ПРОЩЕНОЕ ВОСКРЕСЕНИЕ.Неделя сыропустная,глас 8 Воспоминание Адамова изгнания.ВСЕНОЩНОЕ БДЕНИЕ УТРЕНЯ
17 мáрта 2024 гóда. Недéля сыропýстная. Прощéное воскресéнье. Воспоминáнiе Адáмова изгнáнiя. Заговенье на Велúкiй пост. Глас 8. Воскрéсная прáздничная слýжба для домáшнего (келéйнаго) совершéнiя. Вся слýжба прáздника по Октóиху и Трióди. Слýжба мiрскúм чúном. Послéдованiе ýтрени.
УТРЕНЯ
Начáло зри здесь ( великая вечéрня)
ШЕСТОПСАЛМИЕ
Слáва в вы́шних Бóгу, и на землѝ мир, в человéцех благоволéнiе. (трúжды) Гóсподи, устнè моѝ отвéрзеши, и устà моя́ возвестя́т хвалý Твою́. (двáжды)
Псалом 3
Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгò. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы̀ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоè.
Аз уснýх, и спах, востáх, я́ко Госпóдь застýпит мя.
Псалом 37
Гóсподи, да не я́ростiю Твоéю обличи́ши менè, нижè гнéвом Твои́м накáжеши менè. Яко стрéлы Твоя́ унзóша во мне, и утверди́л есѝ на мне рýку Твою́. Несть исцелéнiя в плóти моéй от лицà гнéва Твоегò, несть ми́ра в костéх мои́х от лицà грех мои́х. Яко беззакóнiя моя́ превзыдóша главý мою́, я́ко брéмя тя́жкое отяготéша на мне. Возсмердéша и согни́ша рáны моя́ от лицà безýмiя моегò. Пострадáх и слякóхся до концà, весь день сéтуя хождáх. Яко ля́двiя моя́ напóлнишася поругáнiй, и несть исцелéнiя в плóти моéй. Озлóблен бых и смири́хся до зелà, рыкáх от воздыхáнiя сéрдца моегò. Гóсподи, пред Тобóю все желáнiе моè и воздыхáнiе моè от Тебè не утаи́ся. Сéрдце моè смятéся, остáви мя си́ла моя́, и свет óчiю моéю, и той несть со мнóю. Дрýзи моѝ и и҆́скреннiи моѝ пря́мо мне прибли́жишася и стáша, и бли́жнiи моѝ отдалéче менè стáша и нуждáхуся и҆́щущiи дýшу мою́, и и҆́щущiи злáя мне глагóлаху сýетная и льсти́вным весь день поучáхуся. Аз же я́ко глух не слы́шах и я́ко нем не отверзáяй уст свои́х. И бых я́ко человéк не слы́шай и не имы́й во устéх свои́х обличéнiя. Яко на Тя, Гóсподи, уповáх, Ты услы́шиши, Гóсподи Бóже мой. Яко рех: да не когдà порáдуют ми ся вразѝ моѝ: и внегдà подвижáтися ногáм мои́м, на мя велерéчеваша. Яко аз на рáны готóв, и болéзнь моя́ предо мнóю есть вы́ну. Яко беззакóнiе моè аз возвещý и попекýся о гресè моéм. Вразѝ же моѝ живýт и укрепи́шася пáче менè, и умнóжишася ненави́дящiи мя без прáвды. Воздаю́щiи ми злáя возблагáя оболгáху мя, занè гоня́х благосты́ню. Не остáви менè, Гóсподи Бóже мой, не отступѝ от менè. Вонмѝ в пóмощь мою́, Гóсподи спасéнiя моегò.
Не остáви менè, Гóсподи Бóже мой, не отступѝ от менè. Вонмѝ в пóмощь мою́, Гóсподи спасéнiя моегò.
Псалом 62
Бóже, Бóже мой, к Тебè ýтренюю, возжадà Тебè душà моя́, коль мнóжицею Тебè плоть моя́, в земли́ пýсте и непрохóдне, и безвóдне. Тáко во святéм яви́хся Тебè, ви́дети си́лу Твою́ и слáву Твою́. Я́ко лýчши ми́лость Твоя́ пáче живóт, устнè мои́ похвали́те Тя. Тáко благословлю́ Тя в животè моéм, о и҆́мени Твоéм воздежý рýце моѝ. Я́ко от тýка и мáсти да испóлнится душà моя́, и устнáма рáдости восхвáлят Тя устà моя́. Áще поминáх Тя на постéли моéй, на ýтренних поучáхся в Тя. Я́ко был есѝ Помóщник мой, и в крóве крилý Твоéю возрáдуюся. Прильпè душà моя́ по Тебè, менè же прiя́т десни́ца Твоя́. Тíи же всýе искáша дýшу мою́, вни́дут в преиспóдняя землѝ, предадя́тся в рýки орýжiя, чáсти ли́совом бýдут. Царь же возвесели́тся о Бóзе, похвáлится всяк клены́йся И҆м, я́ко загради́шася устà глагóлющих непрáведная.
На ýтренних поучáхся в Тя. Яко был есѝ Помóщник мой, и в крóве крилý Твоéю возрáдуюся. Прильпè душà моя́ по Тебè, менè же прiя́т десни́ца Твоя́.
Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Псалом 87
Гóсподи Бóже спасéнiя моегò, во дни воззвáх, и в нощѝ пред Тобóю. Да вни́дет пред Тя моли́тва моя́: приклонѝ ýхо Твоè к молéнiю моемý, я́ко испóлнися зол душà моя́, и живóт мой áду прибли́жися. Привменéн бых с низходя́щими в ров, бых я́ко человéк без пóмощи, в мéртвых свобóдь, я́ко я́звеннiи спя́щiи во грóбе, и҆́хже не помянýл есѝ ктомý, и тíи от рукѝ Твоея́ отриновéни бы́ша. Положи́ша мя в рóве преиспóднем, в тéмных и сéни смéртней. На мне утверди́ся я́рость Твоя́, и вся вóлны Твоя́ навéл есѝ на мя. Удáлил есѝ знáемых мои́х от менè, положи́ша мя мéрзость себè: прéдан бых и не исхождáх. Óчи моѝ изнемогóсте от нищеты̀, воззвáх к Тебè, Гóсподи, весь день, воздéх к Тебè рýце моѝ. Едà мéртвыми твори́ши чудесà? Илѝ врáчеве воскреся́т, и исповéдятся Тебè? Едà повéсть кто во грóбе ми́лость Твою́, и и҆́стину Твою́ в поги́бели? Едà познáна бýдут во тьме чудесà Твоя́, и прáвда Твоя́ в землѝ забвéнней? И аз к Тебè, Гóсподи, воззвáх и ýтро моли́тва моя́ предвари́т Тя. Вскýю, Гóсподи, отрéеши дýшу мою́, отвращáеши лицè Твоè от менè? Нищ есмь аз, и в трудéх от ю́ности моея́; вознéс же ся, смири́хся, и изнемогóх. На мне преидóша гнéви Твоѝ, устрашéнiя Твоя́ возмути́ша мя, обыдóша мя я́ко водà, весь день одержáша мя вкýпе. Удáлил есѝ от менè дрýга и и҆́скренняго, и знáемых моих от страстéй.
Гóсподи Бóже спасéнiя моегò, во дни воззвáх, и в нощѝ пред Тобóю. Да вни́дет пред Тя моли́тва моя́: приклонѝ ýхо Твоè к молéнiю моемý.
Псалом 102
Благословѝ, душè моя, Гóспода, и вся внýтренняя моя и҆́мя святóе Егò. Благословѝ, душè моя, Гóспода, и не забывáй всех воздая́нїй Егò, очищáющаго вся беззакóнїя твоя́, исцеля́ющаго вся недýги твоя́, избавля́ющаго от истлéнiя живóт твой, венчáющаго тя ми́лостїю и щедрóтами, исполня́ющаго во благи́х желáнїе твоè: обновится я́ко óрля юность твоя́. Творя́й ми́лостыни Госпóдь, и судьбý всем оби́димым. Сказà путѝ Своя́ Моисéови, сыновóм Iзрáилевым хотéнїя Своя́: Щедр и Ми́лостив Госпóдь, Долготерпели́в и Многоми́лостив. Не до концà прогнéвается, нижè во век враждýет, не по беззакóнїем нáшим сотвори́л есть нам, нижè по грехóм нáшым воздáл есть нам. Я́ко по высотè небéсней от землѝ, утверди́л есть Госпóдь ми́лость Свою́ на боя́щихся Егò. Ели́ко отстоят востóцы от зáпад, удáлил есть от нас беззакóнїя нáша. Я́коже щéдрит отéц сы́ны, ущéдри Госпóдь боя́щихся Егò. Я́ко Той познà создáнїе нáше, помянý, яко персть есмы̀. Человéк, яко травà днíе eгò, яко цвет сéльный, тáко оцветéт, яко дух прóйде в нем, и не бýдет, и не познáет ктомý мéста своегò. Ми́лость же Госпóдня от вéка и до вéка на боя́щихся Егò, и прáвда Егò на сынéх сынóв, храня́щих завéт Егò, и пóмнящих зáповеди Егò твори́ти я. Госпóдь на Небесѝ уготóва Престóл Свой, и Цáрство Егò всéми обладáет. Благослови́те Гóспода вси Áнгели Егò, си́льнїи крéпостїю, творя́щїи слóво Егò, услышати глас словéс Егò. Благослови́те Гóспода вся Си́лы Егò, слýги Егò, творя́щїи вóлю Егò. Благослови́те Гóспода вся делá Егò, на вся́ком мéсте влады́чества Егò, благословѝ, душè моя́, Гóспода.
На вся́ком мéсте влады́чества Егò, благословѝ, душè моя́, Гóспода.
Псалом 142
Гóсподи, услы́ши моли́тву мою́, внушѝ молéнiе моè во и҆́стине Твоéй, услы́ши мя в прáвде Твоéй и не вни́ди в суд с рабóм Твои́м, я́ко не оправди́тся пред Тобóю всяк живы́й. Яко погнà враг дýшу мою́, смири́л есть в зéмлю живóт мой, посади́л мя есть в тéмных, я́ко мéртвыя вéка. И уны̀ во мне дух мой, во мне смятéся сéрдце моè. Помянýх дни дрéвнiя, поучи́хся во всех дéлех Твои́х, в творéнiих рукý Твоéю поучáхся. Воздéх к Тебè рýце моѝ, душà моя́, я́ко земля́ безвóдная Тебè. Скóро услы́ши мя, Гóсподи, исчезè дух мой, не отвратѝ лицà Твоегò от менè, и уподóблюся низходя́щым в ров. Слы́шану сотворѝ мне заýтра ми́лость Твою́, я́ко на Тя уповáх. Скажѝ мне, Гóсподи, путь вóньже пойдý, я́ко к Тебè взях дýшу мою́. Измѝ мя от враг мои́х, Гóсподи, к Тебè прибегóх. Научѝ мя твори́ти вóлю Твою́, я́ко Ты есѝ Бог мой. Дух Твой Благíй настáвит мя на зéмлю прáву. И҆́мене Твоегò рáди, Гóсподи, живи́ши мя, прáвдою Твоéю изведéши от печáли дýшу мою́. И ми́лостiю Твоéю потреби́ши врагѝ моя́ и погуби́ши вся стужáющыя души́ моéй, я́ко аз раб Твой есмь.
Услы́ши мя, Гóсподи, в прáвде Твоéй и не вни́ди в суд с рабóм Твои́м. Услы́ши мя, Гóсподи, в прáвде Твоéй и не вни́ди в суд с рабóм Твои́м.
