ВЕРБНОЕ ВОСКРЕСЕНИЕ. Вход Господень в Иерусалим. Неделя ваий. ВСЕНОЩНОЕ БДЕНИЕ. ВЕЛИКАЯ ВЕЧЕРНЯ
28 апрéля 2024 гóда. Недéля вáiй, цветонóсная. Вéрбное воскресéнiе. Вход Госпóдень в Iерусалúм. Всeнóщное бдéнiе для домáшнего (келéйнаго) совершéнiя состоúт из Велúкой вечéрни, ýтрени, тáже канóна и пéрвого чáса. Слýжба совершáется по Трióди. Слýжба мiрскúм чúном.
ВЕЛИКАЯ ВЕЧЕРНЯ
Моли́твами святы́х отéц нáших, Гóсподи Iисýсе Хрїстè, Бóже наш, поми́луй нас, ами́нь.
Слáва Тебè, Бóже наш, слáва Тебè.
Царю́ Небéсный, Утéшителю, Дýше И҆́стины, И҆́же вездè сый и вся исполня́яй, Сокрóвище благи́х и жи́зни Подáтелю, прiидѝ и всели́ся в ны, и очи́сти ны от вся́кiя сквéрны, и спасѝ, Блáже, Дýши нáша.
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжїй, поми́луй нас. Ами́нь.
Гóсподи, поми́луй, (12 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Пріиди́те, поклони́мся Царéви нáшему Бóгу.
Пріиди́те, поклони́мся и припадéм Хрїстý, Царéви нáшему Бóгу.
Пріиди́те, поклони́мся и припадéм Самомý Хрїстý, Царéви и Бóгу нáшему.
Псалом 103, предначинaтельный
Стiхù избрáннiи: Благословѝ, душè моя́, Гóспода./ Благословéн есѝ, Гóсподи./ Гóсподи, Бóже мой, возвели́чился есѝ зелò./ Благословéн есѝ, Гóсподи./ Во исповéданiе и в велелéпоту/ облéклся есѝ. Благословéн есѝ, Гóсподи./ Посредè гор прóйдут вóды./ Ди́вна делà Твоя́, Гóсподи./ Вся премýдростiю сотвори́л есѝ./ Слáва Ти, Гóсподи, сотвори́вшему вся.
[Псалом полностью]Благословѝ, душè моя, Гóспода. Гóсподи, Бóже мой, возвеличился есѝ зелò. Во исповéданiе и в велелéпоту облéклся есѝ. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя́, полагáяй óблаки на восхождéнiе Своè, ходя́й на крилý вéтреню. Творя́й Áнгелы Своя дýхи и слугѝ Своя плáмень óгненный. Основáяй зéмлю на твéрди ея́, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегò побéгнут, от глáса грóма Твоегò убоя́тся. Восхóдят гóры и нисхóдят поля́ в мéсто, éже основáл есѝ им. Предéл положи́л есѝ, eгóже не прéйдут, нижè обратя́тся покры́ти зéмлю. Посылáяй истóчники в дéбрех, посредè гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды̀ кáменiя дадя́т глас. Напая́яй гóры от превы́спренних Свои́х, от плодà дел Твоих насы́тится земля́. Прозябáяй травý скотóм, и злак на слýжбу человéком, известѝ хлеб от землѝ. И винò весели́т сéрдце человéка, умáстити лицè елéем, и хлеб сéрдце человéка укрепи́т. Насы́тятся древà польскáя, кéдри Лiвáнстiи, и҆́хже есѝ насади́л. Тáмо пти́цы вогнездя́тся, еродíево жили́ще предводи́тельствует и҆́ми. Гóры высóкiя елéнем, кáмень прибéжище зáяцем. Сотвори́л есть лунý во временà, сóлнце познà зáпад свой. Положи́л есѝ тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себè. Возсiя́ сóлнце и собрáшася и в лóжах свои́х ля́гут. Изы́дет человéк на дéло своè и на дéланiе своè до вéчера. Яко возвели́чишася делà Твоя́, Гóсподи, вся премýдростiю сотвори́л есѝ, испóлнися земля́ твáри Твоея́. Сiè мóре вели́кое и прострáнное, тáмо гáди, и҆́мже несть числà, живóтная мáлая с вели́кими, тáмо кораблѝ преплáвают, змiй сей, eгóже создáл есѝ ругáтися eмý. Вся к Тебè чáют, дáти пи́щу им во блáго врéмя. Дáвшу Тебè им соберýт, отвéрзшу Тебè рýку вся́ческая испóлнятся блáгости, отврáщшу же Тебè лицè, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегò, и сози́ждутся, и обнови́ши лицè землѝ. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животè моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от землѝ, и беззакóнницы, я́коже не бы́ти им. Благословѝ, душè моя́, Гóспода. Сóлнце познà зáпад свой. Положи́л есѝ тму, и бысть нощь. Яко возвели́чишася делà Твоя, Гóсподи, вся премýдростiю сотвори́л есѝ.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Первая кафизма
Читáем кафíсму 1-ю лúбо 1-ю cтатiю(«Блажéн муж» - 1-й антiфóн.)
