Сретение Господа Бога и Спаса нашего Иисуса Христа. ВСЕНОЩНОЕ БДЕНИЕ. ВЕЛИКАЯ ВЕЧЕРНЯ.
15 февраля 2022 года. Срéтение Гóспода Бóга и Спáса нáшего Иисýса Христá. Слýжба для домáшнего (келéйного) совершéния. Слýжба мирскúм чúном. Всенóщное бдéние на прáздник Срéтения состоúт из Велúкой вечéрни, ýтрени с чтéнием Евáнгелия, тáже канóна и пéрвого чáса.
ВЕЛИКАЯ ВЕЧЕРНЯ
Молитвами святых отéц нáших, Гóсподи Иисýсе Христé, Бóже наш, помилуй нас, аминь.
Слáва Тебе, Бóже наш, слáва Тебé.
Царю Небéсный, Утéшителю, Дýше Истины, Иже вездé сый и вся исполняяй, Сокрóвище благих и жизни Подáтелю, прииди́ и всели́ся в ны, и очи́сти ны от всякия сквéрны, и спаси, Блáже, Дýши нáша.
Святы́й Бóже, Святый Крéпкий, Святый Безсмéртный, помилуй нас. (3 раза)
Слáва Отцý и Сыну и Святóму Дýху, и ныне и присно и во вéки векóв, аминь.
Пресвятая Трóице, помилуй нас, Гóсподи, очисти грехи нáша, Владыко, прости беззакóния нáша, Святы́й, посети и исцели нéмощи нáша имене Твоегó рáди.
Гóсподи, помилуй. (3 раза)
Слáва Отцý и Сыну и Святóму Дýху, и ныне и присно и во вéки векóв, аминь.
Óтче наш, Иже еси на небесéх. Да святи́тся Имя Твоé, да приии́дет Цáрствие Твоé, да бýдет вóля Твоя, яко на небеси́ и на земли́. Хлеб наш насýщный даждь нам днесь, и остáви нам дóлги нáша, якоже и мы оставляем должникóм нáшим. И не введи́ нас во искушéние, но избáви нас от лукáваго.
Гóсподи, Иисýсе Христé, Сы́не Бóжий, помилуй нас. Аминь.
Гóсподи, помилуй, (12 раз.)
Слáва Отцý и Сыну и Святóму Дýху, и ны́не и при́сно и во вéки векóв, аминь.
Прииди́те, поклони́мся Царéви нáшему Бóгу.
Прииди́те, поклони́мся и припадéм Христý, Царéви нáшему Бóгу.
Прииди́те, поклони́мся и припадéм Самомý Христý, Царéви и Бóгу нáшему.
Псалом 103, предначинáтельный
Стихú избрáннии: Благослови́, душé моя́, Гóспода./ Благословéн еси́, Гóсподи./ Гóсподи, Бóже мой, возвели́чился еси́ зелó./ Благословéн еси́, Гóсподи./ Во исповéдание и в велелéпоту/ облéклся еси́. Благословéн еси́, Гóсподи./ Посредé гор прóйдут вóды./ Ди́вна делá Твоя́, Гóсподи./ Вся премýдростию сотвори́л еси́./ Слáва Ти, Гóсподи, сотвори́вшему вся.
[Псалом полностью]Благослови, душé моя, Гóспода, Бóже мой, возвеличился еси зелó. Во исповéдание и в велелéпоту облéклся еси. Одеяйся свéтом, яко ри́зою, простирáяй нéбо, яко кóжу. Покрывáяй водáми превыспренняя Своя, полагáяй óблаки на восхождéние Своé, ходяй на крилý вéтреню. Творяй Áнгелы Своя дýхи и слуги́ Своя плáмень óгненный. Основáяй зéмлю на твéрди ея, не преклонится в век вéка. Бéздна, яко риза, одеяние ея, на горáх стáнут вóды, от запрещéния Твоегó побéгнут, от глáса грóма Твоегó убоятся. Восхóдят гóры и нисхóдят поля в мéсто, éже основáл еси им. Предéл положил еси, eгóже не прéйдут, нижé обратятся покрыти зéмлю. Посылáяй истóчники в дéбрех, посредé гор прóйдут вóды. Напаяют вся звéри сéльныя, ждут онáгри в жáжду свою. На тых птицы небéсныя привитáют, от среды кáмения дадят глас. Напаяяй гóры от превыспренних Своих, от плодá дел Твоих насытится земля. Прозябáяй травý скотóм, и злак на слýжбу человéком, извести хлеб от земли. И винó веселит сéрдце человéка, умáстити лицé елéем, и хлеб сéрдце человéка укрепит. Насытятся древá польскáя, кéдри Ливáнстии, и́хже еси насади́л. Тáмо пти́цы вогнездятся, ероди́ево жилище предводительствует ими. Гóры высóкия елéнем, кáмень прибéжище зáяцем. Сотвори́л есть