Дух Твой Благíй настáвит мя на зéмлю прáву.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
БОГ ГОСПОДЬ, глас 8
Чтец: Бог Госпóдь, и яви́ся нам, благословéн Гряды́й во И҆́мя Госпóдне.(Пс.117:27А,26А)
Чтец: И҆сповéдайтеся Гóсподеви, я́ко благ, я́ко в век ми́лость Егò.(Пс.117:1)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Обышéдше обыдóша мя и и҆́менем Госпóдним противля́хся им.(Пс.117:11)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Не умрý, но жив бýду и повéм делà Госпóдня.(Пс.117:17)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Кáмень, Егóже небрегóша зи́ждущiи, Сей бысть во главý ýгла, от Гóспода бысть Сей, и есть ди́вен во очесéх нáших. (Пс.117:22-23)
Хор: Бог Госпóдь, и явúся нам, благословéн Гряды́й во И҆́мя Госпóдне.
ТРОПАРИ
Тропáрь воскрéсный, глас 8: С высоты̀ снизшéл есù, Благоутрóбне,/ погребéнiе прiя́л есù триднéвное,/ да нас свободúши страстéй,// Животè и Воскресéнiе нáше, Гóсподи, слáва Тебè! (Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Богорóдичен воскрéсный (отпуст.) глас 8: И҆́же нас рáди рождéйся от Дéвы/ и распя́тiе претерпéв, Благíй,/ испровéргiй смéртiю смерть,/ и воскресéнiе явлéй, я́ко Бог,/ не прéзри, я́же создáл есù рукóю Твоéю;/ явù человеколю́бiе Твоè, Мúлостиве,/ прiимù рóждшую Тя Богорóдицу, моля́щуюся за ны,// и спасù, Спáсе наш, лю́ди отчáянныя.
Гóсподи, помúлуй. (трúжды)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
КАФИЗМЫ И СЕДАЛЬНЫ
КАФИЗМА ВТОРАЯ
И чтем кафíсму 2-ю ( или одúн псалóм, или до 1-й Слáвы)
[Псалом 9]Исповéмся Тебè, Гóсподи, всем сéрдцем мои́м, повéм вся чудесà Твоя́. Возвеселю́ся и возрáдуюся о Тебè, пою́ и҆́мени Твоемý, Вы́шнiй. Внегдà возврати́тися врагý моемý вспять, изнемóгут и поги́бнут от лицà Твоегò. Яко сотвори́л eси суд мой и прю мою́, сел eсѝ на Престóле, судя́й прáвду. Запрети́л eсѝ язы́ком, и поги́бе нечести́вый, и҆́мя eгò потреби́л eсѝ в век и в век вéка. Врагу оскудéша oрýжiя в конéц, и грáды разруши́л eсѝ, поги́бе пáмять eгò с шýмом. И Госпóдь во век пребывáет, уготóва на суд Престóл Свой, и Той суди́ти и҆́мать вселéнней в прáвду, суди́ти и҆́мать лю́дем в правотè. И бысть Госпóдь прибéжище убóгому, помóщник во благоврéменiих, в скóрбех. И да уповáют на Тя знáющiи и҆́мя Твоè, я́ко не остáвил eсѝ взыскáющих Тя, Гóсподи. Пóйте Гóсподеви, живýщему в Сióне, возвести́те во язы́цех начинáнiя Егò, я́ко взыскáяй крóви их помянý, не забы̀ звáнiя убóгих. Поми́луй мя, Гóсподи, виждь смирéнiе моè от враг мои́х, вознося́й мя от врат смéртных, Яко да возвещý вся хвалы̀ Твоя́ во вратéх дщéре Сióни, возрáдуемся о спасéнiи Твоéм. Углебóша язы́цы в пáгубе, ю́же сотвори́ша, в сéти сей, ю́же скры́ша, увязè ногà их. Знáемь eсть Госпóдь судьбы̀ творя́й, в дéлех рукý своéю увязè грéшник. Да возвратя́тся грéшницы во ад, вси язы́цы забывáющiи Бóга. Яко не до концà забвéн бýдет ни́щiй, терпéнiе убóгих не поги́бнет до концà. Воскреснѝ, Гóсподи, да не крепи́тся человéк, да сýдятся язы́цы пред Тобóю. Постáви, Гóсподи, законоположи́теля над ни́ми, да разумéют язы́цы, я́ко человéцы суть. Вскýю, Гóсподи, отстоя́ далéче, презирáеши во благоврéменiих, в скóрбех? Внегдà горди́тися нечести́вому, возгарáется ни́щiй, увязáют в совéтех, я́же помышля́ют. Яко хвали́мь eсть грéшный в пóхотех душѝ своея́, и оби́дяй благослови́мь eсть. Раздражѝ Гóспода грéшный, по мнóжеству гнéва своегò не взы́щет, несть Бóга пред ним. Оскверня́ются путiè eгò на вся́ко врéмя, отъéмлются судьбы̀ Твоя́ от лицà eгò, всéми врагѝ свои́ми обладáет. Речè бо в сéрдце своéм, не подви́жуся от рóда в род без зла, eгóже кля́твы устà eгò пóлна суть, и гóрести и льсти, под язы́ком eгò труд и болéзнь. Приседи́т в лови́тельстве с богáтыми в тáйных, éже уби́ти непови́ннаго, óчи eгò на ни́щаго призирáете. Лови́т в тáйне я́ко лев во огрáде своéй, лови́т éже восхи́тити ни́щаго, восхи́тити ни́щаго, внегдà привлещѝ и҆̀ в сéти своéй. Смири́т eгò, преклони́тся и падéт, внегдà eмý обладáти убóгими. Речè бо в сéрдце своéм: забы̀ Бог, отвратѝ лицè Своè, да не ви́дит до концà. Воскреснѝ, Гóсподи Бóже мой, да вознесéтся рукà Твоя́, не забýди убóгих Твои́х до концà. Чесò рáди прогнéва нечести́вый Бóга? Речè бо в сéрдце своéм: не взы́щет. Ви́диши, я́ко Ты болéзнь и я́рость смотря́еши, да прéдан бýдет в рýце Твоѝ, Тебè остáвлен eсть ни́щiй, си́ру Ты бýди помóщник. Сокрушѝ мы́шцу грéшному и лукáвому, взы́щется грех eгò и не обря́щется. Госпóдь Царь во век и в век вéка, поги́бнете, язы́цы, от землѝ Егò. Желáнiе убóгих услы́шал eсѝ, Гóсподи, уготóванiю сéрдца их внят ýхо Твоè. Судѝ си́ру и смирéну, да не приложи́т ктомý величáтися человéк на землѝ.
