЩНОЕ БДЕНИЕ. УТРЕНЯ
21 сентября́ 2022 гóда. Рождествó Пресвятóй Влады́чицы нáшей Богорóдицы и Приснодéвы Марíи. Прáздничная слýжба для домáшнего (келéйнаго) совершéнiя. Послéдованiе ýтрени. Слýжба мiрскúм чúном.
УТРЕНЯ
Начáло зри здесь ( великая вечерня)
ШЕСТОПСАЛМИЕ
Слáва в вы́шних Бóгу, и на землѝ мир, в человéцех благоволéнiе. (трúжды) Гóсподи, устнé моѝ отвéрзеши, и устá моя́ возвестя́т хвалý Твою́. (двáжды)
Псалом 3
Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгó. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы́ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоé.
Аз уснýх, и спах, востáх, я́ко Госпóдь застýпит мя.
Псалом 37
Гóсподи, да не я́ростiю Твоéю обличи́ши менé, нижé гнéвом Твои́м накáжеши менé. Яко стрéлы Твоя́ унзóша во мне, и утверди́л есѝ на мне рýку Твою́. Несть исцелéнiя в плóти моéй от лицá гнéва Твоегó, несть ми́ра в костéх мои́х от лицá грех мои́х. Яко беззакóнiя моя́ превзыдóша главý мою́, я́ко брéмя тя́жкое отяготéша на мне. Возсмердéша и согни́ша рáны моя́ от лицá безýмiя моегó. Пострадáх и слякóхся до концá, весь день сéтуя хождáх. Яко ля́двiя моя́ напóлнишася поругáнiй, и несть исцелéнiя в плóти моéй. Озлóблен бых и смири́хся до зелá, рыкáх от воздыхáнiя сéрдца моегó. Гóсподи, пред Тобóю все желáнiе моé и воздыхáнiе моé от Тебé не утаи́ся. Сéрдце моé смятéся, остáви мя си́ла моя́, и свет óчiю моéю, и той несть со мнóю. Дрýзи моѝ и и҆́скреннiи моѝ пря́мо мне прибли́жишася и стáша, и бли́жнiи моѝ отдалéче менé стáша и нуждáхуся и҆́щущiи дýшу мою́, и и҆́щущiи злáя мне глагóлаху сýетная и льсти́вным весь день поучáхуся. Аз же я́ко глух не слы́шах и я́ко нем не отверзáяй уст свои́х. И бых я́ко человéк не слы́шай и не имы́й во устéх свои́х обличéнiя. Яко на Тя, Гóсподи, уповáх, Ты услы́шиши, Гóсподи Бóже мой. Яко рех: да не когдá порáдуют ми ся вразѝ моѝ: и внегдá подвижáтися ногáм мои́м, на мя велерéчеваша. Яко аз на рáны готóв, и болéзнь моя́ предо мнóю есть вы́ну. Яко беззакóнiе моé аз возвещý и попекýся о гресé моéм. Вразѝ же моѝ живýт и укрепи́шася пáче менé, и умнóжишася ненави́дящiи мя без прáвды. Воздаю́щiи ми злáя возблагáя оболгáху мя, занé гоня́х благосты́ню. Не остáви менé, Гóсподи Бóже мой, не отступѝ от менé. Вонмѝ в пóмощь мою́, Гóсподи спасéнiя моегó.
Не остáви менé, Гóсподи Бóже мой, не отступѝ от менé. Вонмѝ в пóмощь мою́, Гóсподи спасéнiя моегó.
Псалом 62
Бóже, Бóже мой, к Тебé ýтренюю, возжадá Тебé душá моя́, коль мнóжицею Тебé плоть моя́, в земли́ пýсте и непрохóдне, и безвóдне. Тáко во святéм яви́хся Тебé, ви́дети си́лу Твою́ и слáву Твою́. Я́ко лýчши ми́лость Твоя́ пáче живóт, устнé мои́ похвали́те Тя. Тáко благословлю́ Тя в животé моéм, о и҆́мени Твоéм воздежý рýце моѝ. Я́ко от тýка и мáсти да испóлнится душá моя́, и устнáма рáдости восхвáлят Тя устá моя́. Áще поминáх Тя на постéли моéй, на ýтренних поучáхся в Тя. Я́ко был есѝ Помóщник мой, и в крóве крилý Твоéю возрáдуюся. Прильпé душá моя́ по Тебé, менé же прiя́т десни́ца Твоя́. Тíи же всýе искáша дýшу мою́, вни́дут в преиспóдняя землѝ, предадя́тся в рýки орýжiя, чáсти ли́совом бýдут. Царь же возвесели́тся о Бóзе, похвáлится всяк клены́йся Им, я́ко загради́шася устá глагóлющих непрáведная.
На ýтренних поучáхся в Тя. Яко был есѝ Помóщник мой, и в крóве крилý Твоéю возрáдуюся. Прильпé душá моя́ по Тебé, менé же прiя́т десни́ца Твоя́.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (3 раза)
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Псалом 87
Гóсподи Бóже спасéнiя моегó, во дни воззвáх, и в нощи́ пред Тобóю. Да вни́дет пред Тя моли́тва моя́: приклони́ ýхо Твоé к молéнiю моемý, я́ко испóлнися зол душá моя́, и живóт мой аду прибли́жися. Привменéн бых с низходя́щими в ров, бых я́ко человéк без пóмощи, в мéртвых свобóдь, я́ко я́звеннiи спя́щiи во грóбе, и҆́хже не помянýл еси́ ктомý, и тíи от руки́ Твоея́ отриновéни бы́ша. Положи́ша мя в рóве преиспóднем, в тéмных и сéни смéртней. На мне утверди́ся я́рость Твоя́, и вся вóлны Твоя́ навéл еси́ на мя. Удáлил еси́ знáемых мои́х от менé, положи́ша мя мéрзость себé: прéдан бых и не исхождáх. Очи мои́ изнемогóсте от нищеты́, воззвáх к Тебé, Гóсподи, весь день, воздéх к Тебé рýце мои́. Едá мéртвыми твори́ши чудесá? Или́ врáчеве воскреся́т, и исповéдятся Тебé? Едá повéсть кто во грóбе ми́лость Твою́, и и҆́стину Твою́ в поги́бели? Едá познáна бýдут во тьме чудесá Твоя́, и прáвда Твоя́ в земли́ забвéнней? И аз к Тебé, Гóсподи, воззвáх и ýтро моли́тва моя́ предвари́т Тя. Вскýю, Гóсподи, отрéеши дýшу мою́, отвращáеши лицé Твоé от менé? Нищ есмь аз, и в трудéх от ю́ности моея́; вознéс же ся, смири́хся, и изнемогóх. На мне преидóша гнéви Твои́, устрашéнiя Твоя́ возмути́ша мя, обыдóша мя я́ко водá, весь день одержáша мя вкýпе. Удáлил еси́ от менé дрýга и и҆́скренняго, и знáемых моих от страстéй.
