“Криминал ијән һодисон”
tolishpress.org
ВОА ВОЈДӘ ТОЛЫШӘ БАНДОНӘДӘ
Ымруж маштәво саат 7-ку Ликәдә воа војдә. Лики әсосән бандә дијонәдә - Рывару, Рәзго, Чајру, Андурмә ијән Тангәбынәдә воә 3-4 см ғалини воа вејән јолә чәтини сохтејдәни бо ҹәмати.
tolishpress.org
ОЗОБИЖОНӘДӘ РОЈ-ҒӘЗО ҺОДИСӘ
Ликәдә рој-ғәзо һодисә быә. Нәтиҹәдә се кәси хәсорәтыш сә. Ғәзијә апрели 23-дә маштәвони Ланкон-Лик шоссејәдә, ди Озобижони (Гунәшли) әрозијәдә быә. Боку шәһри әһл Елвин Зулфуғарови идорә кардә “Мерседес” маркәјнә автомобил 6 метрә былынди пардо егынијә бә ру.
Ғәзо нәтиҹәдә автомобили сәрнышинон - ди Ҹангәмијони әһлон - 50 сининә Видади Ғафәров, 24 сининә Орхан Һејбәтзодә ијән 53 сининә Гулноз Мәммәдовә мыхтәлифә сәвијәдә хәсорәтышон сә. Әвонышон роснијә бә нохәшхонә.
Де ын факти әлоғодор Лики рәјони Полиси шобәдә тәһғиғот бардејдән. Һәлә ки версијә жыгоје ки, ғәзо сәбәб әв быә ки, ромәвони гардышәдә идорә карде зынәшни автомобил.
tolishpress.org
ОСТОРОӘДӘ ИНТИҺОР
Остороәдә интиһор быә. Рәјони прокурорәти хәбә дојдә ки, ғәзијә быә ди Аләшоәдә. Диј 1998-нә сори моәку быә әһл Хәјалә Тәғизодә тәвиләдә еһаштәше ыштән. Хәјалә мијонә мәктәби шогирдбе.
Де ын факти әлоғодор ҹинојәти ко окардә быә, тәһғиғот шејдә.
tolishpress.org
АКОНӘДӘ РОЈ-ҒӘЗО ҺОДИСӘ
Апрели 25-дә рәјон Масалони ди Аконәдә (Әркиван) Илкин Микајилови идорә кардә “ВАЗ-2107” мәркәјнә автомобили жәше ыштә рој дәвардә һамсијә Сәлим Әшрәфов. Хәсорәт сәкәсышон әлбәһол роснијә бә нохәшхонә, әмма бә рәһмәт шә әјо.
Масалони полиси идорә тәһғиғот бардејдә.
tolishpress.org
МОЈӘВОН ТӘСӘЈ ДЫЈОӘДӘ
Ланконәдә мојәвон тәсә дыјоәдә. Ланкони полиси идорәо хәбә дојдән ки, ғәзијә апрелә манги 25-дә ди Сутәмырдови әрозијәдә быә. Диј сәбәсо - 57 сининә Афәрин Вәлијев дыјоәдә мој гәтеәдә тәсә. А. Вәлијеви мардышон бекардә дыјоо, доәшоне бәчәј авлодон.