Рождество Пресвятой Владычицы нашей Богородицы и Приснодевы Марии. ВСЕНОЩНОЕ БДЕНИЕ. УТРЕНЯ. КАНОН
21 сентября́ 2022 гóда. Рождествó Пресвятóй Влады́чицы нáшей Богорóдицы и Приснодéвы Марíи. Прáздничная слýжба для домáшнего (келéйнаго) совершéнiя. Послéдованiе ýтрени. Слýжба мiрскúм чúном.
Начало зри здесь ( великая вечéрня) и здесь ( ýтреня)
Псалом 84
Благоволил есѝ, Гóсподи, зéмлю Твою, возврати́л есѝ плен Iáковль: остáвил есѝ беззакóнiя людéй Твоих, покрыл есѝ вся грехи и҆́х. Укротил есѝ весь гнев Твой, возвратился есѝ от гнéва я́рости Твоея́. Возвратѝ нас, Бóже спасéнiй нáших, и҆ отвратѝ я́рость Твою от нас. Едá во вéки прогнéваешися на ны? Илѝ прострéши гнев Твой от рóда в род? Бóже, Ты обрáщься оживи́ши ны, и҆ людiе Твои возвеселя́тся о Тебé. Явѝ нам, Гóсподи, ми́лость Твою, и҆ спасéнiе Твоé даждь нам. Услышу, что речéт о мне Госпóдь Бог: яко речéт мир на люди Своя́, и҆ на преподóбныя Своя́, и҆ на обращáющыя сердцá к Немý. Обáче близ боя́щихся Егó спасéнiе Егó, всели́ти слáву в зéмлю нáшу. Ми́лость и҆ и҆́стина сретóстеся, прáвда и҆ мир облобызáстася. И҆́стина от земли возсiя́, и҆ прáвда с Небесé прини́че, и҆́бо Госпóдь даст блáгость, и҆ земля́ нáша даст плод свой. Прáвда пред Ним предъи́дет, и҆ положи́т в путь стопы своя́.
Чтец: Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (3 раза)
Гóсподи, помилуй. (12 раз)
Хор (по кафисме седáльны прáздника, глас 4): От ко́рене Иессе́ева и от чресл Дави́довых/ Богоотрокови́ца Мариа́м ражда́ется днесь нам;/ ра́достию бо ра́дуются вся́ческая и обновля́ются./ Сра́дуйтеся ку́пно, Не́бо и земля́,/ восхвали́те Ю, оте́чествия язы́к! Иоаки́м весели́тся, и А́нна торжеству́ет, зову́щи:// непло́ды ражда́ет Богоро́дицу и Пита́тальницу Жи́зни на́шея.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
От ко́рене Иессе́ева и от чресл Дави́довых/ Богоотрокови́ца Мариа́м ражда́ется днесь нам;/ ра́достию бо ра́дуются вся́ческая и обновля́ются./ Сра́дуйтеся ку́пно, Не́бо и земля́,/ восхвали́те Ю, оте́чествия язы́к! Иоаки́м весели́тся, и А́нна торжеству́ет, зову́щи:// непло́ды ражда́ет Богоро́дицу и Пита́тальницу Жи́зни на́шея.
ПОЛИЕЛЕЙ
Хор: Хвали́те И҆́мя Госпóдне, хвали́те, раби́ Гóспода.
Аллилýiа (трúжды)
Благословéн Госпóдь от Сióна, живы́й во Iерусали́ме.
Аллилýiа (трúжды)
Исповéдайтеся Гóсподеви, я́ко Благ, я́ко в век ми́лость Егó.
Аллилýiа (трúжды)
Исповéдайтеся Бóгу Небéсному, я́ко в век ми́лость Егó.
Аллилýiа (трúжды)
ВЕЛИЧАНИЕ ПРАЗДНИКА
Величáем Тя,/ Пресвятáя Дéво,/ и чтим святы́х Твоúх родúтелей,// и всеслáвное слáвим рождествó Твоé.
(И далее хор продолжает чередовать стихи Избранного псалма и Величание)
ПСАЛОМ ИЗБРАННЫЙ
Помяни́, Го́споди, Дави́да и всю кро́тость его./ Я́ко кля́тся Го́сподеви, обеща́ся Бо́гу Иа́ковлю./ Се, слы́шахом я во Евфра́фе, обрето́хом я в поля́х дубра́вы./ Пресла́вная глаго́лашася о тебе́, гра́де Бо́жий./ Бог посреде́ его́, и не подви́жится./ Кля́тся Госпо́дь Дави́ду и́стиною, и не отве́ржется ея./ От плода́ чре́ва твоего́ посажду́ на престо́ле твое́м./ Я́ко избра́ Госпо́дь Сио́на, изво́ли его́ в жили́ще себе́./ Освяти́л есть селе́ние Свое́ Вы́шний./ Святы́ня и велеле́пота во святи́ле его́./ Свят храм твой, ди́вен в пра́вде./ До́му Твоему́ подоба́ет святы́ня, Го́споди, в долготу́ дней./ Помяну́ и́мя Твое́ во вся́ком ро́де и ро́де.// Благослове́н Госпо́дь во век, и в век ве́ка.