[Псалом 1]Блажéн муж, и҆́же не и҆́де на совéт нечести́вых и на путѝ грéшных не ста, и на седáлищи губи́телей не сéде, но в закóне Госпóдни вóля eгò, и в закóне Егò поучи́тся день и нощь. И бýдет яко дрéво насаждéнное при исхóдищих вод, éже плод свой даст во врéмя своè, и лист eгò не отпадéт, и вся, ели́ка áще твори́т, успéет. Не тáко нечести́вiи, не тáко, но яко прах, eгóже возметáет ветр от лицà землѝ. Сегò рáди не воскрéснут нечести́вiи на суд, нижè грéшницы в совéт прáведных. Яко весть Госпóдь путь прáведных, и путь нечести́вых поги́бнет.
[Псалом 2]Вскýю шатáшася язы́цы, и лю́дiе поучи́шася тщéтным? Предстáша цáрiе зéмстiи, и кня́зи собрáшася вкýпе на Гóспода и на Хрїстà Егò. Растóргнем ýзы их и отвéржем от нас и҆́го их. Живы́й на Небесéх посмеéтся им, и Госпóдь поругáется им. Тогдà возглагóлет к ним гнéвом свои́м и я́ростiю Своéю смятéт я́. Аз же постáвлен есмь Царь от Негò над Сióном, горóю святóю Егò, возвещáяй повелéнiе Госпóдне. Госпóдь речè ко Мне: Сын Мой еси Ты, Аз днесь роди́х Тя. Просѝ от Менè, и дам Ти язы́ки достоя́нiе Твоè, и одержáнiе Твоè концы̀ землѝ. Упасéши я́ жезлóм желéзным, я́ко сосýды скудéльничи сокруши́ши я́. И ны́не, цáрiе, разумéйте, накажи́теся вси судя́щiи землѝ. Рабóтайте Гóсподеви со стрáхом и рáдуйтеся Емý с трéпетом. Прiими́те наказáнiе, да не когдà прогнéвается Госпóдь и поги́бнете от путѝ прáведнаго, егдà возгори́тся вскóре я́рость Егò. Блажéни вси надéющiися Нань.
[Псалом 3]Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгò. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы̀ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоè.
Чтец: Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
[Псалом 4]Внегдà призвáти ми, услы́ша мя Бог прáвды моея́, в скóрби распространи́л мя есѝ, ущéдри мя и услы́ши моли́тву мою́. Сы́нове человéчестiи, докóле тяжкосéрдiи? Вскýю лю́бите суетý и и́щете лжи? И увéдите, я́ко удивѝ Госпóдь преподóбнаго Своегò: Госпóдь услы́шит мя, внегдà воззвáти ми к Немý. Гнéвайтеся, и не согрешáйте, я́же глагóлете в сердцáх вáших, на лóжах вáших умили́теся. Пожри́те жéртву прáвды и уповáйте на Гóспода. Мнóзи глагóлют: кто яви́т нам благáя? Знáменася на нас свет лицà Твоегò, Гóсподи. Дал есѝ весéлiе в сéрдце моéм: от плодà пшени́цы, винà и елéа своегò умнóжишася. В ми́ре вкýпе уснý и почíю, я́ко Ты, Гóсподи, еди́наго на уповáнiи всели́л мя есѝ.
[Псалом 5]Глагóлы моя́ внуши́, Гóсподи, разумéй звáнiе моè. Вонми́ глáсу молéнiя моегò, Царю́ мой и Бóже мой, я́ко к Тебè помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Я́ко Бог не хотя́й беззакóнiя, Ты еси́: не присели́тся к Тебè лукáвнуяй, нижè пребýдут беззакóнницы пред очи́ма Твои́ма: возненави́дел еси́ вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг мои́х рáди испрáви пред Тобóю путь мой. Я́ко несть во устéх их и́стины, сéрдце их сýетно, гроб отвéрст гортáнь их: язы́ки свои́ми льщáху. Суди́ им, Бóже, да отпадýт от мы́слей свои́х, по мнóжеству нечéстiя их изри́ни я́, я́ко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебè лю́бящiи и́мя Твоè. Я́ко Ты благослови́ши прáведника, Гóсподи: я́ко орýжiем благоволéнiя венчáл еси́ нас.
