Служба преподобномученикам Оптинским, на Пасху убиенным
В преддверии дня памяти троих новопреподобномучеников, в Оптиной пустыни в день Пасхи убиенных, выкладываю в «Уставные заметки» текст службы убиенным братиям, составленной насельником Иоанно-Предтеченского скита Оптиной пустыни священноиноком Никоном (Скаргой). Фактический состав песнопений в службе славословный, хотя в ней указаны седален по полиелее и стихира по 50-м псалме. Текст последования воспроизводится по авторской машинописи. Поскольку новомученики Василий, Ферапонт и Трофим пока официально не прославлены в лике святых, служба публикуется только для келейного употребления почитателями их мученического подвига.
Служба преподобномученикам Оптинским, на Пасху убиенным,
Василию, Ферапонту и Трофиму
На вечерни
На Господи воззвах: стихиры, глас 5.
Подобен: Радуйся:Радуйтеся, троичным осияемии светом, / тридневным воскресением облистаемии юноши, / мученическими светлостьми озареннии иноцы, / преподобнии агнцы оптинскаго луга духовнаго, / светоносныя звезды тверди церковныя, / в нощи Воскресения Христова неугасимии лампады, / Христа молите // ниспослати душам нашим просвещение и велию милость.
Радуйтеся, новоделателие вертограда оптинскаго, / процветшия ваийя пасхальнаго страдания, / крины новомученичестии, преподобныя шипки, / язвы Христа Бога на телесех своих носящии, / имиже уязвисте демонское множество / и верныя облаговонствовасте, / плоды благочестия израстисте сладкая, / имиже питаете к раце мощей ваших приходящия, / Христа небеснаго вертоградаря молите // угобзитися и нам в житницу жизни.
Радуйтеся, сынове благодати старческия, / изряднии подвижницы Оптиной Пустыни, / исповедницы иноческаго жития, / всеблагоговейнии чтителие отеческих преданий, / трудолюбия красная зерцала, / молитвы делателища ревностная и сладкая, / демонов губители, болезней целители, / всем приходящим в Оптину скорые послушницы, / наследницы старческих дарований, / с нимиже Христа молите // даровати нам мир и велию милость.
Слава, глас тойже:Радуйтеся, новолепнии мученицы, / процветшия страстию Христа Бога, / в нощь Воскресения закланнии агнцы, / струями кровными свидетельствовавшии верность Христу, / подвиги иноческими отрясше ветхий нрав, / во Христа облекшеся страданием, / спогребшеся с ним телесным образом, / духовно же совостасте от гробов, / в Царствие вселистеся пасхальныя радости, / темже молитеся Христу // даровати душам нашим велию милость.
На стиховне, стихиры Триоди.
Слава, Василию, глас 5:О, дивное Божие смотрение, / о велия сила твоего рачения, / венценосче мучениче Василие, / како желанием возжелел еси умрети на Пасху, / како умолил еси Христа смертеумертвителя, / еже тебе хотети, тако и бытии, / и мечное заколение яко целование живота вечнаго приял еси, / стрелою любве уязвлен сый к Распятому, / Емуже и страстию твоею сораспялся еси / и вечно с Богом твоим пребываеши, / темже Избавителя и Искупителя всех моли / свободу улучити нам от страстей безчестия / и область чадами Божиими быти, // твоими молитвами, святе Василие.
Тропарь, глас 3:Да веселятся иноческая воинства, / да радуется старцев оптинских собрание, / яко на Пасху добропобеднии агнцы в Оптиной заклашася, / иже язвами своими уязвиша демонское воинство / и мучителево посрамиша рачение, / меченосно в райская села всельшеся, / идеже молятся Христу Богу // спастися душам нашим.
Ин тропарь, глас тойже:Яко жертву живу телеса ваша Богу представисте, / на Пасху Господню заклатися изволисте, / преподобномученицы Господни непобедимии, / Ферапонте, Трофиме и премудре Василие, / кровию Агнчей души ваша убелисте, / меч мучителев якоже лествицу в небесное обретосте, / имже в чертог царский дерзновенно внидосте, / идеже на Браке Агнчем со всеми святыми ликуете, / темже молитеся за ны, достоблаженная братия, // новомучеников российских сопричастницы.