Чтец: Слáва Отцý и Сыну и Святóму Дýху.
Хор: И ны́не и прúсно и во вéки векóв. Амúнь.
Аллилýiа, аллилýiа, аллилýiа, слáва Тебé Бóже. (Трúжды)
Хор: Величáем Тя,/ Пресвятáя Дéво,/ и чтим святы́х Твоúх родúтелей,// и всеслáвное слáвим рождествó Твоé.
Гóсподи, поми́луй. (12 раз)
Седáльны прáздника по полiелéе, глас 8: Да ра́дуется Не́бо, и земля́ да весели́тся:/ Бо́жие бо не́бо на земли́ роди́ся, Богоневе́стная Сия́, от обетова́ния./ Непло́ды Младе́нца дои́т Мари́ю, и ра́дуется о рождестве́ Иоаки́м:/ жезл, глаго́ля, роди́ся мне,/ из него́же Цвет Христо́с прозябе́,/ из ко́рене Дави́дова.// Вои́стину чу́до пресла́вно!
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Обнови́ся, Ада́ме, ра́дуйся, Е́во, весели́ся, Дави́де, благоду́шствуй А́нно,/ и́бо Ма́ти Зижди́теля твоего́ ражда́ется пресла́вно;/ лику́ет, обно́вльшися, вся земля́/ и ра́дуется, оде́яна во оде́жду;/ всяк язы́к, лику́я, да вопие́т Мари́и:// блаже́н дом Дави́дов, я́ко пита́ет Пита́тельницу Жи́зни на́шея.
СТЕПЕННА, ГЛАС 4
1 АНТИФОН
Хор: От ю́ности моея́/ мнóзи бóрют мя стрáсти,/ но Сам мя заступú// и спасú, Спáсе мой. (Двáжды)
Ненави́дящiи Сióна,/ посрами́теся от Гóспода,/ я́ко травá бо огнéм// бýдете изсóхше. (Двáжды)
Слáва Ѻтцý и Сы́ну и Святóму Дýху.
Святы́м Дýхом/ вся́ка душá живи́тся,/ и чистотóю возвышáется,// светлéется Трóйческим еди́нством, священнотáйне.
И҆ ны́не и прúсно и во вéки векóв. Амúнь.
Святы́м Дýхом/ вся́ка душá живи́тся,/ и чистотóю возвышáется,// светлéется Трóйческим еди́нством, священнотáйне.
ПРОКИМЕН
Чтец: Прокíмен, глас четвéртый. Помянý и҆́мя Твоé во вся́ком рóде и рóде.
Хор: Помянý и҆́мя Твоé/ во вся́ком рóде и рóде.(Пс.44:18А)
Чтец: Отры́гну сéрдце мое слóво блáго, глагóлю аз делá моя Царéви. (Пс.44:2А)
Хор: Помянý и҆́мя Твоé/ во вся́ком рóде и рóде.
Чтец: Помянý и҆́мя Твоé.
Хор: Во вся́ком рóде и рóде.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Луки́ Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Лк.зач.4): Во дни óны, востáвши, Марiáм, и҆́де в гóрняя со тщáнiем, во град Iýдов. И вни́де в дом Захáрiин, и целовá Елисавéт. И бысть я́ко услы́ша Елисавéт целовáнiе Марíино, взыгрáся младéнец во чрéве ея́: и испóлнися Дýха Свя́та Елисавéт. И возопи́ глáсом вéлiим, и речé: благословéна Ты в женáх, и благословéн плод чрéва Твоегó. И откýду мне сié, да прiи́де Мáти Гóспода моегó ко мне? Се бо, я́ко бысть глас целовáнiя Твоегó во ýшiю моéю, взыгрáся младéнец рáдощами во чрéве моéм. И блажéнна Вéровавшая, яко бýдет совершéнiе глагóланным Ей от Гóспода. И речé Марiáм: вели́чит душá Моя́ Гóспода, и возрáдовася дух Мой о Бóзе Спáсе Моéм. Я́ко призрé на смирéнiе Рабы́ Своея́: се бо, отны́не ублажáт Мя вси рóди. Я́ко сотвори́ Мне вели́чiе Си́льный, и свя́то и҆́мя Егó. Пребы́сть же Марiáмь с нею я́ко три мéсяцы, и возврати́ся в дом Свой.
