ПРОЩЕНОЕ ВОСКРЕСЕНИЕ. Неделя сыропустная Воспоминание Адамова изгнания.ВСЕНОЩНОЕ БДЕНИЕ УТРЕНЯ.КАНОН
17 мáрта 2024 гóда. Недéля сыропýстная. Прощéное воскресéнье. Воспоминáнiе Адáмова изгнáнiя. Заговенье на Велúкiй пост. Глас 8. Воскрéсная прáздничная слýжба для домáшнего (келéйнаго) совершéнiя. Вся слýжба прáздника по Октóиху и Трióди. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
[Псалом 135 Аллилуиа]Исповéдайтеся Бóгу богóв, я́ко в век ми́лость Егò./ Исповéдайтеся Гóсподеви господéй, я́ко в век ми́лость Егò./ Сотвóршему чудесà вéлiя еди́ному, я́ко в век ми́лость Егò./ Сотвóршему небесà рáзумом, я́ко в век ми́лость Егò./ Утверди́вшему зéмлю на водáх, я́ко в век ми́лость Егò./ Сотвóршему свети́ла вéлiя еди́ному, я́ко в век ми́лость Егò./ Сóлнце во óбласть дне, я́ко в век ми́лость Егò./ Лунý и звéзды во óбласть нóщи, я́ко в век ми́лость Егò./ Порази́вшему Еги́пта с пéрвенцы eгò, я́ко в век ми́лость Егò,/ и извéдшему Iзрáиля от среды́ их, я́ко в век ми́лость Егò./ Рукóю крéпкою и мы́шцею высóкою, я́ко в век ми́лость Егò./ Раздéльшему Чермнóе мóре в разделéнiя, я́ко в век ми́лость Егò./ И провéдшему Iзрáиля посредè eгò, я́ко в век ми́лость Егò./ И истря́сшему фараóна и си́лу eгò в мóре Чермнóе, я́ко в век ми́лость Егò./ Провéдшему лю́ди Своя́ в пусты́ни, я́ко в век ми́лость Егò./ Порази́вшему царѝ вéлiя, я́ко в век ми́лость Егò,/ и уби́вшему царѝ крéпкiя, я́ко в век ми́лость Егò:/ Сиóна, царя́ Аморрéйска, я́ко в век ми́лость Егò,/ и Óга, царя́ Васáнска, я́ко в век ми́лость Егò./ И дáвшему зéмлю их достоя́нiе, я́ко в век ми́лость Егò./ Достоя́нiе Iзрáилю, рабý Своемý, я́ко в век ми́лость Егò./ Я́ко во смирéнiи нáшем помянý ны Госпóдь, я́ко в век ми́лость Егò./ И избáвил ны есть от врагóв нáших, я́ко в век ми́лость Егò./ Дая́й пи́щу вся́кой плóти, я́ко в век ми́лость Егò.
Исповéдайтеся Бóгу Небéсному, я́ко в век ми́лость Егò.
Аллилýїа (трúжды)
Псалом 136
На рекáх Вавилóнских, тáмо седóхом и плáкахом, внегдà помянýти нам Сióна. (Аллилýїа) На вéрбiих посредè eгò обéсихом оргáны нáша. (Аллилýїа) Я́ко тáмо вопроси́ша ны плéншiи нас о словесéх пéсней и вéдшiи нас о пéнiи: воспóйте нам от пéсней Сióнских. (Аллилýїа) Кáко воспоéм песнь Госпóдню на земли́ чуждéй? (Аллилýїа) Áще забýду тебè, Iерусали́ме, забвéна бýди десни́ца моя́. (Аллилýїа) Прильпни́ язы́к мой гортáни моемý, áще не помянý тебè, áще не предложý Iерусали́ма, я́ко в начáле весéлiя моегò. (Аллилýїа) Помяни́, Гóсподи, сы́ны Едóмскiя, в день Iерусали́мль глагóлющыя: истощáйте, истощáйте до основáнiй eгò. (Аллилýїа) Дщи Вавилóня окая́нная, блажéн и҆́же воздáст тебè воздая́нiе твоè, éже воздалà еси́ нам. (Аллилýїа) Блажéн и҆́же имéт и разбiéт младéнцы твоя́ о кáмень. (Аллилýїа)
ТРОПАРИ ВОСКРЕСНЫЕ, ГЛАС 5
Благословéн есù, Гóсподи,/научù мя оправдáнiем Твоúм.(Пс.118:12)
Áнгельскiй собóр удиви́ся,/ зря Тебè в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есù, Гóсподи,/научù мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есù, Гóсподи,/научù мя оправдáнiем Твоúм.
Зелó рáно мvронóсицы течáху/ ко грóбу Твоемý рыдáющiя,/ но предстà к ним Áнгел и речè:/ рыдáнiя врéмя престà, не плáчите,/ воскресéнiе же апóстолом рцы́те.
Благословéн есù, Гóсподи,/научù мя оправдáнiем Твоúм.
Мvронóсицы жены̀ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речè, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егò Сы́нови, и Святóму Дýху,/ Святéй Трóице во еди́ном существè,/ с Серафíмы зовýще:/ Свят, Свят, Свят есѝ, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехà, Дéво, Адáма избáвила есѝ,/ рáдость же Éве/ в печáли мéсто подалà есѝ,/ пáдшiя же от жи́зни/ к сей напрáви/ из Тебè воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 8: Мvронóсицы Жизнодáвца предстоя́ща грóбу,/ Влады́ку искáху в мéртвых, Безсмéртнаго,/ и рáдость благовéщенiя от Áнгела прiéмша, апóстолом возвещáху:/ я́ко воскрéсе Хрїстóс Бог,// подая́й мíрови вéлiю ми́лость.