На утрени
Седален по полиелее, глас 3:Глас кимвалов и братское ликование не пресече усечение мечное, но паче умолче глас смерти и возопи ад горько, како лишихся триех черноризцев, иже пожрети хотех языком меча, но властию Воскресшаго тридневно от уст моих исторгаются, и горце ми ругаюся, и в горний мир вселяются, яко жертвы приятнии горличищи, и молитвенницы боголюбезнии.
Стихира по 50-м псалме, глас 6:Воскресение Христово видесте, / Агнца Пасхальнаго вкусисте, / мечное усечение приясте / и светлыми душами яко на облацех легцих в небо взошли есте, / идеже глас празднующих срете вы, / и Пасхе истее причастистеся, / Христу поклонилися есте, / темже молитеся Ему / тьмы кромешныя и адских мук избавити // верою и любовию вас почитающих.
Канон, глас 1, егоже краегранесие:
Три свещи пасхальныя пою, возженныя мучением.
Песнь 1
Ирмос: Воскресения день:Троице предстоя, треблаженнии оптинстии отцы, от треволнений скорбных избавите память вашу присносвященную совершающих, молимся.
Распаляеми ревностию, богомудрии, житейских нужд отрясосте молву и в тихое пристанище пустыни оптинстей достигосте, благодатию Христовою воодушевляеми.
Избрание ваше треблаженно есть, отречение от мира премного похваляемо, мученичество же ваше яко приснокрасный венец, от небесных высей к вам ниспосылаемый.
Богородичен: Светлую Тя дверь пророк узрев, ужасеся, Пречистая, яко Свет в Тебе вселися Божества, и просияв от утробы Твоея, светоносныя темже небесныя двери отверзи нам.
Песнь 2
Ирмос: Видите, видите, яко Бог Аз есмь:Видите, видите, яко Бог Аз есмь, мученики Моя новая во обители оптинстей явих, ихже Кровию Моею помазах во причастии Таин Святых, а сии кровь свою излияша за Мя страдальчески.
Елея исполнь имуща в душах, святии мученицы, куплю деяша праведную, и яко мудрыя девы в брачный чертог вошли, светильники сердец вжегша страданием.
Щитом веры угасиша стрелы врага, в плоть ураняются оптинская братия, яко истиннии мученицы свидетельствуются кровьми, и меченосно препровождаются в Царствие.
Богородичен: Испещренна Богоотроковице одеяньми царскими, Царя одесную стоиши, и приводиши Ему испещренныя мученическими кровьми от всех родов люди избранныя.
Песнь 3
Ирмос: Приидите, пиво пием новое:Препоясав истинною чресла ума, ристалище оставив мирское, преподобне, и истинным ратоборством по Христе попрал еси врага, от Бога вдохновляем, Василие.
Адамантову крепость в вере обрет, в горниле послушания просияв чистотою, и плоть яко медяну выковав постом, показался еси бесом страшен, Ферапонте.
Смиренный помысел стяжал еси яко путеводную звезду, трудолюбно понесл еси иноческое иго благое, и молитвою вооружився яко копием, имже заклавшего тебе змия, заклал еси, Трофиме.
Богородичен: Херувимский престол и покоище Бога Слова Твоя ложесна явишася, Пречистая, и трапеза сладкая Воплощенному Христу, Твоя красная сосца, Боголепная Девице.
Седален, глас 2.
Подобен: Камень гробный:Постом утучнисте себе, к заколению тщаливи явистеся, доблемудрии, темже и заклани бысте якоже агнцы, Христу Воскресителю мертвых взывая: Господи, слава Тебе.
Песнь 4
Ирмос: На Божественней стражи:Адова крепость потрясеся, егда удари оптинский компан, и небес небо распростреся, прияти души братий, убиенных за Христа.
Лик Ангельский ужасеся зря, како дерзновенно иноки убиваются; како на Пасху агнцы закалаются и испекаются огнем страдания.
Новое вино в мехи душевныя вливше, богомудрии оптинстии отцы, ихже плоти прободение вашея не расточи, обаче в ризах брачных на пир царский предстасте, и сладость божественнаго вина испили есте.
Богородичен: Из гроба, яко от чертога, Твой, Дево, Сын воскресе, и воскресения радость Тебе первей подаде, темже наша скорби разруши, Богорадованная Девице, и радость воскресения в сердца наша всели.
Песнь 5
Ирмос: Утренюем утреннюю:Яко светоносное утро житие ваше явися, тьму прогоняющее греха, и яко аермонская от гробов ваших каплющая роса, исцеления приходящим дарует.