лунý во временá, сóлнце познá зáпад свой. Положи́л еси тму, и бысть нощь, в нéйже прóйдут вси звéрие дубрáвнии. Ски́мни рыкáющии, восхи́тити и взыскáти от Бóга пи́щу себé. Возсия сóлнце и собрáшася и в лóжах своих лягут. Изыдет человéк на дéло своé и на дéлание своé до вéчера. Яко возвели́чишася делá Твоя, Гóсподи, вся премýдростию сотвори́л еси, испóлнися земля твáри Твоея. Сиé мóре вели́кое и прострáнное, тáмо гáди, и́мже несть числá, живóтная мáлая с вели́кими, тáмо корабли́ преплáвают, змий сей, eгóже создáл еси ругáтися eму. Вся к Тебé чáют, дáти пи́щу им во блáго врéмя. Дáвшу Тебé им соберýт, отвéрзшу Тебé рýку всяческая испóлнятся блáгости, отврáщшу же Тебé лицé, возмятýтся, отъи́меши дух их, и исчéзнут, и в персть свою возвратятся. Пóслеши Дýха Твоегó, и сози́ждутся, и обнови́ши лицé земли́. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творяй ю трясти́ся, прикасáяйся горáм, и дымятся. Воспою Гóсподеви в животé моéм, пою Бóгу моемý, дóндеже есмь, да усладится Емý бесéда моя, аз же возвеселюся о Гóсподе. Да исчéзнут грéшницы от земли, и беззакóнницы, якоже не быти им. Благослови, душé моя, Гóспода. Сóлнце познá зáпад свой. Положи́л еси тму, и бысть нощь. Яко возвели́чишася делá Твоя, Гóсподи, вся премýдростию сотвори́л еси.
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Пeрвая кафисма
Читаем либо кафисму 1-ю (1-ю cтатью(«Блажен муж» - 1-й антифон.)
[Псалом 1]Блажéн муж, и́же не и́де на совéт нечести́вых и на пути́ грéшных не ста, и на седáлищи губи́телей не сéде, но в закóне Госпóдни вóля eгó, и в закóне Егó поучи́тся день и нощь. И бýдет яко дрéво насаждéнное при исхóдищих вод, éже плод свой даст во врéмя своé, и лист eгó не отпадéт, и вся, ели́ка áще твори́т, успéет. Не тáко нечести́вии, не тáко, но яко прах, eгóже возметáет ветр от лицá земли́. Сегó рáди не воскрéснут нечести́вии на суд, нижé грéшницы в совéт прáведных. Яко весть Госпóдь путь прáведных, и путь нечести́вых поги́бнет.
[Псалом 2]Вскýю шатáшася языцы, и людие поучи́шася тщéтным? Предстáша цáрие зéмстии, и кня́зи собрáшася вкýпе на Гóспода и на Христá Егó. Растóргнем ýзы их и отвéржем от нас и́го их. Живый на Небесéх посмеéтся им, и Госпóдь поругáется им. Тогдá возглагóлет к ним гнéвом свои́м и я́ростию Своéю смятéт я́. Аз же постáвлен есмь Царь от Негó над Сиóном, горóю святóю Егó, возвещáяй повелéние Госпóдне. Госпóдь речé ко Мне: Сын Мой еси Ты, Аз днесь роди́х Тя. Проси́ от Менé, и дам Ти языки достоя́ние Твоé, и одержáние Твоé концы земли́. Упасéши я́ жезлóм желéзным, яко сосýды скудéльничи сокруши́ши я́. И ныне, цáрие, разумéйте, накажи́теся вси судя́щии земли́. Рабóтайте Гóсподеви со стрáхом и рáдуйтеся Ему с трéпетом. Приими́те наказáние, да не когдá прогнéвается Госпóдь и поги́бнете от пути́ прáведнаго, егдá возгори́тся вскóре я́рость Егó. Блажéни вси надéющиися Нань.
[Псалом 3]Гóсподи, что ся умнóжиша стужáющии ми? Мнóзи востаю́т на мя, мнóзи глагóлют души́ моéй: несть спасéния eмý в Бóзе eгó. Ты же, Гóсподи, Застýпник мой еси, слáва моя́ и вознося́й главý мою́. Глáсом моим ко Гóсподу воззвáх, и услы́ша мя от горы́ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскресни́, Гóсподи, спаси́ мя, Бóже мой, я́ко Ты порази́л еси́ вся враждýющыя ми всýе: зýбы грéшников сокруши́л еси́. Госпóдне есть спасéние, и на лю́дех Твои́х благословéние Твоé.