[Русский синодальный перевод]Встав же Мария во дни сии, с поспешностью пошла в нагорную страну, в город Иудин, и вошла в дом Захарии, и приветствовала Елисавету. Когда Елисавета услышала приветствие Марии, взыграл младенец во чреве ее; и Елисавета исполнилась Святого Духа, и воскликнула громким голосом, и сказала: благословенна Ты между женами, и благословен плод чрева Твоего! И откуда это мне, что пришла Матерь Господа моего ко мне? Ибо когда голос приветствия Твоего дошел до слуха моего, взыграл младенец радостно во чреве моем. И блаженна Уверовавшая, потому что совершится сказанное Ей от Господа. И сказала Мария: величит душа Моя Господа, и возрадовался дух Мой о Боге, Спасителе Моем, что призрел Он на смирение Рабы Своей, ибо отныне будут ублажать Меня все роды; что сотворил Мне величие Сильный, и свято имя Его; Пребыла же Мария с нею около трех месяцев, и возвратилась в дом Свой.(1:39-49,56)
Хор: Слáва Тебé, Гóсподи, слáва Тебé.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И҆ ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра прáздника, глас 6: Сей день Госпо́день,/ ра́дуйтеся, лю́дие:/ се бо Све́та черто́г/ и кни́га Сло́ва Живо́тнаго/ из утро́бы произы́де,/ и Я́же к восто́ком дверь, ро́ждшися,/ ожида́ет вхо́да Святи́теля вели́каго,/ eди́на и Eди́наго вводя́щи Христа́ во вселе́нную,// во спасе́ние душ на́ших.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
ПЕРВЫЙ КАНОН ПРАЗДНИКА, ГЛАС 2
(совмещенный со вторым каноном праздника, глас 8)
ПЕСНЬ 1
Iрмóс: Гряди́те, лю́дiе,/ пои́м песнь Хрiсту́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,// я́ко просла́вися. (Двáжды)
Припéв: Пресвятáя Богорóдице, спасú нас.
Тропáрь: Гряди́те, вéрнiи, Дýхом Божéственным рáдующеся,/ Ю́же от неплóдове днесь пришéдшую человéков на спасéнiе// Приснодéву Отрокови́цу пéсньми почти́м. (Двáжды)
Припéв: Пресвятáя Богорóдице, спасú нас.
Тропáрь: Рáдуйся, Чи́стая, Мáти и Рабó Хрiстá Бóга,/ Я́же пéрвому Ходáтаица блажéнству,// человéческiй род, Тя вси достóйно пéсньми слáвим.(Двáжды)
Припéв: Пресвятáя Богорóдице, спасú нас.
Тропáрь: Жи́зни раждáется днесь мост,/ и҆́мже человéцы, воззвáнiе падéнiя, еже от áда, обрéтшiи,// Хрiстá Живнодáвца пéсньми прославля́ют. (Двáжды)
Второй канон праздника, глас 8
Iрмóс: Сокруши́вшему бра́ни мы́шцею Свое́ю/ и прове́дшему Изра́иля сквозе́ Чермно́е мо́ре/ пои́м Ему́, я́ко Изба́вителю на́шему Бо́гу,// я́ко просла́вися. (Двáжды)
Припéв: Пресвятáя Богорóдице, спасú нас.
Тропáрь: Да ликовствýет вся тварь, да весели́тся же и Давíд,/ я́ко от колéна и от сéмене егó произы́де жезл,// Цвет нося́щи, Гóспода, Творцá вся́ческих.
Припéв: Пресвятáя Богорóдице, спасú нас.
Тропáрь: Святáя Святы́х, во святéм святи́лищи Младéнец возлагáется/ воспитáтися от руки́ Áнгеловы.// Вси ýбо вéрно спрáзднуим в рождествé Ея́.
Припéв: Пресвятáя Богорóдице, спасú нас.
Тропáрь: Непло́ды неражда́ющая А́нна, но не безча́дна Бо́гу:/ се бо пронарече́ся от родо́в Чи́стая Де́ва Ма́ти.// Те́мже естества́ израсти́ Зижди́теля в ра́бии о́бразе.
Припéв: Пресвятáя Богорóдице, спасú нас.
Тропáрь: Тя, незло́бивую А́гницу,/ А́гнца Христа́ Младе́нца от чре́ва Твоего́ приве́дшую в на́ше существо́,// вси от А́нны рожде́нную Тя пе́сньми почита́ем.
Слáва Ѻтцý и Сы́ну и Святóму Дýху.
Трóичен: Три Безначáльна слáвлю,/ Три Свя́та пою́,/ Три Соприсносýщна в Существé Еди́ном проповéдую:// Еди́н бо во Отцé, и Сы́не, и Дýсе славослóвится Бог.
И҆ ны́не и прúсно и во вéки векóв. Амúнь.
Богорóдичен: Кто ви́де Отрочá, Егóже не всéя Отéц, млекóм питáемое? Или́ где ви́дена бысть Дéва Мáти?// И҆́стинно пáче умá обоя́, Богороди́тельнице Чи́стая.
Катавáсiя (глас 8): Крест начертáв, Моисéй/ впря́мо жезлóм Чермнóе пресечé,/ Iзрáилю пешеходя́щу;/ тóже обрáтно фараóновым колесни́цам, удáрив, совокупи́,/ вопреки́ написáв непобеди́мое орýжiе.// Тем Хрiстý пои́м, Бóгу нáшему, я́ко прослáвися.
ПЕСНЬ 3
Iрмóс: Утверди́ нас в Тебé, Гóсподи,/ Дрéвом умерщвлéй грех,/ и страх Твой всади́// в сердцá нас, пою́щих Тя. (Двáжды)
Припéв: Пресвятáя Богорóдице, спасú нас.