СТЕПЕННА, ГЛАС 8
1 АНТИФОН
Хор: От ю́ности моея́ враг мя искушáет, сластьмù палúт мя:// аз же надéяся на Тя, Гóсподи, побеждáю сегò. (Двáжды)
Ненави́дящiи Сióна,/ да бýдут ýбо прéжде исторжéнiя я́ко травà:// ссéчет бо Хрїстóс вы́я их, усечéнiем мук. (Двáжды)
Слáва Ѻтцý и Сы́ну и Святóму Дýху.
Святы́м Дýхом, Éже жи́ти вся́ческим:/ Свет от Свéта, Бог Вели́к:// со Отцéм поéм Емý, и с Слóвом.
И ны́не и прúсно и во вéки векóв. Амúнь.
Святы́м Дýхом, Éже жи́ти вся́ческим:/ Свет от Свéта, Бог Вели́к:// со Отцéм поéм Емý, и с Слóвом.
2 АНТИФОН
Сéрдце моé стрáхом Твоúм да покры́ется смиренномýдрствующее:// да не вознéсшееся отпадéт от Тебè, Всещéдре. (Двáжды)
На Гóспода имéвый надéжду, не устраши́тся тогдà,// егдà огнéм вся суди́ти и҆́мать, и мýкою. (Двáжды)
Слáва Ѻтцý и Сы́ну и Святóму Дýху.
Святы́м Дýхом, всяк кто божéственный ви́дит, и предглагóлет,/ чудодéйствует вы́шняя, в Трiéх Еди́наго Бóга поя́:// áще бо и трисiя́ет, единоначáльствует Божествó.
И ны́не и прúсно и во вéки векóв. Амúнь.
Святы́м Дýхом, всяк кто божéственный ви́дит, и предглагóлет,/ чудодéйствует вы́шняя, в Трiéх Еди́наго Бóга поя́:// áще бо и трисiя́ет, единоначáльствует Божествó.
3 АНТИФОН
Воззвáх Тебè, Гóсподи, вонмù,/ приклонù ми ýхо Твоè вопiю́щу, и очúсти,// прéжде дáже не вóзмеши менè отсю́ду. (Двáжды)
В мáтери своéй землѝ отходя́й всяк, пáки разрешáется,// прiя́ти мýки, илѝ пóчести пожи́вших. (Двáжды)
Слáва Ѻтцý и Сы́ну и Святóму Дýху.
Святы́м Дýхом богослóвiе, Еди́ница Трисвятáя:/ Отéц бо Безначáлен: от Негóже роди́ся Сын безлéтно,// и Дух Сопрестóлен, Сообрáзен, от Отцà спросiя́вшiй.
И ны́не и прúсно и во вéки векóв. Амúнь.
Святы́м Дýхом богослóвiе, Еди́ница Трисвятáя:/ Отéц бо Безначáлен: от Негóже роди́ся Сын безлéтно,// и Дух Сопрестóлен, Сообрáзен, от Отцà спросiя́вшiй.
4 АНТИФОН
Се ны́не что добрò, илù что краснò; но éже жúти брáтiи вкýпе:// в сем бо Госпóдь обещà живóт вéчный. (Двáжды)
О ри́зе своéй, И҆́же кри́ны сéльныя украшáяй,// повелевáет, я́ко не подобáет пещи́ся. (Двáжды)
Слáва Ѻтцý и Сы́ну и Святóму Дýху.
Святы́м Дýхом, Единови́дною винóю,/ вся содержáтся мироподáтельне:// Бог бо Сей есть, Отцý же и Сы́нови Единосýщен Госпóдственне.
И ны́не и прúсно и во вéки векóв. Амúнь.
Святы́м Дýхом, Единови́дною винóю,/ вся содержáтся мироподáтельне:// Бог бо Сей есть, Отцý же и Сы́нови Единосýщен Госпóдственне.
ПРОКИМЕН
Чтец: Прокíмен, глас осьмы́й, псалóм Давíдов. Воцари́тся Госпóдь во век, Бог твой, Сióне, в род и род. (Пс.145:10)
Хор: Воцарúтся Госпóдь во век,/ Бог твой, Сióне, в род и род.
Чтец: Хвалѝ, душè моя, Гóспода, восхвалю́ Гóспода в животè моéм. (Пс.145:1-2А)
Хор: Воцарúтся Госпóдь во век,/ Бог твой, Сióне, в род и род.
Чтец: Воцари́тся Госпóдь во век.
