Служба святой мученице Алине деве
Полиелейная служба святой мученице Алине деве, Форестской, Брабантской (†640, память 17 июня) составлена клириком Одесской епархии Украинской Православной Церкви протоиереем Илией Тетерько. Последование публикуется по авторской машинописи, цензурными инстанциями текст не рассматривался.
СЛУЖБА
святой мученице деве Алине Форестской
НА ВЕЛИЦЕЙ ВЕЧЕРНИ
На Господи, воззвах: стихиры, глас 1:Алина чудная, / Христова агница непорочная, / яко овча незлобиво, / себе самую приведе на посечение мечное, / благовонно приношение Богу принесеся. / Тоя убо ублажаем священное страдание, священно празднующе, // мучениколюбцы, днесь.
Любве ради Христовы / мечное усечение претерпевши, / от Царя и Владыки мученическим венцем венчалася еси / и с лики святых в неизреченней славе / ныне предстоиши Престолу Владычню. / Поминай и нас, совершающих святую память твою, // Алино, добрая дево.
Чистым сердцем Бога истиннаго обрела еси, / достохвальная дево Алино, / мирскую славу оставльше, / к венцу мученическому востекла если, радуяся. / Страстьми твоими и чудесы многими / родители и соплеменники ко Христу привела еси, / Егоже присно моли // спастися душам нашим.
Исцелений воды / твоя рака притекающим источает всегда, / мученице славная Алино, / и омывает страсти, / и потопляет полки демонския действом Святаго Духа. / Темже молися даровати душам нашим // мир и велию милость.
Слава, глас 4:Отеческую злобу угасила еси / кровными за Христа течении, Алино, дево блаженная, / и чудесы преславными от мощей твоих / в жизнь вечную и воскресение многия веровати научила еси, / нас же память твою чтущих ущедри // и низпосли от Господа велия милости.
И ныне, Догматик, глас тойже: Иже Тебе ради:
Вход. Прокимен дне и чтения.
Пророчества Исаиина чтение (глава 43):Тако глаголет Господь: вси языцы собрашася вкупе и соберутся князи от них. Кто возвестит сия в них или яже от начала, кто слышана сотворит вам? Да приведут свидетели своя и оправдятся, и да услышат, и да рекут истину; будите Ми свидетели, и Аз Свидетель, глаголет Господь Бог, и Отрок, Егоже избрах, да познаете и веруете Ми, и разумеете, яко Аз есмь: прежде Мене не бысть ин бог, и по Мне не будет. Аз есмь Бог, и несть разве Мене спасаяй. Аз возвестих и спасох, уничижих, и не бе в вас чуждий. Вы Мне свидетели, и Аз Господь Бог, и еще от начала Аз есмь: и несть от рук Моих избавляяй; сотворю, и кто отвратит то? Сице глаголет Господь Бог, избавляяй вас Святый Израилев.
Премудрости Соломони чтение (глава 3):Праведных души в руце Божией, и не прикоснется их мука; непщевани быша во очесех безумных умрети, и вменися озлобление исход их, и еже от нас шествие - сокрушение; они же суть в мире. Ибо пред лицем человеческим аще и муку приимут, упование их безсмертия исполнено; и, вмале наказани бывше, великими благодетельствовани будут: яко Бог искуси я, и обрете их достойны Себе. Яко злато в горниле искуси их, и яко всеплодие жертвенное прият я. И во время посещения их возсияют, и яко искры по стеблию потекут. Судят языком и обладают людьми, и воцарится Господь в них во веки. Надеющиися Нань разумеют истину, и вернии в любви пребудут Ему; яко благодать и милость в преподобных Его, и посещение во избранных Его.
Премудрости Соломони чтение (главы 5 и 6):Праведницы во веки живут, и в Господе мзда их, и попечение их у Вышняго: сего ради приимут царствие благолепия и венец доброты от руки Господни, зане десницею покрыет я и мышцею защитит их. Приимет всеоружие - рвение Свое, и вооружит тварь в месть врагом. Облечется в броня правды и возложит шлем - суд нелицемерен. Приимет щит непобедимый - преподобие. Поострит же напрасный гнев во оружие; споборет же с Ним мир на безумныя. Пойдут праволучныя стрелы молниины, и, яко от благокругла лука облаков, на намерение полетят. И от каменометныя ярости исполнь падут грады; вознегодует на них вода морская, реки же потопят я нагло. Сопротив станет им дух силы, и, яко вихор, развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте; навыкните, судии концев земли. Внушите, держащии множества и гордящиися от народов языков: яко дана от Господа держава вам, и сила от Вышняго.
На стиховне стихиры, глас 2.
Подобен: Доме Евфрафов:Дом Духа Божественнаго, / исполненный чистоты и правды, / явилася еси, Алино прехвальная, / сосуде честнаго девства, // и веры утверждение.
Стих: Святым, иже суть на земли Его, / удиви Господь вся хотения Своя в них.
Царство Небесное, / славная дево Алино, / наследила еси страданием, / и Небесный воистинну чертог, // и свет незаходимый.
