Неделя 9 по Пятидесятнице. ВСЕНОЩНОЕ БДЕНИЕ.ЧАС ПЕРВЫЙ Изнесение Честных Древ Креста Господня.Глас 8
14 áвгуста 2022 гóда. Недéля 9 по Пятидеся́тнице. Происхождéнiе (изнесéнiе) Честны́х Древ Животворя́щего Крестá Госпóдня. Семú мýчеников Маккавéев, мáтери их Соломонíи и учúтеля их Елеазáра. Глас 8. (Начáло Успéнского постá, медóвый Спас). Воскрéсная прáздничная слýжба для домáшнего (келéйнаго) совершéнiя.
Окончáние всенóщного бдéния. Начáло здесь ( великая вечéрня), здесь ( ýтреня) здесь ( продолжéние ýтрени с канóном)
ПЕСНЬ 7
Iрмóс: Бóжiя снизхождéнiя/ огнь устыдéся в Вавилóне иногдá./ Сегó рáди óтроцы в пещи́ рáдованною ногóю,/ я́ко во цвéтнице ликýюще поя́ху:// благословéн еси́, Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Слáвное истощáнiе,/ Божéственное богáтство Твоея́ нищеты́, Хрiстé, удивля́ет Áнгелы,/ на Крестé зря́щiя Тя пригвождáема,/ за éже спасти́ вéрою зовýщiя:// благословéн еси́ Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Божéственным Твои́м сошéствiем свéта испóлнил еси́ преиспóдняя,/ и тьма прогнáна бысть прéжде гоня́щая./ Отню́дуже воскресóша и҆́же от вéка ю́зницы, зовýще:// благословéн Бог отéц нáших.
Хор: Пресвятáя Трóице, Бóже наш, слáва Тебé.
Трóичен: Всем ýбо Гóспода,/ Еди́наго же еди́ному Единорóдному Сы́ну правослáвно Отцá,/ богослóвяще Тя возвещáем,/ и Еди́наго вéдяще от Тебé исходя́ща Дýха Прáваго,// Соестéственна и Соприсносýщна.
Глас 8
Хор: Пресвятáя Богорóдице, спасú нас.
Чтец: От Дéвственных ложéсн воплóщься,/ яви́лся еси́ на Спасéнiе нáше./ Тéмже Твою́ Мáтерь вéдяще Богорóдицу, правослáвно зовéм:// отцéв Бóже, благословéн еси́.
Хор: Пресвятáя Богорóдице, спасú нас.
Чтец: Жезл прорасти́ла еси́, Дéво,/ от кóрене Iессéова, Всеблажéнная,/ Плод цветонося́щи спаси́тельный,/ вéрою Сы́ну Твоемý зовýщим:// отцéв Бóже, благословéн еси́.
Глас 6
Хор: Слáва, Гóсподи, Крестý Твоемý Честнóму.
Чтец: Спаси́тельному дрéву поклони́мся, Крестý пресвятóму,/ емýже слýжат Áнгельская вся вóинства,// предлежáщ ви́дяще, вéрнiи, источáющ нам освящéнiе и жизнь.
Хор: Слáва, Гóсподи, Крестý Твоемý Честнóму.
Чтец: Победонóсный яви́ся пресвяты́й Крест Животодáвца Хрiстá,/ свы́ше же бесóм всем мнóжество отгоня́, вáрварское шатáнiе,// и победи́теля явля́я вóинство нáше.
Хор: Слáва, Гóсподи, Крестý Твоемý Честнóму.
Чтец: Я́ко одушевлéнну, тебé, припáдая, взывáю:/ Крéсте мой пресвяты́й, ты ми просвети́ дýшу, и ум, и слух, и устнé,// и язы́к, и дыхáнiе, и óчи к путéм Цáрства Хрiстóва.
Хор: Пресвятáя Богорóдице, спасú нас.
Чтец: Ю́ноши три пещь не опали́, Рождествó прообразýющи Твоé,/ и҆́бо Божéственный огнь Тя не опали́, всели́вся в Тя и вся научи́в пéти:// благословéн Бог отéц нáших.
Глас 8
Припéв: Святíи мýченицы, молúте Бóга о нас.
Тропáрь: Мýченическими пострадáвше болéзньми,/ мучи́тельских не устраши́стеся прещéнiй, Хрiстý вопiю́ще:// благословéн Бог отéц нáших. (Двáжды)
Слáва Ѻтцý и Сы́ну и Святóму Дýху.