Хор: Бог твой, Сióне, в род и род.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егò, хвали́те Егò во утвержéнiи си́лы Егò.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Iоáнна Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Ин.зач.64): Во врéмя óно, Марíя стоя́ше у грóба вне плáчущи. Я́коже плáкашеся, прини́че во гроб и ви́де два Áнгела в бéлых ри́зах седя́ща, еди́наго у главы́ и еди́наго у ногý, идéже бе лежáло тéло Iисýсово. И глагóласта ей óна: жéно, что плáчешися? Глагóла и҆́ма: я́ко взя́ша Гóспода моегó, и не вем, где положи́ша Егó. И сiя́ рéкши обрати́ся вспять и ви́де Iисýса стоя́ща, и не вéдяше, я́ко Iисýс есть. Глагóла ей Iисýс: жéно, что плáчеши, когó и҆́щеши? Онá же мня́щи, я́ко вертогрáдарь есть, глагóла Емý: гóсподи, áще ты еси́ взял Егó, повéждь ми, где еси́ положи́л Егó, и аз возмý Егó. Глагóла ей Iисýс: Марíе. Онá же обрáщшися глагóла Емý: Раввуни́, éже глагóлется, Учи́телю. Глагóла ей Iисýс: не прикасáйся Мне, не у бо взыдóх ко Отцý Моемý: иди́ же ко брáтiи Моéй и рцы им: восхождý ко Отцý Моемý и Отцý вáшему, и Бóгу Моемý и Бóгу вáшему. Прiи́де же Марíя Магдали́на повéдающи ученикóм, я́ко ви́де Гóспода, и сiя́ речé ей.
[Синодальный перевод]В те дни, Мария стояла у гроба и плакала. И, когда плакала, наклонилась во гроб, и видит двух Ангелов, в белом одеянии сидящих, одного у главы и другого у ног, где лежало тело Иисуса. И они говорят ей: жена! Что ты плачешь? Говорит им: унесли Господа моего, и не знаю, где положили Его. Сказав сие, обратилась назад и увидела Иисуса стоящего; но не узнала, что это Иисус. Иисус говорит ей: жена! что ты плачешь? кого ищешь? Она, думая, что это садовник, говорит Ему: господин! если ты вынес Его, скажи мне, где ты положил Его, и я возьму Его. Иисус говорит ей: Мария! Она, обратившись, говорит Ему: Раввунù! - что значит: Учитель! Иисус говорит ей: не прикасайся ко Мне, ибо Я еще не восшел к Отцу Моему; а иди к братьям Моим и скажи им: восхожу к Отцу Моему и Отцу вашему, и к Богу Моему и Богу вашему. Мария Магдалина идет и возвещает ученикам, что видела Господа и что Он это сказал ей. (Ин.20:11-18)
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстè, и святóе Воскресéнiе Твоè поéм и слáвим: Ты бо есѝ Бог наш, рáзве Тебè инóго не знáем, и҆́мя Твоè именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдà благословя́ще Гóспода, поéм Воскресéнiе Егò: распя́тiе бо претерпéв, смéртiю смерть разрушѝ.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегò, и от грехà моегò очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдà суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелю́ся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицà Твоегò, и Дýха Твоегò Святáго не отымѝ от менè. Воздáждь ми рáдость спасéнiя Твоегò, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегò, возрáдуется язык мой прáвде Твоéй. Гóсподи, устнè мои отвéрзеши, и устà моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдà благоволи́ши жéртву прáвды, возношéнiе и всесожегáемая; тогдà возложáт на олтáрь Твой тельцы̀.
Слáва Ѻтцý и Сы́ну и Святóму Дýху.
Глас 8 (Трióди): Покая́нiя отвéрзи ми двéри Жизнодáвче,/ ýтренюет бо дух мой ко хрáму святóму Твоемý,/ храм нося́й телéсный весь осквернéн:/ но я́ко щедр, очи́сти// благоутрóбною Твоéю ми́лостiю.
И ны́не и прúсно и во вéки векóв. Амúнь.
Богорóдичен (Трióди): На спасéнiя стези́ настáви мя Богорóдице,/ стýдными бо окаля́х дýшу грехми́,/ и в лéности все житié моé ижди́х:/ но Твои́ми моли́твами/ избáви мя от вся́кiя нечистоты̀.
Тáже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè.(Пс.50:3)
Стiхúра (Трióди), глас 6: Мнóжества содéянных мнóю лю́тых, помышля́я окая́нный,/ трепéщу стрáшнаго дне сýднаго:/ но надéяся на ми́лость благоутрóбiя Твоегó,/ я́ко Давíд вопiю́ Ти:/ поми́луй мя Бóже// по вели́цей Твоéй ми́лости.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 8
(совмещéнный с канóном крестовоскрéсным (глас 8), Богорóдицы (глас 8) и канóном Трióди, глас 6)
ПЕСНЬ 1
Iрмóс: Колесницегонúтеля фараóня погрузù/ чудотворя́й иногдà/ Моисéйскiй жезл, крестообрáзно поразúв,/ и разделúв мóре,/ Iзрáиля же беглецà, пешехóдца спасè,// песнь Бóгови воспевáюща.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Всеси́льну Хрїстóву Божествý кáко не диви́мся;/ от страстéй ýбо всем вéрным, безстрáстiе и нетлéнiе точáщу,/ от ребрà же Святáго истóчник безсмéртiя искáпающу,// и Живóт из грóба Присносýщный.
Хор: Слáва, Гóсподи, Святóму Воскресéнiю Твоемý.
Чтец: Я́ко благолéпен женáм Áнгел ны́не яви́ся,/ свéтлыя нося́ óбразы естéственныя невещéственныя чистоты̀,// зрáком же возвещáя свет воскресéнiя, зовы́й: воскрéсе Госпóдь.
Хор: Пресвятáя Богорóдице, спасù нас.
Богорóдичен: Преслáвная возглагóлашася о Тебè в родéх родóв,/ Бóга Слóва во чрéве вмéщшая,/ чистà же пребы́вши Богорóдице Марíе.// Тéмже Тя вси почитáем, сýщее по Бóзе заступлéнiе нáше.
