Пегасы
Пегасаў з нябесных лугоў
Сагналі ў калгасы,
Табун мармуровых багоў
Не топча Парнасы.
Ажно па блішчастыя спіны
Абсеклі ім крылы.
Яны зараз - аграмашыны,
Конскія сілы.
Яны зараз - конная цяга,
Крыніца навоза.
Старая, як людзі сага,
Сярмяжная проза.
Баба капрызная - глеба,
Трэба, хоць трэсні,
Дзеля надзённага хлеба
Плюнуць на песні.
Толькі раллёй забіты,
Проста у твары
Пегас ускіне капыты,
Скокне за хмары.