[Псалом 6]Гóсподи, да не яростiю Твоéю обличи́ши менè, нижè гнéвом Твои́м накáжеши менè. Поми́луй мя, Гóсподи, яко нéмощен есмь, исцелѝ мя, Гóсподи, я́ко смятóшася кóсти моя́. И душà моя́ смятéся зелò: и Ты, Гóсподи, докóле? Обрати́ся, Гóсподи, избáви дýшу мою́: спасѝ мя рáди ми́лости Твоея́. Яко несть в смéрти поминáяй Тебè: во áде же кто исповéстся Тебè? Утруди́хся воздыхáнiем мои́м, измы́ю на вся́ку нощь лóже моè, слезáми мои́ми постéлю мою́ омочý. Смятéся от я́рости óко моè, обетшáх во всех вразéх моих. Отступи́те от менè, вси дéлающiи беззакóнiе, я́ко услы́ша Госпóдь глас плáча моегò: услы́ша Госпóдь молéнiе моè, Госпóдь моли́тву мою́ прiя́т. Да постыдя́тся и смятýтся вси вразѝ моѝ, да возвратя́тся и устыдя́тся зелò вскóре.
Чтец: Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
[Псалом 7]Гóсподи Бóже мой, на Тя уповáх, спасѝ мя от всех гоня́щих мя и избáви мя: да не когдà похи́тит я́ко лев дýшу мою́, не сýщу избавля́ющу, нижè спасáющу. Гóсподи Бóже мой, áще сотвори́х сiè, áще есть непрáвда в рукý моéю, áще воздáх воздаю́щим ми зла, да отпадý ýбо от враг мои́х тощ. Да поженéт ýбо враг дýшу мою́ и да пости́гнет, и поперéт в зéмлю живóт мой, и слáву мою́ в персть всели́т. Воскреснѝ, Гóсподи, гнéвом Твои́м, вознеси́ся в концáх враг Твои́х, и востáни, Гóсподи Бóже мой, повелéнiем, и́мже заповéдал есѝ. И сонм людéй обы́дет Тя, и о том на высотý обрати́ся. Госпóдь сýдит лю́дем: судѝ ми, Гóсподи, по прáвде моéй, и по незлóбе моéй на мя. Да скончáется злóба грéшных, и испрáвиши прáведнаго, испытáяй сердцà и утрóбы, Бóже, прáведно. Пóмощь моя́ от Бóга, спасáющаго прáвыя сéрдцем. Бог суди́тель прáведен и крéпок, и долготерпели́в, и не гнев наводя́й на всяк день. Áще не обратитéся, орýжiе Своè очи́стит, лук Свой напряжè и уготóва и́ и в нем уготóва сосýды смéртныя, стрéлы Своя́ сгарáемым содéла. Се болè непрáвдою, зачáт болéзнь, и роди́ беззакóнiе: ров изры̀, и ископà и҆̀, и падéт в я́му, ю́же содéла. Обрати́тся болéзнь eгò на главý eгò, и на верх eгò непрáвда eгò сни́дет. Исповéмся Гóсподеви по прáвде Егò и пою́ и́мени Гóспода Вы́шняго.
[Псалом 8]Гóсподи, Госпóдь наш, я́ко чýдно и́мя Твоè по всей землѝ, я́ко взя́тся великолéпiе Твоè превы́ше небéс. Из уст младéнец и ссýщих соверши́л есѝ хвалý, враг Твои́х рáди, éже разруши́ти врагà и мéстника. Я́ко узрю́ небесà, делà перст Твои́х, лунý и звéзды, я́же Ты основáл есѝ. Что есть человéк, я́ко пóмниши eгò? илѝ сын человéчь, я́ко посещáеши eгò? Умáлил есѝ eгò мáлым чим от áнгел, слáвою и чéстiю венчáл есѝ eгò. И постáвил есѝ eгò над дéлы рукý Твоéю, вся покори́л есѝ под нóзе eгò. О́вцы и волы̀ вся, ещè же и скоты̀ польскíя, пти́цы небéсныя, и ры́бы морскíя, преходя́щiя стезѝ морскíя. Гóсподи, Госпóдь наш, я́ко чýдно и́мя Твоè по всей землѝ.
Лúбо поéм стiхù избрáннiи
БЛАЖЕН МУЖ
Чтец (или хор): Блажéн муж, и҆́же не и҆́де на совéт нечести́вых.
Хор: Аллилýїа, аллилýїа, аллилýїа.
Чтец (или хор): Яко весть Госпóдь путь прáведных, и путь нечести́вых поги́бнет.
Хор: Аллилýїа, аллилýїа, аллилýїа.
Чтец (или хор): Рабóтайте Гóсподеви со стрáхом и рáдуйтеся Емý с трéпетом.
Хор: Аллилýїа, аллилýїа, аллилýїа.
Чтец (или хор): Блажéни вси надéющiися Нань.
Хор: Аллилýїа, аллилýїа, аллилýїа.
Чтец (или хор): Воскреснѝ, Гóсподи, спасѝ мя, Бóже мой.
Хор: Аллилýїа, аллилýїа, аллилýїа.
Чтец (или хор): Госпóдне есть спасéнiе, и на лю́дех Твои́х благословéнiе Твоè.
Хор: Аллилýїа, аллилýїа, аллилýїа.
