Святителя Николая, архиепископа Мир Ликийских чудотворца. (Никола зимний) ОБЕДНИЦА (Изобразительные)
19 декабря́ 2023 гóда. Втóрник 29-й седмúцы по Пятидеся́тнице. И́же во святы́х отцà нáшего Нiколáя, архиепíскопа Мир Ликíйских, чудотвóрца. (Нiкóла зúмнiй). Глас 3. Прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе изобразúтельных.
Прежде глагóли часы. Аще имаши произволéнiе, то чти ýтреню с канóном и пéрвым чáсом, áще же ни, тóкмо часы.
ЧИН ОБЕДНИЦЫ
Глагóли сúце: Благословѝ, душè моя́, Гóспода,/ благословéн есѝ Гóсподи.
Псалом 102
Благословѝ, душè моя́, Гóспода,/ и вся внýтренняя моя и҆́мя святóе Егò./ Благословѝ, душè моя, Гóспода,/ и не забывáй всех воздая́нїй Егò,/ очищáющаго вся беззакóнїя твоя́,/ исцеля́ющаго вся недýги твоя́,/ избавля́ющаго от истлéнiя живóт твой,/ венчáющаго тя ми́лостїю и щедрóтами,/ исполня́ющаго во благи́х желáнїе твоè:/ обновится я́ко óрля юность твоя́./ Творя́й ми́лостыни Госпóдь,/ и судьбý всем оби́димым./ Сказà путѝ Своя́ Моисéови,/ сыновóм Iзрáилевым хотéнїя Своя́:/ Щедр и Ми́лостив Госпóдь,/ Долготерпели́в и Многоми́лостив./ Не до концà прогнéвается,/ нижè во век враждýет,/ не по беззакóнїем нáшим сотвори́л есть нам,/ нижè по грехóм нáшым воздáл есть нам./ Я́ко по высотè небéсней от землѝ,/ утверди́л есть Госпóдь ми́лость Свою́ на боя́щихся Егò./ Ели́ко отстоят востóцы от зáпад,/ удáлил есть от нас беззакóнїя нáша./ Я́коже щéдрит отéц сы́ны,/ ущéдри Госпóдь боя́щихся Егò./ Я́ко Той познá создáнїе нáше,/ помянý, яко персть есмы́./ Человéк, яко травà днíе eгò,/ яко цвет сéльный, тáко оцветéт,/ яко дух прóйде в нем,/ и не бýдет, и не познáет ктомý мéста своегò./ Ми́лость же Госпóдня от вéка и до вéка на боя́щихся Егò,/ и прáвда Егò на сынéх сынóв, храня́щих завéт Егò, и пóмнящих зáповеди Егò твори́ти я./ Госпóдь на Небесѝ уготóва Престóл Свой,/ и Цáрство Егò всéми обладáет./ Благослови́те Гóспода вси Áнгели Егò,/ си́льнїи крéпостїю, творя́щїи слóво Егò, услышати глас словéс Егò./ Благослови́те Гóспода вся Си́лы Егò,/ слýги Егò, творя́щїи вóлю Егò./ Благослови́те Гóспода вся делà Егò,/ на всяком мéсте влады́чества Егò.
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Благословѝ, душè моя, Гóспода,/ и вся внýтренняя моя и҆́мя святóе Егò./ Благословéн есѝ, Гóсподи.
Слáва Ѻтцý и Сы́ну и Святóму Дýху.
Псалом 145
Хвалѝ, душè моя, Гóспода./ Восхвалю́ Гóспода в животè моéм,/ пою Бóгу моемý, дóндеже есмь./ Не надéйтеся на кня́зи, на сы́ны человéческїя,/ в ни́хже несть спасéнїя./ Изы́дет дух eгò/ и возврати́тся в зéмлю свою́./ В той день поги́бнут вся помышлéнїя eгò./ Блажéн, eмýже Бог Iáковль Помóщник егò,/ уповáнiе eгò на Гóспода Бóга своегò,/ сотвóршаго нéбо и зéмлю,/ мóре и вся, я́же в них,/ храня́щаго и҆́стину в век,/ творя́щаго суд оби́димым,/ даю́щаго пи́щу áлчущим./ Госпóдь реши́т оковáнныя./ Госпóдь умудря́ет слепцы̀./ Госпóдь возвóдит низвéрженныя./ Госпóдь лю́бит прáведники./ Госпóдь храни́т пришéльцы,/ си́ра и вдову прїи́мет/ и путь грéшных погуби́т./ Воцари́тся Госпóдь во век,/ Бог твой, Сióне, в род и род.