Стих: Многи скорби праведным, / и от всех их избавит я Господь.
Богом призванная, / мученице Алино славная, / девство свое и веру чистую / на алтарь Христов принесла еси. // Темже ныне радуешися.
Слава, глас и подобен тойже:Услыши наша моления, / Алино, мученице славная, / любовию к тебе прибегающих, / и сердечная подавай прошения / чтущим святую память твою.
И ныне, Богородичен, глас и подобен тойже:Пресвятая Мати Божия, / с лики дев святых / молися из Тебе Воплощенному, / Солнцу Правды, Господу, / спасти и просветити души наша.
На благословении хлебов тропарь святыя дважды и Богородице Дево: единожды.
Тропарь, глас 4:Чудеса твоя проповедают славу твою, / добрая дево страстотерпице Алино, / житие равноангельное просвещает верных сердца, / кровь твоя предстательствует за сродники и люди, // любовию чтущия святую память твою.
НА УТРЕНИ
На Бог Господь: тропарь святыя дважды. Слава, и ныне, Богородичен.
По 1-м стихословии седален, глас 2:Подвигом, мученице, добрым подвизався и светлыя венцы приим, Свету предстоиши, просвещаема по причастию Невещественному, тем молим тя: просвети нас молитвами твоими.
Слава, и ныне, Богородичен:Свет, от Света происходяй, во Твою Девичу утробу вниде / и плотию обложися недомысленно и несказанно, / рождеством же Его вся тварь обновися и идольская лесть разорися. / Тем молим Тя, Пречистая: / моли, да спасет души наша.
По 2-м стихословии седален, глас 6:Светлый твой, мученице Алино, праздник, вся созва радостно на трапезу днесь, предложив страданий твоих борения, мужество и противление, имиже насыщшеся, верою тя и любовию ублажаем.
Слава, и ныне, Богородичен:Труждает мя буря греховная / и возмущение безместных помышлений: / умилосердися, Всенепорочная, / и руку помощи, яко Милосердная, простри ми, / да величаю Тя, спасаемый.
Величание:Величаем тя, / страстотерпице святая Алино, / и чтим честная страдания твоя, // яже за Христа претерпела еси.
Псалом избранный:1. Терпя потерпех Господа, и внят ми, и услыша молитву мою. 2. Бог нам Прибежище и Сила, Помощник в скорбех, обретших ны зело. 1. Многи скорби праведным и от всех их избавит я Господь. 2. Приведутся Царю девы, приведутся в веселии и радовании. 1. Девы да восхвалят имя Господне. 2. Суди ми, Господи, яко аз незлобою моею ходих. 1. Искуси мя, Господи, и испытай мя, разжи утробы моя, и сердце мое. 2. Да не погубиши с нечестивыми душу мою. 1. Аз же незлобою моею ходих, избави мя, Господи, и помилуй мя. 2. Нога моя ста на правоте: в церквах благословлю Тя, Господи.
По полиелеи седален, глас 8:Житие твое равноангельно, / мучение же просвещенно, / имже сподобилася еси со Ангелы ликовати в радости, / чудесы землю, Алино достоблаженная, Божественными озаряя. / Тем твоими молитвами проси // даровати всем велию милость.
Слава, и ныне, Богородичен:Тя надежду, прибежище и Предстательницу обретше, вернии, / к Тебе притекаем и прилежно вопием: / помилуй, Богородице, на Тя уповающия / и прегрешений оставление нам испроси / молитвами Твоими, Пречистая.
Таже степенна, 1-й антифон, глас 4.Прокимен, глас 4: Святым, иже суть на земли Его, / удиви Господь вся хотения своя в них.
Стих: Презрех Господа предо мною выну, яко одесную мене есть, да не подвижуся.
Всякое дыхание: Евангелие от Матфея, зачало 36.
По 50-м псалме стихира самогласна, глас 6:Добродетельми и девством сияя, / и Божественными научении паче солнца, / и страдании, славная, облистала еси, / и просветила еси землю, Алино, / отгнав мглу многобожия и скверны. / Сего ради память твою светло празднуем и молим тя: // низпошли нам от Господа велия милости.
Канон святыя мученицы, глас 8:
Песнь 1Ирмос: Песнь возслем, людие, / чудному Богу нашему, / свободившему Израиля от работы, / песнь победную поюще и вопиюще, // поим Тебе, Единому Владыце.
Песнь хвалебную, Богу содействующу, приношу ти, Алино честная: от избытка бо сердца глаголют уста и потщатся на славословие твое.
Языческия народы в Церковь Свою призвавый чрез огненоязычных апостолов Своих, тя, Алино, показует славную исповедницу и веры утверждение, Христос.
Токи лестныя уставила еси, Алино, теченьми кровей твоих, и верных мысли напоила еси чудными делы твоими.
Богородичен: Неболезновавшая чревом, рождшая Христа Господа, мольбами Твоими матерними исцели болезни душ и телес наших, да благодарно Сыну Твоему приносим победную песнь.