[Псалом 10]На Гóспода уповáх, кáко речéте душѝ моéй: превитáй по горáм, я́ко пти́ца? Яко се, грéшницы налякóша лук, уготóваша стрéлы в тýле, состреля́ти во мрáце прáвыя сéрдцем. Занè я́же Ты соверши́л eсѝ, oнѝ разруши́ша, прáведник же что сотворѝ? Госпóдь во хрáме святéм Своéм. Госпóдь, на Небесѝ Престóл Егò, óчи Егò на нищаго призирáете, вéжди Егò испытáете сы́ны человéчeскiя. Госпóдь испытáет прáведнаго и нечести́ваго, любя́й же непрáвду ненави́дит свою́ дýшу. Одожди́т на грéшники сéти, oгнь и жýпел, и дух бýрен часть чáши их. Яко прáведен Госпóдь, и прáвды возлюбѝ, правоты̀ ви́де лицè Егò.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 11]Спасѝ мя, Гóсподи, я́ко оскудè преподóбный, я́ко умáлишася и҆́стины от сынóв человéческих. Сýeтная глагóла кíйждо ко и҆́скреннему своемý, устнè льсти́выя в сéрдце, и в сéрдце глагóлаша злáя. Потреби́т Госпóдь вся устны̀ льсти́выя, язы́к велерéчивый, рéкшыя: язы́к наш возвели́чим, устны̀ нáша при нас суть, кто нам Госпóдь eсть? Стрáсти рáди ни́щих и воздыхáнiя убóгих ны́не воскреснý, глагóлет Госпóдь, положýся во спасéнiе, не обиню́ся о нем. Словесà Госпóдня словесà чи́ста, сребрò разжжéно, искушéно землѝ, очищéно седмери́цею. Ты, Гóсподи, сохрани́ши ны и соблюдéши ны от рóда сегò и во век. Óкрест нечести́вiи хóдят, по высотè Твоéй умнóжил eсѝ сы́ны человéчeскiя.
[Псалом 12]Докóле, Гóсподи, забýдеши мя до концà? Докóле отвращáеши лицè Твоè от менè? Докóле положý совéты в душѝ моéй, болéзни в сéрдце моéм день и нощь? Докóле вознесéтся враг мой на мя? При́зри, услы́ши мя, Гóсподи Бóже мой, просветѝ óчи моѝ, да не когдà уснý в смерть, да не когдà речéт враг мой, укрепи́хся на негò. Стужáющiи ми возрáдуются, áще подви́жуся. Аз же на ми́лость Твою́ уповáх, возрáдуется сéрдце моè о спасéнiи Твоéм, воспою́ Гóсподеви благодéявшему мне и пою́ и҆́мени Гóспода Вы́шняго.
[Псалом 13]Речè безýмен в сéрдце своéм: несть Бог. Растлéша и омерзи́шася в начинáнiих, несть творя́й благосты́ню. Госпóдь с Небесè прини́че на сы́ны человéчeскiя, ви́дети, áще eсть разумевáяй илѝ взыскáяй Бóга. Вси уклони́шася, вкýпе неключи́ми бы́ша: несть творя́й благосты́ню, несть до eди́наго. Ни ли уразумéют вси дéлающiи беззакóнiе, снедáющiи лю́ди моя́ в снедь хлéба? Гóспода не призвáша. Тáмо убоя́шася стрáха, идéже не бе страх, я́ко Госпóдь в рóде прáведных. Совéт ни́щаго посрами́сте, Госпóдь же уповáнiе eгò eсть. Кто даст от Сióна спасéнiе Iзрáилево? Внегдà возврати́т Госпóдь пленéнiе людéй Свои́х, возрáдуется Iáков, и возвесели́тся Iзрáиль.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 14]Гóсподи, кто обитáет в жили́щи Твоéм? Илѝ кто всели́тся во святýю гóру Твою́? Ходя́й непорóчен и дéлаяй прáвду, глагóляй и҆́стину в сéрдце своéм. И҆́же не ульстѝ язы́ком свои́м и не сотворѝ и҆́скреннему своемý зла, и поношéнiя не прiя́т на бли́жнiя своя́. Уничижéн eсть пред ним лукáвнуяй, боя́щыя же ся Гóспода слáвит, клены́йся и҆́скреннему своeму и не отметáяся. Сребрà своегò не дадè в ли́хву и мзды на непови́нных не прiя́т. Творя́й сiя́ не подви́жится во век.
[Псалом 15]Сохранѝ мя, Гóсподи, яко на Тя уповáх. Рех Гóсподеви: Госпóдь мой eсѝ Ты, яко благи́х мои́х не трéбуеши. Святы́м, и҆́же суть на землѝ Егò, удивѝ Госпóдь вся хотéнiя Своя́ в них. Умнóжишася нéмощи и҆́х, по сих ускори́ша: не соберý собóры и҆́х от кровéй, ни помянý же имéн их устнáма мои́ма. Госпóдь часть достоя́нiя моегò и чáши моея́, Ты eсѝ устроя́яй достоя́нiе моè мне. Ужя нападóша ми в держáвных мои́х, и҆́бо достоя́нiе моè держáвно eсть мне. Благословлю́ Гóспода, вразуми́вшаго мя, eщè же и до нóщи наказáша мя утрóбы моя́. Предзрéх Гóспода предо мнóю вы́ну, я́ко одеснýю менè eсть, да не подви́жуся. Сегò рáди возвесели́ся сéрдце моè, и возрáдовася язы́к мой, eщè же и плоть моя́ всели́тся на уповáнiи. Яко не остáвиши дýшу мою́ во áде, нижè дáси преподóбному Твоемý ви́дети истлéнiя. Сказáл ми eсѝ путѝ животà, испóлниши мя весéлiя с лицéм Твои́м, красотà в десни́це Твоéй в конéц.