Гóсподи Бóже спасéнiя моегó, во дни воззвáх, и в нощи́ пред Тобóю. Да вни́дет пред Тя моли́тва моя́: приклони́ ýхо Твоé к молéнiю моемý.
Псалом 102
Благословѝ, душé моя, Гóспода, и вся внýтренняя моя и҆́мя святóе Егó. Благословѝ, душé моя, Гóспода, и не забывáй всех воздая́нїй Егó, очищáющаго вся беззакóнїя твоя́, исцеля́ющаго вся недýги твоя́, избавля́ющаго от истлéнiя живóт твой, венчáющаго тя ми́лостїю и щедрóтами, исполня́ющаго во благи́х желáнїе твоé: обновится я́ко óрля юность твоя́. Творя́й ми́лостыни Госпóдь, и судьбý всем оби́димым. Сказá путѝ Своя́ Моисéови, сыновóм Iзрáилевым хотéнїя Своя́: Щедр и Ми́лостив Госпóдь, Долготерпели́в и Многоми́лостив. Не до концá прогнéвается, нижé во век враждýет, не по беззакóнїем нáшим сотвори́л есть нам, нижé по грехóм нáшым воздáл есть нам. Я́ко по высотé небéсней от землѝ, утверди́л есть Госпóдь ми́лость Свою́ на боя́щихся Егó. Ели́ко отстоят востóцы от зáпад, удáлил есть от нас беззакóнїя нáша. Я́коже щéдрит отéц сы́ны, ущéдри Госпóдь боя́щихся Егó. Я́ко Той познá создáнїе нáше, помянý, яко персть есмы́. Человéк, яко травá днíе eгó, яко цвет сéльный, тáко оцветéт, яко дух прóйде в нем, и не бýдет, и не познáет ктомý мéста своегó. Ми́лость же Госпóдня от вéка и до вéка на боя́щихся Егó, и прáвда Егó на сынéх сынóв, храня́щих завéт Егó, и пóмнящих зáповеди Егó твори́ти я. Госпóдь на Небесѝ уготóва Престóл Свой, и Цáрство Егó всéми обладáет. Благослови́те Гóспода вси Áнгели Егó, си́льнїи крéпостїю, творя́щїи слóво Егó, услышати глас словéс Егó. Благослови́те Гóспода вся Си́лы Егó, слýги Егó, творя́щїи вóлю Егó. Благослови́те Гóспода вся делá Егó, на вся́ком мéсте влады́чества Егó, благослови́, душé моя́, Гóспода.
На вся́ком мéсте влады́чества Егó, благослови́, душé моя́, Гóспода.
Псалом 142
Гóсподи, услы́ши моли́тву мою́, внуши́ молéнiе моé во и҆́стине Твоéй, услы́ши мя в прáвде Твоéй и не вни́ди в суд с рабóм Твои́м, я́ко не оправди́тся пред Тобóю всяк живы́й. Яко погнá враг дýшу мою́, смири́л есть в зéмлю живóт мой, посади́л мя есть в тéмных, я́ко мéртвыя вéка. И҆ уны́ во мне дух мой, во мне смятéся сéрдце моé. Помянýх дни дрéвнiя, поучи́хся во всех дéлех Твои́х, в творéнiих рукý Твоéю поучáхся. Воздéх к Тебé рýце мои́, душá моя́, я́ко земля́ безвóдная Тебé. Скóро услы́ши мя, Гóсподи, исчезé дух мой, не отврати́ лицá Твоегó от менé, и уподóблюся низходя́щым в ров. Слы́шану сотвори́ мне заýтра ми́лость Твою́, я́ко на Тя уповáх. Скажи́ мне, Гóсподи, путь вóньже пойдý, я́ко к Тебé взях дýшу мою́. И҆зми́ мя от враг мои́х, Гóсподи, к Тебé прибегóх. Научи́ мя твори́ти вóлю Твою́, я́ко Ты еси́ Бог мой. Дух Твой Благíй настáвит мя на зéмлю прáву. И҆́мене Твоегó рáди, Гóсподи, живи́ши мя, прáвдою Твоéю изведéши от печáли дýшу мою́. И҆ ми́лостiю Твоéю потреби́ши враги́ моя́ и погуби́ши вся стужáющыя души́ моéй, я́ко аз раб Твой есмь.
Услы́ши мя, Гóсподи, в прáвде Твоéй и не вни́ди в суд с рабóм Твои́м. Услы́ши мя, Гóсподи, в прáвде Твоéй и не вни́ди в суд с рабóм Твои́м.
