ПРОЩЕНОЕ ВОСКРЕСЕНИЕ.Неделя сыропустная.Воспоминание Адамова изгнания.УТРЕНЯ (окончание) ЧАС ПЕРВЫЙ
17 мáрта 2024 гóда. Недéля сыропýстная. Прощéное воскресéнье. Воспоминáнiе Адáмова изгнáнiя. Заговенье на Велúкiй пост. Глас 8. Воскрéсная прáздничная слýжба для домáшнего (келéйнаго) совершéнiя. Вся слýжба прáздника по Октóиху и Трióди. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
ПЕСНЬ 8
Iрмóс: Седмерúцею пещь/ халдéйскiй мучúтель Богочестúвым неúстовно разжжé,/ сúлою же лýчшею спасéны сiя́ вúдев,/ Творцý и Избáвителю вопiя́ше:/ óтроцы, благословúте,/ свящéнницы, воспóйте,// лю́дiе, превозносúте во вся вéки.
Хор: Слáва, Гóсподи, Святóму Воскресéнiю Твоемý.
Чтец: Iисýсова Божествá Пребожéственная си́ла,/ в нас боголéпно возсiя́ла есть:/ плóтiю бо вкуш за всех смерть крéстную,/ разруши́ áдову крéпость./ Егóже непрестáнно дéти благослови́те, свящéнницы воспóйте,// лю́дiе превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Распны́йся востá, великовы́йный падé,/ пады́й и сокрушéнный испрáвися,/ тля отвéржена бысть, и нетлéнiе процветé:// Жи́знiю бо мéртвенное пожéрто бысть. Дéти благослови́те, свящéнницы воспóйте, лю́дiе превозноси́те во вся вéки.
Хор: Пресвятáя Богорóдице, спасù нас.
Трóичен: Трисвéтлое Божествó,/ Еди́ну сiя́ющее зарю́ от Еди́наго Трiипостáснаго Естествá, Роди́теля Безначáльна:/ Единоестéственно же Слóво Отцý, и Сцáрствующаго Единосýщнаго Дýха,/ дéти благослови́те, свящéнницы воспóйте,// лю́дiе превозноси́те во вся вéки.
Глас 8
Хор: Слáва, Гóсподи, Крестý Твоемý Честнóму и Воскресéнiю.
Чтец: На дрéве рýце мне простéршаго, обнажéнному, призывáюща мя,/ Своéю благообрáзною согрéяти наготóю:/ благослови́те вся делá Госпóдня,/ и превозноси́те Егó во вéки.
Хор: Слáва, Гóсподи, Крестý Твоемý Честнóму и Воскресéнiю.
Чтец: Из преиспóдняго áда вознéсша мя, пáдшаго,/ и высокопрестóльною слáвою Роди́теля почéтшаго:/ благослови́те, вся делá Госпóдня, Гóспода,/ и превозноси́те Егó во вéки.
Глас 8
Хор: Пресвятáя Богорóдице, спасù нас.
Чтец: Сопроти́вных разжжéнныя и пламенови́дныя на нас угасѝ стрéлы:// я́ко да поéм Тя во вся вéки.
Хор: Пресвятáя Богорóдице, спасù нас.
Чтец: Преестéственне Содéтеля и Спáса,/ Бóга Слóва родилá есѝ, Дéво:// тéмже Тя поéм, и превознóсим во вся вéки.
Глас 6
Хор: Помúлуй мя, Бóже, помúлуй мя.
Чтец: Дарми́ многообрáзными дрéвле,/ почéл еси́ руку́ Твоéю дéло, еди́не Человеколю́бче:/ змий же лю́тый свистáнiем прельсти́, увы́ мне,// настоя́щих благ обнажи́в. (двáжды)
Хор: Помúлуй мя, Бóже, помúлуй мя.
Чтец: Вску́ю совéта гóрькаго послу́шала еси́,/ и Божéственнаго повелéния былá еси́ преслу́шна?/ Увы мне смирéнная душé, Бóга оскорби́вшая:// Егóже при́сно слáвити учине́на еси́ со áнгелы! (двáжды)
Благословúм Отцá, и Сы́на, и Святáго Дýха, Гóспода.
Тропáрь: Гадóм и зверéм влады́чица бы́вши,/ гáду душетлéнному кáко собесéдовала еси́,/ совéтника прии́мши я́ко прáваго, льсти́ваго?// О твоегó прельщéния, душé моя́ всестрáстная!