Постом умертвивши плотския страсти, Христу сраспястеся Великим Постом, и в нощь Воскресения закластеся якоже агнцы, темже и воскреснусте с Ним, якоже Спас рече.
Окровавленна бывает кампанозвоница убиением иноков всечестных, и земля напояется кровию священнослужителя, еже израстити нетления цветы.
Богородичен: Юнице нескверная, Агнице Всечестная, Марие Дево, от злых треволнений избави стадо Твое, от волков мысленных, от еретиков злославных и от мужа кровей огради иноков всечестных.
Песнь 6
Ирмос: Снисшел еси:Возопиша с веселием праведнии иноцы, вместо песни трезвон имуща во вся: ныне Пасха Божественная является, и кроплением нашея крове, да совоскреснут душы наша.
Оптинское торжество днесь, братие: в жертву живу тщуся себе принести, и сраспятися с Богом моим и совоскреснути, богомудрый Василий рече.
Звездоявленно взошли есть в небесный чертог, окровавленны имущи ризы брачныя, два инока и един священномонах, твердь церковную озариша пасхальным страданием, трилепосветлую имуща благодать.
Богородичен: Жену кто видев без мужа рождшую; кто видев Деву доящую сосцы; и на руку носящую Невместимаго; сия есть Матерь Слова, Едина от родов Благословенная, Мария дщерь земли.
Кондак, глас 8:
Подобен: Аще и во гроб:Аще и во гробы снисшли есте на Пасху, но небо души ваша прияло есть, и воскреснусте со Христом, яко Его ради умертвистеся, и адову посрамисте власть. Темже на браке Агнчем ликуете, всерадостную воспевая песнь: Христос воскресе из мертвых, падшим подаяй воскресение.
Икос:Милость Твоя, Спасе, паче нежели живот благовествует пророческая гусль Давидова, таже и Григорий Богословец возвышенно вопиет, яко един путь живота ведаю еже за Бога умрети; сия помыслиша любомудрейшая оптинская братия, и восхотеша Христови сраспятися, и погребстися, и с Ним воскреснуть. Темже смерть приемлют нужднейшую в неумираемый день Воскресения, и мечным усечением отделенныя от тел души своя в руцы Божия предают. Сего ради вечно живут в Христовых брачных чертозех, и всерадостную песнь со Ангелы поют: Христос воскресе от гроба, падшим подаяй воскресение.
Песнь 7
Ирмос: Отроки от пещи избавивый:Евангельски прилепистеся Христу правым произволением, и иноческия ризы мученическою кровию яко багряницею украсили есте, темже в нетления облачает вы благолепие, Един благословен отцев Бог и препрославлен.
На отеческих заповедех утвердисте стопы, иночестии возлюбивше уставы и к почести вышняго звания устремилися есте, и за Христа, отцев Бога и препрославленнаго, закластеся.
Новыя мученицы Богу приводятся днесь, от старческих благодатных гробов силою воскресения вжилившаяся, яко сыны дне показуются всем, и гробы своя являют яко благоуханный сад, верою и любовию их целующим.
Богородичен: Испечеся во утробе Твоей Хлеб Святый, с Небес сшедый Отчим присносущным слиянием, и ложесна Твоя яко пещь безстрастия сотвори, юже древле прообразиша вавилонския юноши.
Песнь 8
Ирмос: Сей нареченный и святый день:Язвы Христовы на теле своем носяще, красотою мученическою украсилися есте, преподобнии отцы, темже язвы греховныя уврачуйте к вам любовию притекающим, и раки мощей ваших целующим.
Мечем секоми бысте по телесем рукою злодейскою, добропобеднии оптинстии мученицы, обаче от Бога духом неотделими пребыли есте, и мужества мечем ссекосте бесовския полчища.
Успение ваше яко сладчайший сон, яко медоточная роса лияние кровей ваших, всеблаженнии, яко ходатаица безсмертия кончина ваша пречестна, темже молитеся о нас прилежно, всеблагоговейнии.
Троичен: Чту и покланяюся Преестественней Троице, во едином существе пребывающей и Лицами разделяемей, любовию зову: спаси мя, Отче, Сыне и Душе Правый.
Богородичен: Еже преестественно заченшую всех Творца, и Невместимаго во утробе Своей вместившую, прославим Деву Богородицу яко одушевленный храм, яко неусыпную о нас молитвенницу.