Дух Твой Благíй настáвит мя на зéмлю прáву.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (3 раза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
БОГ ГОСПОДЬ, глас 4
Чтец: Бог Госпóдь, и яви́ся нам, благословéн Гряды́й во И҆́мя Госпóдне.(Пс.117:27А,26А)
Чтец: И҆сповéдайтеся Гóсподеви, я́ко благ, я́ко в век ми́лость Егó.(Пс.135:1/106:1)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Обышéдше обыдóша мя и и҆́менем Госпóдним противля́хся и҆м.(Пс.117:11)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Не умрý, но жив бýду и повéм делá Госпóдня.(Пс.117:17)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Кáмень, Егóже небрегóша зи́ждущiи, Сей бысть во главý ýгла, от Гóспода бысть Сей, и есть ди́вен во очесéх нáших. (Пс.117:22-23)
Хор: Бог Госпóдь, и явúся нам, благословéн Гряды́й во И҆́мя Госпóдне.
ТРОПАРИ
Тропáрь прáздника, глас 4: Рождествó Твоé, Богорóдице Дéво, рáдость возвести́ всей вселéнней: из Тебé бо возсiя́ Сóлнце Прáвды, Хрiстóс Бог наш, и, разруши́в кля́тву, дадé благословéнiе, и, упраздни́в смерть, даровá нам живóт вéчный. (Двáжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Рождествó Твоé, Богорóдице Дéво, рáдость возвести́ всей вселéнней: из Тебé бо возсiя́ Сóлнце Прáвды, Хрiстóс Бог наш, и, разруши́в кля́тву, дадé благословéнiе, и, упраздни́в смерть, даровá нам живóт вéчный.
Гóсподи, помúлуй. (трúжды)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
КАФИЗМЫ И СЕДАЛЬНЫ
КАФИЗМА ДЕСЯТАЯ
И чтем кафíсму 10-ю ( или одúн псалóм, или до 1-й Слáвы)
Псалом 70
На Тя, Гóсподи, уповáх, да не постыжýся в век. Прáвдою Твоéю избáви мя и изми́ мя, приклони́ ко мне ýхо Твоé и спаси́ мя. Бýди ми в Бóга Защи́тителя и в мéсто крéпко спасти́ мя, я́ко утвержéнiе моé и прибéжище моé еси́ Ты. Бóже мой, избáви мя из руки́ грéшнаго, из руки́ законопрестýпнаго и оби́дящаго, я́ко Ты еси́ терпéнiе моé, Гóсподи, Гóсподи, уповáнiе моé от ю́ности моея́. В Тебé утверди́хся от утрóбы, от чрéва мáтере моея́ Ты еси́ мой покрови́тель: о Тебé пéнiе моé вы́ну. Я́ко чýдо бых мнóгим, и Ты помóщник мой крéпок. Да испóлнятся устá моя́ хвалéнiя, я́ко да воспою́ слáву Твою́, весь день великолéпiе Твоé. Не отвéржи менé во врéмя стáрости, внегдá оскудевáти крéпости моéй, не остáви менé. Я́ко рéша врази́ мои́ мне, и стрегýщiи дýшу мою́ совещáша вкýпе, глагóлюще: Бог остáвил есть eгó, пожени́те и ими́те eгó, я́ко несть избавля́яй. Бóже мой, не удали́ся от менé, Бóже мой, в пóмощь мою́ вонми́. Да постыдя́тся и исчéзнут оклеветáющiи дýшу мою́, да облекýтся в студ и срам и҆́щущiи злáя мне. Аз же всегдá возуповáю на Тя и приложý на вся́ку похвалý Твою́. Устá моя́ возвестя́т прáвду Твою́, весь день спасéнiе Твоé, я́ко не познáх кни́жная. Вни́ду в си́ле Госпóдни, Гóсподи, помянý прáвду Тебé Еди́наго. Бóже мой, и҆́мже научи́л мя еси́ от ю́ности моея́, и до ны́не возвещý чудесá Твоя́, и дáже до стáрости и престарéнiя, Бóже мой, не остáви менé, дóндеже возвещý мы́шцу Твою́ рóду всемý грядýщему, си́лу Твою́ и прáвду Твою́, Бóже, дáже до вы́шних, я́же сотвори́л ми еси́ вели́чiя. Бóже, кто подóбен Тебé? Ели́ки яви́л ми еси́ скóрби мнóги и злы, и обрáщься оживотвори́л мя еси́, и от бездн земли́ возвéл мя еси́. Умнóжил еси́ на мне вели́чествiе Твоé, и обрáщься утéшил мя еси́, и от бездн земли́ пáки возвéл мя еси́. И́бо аз исповéмся Тебé в лю́дех, Гóсподи, в сосýдех псалóмских и҆́стину Твою́, Бóже, воспою́ Тебé в гýслех, Святы́й Iзрáилев. Возрáдуетеся устнé мои́, егдá воспою́ Тебé, и душá моя́, ю́же еси́ избáвил. Ещé же и язы́к мой весь день поучи́тся прáвде Твоéй, егдá постыдя́тся и посрáмятся и҆́щущiи злáя мне.