Канон крестовоскресный, глас 8
Хор: Слáва, Гóсподи, Крестý Твоемý Честнóму и Воскресéнiю.
Чтец: Взя́шася вратà болéзненная,/ и ужасóшася врáтницы áдовы,/ зря́ще в преиспóднейшая Сошéдшаго,// И́же на высотé всех превы́ше естествà.
Хор: Слáва, Гóсподи, Крестý Твоемý Честнóму и Воскресéнiю.
Чтец: Удиви́шася чи́ни Áнгельстiи,/ зря́ще на престóле посаждéно Ѻ́тчи,/ отпáдшее естествó человéческое,// затворéное в преиспóдних земли́.
Канон Богородицы, глас 8
Хор: Пресвятáя Богорóдице, спасù нас.
Чтец: Пречи́стая Богорóдице,/ воплóщшееся Присносýщное и Пребожéственное Слóво,// пáче естествà рóждши, поéм Тя.
Хор: Пресвятáя Богорóдице, спасù нас.
Чтец: Грозд Тя Живонóсен,/ всемíрнаго искáпающ слáдость спасéнiя,// Дéва, Хрїстé, родѝ.
Канон постной Триоди, глас 6
Хор: Помúлуй мя, Бóже, помúлуй мя.
Чтец: Гряди́ душé моя́ стрáстная, плáчи твоя́ дея́нiя днесь,/ поминáющи пéрвое обнажéнiе во Едéме,// и́мже изгнáна еси́ от слáдости, и непрестáнныя рáдости. (двáжды)
Хор: Помúлуй мя, Бóже, помúлуй мя.
Чтец: От мнóгаго благоутрóбiя и щедрóт,/ Создáтелю твáри, и Твóрче всех,/ от пéрсти оживи́в мя прéжде,// заповéдал еси́ пéти Тя со áнгелы Твои́ми.
Хор: Помúлуй мя, Бóже, помúлуй мя.
Чтец: Рáди богáтства блáгости, Ты сади́ши Создáтелю и Гóсподи,/ рáйскую слáдость во Едéме,/ повелевáя ми наслаждáтися крáсных и слáдких,// и немимотекýщих плодóв.
Слáва Отцý и Сы́ну и Святóму Дýху.
Тропáрь: Увы̀ мне душé моя́ окая́нная,/ сýщих во Едéме наслаждáтися прiя́ла еси́ власть от Бóга,/ не я́сти же вéденiя плодà повелéна былà еси́:// вскýю преступи́ла еси́ закóн Бóжiй?
И ны́не и прúсно и во вéки векóв, амúнь.
Богорóдичен: Богороди́тельнице Дéво, я́ко Адáмова дщи по рóду,/ по благодáти же Хрiстý Бóгу роди́тельница,// менé изгнáннаго от Едéма, ны́не воззови́.
Катавáсiя Трióди (глас 6): Я́ко по сýху пешешéствовав Iзрáиль,/ по бéздне стопáми,/ гонúтеля фараóна/ вúдя потопля́ема,// Бóгу побéдную песнь поúм, вопiя́ше.
ПЕСНЬ 3
Iрмóс: Утверждéй в начáле Небесà рáзумом,/ и зéмлю на водáх основáвый,/ на кáмени мя, Хрїстè, зáповедей Твоúх утвердù,/ я́ко несть свят, пáче Тебè// Едúне Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Осуждéна бы́вша Адáма вкушéнiем грехà,/ плóти Твоея́ спаси́тельною стрáстiю оправдáл есѝ, Хрїстè:// Сам бо непови́нен смéртнаго искýса был есѝ, Безгрéшне.
Хор: Слáва, Гóсподи, Святóму Воскресéнiю Твоемý.
Чтец: Воскресéнiя свет возсiя́/ сýщим во тьме, и сéни смéртней седя́щим,/ Бог мой Iисýс,/ и Свои́м Божествóм крéпкаго связáв,// сегó сосýды расхи́тил есть.
Хор: Пресвятáя Богорóдице, спасù нас.
Богорóдичен: Херувíмов и Серафíмов превы́шши яви́лася есѝ, Богорóдице:/ Ты бо Еди́на прiя́ла есѝ Невмести́маго Бóга в Твоéм чрéве, Несквéрная:// тéмже Тя вéрнiи вси пéсньми, Чи́стая, ублажáем.
Глас 8
Хор: Слáва, Гóсподи, Крестý Твоемý Честнóму и Воскресéнiю.
Чтец: Отвéргшагося прéжде зáповеди, Гóсподи,/ изриновéна мя от Тебé сотвори́л еси́,/ в негóже вообрази́вся, послушáнiю же навы́к,/ Себé пáки наздáл еси́ распя́тiем.
Хор: Слáва, Гóсподи, Крестý Твоемý Честнóму и Воскресéнiю.
Чтец: Премýдростiю вся проувéдевый, Гóсподи,/ и рáзумом Твои́м водрузи́вый преиспóдняя,/ не не сподóбил еси́ снизхождéнiем Твои́м, Слóве Бóжiй,/ воскреси́ти, éже по óбразу Твоемý.
Глас 8
Хор: Пресвятáя Богорóдице, спасù нас.
Чтец: Даждь нам пóмощь Твои́ми моли́твами, Всечи́стая,// прилóги отражáющи лю́тых обстоя́нiй.
Хор: Пресвятáя Богорóдице, спасù нас.