Либо поем стихи избрáннии
БЛАЖЕН МУЖ
Чтец (или хор): Блажéн муж, и́же не и́де на совéт нечести́вых.
Хор: Аллилýиа, аллилýиа, аллилýиа.
Чтец (или хор): Яко весть Госпóдь путь прáведных, и путь нечести́вых поги́бнет.
Хор: Аллилýиа, аллилýиа, аллилýиа.
Чтец (или хор): Рабóтайте Гóсподеви со стрáхом и рáдуйтеся Емý с трéпетом.
Хор: Аллилýиа, аллилýиа, аллилýиа.
Чтец (или хор): Блажéни вси надéющиися Нань.
Хор: Аллилýиа, аллилýиа, аллилýиа.
Чтец (или хор): Воскресни, Гóсподи, спаси́ мя, Бóже мой.
Хор: Аллилýиа, аллилýиа, аллилýиа.
Чтец (или хор): Госпóдне есть спасéние, и на людех Твои́х благословéние Твоé.
Хор: Аллилýиа, аллилýиа, аллилýиа.
Чтец: Слáва Отцý и Сыну и Святóму Дýху.
Хор: Аллилýиа, аллилýиа, аллилýиа.
Хор: И ныне и присно и во вéки векóв, аминь.
Хор: Аллилýиа, аллилýиа, аллилýиа.
Аллилýиа, аллилýиа, аллилýиа, слáва Тебé Бóже. (трúжды)
Гóсподи, помилуй. (3 раза)
Слáва Отцý и Сыну и Святóму Дýху, и ныне и присно и во вéки векóв, аминь.
ГОСПОДИ ВОЗЗВАХ, ГЛАС 1
Хор: Гóсподи, воззвáх к Тебé, услыши мя./ Услыши мя, Гóсподи./ Гóсподи, воззвáх к Тебé, услыши мя:/ вонми́ глáсу молéния моегó,/ внегдá воззвáти ми к Тебé./ Услыши мя, Гóсподи.
Хор: Да испрáвится моли́тва моя́,/ я́ко кадило пред Тобóю,/ воздея́ние рукý моéю/ - жéртва вечéрняя./ Услыши мя, Гóсподи.
[в приходской практике пропускается до стихир](в приходской практике пропускается до стихир): Положи́, Гóсподи, хранéние устóм мои́м, и дверь ограждéния о устнáх мои́х. Не уклони́ сéрдце моé в словесá лукáвствия, непщевáти вины́ о гресéх, с человéки дéлающими беззакóние, и не сочтýся со избрáнными их. Накáжет мя прáведник ми́лостию и обличи́т мя, елéй же грéшнаго да не намáстит главы́ моея́, я́ко ещé и моли́тва моя́ во благоволéниих их. Пожéрты бы́ша при кáмени судии́ их: услы́шатся глагóли мои́, я́ко возмогóша. Я́ко тóлща земли́ просéдеся на земли́, расточи́шася кóсти их при áде. Я́ко к Тебé, Гóсподи, Гóсподи, óчи мои́: на Тя уповáх, не отыми́ дýшу мою́. Сохрани́ мя от сéти, ю́же состáвиша ми, и от соблáзн дéлающих беззакóние. Падýт во мрéжу свою́ грéшницы: еди́н есмь аз, дóндеже прейдý.
[в приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролию́ пред Ним молéние моé, печáль мою́ пред Ним возвещý. Внегдá исчезáти от менé дýху моемý: и Ты познáл еси́ стези́ моя́: на пути́ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менé: поги́бе бéгство от менé, и несть взыскáяй дýшу мою́. Воззвáх к Тебé, Гóсподи, рех: Ты еси́ уповáние моé, часть моя́ еси́ на земли́ живы́х. Вонми́ молéнию моемý, я́ко смири́хся зелó, избáви мя от гоня́щих мя, я́ко укрепи́шася пáче менé.
[Пропускается до стихир]На 10 Чтец: Изведú из темнúцы дýшу мою,// исповéдатися úмени Твоемý. Менé ждут прáведницы,// дóндеже воздáси мне.
На 8. Стих: Из глубины воззвáх к Тебе, Гóсподи,// Гóсподи, услыши глас мой.
Стихúры прáздника, самоглáсны, глас 1: Глагóли, Симеóне,/ Когó нося́ на рукý в цéркви рáдуешися?/ Комý зовéши и вопиéши:/ ны́не свободи́хся, ви́дех бо Спáса моегó?/ Сей есть от Дéвы рождéйся,/ Сей есть от Бóга Бог Слóво,/ воплоти́выйся нас рáди и спасы́й человéка,// Томý поклони́мся.