Песнь 3Ирмос: Несть свят, яко Господь, / и несть праведен, яко Бог наш, / Егоже поет вся тварь: // несть праведен, паче Тебе, Господи.
Нощь отгнала еси многобожия всякую, Алино, блистании евангельских словес, и всем сердцем Богу воззвала еси: несть праведен, паче Тебе, Господи.
Не убоявшися слуг отеческих, невесто Христова Алино, великия ревности исполнилася еси ко Христу и, кровь свою изливающи, вопияла еси дерзновенно: несть праведен, паче Тебе, Господи.
Истине Евангельской научена, животворныя заповеди Спасовы исполнила еси ревностно, Алино блаженная, и научила еси всех взывати: несть праведен, паче Тебе, Господи.
Богородичен: Ангелов удивление, человеков дерзновение, Богородице Чистая, Приснодево, моли Христа Бога, спасти непрестанно Тя блажащия.
Седален, глас 1:Душу связавши любовию Христовою, тленна яже и временная, мученице мудрая, забвением преминула еси, яко Спасова ученица: востекла еси с мудрыми девами в Горний чертог, идеже сугубо дерзновение обрела еси, Алино славная: моли Христа Бога, согрешений оставление даровати чтущим любовию святую память твою.
Слава, и ныне, глас тойже:Упование христиан, Пресвятая Дево, Егоже родила еси Бога, паче ума же и слова, непрестанно моли с вышними Силами подати оставление грехов наших всех и исправление жития верою и любовию присно Тя славящим.
Песнь 4Ирмос: Из горы приосененныя, Слове, пророк, / единыя Богородицы, / хотяща воплотитися Боговидно усмотри // и со страхом славословяще силу Твою.
Светом Пресущным просвещена, Алино чудная, воспламенилася еси любовию Божественною и явилася еси заря пресветлая, облистающая безбожия нощь.
Блистают мученицы светозарныя мощи светом исцелений, верою к сим притекающим, благодать бо приимь от источников Спасовых, Того вольней страсти поревновавше.
Красотою добродетелей просвещаема, от кровей багряницею украсилася еси очервленою, Алино мудрая дево, якоже скиптр, Креста победу носяще, со Христом царствовати сподобилася еси, славословяще силу Его.
Богородичен: Владычице Милостивая, не возгнушайся язвами нашими греховными, Врача рождшая душ и телес наших, утоли болезни и исцели неможения, и спаси души наша.
Песнь 5Ирмос:Страстей мя мглы, / яко от глубокия нощи, избавляяй, / утреневати сподоби дух мой, молюся, // во свете дне повелений Твоих, Христе.
Потекла еси, последуя Христовым стопам Божественным, и общница показался еси Страстей Того и Царствия, всеславная, за любовь твою изрядно венчаваема.
От младых ногтей вожделела еси любве Источника приснотекущаго, Егоже насыщшися, мучения болезни претерпела еси, руки лишена и кровию истекаема, Алино славная, дев похвало.
Разжегшися, мученице, любовию Жениха твоего мысленнаго и распальшися Сего добротами нетленными, претерпела еси усечение руки и язвенныя болезни, Алино хвальная, мучениц похвало.
Богородичен: Льщением человекоубийцы древняго праотцы наша от Присносущныя Жизни отпадоша: Рождеством Твоим, Чистая, земнороднии вси паки в рай восхищени быхом.
Песнь 6Ирмос: Содержима мя приими, Человеколюбче, / грехи многими, / и припадающа щедротам Твоим, // яко пророка Иону, Господи, и спаси мя.
Токи твоих кровей многобожия пламень угасиша, чудесы же, от гроба бываемыя, исторгоша идольскую лесть, и пищу нам, Алино, хваления доброт твоих соделаша.
Блаженно житие твое на земли и кончина славна, сего ради нетленная богатства стяжала еси, Алино, дивная дево, и просвещаеши притекающих к тебе чудесы.
Сладости Небесныя и пресветлыя радости исполнена еси, предстоя Христу, Духом Святым и страдании очищена, мученице достохвальная Алино, молися за люди твоя.
Богородичен: Архангельский глас вопием Ти: Радуйся, Благодатная, Господь с Тобою; радуйся, Благословенная, Заступница наша и скорая в бедах Помощница.
Кондак, глас 2:Связа вся любовию Избавителя, / руки сечение претерпела еси, славная, мужественным мудрованием, / кровей теченьми конец святый прияла еси / и богатство многоценно всем подалася еси, источая исцеления / и решая недуги верно притекающим к тебе, Алино, дево блаженная. / Моли Христа Бога прегрешений оставление даровати // чтущим любовию святую память твою.
Икос:Добродетельным житием на земли просиявшую / и на Небесех со Ангелы ныне ликующую, / деву всечудную и мученицу неодоленную, / сугубым венцем исповедничества и целомудрия увенчaнную, / Алину воспоим, вернии, / сия бо подает исцеления // чтущим любовию святую память ея.
Песнь 7Ирмос: На поле Деире / иногда мучитель пещь постави на мучение Богоносных, / в нейже три отроки песнословляху Единаго Бога, / троично воспеваху, глаголюще: // отцев Боже, благословен еси.