Псалом 71
Бóже, суд Твой царéви даждь, и прáвду Твою́ сы́ну царéву: суди́ти лю́дем Твои́м в прáвде, и ни́щим Твои́м в судé. Да воспрiи́мут гóры мир лю́дем, и хóлми прáвду. Сýдит ни́щим людски́м, и спасéт сы́ны убóгих и смири́т клеветникá. И пребýдет с сóлнцем, и прéжде луны́ рóда родóв. Сни́дет я́ко дождь на рунó, и я́ко кáпля, кáплющая на зéмлю. Возсiя́ет во днех eгó прáвда и мнóжество ми́ра, дóндеже отъи́мется лунá. И обладáет от мóря до мóря, и от рек до конéц вселéнныя. Пред ним припадýт Ефióпляне, и врази́ eгó персть поли́жут. Цáрiе Фарсíйстiи и óстрови дáры принесýт, цáрiе Арáвстiи и Савá дáры приведýт: и поклóнятся eмý вси цáрiе зéмстiи, вси язы́цы порабóтают eмý. Я́ко избáви ни́ща от си́льна, и убóга, eмýже не бе помóщника. Пощади́т ни́ща и убóга, и дýши убóгих спасéт: от ли́хвы и от непрáвды избáвит дýши их, и чéстно и҆́мя eгó пред ни́ми. И жив бýдет, и дáстся eмý от злáта Аравíйска, и помóлятся о нем вы́ну, весь день благословя́т eгó. Бýдет утверждéнiе на земли́ на версéх гор, превознесéтся пáче Лiвáна плод eгó: и процветýт от грáда я́ко травá земнáя. Бýдет и҆́мя eгó благословéно во вéки, прéжде сóлнца пребывáет и҆́мя eгó, и благословя́тся в нем вся колéна земнáя, вси язы́цы ублажáт eгó. Благословéн Госпóдь Бог Изрáилев, творя́й чудесá Еди́н. И благословéно и҆́мя слáвы Егó во век и в век вéка, и испóлнится слáвы Егó вся зéмля: бýди, бýди.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
Псалом 72
Коль благ Бог Iзрáилев, прáвым сéрдцем. Мои́ же вмáле не подвижáстеся нóзе: вмáле не пролiя́шася стопы́ моя́. Я́ко возревновáх на беззакóнныя, мир грéшников зря. Я́ко несть восклонéнiя в смéрти их, и утверждéнiя в рáне их, в трудéх человéческих не суть, и с человéки не прiи́мут ран. Сегó рáди удержá я́ горды́ня их до концá: одéяшася непрáвдою и нечéстiем свои́м. Изы́дет я́ко из тýка непрáвда их, преидóша в любóвь сéрдца. Помы́слиша и глагóлаша в лукáвстве, непрáвду в высотý глагóлаша. Положи́ша на небеси́ устá своя́, и язы́к их прéйде по земли́. Сегó рáди обратя́тся лю́дiе мои́ сéмо, и днíе испóлнени обря́щутся в них. И рéша: кáко увéде Бог? И áше есть рáзум в Вы́шнем? Се сíи грéшницы и гобзýющiи в век, удержáша богáтство. И рех: едá всýе оправди́х сéрдце моé и умы́х в непови́нных рýце мои́, и бых я́звен весь день, и обличéнiе моé на ýтренних. А́ще глагóлах, повéм тáко: се рóду сынóв Твои́х, eмýже обещáхся, и непщевáх разумéти: сié труд есть предо мнóю, дóндеже вни́ду во святи́ло Бóжiе и разумéю в послéдняя их. Обáче за льщéнiя их положи́л еси́ им злáя, низложи́л еси́ я́, внегдá разгордéшася. Кáко бы́ша в запустéнiе? Внезáпу исчезóша, погибóша за беззакóнiе своé. Я́ко сóнiе востаю́щаго, Гóсподи, во грáде Твоéм óбраз их уничижи́ши. Я́ко разжжéся сéрдце моé, и утрóбы моя́ измени́шася. И аз уничижéн и не разумéх, скóтен бых у Тебé. И аз вы́ну с Тобóю, удержáл еси́ рýку деснýю мою́, и совéтом Твои́м настáвил мя еси́, и со слáвою прiя́л мя еси́. Что бо ми есть на небеси́? И от Тебé что восхотéх на земли́? Исчезé сéрдце моé и плоть моя́, Бóже сéрдца моегó, и часть моя́, Бóже, во век. Я́ко се удаля́ющiи себé от Тебé поги́бнут; потреби́л еси́ вся́каго любодéющаго от Тебé. Мне же прилепля́тися Бóгови блáго есть, полагáти на Гóспода уповáнiе моé, возвести́ти ми вся хвалы́ Твоя́ во вратéх дщéре Сióни.
Псалом 73
Вскýю, Бóже, отри́нул еси́ до концá? Разгнéвася я́рость Твоя́ на óвцы пáжити Твоея́? Помяни́ сонм Твой, eгóже стяжáл еси́ испéрва, избáвил еси́ жезлóм достоя́нiя Твоегó, горá Сióн сiя́, в нéйже всели́лся еси́. Воздви́гни рýце Твои́ на горды́ни их в конéц, ели́ка лукáвнова враг во святéм Твоéм. И восхвали́шася ненави́дящiи Тя посредé прáздника Твоегó, положи́ша знáменiя своя́, знáменiя, и не познáша, я́ко во исхóде превы́ше, я́ко в дубрáве дрéвяне секи́рами разсекóша. Двéри eгó вкýпе: сéчивом и оскóрдом разруши́ша и҆́. Возжгóша огнéм святи́ло Твоé, на земли́ оскверни́ша жили́ще и҆́мене Твоегó. Рéша в сéрдце своéм ю́жики их вкýпе: прииди́те и отстáвим вся прáздники Бóжия от земли́. Знáмения их не ви́дехом: несть ктомý прорóка, и нас не познáет ктомý. Докóле, Бóже, понóсит враг? Раздражи́т проти́вный и҆́мя Твоé до концá? Вскýю отвращáеши рýку Твою́ и десни́цу Твою́ от среды́ нéдра Твоегó в конéц? Бог же Царь наш прéжде вéка содéла спасéнiе посредé земли́. Ты утверди́л еси́ си́лою Твоéю мóре, Ты стéрл еси́ главы́ змiéв в водé, Ты сокруши́л еси́ главý змíеву, дал еси́ тогó брáшно лю́дем Ефióпским. Ты растóргл еси́ истóчники и потóки, Ты изсуши́л еси́ рéки Ифáмскiя. Твой есть день, и Твоя́ есть нощь: Ты соверши́л еси́ зарю́ и сóлнце. Ты сотвори́л еси́ вся предéлы земли́, жáтву и вéсну Ты создáл еси́ я́. Помяни́ сiя́, враг поноси́ Гóсподеви, и лю́дiе безýмнiи раздражи́ша и҆́мя Твоé. Не предáждь зверéм дýшу, исповéдающуся Тебé, душ убóгих Твои́х не забýди до концá. При́зри на завéт Твой, я́ко испóлнишася помрачéннiи земли́ домóв беззакóнiй. Да не возврати́тся смирéнный посрáмлен, нищ и убóг восхвали́та и҆́мя Твоé. Востáни, Бóже, суди́ прю Твою́, помяни́ поношéнiе Твоé, éже от безýмнаго весь день. Не забýди глáса моли́твенник Твои́х, горды́ня ненави́дящих Тя взы́де вы́ну.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
Псалом 74
Исповéмыся Тебé, Бóже, исповéмыся Тебé, и призовéм и҆́мя Твоé; повéм вся чудесá Твоя́. Егдá прiимý врéмя, Аз правоты́ возсуждý. Растáяся земля́ и вси живýщiи на ней, Аз утверди́х столпы́ ея́. Рех беззакóннующим, не беззакóннуйте: и согрешáющим, не возноси́те рóга, не воздвизáйте на высотý рóга вáшего, и не глагóлите на Бóга непрáвду: я́ко нижé от исхóд, нижé от зáпад, нижé от пусты́х гор. Я́ко Бог судiя́ есть: сегó смиря́ет, и сегó вознóсит. Я́ко чáша в руцé Госпóдни, винá нерастворéна, испóлнь растворéнiя, и уклони́ от сея́ в сiю́: обáче дрóждiе Егó не истощи́ся, испiю́т вси грéшнiи земли́. Аз же возрáдуюся в век, воспою́ Бóгу Iáковлю: и вся рóги грéшных сломлю́, и вознесéтся рог прáведнаго.