Чтец: Слáва Ѻтцý и Сы́ну и Святóму Дýху.
Хор: Аллилýїа, аллилýїа, аллилýїа.
Хор: И ны́не и при́сно и во вéки векóв, ами́нь.
Хор: Аллилýїа, аллилýїа, аллилýїа.
Аллилýїа, аллилýїа, аллилýїа, слáва Тебè Бóже. (трúжды)
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
ГОСПОДИ ВОЗЗВАХ, ГЛАС 6
Хор: Гóсподи, воззвáх к Тебè, услы́ши мя./ Услы́ши мя, Гóсподи./ Гóсподи, воззвáх к Тебè, услы́ши мя:/ вонмѝ глáсу молéнія моегò,/ внегдà воззвáти ми к Тебè./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ніе рукý моéю/ - жéртва вечéрняя./ Услы́ши мя, Гóсподи.
[В приходской практике пропускается до стихир]Положѝ, Гóсподи, хранéнiе устóм мои́м, и дверь ограждéнiя о устнáх мои́х. Не уклонѝ сéрдце моè в словесà лукáвствiя, непщевáти вины̀ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы̀ моея́, я́ко ещè и моли́тва моя́ во благоволéнiих их. Пожéрты бы́ша при кáмени судiѝ их: услы́шатся глагóли моѝ, я́ко возмогóша. Я́ко тóлща землѝ просéдеся на землѝ, расточи́шася кóсти и҆́х при áде. Я́ко к Тебè, Гóсподи, Гóсподи, óчи моѝ: на Тя уповáх, не отымѝ дýшу мою́. Сохранѝ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
[В приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моè, печáль мою́ пред Ним возвещý. Внегдà исчезáти от менè дýху моемý: и Ты познáл есѝ стезѝ моя́: на путѝ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менè: поги́бе бéгство от менè, и несть взыскáяй дýшу мою́. Воззвáх к Тебè, Гóсподи, рех: Ты есѝ уповáнiе моè, часть моя́ есѝ на землѝ живы́х. Вонмѝ молéнiю моемý, я́ко смири́хся зелò, избáви мя от гоня́щих мя, я́ко укрепи́шася пáче менè.
На 10 Чтец: Изведù из темнúцы дýшу мою́,// исповéдатися úмени Твоемý.
Стiхúры Трióди (вáiй) самоглáсны, глас 6: Днесь благодáть Святáго Дýха нас собрà,/ и вси взéмше крест Твой глагóлем,/ благословéн Гряды́й во и́мя Госпóдне,// осáнна в вы́шних.
Менè ждут прáведницы,// дóндеже воздáси мне.
Стiхúра: Днесь благодáть Святáго Дýха нас собрà,/ и вси взéмше крест Твой глагóлем,/ благословéн Гряды́й во и́мя Госпóдне,// осáнна в вы́шних.
На 8. Стiх: Из глубины̀ воззвáх к Тебè, Гóсподи,// Гóсподи, услы́ши глас мой.
Стiхúра: Имéяй престóл нéбо, и поднóжiе зéмлю,/ Бóга Отцà Слóво и Сын соприсносýщный,/ на жребя́ти безсловéснем смири́ся днесь, в Вифáнiю пришéд./ Тéмже дéти еврéйскiя,/ вéтви рукáми держáще, хвáляху глáсом:/ осáнна в вы́шних,// благословéн гряды́й Царь Iзрáилев.
Да бýдут ýши Твоù// внéмлюще глáсу молéнiя моегò.
Стiхúра: Имéяй престóл нéбо, и поднóжiе зéмлю,/ Бóга Отцà Слóво и Сын соприсносýщный,/ на жребя́ти безсловéснем смири́ся днесь, в Вифáнiю пришéд./ Тéмже дéти еврéйскiя,/ вéтви рукáми держáще, хвáляху глáсом:/ осáнна в вы́шних,// благословéн гряды́й Царь Iзрáилев.
На 6. Стiх: Áще беззакóнiя нáзриши, Гóсподи, Гóсподи, кто постоúт?// Яко у Тебè очищéнiе есть.
Стiхúра: Прiиди́те и мы днесь весь нóвый Iзрáиль,/ я́же от язы́к Цéрковь,/ со прорóком Захáрiею возопiи́м:/ рáдуйся зелò дщи Сióнова,/ проповéдуй дщи Iерусали́мова:/ я́ко се Царь твой грядéт тебè крóток и спасáяй,/ и всéдый на жребя́ óсле, сы́на подъярéмнича:/ прáзднуй я́же детéй, вéтви рукáми держáщи похвалѝ:/ осáнна в вы́шних,// благословéн гряды́й Царь Iзрáилев.
И҆́мене рáди Твоегò потерпéх Тя, Гóсподи, потерпè душà моя́ в слóво Твоè,// уповà душà моя на Гóспода.