Тропáрь: Непорóчно Бóгу пожи́вшiи,/ всех роди́сте Спасéнiе,/ богомýдрiи роди́теле// Зижди́теля Рóждшiя и Бóга нáшего. (Двáжды)
Припéв: Пресвятáя Богорóдице, спасú нас.
Тропáрь: Всем жизнь источáяй Госпóдь/ от неплóдове произведé Дéву,/ в Ню́же всели́тися извóли,// и по Рождествé сохрани́в нетлéнну. (Двáжды)
Припéв: Пресвятáя Богорóдице, спасú нас.
Тропáрь: Áннин плод, Марíю, днесь,/ Грозд рóждшую живонóсный,/ я́ко Богорóдицу воспои́м,// Предстáтельницу же всех, и Помóщницу. (Двáжды)
Глас 8
Iрмóс: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,// возвесели́хся о спасе́нии Твое́м. (Двáжды)
Припéв: Пресвятáя Богорóдице, спасú нас.
Тропáрь: Воспитáвшися во Святáя Святы́х,/ Дéво Пречи́стая Богорóдице,/ вы́шши яви́лася еси́ твáри,// Зижди́теля плóтiю порóждши.
Припéв: Пресвятáя Богорóдице, спасú нас.
Тропáрь: Благословéнно чрéво твоé, целомýдренная Áнно,/ плод бо израсти́ла еси́ дéвства,/ Ю́же безсéменно Питáтеля твáри рóждшую// и Избáвителя Iисýса.
Припéв: Пресвятáя Богорóдице, спасú нас.
Тропáрь: Тя блажи́т, Присноде́во, вся тварь,/ от А́нны днесь ро́ждшуюся,/ от ко́рене Иессе́ева жезл,// пречи́ст цвет, Христа́, израсти́вшую.
Припéв: Пресвятáя Богорóдице, спасú нас.
Тропáрь: Тя вы́шшую всея́ тва́ри, Богоро́дице,/ показу́я, Чи́стая, Сын Твой,/ е́же от А́нны вели́чит Твое́ рождество́// и всех весели́т днесь.
Слáва Ѻтцý и Сы́ну и Святóму Дýху.
Трóичен: Тебé покланя́емся, Ѻ́тче, Безначáльне Существóм,/ поéм Безлéтнаго Сына Твоегó/ и чтем Соприсносýщнаго Дýха Твоегó,// я́ко Еди́наго Трóе естествóм Бóга.
И҆ ны́не и прúсно и во вéки векóв. Амúнь.
Богорóдичен: Светодáвца и Начáльника жи́зни человéческiя рóждшая, Чи́стая Богорóдице,/ яви́лася еси́ сокрóвище жи́зни нáшея// и дверь непристýпнаго Свéта.
Катавáсiя (глас 8): Жезл во óбраз тáйны прiéмлется,/ прозябéнiем бо предразсуждáет свящéнника;/ неплодя́щей же прéжде Цéркви/ ны́не процветé Дрéво Крестá// в держáву и утверждéнiе.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Седáлен прáздника, глас 4: Дéва Марíя и Богорóдица и҆́стинно,/ я́ко óблак свéта, днесь возсiя́ нам/ и от прáведных предгрядéт в слáву нáшу./ Не ктомý Адáм осуждáется,/ и Éва от уз свободи́ся,/ и сегó рáди зовéм, вопiю́ще со дерзновéнiем еди́ней Чи́стей:// рáдость возвещáет рождествó Твоé всей вселéнней.
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Дéва Марíя и Богорóдица и҆́стинно,/ я́ко óблак свéта, днесь возсiя́ нам/ и от прáведных предгрядéт в слáву нáшу./ Не ктомý Адáм осуждáется,/ и Éва от уз свободи́ся,/ и сегó рáди зовéм, вопiю́ще со дерзновéнiем еди́ней Чи́стей:// рáдость возвещáет рождествó Твоé всей вселéнней.
ПЕСНЬ 4
Iрмóс: Услы́шах, Го́споди,/ слух Твоего́ смотре́ния/ и просла́вих Тя,// Еди́не Человеколю́бче. (Двáжды)
Припéв: Пресвятáя Богорóдице, спасú нас.
Тропáрь: Воспевáем Тя, Гóсподи,/ вéрным спаси́тельное пристáнище подáвшаго всем,// Тебé Рóждшую. (Двáжды)
Припéв: Пресвятáя Богорóдице, спасú нас.
Тропáрь: Тя, Богоневéсто,/ похвалý всем Хрiстóс яви́ и держáву// пою́щим вéрно Твоé тáинство. (Двáжды)
Припéв: Пресвятáя Богорóдице, спасú нас.