Песнь 9
Ирмос: Светися, светися:Небесный Иерусалим наследовали есте, идеже празднующих глас неумолкаемый, идеже лики мучеников и всех святых, идеже старцы оптинстии с вами пасхальною радостию радуются.
Испещренны мученическими кровьми, законно в брачный чертог вселистеся, иже плотию пострадавше на земли, душами ныне на небесах пасхальною радостию радуетеся.
Единице троица ныне предстоит Богу, страдальцы пасхальная, и молятся прилежно спастися всем, Василий песнописец, преподобномудрый Ферапонт и Трофим инок всерачительный.
Богородичен: Марие Богоневестная, рцы нам: како скорбь Твоя небомерная в небомерную радость преложися; како во утробе Твоей Вселивыйся иже утробу адову разори, и Тебе первей принесе целования Воскресения.
Светилен
Подобен: Плотию уснув:Плотию уснуша яко сладким сном, мечем побратимая братия, от тридневнаго воскресения к вечней Пасхе мучением прешли, душами у Престола Божия веселящася. Темже и молят Христа от сна греховнаго воздвигнути, память их светло празднующих.
На хвалитех стихиры, глас 4.
Подобен: Дал еси знамение:Дал еси знамение / боящимся Тебе, Господи, / триех преподобномучеников оптинских, / иже смерти в лице посмеяшася, / на Пасху Тебе ради умертвишася, / с Тобою ныне вечною Пасхою радуются, // Иисусе Всесильне, Спасе душ наших.
Даровася вам, достоблаженнии, / возлюбити Господа всею крепостию, / и заклатися за Истину истинно, / и посрамити лжемудрование убийцы, / трапезе сладкия премудрости причаститися / и ликование вечнопасхальное улучити // в Господе, тридневно воскресшем.
От богатых даров Божественных / и от щедрот Всемилостиваго Господа / недугов исцеление испросите нам / и страстей искоренение, / всесильными вашими к Богу молитвами / ниспослите нам радости Пасхальныя приобщение // и всего мира умирение.
Слава, глас 5:Якоже рай богосажденный, / Оптина Пустынь вертоградом старчества процвете, / в годину же гонений израсти крины преподобномучеников, / ныне же процвете треми шипками богокрасными, / иже на красную Пасху мечем срезаются, / и в райских кущах насаждаются, / и непрестанною молитвою благоухают Христу, // прося помиловатися душам нашим.
И ныне: Богородичен или Триоди.
Служба преподобномученикам Оптинским, на Пасху убиенным,
Василию, Ферапонту и Трофиму
На вечерни
На Господи воззвах: стихиры, глас 5.
Подобен: Радуйся:Радуйтеся, троичным осияемии светом, / тридневным воскресением облистаемии юноши, / мученическими светлостьми озареннии иноцы, / преподобнии агнцы оптинскаго луга духовнаго, / светоносныя звезды тверди церковныя, / в нощи Воскресения Христова неугасимии лампады, / Христа молите // ниспослати душам нашим просвещение и велию милость.
Радуйтеся, новоделателие вертограда оптинскаго, / процветшия ваийя пасхальнаго страдания, / крины новомученичестии, преподобныя шипки, / язвы Христа Бога на телесех своих носящии, / имиже уязвисте демонское множество / и верныя облаговонствовасте, / плоды благочестия израстисте сладкая, / имиже питаете к раце мощей ваших приходящия, / Христа небеснаго вертоградаря молите // угобзитися и нам в житницу жизни.
Радуйтеся, сынове благодати старческия, / изряднии подвижницы Оптиной Пустыни, / исповедницы иноческаго жития, / всеблагоговейнии чтителие отеческих преданий, / трудолюбия красная зерцала, / молитвы делателища ревностная и сладкая, / демонов губители, болезней целители, / всем приходящим в Оптину скорые послушницы, / наследницы старческих дарований, / с нимиже Христа молите // даровати нам мир и велию милость.
Слава, глас тойже:Радуйтеся, новолепнии мученицы, / процветшия страстию Христа Бога, / в нощь Воскресения закланнии агнцы, / струями кровными свидетельствовавшии верность Христу, / подвиги иноческими отрясше ветхий нрав, / во Христа облекшеся страданием, / спогребшеся с ним телесным образом, / духовно же совостасте от гробов, / в Царствие вселистеся пасхальныя радости, / темже молитеся Христу // даровати душам нашим велию милость.