И ны́не и прúсно и во вéки векóв, амúнь.
Богорóдичен: Светонóсное селéние Тя Бóжия воплощéния,/ воспевáем Мари́е Богоблагодáтная:/ тéмже мя лю́те омрачéнна страстьми́,// просвети́ свéтом ми́лости, надéжде ненадéжных.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя Трióди (глас 6): Из плáмене преподóбным рóсу источúл есù/ и прáведнаго жéртву водóю попалúл есù:/ вся бо творúши, Хрїстè, тóкмо éже хотéти.// Тя превознóсим во вся вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душà Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На кáждый стiх)
Я́ко призрè на смирéнiе рабы̀ Своея́,/ се бо от ны́не ублажáт Мя вси рóди.
Я́ко сотворѝ Мне вели́чiе Си́льный,/ и свя́то И҆́мя Егò, и ми́лость Егò в рóды родóв боя́щимся Егò.
Сотворѝ держáву мы́шцею Своéю,/ расточѝ гóрдыя мы́слiю сéрдца их.
Низложѝ си́льныя со престóл, и вознесè смирéнныя;/ áлчущiя испóлни благ, и богатя́щiяся отпустѝ тщи.
Воспрiя́т Iзрáиля óтрока Своегò, помянýти ми́лости,/ я́коже глагóла ко отцéм нáшим, Авраáму и сéмени егò, дáже до вéка.
ПЕСНЬ 9
Iрмóс: Ужасéся о сем Нéбо,/ и земли́ удиви́шася концы́,/ я́ко Бог яви́ся человéком плóтски,/ и чрéво Твоé бысть прострáннейшее Небéс./ Тем Тя, Богорóдицу,// Áнгелов и человéк чиноначáлiя величáют.
Хор: Слáва, Гóсподи, Святóму Воскресéнiю Твоемý.
Чтец: Божéственным и Безначáльным Естествóм прост сый,/ сложи́лся есѝ прiя́тiем плóти, в Тебè Самóм Сiю́ состáвив, Слóве Бóжiй,/ и пострадáв я́ко человéк, пребы́л есѝ кромè страстéй, я́ко Бог.// Тéмже Тя во Двою́ Существý нераздéльно и неслiя́нно величáем.
Хор: Слáва, Гóсподи, Святóму Воскресéнiю Твоемý.
Чтец: Отцá по Существý Божéственному,/ я́коже естествóм быв человéк,/ рекл есѝ Бóга Вы́шнiй, рабóм снизходя́,/ воскрéс от грóба, благодáтiю Отцá/ земнорóдным полóж, и҆́же по естествý Бóга же и Влады́ку,// с Ни́мже Тя вси величáем.
Хор: Пресвятáя Богорóдице, спасù нас.
Богорóдичен: Яви́лася есѝ, о Дéво Мáти Бóжiя,/ пáче естествá рóждши плóтiю Бóга Слóва,/ Егóже Отéц отры́гну от сéрдца Своегó прéжде всех век, я́ко Благ,// Егóже ны́не и телéс превы́шша разумéем, áще и в тéло облечéся.
Глас 8
Хор: Слáва, Гóсподи, Крестý Твоемý Честнóму и Воскресéнiю.
Чтец: Бóжiя Тя естествóм ýбо Сы́на,/ зачáтаго во утрóбе свéмы Богомáтере,/ и бы́вшаго нас рáди Человéка,/ и зря́ще Тя на Крестé естествóм ýбо стрáждуща человéческим,/ безстрáстна же, я́ко Бóга пребывáюща, величáем.
Хор: Слáва, Гóсподи, Крестý Твоемý Честнóму и Воскресéнiю.
Чтец: Разруши́ся тьма дря́хлая,/ от áда бо возсiя́ Сóлнце Прáвды Хрїстóс,/ земли́ просвещáя вся концы́,/ сiя́я Божествá свéтом, Небéсный Человéк, Бог земны́й:/ Егóже во двою́ естествý величáем.
Глас 8
Хор: Пресвятáя Богорóдице, спасù нас.
Чтец: Рáдости и весéлiя испóлнь есть пáмять Твоя́,/ приступáющим исцелéнiя точáщи,// и благочéстно Богорóдицу Тя возвещáющим.
Хор: Пресвятáя Богорóдице, спасù нас.