Чтец: Éве прамáтери Ты исправлéнiе бы́ла есѝ,// Начáльника жи́зни мíрови, Хрїстà Богорóдице, рóждши.
Глас 6
Хор: Помúлуй мя, Бóже, помúлуй мя.
Чтец: Змiй льсти́вый нéкогда чéсти моéй позави́дев,/ пошептà лéстiю Éве во ýши,/ от нея́же аз прельсти́вся изгнáн бых,// увы̀ мне, от ли́ка жи́зни. (двáжды)
Хор: Помúлуй мя, Бóже, помúлуй мя.
Чтец: Рýку простéр дéрзостно, вкуси́х дрéва разýмнаго,/ егóже повелé мне Бог никáкоже причасти́тися,// и Божéственныя слáвы отвéржен бых гóрце. (двáжды)
Слáва Отцý и Сы́ну и Святóму Дýху.
Тропáрь: Увы̀ мне стрáстная моя́ душé, кáко не познáла еси́ прéлести?/ Кáко не ощути́ла еси́ льщéнiя, и зáвисти врáжiя?// Но помрачи́лася еси́ умóм, и преступи́ла еси́ зáповедь Создáтеля твоегó.
И ны́не и прúсно и во вéки векóв, амúнь.
Богорóдичен: Уповáнiе и покрóв мой Чи́стая,/ обнажéнiе дрéвле покры́вшая, еди́на, пáдшаго Адáма,// Рождествóм Твои́м Чи́стая, в нетлéнiе пáки облецы̀ мя.
Катавáсiя Трióди (глас 6): Несть свят,/ я́коже Ты, Гóсподи Бóже мой,/ вознесы́й рог вéрных Твоúх, Блáже,/ и утвердúвый нас на кáмени// исповéданiя Твоегò.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Седáлен Трióди, глас 6: Изгнáн бысть Адáм от рáйскiя слáдости,/ снéдiю гóрькою в невоздержáнiи/ зáповеди не сохрани́ Влады́чни,/ и осуди́ся дéлати зéмлю, от нея́же взят бысть сам:/ пóтом же мнóгим я́сти хлеб свой./ Тéмже мы возлю́бим воздержáнiе,// да не вне рая́ возрыдáим, я́коже он, но в негó вни́дем. (Двáжды)
Слáва Ѻтцý и Сы́ну и Святóму Дýху.
Ин седáлен Трióди, глас тóйже: Ны́не врéмя добродéтелей яви́ся,/ и при двéрех Судiя́, не скорби́м,/ но прiиди́те постя́щеся принесéм слéзы,/ умилéнiе и ми́лостыню, зовýще:/ согреши́хом пáче пескà морскáго,/ но ослáби всем всех Свободи́телю,// да воспрiи́мем нетлéнный венéц.
И ны́не и прúсно и во вéки векóв. Амúнь.
Богорóдичен Трióди, глас 4: Не умолчи́м никогдà Богорóдице,/ си́лы Твоя́ глагóлати недостóйнiи:/ áще бо Ты не бы предстоя́ла моля́щи,/ кто бы нас избáвил от толи́ких бед,/ кто же бы сохрани́л до ны́не свобóдны?/ Не отстýпим Влады́чице, от Тебé:// Твоя́ бо рабы́ спасáеши при́сно от вся́ких лю́тых.
ПЕСНЬ 4
Iрмóс: Ты моя́ крéпость Гóсподи,/ Ты моя́ и сúла,/ Ты мой Бог, Ты моé рáдованiе,/ не остáвль нéдра Ѻ́тча,/ и нáшу нищетý посетúв./ Тем с прорóком Аввакýмом зовý Ти:// сúле Твоéй слáва, Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Ты врагà сýща мя зелó возлюби́л есѝ:/ Ты истощáнiем стрáнным сошéл есѝ на зéмлю, Благоутрóбне Спáсе,/ послéдняго моегó досаждéнiя не отвéргся,/ и пребы́в на высотé пречи́стыя Твоея́ слáвы,// прéжде безчéствованнаго прослáвил есѝ.
Хор: Слáва, Гóсподи, Святóму Воскресéнiю Твоемý.
Чтец: Кто зря, Влады́ко, ны́не не ужасáется,/ стрáстiю смерть разрушáему;/ Крестóм бежáщее тлéнiе,/ и смéртiю ад богáтства истощавáемый,/ Божéственною си́лою Тебè распя́таго;// чýдно дéло, Человеколю́бче!
Хор: Пресвятáя Богорóдице, спасù нас.
Богорóдичен: Ты вéрным похвалà есѝ, Безневéстная, Ты Предстáтельнице,/ Ты и прибéжище хрїстiáн, стенà и пристáнище:/ к Сы́ну бо Твоемý мольбы́ нóсиши, Всенепорóчная, и спасáеши от бед,// вéрою и любóвiю Богорóдицу Чи́стую Тебè знáющих.
Глас 8
Хор: Слáва, Гóсподи, Крестý Твоемý Честнóму и Воскресéнiю.
Чтец: На Крестé Тя пригвозди́ша законопрестýпных дéти, Хрiстé Бóже:/ и́мже спасл еси́ я́ко Благоутрóбен, слáвящiя Твоя́ страдáнiя.
Хор: Слáва, Гóсподи, Крестý Твоемý Честнóму и Воскресéнiю.
Чтец: Воскрéс от грóба, вся совоскреси́л еси́ сýщiя во áде мéртвыя,/ и просвети́л еси́ я́ко Благоутрóбен, слáвящiя Твоé воскресéнiе.