[Псалом 16]Услы́ши, Гóсподи, прáвду мою́, вонмѝ молéнiю моемý, внушѝ моли́тву мою́ не во устнáх льсти́вых. От лицà Твоегò судьбà моя́ изы́дет, óчи моѝ да ви́дита правоты̀. Искуси́л eсѝ сéрдце моè, посети́л eсѝ нóщiю, искуси́л мя eсѝ, и не обрéтеся во мне непрáвда. Яко да не возглагóлют устà моя́ дел человéческих, за словесà устéн Твои́х аз сохрани́х путѝ жéстоки. Совершѝ стопы̀ моя́ во стезя́х Твои́х, да не подви́жутся стопы̀ моя́. Аз воззвáх, яко услы́шал мя eсѝ, Бóже, приклонѝ ýхо Твоè мне и услы́ши глагóлы моя́. Удивѝ ми́лости Твоя́, спасáяй уповáющыя на Тя от проти́вящихся десни́це Твоéй. Сохранѝ мя, Гóсподи, я́ко зéницу óка, в крóве крилý Твоéю покры́еши мя. От лицà нечести́вых острáстших мя, вразѝ мои́ дýшу мою́ одержáша. Тук свой затвори́ша, устà их глагóлаша горды́ню. Изгоня́щiи мя ны́не обыдóша мя, óчи свои́ возложи́ша уклони́ти на зéмлю. Объя́ша мя я́ко лев готóв на лов и яко ски́мен обитáяй в тáйных. Воскреснѝ, Гóсподи, предварѝ я́ и запнѝ им, избáви дýшу мою́ от нечести́ваго, орýжiе Твоè от враг рукѝ Твоея́, Гóсподи, от мáлых от землѝ, разделѝ я́ в животè их, и сокровéнных Твои́х испóлнися чрéво их, насы́тишася сынóв, и остáвиша остáнки младéнцeм свои́м. Аз же прáвдою явлю́ся лицý Твоемý, насы́щуся, внегдà яви́ти ми ся слáве Твоéй.
Чтец: Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
СЕДАЛЬНЫ
Хор (по кафíсме седáльны воскрéсные, глас 8): Воскрéсл есѝ из мéртвых, Животé всех,/ и Áнгел свéтел женáм вопiя́ше: престáните от слез,/ апóстолом благовести́те, возопíйте пою́ща:/ я́ко воскрéсе Хрїстóс Госпóдь,// благоволи́вый спастѝ, я́ко Бог, род человéческiй.
Стiх: Воскреснù Гóсподи Бóже мой, да вознесéтся рукà Твоя,/ не забýди убóгих Твоúх до концà.
Воскресы́й из грóба я́ко вои́стинну,/ преподóбным повелéл есѝ женáм/ проповéдати востáнiе апóстолом, я́коже пи́сано есть:/ и скóрый Петр предстá грóбу, и свет зря во грóбе, ужасáшеся./ Тéмже и уви́дев плащани́цы, кромè Божéственнаго тéла в нем лежáщiя, со стрáхом возопѝ:/ слáва Тебè Хрїстè Бóже, я́ко спасáеши вся Спáсе наш:// Ѻ́тчее бо есѝ сiя́нiе.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Богорóдичен: Небéсную дверь, и кiвóт, всесвятýю гóру,/ светозáрный óблак воспои́м, небéсную лéствицу, словéсный рай,/ Éвино избавлéнiе, вселéнныя всея́ вели́кое сокрóвище,/ я́ко Спасéнiе в Ней содéлася мíрови,/ и оставлéнiе дрéвних согрешéнiй./ Сегó рáди вопiéм Ти:/ моли́ Сы́на Твоегó и Бóга,/ прегрешéнiй оставлéнiе даровáти,// благочéстно покланя́ющимся пресвятóму Рождествý Твоемý.