Чтец: Псалмы́ Тя воспевáем Благодáтная,/ и немóлчно, éже рáдуйся, принóсим:// Ты бо источи́ла есѝ всем рáдость.
Глас 6
Хор: Помúлуй мя, Бóже, помúлуй мя.
Чтец: Слáдок вкус плод рáзума во Едéме яви́ ми ся насы́щшемуся снéди,/ в желчь же бысть конéц егó./ Увы́ мне душé стрáстная,// кáко невоздержáнiе тя рáйскаго ядéнiя стрáнна сотвори́? (двáжды)
Хор: Помúлуй мя, Бóже, помúлуй мя.
Чтец: Бóже всех, ми́лости Гóсподи,/ на моé смирéнiе благоутрóбне при́зри,/ и не далéче посли́ мя Божéственнаго Едéма,/ я́ко да зря добрóты, отону́дуже испадóх,// потщу́ся па́ки рыдáньми воспрiя́ти я́же погуби́х.
Хор: Помúлуй мя, Бóже, помúлуй мя.
Чтец: Рыдáю, стеню́ и плáчу, херуви́мы с плáменным орýжiем зря,/ Едéма вход стрещи́ повелéнныя,/ всем престýпником, увы́ непристýпный,// áще не Ты невозбранéн Спáсе той сотвори́ши ми.
Слáва Отцý и Сыну и Святóму Дýху.
Тропáрь: Дерзáю мнóжеству ми́лости Твоея́ Хрiстé Спáсе,/ и Божéственных ребр Твои́х крóви,/ éюже освяти́л еси́ естествó человéческое,/ отвéрзл же еси́ вратá Тебé служáщим рáйская Блáже,// прéжде заключéная Адáму.
И ныне и прúсно и во вéки векóв, амúнь.
Богорóдичен: Жи́зни двéре непроходи́мая, ýмная,/ Дéво Богорóдице Безневéстная,/ рáйская вратá заключéная ми прéжде отвéрзи Твои́ми моли́твами,/ я́ко да слáвлю Тя по Бóзе мою́ помóщницу,// и держáвное прибéжище.
Катавáсiя (глас 6): Бóга/ человéком невозмóжно вúдети,/ на Негóже не смéют чúни Áнгельстiи взирáти;/ Тобóю бо, Всечúстая, явúся человéком/ Слóво воплощéнно,/ Егóже величáюще,// с Небéсными вóи Тя ублажáем.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьмѝ Бог наш.
Хор: Свят Госпóдь Бог наш
Ексапостiлáрiй воскрéсный oсьмы́й: Два Áнгела ви́девши внутрь грóба, Марíя удивля́шеся,/ и Хрїстá не знáющи, я́ко вертогрáдаря вопрошáше:/ гóсподи, где положи́л еси́ тéло Iисýса моегó?/ Звáнiем же Тогó познáвши бы́ти Самогó Спáса,/ слы́ша: не прикасáйся Мне, ко Отцý отхождý,// рцы брáтiи Моéй.
Слáва Ѻтцý и Сы́ну и Святóму Дýху.
Светúлен Трióди: За́поведь Твою́, Го́споди, преслу́шав окая́нный,/ и обнаже́н Твоея́ сла́вы, студа́ испо́лнихся, увы́ мне!/ и сла́дости изринове́н есмь ра́йския Благоутро́бне.// Ми́лостиве, поми́луй лиши́вшася пра́ведно бла́гости Твоея́.
И ны́не и прúсно и во вéки векóв. Амúнь.
Ин светúлен Трióди: Cе день гряде́т Го́cпoдa Вcедержи́теля,/ и ктo cтерпи́т cтрaх прише́cтвия о́нaгo?/ День бo я́рocти еcть, и пещь гoря́щaя, во́ньже Cудия́ cя́дет,// и пo дocтoя́нию дея́ний кoму́жде oтдaя́й.
ХВАЛИТНЫ
Хор, глас 8: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егò в вы́шних.// Тебè подобáет песнь Бóгу.
Хвали́те Егò вси áнгели Егò,/ хвалите Егò вся си́лы Егò.// Тебè подобáет песнь Бóгу.