Яко агница на жертву ведома, славная дево Алино, никакоже провещала еси, Владыце твоему подобяся, Егоже ради и смерть пренебрегла еси.
Целомудрием украшаема и мирностию духа, раны твердым умом твоим терпела еси от слуг отеческих, дух твой предая в руце Небеснаго Отца.
Не оставила еси, Алино, попечения о сродном тебе языке, с Горния славы своея подаеши благодать исцелений, верою зовущим: отцев Боже, благословен еси.
Богородичен: Радосте наша, Пречистая Дево, Ты едина во всех родех Мати Божия показалася еси, Божество неопально вместившая. Тем Тя благословим, Марие Богоневестная.
Песнь 8Ирмос: Победители мучителя и пламене / благодатию Твоею бывше, / заповедем Твоим зело прилежаще, / отроцы вопияху: // благословите, вся дела Господня, Господа.
Струи точиши исцелений притекающим верою к твоему гробу, Алино, и Жениху твоему вопиющим: благословите, вся дела Господня, Господа.
Неусыпну тя имамы молитвенницу, волны страстей утишающую, печали утоляющую и лютых всяческих нас избавляющую, вопиющих: благословите, вся дела Господня, Господа.
Мудрования врага прегордаго в себе убив, уму Божественному приобщилася еси житием твоим чистым и ума светлостию, зовуще непрестанно: благословите, вся дела Господня, Господа.
Богородичен: Слово Отчее Единосущное, Адамово избавление от кровей Твоих девственных воплотися, Един, яко весть, Всепетая, спасая нас Своею благостию.
Песнь 9Ирмос: Проявленное на горе законоположнику во огни и купине / Рождество Приснодевы / в наше, верных, спасение // песньми немолчными величаем.
Изрядную угодницу Христову песньми благохвальными почтим, яко исполнена яве благодати и Божественными сияньми преукрашена, и молится о душах наших.
Помяни ныне, Алино славная, всех верою к тебе притекающих, и, от душевных страстей избавляя, защити нас от бед и обстояний, и спасения Божественнаго буди нам ходатаица.
Украсилася еси, мученице, чистотою девства, уяснилася еси страданий лепотою и просияла еси, якоже звезда, сего ради тя песньми немолчными величаем.
Вся во Свет Божественныя Троицы с веселием прешла еси, ангельским воинством ныне срадуешися, пречудная дево Алино, с нимиже непрестанно моли всем спастися, поющим тя.
Богородичен: Юже воспевают Силы Небесныя, Владычицу Деву, Церкве красоту, верных державу и похвалу, благодарно величаю и пение скончаваю.
Светилен:Светом Превечнаго сияния озарився, Алино хвальная, Христу последовала еси, и Того благодатию просветився, источник чудес и милостей явилася еси, сего ради молим тя: спаси души наша.
Слава, и ныне, Богородичен:Зарю пресветлую, являющую нам Солнце незаходимое, вемы, Тя, Пресвятая Дево Богородице. Сего ради молим Тя: яко Мати Света сущи, просвети нас светом Сына Твоего, Христа Бога нашего.
На хвалитех стихиры, глас 1:Божественная Владыки голубице, / позлащенна светлостию девства, / душу просвещши словесы евангельскими, / позлащенна крилы златовидными блистании / твоего исповедания и Божественных твоих кровей, // тя поющия, Алино всехвальная, просвети.
Иже от любве пение тебе приносящих / не забуди, Алино, добрая дево, / но пролей о нас к Богу моление теплое / и избави демонскаго нахождения и лютаго озлобления, / да во дни испытаний не посрамлены будем, // раби твои, страстотерпице приснопамятная.
И по смерти тебе Господь прослави / знамением исцеления, / яви бо нам честныя мощи твоя, / Алино, предивная страдалице, / яко сокровище некрадомо, / к ним же притекающии приемлют здравие душам же и телесем, // присно блажащии тя, дево Христова.
Воспеваем житие твое всечудное / и чтим в Горняя преселение твое праведное, / лобызаем честныя мощи твоя, / токи чудес нам источающия, / и празднуем радостно всесвященную память твою, // мученице Алино добропобедная.
Слава, глас 8:Троическим Светом озаряема, / со Ангелы ныне ликуеши, / предстоя Престолу всех Царя / и почесть приемля трудов своих, Алино предивная, / Егоже присно моли // о чтущих святую память твою, преблаженная.
И ныне, глас тойже:Владычице, приими молитвы раб Твоих / и избави нас // от всякия нужды и печали.
Славословие великое и отпуст.
НА ЛИТУРГИИБлаженны от канона, песнь 3-я и 6-я.
Прокимен, глас 4: Святым, иже суть на земли Его, / удиви Господь вся хотения своя в них. Стих: Презрех Господа предо мною выну, яко одесную мене есть, да не подвижуся.
Апостол к Галатом, зачало 214.
Аллилуиа, глас 4: Воззваша праведнии, и Господь услыша их, и от всех скорбей их избави их. Стих: Многи скорби праведным, и от всех их избавит я Господь.