Тропáрь: Неискусобрáчная Влады́чице,/ Твои́ми моли́твами избавля́еми прегрешéнiй,// благоразýмно вси Тя ублажáем. (Двáжды)
Глас 8
Iрмóс: Проро́к Авваку́м у́мныма очи́ма/ прови́де, Го́споди, прише́ствие Твое́,/ тем и вопия́ше: от ю́га прии́дет Бог./ Сла́ва си́ле Твое́й,// сла́ва снизхожде́нию Твоему́. (Двáжды)
Припéв: Пресвятáя Богорóдице, спасú нас.
Тропáрь: Патрiáрх Iáков, прови́дев, Спáсе, вели́чiя я́сно строéнiя Твоегó,/ вопiя́ше Дýхом, ко Iýде глагóля тáйно:/ от лéторасли возшéл еси́, Сы́не мой,// возвещáя Тя от Дéвы Бóга.
Припéв: Пресвятáя Богорóдице, спасú нас.
Тропáрь: Ны́не жезл Аарóнов, от кóрене Давíдова прозя́бшiй,/ ны́не Дéва Чи́стая происхóдит,/ и сликовствýет Нéбо и земля́, и вся отéчествiя язы́ков,// и Áнна и Iоакíм тáинственно.
Припéв: Пресвятáя Богорóдице, спасú нас.
Тропáрь: Ны́не да весели́тся Не́бо, да ра́дуется же земля́, и да лику́ет Иоаки́м и Дави́д:/ ов у́бо я́ко роди́тель Твой, и́стинно ро́ждшия Бо́га,/ ов же я́ко пра́отец Твой,// пропове́дая Твоя́ вели́чествия, Чи́стая.
Припéв: Пресвятáя Богорóдице, спасú нас.
Тропáрь: Сра́дуется Тебе́ днесь, богому́дренная А́нно, вселе́нная:/ Изба́вителя бо тоя́ Ма́терь процвела́ еси́,/ Ю́же от ко́рене прозя́бшую Дави́дова,// жезл си́лы, нам нося́щую Цвет, Христа́.
Слáва Ѻтцý и Сы́ну и Святóму Дýху.
Трóичен: Слáвлю Безначáльна Бóга, Ѻтцá и Сы́на и Святáго Дýха,/ Единосýщную Трóицу Несоздáнную,/ Éйже предстоя́т Серафíми благоговéйно, зовýще:// Свят, Свят, Свят еси́, Бóже.
И҆ ны́не и прúсно и во вéки векóв. Амúнь.
Богорóдичен: Пребезначáльное Начáло начáло прiéмлет из Тебé, Богороди́тельнице, плотски́м врéменем/ и пребывáет собезначáльно и воплóщься Слóво Ѻ́тчее и Дýху соприсносýщное,// сохраня́я Божéственное достóинство.
Катавáсiя (глас 8): Услы́шах, Гóсподи,/ смотрéнiя Твоегó тáинство,/ разумéх делá Твоя́// и прослáвих Твоé Божествó.
ПЕСНЬ 5
Iрмóс: Сеннопи́санный мрак гада́ний разори́в/ и ве́рных прибы́тием и́стины,/ Богоотрокови́цею, озари́в сердца́,// и нас све́том Твои́м, Христе́, наста́ви. (Двáжды)
Припéв: Пресвятáя Богорóдице, спасú нас.
Тропáрь: Воспои́м, лю́дiе, всех винý/ сýщаго по нам бы́ти Винóвнаго:/ Ея́же óбразу рáдовахуся сподобля́еми прорóцы,// явлéнное спасéнiе от Тоя́ плодя́ще. (трúжды)
Припéв: Пресвятáя Богорóдице, спасú нас.
Тропáрь: От сýха прозябéнiе жезлá iерéева/ Iзрáилю показá проразсуждéнiе,/ и ны́не свéтлость прозя́бших преслáвно свéтит,// от неплóдове всеслáвное рождéнiе. (трúжды)
Глас 8
Iрмóс: Го́споди Бо́же наш/ мир даждь нам,/ Го́споди Бо́же наш, стяжи́ ны,/ Го́споди, ра́зве Тебе́ ино́го не ве́мы,// И́мя Твое́ имену́ем. (Двáжды)
Припéв: Пресвятáя Богорóдице, спасú нас.
Тропáрь: Пречи́стое Твоé рождествó, Дéва Непорóчная, несказáнное,/ и зачáтiе неизглагóланно, и рождéнiе Твоé,/ Невéсто неневéстная,// Бог бо бе, весь в мя облекíйся.
Припéв: Пресвятáя Богорóдице, спасú нас.
Тропáрь: Днесь да веселя́тся áнгельстiи чи́ни,/ пéсньми да ликýют сýщiи из Адáма:/ роди́ся бо жезл, Цвет возрасти́вшiй, Хрiста,// Еди́наго Избáвителя нáшего.
Припéв: Пресвятáя Богорóдице, спасú нас.
Тропáрь: Днесь Е́ва разреша́ется осужде́ния,/ разреша́ется же и непло́дство,/ и Ада́м дре́вния кля́твы о рождестве́ Твое́м,// Тобо́ю бо от тли изба́вихомся.
Припéв: Пресвятáя Богорóдице, спасú нас.