Стiхúра: Прiиди́те и мы днесь весь нóвый Iзрáиль,/ я́же от язы́к Цéрковь,/ со прорóком Захáрiею возопiи́м:/ рáдуйся зелò дщи Сióнова,/ проповéдуй дщи Iерусали́мова:/ я́ко се Царь твой грядéт тебè крóток и спасáяй,/ и всéдый на жребя́ óсле, сы́на подъярéмнича:/ прáзднуй я́же детéй, вéтви рукáми держáщи похвалѝ:/ осáнна в вы́шних,// благословéн гряды́й Царь Iзрáилев.
На 4. Стiх: От стрáжи ýтреннiя до нóщи, от стрáжи ýтреннiя,// да уповáет Iзрáиль на Гóспода.
Стiхúра: Честнóе воскресéнiе Твоè прообразýя нам,/ воздви́гл есѝ умéршаго повелéнiем Твои́м,/ бездыхáннаго Лáзаря дрýга Блáже,/ из грóба четвероднéвна смердя́ща./ Тéмже и на жребя́ возшéд обрáзно,/ я́коже на колесни́це носи́мь,/ язы́ки укротевáя Спáсе./ Сегò рáди и хвалéнiе принóсит возлю́бленный Iзрáиль/ из уст ссýщих, и младéнец незлóбивых,/ зря́щих Тя Хрїстè, входя́ща во святы́й град,// прéжде шестѝ дней Пáсхи.
Яко у Гóспода мúлость, и мнóгое у Негò избавлéнiе,// и Той избáвит Iзрáиля от всех беззакóнiй eгò.
Стiхúра: Честнóе воскресéнiе Твоè прообразýя нам,/ воздви́гл есѝ умéршаго повелéнiем Твои́м,/ бездыхáннаго Лáзаря дрýга Блáже,/ из грóба четвероднéвна смердя́ща./ Тéмже и на жребя́ возшéд обрáзно,/ я́коже на колесни́це носи́мь,/ язы́ки укротевáя Спáсе./ Сегò рáди и хвалéнiе принóсит возлю́бленный Iзрáиль/ из уст ссýщих, и младéнец незлóбивых,/ зря́щих Тя Хрїстè, входя́ща во святы́й град,// прéжде шестѝ дней Пáсхи.
На 2. Стiх: Хвалúте Гóспода вси язы́цы, похвалúте Егò вси лю́дiе.
Стiхúра: Прéжде шестѝ дней Пáсхи прiи́де Iисýс во Вифáнiю,/ и приступи́ша к немý ученицы̀ Егò, глагóлюще Емý:/ Гóсподи, где хóщеши, уготóваем Ти я́сти Пáсху./ Он же послà их:/ иди́те в прéднюю весь,/ и обря́щете человéка, скудéль воды̀ нося́ща:/ послéдуйте емý, и дóму влады́це рцы́те:/ Учи́тель глагóлет,// у тебè сотворю́ Пáсху со ученикѝ Мои́ми.
Яко утвердúся мúлость Егò на нас,// и и҆́стина Госпóдня пребывáет во век.
Стiхúра: Прéжде шестѝ дней Пáсхи прiи́де Iисýс во Вифáнiю,/ и приступи́ша к немý ученицы̀ Егò, глагóлюще Емý:/ Гóсподи, где хóщеши, уготóваем Ти я́сти Пáсху./ Он же послà их:/ иди́те в прéднюю весь,/ и обря́щете человéка, скудéль воды̀ нося́ща:/ послéдуйте емý, и дóму влады́це рцы́те:/ Учи́тель глагóлет,// у тебè сотворю́ Пáсху со ученикѝ Мои́ми.
Слáва Отцý и Сы́ну и Святóму Дýху.
Стiхúра: Днесь благодáть Святáго Дýха нас собрà,/ и вси взéмше крест Твой глагóлем,/ благословéн Гряды́й во и́мя Госпóдне,// осáнна в вы́шних.
И ны́не и прúсно и во вéки векóв, амúнь.
Стiхúра: Днесь благодáть Святáго Дýха нас собрà,/ и вси взéмше крест Твой глагóлем,/ благословéн Гряды́й во и́мя Госпóдне,// осáнна в вы́шних.
СВЕТЕ ТИХИЙ
Хор: Свéте Ти́хiй святы́я слáвы Безсмéртнаго Ѻтцà Небéснаго, Святáго, Блажéннаго, Iисýсе Хрїстè! Пришéдше на зáпад сóлнца, ви́девше свет вечéрнiй, поéм Ѻтцà, Сы́на и Святáго Дýха, Бóга. Достóин есѝ во вся временà пет бы́ти глáсы преподóбными, Сы́не Бóжiй, живóт дая́й; тéмже мiр Тя слáвит.
ПРОКИМЕН ВОСКРЕСНЫЙ
Чтец: Прокíмен, глас шесты́й: Госпóдь воцари́ся, в лéпоту облечéся.