Евангелие от Иоанна, зачало 51.
Причастен: Радуйтеся, праведнии, о Господе, правым подобает похвала.
СЛУЖБА
святой мученице деве Алине Форестской
НА ВЕЛИЦЕЙ ВЕЧЕРНИ
На Господи, воззвах: стихиры, глас 1:Алина чудная, / Христова агница непорочная, / яко овча незлобиво, / себе самую приведе на посечение мечное, / благовонно приношение Богу принесеся. / Тоя убо ублажаем священное страдание, священно празднующе, // мучениколюбцы, днесь.
Любве ради Христовы / мечное усечение претерпевши, / от Царя и Владыки мученическим венцем венчалася еси / и с лики святых в неизреченней славе / ныне предстоиши Престолу Владычню. / Поминай и нас, совершающих святую память твою, // Алино, добрая дево.
Чистым сердцем Бога истиннаго обрела еси, / достохвальная дево Алино, / мирскую славу оставльше, / к венцу мученическому востекла если, радуяся. / Страстьми твоими и чудесы многими / родители и соплеменники ко Христу привела еси, / Егоже присно моли // спастися душам нашим.
Исцелений воды / твоя рака притекающим источает всегда, / мученице славная Алино, / и омывает страсти, / и потопляет полки демонския действом Святаго Духа. / Темже молися даровати душам нашим // мир и велию милость.
Слава, глас 4:Отеческую злобу угасила еси / кровными за Христа течении, Алино, дево блаженная, / и чудесы преславными от мощей твоих / в жизнь вечную и воскресение многия веровати научила еси, / нас же память твою чтущих ущедри // и низпосли от Господа велия милости.
И ныне, Догматик, глас тойже: Иже Тебе ради:
Вход. Прокимен дне и чтения.
Пророчества Исаиина чтение (глава 43):Тако глаголет Господь: вси языцы собрашася вкупе и соберутся князи от них. Кто возвестит сия в них или яже от начала, кто слышана сотворит вам? Да приведут свидетели своя и оправдятся, и да услышат, и да рекут истину; будите Ми свидетели, и Аз Свидетель, глаголет Господь Бог, и Отрок, Егоже избрах, да познаете и веруете Ми, и разумеете, яко Аз есмь: прежде Мене не бысть ин бог, и по Мне не будет. Аз есмь Бог, и несть разве Мене спасаяй. Аз возвестих и спасох, уничижих, и не бе в вас чуждий. Вы Мне свидетели, и Аз Господь Бог, и еще от начала Аз есмь: и несть от рук Моих избавляяй; сотворю, и кто отвратит то? Сице глаголет Господь Бог, избавляяй вас Святый Израилев.
Премудрости Соломони чтение (глава 3):Праведных души в руце Божией, и не прикоснется их мука; непщевани быша во очесех безумных умрети, и вменися озлобление исход их, и еже от нас шествие - сокрушение; они же суть в мире. Ибо пред лицем человеческим аще и муку приимут, упование их безсмертия исполнено; и, вмале наказани бывше, великими благодетельствовани будут: яко Бог искуси я, и обрете их достойны Себе. Яко злато в горниле искуси их, и яко всеплодие жертвенное прият я. И во время посещения их возсияют, и яко искры по стеблию потекут. Судят языком и обладают людьми, и воцарится Господь в них во веки. Надеющиися Нань разумеют истину, и вернии в любви пребудут Ему; яко благодать и милость в преподобных Его, и посещение во избранных Его.
Премудрости Соломони чтение (главы 5 и 6):Праведницы во веки живут, и в Господе мзда их, и попечение их у Вышняго: сего ради приимут царствие благолепия и венец доброты от руки Господни, зане десницею покрыет я и мышцею защитит их. Приимет всеоружие - рвение Свое, и вооружит тварь в месть врагом. Облечется в броня правды и возложит шлем - суд нелицемерен. Приимет щит непобедимый - преподобие. Поострит же напрасный гнев во оружие; споборет же с Ним мир на безумныя. Пойдут праволучныя стрелы молниины, и, яко от благокругла лука облаков, на намерение полетят. И от каменометныя ярости исполнь падут грады; вознегодует на них вода морская, реки же потопят я нагло. Сопротив станет им дух силы, и, яко вихор, развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте; навыкните, судии концев земли. Внушите, держащии множества и гордящиися от народов языков: яко дана от Господа держава вам, и сила от Вышняго.
На стиховне стихиры, глас 2.
Подобен: Доме Евфрафов:Дом Духа Божественнаго, / исполненный чистоты и правды, / явилася еси, Алино прехвальная, / сосуде честнаго девства, // и веры утверждение.
Стих: Святым, иже суть на земли Его, / удиви Господь вся хотения Своя в них.
Царство Небесное, / славная дево Алино, / наследила еси страданием, / и Небесный воистинну чертог, // и свет незаходимый.
Стих: Многи скорби праведным, / и от всех их избавит я Господь.
Богом призванная, / мученице Алино славная, / девство свое и веру чистую / на алтарь Христов принесла еси. // Темже ныне радуешися.