Да бýдут ýши Твои// внéмлюще глáсу молéния моегó.
Стихúра: Глагóли, Симеóне,/ Когó нося́ на рукý в цéркви рáдуешися?/ Комý зовéши и вопиéши:/ ны́не свободи́хся, ви́дех бо Спáса моегó?/ Сей есть от Дéвы рождéйся,/ Сей есть от Бóга Бог Слóво,/ воплоти́выйся нас рáди и спасы́й человéка,// Томý поклони́мся.
На 6. Стих: Аще беззакóния нáзриши, Гóсподи, Гóсподи, кто постоит? Яко у Тебé очищéние есть.
Стихúра: Глагóли, Симеóне,/ Когó нося́ на рукý в цéркви рáдуешися?/ Комý зовéши и вопиéши:/ ны́не свободи́хся, ви́дех бо Спáса моегó?/ Сей есть от Дéвы рождéйся,/ Сей есть от Бóга Бог Слóво,/ воплоти́выйся нас рáди и спасы́й человéка,// Томý поклони́мся.
Имене рáди Твоегó потерпéх Тя, Гóсподи, потерпé душá моя в слóво Твоé, уповá душá моя на Гóспода.
Стихúра: Приими́, Симеóне,/ Егóже под мрáком Моисéй законополагáюща прови́де в Синáи,/ Младéнца бы́вша, закóну повинýющася./ Сей есть закóном глагóлавый,/ Сей есть во прорóцех речéнный,/ воплоти́выйся нас рáди и спасы́й человéка,// Томý поклони́мся.
На 4. Стих: От стрáжи ýтренния до нóщи, от стрáжи ýтренния, да уповáет Изрáиль на Гóспода.
Стихúра: Приими́, Симеóне,/ Егóже под мрáком Моисéй законополагáюща прови́де в Синáи,/ Младéнца бы́вша, закóну повинýющася./ Сей есть закóном глагóлавый,/ Сей есть во прорóцех речéнный,/ воплоти́выйся нас рáди и спасы́й человéка,// Томý поклони́мся.
Яко у Гóспода милость, и многое у Него избавлéние, и Той избáвит Изрáиля от всех беззакóний eго.
Стихúра: Приими́, Симеóне,/ Егóже под мрáком Моисéй законополагáюща прови́де в Синáи,/ Младéнца бы́вша, закóну повинýющася./ Сей есть закóном глагóлавый,/ Сей есть во прорóцех речéнный,/ воплоти́выйся нас рáди и спасы́й человéка,// Томý поклони́мся.
На 2. Стих: Хвалите Гóспода вси языцы, похвалите Егó вси людие.
Стихúра: Прии́дем и мы, пéсньми Божéственными Христá усря́щем/ и прии́мем Егó,/ Егóже спасéние Симеóн ви́де./ Сей есть, Егóже Дави́д провозвести́,/ Сей есть во прорóцех глагóлавый,/ воплоти́выйся нас рáди и закóном вещáвый,// Томý поклони́мся.
Яко утвердися милость Егó на нас, и истина Госпóдня пребывáет во век.
Стихúра: Прии́дем и мы, пéсньми Божéственными Христá усря́щем/ и прии́мем Егó,/ Егóже спасéние Симеóн ви́де./ Сей есть, Егóже Дави́д провозвести́,/ Сей есть во прорóцех глагóлавый,/ воплоти́выйся нас рáди и закóном вещáвый,// Томý поклони́мся.
Слáва Отцу и Сыну и Святóму Духу, и ныне и присно и во вéки векóв, аминь.
Стихúра Иоáнна монáха, глас 6: Да отвéрзется дверь Небéсная днесь:/ Безначáльное бо Слóво Óтчее,/ начáло прии́м под лéты,/ не отстýпль Своегó Божествá,/ от Дéвы я́ко Младéнец четыредесятоднéвен/ Мáтерию вóльне принóсится в цéрковь закóнную,/ и Сегó на рýки приéмлет стáрец,/ отпусти́, зовы́й, рабá, Влады́ко,/ и́бо óчи мои́ ви́деста спасéние Твоé./ Пришéдый в мир спасти́ род человéчь,// Гóсподи, слáва Тебé.
СВЕТЕ ТИХИЙ
Хор: Свéте Ти́хий святы́я слáвы Безсмéртнаго Отцá Небéснаго, Святáго, Блажéннаго, Иисусе Христé! Пришéдше на зáпад сóлнца, ви́девше свет вечéрний, поéм Отцá, Сына и Святáго Духа, Бóга. Достóин еси во вся временá пет бы́ти глáсы преподóбными, Сы́не Бóжий, живóт дая́й; тéмже мир Тя слáвит.