Глас 8
Хор: Пресвятáя Богорóдице, спасù нас.
Чтец: Клас возрасти́вшая животвóрный, неорáнная Ни́во,/ подаю́щаго мíрови жизнь, Богорóдице,// спасáй пою́щiя Тя.
Хор: Пресвятáя Богорóдице, спасù нас.
Чтец: Богорóдицу Тя, Всечи́стая, просвéщшiися вси проповéдуем:// Сóлнце бо прáвды родилá есѝ, Приснодéво.
Глас 6
Хор: Помúлуй мя, Бóже, помúлуй мя.
Чтец: Чéсти сподóбихся аз стрáстный,/ от Тебé Влады́ки во Едéме:/ увы̀ мне, кáко прельсти́вся, и дiáволом позави́девся// отвéржен бых от лицà Твоегó? (двáжды)
Хор: Помúлуй мя, Бóже, помúлуй мя.
Чтец: Менé рыдáйте áнгельстiи чи́нове,/ рая́ добрóты, и садóв тáмошнее благолéпiе,// прельсти́вшагося злополýчно, и Бóга отвéргшагося.
Хор: Помúлуй мя, Бóже, помúлуй мя.
Чтец: Лýже блажéнный, сáдове богосаждéннiи, рая́ красотó,/ ны́не о мне слéзы проливáйте,/ от листóв, я́коже от óчiю,// обнажéннем и стрáннем слáвы Бóжiя.
Слáва Отцý и Сы́ну и Святóму Дýху.
Тропáрь: Не ктомý ви́жу тебé,/ ни наслаждáюся преслáдкiя твоея́ и божéственныя свéтлости, всечестны́й раю́:// наг бо повергóхся в зéмлю, прогнéвая Сотвóршаго.
И ны́не и прúсно и во вéки векóв, амúнь.
Богорóдичен: Святáя Влады́чице, отвéрзшая рая́ вратà всем вéрным,/ я́же Адáм заключи́ преступлéнiем иногдà,// вратà ми́лости мне отвéрзи.
Катавáсiя Трióди (глас 6): Хрїстóс моя́ сúла,/ Бог и Госпóдь,/ честнáя Цéрковь/ боголéпно поéт, взывáющи,// от смы́сла чúста, о Гóсподе прáзднующи.
ПЕСНЬ 5
Iрмóс: Вскýю мя отрúнул есù/ от лицá Твоегó, Свéте Незаходúмый,/ и покры́ла мя есть чуждáя тьма, окая́ннаго;/ но обратù мя,/ и к свéту зáповедей Твоúх// путù моя́ напрáви, молю́ся.
Хор: Слáва, Гóсподи, Святóму Воскресéнiю Твоемý.
Чтец: Одéятися претерпéл еси́ в багряни́цу/ прéжде стрáсти Твоея́, Спáсе, поругáемь,/ первоздáннаго покрывáя безобрáзное обнажéнiе:/ и наг пригвозди́лся еси́ на Крестé плóтiю,// совлачáя, Хрїстé, ри́зу умерщвлéнiя.
Хор: Слáва, Гóсподи, Святóму Воскресéнiю Твоемý.
Чтец: От пéрсти смéртныя,/ Ты пáдшее моè пáки наздáл еси́ существó, воскрéс:/ и нестарéющееся, Хрїстè устрóил еси́,/ яви́в пáки я́коже цáрскiй óбраз,// нетлéнiя жизнь блистáющ.
Хор: Пресвятáя Богорóдице, спасù нас.
Богорóдичен: Мáтернее дерзновéнiе, éже к Сы́ну Твоемý имýщи, Всечи́стая,/ срóднаго промышлéнiя, éже о нас, не прéзри, мóлимся:// я́ко Тебè и Еди́ну хрїстiáне ко Влады́це очищéнiе ми́лостивно предлагáем.
Глас 8
Хор: Слáва, Гóсподи, Крестý Твоемý Честнóму и Воскресéнiю.
Чтец: Настáви нас си́лою Крестá Твоегó, Хрiстé:/ тем бо Тебé припáдаем,/ мир подáждь нам Человеколю́бче.
Хор: Слáва, Гóсподи, Крестý Твоемý Честнóму и Воскресéнiю.
Чтец: Окорми́ живóт наш, я́ко Преблагíй,/ пою́щих Твоé востáнiе,/ и мир подáждь нам, Человеколю́бче.
Глас 8
Хор: Пресвятáя Богорóдице, спасù нас.
Чтец: Утоли́ нестерпи́мую бýрю страстéй мои́х,// Я́же Бóга рóждшая, Окорми́теля и Гóспода.
Хор: Пресвятáя Богорóдице, спасù нас.
Чтец: Слýжат рождествý Твоемý, Пречи́стая Богорóдице,// Áнгельстiи чи́нове, и человéков собрáнiе.
Глас 6
Хор: Помúлуй мя, Бóже, помúлуй мя.
Чтец: Позави́дев дрéвле мне враг,/ в раи́ благополýчна житiя́ человеконенави́стник,/ в видéнiи зми́я мне запя́т,// и слáвы присносýщныя стрáнна мя показá. (двáжды)
Хор: Помúлуй мя, Бóже, помúлуй мя.
Чтец: Рыдáю и плáчу душéю,/ и очесéм ищу́ мнóжества слез прилагáти,/ егдá воззрю́ и познáю мою́ наготу́,// ю́же имéх от преступлéния. (двáжды)
Слáва Отцý и Сы́ну и Святóму Дýху.