[В приходской практике пропускается до стихир]Хвали́те Егò, сóлнце и лунà, хвали́те Егò, вся звéзды и свет. Хвали́те Егò Небесà небéс и водà, я́же превы́ше небéс. Да восхвáлят и҆́мя Госпóдне: я́ко Той речè, и бы́ша, Той повелè, и создáшася. Постáви я́ в век и в век вéка, повелéнiе положѝ, и не ми́мо и҆́дет. Хвали́те Гóспода от землѝ, змíеве и вся бéздны: огнь, град, снег, гóлоть, дух бýрен, творя́щая слóво Егò, гóры и вси хóлми, древà плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiѝ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогò Еди́наго, исповéданiе Егò на землѝ и на небесѝ. И вознесéт рог людéй Свои́х, песнь всем преподóбным Егò, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егò в цéркви преподóбных. Да возвеселится Iзрáиль о сотвóршем Егò, и сы́нове Сióни возрáдуются о Царè своéм. Да восхвáлят и҆́мя Егò в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечѝ обою́ду острѝ в рукáх их: сотвори́ти отмщéнiе во языцех, обличéнiя в лю́дех, связáти царѝ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егò.
Стiхúры воскрéсные, глас 8: Гóсподи, áще и суди́лищу предстáл еси́ от Пiлáта суди́мый,/ но не отступи́л еси́ от престóла со Отцéм седя́:/ и воскрéс из мéртвых,/ мiр свободи́л еси́ от рабóты чуждáго,// я́ко Щедр и Человеколю́бец.
Хвалúте Бóга во святых Егò,/ хвалúте Егò в утвержéнiи сúлы Егò.
Стiхúра: Гóсподи, орýжiе на дiáвола/ Крест Твой дал еси́ нам:/ трепéщет бо и трясéтся, не терпя́ взирáти на си́лу Егó:/ я́ко мéртвыя возставля́ет, и смерть упраздни́./ Сегó рáди покланя́емся// погребéнiю Твоемý и востáнiю.
На 6: Хвалúте Егò на сúлах Егò, хвалúте Егò по мнóжеству велúчествiя Егò.
Стiхúра: Гóсподи, áще и я́ко мéртва/ во грóбе iудéи положи́ша,/ но я́ко Царя́ спя́ща вóини Тя стрежáху,/ и я́ко животá сокрóвище, печáтiю печáташа,/ но воскрéсл еси́,// и пóдал еси́ нетлéнiе душáм нáшым.
Хвалúте Егò во глáсе трýбнем, хвалúте Егò во псалтúри и гýслех.
Стiхúра: Áнгел Твой, Гóсподи,/ Воскресéнiе проповéдавый,/ стрáжи ýбо устраши́,/ женáм же возгласи́, глагóля:/ что и́щете Живáго с мéртвыми;/ воскрéсе Бог сый,// и вселéнней жизнь даровá.
На 4. Хвалúте Егò в тимпáне и лúце, хвалúте Егò во стрýнах и оргáне.
И҆́ны стiхúры анатóлiевы: Пострадáл еси́ Крестóм, Безстрáстный Божествóм,/ погребе́нiе прiя́л еси́ тридне́вное,/ да нас свободи́ши от рабóты врáжiя,/ и обезсме́ртив оживотвори́ши нас Хрiсте́ Бóже,// воскресе́нiем Твои́м, Человеколю́бче.
Хвалúте Егò в кимвáлех доброглáсных, хвалúте Егò в кимвáлех восклицáнiя. Всякое дыхáнiе да хвáлит Гóспода.
Стiхúры Трióди, глас 5: Увы́ мне, Адáм рыдáнiем возопи́,/ я́ко змiй и жена́ Божéственнаго дерзновéнiя изри́нуша мя,/ и рáйскiя слáдости, дрéва снедь отчужди́./ Увы́ мне, не терплю́ прóчее поношéнiя:/ иногдá царь сый земны́х всех создáнiй Бóжiих,/ ны́не плéнник яви́хся от еди́наго беззакóннаго совéта:/ и иногдá слáвою безсмéртiя облечéн сый,/ умерщвлéнiя кóжу я́ко смéртный окая́нно обношý./ Увы́ мне, когó рыдáнiй содéйственника сотворю́?/ Но Ты Человеколю́бче, от земли́ создáвый мя,/ во благоутрóбiе оболки́йся,// рабóты врáжiя свободи́, и спаси́ мя.