И ны́не и прúсно и во вéки векóв. Амúнь.
ЕДИНОРОДНЫЙ СЫНЕ
Единорóдный Сы́не и Слóве Бóжiй, Безсмéртен Сый/ и извóливый спасéнїя нáшего рáди/ воплоти́тися от Святы́я Богорóдицы и Приснодéвы Марíи,/ непрелóжно вочеловéчивыйся,/ распны́йся же, Хрїстè Бóже, смéртїю смерть попрáвый,/ Един Сый Святы́я Трóицы,/ спрославля́емый Отцý и Святóму Дýху, спасѝ нас.
И поем Блаженны с тропарями из Октоиха
Хор: Во Цáрствiи Твоéм помянù нас, Гóсподи,/ егдà прiúдеши, во Цáрствiи Твоéм.
На 12. Хор: Блажéни нúщiи дýхом,/ я́ко тех есть Цáрство Небéсное.
Хор: Блажéни плáчущiи,/ я́ко тíи утéшатся.
На 10. Хор: Блажéни крóтцыи,/ я́ко тíи наслéдят зéмлю.
Хор: Блажéни áлчущiи и жáждущiи прáвды,/ я́ко тíи насы́тятся.
На 8. Хор: Блажéни мúлостивiи,/ я́ко тíи помúловани бýдут.
Чтец (стiхúры свт. Нiколáя, глас 2): Процвелá есть пусты́ня, я́ко крiн, Гóсподи,/ язы́ческая неплодя́щая Цéрковь/ пришéствiем Твои́м,// в нéйже утверди́ся моè сéрдце.
Хор: Блажéни чúстiи сéрдцем,/ я́ко тíи Бóга ýзрят.
Чтец: Нiкóлае блажéнне, Влады́ки и҆́скреннiй учени́к ты быв,// спасáеши к тебè притекáющия от лю́тых бед и смéрти гóрькiя.
На 6. Хор: Блажéни миротвóрцы,/ яко тíи сы́нове Бóжiи нарекýтся.
Чтец: Очи́сти рабы̀ Твоя́, грехóв оставлéнiе, я́ко благ,/ дáруя, Нiколáя, Твоегó угóдника,// я́же к Тебè ходáтайствы, Многоми́лостиве.
Хор: Блажéни изгнáни прáвды рáди,/ я́ко тех есть Цáрство Небéсное.
Богорóдичен: Утолѝ смущéнiе душѝ моея́, Пречи́стая,/ и жизнь окормѝ, Всесвятáя, Бóга рóждшая,// в Нéмже утверди́ся сéрдце моè.
На 4. Хор: Блажéни естè, егдà понóсят вам,/ и изженýт, и рекýт всяк зол глагóл на вы лжýще Менè рáди.
Чтец (стiхúры свт. Нiколáя, глас 1): Нóвый яви́лся есѝ Авраáм, Нiкóлае,/ я́ко единорóдна бо ны́не привéл есѝ сы́на Влады́це твоемý,/ безкрóвныя жéртвы принося́ при́сно./ Отонýдуже благослови́лся есѝ, я́ко страннолю́бец, óтче,// и Трóицы был есѝ оби́тель Божéственна и непорóчна.
Хор: Рáдуйтеся и веселúтеся, я́ко мзда вáша мнóга на Небесéх.
Чтец: Стрáнна и ужáсна содевáеши чудесá, Нiкóлае,/ по всей землѝ и в мóри далéче бéдствующим скоротéчными моли́твами предстáтельствуя,/ немощны́м врач и ни́щим питáтель,// побéды на врагѝ тезоимени́т лю́дем вéрным явля́яся.
Хор: Слáва Ѻтцý и Сы́ну и Святóму Дýху.
Трóичен: Чту и почитáю Трóицу Нераздéльную, Тремѝ Ли́цы разделя́емую при́сно,/ соединя́емую же Существóм и Естествóм, я́ко Еди́но Начáло,/ Отцá, и Сы́на, и Дýха Святáго, всéми держáвно влады́чествующую// и вся соблюдáющую, я́ко хóщет.