ВЕЧЕРНИЙ ПРОКИМЕН ДНЯ
Чтец: Проки́мен, глас четвéртый: Госпóдь услы́шит мя, внегдá воззвáти ми к Немý.
Хор: Госпóдь услы́шит мя,/ внегдá воззвáти ми к Немý.
Чтец: Облечéся Госпóдь в си́лу и препоя́сася.
Хор: Госпóдь услы́шит мя,/ внегдá воззвáти ми к Немý.
Чтец: Ибо утверди вселéнную, я́же не подвижится.
Хор: Госпóдь услы́шит мя,/ внегдá воззвáти ми к Немý.
Чтец: Дóму Твоемý подобáет святыня, Гóсподи, в долготý дний.
Хор: Госпóдь услы́шит мя,/ внегдá воззвáти ми к Немý.
Чтец: Госпóдь услы́шит мя.
Хор: Внегдá воззвáти ми к Немý.
ПАРЕМИИ
Чтец: Исхóда чтéние.
(Из глав 12 и 13) Глагóла Госпóдь к Моисéю в день он, вóньже изведé сы́ны Изрáилевы от земли́ Еги́петския, глагóляй: Освяти́ Мне вся́каго пéрвенца перворождéннаго, разверзáющаго ложеснá в сынéх Изрáилевых. И и́де Моисéй, и собрá вся лю́ди, и речé: пóмните день сей, вóньже изыдóсте от земли́ Еги́петския, из дóму рабóты, рукóю бо крéпкою Госпóдь изведé нас оттýду, и сохрани́те закóн Егó. И бýдет, я́ко áще введéт вас Госпóдь Бог в зéмлю хананéйску, и́мже óбразом клятся отцéм твои́м. И отлучи́ши вся́каго перворóднаго, разверзáющаго ложеснá, мýжеск пол Гóсподу: и бýдет, я́ко áще вопрóсит тя по сих сын твой, глагóля: что сиé? И речéши емý: я́ко рукóю крéпкою изведé нас Госпóдь от земли́ Еги́петския, из дóму рабóты. Егдá бо ожесточи́ фарaóна не отпусти́ти нас, поби́ Госпóдь вся перворóдныя в земли́ Еги́петстей, от перворóдных человéческих, дáже до перворóдных скóтских. Сегó рáди аз жéртву Гóсподу приношý: вся́каго, отверзáющаго ложеснá, мýжеска пóлу и вся́каго перворóднаго сынóв мои́х избáвлю. И бýдет в знáмение непоколеби́мо пред очи́ма твои́ма. Я́ко тáко речé Госпóдь Бог Вседержи́тель: я́ко перворождéнная сынóв твои́х дáси Мне. И бýдет: всяк, и́же áще роди́т отрочá мýжеск пол, в день осмы́й обрéжете емý плоть крáйнюю егó. И три́десять и три дни не вни́дет во святи́лище Бóжие ко свящéннику, дóндеже испóлнятся дни́е очищéния. И по сих принесéши Гóсподу áгня единолéтно, непорóчно во всесожжéние и птенцá голуби́на или́ гóрличищна при двéрех ски́нии свидéния, ко святи́телю. Или́ вмéсто сих принесéши пред Гóсподем два птенцá голуби́на или́ два гóрличища, и помóлится о нем свящéнник. Я́ко воздая́ние воздаю́щии си́и Мне суть от всех сынóв Изрáилевых, и прия́т их. И освяти́т я Мне вмéсто перворóдных еги́петских: вóньже день порази́х вся́каго пéрвенца в земли́ Еги́петстей, от человéка до скотá, - речé Бог Вы́шний Святы́й Изрáилев.
Чтец: Прорóчества Исáиина чтéние.