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
КАФИЗМА ТРЕТЬЯ
И чтем кафíсму 3-ю (или одúн псалóм, или до 1-й Слáвы)
[Псалом 17]Возлюблю́ Тя, Гóсподи, крéпосте моя́. Госпóдь утверждéнiе моè, и прибéжище моè, и Избáвитель Moй, Бог мой, Помóщник мой, и уповáю на Негò, Защи́титель мой, и рог спасéнiя моегò, и Застýпник мой. Хваля́ призовý Гóспода и от враг мои́х спасýся. Одержáша мя болéзни смéртныя, и потóцы беззакóнiя смятóша мя, болéзни áдовы обыдóша мя, предвари́ша мя сéти смéртныя. И внегдà скорбéти ми, призвáх Гóспода, и к Бóгу моемý воззвáх, услы́ша от хрáма Святáго Своегò глас мой, и вопль мой пред Ним вни́дет во ýши Егò. И подви́жеся, и трéпетна бысть земля́, и основáнiя гор смятóшася и подвигóшася, я́ко прогнéвася на ня Бог. Взы́де дым гнéвом Егò, и огнь от лицà Егò восплáменится, ýглiе возгорéся от Негò. И приклонѝ небесà, и сни́де, и мрак под ногáма Егò. И взы́де на Херувíмы, и летè, летè на крилý вéтреню. И положѝ тму закрóв Свой, óкрест Егò селéнiе Егò, темнà водà во óблацех воздýшных. От облистáнiя пред Ним óблацы проидóша, град и ýглiе óгненное. И возгремè с Небесè Госпóдь и Вы́шнiй дадè глас Свой. Низпослà стрéлы и разгнà я́, и мóлнiи умнóжи и смятè я́. И яви́шася истóчницы воднíи, и откры́шася основáнiя вселéнныя, от запрещéнiя Твоегò, Гóсподи, от дохновéнiя дýха гнéва Твоегò. Низпослà с высоты̀, и прiя́т мя, воспрiя́т мя от вод мнóгих. Избáвит мя от врагóв мои́х си́льных и от ненави́дящих мя, я́ко утверди́шася пáче менè. Предвари́ша мя в день озлоблéнiя моегò, и бысть Госпóдь утвержéнiе моè. И изведè мя на широтý, избáвит мя, я́ко восхотè мя. И воздáст ми Госпóдь по прáвде моéй и по чистотè рукý моéю воздáст ми. Яко сохрани́х путѝ Госпóдни и не нечéствовах от Бóга моегò. Яко вся судьбы̀ Егò предо мнóю и оправдáнiя Егò не отступи́ша от менè. И бýду непорóчен с Ним, и сохраню́ся от беззакóнiя моегò. И воздáст ми Госпóдь по прáвде моéй и по чистотè рукý моéю пред очи́ма Егò. С преподóбным преподóбен бýдеши, и с мýжем непови́нным непови́нен бýдеши, и со избрáнным избрáн бýдеши, и со стропти́вым разврати́шися. Яко Ты лю́ди смирéнныя спасéши и óчи гóрдых смири́ши. Яко Ты просвети́ши свети́льник мой, Гóсподи, Бóже мой, просвети́ши тму мою́. Яко Тобóю избáвлюся от искушéнiя и Бóгом мои́м прейдý стéну. Бог мой, непорóчен путь Егò, словесà Госпóдня разжжéна, Защи́титель есть всех уповáющих на Негò. Яко кто бог, рáзве Гóспода? илѝ кто бог, рáзве Бóга нáшего? Бог препоясýяй мя си́лою, и положѝ непорóчен путь мой. Совершáяй нóзе моѝ, я́ко елéни, и на высóких поставля́яй мя. Научáяй рýце моѝ на брань, и положи́л есѝ лук мéдян мы́шца моя́. И дал ми есѝ защищéнiе спасéнiя, и десни́ца Твоя́ воспрiя́т мя, и наказáнiе Твоè испрáвит мя в конéц, и наказáнiе Твоè то мя научи́т. Ушири́л есѝ стопы̀ моя́ пóдо мнóю, и не изнемогóсте плеснè моѝ. Поженý врагѝ моя́, и пости́гну я́, и не возвращýся, дóндеже скончáются. Оскорблю́ их, и не возмóгут стáти, падýт под ногáма мои́ма. И препоя́сал мя есѝ си́лою на брань, спял есѝ вся востаю́щыя на мя под мя. И врагóв мои́х дал ми есѝ хребéт, и ненави́дящыя мя потреби́л есѝ. Воззвáша, и не бе спасáяй: ко Гóсподу, и не услы́ша их. И истню́ я́ я́ко прах пред лицéм вéтра, я́ко брéнiе путéй поглáжду я́. Избáвиши мя от пререкáнiя людéй, постáвиши мя во главý язы́ков. Лю́дiе, и҆́хже не вéдех, рабóташа ми. В слух ýха послýшаша мя. Сы́нове чуждíи солгáша ми. Сы́нове чуждíи обетшáша и охромóша от стезь свои́х. Жив Госпóдь, и благословéн Бог, и да вознесéтся Бог спасéнiя моегò. Бог дая́й отмщéнiе мне и покори́вый лю́ди под мя. Избáвитель мой от враг мои́х гневли́вых, от востаю́щих на мя вознесéши мя, от мýжа непрáведна избáвиши мя. Сегò рáди исповéмся Тебè во язы́цех, Гóсподи, и и҆́мени Твоемý пою́: величáяй спасéнiя царéва, и творя́й ми́лость хрїстý Своемý Давíду, и сéмени eгò до вéка.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 18]Небесà повéдают слáву Бóжiю, творéнiе же рукý Егò возвещáет твердь. День дни отрыгáет глагóл, и нощь нóщи возвещáет рáзум. Не суть рéчи, нижè словесà, и҆́хже не слы́шатся глáси их. Во всю зéмлю изы́де вещáнiе их и в концы̀ вселéнныя глагóлы их. В сóлнце положѝ селéнiе Своè, и Той, я́ко Жени́х исходя́й от чертóга Своегò, возрáдуется, я́ко Исполи́н тещѝ путь. От крáя небесè исхóд Егò, и срéтенiе Егò до крáя небесè, и несть и҆́же укры́ется теплоты̀ Егò. Закóн Госпóдень непорóчен, обращáяй дýшы, свидéтельство Госпóдне вéрно, умудря́ющее младéнцы. Оправдáнiя Госпóдня прáва, веселя́щая сéрдце, зáповедь Госпóдня светлà, просвещáющая óчи. Страх Госпóдень чист, пребывáяй в век вéка: судьбы̀ Госпóдни и҆́стинны, оправдáны вкýпе, вожделéнны пáче злáта и кáмене чéстна мнóга, и слáждша пáче мéда и сóта. И҆́бо раб Твой храни́т я́, внегдà сохрани́ти я́, воздая́нiя мнóго. Грехопадéнiя кто разумéет? От тáйных мои́х очи́сти мя, и от чужди́х пощадѝ рабà Твоегò, áще не обладáют мнóю, тогдà непорóчен бýду и очи́щуся от грехà вели́ка. И бýдут во благоволéнiе словесà уст мои́х, и поучéнiе сéрдца моегò пред Тобóю вы́ну, Гóсподи, Помóщниче мой и Избáвителю мой.