Хор: И ны́не и прúсно и во вéки векóв. Амúнь.
Богорóдичен: Весь воплóщься во утрóбе Твоéй, Пречи́стая,/ Хрiстóс Бог без сéмене роди́ся:/ не стерпè бо Свои́х рук создáнiе зрéти, от льсти́ваго мýчимо,// прiи́де рабозрáчным óбразом человéческiй род избáвити.
Тропари и кондаки
Тропáрь cв. Нiколáя, глас 4: Прáвило вéры и óбраз крóтости,/ воздержáнiя учи́теля/ яви́ тя стáду твоемý/ Я́же вещéй И҆́стина./ Сегó рáди стяжáл есѝ смирéнiем высóкая,/ нищетóю богáтая,/ óтче священноначáльниче Нiкóлае,/ молѝ Хрiстà Бóга,// спасти́ся душáм нáшим.
Слáва Ѻтцý и Сы́ну и Святóму Дýху.
Кондáк свт. Николáя, глас 3: В Ми́рех, свя́те, священнодéйствитель показáлся есѝ,/ Хрiстóво бо, преподóбне, Евáнгелiе испóлнив,/ положи́л есѝ дýшу твою́ о лю́дех твои́х/ и спасл есѝ непови́нныя от смéрти./ Сегò рáди освяти́лся есѝ,// я́ко вели́кiй таи́нник Бóжiя благодáти.
И ны́не и прúсно и во вéки векóв. Амúнь.
Кондáк Богорóдицы, глас 6: Предстáтельство хрiстiáн непосты́дное,/ ходáтайство ко Творцý непрелóжное,/ не прéзри грéшных молéнiй глáсы,/ но предварѝ, я́ко Благáя,/ на пóмощь нас, вéрно зовýщих Ти;/ ускорѝ на моли́тву и потщи́ся на умолéнiе,// предстáтельствующи при́сно, Богорóдице, чтýщих Тя.
Трисвятое
Хор: Святы́й Бóже,/ Святы́й Крéпкій,/ Святы́й Безсмéртный, помúлуй нас. (3 рáза)
Хор: Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Хор: Святы́й Безсмéртный, помúлуй нас.
Хор: Святы́й Бóже,/ Святы́й Крéпкій,/ Святы́й Безсмéртный, помúлуй нас.
Прокимен святителя, глас 7
Чтец: Прокíмен, глас седьмы́й, псалóм Давíдов. Возвесели́тся прáведник о Гóсподе и уповáет на негò. (Пс.63:11)
Хор: Возвеселúтся прáведник о Гóсподе/ и уповáет на негò.
Чтец: Услы́ши, Бóже, глас мой, внегдà моли́ти ми ся к Тебè.(Пс.63:2А)
Хор: Возвеселúтся прáведник о Гóсподе/ и уповáет на негò.
Чтец: Возвесели́тся прáведник о Гóсподе.
Хор: И уповáет на негò.
АПОСТОЛ
Чтец: Ко Еврéем послáнiя святáго апóстола Пáвла чтéнiе.
(Евр.зач.335): Брáтiе, повинýйтеся настáвником вáшым и покаря́йтеся: тíи бо бдят о душáх вáших, я́ко слóво воздáти хотя́ще: да с рáдостiю сiè творя́т, а не воздыхáюще, нѣсть бо полéзно вaм сiè. Моли́теся о нaс: уповáем бо, я́ко добрý сóвѣсть и́мамы, во всѣх дóбре хотя́ще жи́ти. Ли́шше же молю́, сiè твори́те, да вскóрѣ устрóюся вaм. Бoг же ми́ра, возведы́й из мéртвых пáстыря овцáм вели́каго крóвiю завѣ́та вѣ́чнаго, Гóспода нáшего Iисýса Хрїстà, да соверши́т вы во вся́цѣм дѣ́лѣ блáзѣ, сотвори́ти вóлю егò, творя́ в вaс благоугóдное пред ним Iисýс Хрїстóм: емýже слáва во вѣ́ки вѣкóв. Ами́нь.