(Из главы 6) Бысть в лéто, в нéже ýмре Ози́я, царь,/ ви́дех Гóспода, седя́ща на престóле высóце, и превознесéнне, и испóлнь дом слáвы Егó. И Серафи́ми стоя́ху óкрест Егó, шесть крил еди́ному, и шесть крил другóму, и двемá ýбо покрывáху ли́ца своя́, двемá же покрывáху нóги своя́ и двемá летáху. И взывáху друг ко дрýгу, и глагóлаху: Свят, Свят, Свят Госпóдь Саваóф, испóлнь вся земля́ слáвы Егó. И взя́тся наддвéрие от глáса, и́мже вопия́ху, и дом испóлнися ды́ма. И рех: о, окая́нный аз! Я́ко умили́хся, я́ко человéк сый, и, нечи́сты устнé имéя, посредé людéй, нечи́стая устнá имýщих, аз живý, и Царя́ Гóспода Саваóфа ви́дех очи́ма мои́ма. И пóслан бысть ко мне еди́н от Серафи́мов, и в руцé своéй имя́ше угль óгненный, егóже клещáми взят от жéртвенника. И прикоснýся устом мои́м, и речé: се прикоснýся сиé устнáм твои́м, и оты́мет беззакóния твоя́ и грехи́ твоя́ очи́стит. И слы́шах глас Гóспода, глагóлющаго: когó послю́? И кто пóйдет к лю́дем сим? И рекóх: се аз есмь, посли́ мя. И речé: иди́ и рцы лю́дем сим: слýхом услы́шите, и не уразумéете, и, ви́дяще, ýзрите и не уви́дите. Одебелé бо сéрдце людéй сих, и уши́ма свои́ма тя́жко слы́шаша, и óчи свои́ смежи́ша, да не кáко уви́дят очи́ма, и уши́ма услы́шат, и сéрдцем уразумéют, и обратя́тся, и исцелю́ я. И рекóх: докóле, Гóсподи? И речé: дóндеже áще запустéют грáди, от éже не пожи́ти, и дóми, от éже не бы́ти человéком, и земля́ остáвлена бýдет пустá. И по сих продолжи́т Бог человéки, и умнóжатся остáвльшиися на земли́.
Чтец: Прорóчества Исáиина чтéние.
(Из главы 19) Се Госпóдь седи́т на óблаце лéгце и прии́дет в Еги́пет, и сотрясýтся рукотворéнная еги́петская от Лицá Егó, и сéрдце их умáлится в них. И смятéтся дух их в них, и совéт их разори́т. И предáст Еги́пта в рýки господéй, занé сия́ глагóлет Госпóдь, Влады́ка Святы́й Саваóф. Пию́т еги́птяне вóду я́же при мóри. Рекá же оскудéет и и́зсхнет. Сия́ глагóлет Госпóдь: где суть ны́не премýдрии твои́? Да возвестя́т ти и да рекýт тебé что совещá Госпóдь Саваóф на Еги́пта. В день он бýдут еги́птяне в стрáсе и трéпете от лицá руки́ Гóспода Саваóфа, ю́же Он возложи́т на них, и бýдет олтáрь Госпóдень в странé еги́петстей и столп в предéлех егó Гóсподеви. И бýдет в знáмение в вéки Гóсподу Саваóфу в странé еги́петстей. Я́ко воззовýт ко Гóсподу, и пóслет им Госпóдь человéка, и́же спасéт их. И вéдом бýдет Госпóдь еги́птяном, и познáют еги́птяне Гóспода в день он, и сотворя́т жéртву и дар, и помóлятся, и воздадя́т обéты своя́ Гóсподеви.
Гóсподи, помилуй. (40 раз)
Слáва Отцу и Сыну и Святóму Духу, и ныне и присно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехá сохрани́тися нам./ Благословéн еси́, Гóсподи Бóже отéц нáших,/ и хвáльно и прослáвлено и́мя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя./ Благословéн еси, Гóсподи, научи́ мя оправдáнием Твоим./ Благословéн еси, Владыко, вразуми мя оправдáнием Твоим./ Благословéн еси, Святый, просвети́ мя оправдáнии Твои́ми.
Гóсподи, ми́лость Твоя́ во век, дел рукý Твоéю не прéзри./ Тебé подобáет хвалá. Тебé подобáет пéние,/ Тебé слáва подобáет, Отцý и Сыну и Святóму Дýху, ныне и при́сно и во вéки векóв. Ами́нь.
Гóсподи, помилуй. (12 раз)
Слáва Отцý и Сыну и Святóму Дýху, и ныне и присно и во вéки векóв, аминь.
ЛИТИЯ
Стихúры прáздника, глас 1, самоглáсны: Вéтхий дéньми,/ И́же закóн дрéвле в Синáи дав Моисéю,/ днесь Младéнец ви́дится/ и по закóну, я́ко закóна Творéц,/ закóн исполня́я, во храм принóсится,/ и стáрцу даéтся./ Приéм же Сегó Симеóн прáведный/ и, обещáний сбытиé ви́дев совершáемое, рáдостно вопия́ше:/ ви́деша óчи мои́ éже от вéка тáинство сокровéнное,/ напослéдок дний сих я́вльшееся,/ свет, разоря́я невéрных язы́ков омрачéние/ и слáву дая́ новоизбрáнному Изрáилю;/ тéмже отпусти́ рабá Твоегó от соýз сея́ плóти/ к нестарéемому и чýдному некончаéмому животý,// подая́ ми́рови вéлию ми́лость.