Псалом 75
Вéдом во Iудéи Бог: во Iзрáили вéлiе и҆́мя Егó. И бысть в ми́ре мéсто Егó и жили́ще Егó в Сióне. Тáмо сокруши́ крéпости лукóв, орýжiе и мечь и брань. Просвещáеши Ты ди́вно от гор вéчных. Смятóшася вси неразýмнiи сéрдцем: уснýша сном свои́м, и ничтóже обретóша вси мýжiе богáтства в рукáх свои́х. От запрещéнiя Твоегó, Бóже Iáковль, воздремáша всéдшiи на кóни. Ты стрáшен еси́, и кто противостáнет Тебé? Оттóле гнев Твой. С Небесé слы́шан сотвори́л еси́ суд: земля́ убоя́ся, и умолчá, внегдá востáти на суд Бóгу, спасти́ вся крóткiя земли́. Я́ко помышлéнiе человéческое исповéстся Тебé: и остáнок помышлéнiя прáзднует Ти. Помоли́теся и воздади́те Гóсподеви Бóгу нáшему. Вси и҆́же óкрест Егó принесýт дáры, стрáшному и отъéмлющему дýхи князéй, стрáшному пáче царéй земны́х.
Псалом 76
Глáсом мои́м ко Гóсподу воззвáх, глáсом мои́м к Бóгу, и внят ми. В день скóрби моея́ Бóга взыскáх рукáма мои́ма, нóщiю пред Ним, и не прельщéн бых. Отвéржеся утéшитися душá моя́. Помянýх Бóга и возвесели́хся, поглумля́хся и малодýшествоваше дух мой. Предвари́сте стражбы́ óчи мои́: смятóхся и неглагóлах. Помы́слих дни пéрвыя, и лéта вéчная помянýх, и поучáхся: нóщiю сéрдцем мои́м глумля́хся, и тужáше дух мой: едá во вéки отри́нет Госпóдь, и не приложи́т благоволи́ти пáки? Или́ до концá ми́лость Свою́ отсечéт, скончá глагóл от рóда в род? Едá забýдет ущéдрити Бог? Или́ удержи́т во гнéве Своéм щедрóты Своя́? И рех: ны́не начáх, сiя́ измéна десни́цы Вы́шняго. Помянýх делá Госпóдня, я́ко помянý от начáла чудесá Твоя́, и поучýся во всех дéлех Твои́х, и в начинáнiих Твои́х поглумлю́ся. Бóже, во святéм путь Твой: кто бог вéлiй я́ко Бог наш? Ты еси́ Бог творя́й чудесá: сказáл еси́ в лю́дех си́лу Твою́, избáвил еси́ мы́шцею Твоéю лю́ди Твоя́, сы́ны Iáковли и Ióсифовы. Ви́деша Тя вóды, Бóже, ви́деша Тя вóды, и убоя́шася: смятóшася бéздны, мнóжество шýма вод, глас дáша óблацы, и҆́бо стрéлы Твоя́ прехóдят. Глас грóма Твоегó в колеси́, освети́ша мóлнiя Твоя́ вселéнную: подви́жеся и трéпетна бысть земля́. В мóри путié Твои́, и стези́ Твои́ в водáх мнóгих, и следы́ Твоя́ не познáются. Настáвил еси́ я́ко óвцы лю́ди Твоя́ рукóю Моисéовою и Аарóнею.
Чтец: Слáва Отцý и Сыну и Святóму Дýху, и ныне и присно и во вéки векóв, аминь.
Аллилýiа, аллилýiа, аллилýiа, слáва Тебé Бóже. (3 раза)
Гóсподи, поми́луй. (12 раз)
СЕДАЛЬНЫ
Хор (по кафíсме седáлен, глас 4): Возопíй, Давíде, что кля́тся тебé Бог?/ Я́же мне кля́тся, речé, и испóлни ужé:/ от плодá чрéва моегó дáвый Деви́цу,/ из Нея́же Содéтель Хрiстóс, Нóвый Адáм роди́ся, Царь на престóле моéм;/ и цáрствует днесь, имéяй Цáрство недви́жимо.// Неплóды раждáет Богорóдицу и Питáтельницу Жи́зни нáшея.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Возопíй, Давíде, что кля́тся тебé Бог?/ Я́же мне кля́тся, речé, и испóлни ужé:/ от плодá чрéва моегó дáвый Деви́цу,/ из Нея́же Содéтель Хрiстóс, Нóвый Адáм роди́ся, Царь на престóле моéм;/ и цáрствует днесь, имéяй Цáрство недви́жимо.// Неплóды раждáет Богорóдицу и Питáтельницу Жи́зни нáшея.