Тропáрь: Терпéнiя пождáвше болéзней,/ врáжiя лю́тая победи́сте ковáрства, Хрiстý вопiю́ще:// благословéн Бог отéц нáших.
И҆ ны́не и прúсно и во вéки векóв. Амúнь.
Богорóдичен: И҆́же во утрóбу Дéвыя всели́выйся/ и Тоя́ рáди Адáма обнóвль,// благословéн Бог отéц нáших.
Катавáсiя (глас 8): Безýмное велéнiе мучи́теля злочести́ваго лю́ди поколебá,/ ды́шущее прещéнiе и злохулéнiе богомéрзкое,/ обáче три óтроки не устраши́ я́рость звéрская,/ ни огнь снедáяй,/ но противоды́шущу росонóсному Дýху,/ со огнéм сýще, поя́ху:// препéтый отцéв и нас Бóже, благословéн еси́.
ПЕСНЬ 8
Iрмóс: Седмери́цею пещь/ халдéйскiй мучи́тель Богочести́вым неи́стовно разжжé,/ си́лою же лýчшею спасéны сiя́ ви́дев,/ Творцý и Избáвителю вопiя́ше:/ óтроцы, благослови́те,/ свящéнницы, воспóйте,// лю́дiе, превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Iисýсова Божествá Пребожéственная си́ла,/ в нас боголéпно возсiя́ла есть:/ плóтiю бо вкуш за всех смерть крéстную,/ разруши́ áдову крéпость./ Егóже непрестáнно дéти благослови́те, свящéнницы воспóйте,// лю́дiе превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Распны́йся востá, великовы́йный падé,/ пады́й и сокрушéнный испрáвися,/ тля отвéржена бысть, и нетлéнiе процветé:// Жи́знiю бо мéртвенное пожéрто бысть. Дéти благослови́те, свящéнницы воспóйте, лю́дiе превозноси́те во вся вéки.
Хор: Пресвятáя Богорóдице, спасú нас.
Трóичен: Трисвéтлое Божествó,/ Еди́ну сiя́ющее зарю́ от Еди́наго Трiипостáснаго Естествá, Роди́теля Безначáльна:/ Единоестéственно же Слóво Отцý, и Сцáрствующаго Единосýщнаго Дýха,/ дéти благослови́те, свящéнницы воспóйте,// лю́дiе превозноси́те во вся вéки.
Глас 8
Хор: Пресвятáя Богорóдице, спасú нас.
Чтец: Сопроти́вных разжжéнныя и пламенови́дныя на нас угаси́ стрéлы:// я́ко да поéм Тя во вся вéки.
Хор: Пресвятáя Богорóдице, спасú нас.
Чтец: Преестéственне Содéтеля и Спáса,/ Бóга Слóва родилá еси́, Дéво:// тéмже Тя поéм, и превознóсим во вся вéки.
Глас 6
Хор: Слáва, Гóсподи, Крестý Твоемý Честнóму.
Чтец: Твой Крест прообразýя Iáков иногдá, на внýки полóжь длáни премéнно/ и благослови́в их, благодáти во язы́цех научáя:/ óтроцы, благослови́те, свящéннiи, пóйте,// лю́дiе, превозноси́те Егó во вéки.
Хор: Слáва, Гóсподи, Крестý Твоемý Честнóму.
Чтец: О, неизречéннаго Твоегó, Хрiстé, сни́тiя и неизглагóланных благи́х!/ Воплоти́ся и, рáспят быв, смерть прiéм,/ и реши́ши человéки от кля́твы, источи́в нетлéнiе на треблажéннем Дрéве,// препрослáвленный Крест сей во вéки.
Хор: Слáва, Гóсподи, Крестý Твоемý Честнóму.
Чтец: Пресвяты́й Крест, Божéственную побéду, жи́зни начáльника,/ лéсти потреби́теля, днесь похвáлим Крест всесвяты́й Госпóдень,// бесóв губи́теля и вáрваров прогони́теля, вéрных победотвóрца и покрови́теля.
Хор: Пресвятáя Богорóдице, спасú нас.
Чтец: Гвоздьми́ пригвождéна Хрiстá, копiéм прободéна в нетлéнная рéбра,/ трóстiем в главý бiéма, желчь вкушáюща, зря́щи, Дéва вопiя́ше:/ где Твоя́ добрóта зáйде, прекрáсное Слóво,// Препрослáвленне пáче сынóв человéческих?