Тропáрь: Сла́ва Тебе́, Просла́вльшему непло́дную днесь:/ роди́ бо жезл присноцвету́щий от обеща́ния,/ от него́же прозябе́ Христо́с,// Цвет жи́зни на́шея.
Слáва Ѻтцý и Сы́ну и Святóму Дýху.
Трóичен: Слáва Тебé, Ѻ́тче Святы́й, Бóже Нерождéнне;/ слáва Тебé, Сы́не Безлéтне, Единорóдне;/ слáва Тебé, Дýше Божéственный и Сопрестóльный,// от Ѻтцá происходя́й и в Сы́не пребывáяй.
И҆ ны́не и прúсно и во вéки векóв. Амúнь.
Богорóдичен: Бысть чрéво Твоé Сóлнца носи́ло,/ пребы́сть чистотá Твоя́, я́коже прéжде, невреди́ма, Дéво,/ Хрiстóс бо Сóлнце,// я́ко от чертóга жени́х, яви́ся из Тебé.
Катавáсiя (глас 8): О треблажéнное Дрéво,/ на нéмже распя́ся Хрiстóс, Царь и Госпóдь!/ И҆́мже падé дрéвом прельсти́вый,/ тобóю прельсти́вся,/ Бóгу пригвозди́вшуся плóтiю,// подаю́щему мир душáм нáшим.
ПЕСНЬ 6
Iрмóс: Ко Го́споду от ки́та Ио́на возопи́:/ Ты мя возведи́ из глубины́ а́да, молю́ся,/ да я́ко Изба́вителю, во гла́се хвале́ния,// и́стины же ду́хом пожру́ Тебе́. (Двáжды)
Припéв: Пресвятáя Богорóдице, спасú нас.
Тропáрь: Ко Гóсподу в скóрби неплóдства возопи́ша/ Богомáтере богомýдрiи роди́тели/ и Сiю́ в рóды родóв роди́ша,// на óбщее спасéнiе и похвалý. (трúжды)
Припéв: Пресвятáя Богорóдице, спасú нас.
Тропáрь: Прiя́ша Небéсный дар от Бóга достóин/ Богомáтере богомýдрiи роди́тели,/ самéх Херувíмов превы́шшее носи́ло,// Слóва и Зижди́теля Роди́тельницу. (трúжды)
Глас 8
Iрмóс: Яко во́ды морски́я, Человеколю́бче,/ волна́ми жите́йскими обурева́юся,/ те́мже, я́ко Ио́на, та́ко вопию́ Ти:/ возведи́ от тли живо́т мой,// Благоутро́бне Го́споди. (Двáжды)
Припéв: Пресвятáя Богорóдице, спасú нас.
Тропáрь: Святýю Святы́х сýщу,/ целомýдреннiи роди́тели Твои́, Чи́стая,/ возложи́ша Тя в хрáме Госпóдни воспитáтися чéстно// и уготóватися в Мáтерь Емý.
Припéв: Пресвятáя Богорóдице, спасú нас.
Тропáрь: Неплóды и мáтери, ликýйте,/ дерзáйте и игрáйте, безчáдныя:/ безчáдна бо неплóды Богорóдицу прозябáет,// Я́же избáвит от болéзней Éву и кля́твы Адáма.
Припéв: Пресвятáя Богорóдице, спасú нас.
Тропáрь: Слы́шу Дави́да, пою́ща Тебе́:/ приведу́тся де́вы во след Тебе́,/ приведу́тся в храм Царе́в.// И с ним Тя и аз, Дщерь Царе́ву, воспева́ю.
Припéв: Пресвятáя Богорóдице, спасú нас.
Тропáрь: Пое́м свято́е Твое́ рождество́,/ чтим и непоро́чное зача́тие Твое́,/ Неве́сто Богозва́нная и Де́во;// сла́вят же с на́ми А́нгелов чи́ни и святы́х ду́ши.
Слáва Ѻтцý и Сы́ну и Святóму Дýху.
Трóичен:В Тебé Трóическое тáинство поéтся и слáвится, Чи́стая:/ Отéц бо благоволи́,/ и Слóво всели́ся в Тя,// и Божéственный Дух Тебé осени́.
И҆ ны́не и прúсно и во вéки векóв. Амúнь.
Богорóдичен: Златáя кади́льница былá еси́,/ Огнь бо во утрóбе Твоéй всели́ся, Слóво от Дýха Свя́та,/ и человéческим зрáком в Тебé ви́деся,// Богороди́тельнице Чи́стая.
Катавáсiя (глас 8): Вóднаго звéря во утрóбе/ длáни Ióна крестови́дно распростéр,/ спаси́тельную Страсть проображáше я́ве./ Тем, триднéвен изшéд,/ премíрное Воскресéнiе прописáше/ Плóтiю пригвождéннаго Хрiстá Бóга// и триднéвным Воскресéнiем мiр просвéщшаго.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк прáздника, глас 4: Iоакíм и Áнна поношéнiя безчáдства/ и Адáм и Éва от тли смéртныя свободи́стася, Пречи́стая,/ во святéм рождествé Твоéм./ То прáзднуют и лю́дiе Твои́,/ вины́ прегрешéнiй избáвльшеся,/ внегдá звáти Ти:// неплóды раждáет Богорóдицу и Питáтельницу Жи́зни нáшея.