[Синодальный перевод]Братия, повинуйтесь наставникам вашим и будьте покорны, ибо они неусыпно пекутся о душах ваших, как обязанные дать отчет; чтобы они делали это с радостью, а не воздыхая, ибо это для вас неполезно. Молитесь о нас; ибо мы уверены, что имеем добрую совесть, потому что во всем желаем вести себя честно. Особенно же прошу делать это, дабы я скорее возвращен был вам. Бог же мира, воздвигший из мертвых Пастыря овец великого Кровию завета вечного, Господа нашего Иисуса Христа, да усовершит вас во всяком добром деле, к исполнению воли Его, производя в вас благоугодное Ему через Иисуса Христа. Ему слава во веки веков! Аминь. (Евр.13:17-21)
Аллилуиарий святителя, глас 4
Чтец: Аллилýїа, аллилýїа, аллилýїа, глас четвéртый, псалóм Давíдов.
Хор: Аллилýїа, аллилýїа, аллилýїа.
Чтец: Свящéнницы Твои́ облеку́тся прáвдою, и преподóбнiи Твои́ возрáдуются. (Пс.131:9)
Хор: Аллилýїа, аллилýїа, аллилýїа.
Чтец: Закóн Бóга егò в сéрдце егò, и не зáпнутся стопы́ егò. (Пс.36:31)
Хор: Аллилýїа, аллилýїа, аллилýїа.
ЕВАНГЕЛИЕ
От Лукѝ Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Лк.зач.24): Во врéмя óно, ста Iисýс на мéсте рáвне, и нарóд учени́к Егò, и мнóжество мнóго людéй от всея́ Iудéи и Iерусали́ма, и помóрiя Ти́рска и Сiдóнска, и́же прiидóша послýшати Егò и исцели́тися от недýг свои́х, и стрáждущiи от дух нечи́стых, и исцеля́хуся. И весь нарóд искáше прикасáтися Емý, я́ко си́ла от Негò исхождáше, и исцеля́ше вся. И той возвéд óчи своѝ на ученикѝ своя́, глагóлаше: блажéни ни́щiи дýхом, я́ко вáше есть Цáрствiе Бóжiе. Блажéни, áлчущiи ны́не, я́ко насы́титеся. Блажéни, плáчущiи ны́не, я́ко возсмеéтеся. Блажéни бýдете, егдà возненави́дят вас человéцы, и егдà разлучáт вы и понóсят, и пронесýт и́мя вáше я́ко зло, Сы́на Человéческаго рáди. Возрáдуйтеся в той день и взыгрáйте: се бо мзда вáша мнóга на небесѝ.
[Синодальный перевод]В те дни стал Иисус на ровном месте, и множество учеников Его, и много народа из всей Иудеи и Иерусалима и приморских мест Тирских и Сидонских, которые пришли послушать Его и исцелиться от болезней своих, также и страждущие от нечистых духов; и исцелялись. И весь народ искал прикасаться к Нему, потому что от Него исходила сила и исцеляла всех. И Он, возведя очи Свои на учеников Своих, говорил: Блаженны алчущие ныне, ибо насытитесь. Блаженны вы, когда возненавидят вас люди и когда отлучат вас, и будут поносить, и пронесут имя ваше, как бесчестное, за Сына Человеческого. Возрадуйтесь в тот день и возвеселитесь, ибо велика вам награда на небесах. (Лк.6:17-23А)
Хор: Слáва Тебè, Гóсподи, слáва Тебè.
Помянѝ нас, Гóсподи, егдà прїи́деши во Цáрствiи Твоéм.
Помянѝ нас, Влады́ко, егдà прїи́деши во Цáрствiи Твоéм.
Помянѝ нас, Святы́й, егдà прїи́деши во Цáрствiи Твоéм.
Лик небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Стiх: Приступи́те к Немý и просвети́теся, и лицà вáша не постыдя́тся.
Лик Небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Слáва Ѻтцý и Сы́ну и Святóму Дýху.
Лик святы́х Áнгел и Архáнгел со всéми Небéсными си́лами поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
И ны́не и прúсно и во вéки векóв. Амúнь.