Тропáрь: От земли́ сóздан бых рукóю Бóжиею,/ пáки же возврати́тися в зéмлю аз стрáстный слы́шах:/ кто менé не восплáчет, отриновéннаго от Бóга,// и Едéмом ад измени́вшаго?
И ны́не и прúсно и во вéки векóв, амúнь.
Богорóдичен: Чертóг слáвы Тя тáйный вси возвещáем вéрнiи, Богороди́тельнице Всенепорóчная./ Тéмже молю́ Тя Чи́стая:// испáдшаго мя чертóга рáйска, свóйственна сотвори́.
Катавáсiя Трióди (глас 6): Бóжiим свéтом Твоúм, Блáже,/ ýтренюющих Ти дýши любóвiю озарù, молю́ся,/ Тя вéдети, Слóве Бóжiй,/ úстиннаго Бóга,// от мрáка грехóвнаго взывáюща.
ПЕСНЬ 6
Iрмóс: Очúсти мя, Спáсе,/ мнóга бо беззакóнiя моя́,/ и из глубины́ зол возведù, молю́ся:/ к Тебé бо возопúх, и услы́ши мя,// Бóже спасéнiя моегó.
Хор: Слáва, Гóсподи, Святóму Воскресéнiю Твоемý.
Чтец: Дрéвом крéпко низложи́ мя началозлóбный:/ Ты же, Хрїстè, вознéсся на Крестè,/ крепчáе низложи́л еси́, посрами́в сегó,// пáдшаго же воскреси́л еси́.
Хор: Слáва, Гóсподи, Святóму Воскресéнiю Твоемý.
Чтец: Ты ущéдрил еси́ Сióна, возсiя́вый от грóба,/ нóваго вмéсто вéтхаго соверши́в, я́ко Благоутрóбен, Божéственною Твоéю крóвiю:// и ны́не цáрствуеши в нем во вéки, Хрїстè.
Хор: Пресвятáя Богорóдице, спасù нас.
Богорóдичен: Да избáвимся от лю́тых прегрешéнiй,/ мольбáми Твои́ми, Богороди́тельнице Чи́стая,/ и да улучи́м, Пречи́стая, Божéственное сiя́нiе,// из Тебè неизречéнно воплощéннаго Сы́на Бóжiя.
Глас 8
Хор: Слáва, Гóсподи, Крестý Твоемý Честнóму и Воскресéнiю.
Чтец: Длáни на Крестé распростéрл еси́,/ исцеля́яй неудержáнно простéртую во Едéме рýку первоздáннаго:/ и Твоéю вóлею жéлчи вкуси́в,/ и спасл еси́, Хрiстé, я́ко Си́лен,/ слáвящiя Твоя́ страдáнiя.
Хор: Слáва, Гóсподи, Крестý Твоемý Честнóму и Воскресéнiю.
Чтец: Смéрти Избáвитель вкуси́, дрéвняго осуждéнiя,/ я́ко да и тлéнiя цáрство разруши́т,/ и во áдская сшед, воскрéсе Хрiстóс,/ и спасé, я́ко Си́лен, пою́щiя Егó воскресéнiе.
Глас 8
Хор: Пресвятáя Богорóдице, спасù нас.
Чтец: Храм Тя Бóжiй и Ковчéг,/ и чертóг одушевлéнный, и дверь Небéсную,// Богорóдице, вéрнiи возвещáем.
Хор: Пресвятáя Богорóдице, спасù нас.
Чтец: Трéбищ разруши́тель, я́ко Бог,/ бы́вшее рождествó Твоè, Марíе Богоневéсто,// покланя́емо есть со Отцéм и Дýхом.
Глас 6
Хор: Помúлуй мя, Бóже, помúлуй мя.
Чтец: Одéждею мя облéкл еси́ боготкáнною Спáсе, во Едéме, я́ко благоутрóбен:/ аз же Твою́ преступи́х зáповедь, вéровав льсти́вому,// и наг ви́дехся окая́нный. (двáжды)
Хор: Помúлуй мя, Бóже, помúлуй мя.
Чтец: Душé всестрáстная моя́, удали́лася еси́ от Бóга,/ невнимáнiем твои́м рáйскаго лиши́лася еси́ наслаждéнiя,/ от áнгел разлучи́лася еси́, во тлю ввелáся еси́:// о падéнiя! (двáжды)
Слáва Отцý и Сыну и Святóму Дýху.
Тропáрь: Поми́луй, ущéдри Вседержи́телю Бóже,/ Твоéю рукý творéнiе,/ не прéзри менé, молю́ся, Блáже,// отлучи́вшаго себé самагó от ли́ка áнгел Твои́х.
И ныне и прúсно и во вéки векóв, амúнь.
Богорóдичен: Марíе Богозвáнная, Госпожé вся́ческих,/ я́ко рóждшая Гóспода Царя́ всех и Избáвителя,// пленéна мя сýща от рáйскiя слáвы, воззови́.
Катавáсiя Трióди (глас 6): Житéйское мóре,/ воздвизáемое зря напáстей бýрею,/ к тúхому пристáнищу Твоемý притéк, вопiю́ Ти:/ возведù от тли живóт мой,// Многомúлостиве.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк Трióди, глас 6: Премýдрости настáвниче, смы́сла подáтелю,/ немýдрых наказáтелю, и ни́щих защи́тителю,/ утверди́, вразуми́ сéрдце моé Влады́ко./ Ты даждь ми слóво, Óтчее Слóво,/ се бо устнé мои́ не возбраню́,/ во éже звáти Тебé:// Ми́лостиве, поми́луй мя пáдшаго.