Глас 8
Припéв: Святíи мýченицы, молúте Бóга о нас.
Тропáрь: И҆́стины рачи́телiе и закóна извéстнiи храни́телiе бы́вше, прехвáльнiи мýченицы,// поéте Хрiстá во вéки.
Припéв: Святíи мýченицы, молúте Бóга о нас.
Тропáрь: Седморáсленный плод святáго кóрене я́ко вои́стинну,// седмь Маккавéи, мýченики Госпóдни, почти́м достóйно.
Благословúм Ѻтцá, и Сы́на, и Святáго Дýха, Гóспода.
Трóичен: Трóице Нераздели́мая, Еди́нице,/ в Божествé слáвлю Еди́ну// и в трiéх пою́ Тя ли́цех, Еди́ну си́лу.
И҆ ны́не и прúсно и во вéки векóв. Амúнь.
Богорóдичен: В послéдняя нас рáди от Дéвы воплощéннаго Бóга,// свящéнницы, пóйте и превозноси́те Егó во вéки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 8): Благослови́те, óтроцы,/ Трóицы равночи́сленнiи,/ Содéтеля Отцá Бóга,/ пóйте снизшéдшее Слóво/ и огнь в рóсу претвóршее/ и превозноси́те всем жизнь подавáющаго// Дýха Всесвятáго во вéки.
Возглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стих)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Ужасéся о сем Нéбо,/ и земли́ удиви́шася концы́,/ я́ко Бог яви́ся человéком плóтски,/ и чрéво Твоé бысть прострáннейшее Небéс./ Тем Тя, Богорóдицу,// Áнгелов и человéк чиноначáлiя величáют.
Хор: Слáва, Гóсподи, Святóму Воскресéнiю Твоемý.
Чтец: Божéственным и Безначáльным Естествóм прост сый,/ сложи́лся еси́ прiя́тiем плóти, в Тебé Самóм Сiю́ состáвив, Слóве Бóжiй,/ и пострадáв я́ко человéк, пребы́л еси́ кромé страстéй, я́ко Бог.// Тéмже Тя во Двою́ Существý нераздéльно и неслiя́нно величáем.
Хор: Слáва, Гóсподи, Святóму Воскресéнiю Твоемý.
Чтец: Отцá по Существý Божéственному,/ я́коже естествóм быв человéк,/ рекл еси́ Бóга Вы́шнiй, рабóм снизходя́,/ воскрéс от грóба, благодáтiю Отцá/ земнорóдным полóж, и҆́же по естествý Бóга же и Влады́ку,// с Ни́мже Тя вси величáем.
Хор: Пресвятáя Богорóдице, спасú нас.
Богорóдичен: Яви́лася еси́, о Дéво Мáти Бóжiя,/ пáче естествá рóждши плóтiю Бóга Слóва,/ Егóже Отéц отры́гну от сéрдца Своегó прéжде всех век, я́ко Благ,// Егóже ны́не и телéс превы́шша разумéем, áще и в тéло облечéся.
Глас 8
Хор: Пресвятáя Богорóдице, спасú нас.
Чтец: Рáдости и весéлiя испóлнь есть пáмять Твоя́,/ приступáющим исцелéнiя точáщи,// и благочéстно Богорóдицу Тя возвещáющим.
Хор: Пресвятáя Богорóдице, спасú нас.
Чтец: Псалмы́ Тя воспевáем Благодáтная,/ и немóлчно, éже рáдуйся, принóсим:// Ты бо источи́ла еси́ всем рáдость.
Глас 6
Хор: Слáва, Гóсподи, Крестý Твоемý Честнóму.
Чтец: Тлéнни от преслушáнiя бы́хом, Бóжiя зáповеди престýпницы я́вльшеся:/ сегó рáди смерть прiи́де человéком.// Тéмже безсмéртiя процветé днесь побéдный Крест Хрiстóв, егóже целýем.
Хор: Слáва, Гóсподи, Крестý Твоемý Честнóму.
Чтец: Се Дрéво пресвятóе крéпкая надéжда вéрным яви́ся, кля́твы избавлéнiе,/ человéком рáдость предлежи́т, обличáя тьмы начáльника,// семý поклони́мся, вéрнiи, с весéлiем.
Хор: Слáва, Гóсподи, Крестý Твоемý Честнóму.