Символ веры
Вéрую во Еди́наго Бóга Ѻтцà, Вседержи́теля, Творцà нéбу и землѝ, ви́димым же всем и неви́димым. И во Еди́наго Гóспода Iисýса Хрїстà, Сы́на Бóжiя, Единорóднаго, И҆́же от Ѻтцà Рождéннаго прéжде всех век; Свéта от Свéта, Бóга И҆́стинна от Бóга И҆́стинна, рождéнна, несотворéнна, единосýщна Ѻтцý, И҆́мже вся бы́ша. Нас рáди человéк и нáшего рáди спасéнiя сшéдшаго с небéс и воплоти́вшагося от Дýха Свята и Марíи Дéвы и вочеловéчшася. Распя́таго же за ны при Понтíйстем Пiлáте, и страдáвша и погребéнна. И воскрéсшаго в трéтiй день по Писáнiем, и возшéдшаго на небесà и седя́ща одеснýю Ѻтцà. И пáки грядýщаго со слáвою суди́ти живы́м и мéртвым, Егóже Цáрствiю не бýдет концà. И в Дýха Святáго, Гóспода, Животворя́щаго, И҆́же от Ѻтцà исходя́щаго, И҆́же со Ѻтцéм и Сы́ном спокланя́ема и сслáвима, Глагóлавшего прорóки. Во еди́ну Святýю, Собóрную и Апóстольскую Цéрковь. Исповéдую еди́но крещéнiе во оставлéнiе грехóв. Чáю воскресéнiя мéртвых, и жи́зни бýдущаго вéка. Аминь.
Ослáби, остáви, простѝ Бóже, прегрешéнiя нáша, вóльная, и невóльная, я́же в слóве и в дéле, я́же в вéденiи и не в вéденiи, я́же во дни и в нощѝ, я́же во умè и помышлéнiи, вся нам простѝ, я́ко Благ и Человеколю́бец.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
КОНДАК
Кондáк свт. Николáя, глас 3: В Ми́рех, свя́те, священнодéйствитель показáлся еси́,/ Хрiстóво бо, преподóбне, Евáнгелiе испóлнив,/ положи́л еси́ дýшу твою́ о лю́дех твои́х/ и спасл еси́ непови́нныя от смéрти./ Сегò рáди освяти́лся еси́,// я́ко вели́кiй таи́нник Бóжiя благодáти.
Гóсподи, поми́луй. (12 раз)
И молитву: Всесвятáя Трóице, Единосýщная Держáво, Нераздéльное Цáрство, всех благи́х Винà, благоволѝ же и о мне грéшнем, утвердѝ, вразумѝ сéрдце моè, и всю мою отымѝ сквéрну, просветѝ мою мысль, да вы́ну слáвлю, пою, покланя́юся и глагóлю: Еди́н Свят, Един Госпóдь, Iисýс Хрїстóс, во слáву Бóга Ѻтцá, ами́нь.
Бýди и҆́мя Госпóдне благословéно от ны́не и до вéка. (3 рáза)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Псалом 33
Благословлю́ Гóспода на вся́кое врéмя,/ вы́ну хвалà Егò во устéх мои́х./ О Гóсподе похвáлится душà моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егò вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицà вáша не постыдя́тся./ Сей ни́щiй воззвà, и Госпóдь услы́ша и҆̀,/ и от всех скорбéй егò спасè и҆̀./ Ополчи́тся Áнгел Госпóдень óкрест боя́щихся Егò,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егò,/ яко несть лишéнiя боя́щымся Егò./ Богáтiи обнищáша и взалкáша,/ взыскáющiи же Гóспода не лишáтся вся́каго блáга./ Прiиди́те, чáда, послýшайте менè,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнè твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Óчи Госпóдни на прáведныя,/ и ýши Егò в моли́тву их./ Лицè же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша и҆́х,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютà,/ и ненави́дящiи прáведнаго прегрешáт./ Избáвит Госпóдь дýши раб Свои́х,/ и не прегрешáт вси уповáющiи на Негò.
Достойно есть
Хор: Достóйно есть я́ко воúстинну блажúти Тя, Богорóдицу,/ Присноблажéнную и Пренепорóчную и Мáтерь Бóга нáшего./ Честнéйшую Херувíм и слáвнeйшую без сравнéнiя Серафíм,/ без истлéнiя Бóга Слóва рóждшую, сýщую Богорóдицу Тя величáем.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи, помúлуй. (3 рáза)
Гóсподи, благословᴎ́.
ОТПУСТ
Гóсподи, Iисýсе Хрїстè, Сы́не Бóжiй, моли́твами пречи́стыя Своея́ Мáтере, святы́х слáвных и всехвáльных Апóстол, преподóбных и богонóсных отéц наших и всех святы́х, поми́лует и спасéт нас, я́ко Благ и Человеколю́бец.