На стиховне, стихиры Триоди.
Слава, Василию, глас 5:О, дивное Божие смотрение, / о велия сила твоего рачения, / венценосче мучениче Василие, / како желанием возжелел еси умрети на Пасху, / како умолил еси Христа смертеумертвителя, / еже тебе хотети, тако и бытии, / и мечное заколение яко целование живота вечнаго приял еси, / стрелою любве уязвлен сый к Распятому, / Емуже и страстию твоею сораспялся еси / и вечно с Богом твоим пребываеши, / темже Избавителя и Искупителя всех моли / свободу улучити нам от страстей безчестия / и область чадами Божиими быти, // твоими молитвами, святе Василие.
Тропарь, глас 3:Да веселятся иноческая воинства, / да радуется старцев оптинских собрание, / яко на Пасху добропобеднии агнцы в Оптиной заклашася, / иже язвами своими уязвиша демонское воинство / и мучителево посрамиша рачение, / меченосно в райская села всельшеся, / идеже молятся Христу Богу // спастися душам нашим.
Ин тропарь, глас тойже:Яко жертву живу телеса ваша Богу представисте, / на Пасху Господню заклатися изволисте, / преподобномученицы Господни непобедимии, / Ферапонте, Трофиме и премудре Василие, / кровию Агнчей души ваша убелисте, / меч мучителев якоже лествицу в небесное обретосте, / имже в чертог царский дерзновенно внидосте, / идеже на Браке Агнчем со всеми святыми ликуете, / темже молитеся за ны, достоблаженная братия, // новомучеников российских сопричастницы.
На утрени
Седален по полиелее, глас 3:Глас кимвалов и братское ликование не пресече усечение мечное, но паче умолче глас смерти и возопи ад горько, како лишихся триех черноризцев, иже пожрети хотех языком меча, но властию Воскресшаго тридневно от уст моих исторгаются, и горце ми ругаюся, и в горний мир вселяются, яко жертвы приятнии горличищи, и молитвенницы боголюбезнии.
Стихира по 50-м псалме, глас 6:Воскресение Христово видесте, / Агнца Пасхальнаго вкусисте, / мечное усечение приясте / и светлыми душами яко на облацех легцих в небо взошли есте, / идеже глас празднующих срете вы, / и Пасхе истее причастистеся, / Христу поклонилися есте, / темже молитеся Ему / тьмы кромешныя и адских мук избавити // верою и любовию вас почитающих.
Канон, глас 1, егоже краегранесие:
Три свещи пасхальныя пою, возженныя мучением.
Песнь 1
Ирмос: Воскресения день:Троице предстоя, треблаженнии оптинстии отцы, от треволнений скорбных избавите память вашу присносвященную совершающих, молимся.
Распаляеми ревностию, богомудрии, житейских нужд отрясосте молву и в тихое пристанище пустыни оптинстей достигосте, благодатию Христовою воодушевляеми.
Избрание ваше треблаженно есть, отречение от мира премного похваляемо, мученичество же ваше яко приснокрасный венец, от небесных высей к вам ниспосылаемый.
Богородичен: Светлую Тя дверь пророк узрев, ужасеся, Пречистая, яко Свет в Тебе вселися Божества, и просияв от утробы Твоея, светоносныя темже небесныя двери отверзи нам.
Песнь 2
Ирмос: Видите, видите, яко Бог Аз есмь:Видите, видите, яко Бог Аз есмь, мученики Моя новая во обители оптинстей явих, ихже Кровию Моею помазах во причастии Таин Святых, а сии кровь свою излияша за Мя страдальчески.
Елея исполнь имуща в душах, святии мученицы, куплю деяша праведную, и яко мудрыя девы в брачный чертог вошли, светильники сердец вжегша страданием.
Щитом веры угасиша стрелы врага, в плоть ураняются оптинская братия, яко истиннии мученицы свидетельствуются кровьми, и меченосно препровождаются в Царствие.
Богородичен: Испещренна Богоотроковице одеяньми царскими, Царя одесную стоиши, и приводиши Ему испещренныя мученическими кровьми от всех родов люди избранныя.
Песнь 3
Ирмос: Приидите, пиво пием новое:Препоясав истинною чресла ума, ристалище оставив мирское, преподобне, и истинным ратоборством по Христе попрал еси врага, от Бога вдохновляем, Василие.