Чтец: Начáло благословéнiя, и утверждéнiе хрiстiáн, и стенá, и твéрдое заступлéнiе,/ и кля́твы избавлéнiе яви́ся нам Дрéво вожделéнное, орýжiе непобеди́мое,// просвети́ и освяти́ нас, покланя́ющихся тебé.
Хор: Пресвятáя Богорóдице, спасú нас.
Чтец: Хрáме и двéре освящéнiя, Престóле Бóжiй,/ óблаче и свéщниче всесвéтлый и ковчéже благодáти, Всенепорóчная,// чéстне покланя́ющiяся óбразу честнóму Единорóднаго Твоегó Сы́на покры́й и сохрани́.
Глас 8
Припéв: Святíи мýченицы, молúте Бóга о нас.
Тропáрь: Сокрóвище Божéственных даровáнiй вои́стинну показáстеся,// богáтство неотъéмлемое, всехвáльнiи мýченицы.
Припéв: Святíи мýченицы, молúте Бóга о нас.
Тропáрь: Моли́твенницы дóблiи к Зижди́телю всех сýще,// испроси́те невлáемую жизнь душáм нáшим.
Слáва Ѻтцý и Сы́ну и Святóму Дýху.
Трóичен: С Сы́ном Отцý и Дýху прáвому поклони́мся, со Áнгелы зовýще:// слáва в Вы́шних Бóгу.
И҆ ны́не и прúсно и во вéки векóв. Амúнь.
Богорóдичен: Рáдуйся, двéре святáя, Бóгу отвéрстая, еди́ному Премýдрому,// Ю́же осени́ Дух Пресвяты́й.
Катавáсiя (глас 8): Тáин еси́, Богорóдице, рай,/ невоздéланно возрасти́вшiй Хрiстá,/ И҆́мже крéстное живонóсное на земли́ насади́ся Дрéво./ Тем, ны́не возноси́му,// покланя́ющеся Емý, Тя величáем.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостилáрiй воскрéсный девятый: Заключéнным Влады́ко двéрем, я́ко вшел еси́,/ Апóстолы испóлнил еси́ Дýха Пресвятáго, ми́рно дýнув,/ и҆́мже вязáти же и решáти грехи́ рекл еси́:/ и по осми́ днех Твоя́ рéбра Фомé показáл еси́, и рýце./ С ни́мже вопiéм:// Госпóдь и Бог Ты еси́.
Слáва Ѻтцý и Сы́ну и Святóму Дýху.
Светúлен мýчеников: Чýдныя воспоéм Маккавéи, Елиазáра, óтроки и Соломонíю:/ сíи бо низложи́ша шатáнiя началозло́бнаго змíя// и, зако́на служи́телiе бы́вше, венчáшася.
И҆ ны́не и прúсно и во вéки векóв. Амúнь.
Светúлен Крестá: Крест - храни́тель всея́ вселéнныя,/ Крест - красотá Цéркве,/ Крест - нáша держáва,/ Крест - вéрных утверждéнiе,// Крест - А́нгелов слáва и дéмонов я́зва.
ХВАЛИТНЫ
Хор, глас 2: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéние положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 8: Гóсподи, áще и суди́лищу предстáл еси́ от Пилáта суди́мый,/ но не отступи́л еси́ от престóла со Отцéм седя́:/ и воскрéс из мéртвых,/ мiр свободи́л еси́ от рабóты чуждáго,// я́ко Щедр и Человеколю́бец.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Гóсподи, орýжiе на дiáвола/ Крест Твой дал еси́ нам:/ трепéщет бо и трясéтся, не терпя́ взирáти на си́лу Егó:/ я́ко мéртвыя возставля́ет, и смерть упраздни́./ Сегó рáди покланя́емся// погребéнiю Твоемý и востáнiю.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Гóсподи, áще и я́ко мéртва/ во грóбе iудéи положи́ша,/ но я́ко Царя́ спя́ща вóини Тя стрежáху,/ и я́ко животá сокрóвище, печáтiю печáташа,/ но воскрéсл еси́,// и пóдал еси́ нетлéнiе душáм нáшым.
Хвалúте Егó во глáсе трýбнем, хвалúте Егó во псалтúри и гýслех.
