Сівер
Сонечны сакавіцкі дзень і сухі, пранізьлівы, аж да касьцей, паўночны вецер - сівер. Выйшаў з дому і напоўніцу адчуў марозны подых Поўначы. Адразу прыгадаў аповяды бацькі пра тое, як дзед Мацьвей менавіта ў такія дні сівярыў кумпяк. Мяса вешалі на паддашку на некалькі дзён і сівер вяліў яго найлепшым чынам. Кажуць знаўцы, што тое мяса немагчыма параўнаць з цяперашнімі крамнымі прысмакамі - настолькі смачнае было.
Калі нарэшце пабудую свой маленькі фальварак, то паспрабую адрадзіць дзядоўскі звычай сівярыць мяса сонечнымі сакавіцкімі днямі, калі дзьме моцны паўночны вецер...