Слава, глас и подобен тойже:Услыши наша моления, / Алино, мученице славная, / любовию к тебе прибегающих, / и сердечная подавай прошения / чтущим святую память твою.
И ныне, Богородичен, глас и подобен тойже:Пресвятая Мати Божия, / с лики дев святых / молися из Тебе Воплощенному, / Солнцу Правды, Господу, / спасти и просветити души наша.
На благословении хлебов тропарь святыя дважды и Богородице Дево: единожды.
Тропарь, глас 4:Чудеса твоя проповедают славу твою, / добрая дево страстотерпице Алино, / житие равноангельное просвещает верных сердца, / кровь твоя предстательствует за сродники и люди, // любовию чтущия святую память твою.
НА УТРЕНИ
На Бог Господь: тропарь святыя дважды. Слава, и ныне, Богородичен.
По 1-м стихословии седален, глас 2:Подвигом, мученице, добрым подвизався и светлыя венцы приим, Свету предстоиши, просвещаема по причастию Невещественному, тем молим тя: просвети нас молитвами твоими.
Слава, и ныне, Богородичен:Свет, от Света происходяй, во Твою Девичу утробу вниде / и плотию обложися недомысленно и несказанно, / рождеством же Его вся тварь обновися и идольская лесть разорися. / Тем молим Тя, Пречистая: / моли, да спасет души наша.
По 2-м стихословии седален, глас 6:Светлый твой, мученице Алино, праздник, вся созва радостно на трапезу днесь, предложив страданий твоих борения, мужество и противление, имиже насыщшеся, верою тя и любовию ублажаем.
Слава, и ныне, Богородичен:Труждает мя буря греховная / и возмущение безместных помышлений: / умилосердися, Всенепорочная, / и руку помощи, яко Милосердная, простри ми, / да величаю Тя, спасаемый.
Величание:Величаем тя, / страстотерпице святая Алино, / и чтим честная страдания твоя, // яже за Христа претерпела еси.
Псалом избранный:1. Терпя потерпех Господа, и внят ми, и услыша молитву мою. 2. Бог нам Прибежище и Сила, Помощник в скорбех, обретших ны зело. 1. Многи скорби праведным и от всех их избавит я Господь. 2. Приведутся Царю девы, приведутся в веселии и радовании. 1. Девы да восхвалят имя Господне. 2. Суди ми, Господи, яко аз незлобою моею ходих. 1. Искуси мя, Господи, и испытай мя, разжи утробы моя, и сердце мое. 2. Да не погубиши с нечестивыми душу мою. 1. Аз же незлобою моею ходих, избави мя, Господи, и помилуй мя. 2. Нога моя ста на правоте: в церквах благословлю Тя, Господи.
По полиелеи седален, глас 8:Житие твое равноангельно, / мучение же просвещенно, / имже сподобилася еси со Ангелы ликовати в радости, / чудесы землю, Алино достоблаженная, Божественными озаряя. / Тем твоими молитвами проси // даровати всем велию милость.
Слава, и ныне, Богородичен:Тя надежду, прибежище и Предстательницу обретше, вернии, / к Тебе притекаем и прилежно вопием: / помилуй, Богородице, на Тя уповающия / и прегрешений оставление нам испроси / молитвами Твоими, Пречистая.
Таже степенна, 1-й антифон, глас 4.Прокимен, глас 4: Святым, иже суть на земли Его, / удиви Господь вся хотения своя в них.
Стих: Презрех Господа предо мною выну, яко одесную мене есть, да не подвижуся.
Всякое дыхание: Евангелие от Матфея, зачало 36.
По 50-м псалме стихира самогласна, глас 6:Добродетельми и девством сияя, / и Божественными научении паче солнца, / и страдании, славная, облистала еси, / и просветила еси землю, Алино, / отгнав мглу многобожия и скверны. / Сего ради память твою светло празднуем и молим тя: // низпошли нам от Господа велия милости.
Канон святыя мученицы, глас 8:
Песнь 1Ирмос: Песнь возслем, людие, / чудному Богу нашему, / свободившему Израиля от работы, / песнь победную поюще и вопиюще, // поим Тебе, Единому Владыце.
Песнь хвалебную, Богу содействующу, приношу ти, Алино честная: от избытка бо сердца глаголют уста и потщатся на славословие твое.
Языческия народы в Церковь Свою призвавый чрез огненоязычных апостолов Своих, тя, Алино, показует славную исповедницу и веры утверждение, Христос.
Токи лестныя уставила еси, Алино, теченьми кровей твоих, и верных мысли напоила еси чудными делы твоими.
Богородичен: Неболезновавшая чревом, рождшая Христа Господа, мольбами Твоими матерними исцели болезни душ и телес наших, да благодарно Сыну Твоему приносим победную песнь.
Песнь 3Ирмос: Несть свят, яко Господь, / и несть праведен, яко Бог наш, / Егоже поет вся тварь: // несть праведен, паче Тебе, Господи.