И҆́кос: Моли́тва кýпно и воздыхáнiе неплóдства и безчáдства Iоакíма же и Áнны благопрiя́тное/ и во ýши Госпóдни вни́де, и прозябé плод живонóсен мíру./ Ов бо моли́тву на горé творя́ше, óва же в садé поношéнiе ношáше,// но с рáдостiю неплóды раждáет Богорóдицу и Питáтельницу Жи́зни нáшея.
ПЕСНЬ 7
Iрмóс: Купина́ в горе́ огненеопа́льная и росоно́сная пещь халде́йская/ я́ве предписа́ Тя, Богоневе́сто,/ Боже́ственный бо невеще́ственный в веще́ственнем чре́ве Огнь неопа́льно прия́ла еси́./ Те́мже из Тебе́ Ро́ждшемуся пое́м:// благослове́н еси́, Бо́же оте́ц на́ших. (Двáжды)
Припéв: Пресвятáя Богорóдице, спасú нас.
Тропáрь: Твоé в вещéственных явлéнiих/ законополóжник возбрани́ся разумéти/ и вели́кое, Пречи́стая, тáинство,/ не мýдрствовати земнорéвностная обрáзно наказýемь иногдá./ Тéмже, уди́влься чудеси́, глагóлаше:// благословéн Бог отéц нáших. (трúжды)
Припéв: Пресвятáя Богорóдице, спасú нас.
Тропáрь: Гóру и дверь Небéсную и мы́сленную Тя лéствицу/ боголéпно лик божéственный пронаречé,/ от Тебé бо Кáмень отсечéся не рукáми мýжескими,// и дверь, Éюже прóйде Госпóдь, И҆́же чудéс Бог отéц нáших. (трúжды)
Глас 8
Iрмóс: Халде́йская пещь, огне́м распала́емая,/ ороша́шеся Ду́хом,/ Бо́жиим предстоя́нием,/ о́троцы поя́ху:// благослове́н еси́, Бо́же оте́ц на́ших. (Двáжды)
Тропáрь: Прáзднуем, Чи́стая,/ и вéрно покланя́емся святóму Твоемý Рождествý,/ пою́ще Сы́на Твоегó,// И҆́мже избáвихомся дрéвняго Адáмова ны́не осуждéнiя.
Припéв: Пресвятáя Богорóдице, спасú нас.
Тропáрь: Ны́не Áнна весели́тся и вопiéт, хвáлящися:/ неплóды сýщи, роди́х Бóжiю Мáтерь,/ Ея́же рáди осуждéнiе Éвино разреши́ся// и я́же в печáлех болéзнь.
Припéв: Пресвятáя Богорóдице, спасú нас.
Тропáрь: Ада́м свободи́ся, и Е́ва лику́ет,/ и вопию́т ду́хом к Тебе́, Богоро́дице:/ Тобо́ю изба́вихомся перворо́дныя кля́твы,// я́вльшуся Христу́.
Припéв: Пресвятáя Богорóдице, спасú нас.
Тропáрь: О чре́во, вмести́вшее Бо́жие селе́ние!/ О утро́бо, носи́вшая Небе́с ши́ршую, престо́л святы́й,// мы́сленный киво́т свяще́ния!
Слáва Ѻтцý и Сы́ну и Святóму Дýху.
Трóичен: Отцá прослáвим, Сы́на и Дýха,/ во Еди́нстве Божествá,/ Трóицу Пресвятýю, Нераздéльную, Несоздáнную,// и Соприсносýщную, и Единосýщную.
И҆ ны́не и прúсно и во вéки векóв. Амúнь.
Богорóдичен: Ты Бóга еди́на родилá еси́, Дéво, преслáвно,/ Ты естествó обнови́ла еси́ Рождествóм Твои́м, Мари́е,/ Ты Éву разреши́ла еси́ перворóдныя кля́твы,// Богороди́тельнице Чи́стая.
Катавáсiя (глас 8): Безýмное велéнiе мучи́теля злочести́ваго лю́ди поколебá,/ ды́шущее прещéнiе и злохулéнiе богомéрзкое,/ обáче три óтроки не устраши́ я́рость звéрская,/ ни огнь снедáяй,/ но противоды́шущу росонóсному Дýху,/ со огнéм сýще, поя́ху:// препéтый отцéв и нас Бóже, благословéн еси́.
ПЕСНЬ 8
Iрмóс: В пещи́ о́трочестей прообрази́л еси́ иногда́ Твою́ Ма́терь, Го́споди,/ о́браз же Сия́ из огня́ изыма́ше неопа́льно входя́щия,/ Ю́же пое́м, я́вльшуюся Тобо́ю конце́м днесь,// и превозно́сим во вся ве́ки. (Двáжды)
Припéв: Пресвятáя Богорóдице, спасú нас.