Исповéмся Тебè Гóсподи всем сéрдцем моúм,/ повéм вся чудесà Твоя́.(Пс.9:2)
Стiхúра: Пóприще добродéтелей отвéрзеся,/ хотя́щiи страдáльчествовати вни́дите,/ препоя́савшеся дóбрым постá пóдвигом:/ закóнно бо страдáльчествующiи, прáведно венчáются./ И воспрiи́мше всеорýжiе Крестá, врагý сопроти́вимся, я́ко стéну неруши́мую имýще вéру,/ и я́ко щит моли́тву, и шлем ми́лостыню,/ вмéсто мечá пост,/ и́же отсекáет от сéрдца всю злóбу./ Творя́й сiя́, и́стинный прiи́мет венéц// от Всецаря́ Хрiстá в день сýдный.
Возвеселю́ся и возрáдуюся о Тебè,/ пою́ úмени Твоемý, Вы́шнiй.(Пс.9:3)
Глас 6: Адáм из рая́ отгóнится, пи́щи причасти́вся, я́ко преслýшник:/ Моисéй Богови́дец бысть,/ постóм óчи душéвныя очи́стив./ Тéмже рая́ жи́телiе бы́ти возжелéвше,/ измени́мся от неполéзныя пи́щи,/ и Бóга зрéти желáюще,/ Моисéйскую четвери́цу десяти́ц пости́мся,/ моли́твою и молéнiем чи́сто терпя́ще:/ утоли́м душéвныя стрáсти,/ отженéм плотски́я слáсти,/ лéгцы к гóрнему шéствiю прéйдем,/ иде́же áнгельстiи ли́цы/ немóлчными глáсы нераздéльную воспевáют Трóицу,/ зрéти недоумéнную добрóту и Влады́чню./ Та́мо сподóби нас, Сы́не Бóжiй Жизнодáвче, на Тя надéющихся,/ ликовáти со áнгельскими вóинствы,/ рóждшiя Тя Мáтере Хрiстé моли́твами,// и апóстол, и мýченик, и преподóбных.
Воскреснù Гóсподи Бóже мой, да вознесéтся рукà Твоя́,/ не забýди убóгих Твоúх до концà.(Пс.9:33)
Глас 6: Приспé врéмя, духóвных подвигóв начáло,/ на дéмоны побéда, всеорýжное воздержáнiе,/ áнгельское благолéпiе, к Бóгу дерзновéнiе:/ тем бо Моисéй бысть Зижди́телю собесéдник,/ и глас неви́димо в слýхи прiя́т./ Гóсподи, тем сподóби и нас поклони́тися/ Твои́м страстéм, и святóму Воскресéнiю,// я́ко Человеколю́бец.
Слáва Отцý и Сы́ну и Святóму Дýху.
Приспé врéмя, духóвных подвигóв начáло,/ на дéмоны побéда, всеорýжное воздержáнiе,/ áнгельское благолéпiе, к Бóгу дерзновéнiе:/ тем бо Моисéй бысть Зижди́телю собесéдник,/ и глас неви́димо в слýхи прiя́т./ Гóсподи, тем сподóби и нас поклони́тися/ Твои́м страстéм, и святóму Воскресéнiю,// я́ко Человеколю́бец.
И ны́не и прúсно и во вéки векóв. Амúнь.
Глас 2: Преблагословéнна есѝ, Богорóдице Дéво,/ Воплóщшим бо ся из Тебè ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебè.
Вóзглас: Слáва Тебè, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстè, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцà, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцà, ами́нь.
На всяк день благословлю́ Тя и восхвалю́ и҆́мя Твоè во вéки, и в век вéка.
Сподóби, Гóсподи, в день сей без грехà сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоè во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был есѝ нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебè. Гóсподи, к Тебè прибегóх, научѝ мя твори́ти вóлю Твою́, яко Ты есѝ Бог мой, яко у Тебè истóчник животà, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, помúлуй нас. (3 рáза)
Хор: Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Хор: Святы́й Безсмéртный, помúлуй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помúлуй нас.
Тропáрь воскрéсный, глас 2: Воскрéс из грóба и ýзы растерзáл еси áда,/ разруши́л еси осуждéнiе смéрти, Гóсподи,/ вся от сетéй врагá избáвивый;/ яви́вый же Себè апóстолом Твоим,/ послáл еси я на прóповедь,/ и тéми мир Твой пóдал еси вселéнней,// Еди́не Многоми́лостиве.