Нощь отгнала еси многобожия всякую, Алино, блистании евангельских словес, и всем сердцем Богу воззвала еси: несть праведен, паче Тебе, Господи.
Не убоявшися слуг отеческих, невесто Христова Алино, великия ревности исполнилася еси ко Христу и, кровь свою изливающи, вопияла еси дерзновенно: несть праведен, паче Тебе, Господи.
Истине Евангельской научена, животворныя заповеди Спасовы исполнила еси ревностно, Алино блаженная, и научила еси всех взывати: несть праведен, паче Тебе, Господи.
Богородичен: Ангелов удивление, человеков дерзновение, Богородице Чистая, Приснодево, моли Христа Бога, спасти непрестанно Тя блажащия.
Седален, глас 1:Душу связавши любовию Христовою, тленна яже и временная, мученице мудрая, забвением преминула еси, яко Спасова ученица: востекла еси с мудрыми девами в Горний чертог, идеже сугубо дерзновение обрела еси, Алино славная: моли Христа Бога, согрешений оставление даровати чтущим любовию святую память твою.
Слава, и ныне, глас тойже:Упование христиан, Пресвятая Дево, Егоже родила еси Бога, паче ума же и слова, непрестанно моли с вышними Силами подати оставление грехов наших всех и исправление жития верою и любовию присно Тя славящим.
Песнь 4Ирмос: Из горы приосененныя, Слове, пророк, / единыя Богородицы, / хотяща воплотитися Боговидно усмотри // и со страхом славословяще силу Твою.
Светом Пресущным просвещена, Алино чудная, воспламенилася еси любовию Божественною и явилася еси заря пресветлая, облистающая безбожия нощь.
Блистают мученицы светозарныя мощи светом исцелений, верою к сим притекающим, благодать бо приимь от источников Спасовых, Того вольней страсти поревновавше.
Красотою добродетелей просвещаема, от кровей багряницею украсилася еси очервленою, Алино мудрая дево, якоже скиптр, Креста победу носяще, со Христом царствовати сподобилася еси, славословяще силу Его.
Богородичен: Владычице Милостивая, не возгнушайся язвами нашими греховными, Врача рождшая душ и телес наших, утоли болезни и исцели неможения, и спаси души наша.
Песнь 5Ирмос:Страстей мя мглы, / яко от глубокия нощи, избавляяй, / утреневати сподоби дух мой, молюся, // во свете дне повелений Твоих, Христе.
Потекла еси, последуя Христовым стопам Божественным, и общница показался еси Страстей Того и Царствия, всеславная, за любовь твою изрядно венчаваема.
От младых ногтей вожделела еси любве Источника приснотекущаго, Егоже насыщшися, мучения болезни претерпела еси, руки лишена и кровию истекаема, Алино славная, дев похвало.
Разжегшися, мученице, любовию Жениха твоего мысленнаго и распальшися Сего добротами нетленными, претерпела еси усечение руки и язвенныя болезни, Алино хвальная, мучениц похвало.
Богородичен: Льщением человекоубийцы древняго праотцы наша от Присносущныя Жизни отпадоша: Рождеством Твоим, Чистая, земнороднии вси паки в рай восхищени быхом.
Песнь 6Ирмос: Содержима мя приими, Человеколюбче, / грехи многими, / и припадающа щедротам Твоим, // яко пророка Иону, Господи, и спаси мя.
Токи твоих кровей многобожия пламень угасиша, чудесы же, от гроба бываемыя, исторгоша идольскую лесть, и пищу нам, Алино, хваления доброт твоих соделаша.
Блаженно житие твое на земли и кончина славна, сего ради нетленная богатства стяжала еси, Алино, дивная дево, и просвещаеши притекающих к тебе чудесы.
Сладости Небесныя и пресветлыя радости исполнена еси, предстоя Христу, Духом Святым и страдании очищена, мученице достохвальная Алино, молися за люди твоя.
Богородичен: Архангельский глас вопием Ти: Радуйся, Благодатная, Господь с Тобою; радуйся, Благословенная, Заступница наша и скорая в бедах Помощница.
Кондак, глас 2:Связа вся любовию Избавителя, / руки сечение претерпела еси, славная, мужественным мудрованием, / кровей теченьми конец святый прияла еси / и богатство многоценно всем подалася еси, источая исцеления / и решая недуги верно притекающим к тебе, Алино, дево блаженная. / Моли Христа Бога прегрешений оставление даровати // чтущим любовию святую память твою.
Икос:Добродетельным житием на земли просиявшую / и на Небесех со Ангелы ныне ликующую, / деву всечудную и мученицу неодоленную, / сугубым венцем исповедничества и целомудрия увенчaнную, / Алину воспоим, вернии, / сия бо подает исцеления // чтущим любовию святую память ея.
Песнь 7Ирмос: На поле Деире / иногда мучитель пещь постави на мучение Богоносных, / в нейже три отроки песнословляху Единаго Бога, / троично воспеваху, глаголюще: // отцев Боже, благословен еси.
Яко агница на жертву ведома, славная дево Алино, никакоже провещала еси, Владыце твоему подобяся, Егоже ради и смерть пренебрегла еси.