Хор: Госпóдь воцарúся,/ в лéпоту облечéся. (Пс.92:1А)
Чтец: Облечéся Госпóдь в си́лу и препоя́сася. (Пс.92:1Б)
Хор: Госпóдь воцарúся,/ в лéпоту облечéся.
Чтец: И҆́бо утвердѝ вселéнную, я́же не подви́жится. (Пс.92:1В)
Хор: Госпóдь воцарúся,/ в лéпоту облечéся.
Чтец: Дóму Твоемý подобáет святы́ня, Гóсподи, в долготý днiй.(Пс.92:2Б)
Хор: Госпóдь воцарúся,/ в лéпоту облечéся.
Чтец: Госпóдь воцари́ся.
Хор: В лéпоту облечéся.
ПАРИМИИ
Чтец: Бытiя́ чтéнiе.
(Из главы 49:) Призвà Iáков сы́ны своя́, и речè им: собери́теся, да возвещý вам, что сря́щет вас в послéднiя дни. Собери́теся, и послýшайте менè сы́нове Iáковли: послýшайте Iзрáиля, послýшайте отцà вáшего. Iýдо, тебè похвáлят брáтiя твоя́: рýце твоѝ на плещý враг твои́х: поклóнятся тебè сы́нове отцà твоегò. Ски́мен львов Iýда, от лéторасли сы́не мой возшéл есѝ: возлéг уснýл есѝ я́ко лев, и я́ко ски́мен, кто возбýдит егò? Не оскудéет князь от Iýды, и вождь от чресл егò, дóндеже прiи́дут отложéная емý: и той чáянiе язы́ков. Привязýяй к лозè жребя́ своè, и к ви́нничiю жребцà осля́те своегò: исперéт винóм одéжду свою́, и крóвiю грóздiя одея́нiе своè. Радостотвóрны óчи егò пáче винà, и белы̀ зýбы егò пáче млекà.
[Cинодальный перевод]Призвал Иаков сыновей своих и сказал: соберитесь, и я возвещу вам, что будет с вами в грядущие дни; сойдитесь и послушайте, сыны Иакова, послушайте Израиля, отца вашего. Иуда! тебя восхвалят братья твои. Рука твоя на хребте врагов твоих; поклонятся тебе сыны отца твоего. Молодой лев Иуда, с добычи, сын мой, поднимается. Преклонился он, лег, как лев и как львица: кто поднимет его? Не отойдет скипетр от Иуды и законодатель от чресл его, доколе не придет Примиритель, и Ему покорность народов. Он привязывает к виноградной лозе осленка своего и к лозе лучшего винограда сына ослицы своей; моет в вине одежду свою и в крови гроздьев одеяние своё; блестящи очи его от вина, и белы зубы его от молока.(Быт.49:1-2:8-12)
Чтец: Прорóчества Софóнiева чтéнiе.
(Из главы 3:) Тáко глагóлет Госпóдь: рáдуйся дщи Сióнова зелò, проповéдуй дщи Iерусали́мова, весели́ся и преукрашáйся от всегò сéрдца твоегò, дщи Iерусали́мля. Отъя́т Госпóдь непрáвды твоя́, и избáвил тя есть из рукѝ враг твои́х: воцари́тся Госпóдь посредè тебè, и не ýзриши зла ктомý. Во врéмя óно речéт Госпóдь Iерусали́му: дерзáй Сióне, да не ослабéют рýце твоѝ. Госпóдь Бог твой в тебè, Си́льный спасéт тя: наведéт на тя весéлiе, и обнови́т тя в любвѝ Своéй, и возвесели́тся о тебè во украшéнiи, я́ко в день прáздника. И соберý сотрéныя твоя́: гóре, кто прiи́мет нань поношéнiе? Се Аз сотворю́ в тебè, тебè рáди, глагóлет Госпóдь, во врéмя óно, и спасý утиснéнную, и отриновéнную прiимý, и положý я в похвалéнiе, и имени́ты по всей землѝ.
[Cинодальный перевод]Так говорит Господь: ликуй, дщерь Сиона! торжествуй, Израиль! веселись и радуйся от всего сердца, дщерь Иерусалима! Отменил Господь приговор над тобою, прогнал врага твоего! Господь, царь Израилев, посреди тебя: уже более не увидишь зла. В тот день скажут Иерусалиму: "не бойся", и Сиону: "да не ослабевают руки твои!" Господь Бог твой среди тебя, Он силен спасти тебя; возвеселится о тебе радостью, будет милостив по любви Своей, будет торжествовать о тебе с ликованием. Сетующих о торжественных празднествах Я соберу: твои они, на них тяготеет поношение. Вот, Я стесню всех притеснителей твоих в то время и спасу хромлющее, и соберу рассеянное, и приведу их в почет и именитость на всей этой земле поношения их.(Соф.3:14-19)
Чтец: Прорóчества Захáрiина чтéнiе.