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
КАФИЗМА ОДИННАДЦАТАЯ
И чтем кафíсму 11-ю (или одúн псалóм, или до 1-й Слáвы)
Псалом 77
Внемли́те, лю́дiе мои́, закóну моемý, приклони́те ýхо вáше во глагóлы уст мои́х. Отвéрзу в при́тчах устá моя́, провещáю ганáнiя испéрва. Ели́ка слы́шахом и познáхом я́, и отцы́ нáши пове́даша нам: не утаи́шася от чад их в род ин, возвешáюще хвалы́ Госпóдни и си́лы Егó, и чудесá Егó, я́же сотвори́. И воздви́же свидéнiе во Iáкове, и закóн положи́ во Iзрáили: ели́ка заповéда отцéм нáшим, сказáти я́ сыновóм свои́м, я́ко да познáет род ин, сы́нове родя́щiися, и востáнут и повéдят я́ сыновóм свои́м: да положáт на Бóга уповáнiе своé, и не забýдут дел Бóжiих, и зáповеди Егó взы́щут. Да не бýдут я́коже отцы́ их, род стропти́в и преогорчевáяй, род и́же не испрáви сéрдца своегó, и не увéри с Бóгом дýха своегó. Сы́нове Ефрéмли наляцáюще и стреля́юще лýки, возврати́шася в день брáни: не сохрани́ша завéта Бóжiя, и в закóне Егó не восхотéша ходи́ти. И забы́ша благодея́нiя Егó, и чудесá Егó, я́же показá им пред отцы́ их, я́же сотвори́ чудесá в земли́ Еги́петстей, на пóли Танеóсе. Развéрзе мóре, и проведé их, предста́ви вóды я́ко мех. И настáви я́ óблаком во дни, и всю нощь просвещéнiем огня́. Развéрзе кáмень в пусты́ни, и напои́ я́ я́ко в бéздне мнóзе, и изведé вóду из кáмене, и низведé я́ко рéки вóды. И приложи́ша ещé согрешáти Емý, преогорчи́ша Вы́шняго в безвóдней; и искуси́ша Бóга в сердцáх свои́х, вопроси́ти брáшна душáм свои́м. И клеветáша на Бóга, и рéша: едá возмóжет Бог уготóвати трапéзу в пусты́ни? Понéже порази́ кáмень, и потекóша вóды, и потóцы наводни́шася: едá и хлеб мóжет дáти, или́ уготóвати трапéзу лю́дем Свои́м? Сегó рáди слы́ша Госпóдь и презрé: и огнь возгорéся во Iáкове, и гнев взы́де на Iзрáиля, я́ко не вéроваша Бóгови, нижé уповáша на спасéнiе Егó. И заповéда облакóм свы́ше, и двéри небесé отвéрзе, и одожди́ им мáнну я́сти, и хлеб небéсный дадé им. Хлеб áнгельскiй ядé человéк, брáшно послá им до сы́тости. Воздви́же юг с небесé, и наведé си́лою Своéю ли́ва, и одожди́ на ня я́ко прах плóти, и я́ко песóк морскíй пти́цы пернáты. И нападóша посредé стáна их, óкрест жили́щ их. И ядóша и насы́тишася зелó, и желáнiе их принесé им. Не лиши́шася от желáнiя своегó: ещé брáшну сýщу во устéх их: и гнев Бóжiй взы́де на ня, и уби́ мнóжайшая их, и избрáнным Iзрáилевым запя́т. Во всех сих согреши́ша ещé, и не вéроваша чудесéм Егó. И исчезóша в суетé днíе их, и лéта их со тщáнiем. Егдá убивáше я́, тогдá взыскáху Егó, и обращáхуся, и ýтреневаху к Бóгу: и помянýша, я́ко Бог Помóщник им есть, и Бог Вы́шнiй Избáвитель им есть. И возлюби́ша Егó усты́ свои́ми, и язы́ком свои́м солгáша Емý: сéрдце же их не бе прáво с Ним, нижé увéришася в завéте Егó. Тóйже есть щедр, и очи́стит грехи́ их, и не растли́т, и умнóжит отврати́ти я́рость Свою́, и не разжжéт всегó гнéва Своегó. И помянý, я́ко плоть суть, дух ходя́й и не обращáяйся. Колькрáты преогорчи́ша Егó в пусты́ни, прогнéваша Егó в земли́ безвóдней? И обрати́шася, и искуси́ша Бóга, и Святáго Iзрáилева раздражи́ша, и не помянýша руки́ Егó в день, вóньже избáви я́ из руки́ оскорбля́юшаго, я́коже положи́ во Еги́пте знáменiя Своя́, и чудесá Своя́ на пóли Танеóсе, и преложи́ в кровь рéки их, и истóчники их, я́ко да не пiю́т. Послá на ня пéсiя мýхи и поядóша я́: и жáбы, и растли́ я́. И дадé рже плоды́ их, и труды́ их пругóм. Уби́ грáдом виногрáды их, и черни́чiе их слáною, и предадé грáду скоты́ их, и имéнiе их огню́. Послá на ня гнев я́рости Своея́, я́рость и гнев и скорбь, послáнiе áнгелы лю́тыми. Путесотвори́ стезю́ гнéву Своемý, и не пощадé от смéрти душ их: и скоты́ их в смéрти заключи́, и порази́ вся́кое перворóдное в земли́ Еги́петстей, начáток вся́каго трудá их в селéнiих Хáмовых. И воздви́же я́ко óвцы лю́ди Своя́, и возведé я́ я́ко стáдо в пусты́ни, и настáви я́ на уповáнiе, и не убоя́шася, и враги́ их покры́ мóре. И