Днесь дрéвле Моисéю в Синáи закóн подáвый/ закóнным повину́ется велéнием,/ нас рáди, я́ко Милосéрд, по нам быв./ Ны́не Чи́стый Бог я́ко Отрочá Свя́то, ложеснá развéрз чи́стыя,/ Себé Самомý я́ко Бог принóсится,/ закóнныя кля́твы свобождáя// и просвещáя дýши нáша.
Глас 2: Ему́же вы́шнии служи́телие с трéпетом мóлятся,/ дóлу ны́не Симеóн вéщными рукáми приéмь,/ Бóга человéком соедини́тися проповéда,/ и Человéка Небéсна Бóга ви́дяй,/ отлучáяся сýщих на земли́, рáдостно взывáше:/ И́же во тьмé сýщим Невечéрний Свет открывáяй,// Гóсподи, слáва Тебé.
Днесь Симеóн на рýки Гóспода слáвы подъéмлет,/ Егóже под мрáком пéрвее Моисéй ви́де,/ на горé Синáйстей скрижáли даю́ща емý./ Сей есть, И́же во прорóцех глагóляй и закóна Творéц./ Сей есть, Егóже Дави́д возвещáет, И́же всем стрáшный,// име́яй вéлию и богáтую ми́лость.
Свящéннаго свящéнная Дéва принесé во святи́лище святи́телю,/ простéр же ру́це, Симеóн прия́т Сегó, рáдуяся,/ и возопи́: ны́не отпущáеши рабá Твоегó, Влады́ко,// по глагóлу Твоемý с ми́ром, Гóсподи.
Зижди́тель Небесé и земли́/ на рукáх ношáшеся святы́м Симеóном стáрцем днесь,/ той бо Дýхом Святы́м глагóлаше:// ны́не свободи́хся, ви́дех бо Спáса моегó.
Днесь Симеóн стáрец во храм вхóдит, рáдуяся дýхом,/ Законодáвца Моисеéва и Исполни́теля закóна на рýки восприя́ти./ Он ýбо мрáком и глáсом неявлéнным Богови́дец сподóбися бы́ти,/ покровéнным лицéм еврéев невéрная сердцá изобличи́,/ сей же Первовéчное Слóво Óтчее воплощéнное понесé/ и язы́ком откры́ Свет, Крест и Воскресéние./ И Áнна прорóчица показáся,/ Спáса Избáвителя Изрáилю проповéдающи./ Томý возопии́м, Христý Бóгу нáшему:// Богорóдицы рáди поми́луй нас.
Слáва Отцý и Сыну и Святóму Дýху.
Глас 5: Испытáйте писáния,/ я́коже речé во Евáнгелиих Христóс Бог наш,/ в них бо обретáем Тогó, раждáема/ и пеленáми повивáема,/ в я́слех полагáема и млекóм питáема,/ обрéзание приéмлюща и Симеóном носи́ма,/ не мнéнием, ни привидéнием, но и́стиною ми́рови я́вльшася./ К Немýже возопии́м:// Превéчный Бóже, слáва Тебé.
И ныне и прúсно и во вéки векóв. Амúнь.
Вéтхий дéньми, младéнствовав плóтию,/ Мáтерию Дéвою в цéрковь принóсится,/ Своегó закóна исполня́я обещáние,/ Егóже Симеóн прии́м, глагóлаше:/ ны́не отпущáеши с ми́ром, по глагóлу Твоемý, рабá Твоегó,// ви́деша бо óчи мои́ спасéние Твоé, Святы́й.
Гóсподи, помилуй. (40 раз)
Слáва Отцý и Сыну и Святóму Дýху, и ныне и присно и во вéки векóв, аминь.
СТИХИРЫ НА СТИХОВНЕ
Чтец (Стихúры прáздника, глас 7): Украси́ твой чертóг, Сиóне,/ и подыми́ Царя́ Христá,/ целýй Мари́ю, Небéсную Дверь:/ Та бо престóл Херуви́мский яви́ся,/ Та нóсит Царя́ Слáвы./ Óблак свéта есть Дéва,/ нося́щи на рукáх Сы́на прéжде денни́цы,/ Егóже приéмь Симеóн на рýки своя́,/ проповéдуя лю́дям Влады́ку Сегó бы́ти животá и смéрти// и Спáса ми́ру.
Стих: Ны́не отпущáеши рабá Твоегó, Влады́ко,/ по глагóлу Твоемý, с мúром.
Возсия́вшаго прéжде век от Отцá,/ напослéдок же от ложéсн Деви́ческих/ нося́щи в цéрковь неискусобрáчная Мáти,/ в Синáйстей горé Законоположи́вшаго,/ повелéнию закóнному повинýющася/ принесé святи́телю стáрцу и прáведнику,/ Христá Гóспода ви́дети обещáнна./ Егóже приéмь Симеóн на рýки своя́, возрáдовася, вопия́:/ Бог есть Сей, Отцý Соприсносýщный,// и Избáвитель душ нáших.