Адамантову крепость в вере обрет, в горниле послушания просияв чистотою, и плоть яко медяну выковав постом, показался еси бесом страшен, Ферапонте.
Смиренный помысел стяжал еси яко путеводную звезду, трудолюбно понесл еси иноческое иго благое, и молитвою вооружився яко копием, имже заклавшего тебе змия, заклал еси, Трофиме.
Богородичен: Херувимский престол и покоище Бога Слова Твоя ложесна явишася, Пречистая, и трапеза сладкая Воплощенному Христу, Твоя красная сосца, Боголепная Девице.
Седален, глас 2.
Подобен: Камень гробный:Постом утучнисте себе, к заколению тщаливи явистеся, доблемудрии, темже и заклани бысте якоже агнцы, Христу Воскресителю мертвых взывая: Господи, слава Тебе.
Песнь 4
Ирмос: На Божественней стражи:Адова крепость потрясеся, егда удари оптинский компан, и небес небо распростреся, прияти души братий, убиенных за Христа.
Лик Ангельский ужасеся зря, како дерзновенно иноки убиваются; како на Пасху агнцы закалаются и испекаются огнем страдания.
Новое вино в мехи душевныя вливше, богомудрии оптинстии отцы, ихже плоти прободение вашея не расточи, обаче в ризах брачных на пир царский предстасте, и сладость божественнаго вина испили есте.
Богородичен: Из гроба, яко от чертога, Твой, Дево, Сын воскресе, и воскресения радость Тебе первей подаде, темже наша скорби разруши, Богорадованная Девице, и радость воскресения в сердца наша всели.
Песнь 5
Ирмос: Утренюем утреннюю:Яко светоносное утро житие ваше явися, тьму прогоняющее греха, и яко аермонская от гробов ваших каплющая роса, исцеления приходящим дарует.
Постом умертвивши плотския страсти, Христу сраспястеся Великим Постом, и в нощь Воскресения закластеся якоже агнцы, темже и воскреснусте с Ним, якоже Спас рече.
Окровавленна бывает кампанозвоница убиением иноков всечестных, и земля напояется кровию священнослужителя, еже израстити нетления цветы.
Богородичен: Юнице нескверная, Агнице Всечестная, Марие Дево, от злых треволнений избави стадо Твое, от волков мысленных, от еретиков злославных и от мужа кровей огради иноков всечестных.
Песнь 6
Ирмос: Снисшел еси:Возопиша с веселием праведнии иноцы, вместо песни трезвон имуща во вся: ныне Пасха Божественная является, и кроплением нашея крове, да совоскреснут душы наша.
Оптинское торжество днесь, братие: в жертву живу тщуся себе принести, и сраспятися с Богом моим и совоскреснути, богомудрый Василий рече.
Звездоявленно взошли есть в небесный чертог, окровавленны имущи ризы брачныя, два инока и един священномонах, твердь церковную озариша пасхальным страданием, трилепосветлую имуща благодать.
Богородичен: Жену кто видев без мужа рождшую; кто видев Деву доящую сосцы; и на руку носящую Невместимаго; сия есть Матерь Слова, Едина от родов Благословенная, Мария дщерь земли.
Кондак, глас 8:
Подобен: Аще и во гроб:Аще и во гробы снисшли есте на Пасху, но небо души ваша прияло есть, и воскреснусте со Христом, яко Его ради умертвистеся, и адову посрамисте власть. Темже на браке Агнчем ликуете, всерадостную воспевая песнь: Христос воскресе из мертвых, падшим подаяй воскресение.
Икос:Милость Твоя, Спасе, паче нежели живот благовествует пророческая гусль Давидова, таже и Григорий Богословец возвышенно вопиет, яко един путь живота ведаю еже за Бога умрети; сия помыслиша любомудрейшая оптинская братия, и восхотеша Христови сраспятися, и погребстися, и с Ним воскреснуть. Темже смерть приемлют нужднейшую в неумираемый день Воскресения, и мечным усечением отделенныя от тел души своя в руцы Божия предают. Сего ради вечно живут в Христовых брачных чертозех, и всерадостную песнь со Ангелы поют: Христос воскресе от гроба, падшим подаяй воскресение.