Стихúра: Áнгел Твой, Гóсподи,/ Воскресéнiе проповéдавый,/ стрáжи ýбо устраши́,/ женáм же возгласи́, глагóля:/ что и́щете Живáго с мéртвыми;/ воскрéсе Бог сый,// и вселéнней жизнь даровá.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúры Крестá, глас 1: Небéсная шéствiя/ Крест Честны́й готóвит всем,/ томý покланя́ющимся вéрою несумнéнною,/ и ликóм невещéственных сил/ И҆́же на нем Пригвозди́выйся// сочетáет любóвiю пою́щiя тогó.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Клáняющеся вéрою Крестý Честнóму,/ на нем распéншагося воспоéм Влады́ку,/ Тогó мановéнiем,/ устнé вкýпе и дýшу очищáюще,/ и сiя́нiи сегó мы́сленными уясни́мся,// хвáляще егó.
Возносúте Гóспода Бóга нáшего,/ и покланя́йтеся поднóжiю нóгу Егó, я́ко свя́то есть.
Стiхúра: Гóресть дрéвле услаждáя, Моисéй/ избáви Iзрáиля,/ óбраз Крестá написýя,/ мы же сегó, вси вéрнiи,/ тáйно и Божéственно воображáюще в сердцáх нáших,// всегдá спасáемся держáвою егó.
Бог же Царь наш прéжде вéка,/ содéла спасéнiе посредé землú.
Глас 4: Пособи́вый, Гóсподи, крóткому Дави́ду покори́ти иноплемéнника,/ вéрному нáшему вóинству спобóрствуй/ и орýжiем Крестá низложи́ враги́ нáша./ Покажи́, Благоутрóбне, на нас дрéвнiя ми́лости Твоя́,/ и да разумéют вои́стинну, я́ко Ты еси́ Бог,/ и, на Тя надéющиися, побеждáем,/ моля́щiися обы́чно Пречи́стей Твоéй Мáтери// даровáтися нам вéлiей ми́лости.
Слáва Ѻтцý и Сы́ну и Святóму Дýху.
Стiхúра евáнгельская девятая, глас 5: Я́ко в послéдняя лéта,/ сýщу пóзде от суббóт,/ предстáл еси́ другóм Хрiстé,/ и чудесéм чýдо извествýеши,/ заключéным вхóдом двéрным,/ éже из мéртвых Твоé воскресéнiе./ Но испóлнил еси́ рáдости ученики́,/ и Дýха Святáго преподáл еси́ им,/ и власть пóдал еси́ оставлéнiя грехóв/ и Фомы́ не остáвил еси́ в невéрствiя погружáтися бýри./ Тéмже подáждь и нам рáзум и҆́стинный и оставлéнiе прегрешéнiй,// благоутрóбне Гóсподи.
И҆ ны́не и прúсно и во вéки векóв. Амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрiстóс Бог,// благоволи́вый тáко, слáва Тебé.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрiстé, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрiстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 2: Воскрéс из грóба и ýзы растерзáл еси́ áда,/ разруши́л еси́ осуждéнiе смéрти, Гóсподи,/ вся от сетéй врагá избáвивый;/ яви́вый же Себé апóстолом Твои́м,/ послáл еси́ я на прóповедь,/ и тéми мир Твой пóдал еси́ вселéнней,// Еди́не Многоми́лостиве.
Хор: Крестý Твоемý покланя́емся Влады́ко,/ и святóе Воскресéнiе Твоé слáвим. (Трúжды, после каждого раза один земной поклон)
СТИХИРЫ ТРИОДИ НА ПОКЛОНЕНИЕ КРЕСТУ
Глас 2: Прiиди́те вéрнiи,/ животворя́щему Дрéву поклони́мся,/ на нéмже Хрiстóс Царь слáвы вóлею рýце распростéр,/ вознесé нас на пéрвое блажéнство,/ и́хже прéжде слáстiю укрáд враг,/ изгнáны от Бóга сотвори́./ Прiиди́те вéрнiи, Дрéву поклони́мся,/ и́мже сподóбихомся неви́димых враг сокруши́ти главы́./ Прiиди́те вся отéчествiя язы́к,/ Крест Госпóдень пéсньми почти́м:/ рáдуйся Крéсте, пáдшаго Адáма совершéнное избавлéнiе!/ О тебé вéрнiи хвáлятся,/ я́ко твоéю си́лою исмáильтескiя лю́ди держáвно покаря́ющiи./ Тебé ны́не со стрáхом хрiстiáне целýем:/ на тебé пригвозди́вшагося Бóга слáвим, глагóлюще:/ Гóсподи на том пригвозди́выйся поми́луй нас,// я́ко Благ и Человеколю́бец.