Целомудрием украшаема и мирностию духа, раны твердым умом твоим терпела еси от слуг отеческих, дух твой предая в руце Небеснаго Отца.
Не оставила еси, Алино, попечения о сродном тебе языке, с Горния славы своея подаеши благодать исцелений, верою зовущим: отцев Боже, благословен еси.
Богородичен: Радосте наша, Пречистая Дево, Ты едина во всех родех Мати Божия показалася еси, Божество неопально вместившая. Тем Тя благословим, Марие Богоневестная.
Песнь 8Ирмос: Победители мучителя и пламене / благодатию Твоею бывше, / заповедем Твоим зело прилежаще, / отроцы вопияху: // благословите, вся дела Господня, Господа.
Струи точиши исцелений притекающим верою к твоему гробу, Алино, и Жениху твоему вопиющим: благословите, вся дела Господня, Господа.
Неусыпну тя имамы молитвенницу, волны страстей утишающую, печали утоляющую и лютых всяческих нас избавляющую, вопиющих: благословите, вся дела Господня, Господа.
Мудрования врага прегордаго в себе убив, уму Божественному приобщилася еси житием твоим чистым и ума светлостию, зовуще непрестанно: благословите, вся дела Господня, Господа.
Богородичен: Слово Отчее Единосущное, Адамово избавление от кровей Твоих девственных воплотися, Един, яко весть, Всепетая, спасая нас Своею благостию.
Песнь 9Ирмос: Проявленное на горе законоположнику во огни и купине / Рождество Приснодевы / в наше, верных, спасение // песньми немолчными величаем.
Изрядную угодницу Христову песньми благохвальными почтим, яко исполнена яве благодати и Божественными сияньми преукрашена, и молится о душах наших.
Помяни ныне, Алино славная, всех верою к тебе притекающих, и, от душевных страстей избавляя, защити нас от бед и обстояний, и спасения Божественнаго буди нам ходатаица.
Украсилася еси, мученице, чистотою девства, уяснилася еси страданий лепотою и просияла еси, якоже звезда, сего ради тя песньми немолчными величаем.
Вся во Свет Божественныя Троицы с веселием прешла еси, ангельским воинством ныне срадуешися, пречудная дево Алино, с нимиже непрестанно моли всем спастися, поющим тя.
Богородичен: Юже воспевают Силы Небесныя, Владычицу Деву, Церкве красоту, верных державу и похвалу, благодарно величаю и пение скончаваю.
Светилен:Светом Превечнаго сияния озарився, Алино хвальная, Христу последовала еси, и Того благодатию просветився, источник чудес и милостей явилася еси, сего ради молим тя: спаси души наша.
Слава, и ныне, Богородичен:Зарю пресветлую, являющую нам Солнце незаходимое, вемы, Тя, Пресвятая Дево Богородице. Сего ради молим Тя: яко Мати Света сущи, просвети нас светом Сына Твоего, Христа Бога нашего.
На хвалитех стихиры, глас 1:Божественная Владыки голубице, / позлащенна светлостию девства, / душу просвещши словесы евангельскими, / позлащенна крилы златовидными блистании / твоего исповедания и Божественных твоих кровей, // тя поющия, Алино всехвальная, просвети.
Иже от любве пение тебе приносящих / не забуди, Алино, добрая дево, / но пролей о нас к Богу моление теплое / и избави демонскаго нахождения и лютаго озлобления, / да во дни испытаний не посрамлены будем, // раби твои, страстотерпице приснопамятная.
И по смерти тебе Господь прослави / знамением исцеления, / яви бо нам честныя мощи твоя, / Алино, предивная страдалице, / яко сокровище некрадомо, / к ним же притекающии приемлют здравие душам же и телесем, // присно блажащии тя, дево Христова.
Воспеваем житие твое всечудное / и чтим в Горняя преселение твое праведное, / лобызаем честныя мощи твоя, / токи чудес нам источающия, / и празднуем радостно всесвященную память твою, // мученице Алино добропобедная.
Слава, глас 8:Троическим Светом озаряема, / со Ангелы ныне ликуеши, / предстоя Престолу всех Царя / и почесть приемля трудов своих, Алино предивная, / Егоже присно моли // о чтущих святую память твою, преблаженная.
И ныне, глас тойже:Владычице, приими молитвы раб Твоих / и избави нас // от всякия нужды и печали.
Славословие великое и отпуст.
НА ЛИТУРГИИБлаженны от канона, песнь 3-я и 6-я.
Прокимен, глас 4: Святым, иже суть на земли Его, / удиви Господь вся хотения своя в них. Стих: Презрех Господа предо мною выну, яко одесную мене есть, да не подвижуся.
Апостол к Галатом, зачало 214.
Аллилуиа, глас 4: Воззваша праведнии, и Господь услыша их, и от всех скорбей их избави их. Стих: Многи скорби праведным, и от всех их избавит я Господь.
Евангелие от Иоанна, зачало 51.
Причастен: Радуйтеся, праведнии, о Господе, правым подобает похвала.