введé я́ в гóру святы́ни Своея́, гóру сiю́, ю́же стяжá десни́ца Егó. И изгнá от лицá их язы́ки, и по жрéбiю дадé им [зéмлю] ýжем жребодая́нiя, и всели́ в селéнiих их колéна Iзрáилева. И искуси́ша и преогорчи́ша Бóга Вы́шняго, и свидéнiй Егó не сохрани́ша, и отврати́шася, и отвергóшася, я́коже и отцы́ их, преврати́шася в лук развращéн, и прогнéваша Егó в хóлмех свои́х и во истукáнных свои́х раздражи́ша Егó. Слы́ша Бог и презрé, и уничижи́ зелó Iзрáиля, и отри́ну ски́нiю Силóмскую, селéнiе, éже всели́ся в человéцех. И предадé в плен крéпость их, и добрóту их в рýки врагóв, и затвори́ во орýжiи лю́ди Своя́, и достоя́нiе Своé презрé. Ю́ноши их поядé огнь, и дéвы их не осéтованы бы́ша; свящéнницы их мечéм падóша, и вдови́цы их не оплáканы бýдут. И востá я́ко спя́ Госпóдь, я́ко си́лен и шýмен от винá, и порази́ враги́ Своя́ вспять, поношéнiе вéчное дадé им. И отри́ну селéнiе Ióсифово, и колéно Ефрéмово не избрá, и избрá колéно Iýдово, гóру Сióню, ю́же возлюби́, и создá я́ко единорóга святи́лище Своé, на земли́ основá и́ в век. И избрá Давíда рабá Своегó, и воспрiя́т eгó от стад óвчих. От дои́лиц поя́т eгó пасти́ Iáкова рабá Своегó и Iзрáиля достоя́нiе Своé. И упасé я́ в незлóбiи сéрдца своегó, и в рáзумех рукý своéю настáвил я́ есть.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
Псалом 78
Бóже, прiидóша язы́цы в достоя́нiе Твоé, оскверни́ша храм святы́й Твой, положи́ша Iерусали́м я́ко овóщное храни́лище, положи́ша трýпiя раб Твои́х брáшно пти́цам небéсным, плóти преподóбных Твои́х зверéм земны́м. Пролiя́ша кровь их я́ко вóду óкрест Iерусали́ма, и не бе погребáяй. Бы́хом поношéнiе сосéдом нáшим, подражнéнiе и поругáнiе сýщим óкрест нас. Докóле, Гóсподи, прогнéваешися до концá? Разжжéтся я́ко огнь рвéнiе Твоé? Пролéй гнев Твой на язы́ки не знáющiя Тебé, и на цáрствiя, я́же и҆́мене Твоегó не призвáша, я́ко поядóша Iáкова, и мéсто eгó опустоши́ша. Не помяни́ нáших беззакóнiй пéрвых: скóро да предваря́т ны щедрóты Твоя́, Гóсподи, я́ко обнищáхом зелó. Помози́ нам, Бóже, Спаси́телю наш, слáвы рáди и҆́мене Твоегó, Гóсподи, избáви ны, и очи́сти грехи́ нáша и҆́мене рáди Твоегó. Да не когдá рекýт язы́цы, где есть Бог их? И да увéстся во язы́цех пред очи́ма нáшима отмщéнiе крóве раб Твои́х пролиты́я. Да вни́дет пред Тя воздыхáнiе оковáнных, по вели́чiю мы́шцы Твоея́ снабди́ сы́ны умерщвлéнных. Воздáждь сосéдом нáшим седмери́цею в нéдро их поношéнiе их, и҆́мже поноси́ша Тя, Гóсподи. Мы же, лю́дiе Твои́ и óвцы пáжити Твоея́, исповéмыся Тебé, Бóже, во век, в род и род возвести́м хвалý Твою́.
Псалом 79
Пасы́й Iзрáиля вонми́: наставля́яй я́ко овчá Ióсифа, седя́й на Херувíмех, яви́ся, пред Ефрéмом и Beнiамíном и Манассíем, воздви́гни си́лу Твою́, и прiиди́ во éже спасти́ нас. Бóже, обрати́ ны, и просвети́ лицé Твоé, и спасéмся. Гóсподи Бóже сил, докóле гнéваешися на моли́тву раб Твои́х? Напитáеши нас хлéбом слéзным, и напои́ши нас слезáми в мéру. Положи́л еси́ нас в пререкáнiе сосéдом нáшим, и врази́ нáши подражни́ша ны. Гóсподи Бóже сил, обрати́ ны, и просвети́ лицé Твоé, и спасéмся. Виногрáд из Еги́пта пренéсл еси́, изгнáл еси́ язы́ки, и насади́л еси́ и҆́. Путесотвори́л еси́ пред ним, и насади́л еси́ корéнiя eгó, и испóлни зéмлю. Покры́ гóры сень eгó, и вéтвiя eгó кéдры Бóжiя; прострé рóзги eгó до мóря, и дáже до рек óтрасли eгó. Вскýю низложи́л еси́ оплóт eгó, и объимáют и҆́ вси мимоходя́щiи путéм? Озобá и҆́ вепрь от дубрáвы, и уединéнный ди́вiй поядé и҆́. Бóже сил, обрати́ся ýбо, и при́зри с Небесé и виждь, и посети́ виногрáд сей, и соверши́ и҆́, eгóже насади́ десни́ца Твоя́, и на сы́на человéческаго, eгóже укрепи́л еси́ Себé. Пожжéн огнéм и раскóпан, от запрещéнiя лицá Твоегó поги́бнут. Да бýдет рукá Твоя́ на мýжа десни́цы Твоея́, и на сы́на человéческаго, eгóже укрепи́л еси́ Себé, и не отстýпим от Тебé; оживи́ши ны, и и҆́мя Твоé призовéм. Гóсподи Бóже сил, обрати́ ны, и просвети́ лицé Твоé, и спасéмся.