[Псалом 19]Услы́шит тя Госпóдь в день печáли, защи́тит тя и҆́мя Бóга Iáковля. Пóслет ти пóмощь от Святáго и от Сióна застýпит тя. Помянéт вся́ку жéртву твою́, и всесожжéнiе твоè тýчно бýди. Даст ти Госпóдь по сéрдцу твоемý и весь совéт твой испóлнит. Возрáдуемся о спасéнiи твоéм и во и҆́мя Гóспода Бóга нáшего возвели́чимся. Испóлнит Госпóдь вся прошéнiя твоя́. Ны́не познáх, я́ко спасè Госпóдь хрїстà Своегò, услышит eгò с Небесè Святáго Своегò, в си́лах спасéнiе десни́цы Егò. Сíи на колесни́цах, и сíи на кóнех, мы же во и҆́мя Гóспода Бóга нáшего призовéм. Тíи спя́ти бы́ша и падóша, мы же востáхом и испрáвихомся. Гóсподи, спасѝ царя́ и услы́ши ны, вóньже áще день призовéм Тя.
[Псалом 20]Гóсподи, си́лою Твоéю возвесели́тся царь и о спасéнiи Твоéм возрáдуется зелò. Желáнiе сéрдца eгò дал есѝ eмý, и хотéнiя устнý eгò нéси лиши́л eгò. Я́ко предвари́л есѝ eгò благословéнiем благосты́нным, положи́л есѝ на главè eгò венéц от кáмене чéстна. Животà проси́л есть у Тебé, и дал есѝ eмý долготý днíй во век вéка. Вéлiя слáва eгò спасéнiем Твои́м, слáву и велелéпiе возложи́ши на негò. Я́ко дáси eмý благословéнiе во век вéка, возвесели́ши eгò рáдостiю с лицéм Твои́м. Я́ко царь уповáет на Гóспода, и ми́лостiю Вы́шняго не подви́жится. Да обря́щется рукà Твоя́ всем врагóм Твои́м, десни́ца Твоя́ да обря́щет вся ненави́дящiя Тебè. Я́ко положи́ши их я́ко пещь óгненную во врéмя лицà Твоегò, Госпóдь гнéвом Свои́м смятéт я́, и снéсть их огнь. Плод их от землѝ погуби́ши, и сéмя их от сынóв человéческих. Я́ко уклони́ша на Тя злáя, помы́слиша совéты, и҆́хже не возмóгут состáвити. Я́ко положи́ши я́ хребéт, во избы́тцех Твои́х уготóвиши лицè их. Вознеси́ся, Гóсподи, си́лою Твоéю, воспоéм и поéм си́лы Твоя́.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 21]Бóже, Бóже мой, вонмѝ ми, вскýю остáвил мя есѝ? Далéче от спасéнiя моегò словесà грехопадéнiй мои́х. Бóже мой, воззовý во дни, и не услы́шиши, и в нощѝ, и не в безýмiе мне. Ты же во Святéм живéши, хвалò Iзрáилева. На Тя уповáша отцы̀ нáши, уповáша и избáвил есѝ я́. К Тебé воззвáша, и спасóшася, на Тя уповáша, и не постыдéшася. Аз же есмь червь, а не человéк, поношéнiе человéков и уничижéнiе людéй. Вси ви́дящiи мя поругáша ми ся, глагóлаша устнáми, покивáша главóю: уповà на Гóспода, да избáвит eгò, да спасéт eгò, я́ко хóщет eгò. Яко Ты есѝ истóргiй мя из чрéва, уповáнiе моè от сосцý мáтере моея́. К Тебè привéржен есмь от ложéсн, от чрéва мáтере моея́ Бог мой есѝ Ты. Да не отстýпиши от менè, я́ко скорбь близ, я́ко несть помогáяй ми. Обыдóша мя тельцы̀ мнóзи, юнцы̀ тýчнiи одержáша мя. Отверзóша на мя устà своя́, я́ко лев восхищáяй и рыкáяй. Яко водà излiя́хся, и разсы́пашася вся кóсти моя́, бысть сéрдце моè я́ко воск, тáяй посредè чрéва моегò. И҆́зсше я́ко скудéль крéпость моя́, и язы́к мой прильпè гортáни моемý, и в персть смéрти свел мя есѝ. Яко обыдóша мя пси мнóзи, сонм лукáвых одержáша мя, ископáша рýце моѝ и нóзе моѝ. Исчетóша вся кóсти моя́, тíи же смотри́ша и презрéша мя. Раздели́ша ри́зы моя́ себè, и о одéжди моéй метáша жрéбiй. Ты же, Гóсподи, не удалѝ пóмощь Твою́ от менè, на заступлéнiе моè вонмѝ. Избáви от орýжiя дýшу мою́, и из рукѝ пéсiи единорóдную мою́. Спасѝ мя от уст львóвых и от рог единорóжь смирéнiе моè. Повéм и҆́мя Твоè брáтiи моéй, посредè цéркве воспою́ Тя. Боя́щiися Гóспода, восхвали́те Егò, все сéмя Iáковле, прослáвите Егò, да убои́тся же от Негò все сéмя Iзрáилево. Яко не уничижѝ, нижè негодовà моли́твы ни́щаго, нижè отвратѝ лицè Своè от менè, и егдà воззвáх к Немý, услы́ша мя. От Тебè похвалà моя́, в цéркви вели́цей исповéмся Тебè, моли́твы моя́ воздáм пред боя́щимися Егò. Ядя́т убóзiи и насы́тятся, и восхвáлят Гóспода взыскáющiи Егò, живà бýдут сердцà их в век вéка. Помянýтся и обратя́тся ко Гóсподу вси концы̀ землѝ, и поклóнятся пред Ним вся отéчествiя язы́к. Яко Госпóдне есть цáрствiе, и Той обладáет язы́ки. Ядóша и поклони́шася вси тýчнiи землѝ, пред Ним припадýт вси низходя́щiи в зéмлю, и душà моя́ Томý живéт. И сéмя моè порабóтает Емý, возвести́т Гóсподеви род грядýщiй. И возвестя́т прáвду Егò лю́дем рóждшымся, я́же сотворѝ Госпóдь.