(Из главы 9:) Тáко глагóлет Госпóдь: рáдуйся зелò дщи Сióня, проповéдуй дщи Iерусали́мля, се Царь твой грядéт тебè прáведен и спасáяй, Той крóток, и всед на подъярéмника и жребцà ю́на. И потреби́т колесни́цы от Ефрéма, и кóни от Iерусали́ма, и потреби́т лук брáнный, и мнóжество, и мир от язы́ков: и обладáет водáми от мóря до мóря, и от рек до исхóдищ земли́. И ты в крóви завéта твоегò, испусти́л еси́ ýзники твоя́ от рóва не имýща воды̀. Ся́дите в твердéлех свя́зани сóнмища, и за еди́н день пришéльствiя твоегò сугýбо воздáм ти. Занéже напрягóх тя Себè Iýдо я́ко лук, испóлних Ефрéма, и воздви́гну чáда твоя́ Сióне на чáда éллинска, и осяжý тя я́ко меч рáтника. И Госпóдь на них яви́тся, и изы́дет я́ко мóлнiя стрелà егò: и Госпóдь Бог Вседержи́тель в трубý вострýбит, и пóйдет в шýме прещéнiя Своегò. Госпóдь Вседержи́тель защити́т их.
[Cинодальный перевод]Так говорит Господь: ликуй от радости, дщерь Сиона, торжествуй, дщерь Иерусалима: се Царь твой грядет к тебе, праведный и спасающий, кроткий, сидящий на ослице и на молодом осле, сыне подъяремной. Тогда истреблю колесницы у Ефрема и коней в Иерусалиме, и сокрушен будет бранный лук; и Он возвестит мир народам, и владычество Его будет от моря до моря и от реки до концов земли. А что до тебя, ради крови завета твоего Я освобожу узников твоих изо рва, в котором нет воды. Возвращайтесь на твердыню вы, пленники надеющиеся! Что теперь возвещаю, воздам тебе вдвойне. Ибо как лук Я натяну Себе Иуду и наполню лук Ефремом, и воздвигну сынов твоих, Сион, против сынов твоих, Иония, и сделаю тебя мечом ратоборца. И явится над ними Господь, и как молния вылетит стрела Его, и возгремит Господь Бог трубою, и шествовать будет в бурях полуденных. Господь Саваоф будет защищать их.(Зах.9:9-15)
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехà сохрани́тися нам./ Благословéн есѝ, Гóсподи Бóже ѻтéц нáших,/ и хвáльно и прослáвлено и҆́мя Твоè во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн есѝ, Гóсподи, научѝ мя оправдáнiем Твои́м./ Благословéн есѝ, Влады́ко, вразумѝ мя оправдáнiем Твои́м./ Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя́ во век, дел рукý Твоéю не прéзри./ Тебè подобáет хвалà. Тебè подобáет пéнiе,/ Тебè слáва подобáет, Ѻтцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
ЛИТИЯ
Стiхúры Трióди (вáiй) самоглáсны, глас 1: Всесвяты́й Дух,/ апóстолы научи́вый глагóлати ины́ми стрáнными язы́ки,/ Той дéтем еврéйским неискусозлóбным повелевáет звáти:/ осáнна в вы́шних,// благословéн гряды́й Царь Iзрáилев.
Собезначáльный и соприсносýщный,/ Сын и Слóво Óтчее,/ на жребя́ти безсловéсном седя́,/ прiи́де днесь во град Iерусали́м,/ Егóже херувíми со стрáхом зрéти не мóгут,/ дéти восхвали́ша, с вáiем и вéтвьми,/ хвалý тáинственно воспевáюще:/ осáнна в вы́шних, осáнна Сы́ну Давíдову,// пришéдшему спастѝ от прéлести весь род наш.
Прéжде шестѝ дней Пáсхи,/ глас Твой услы́шася Гóсподи, во глубинáх áдовых:/ тéмже и Лáзаря четвероднéвна воздви́гл есѝ./ Дéти же еврéйскiя взывáху:// осáнна Бóже наш, слáва Тебè.
Глас 2: Входя́щу Ти Гóсподи/ во святы́й град, на жребя́ти седя́,/ потщáлся есѝ прiитѝ на страсть,/ да соверши́ши закóн и прорóки./ Дéти же еврéйскiя воскресéнiя побéду предвозвещáюще,/ сретáху Тя с вéтвьми и вáiем, глагóлюще:// благословéн есѝ Спáсе, поми́луй нас.
Слáва Тебè Хрїстè,/ в вы́шних седя́щему на престóле,/ и ны́не чáемому с честны́м Твои́м Крестóм./ Тéмже весели́тся дщи Сióнова,/ рáдуются язы́цы земнíи,/ вéтви держáт дéти, ри́зы же ученицы̀,/ и вся вселéнная научи́ся вопи́ти Тебè:// благословéн есѝ Спáсе, поми́луй нас.
Слáва Отцý и Сыну и Святóму Дýху, и ныне и прúсно и во вéки векóв, амúнь.