Стих: Свет во откровéние язы́ков/ и слáву людéй Твоúх Изрáиля.
Носи́маго на колесни́це Херуви́мстей/ и певáемаго в пéснех Серафи́мских/ нося́щи на рукý Богорóдица Мари́я,/ неискусобрáчно из Нея́ воплóщшагося,/ Законодáвца, закóна исполня́юща чин,/ подая́ше рукáм стáрца иерéя./ Живóт же нося́й животá прошáше разрешéния, глагóля:/ Влады́ко, ны́не отпусти́ мя возвести́ти Адáму,/ я́ко ви́дех непрелóжна Отрочá, Бóга Превéчнаго// и Спáса ми́ра.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Глас 8: И́же на Херуви́мех носи́мый и певáемый от Серафи́м,/ днесь в Божéственное святи́лище по закóну приноси́м,/ на стáрческих, я́ко на престóле, седи́т рукáх/ и от Иóсифа приéмлет дáры Боголéпно,/ я́ко супрýг гóрличищ,/ несквéрную Цéрковь и от язы́к новоизбрáнныя лю́ди,/ голуби́на же два птенцá,/ я́ко Начáльник Вéтхаго же и Нóваго./ Éже к Немý обещáния Симеóн конéц приéм,/ благословя́ Дéву Мари́ю Богорóдицу,/ страстéй óбразы, И́же из Нея́, провозгласи́/ и от Негó прошáше отпущéния, вопия́:/ ны́не отпусти́ мя, Влады́ко,/ я́коже прéжде возвести́ ми,/ я́ко ви́дех Тя, Первовéчнаго Свéта// и Спáса Гóспода христоимени́тым лю́дем.
Молитва святаго Симеона Богоприимца
Ныне отпущáеши рабá Твоегó, Владыко,/ по глагóлу Твоемý, с миром;/ я́ко видеста óчи мои спасéние Твоé,/ éже еси уготóвал пред лицéм всех людéй,/ свет во откровéние языков,// и слáву людéй Твоих Изрáиля.
Трисвятое по Отче наш
Святы́й Бóже, Святый Крéпкий, Святый Безсмéртный, помилуй нас. (3 раза)
Слáва Отцý и Сыну и Святóму Дýху, и ны́не и при́сно и во вéки векóв, аминь.
Пресвятая Трóице, помилуй нас, Гóсподи, очисти грехи нáша, Владыко, прости беззакóния нáша, Святы́й, посети и исцели нéмощи нáша имене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Óтче наш, Иже еси́ на небесéх. Да святи́тся Имя Твоé, да приии́дет Цáрствие Твоé, да бýдет вóля Твоя, яко на небеси́ и на земли́. Хлеб наш насýщный даждь нам днесь, и остáви нам дóлги нáша, якоже и мы оставляем должникóм нáшим. И не введи́ нас во искушéние, но избáви нас от лукáваго.
Гóсподи, Иисýсе Христé, Сы́не Бóжий, помилуй нас. Аминь.
Тропáрь Cрéтения, глас 1: Рáдуйся, Благодáтная Богорóдице Дéво,/ из Тебé бо возсия́ Сóлнце Прáвды - Христóс, Бог наш,/ просвещáяй сýщия во тьме./ Весели́ся и ты, стáрче прáведный,/ приéмый во объя́тия Свободи́теля душ нáших,// дáрующаго нам воскресéние.
Бýди и́мя Госпóдне благословéно от ны́не и до вéка. (3 раза)
Псалом 33
Благословлю Гóспода на вся́кое врéмя,/ вы́ну хвалá Его во устéх моих./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм имя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щий воззвá, и Госпóдь услы́ша и,/ и от всех скорбéй егó спасé и./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, иже уповáет нань./ Бóйтеся Гóспода, вси святи́и Егó,/ яко несть лишéния боя́щымся Его./ Богáтии обнищáша и взалкáша,/ взыскáющии же Гóспода не лишáтся вся́каго блáга./ Прииди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержи́ язык твой от зла,/ и устнé твои́, éже не глагóлати льсти./ Уклони́ся от зла и сотвори́ блáго,/ взыщи́ ми́ра, и пожени́ и./ Очи Госпóдни на прáведныя,/ и ýши Егó в моли́тву их./ Лицé же Госпóдне на творя́щия злáя,/ еже потреби́ти от земли́ пáмять их./ Воззвáша прáведнии, и Госпóдь услы́ша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящии прáведнаго прегрешáт./ Избáвит Госпóдь дýши раб Своих,/ и не прегрешáт вси уповáющии на Негó.
И глагóли ýтреню