Псалом 80
Рáдуйтеся Бóгу, Помóщнику нáшему, воскли́кните Бóгу Iáковлю, прiими́те псалóм и дади́те тимпáн, псалти́рь красéн с гýсльми, воструби́те в новомéсячiи трубóю, во благознамени́тый день прáздника вáшего, я́ко повелéнiе Iзрáилеви есть, и судьбá Бóгу Iáковлю. Свидéнiе во Ióсифе положи́ é, внегдá изы́ти eмý от земли́ Еги́петскiя, язы́ка eгóже не вéдяше услы́ша. Отъя́т от брéмене хребéт eгó, рýце eгó в коши́ порабóтасте. В скóрби призвáл Мя еси́, и избáвих тя, услы́шах тя в тáйне бýрне, искуси́х тя на водé пререкáнiя. Слы́шите, лю́дiе мои́, и засвидéтельствую вам, Iзрáилю, áще послýшаеши Менé. Не бýдет Тебé бог нов , нижé поклони́шися бóгу чуждéму. Аз бо есмь Госпóдь Бог твой, изведы́й тя от земли́ Еги́петскiя, разшири́ устá Твоя́, и испóлню я́. И не послýшаша лю́дiе мои́ глáса Моегó, и Iзрáиль не внят Ми: и отпусти́х я́ по начинáнiем сердéц их, пóйдут в начинáнiих свои́х. Áще бы́ша лю́дiе Мои́ послýшали Менé, Iзрáиль áще бы в пути́ Моя́ ходи́л, ни о чесóм же ýбо враги́ eгó смири́л бых, и на оскорбля́ющыя их возложи́л бых рýку Мою́. Врази́ Госпóдни солгáша Eмý, и бýдет врéмя их в век. И напитá их от тýка пшени́чна, и от кáмене мéда насы́ти их.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
Псалом 81
Бог ста в сóнме богóв, посредé же бóги разсýдит. Докóле сýдите непрáвду, и ли́ца грéшников прiéмлете? Суди́те си́ру и убóгу, смирéна и ни́ща оправдáйте. Изми́те ни́ща и убóга, из руки́ грéшничи избáвите eгó. Не познáша, нижé уразумéша, во тьме хóдят: да подви́жатся вся основáнiя земли́. Аз рех: бóзи естé, и сы́нове Вы́шняго вси. Вы же я́ко человéцы умирáете, и я́ко еди́н от князéй пáдаете. Воскресни́, Бóже, суди́ земли́: я́ко Ты наслéдиши во всех язы́цех.
Псалом 82
Бóже, кто уподóбится Тебé? Не премолчи́ нижé укроти́, Бóже. Я́ко се врази́ Твои́ возшумéша, и ненави́дящiи Тя воздвигóша главý. На лю́ди Твоя́ лукáвноваша вóлею, и совещáша на святы́я Твоя́. Рéша: прiиди́те и потреби́м я́ от язы́к, и не помянéтся и҆́мя Iзрáилево ктомý. Я́ко совещáша единомышлéнiем вкýпе, на Тя завéт завещáша: селéнiя Iдумéйска, и Iсмáилiте, Моáв и Агáряне: Гевáл и Аммóн и Амали́к, иноплемéнницы с живýщими в Ти́ре, и҆́бо и Ассýр прiи́де с ни́ми, бы́ша в заступлéнiе сыновóм Лóтовым. Сотвори́ им я́ко Мадiáму и Сiсáре, я́ко Iавíму в потóце Кíссове. Потреби́шася во Аендóре, бы́ша я́ко гной земны́й. Положи́ кня́зи их, я́ко Ори́ва и Зи́ва, и Зевéа и Салмáна, вся кня́зи их, и҆́же рéша: да наслéдим себé святи́лише Бóжiе. Бóже мой, положи́ я́ я́ко кóло, я́ко трость пред лицéм вéтра. Я́ко огнь попаля́яй дубрáвы, я́ко плáмень пожигáяй гóры, тáко поженéши я́ бýрею Твоéю, и гнéвом Твои́м смятéши я́. Испóлни ли́ца их безчéстiя, и взы́щут и҆́мене Твоегó, Гóсподи. Да постыдя́тся и смятýтся в век вéка, и посрáмятся и поги́бнут. И да познáют, я́ко и҆́мя Тебé Госпóдь, Ты еди́н Вы́шнiй по всей земли́.
Псалом 83
Коль возлюбленна селéнiя Твоя́, Гóсподи сил! Желáет и скончавáется душá моя́ во дворы́ Госпóдни, сéрдце моé и плоть моя́ возрáдовастася о Бóзе живе. И҆́бо птица обрéте себé хрáмину, и гóрлица гнездó себé, идéже положи́т птенцы своя́, олтарѝ Твоя, Гóсподи сил, Царю мой и Бóже мой. Блажéни живýщiи в домý Твоéм, в вéки векóв восхвáлят Тя. Блажéн муж, eмýже есть заступлéнiе eго у Тебé; восхождéнiя в сéрдце своéм положѝ, во юдóль плачéвную, в мéсто éже положѝ, и҆́бо благословéнiе даст законополагáяй. Пóйдут от си́лы в си́лу: яви́тся Бог богóв в Сióне. Гóсподи Бóже сил, услыши моли́тву мою, внушѝ, Бóже Iáковль. Защи́тниче наш, виждь, Бóже, и при́зри на лицé хрiстá Твоегó. Яко лýчше день еди́н во двóрех Твои́х пáче тысящ: извóлих приметáтися в домý Бóга моегó пáче, нéже жи́ти ми в селéнiих грéшничих. Яко ми́лость и и҆́стину любит Госпóдь, Бог благодáть и слáву даст, Госпóдь не лиши́т благих ходящих незлóбiем. Гóсподи Бóже сил, Блажéн человéк уповáяй на Тя.
(продолжение зри здесь)