Глас 3: Прéжде шестѝ дней бытiя́ Пáсхи,/ прiи́де Iисýс во Вифáнiю,/ воззвáти умéрша четвероднéвна Лáзаря,/ и проповéдати воскресéнiе./ Сретóша же егò и жены̀,/ Мáрфа и Марíя сестры̀ Лáзаревы, вопiю́ще к Немý:/ Гóсподи, áще бы есѝ был зде, не бы ýмерл брат наш./ Тогдà глагóла к ним:/ не предрекóх ли вам: вéруяй в Мя, áще и ýмрет, жив бýдет:/ покажи́те ми, где положи́сте егò?/ И вопiя́ше к немý Зижди́тель всех:// Лáзаре, грядѝ вон.
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СТИХИРЫ НА СТИХОВНЕ
Чтец (Стихúры Трióди (вáiй), глас 8, самоглáсны): Рáдуйся и весели́ся грáде Сióне,/ красýйся и рáдуйся Цéркве Бóжiя:/ се бо Царь твой прiи́де в прáвде,/ на жребя́ти седя́, от детéй воспевáемый:/ осáнна в вы́шних, благословéн есѝ,// Имéяй мнóжество щедрóт, поми́луй нас.
Стiх: Из уст младéнец и ссýщих совершúл есù хвалý.
Прiи́де Спас днесь во град Iерусали́м,/ испóлнити Писáнiе,/ и вси прiя́ша в рýки вáiа:/ ри́зы же подстилáху Емý,/ вéдуще, я́ко Той есть Бог наш,/ Емýже херувíми вопiю́т непрестáнно:/ осáнна в вы́шних, благословéн есѝ,// Имéяй мнóжество щедрóт поми́луй нас.
Стiх: Гóсподи Госпóдь наш, я́ко чýдно úмя Твоè по всей землù.
На херувíмех носи́мый, и певáемый от серафíм,/ возсéл еси́ на жребя́ Давíдски Блáже:/ и дéти Тя воспевáху Боголéпно,/ iудéе же хýляху беззакóнно:/ стрóпотное язы́ков, седáлище жребцà прообразовáше,/ из невéрiя в вéру претворя́емое./ Слáва Тебè Хрїстè,// еди́не Ми́лостиве и Человеколю́бче.
Слáва Ѻтцý и Сы́ну и Святóму Дýху.
Глас 6: Днесь благодáть Святáго Дýха нас собрà,/ и вси взéмше крест Твой глагóлем,/ благословéн Гряды́й во и́мя Госпóдне,// осáнна в вы́шних.
И ны́не и прúсно и во вéки векóв, амúнь.
Днесь благодáть Святáго Дýха нас собрà,/ и вси взéмше крест Твой глагóлем,/ благословéн Гряды́й во и́мя Госпóдне,// осáнна в вы́шних.
Молитва святаго Симеона Богоприимца
Ны́не отпущáеши рабà Твоегò, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоè,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.
Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
Тропáрь Трióди (вáiй), глас 1: Óбщее воскресéніе/ прéжде Твоея́ Стрáсти уверя́я,/ из мéртвых воздвúгл есù Лáзаря, Хрїстè Бóже./ Тéмже и мы, я́ко óтроцы побéды знáменiя нося́ще,/ Тебè победúтелю смéрти вопіéм:/ осáнна в вы́шних,// благословéн Гряды́й во úмя Госпóдне. (двáжды)
Ин тропáрь Трióди (вáiй), глас 4: Спогрéбшеся Тебè крещéнiем, Хрїстè Бóже наш,/ безсмéртныя жúзни сподóбихомся Воскресéнiем Твоúм,/ и воспевáюще зовéм:/ осáнна в вы́шних,// благословéн Гряды́й во úмя Госпóдне.
Бýди и҆́мя Госпóдне благословéно от ны́не и до вéка. (Трúжды)
Псалом 33
Благословлю́ Гóспода на вся́кое врéмя,/ вы́ну хвалà Егò во устéх мои́х./ О Гóсподе похвáлится душà моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егò вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицà вáша не постыдя́тся./ Сей ни́щiй воззвà, и Госпóдь услы́ша и҆̀,/ и от всех скорбéй егò спасè и҆̀./ Ополчи́тся Áнгел Госпóдень óкрест боя́щихся Егò,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егò,/ яко несть лишéнiя боя́щымся Егò./ Богáтiи обнищáша и взалкáша,/ взыскáющiи же Гóспода не лишáтся вся́каго блáга.[B приходской практитке пропускается]/ Прiиди́те, чáда, послýшайте менè,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнè твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Óчи Госпóдни на прáведныя,/ и ýши Егò в моли́тву их./ Лицè же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша и҆́х,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютà,/ и ненави́дящiи прáведнаго прегрешáт./ Избáвит Госпóдь дýши раб Свои́х,/ и не прегрешáт вси уповáющiи на Негò.
И глаголи ýтреню