Песнь 7
Ирмос: Отроки от пещи избавивый:Евангельски прилепистеся Христу правым произволением, и иноческия ризы мученическою кровию яко багряницею украсили есте, темже в нетления облачает вы благолепие, Един благословен отцев Бог и препрославлен.
На отеческих заповедех утвердисте стопы, иночестии возлюбивше уставы и к почести вышняго звания устремилися есте, и за Христа, отцев Бога и препрославленнаго, закластеся.
Новыя мученицы Богу приводятся днесь, от старческих благодатных гробов силою воскресения вжилившаяся, яко сыны дне показуются всем, и гробы своя являют яко благоуханный сад, верою и любовию их целующим.
Богородичен: Испечеся во утробе Твоей Хлеб Святый, с Небес сшедый Отчим присносущным слиянием, и ложесна Твоя яко пещь безстрастия сотвори, юже древле прообразиша вавилонския юноши.
Песнь 8
Ирмос: Сей нареченный и святый день:Язвы Христовы на теле своем носяще, красотою мученическою украсилися есте, преподобнии отцы, темже язвы греховныя уврачуйте к вам любовию притекающим, и раки мощей ваших целующим.
Мечем секоми бысте по телесем рукою злодейскою, добропобеднии оптинстии мученицы, обаче от Бога духом неотделими пребыли есте, и мужества мечем ссекосте бесовския полчища.
Успение ваше яко сладчайший сон, яко медоточная роса лияние кровей ваших, всеблаженнии, яко ходатаица безсмертия кончина ваша пречестна, темже молитеся о нас прилежно, всеблагоговейнии.
Троичен: Чту и покланяюся Преестественней Троице, во едином существе пребывающей и Лицами разделяемей, любовию зову: спаси мя, Отче, Сыне и Душе Правый.
Богородичен: Еже преестественно заченшую всех Творца, и Невместимаго во утробе Своей вместившую, прославим Деву Богородицу яко одушевленный храм, яко неусыпную о нас молитвенницу.
Песнь 9
Ирмос: Светися, светися:Небесный Иерусалим наследовали есте, идеже празднующих глас неумолкаемый, идеже лики мучеников и всех святых, идеже старцы оптинстии с вами пасхальною радостию радуются.
Испещренны мученическими кровьми, законно в брачный чертог вселистеся, иже плотию пострадавше на земли, душами ныне на небесах пасхальною радостию радуетеся.
Единице троица ныне предстоит Богу, страдальцы пасхальная, и молятся прилежно спастися всем, Василий песнописец, преподобномудрый Ферапонт и Трофим инок всерачительный.
Богородичен: Марие Богоневестная, рцы нам: како скорбь Твоя небомерная в небомерную радость преложися; како во утробе Твоей Вселивыйся иже утробу адову разори, и Тебе первей принесе целования Воскресения.
Светилен
Подобен: Плотию уснув:Плотию уснуша яко сладким сном, мечем побратимая братия, от тридневнаго воскресения к вечней Пасхе мучением прешли, душами у Престола Божия веселящася. Темже и молят Христа от сна греховнаго воздвигнути, память их светло празднующих.
На хвалитех стихиры, глас 4.
Подобен: Дал еси знамение:Дал еси знамение / боящимся Тебе, Господи, / триех преподобномучеников оптинских, / иже смерти в лице посмеяшася, / на Пасху Тебе ради умертвишася, / с Тобою ныне вечною Пасхою радуются, // Иисусе Всесильне, Спасе душ наших.
Даровася вам, достоблаженнии, / возлюбити Господа всею крепостию, / и заклатися за Истину истинно, / и посрамити лжемудрование убийцы, / трапезе сладкия премудрости причаститися / и ликование вечнопасхальное улучити // в Господе, тридневно воскресшем.
От богатых даров Божественных / и от щедрот Всемилостиваго Господа / недугов исцеление испросите нам / и страстей искоренение, / всесильными вашими к Богу молитвами / ниспослите нам радости Пасхальныя приобщение // и всего мира умирение.
Слава, глас 5:Якоже рай богосажденный, / Оптина Пустынь вертоградом старчества процвете, / в годину же гонений израсти крины преподобномучеников, / ныне же процвете треми шипками богокрасными, / иже на красную Пасху мечем срезаются, / и в райских кущах насаждаются, / и непрестанною молитвою благоухают Христу, // прося помиловатися душам нашим.
И ныне: Богородичен или Триоди.