Гóсподи поми́луй (40 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи поми́луй (12 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
Гóсподи, Iисýсе Хрїстè, Сыне Бóжій, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
Слáва Отцý и Сы́ну и Святóму Дýху, и ны́не и прúсно и во вéки векóв. Амúнь.
Стiхúра евáнгельская осьмáя, глас 8: Марíины слéзы не всýе проливáются тéпле,/ се бо сподóбися и учáщих Áнгелов,/ и видéнiя Самогó Iисýса./ Но ещé земнáя мýдрствует, я́ко женá немощнáя:/ тéмже и отсылáется не прикасáтися Хрїстý./ Но обáче проповéдница посылáется Твои́м ученикóм,/ и҆́мже благовествовáнiе нося́щи,/ éже ко Отéческому жрéбiю восхóд возвещáющи.// С нéюже сподóби и нас явлéнiя Твоегó, Влады́ко Гóсподи.
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моè. Вонмѝ глáсу молéнiя моегò, Царю́ мой и Бóже мой, яко к Тебè помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебè лукáвнуяй, нижè пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебè лю́бящiи имя Твоè. Яко Ты благослови́ши прáведника, Гóсподи: яко орýжiем благоволéнiя венчáл есѝ нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты есѝ. Не отвратѝ человéка во смирéнiе, и рекл есѝ: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травà мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л есѝ беззакóнiя нáша пред Тобóю: век наш в просвещéнiе лицà Твоегò. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегò, и от стрáха Твоегò, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы̀ Твоя́. Испóлнихомся заýтра ми́лости Твоея́, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны есѝ, лéта в ня́же ви́дехом злáя. И при́зри на рабы̀ Твоя́, и на делà Твоя́, и настáви сы́ны их. И бýди свéтлость Гóспода Бóга нáшего на нас, и делà рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебè, Гóсподи. Пою́ и разумéю в путѝ непорóчне, когдà прiи́деши ко мне? Прехождáх в незлóбiи сéрдца моегò посредè дóму моегò. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпè мне сéрдце стропти́во, уклоня́ющагося от менè лукáваго не познáх. Оклеветáющаго тай и҆́скренняго своегò, сегò изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредè дóму моегò творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Тропáрь воскрéсный, глас 8: С высоты̀ снизшéл есѝ, Благоутрóбне,/ погребéнiе прiя́л есѝ триднéвное,/ да нас свободи́ши страстéй,// Животè и Воскресéнiе нáше, Гóсподи, слáва Тебè!
И ны́не и прúсно и во вéки векóв. Амúнь.
Богорóдичен 1‑го часá: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблà есѝ цвет нетлéнiя. Дéву, я́ко пребылà есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогò молѝ спасти́ся душáм нáшым.
Стопы̀ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы̀ человéческiя, и сохраню́ зáповеди Твоя́. Лицè Твоè просветѝ на рабà Твоегò и научѝ мя оправдáнiем Твои́м.
Да испóлнятся устà моя хвалéнiя Твоегò, Гóсподи, я́ко да воспою́ слáву Твою́, весь день великолéпiе Твоè.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сыне Бóжїй, поми́луй нас. Ами́нь.
КОНДАК
Кондáк Трióди, глас 6: Премýдрости настáвниче, смы́сла подáтелю,/ немýдрых наказáтелю, и ни́щих защи́тителю,/ утверди́, вразуми́ сéрдце моé Влады́ко./ Ты даждь ми слóво, Óтчее Слóво,/ се бо устнé мои́ не возбраню́,/ во éже звáти Тебé:// Ми́лостиве, поми́луй мя пáдшаго.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстè Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýшы нáша освятѝ, телесà очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицà Твоегò, да в нем ýзрим Свет Непристýпный: и испрáви стопы̀ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победúтельная,/ я́ко избáвльшеся от злых,/ благодáрственная восписýем Ти рабù Твоù, Богорóдице;/ но я́ко имýщая держáву непобедúмую,/ от вся́ких нас бед свободù, да зовéм Ти:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 рáза)
Гóсподи, благословᴎ́.
Гóсподи, Iисýсе Хрїстè, Сыне Бóжій, моли́твами Пречи́стыя Своея́ Мáтере, святы́х и прáведных богоотéц Iоакíма и Áнны, и всех святы́х, поми́лует и спасéт нас, яко Благ и Человеколю́бец. Ами́нь.
И глаголи часы и обéдницу