[Псалом 22]Госпóдь пасéт мя, и ничтóже мя лиши́т. На мéсте злáчне, тáмо вселѝ мя, на водè покóйне воспитà мя. Дýшу мою́ обратѝ, настáви мя на стезѝ прáвды, и҆́мене рáди Своегò. Áще бо и пойдý посредè сéни смéртныя, не убою́ся зла, я́ко Ты со мнóю есѝ, жезл Твой и пáлица Твоя́, та мя утéшиста. Уготóвал есѝ предо мнóю трапéзу сопроти́в стужáющым мне, умáстил есѝ елéом главý мою́, и чáша Твоя́ упоявáющи мя, я́ко держáвна. И ми́лость Твоя́ поженéт мя вся дни животà моегò, и éже всели́ти ми ся в дом Госпóдень, в долготý днiй.
[Псалом 23]Госпóдня земля́, и исполнéнiе ея́, вселéнная и вси живýщiи на ней. Той на моря́х основáл ю есть, и на рекáх уготóвал ю есть. Кто взы́дет на гóру Госпóдню? илѝ кто стáнет на мéсте святéм Егò? Непови́нен рукáма и чист с сéрдцем, и҆́же не прiя́т всýе дýшу свою́, и не кля́тся лéстiю и҆́скреннему своемý. Сей прiи́мет благословéнiе от Гóспода, и ми́лостыню от Бóга, Спáса своегò. Сей род и҆́щущих Гóспода, и҆́щущих лицè Бóга Iáковля. Возми́те вратà кня́зи вáша, и возми́теся вратá вéчная, и вни́дет Царь слáвы. Кто есть сей Царь слáвы? Госпóдь крéпок и си́лен, Госпóдь си́лен в брáни. Возми́те вратá кня́зи вáша, и возми́теся вратá вéчная, и вни́дет Царь слáвы. Кто есть сей Царь слáвы? Госпóдь сил, Той есть Царь слáвы.
Чтец: Слáва Ѻтцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
Хор (по кафíсме седáльны воскрéсные, глас 8): Человéцы, Спáсе, гроб Твой запечáташа:/ Áнгел кáмень от дверéй отвалѝ:/ жены̀ ви́деша востáвша от мéртвых,/ и ты́я благовести́ша ученикóм Твои́м в Сióне,/ я́ко воскрéсл есѝ, Животè всех, и разреши́шася ýзы смéртныя:// Гóсподи слáва Тебè.
Стiх: Исповéмся Тебè Гóсподи всем сéрдцем моúм,/ повéм вся чудесà Твоя́.
Ми́ра погребáтельная жены̀ принéсша,/ глас Áнгельскiй из грóба слы́шаху: престáните от слез,/ и вмéсто печáли рáдость прiими́те, возопíйте пою́ща:/ я́ко воскрéсе Хрїстóс Госпóдь,// благоволи́вый спастѝ, я́ко Бог, род человéческiй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Богорóдичен: О Тебè рáдуется, Благодáтная вся́кая тварь,/ Áнгельскiй собóр и человéческий род,/ освящéнный хрáме и раю́ словéсный,/ дéвственная похвалó,/ из Нея́же Бог воплоти́ся,/ и Младéнец бысть, прéжде век Сый Бог наш:/ ложеснá бо Твоя престóл сотворѝ/ и чрéво Твоè прострáннее Небéс содéла.// О Тебè рáдуется, Благодáтная, вся́кая тварь, слáва Тебè.
ПОЛИЕЛЕЙ
Хор: Хвали́те И҆́мя Госпóдне, хвали́те, рабѝ Гóспода.
Аллилýїа (трúжды)
(И далее хор продолжает чередовать стiхи 134 псалма и Аллилуиа)
[Псалом 134 Аллилуиа]стоя́щiи во хрáме Госпóдни, во двóрех дóму Бóга нáшего./ Хвали́те Гóспода, я́ко Благ Госпóдь, пóйте и҆́мени Егò, я́ко добрò:/ я́ко Iáкова избрà Себè Госпóдь, Iзрáиля в достоя́нiе Себè./ Я́ко аз познáх, я́ко Вéлiй Госпóдь, и Госпóдь наш над всéми бóги./ Вся ели́ка восхотè Госпóдь, сотворѝ на небесѝ и на землѝ, в моря́х и во всех бéзднах./ Возводя́ óблаки от послéдних землѝ, мóлнiи в дождь сотворѝ, изводя́й вéтры от сокрóвищ Свои́х./ И҆́же поразѝ пéрвенцы Еги́петскiя, от человéка до скотà./ Послà знáменiя и чудесà посредè Тебè, Еги́пте, на фараóна и на вся рабы̀ eгò./ И҆́же поразѝ язы́ки мнóги и избѝ царѝ крéпки:/ Сиóна, царя Аморрéйска, и Óга, царя́ Васáнска, и вся цáрствiя Ханаáнска,/ и дадè зéмлю их достоя́нiе, достоя́нiе Iзрáилю, лю́дем Свои́м./ Гóсподи, и҆́мя Твоè в век и пáмять Твоя́ в род и род:/ я́ко суди́ти и҆́мать Госпóдь лю́дем Свои́м, и о рабéх Свои́х умóлится./ Íдоли язы́к, сребрò и злáто, делá рук человéческих/ Устà и҆́мут, и не возлагóлют, óчи и҆́мут, и не ýзрят,/ ýши и҆́мут, и не услы́шат, нижè бо есть дух во устéх их./ Подóбни им да бýдут творя́щiи я́, и вси надéющiися на ня./ Дóме Iзрáилев, благослови́те Гóспода, дóме Аарóнь, благослови́те Гóспода, дóме Левíин, благослови́те Гóспода./ Боя́щiися Гóспода, благослови́те Гóспода.
Благословéн Госпóдь от Сióна, живы́й во Iерусали́ме.
Аллилýїа (трúжды)
Исповéдайтеся Гóсподеви, я́ко Благ, я́ко в век ми́лость Егò.
Аллилýїа (трúжды)
(И далее хор продолжает чередовать стiхи 135 псалма и Аллилуиа)
Продолжéнiе здесь