Íкос: Сéде Адáм тогдá и плáкася, пря́мо слáдости рая́,/ рукáма бiя́ лицé, и глагóлаше:// Ми́лостиве, поми́луй мя пáдшаго. Ви́дев Адáм áнгела изри́нувша, и затвори́вша божéственнаго сáда дверь,/ воздохнýв вельми́, и глагóла:// Ми́лостиве, поми́луй мя пáдшаго. Споболи́ раю́ стяжáтелю обнищáвшему,/ и шýмом твои́х ли́ствий умоли́ Содéтеля, да не затвори́т тя:// Ми́лостиве, поми́луй мя пáдшаго. Раю́ вседобродéтельный, всесвяты́й, всебогáтый,/ Адáма рáди насаждéнный, и рáди Éвы заключéнный,/ умоли́ Бóга о пáдшем:// Ми́лостиве, поми́луй мя пáдшаго.
ПЕСНЬ 7
Iрмóс: Бóжiя снизхождéнiя/ огнь устыдéся в Вавилóне иногдá./ Сегó рáди óтроцы в пещù рáдованною ногóю,/ я́ко во цвéтнице ликýюще поя́ху:// благословéн есù, Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Слáвное истощáнiе,/ Божéственное богáтство Твоея́ нищеты́, Хрїстè, удивля́ет Áнгелы,/ на Крестè зря́щiя Тя пригвождáема,/ за éже спасти́ вéрою зовýщiя:// благословéн еси́ Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Божéственным Твои́м сошéствiем свéта испóлнил еси́ преиспóдняя,/ и тьма прогнáна бысть прéжде гоня́щая./ Отню́дуже воскресóша и҆́же от вéка ю́зницы, зовýще:// благословéн Бог отéц нáших.
Хор: Пресвятáя Трóице, Бóже наш, слáва Тебé.
Трóичен: Всем ýбо Гóспода,/ Еди́наго же еди́ному Единорóдному Сы́ну правослáвно Отцá,/ богослóвяще Тя возвещáем,/ и Еди́наго вéдяще от Тебè исходя́ща Дýха Прáваго,// Соестéственна и Соприсносýщна.
Глас 8
Хор: Слáва, Гóсподи, Крестý Твоемý Честнóму и Воскресéнiю.
Чтец: Спасéнiе содéлал еси́ посредé вселéнныя, прорóчески Бóже:/ на дрéво бо вознесéн быв, вся призвáл еси́ вéрою зовýщiя:/ отéц нáших Бóже, благословéн еси́.
Хор: Слáва, Гóсподи, Крестý Твоемý Честнóму и Воскресéнiю.
Чтец: Воскрéс от грóба, я́коже от сна, Щéдре,/ всех избáвил еси́ от тли,/ тварь же уверя́ется апóстолы проповéдающими востáнiе:/ отцéв Бóже, благословéн еси́.
Глас 8
Хор: Пресвятáя Богорóдице, спасù нас.
Чтец: От Дéвственных ложéсн воплóщься,/ яви́лся еси́ на Спасéнiе нáше./ Тéмже Твою́ Мáтерь вéдяще Богорóдицу, правослáвно зовéм:// отцéв Бóже, благословéн еси́.
Хор: Пресвятáя Богорóдице, спасù нас.
Чтец: Жезл прорасти́ла еси́, Дéво,/ от кóрене Iессéова, Всеблажéнная,/ Плод цветонося́щи спаси́тельный,/ вéрою Сы́ну Твоемý зовýщим:// отцéв Бóже, благословéн еси́.
Глас 6
Хор: Помúлуй мя, Бóже, помúлуй мя.
Чтец: Влады́чествуяй всéми вéки Гóсподи,/ создáвый мя вóлею Твоéю,/ зави́дена мя льсти́вым змíем иногдá, и Тебé прогнéвавшаго Спáсе,// не прéзри Бóже, но воззови́ мя. (двáжды)
Хор: Помúлуй мя, Бóже, помúлуй мя.
Чтец: Сту́дными одéян одéждами, увы́ мне, вмéсто одея́нiя светозáрнаго,/ плáчу моея́ поги́бели, Спáсе, и вéрою вопiю́ Ти Благíй:// не прéзри Бóже, но воззови́ мя. (двáжды)
Слáва Отцý и Сыну и Святóму Дýху.
Тропáрь: Уязви́ змiй вселукáвый всю мою́ дýшу лукáвно,/ рáйскiя же слáдости изгнáна сотвори́,// но о благосéрде Спáсе, не прéзри я́ко Бог, но воззови́ мя.
И ныне и прúсно и во вéки векóв, амúнь.
Богорóдичен: Молéбное моé молéнiе Всенепорóчная прiими́ ми́лостiю Твоéю,/ и прощéнiе прегрешéнiй даждь ми Чи́стая,/ рыдáньми вопiю́щему прилéжно:// не прéзри Благáя, но воззови́ мя.
Катавáсiя (глас 6): Росодáтельну ýбо пещь/ содéла Áнгел/ преподóбным отрокóм,/ халдéи же опаля́ющее/ велéнiе Бóжiе мучúтеля увещà вопúти:// благословéн есù, Бóже отéц нáших.
Продолжéнiе здесь