Тропáрь: Я́же к Бóгу нáшего примирéнiя предопределéнная ски́нiя/ éже бы́ти ны́не начинáет,/ имýщи роди́ти Слóва, нам дебельствóм Плóти я́вльшася,/ Егóже поéм, из не сýщих во éже бы́ти Тем прiéмшiи,// и превознóсим во вся вéки. (трúжды)
Припéв: Пресвятáя Богорóдице, спасú нас.
Тропáрь: Неплóдства преложéнiе мирскóе благи́х разреши́ неплóдство/ и я́сно чýдо Хрiстá показá, к земны́м пришéдша,/ Егóже поéм, из не сýщих во éже бы́ти Тем прiéмшiи,// и превознóсим во вся вéки. (трúжды)
Глас 8
Iрмóс: Покрыва́яй вода́ми превы́спренняя Своя́,/ полага́яй мо́рю преде́л песо́к и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,// я́ко Соде́телю всех во ве́ки. (Двáжды)
Припéв: Пресвятáя Богорóдице, спасú нас.
Тропáрь: Сотвори́вый пресла́вная непло́дней утро́бе,/ отве́рзый А́нны неражда́ющая ложесна́ и плод ей дав,/ Ты, Бо́же Святы́й, Ты, Сы́не Де́вы,/ Ты от Сея́ Плоть прия́л еси́,// присноцвету́щия Де́вы и Богоро́дицы.
Припéв: Пресвятáя Богорóдице, спасú нас.
Тропáрь: Затворя́яй бе́здну и отверза́яй ю,/ вознося́й во́ду во о́блацех и дая́й дождь,/ Ты, да́вый, Го́споди, от непло́днаго ко́рене/ прозя́бнути А́нны святы́я пречи́ст плод// и роди́ти Богоро́дицу.
Припéв: Пресвятáя Богорóдице, спасú нас.
Тропáрь: Де́лателю мы́слей на́ших/ и Насади́телю душ на́ших,/ Ты, непло́дную зе́млю благопло́дну показа́вый,/ Ты дре́вле суху́ю родови́ту, благокла́сну, бразду́ плодоно́сну соде́лал еси́ А́нну святу́ю,// пречи́ст плод израсти́ти, Богоро́дицу.
Припéв: Пресвятáя Богорóдице, спасú нас.
Тропáрь: Прииди́те, вси у́зрим,/ яко от черто́га ма́ла, Бо́жий град, ны́не ражда́емый,/ и́же от две́ри утро́бныя исхо́д иму́щую,/ вход же не ве́дущу обще́ния:// Еди́н Бог Зижди́тель Се́ю про́йде стезе́ю стра́нною.
Благословúм Отцá, и Сы́на, и Святáго Дýха, Гóспода.
Трóичен: О Тро́ице Пресу́щная, Еди́нице Собезнача́льная!/ Тя пое́т и трепе́щет мно́жество А́нгел,/ Не́бо и земля́ и бе́здны ужаса́ются,/ челове́цы благословя́т, огнь рабо́тает,// вся послу́шают Тебе́, Тро́ице Свята́я, со стра́хом, я́же в тва́ри.
И҆ ны́не и прúсно и во вéки векóв. Амúнь.
Богорóдичен: О нове́йшаго слы́шания: Бог Сын Жены́!/ О безсе́меннаго Рождества́! Безму́жныя Ма́ти и рожде́нное Бог!/ О ужа́снаго виде́ния! О зача́тия стра́ннаго Де́вы! О несказа́ннаго Рождества́!// И́стинно па́че ума́ вся и виде́ния.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 8): Благослови́те, óтроцы,/ Трóицы равночи́сленнiи,/ Содéтеля Отцá Бóга,/ пóйте снизшéдшее Слóво,/ и огнь в рóсу претвóршее,/ и превозноси́те всем жизнь подавáющаго// Дýха Всесвятáго во вéки.
Возглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Я́же пре́жде Со́лнца Свети́льника Бо́га возсия́вшаго,/ пло́тски к нам прише́дшаго,/ из боку́ Деви́чу неизрече́нно воплоти́вшая,/ Благослове́нная Всечи́стая,// Тя, Богоро́дице, велича́ем. (Двáжды)
Припéв: Величáй, душé моя́,/ преслáвное рождествó Бóжiя Мáтере.
Тропáрь: И́же непокори́вым лю́дем из ка́мене источи́в во́ду,/ благопокори́вым же язы́ком да́рует от чресл непло́дных плод на весе́лие нам,/ Тя, Богома́ти Пречи́стая,// Ю́же досто́йно велича́ем. (трúжды)
Припéв: Величáй, душé моя́,/ преслáвное рождествó Бóжiя Мáтере.
Тропáрь: Напра́снаго дре́вняго Отъя́тельницу осужде́ния и прама́тере исправле́ние,/ Ю́же ро́да к Бо́гу вину́ присвое́ния, к Зижди́телю мост,// Тя, Богоро́дице, велича́ем. (трúжды)
Глас 8
Продолжение здесь