Глас 5: Зря́щи Тя тварь вся, на Крестé нáга ви́сяща,/ Содéтеля и Зижди́теля всех,/ изменя́шеся стрáхом и рыдáше,/ сóлнце же свет омрачи́,/ и земля́ колебáшеся,/ кáменiе же разседáшеся,/ и хрáма свéтлость раздирáшеся,/ мéртвiи востáша от гробóв,/ и Áнгельскiя си́лы ужасóшася, глагóлюще:/ о, чудесé! Судiя́ сýдится// и стрáждет хотя́ за спасéнiе мíра и обновлéнiе.
Глас 8: Днесь Влады́ка твáри, и Госпóдь слáвы,/ на Крестé пригвождáется и в рéбра прободáется,/ жéлчи и óцта вкушáет, слáдость церкóвная:/ венцéм от тéрнiя облагáется:/ покрывáяй нéбо óблаки,/ одéждею облачи́тся поругáнiя:/ и заушáется брéнною рукóю,/ рукóю создáвый человéка./ По плещéма бiéн бывáет,/ одевáяй нéбо óблаки./ Заплевáнiя и рáны прiéмлет,/ поношéнiя и заушéнiя:/ и вся терпи́т менé рáди осуждéннаго,/ Избáвитель мой и Бог,// да спасéт мiр от прéлести, я́ко благоутрóбен.
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Днесь неприкосновéнный существóм,/ прикосновéн мне бывáет,/ и стрáждет стрáсти,/ свобождáяй мя от страстéй./ Свет подавáяй слепы́м,/ от беззакóнных устéн оплевáется,/ и даéт плещи́ за пленéнныя на рáны./ Сегó Чи́стая Дéва и Мáти на Крестé зря́щи,/ болéзненно вещáше:/ увы́ мне Чáдо Моé,/ что сié сотвори́л еси́?/ Крáсный добрóтою пáче всех человéк,/ бездыхáнный, беззрáчный явля́ешися,/ не имéя ви́да, нижé добрóты./ Увы́ Мне Мой Свéте!/ Не могý спя́ща зрéти Тя,/ утрóбою уязвля́юся,/ и лю́тое орýжiе сéрдце Моé прохóдит./ Воспевáю Твоя́ стрáсти,/ покланя́юся благоутрóбiю Твоемý,/ долготерпели́ве слáва Тебé.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Гóсподи поми́луй (12раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных христiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
ОТПУСТ
Хрiстóс, и҆́стинный Бог наш, моли́твами пречи́стыя Своея́ Мáтере, си́лою Честнáго и Животворя́щаго Крестá, семѝ мýчеников Маккавéев, мáтери их Соломонíи и учи́теля их Елеазáра и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрiстý, Царéви нáшему Бóгу.
Прiиди́те, поклони́мся и припадéм Самомý Хрiстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 8: С высоты́ снизшéл еси́, Благоутрóбне, погребéнiе прiя́л еси триднéвное, да нас свободи́ши страстéй, Животé и Воскресéнiе нáше, Гóсподи, слáва Тебé!
Слáва Отцý и Сы́ну и Святóму Дýху.
Тропáрь Крестá, глас 1: Спаси́, Гóсподи, лю́ди Твоя́ и благослови́ достоя́нiе Твоé, побéды правослáвным хрiстiáнам на сопроти́вныя дáруя и Твоé сохраня́я Крестóм Твои́м жи́тельство.
[Тропарь ц. ч.]Тропáрь Крестá, глас 1: Спаси́, Гóсподи, лю́ди Твоя́ и благослови́ достоя́нiе Твоé, побéды грядýщему рýсскому Царю́ и правослáвным хрiстiáнам на сопроти́вныя дáруя и Твоé сохраня́я Крестóм Твои́м жи́тельство.
И҆ ны́не и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрiстé, Сыне Бóжiй, поми́луй нас. Ами́нь.
КОНДАК
Кондáк воскрéсный, глас 8: Воскрéс из грóба, умéршыя воздви́гл еси́, и Адáма воскреси́л еси́, и Éва ликýет во Твоéм Воскресéнiи, и мiрстíи концы́ торжествýют éже из мéртвых востáнiем Твои́м, Многоми́лостиве.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрiстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрiстé, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Отцý и Сыну и Святóму Дýху, и ны́не и при́сно и во вéки векóв, аминь.
Гóсподи, поми́луй. (3 раза)
Гóсподи, благословѝ.
Хрiстóс, и҆́стинный Бог наш, моли́твами пречи́стыя Своея́ Мáтере, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу