Проект службы Саратовским святым
Выкладываю в «Уставные заметки» для обсуждения и отзывов предварительный вариант проекта службы всем святым, в земле Саратовской просиявшим. Замечания, поправки и прочее аналогичное категорически приветствуются. Текст еще будет проходить как минимум две редактуры (текстуальную и певческую), поэтому всё ещё может измениться, но, надеюсь, концептуально ничего менять не придётся. В сносках расшифровано, какие именно святые поминаются в песнопениях службы; для справки см. аннотированный список святых.
В Неделю близ 31 августа
Собор святых, в земле Саратовской просиявших
На велицей вечерни
На Господи, воззвах: стихиры воскресны гласа.
Таже стихиры святых, глас 8.
Подобен: Радуйся, Египте верный:Радуйся, земле Саратовская, / ликовствуй и красуйся днесь, / се бо, прозябения твоя / ныне от нас похвалами венчаются, / граждане суще Царствия Небеснаго. / Сии об отечествии своем прилежно ходатайствуют, / лик совокупный составивше, / древлии вкупе и новейшии, / именованнии и безыменнии, / славою почтенныя от Церкве земныя / и в Небеснем Граде похваляемии, // всех же на молитву призывати потщимся.
Радуйся, Ермогене священномучениче [1], / градов и весей волжских мудрый архипастырю, / людей новопросвещенных красный светильниче, / земли прежде дивия ко Христу приведый, / Божия Матере избранниче пречудный. / Како словесы похвальными украсим тя, / како по достоянию тя ублажим, / но земли нашея ходатая усерднаго тя ведуще, // помилование нам исходатайствовати молим усердно.
Радуйся, святый царю Феодоре [2], / градов поволжских зиждителю, / земли сии ныне светом Православныя веры озаришася, / храмы честыми украшеннии, / сонмом угодников Божиих от Господа почтенныя, / мы же яко первоначальника нашего воспеваем тя, / и благодарение приносяще, / со страхом и трепетом взываем: / о угодниче Божий пречудный, / не престай заступати чад твоих, / помилование просяще душам нашим.
Слава, глас 5:Ангельския силы и человеческий род / составим днесь совокупный лик, / во псалмех и песнех и пениих духовных / прославити святых земли Саратовския, / яко светильники всесветлыя нам сияющия / и души верных просвещающия. / Несть нам излити словесе довольство / еже по достоянию ублажити подвизи их, / но и сие убогое приношение не отвергните, молим вас, / земли нашея небеснии предстатели, / венцы нетленными от Господа почтенныя / и в Небесныя обители вселившиеся, / яко да вас споспешники имеюще, / прославим Бога дивнаго во святых Своих, / и милости от Него сподобимся, // венцы Небесныя уготовляющаго любящим Его.
И ныне, догматик гласа.
Вход. Прокимен дне. И чтения три мученическия.
На литии стихиры святых, глас 2:Невинности тезоименитаго святителя, / церковных догматов защитника, / Иннокентия многострадальнаго почтим, вернии, / сей бо правды ради изгнан бысть, / темже блажен показася воистину, / чудесы от Господа прославленный, / паствы своея заступник усердный, // у Престола Господня молится о всех нас.
Иные стихиры, глас 8:Приидите, мучениколюбцы, днесь, / песньми почтим Гермогена дивнаго, / о вере и Отечествии ревнителя усерднаго, / благочестия твердаго зиждителя, / безбожия льсти обличителя, / страданий от богоборцев не убоявшагося, / пастве своей взывавшаго: / не скорбите убо, братия моя, / сии бо страдания // училище нам духовное есть.
Видим ныне Германа добропобеднаго, / на судище неправеднем безбожным судиям противоставшаго, / верою крепкою гонителей злобу превозмогшаго, / тии бо победу непщеваша во убиении его, / но прослави его во Царствии Небеснем Христос Бог, / венцы небесными увенчавающаго любящих Его.
Слава, глас тойже:Приидите, возрадуемся Господеви / и воспоем Ему песнь благодарственную, / се бо сонм святых сродник наших / Церковию земною и Небесною прославляется. / Срадуются нам умная чиноначалия, / таковых изрядных граждан Иерусалима Вышняго зряще: / святители доблественныя, / правыя веры блюстителие, / иноцы ангелоподобныя, / постом и послушанием украшенныя, / мученицы добропобедныя, / кровьми своими ризы своя убелившия, / священномученицы многострадальныя, / Агнцу принесшияся яко жертва непорочная, / с ними же и вси прочии святии земли нашея, / именовании и безыменнии, / всякий град и всякую весь / кровьми и подвиги своими освятившия, / на свещнице церковнем уставленныя / и в вертепех и пропастех земных до времени от мира сокровенныя, / вкупе же от Господа прославленныя, / и молитвы своя тепле к Нему проливающия, / да избавит землю нашу и всякий град и страну / от губительства льстиваго и падений греховных, / яко да и мы, чада их недостойнии, / подвизи их зде на земли воспевающия, / от Господа воприимем // благодать и велию милость.
И ныне, Богородичен:Видите Царицу Богородицу, / Покров Свой над миром простирающую, / к Сыну Своему руце Своя молебне воздвизающия, / глаголюще: о Сыне Мой и Боже, / не престай люди сия миловати, / иже Мене на заступление призывают, / огради их от бесовских прилогов / и наветований злых человек, / Аз бо их Помощница и Предстательница, / в сердце Своем вмещающи скорби их и нужды, / да помилование обрящут от Тебе // егда возсядеши судити мертвыя и живыя.
Таже в молитве Спаси, Боже, люди Твоя: поминает диакон:…иже во святых отца нашего Иннокентия, епископа Саратовскаго и Пензенскаго, святых священномучеников Гермогена, епископа Тобольскаго, Германа, епископа Вольскаго, Дионисия, Иоанна, Космы, Михаила, Сергия, Иоанна, Николая и Петра пресвитеров, святаго преподобномученика Нифонта, святаго мученика болярина Александра и всех прочих святых, в земле Саратовской просиявших.
На стиховне стихиры воскресны гласа.
Слава, святых, глас 8.
Подобен: Что вас наречем:Что вы наречем, святии? / Закона ли вестники, / яко заповеди Господни пред беззаконники ясно исповедаша? / Благодати ли стяжатели, / яко посреде нечестия Имя Божие возглашаша небоязненно? / Но яко обоих Подателя вернии служители, / заступайте нас, в беззакония ежеденно впадающия, / да не лишимся всеконечно благодати Божия, // животворящия всякое дыхание.
И ныне, Богородичен по гласу Славы.
По Ныне отпущаеши: и Трисвятом Богородице Дево: дважды
и тропарь святых единожды.
Тропарь, глас 5:Днесь да празднует земля Саратовская / и да красуется песненными добротами, / яко ныне прииде день всекраснаго торжества, / память общая святых, произшедших от нея: / святителей честных и дивных праведников, / мучеников добропобедных и преподобных отцев, / имже ныне с верою вси возопиим: / о полче пресветлый и богоизбранный, / не оставьте вашими святыми молитвами // иже на земли память вашу совершающих.
На утрени
По стихословиям седальны воскресны.
Полиелей, и величание:Величаем вас, святии вси, в земли Саратовстей просиявшия, и чтим святую память вашу, вы бо молите за нас Христа Бога нашего.
Ипакои гласа, таже седальны святых, глас 2:Ангелом веселие, человеком же наставление бысть подвиги и страдания ваша, святии, ныне же ублажающе вы, части общия с вами улучити надеемся.
Странники, зде пребывающаго града не имущия, но грядущий обретшия, вемы вы, святии, мы же долу приклоненныя предстательства вашего всеусердно желаем, да во Град Горний внити возможем.
Слава, глас тойже:«Аз есмь путь и истина и живот», - глаголет Господь, вы же, приснославнии, путем Его шествующе, истины Его алчуще, жизни вечныя от Него сподобишася, и ныне испросите и нам тояжде жизни вечныя причащения.
И ныне, Богородичен:Мати Божия, Солнце правды Христа рождшая, помози и ныне нам, грехми омраченным, да сподобимся по исходе от жития сего временнаго во свете пребывати невечернем, со всеми святыми земли нашея.
Степенны, прокимен и Евангелие воскресны.
ЗРИ: Аще храм святых, прокимен и Евангелие храма.Прокимен, глас 4: Праведник яко финикс процветет / и яко кедр, иже в Ливане, умножится. Стих: Насаждени в дому Господни, во дворех Бога нашего процветут.
Евангелие, от Иоанна, зачало 51.
По 50-м псалме стихира, глас 6:Не оскуде любовь ваша, святии, / егда изыдосте от сего временнаго жития, / но паче распростреся на всякаго, / в молитвах призывающаго вас. / Мы же в любве оскудевающии, / слезныя своя воздыхания приносим вам, / да предстательством вашим укрепляемии, / душам нашим приобрящем от Господа // благодать и велию милость.
Канон святых, глас 5,
имый краестрочие: Святым земли Саратовския похвалу пою.
Песнь 1.Ирмос: Коня и всадника в море Чермное / сокрушаяй брани мышцею высокою / Христос истрясе, Израиля же спасе, / победную песнь поюща.
Припев: Вси святии земли Саратовския, молите Бога о нас.
Сошедшеся ныне, чада земли Саратовския, в день нашаго светлаго торжества, прославим дивнаго во святых Своих Бога, сонм святых в земли нашей явившаго, песни победныя Тому поюще.
Величие наше и похвала еси ты, Гермогене [3] боговенчанне, пастырю ревностный и хранителю Церкви усердный. Како крови твоя мученическия по достоянию воспети мощно, како терпение твое возможем возвеличити, но обаче дерзаем с тобою купно тебе прославльшему Богу воспевати песни победныя.
Яко светильника всесветлаго, восхвалим Иннокентия [4] чуднаго, от Света Тихаго Самаго Христа огнь в души своей приемый и сквозе искушения велия пронесый. Сим ныне осияваемыя, песнь Подвигоположнику Богу воспеваем.
Богородичен: Творец и Избавитель Твой, Пречистая, от Твоих чистых кровей в наше облекийся естество, из утробы Твоея пройде, наше все изцеливый смешение, темже любовию песни победными ублажаем Тя.
Песнь 3Ирмос: Водрузивый на ничесомже землю повелением Твоим / и повесивый неодержимо тяготеющую / на недвижимем, Христе, камени заповедей Твоих, / Церковь Твою утверди, Едине Блаже и Человеколюбче.
Инаго языка рождение, от чуждаго исповедания к Свету Истиному прешел еси, правое хваление Имене Божия вседушевне восприем, страданием за Христа житие многотрудное увенчавый, мучениче всечестне Александре [5], предстательствуй за ны ко Единому Человеколюбцу.
Множицею разжегошася гнавшия Церковь Божию, зело возмятошася ненавистницы обетов иноческих, но возсташа доблии воини Христовы, Нифонт [6] с Феодором [7], меч прием Слова Божия и в броню оболкшеся правды Его, темже превозмогоша кровьми своими лаяние безбожное, и мощьми своими землю нашу украсиша, слузи вернии Бога благаго и Человеколюбца.
Земли Саратовския всекрасное прозябение почтим, страдальца добропобеднаго Виктора [8], иноческия его подвизи во обители Святыя Троицы и Слова Божия благовествование воспоминающе, ныне же к мощем его святым и многоцелебным припадающе, хвалим Единаго Благаго и Человеколюбца.
Богородичен: Еже от Ангела «Радуйся» приявшая, радости мир весь исполнила еси, Марие Дево, мы же тебе припадем и тепле вопием: Сыну Своему принеси наша молитвы, да обрадованнии поим Единаго Благаго и Человеколюбца.
Кондак и икос святых.
Кондак, глас 8.
Подобен: Взбранной Воеводе:Избранным от земли нашея, / яко велицем угодником Христовым, / вам, о святии вси Саратовстии, / похвальное пение приносим днесь. / Вы же, у престола Господня предстоящии, / от всяких нас бед избавите молитвами вашими, да зовем вам: // радуйтеся, святии вси земли Саратовския, земли нашея небеснии предстателие.
Икос:Ангели земнии и человецы небеснии вемы вас, о святии вси чудотворцы Саратовстии, подвиги своими Православие в той утвердившия и мощьми своими ю освятившия. И како язык человечь возможет по достоянию восхвалити вы? Но обаче приимите от нас похвалы сицевая: радуйтеся, святителие святыя, яко правила веры и добродетелей учителие явльшияся; радуйтеся, отцы преподобнии, постничества подвиги и труды молитвенными просиявшия; радуйтеся, священномученицы дивнии, у Престола Божия на земли предстоявшия и путем страстотерпческим ко Престолу Пресвятыя Троицы прешедшия; радуйтеся, Христовы новии мученицы, яко заколение непорочное от земли нашея принесшияся и кровьми своими тую освятившия; радуйтеся, праведницы блаженнии, вы бо слышати глас Господень: приимите славу Мою, юже даде Ми Отец, сподобитеся; радуйтеся, вы бо есте раби Спасовы блазии и вернии; радуйтеся, святии вси земли Саратовския, земли нашея небеснии предстателие.
Седален, глас 4:Яко подобницы честнии Христовы, приснии Божии друзи и доблии венечницы да почтутся от нас песньми похвальными святии вси, в земли Саратовстей просиявшия, дерзновение ко Спасу стяжавшия, молитвам нашим немощным усерднии пособницы, от всяких лютых ограждающия ны.
Слава, и ныне:Притецем днесь, людие, ко Спасителеву Образу нерукотворенному, чрез той бо токи чудес неисякаемыя граду нашему излияшася, и велегласно возопиим: Многомилостиве и Всещедре Господи, Образ давый Свой граду Саратову, недвижим и невредим той сохрани и, молитвами всех святых его, верным даруй мир Твой и велию милость.
Песнь 4Ирмос: Божественное Твое разумев истощание прозорливо, / Аввакум, Христе, со трепетом вопияше Тебе: / во спасение людей Твоих / спасти помазанныя Твоя пришел еси.
Милости исполнен сый, всеблаженне отче Александре [9], люди от Церкви отвращенныя кротостию и о заповедех Господних ревнованием на путь покаяния наставлял еси. Сего ради и Господь тебе даром чудес украси и предстателя земли нашея яви.
Любве ради Божественныя к земли чуждей устремился еси, Гурие [10] всеблаженне, земли отдаленней и языку Христа не ведущему послужити вседушевне желая, темже апостольства почесть приял еси, горнему званию повнуяся, просветителю сущих во тме нечестия.
Иже первее раскола и лжеучений обличителю, и жизни во Христе ревнителю теплейший, Иларионе [11], показася мирови недугов душевных целитель всеусерднейший, язвы сердца человеческаго силою Божиею врачуя, в вертограде обители Оптинския пристанище тихое обретый и нас на спасения путь словесы своими наставляя.
Богородичен: Странное чудо зрим о Тебе, Отроковице: како Безконечный от утробы Твоея Отроча младо бывает, како Безсмертия источник в смертность нашу облекается, како дерзновение Матернее употребляюще, Судии Крайняго милосердие к нам доныне ходатайствуеши.
Песнь 5Ирмос: Одеяйся светом яко ризою, / к Тебе утренюю и Тебе зову: / душу мою просвети омраченную, Христе, / яко Един Благоутробен.
Адаманта твердейша воистину показася нам верность ваша, новомученицы добропобеднии земли Саратовския, вас ни заточения, ни страдания, ни самая смерть от любве не возмогоша разлучити, яже о Христе Сладчайшем, Господе нашем.
Рекоша ваша честнии уста: несумненно веруем и вслух народа Божия сия свидетельствуем, яко небесных сладчайших обителей желаем и жизни вечныя улучити уповаем. Убиение телесе жизнь нам воистину, страдания же и муки временныя путь наш ко Христу Сладчайшему, Избавителю душ наших.
Авелю древлему уподобишася, Германе [12] честный, Вольска славнаго первопастырю, и Михаиле [13] милосердный, сирот и убогих евангельски напитавший, дела ваша добрая Небеса вам отверзоша, мы же песнь вам принесем всеусердне, славящим Христа Человеколюбца.
Богородичен: Таинственне Огнь Божественный прияла еси во утробу Свою, Мати Слова и Дево, молитву с новомученики добропобедными излей к Сыну и Богу Твоему, да огня нас избавит вечнаго.
Песнь 6Ирмос: Обыде мя бездна, / гроб мне кит бысть, / аз же возопих к Тебе, Человеколюбцу, / и спасе мя десница Твоя, Господи.
От юности Христа возлюбили есте, святии мученицы, Страстем Его подражати уповающе, в терпении своем от Онего же укрепляеми, всякое место и град кровьми своими обагриша, и телеса своя страдальческая, яко семя веры нам дароваша.
Воине Христов доблественный Константине [14], раскола всеусердный обличителю, жизнь твоя честна и кончина твоя непорочна, словесем твоим свидетельство мучения твоя явишася, темже нетлением мощи твоя прослави Бог, душетленныя пагубы нас молитвами твоими избавляяй.
Сердце твое очистися, отче Иоанне [15], во огни гонения, и дух прав обновися во утробе твоей, злостраданием очищенней, сего ради глас твой к Богу Живу возвысися от пустыни безбожныя, и жертва твоя чиста прията бысть в пренебесный жертвенник Господень.
Богородичен: Купина неопалне горящая и не сгарающая образ бысть Твоего девства и чистоты, Марие Богоневестная, огради и нас предстательством Твоим огня страстей и искушений и бед, находящих на ны.
Кондак и икос воскресные.
Песнь 7Ирмос: Превозносимый отцев Господь / пламень угаси, отроки ороси, / согласно поющия: / Боже, благословен еси.
Измлада служити Богови вожделевый, ко алтарю Господню всеусердне потщался еси, святителю всечестне Феофане [16], и овцы словесныя словом своим добре упасл еси, течение же твое мученически во стране полунощней скончал еси, со паствою твоею и чады твоими взывая: Боже, благословен еси.
Яко древле Стефану перводиакону, отверзе ти Господь в последняя дни сия Небесная врата, отче Петре [17], диаконе всечестне, силы Божия и веры исполнен сый, во узех и работех горцех выну воспевая: Боже, благословен еси.
Призвание Господне разумевый, не ниву чувственную, но пажить словесную возделати потщался еси, отче Космо [18], священства достоинство в гонениих приемый, и онаго ничимже посрами, и даже до часа смертнаго верным Господеви пребыл еси, взывая: Боже, благословен еси.
Богородичен: О Пречистая Мати Божия, Небесный Хлеб Сына Твоего и Бога нашего на руках Своих носившая, не остави нас, непотребных, крепким Твоим предстательством, да с Тобою вместе возопием, спасаемии: Боже наш, благословен еси.
Песнь 8Ирмос: Из Отца прежде век рожденнаго Сына и Бога / и в последняя лета воплощеннаго от Девы Матере, / священницы, пойте, / людие, превозносите во вся веки.
Христу Пастыреначальнику последуя, пастве своей усердно послужил еси, и в час испытания огненнаго уст своих ложным свидетельством не осквернил еси, Дионисие [19], но небесною помощию укрепляемь, глаголал еси, яко Бога нашего достойно есть воспевати и превозносити во вся веки.
Воинства земнаго помощниче, Царю Небесному в лице мученичестем ввоинился еси, святе Сергие [20], несть бо нам Бога нашего отвратитися, пред мучители возгласивый, ниже на ближняго нашего клеветы изрещи, но еже Господеви пети и превозносити Его во вся веки.
Аще и ввергоша дивнаго Иоанна [21] во узилище безбожнии гонители, но не возмогоша поколебати веры его, тесноту бо крайнюю вмени сей яко росу благодати Божия, взывая от изнеможения своего: Господа пойте, людие, и превозносите Его во вся веки.
Богородичен: Лики торжествующе составим, пети Матери Господа нашего дерзающе, аще и не довлеет похвале сей словеса человеческия, но яко Благая сущи, сия от нас приими, да воспоем Сыну Твоего и превознесем Его во веки.
Песнь 9Ирмос: Исаие, ликуй, / Дева име во чреве и роди Сына Еммануила, / Бога же и Человека, Восток имя Ему, / Егоже величающе, Деву ублажаем.
Ублажим ныне Иоанна [22], Николая [23] и Петра [24], класы зрелейшия земли нашея, от степей Казахстанских в житницу Небесную приятыя, кровьми своими ризы своя убелившия, почести горняго звания восприявшия, и у Престола Божия за ны грешныя предстательствующия.
Память совершая днесь святых земли Саратовския, пение благодарственное принесем Богу, дивному во святых Своих, доныне землю нашу не оставляющему, но светом Царствия Небеснаго чрез сих молитвенников наших души наша озаряющаго.
Троичен: О Триипостасне Боже, Алфо и Омего нашего спасения, землю нашу светом Крещения просветивый и сонм святых от нея воздвигнувый, приими ныне молитвы сих, о нас грешных приносимыя, да мир Небесный и земный улучим и спасение душам нашим.
Богородичен: Юнице Божия, Агнице чистая миру Агнца Божия родившая, Покров Твой честный простри нам, грешным, несть бо нам иныя помощи и инаго ограждения, токмо Матерния молитвы Твоя и к Сыну Твоему теплейшее предстательство.
СветиленСветила всесветлыя явишася на тверди церковней, святии славнии земли Саратовския, тму зловерия и нечестия просвещающия, Солнце Правды Христа возвещающия и верным всем путь неложный в Царствие Небесное указующия.
На хвалитех стихиры воскресны гласа.
Таже святых, глас 8.
Подобен: О, преславнаго чудесе:О, преславнаго чудесе! / От земли Саратовския святых сонм возсия, / и яко светильницы чистыя / на свещнице церковнем сии уставишася, / житием своим наше течение многоскорбное осиявающия, / во еже и нам по стопам их шествующе, // славы Царствия Небеснаго достигнути.
О, преславнаго чудесе! / Святыя земли Саратовския Престолу Божию ныне предстоят. / Се, святители преславныя, / народа церковнаго вернии блюстителие, / иноцы преподобнии и пресвитеры честнии, / мужие и жены всеславныя, / всякое звание и возраст и всякий чин, / ко Христу пришедшия и Истину соблюдшия, / ихже молитвами обрящем и мы милость // в день Судный.
О, преславнаго чудесе! / Святии новии мученицы, / в земли Саратовстей явленныя, / крови своя яко жертву чистую / пред лице Господне принесоша, / и тако ослабу велию Церкви нашей испросиша. / О страдальцы велицыи, / ходатайством вашим ко Господу // доныне заступайте нас.
Слава, стихира Евангельская.
И ныне, Богородичен, глас 2: Преблагословенна еси:
На ЛитургииБлаженна гласа, на 6, и святых, песнь 5-я, на 4.
Прокимен воскресный и святых, глас 4: Святым иже суть на земли Его удиви Господь вся хотения своя в них.
Апостол ко Евреом, зачало 330.
Аллилуиа гласа и святых, глас 4: Воззваша праведнии и Господь услыша их и от всех скорбей их избави их.
Евангелие от Матфеа, зачало 10.
Причастен: Радуйтеся, праведнии, о Господе, правым подобает похвала.
МолитваО божественный сонме крепкодушных страдальцев, новомученицы добропобеднии земли Саратовския! К вам, яко сродником нашим, ныне прибегаем, в день вашего общего торжества, и усердно молим: не оставите предстательством своим землю сию, юже кровьми своими страдальческими обагрили есте. Терпение изрядное во страдании своем показавшии, испросите нам у Господа мужества дар, во еже не уклонятися нам от пути заповедей Христовых, егда приидет и нам час испытаний нечаянных. Уста своя оградившия от льсти и глаголаний ложных, оградите сердца наша от помышлений суетных и ложных, по действу диаволю в нас порождаемых. Паству свою не оставившия во дни лютых обстояний, укрепите и ныне пастырей наших во еже право правити слово Христовой истины. Церкви Православныя не отвергшиеся, помозите ныне нам, ересями и расколы обуреваемым, да и мы пребудем выну во ограде двора овчаго и да будем единым стадом Единаго Пастыря. Прешедшия поприще земнаго вашего течения непостыдно и венцы победными увенчанныя во Царствии Небеснем, испросите у Господа и нам поможения на пути нашего многоскорбнаго жития, да прешедше порог смертный, возможем внити в светлый оный и неизглаголанный чертог, егоже уготовал Господь любящим Его, и тамо купно с вами прославим пречестное и великолепое Имя Отца и Сына и Святаго Духа, Троицы Единосущныя и Неразделимыя, во веки веков. Аминь.
ЗРИ: Аще прилучится память святых августа в 29 день, поем им службу в Неделю грядущую, праздника ради Предтечева.
Примечания:
[1] Свщмч. Ермоген, Патр. Московский и всея Руси (†1612, память 17 февраля и 12 мая)
[2] Благов. Феодор I Иоаннович, Царь Московский (†1598, память 7 января)
[3] Свщмч. Гермоген (Долганёв), еп. Тобольский и Сибирский (†1918, память 16 июня)
[4] Свят. Иннокентий (Смирнов), еп. Пензенский и Саратовский (†1819, память 10 октября)
[5] Муч. Александр (Медем; †1931, память 10 ноября)
[6] Прпмч. Нифонт (Выблов) священноинок (†1931, память 10 ноября)
[7] Прпмч. Феодор (Богоявленский) священноинок (†1943, память 6 июля)
[8] Свят. Виктор (Островидов) исп., еп. Глазовский и Воткинский (†1934, память 19 апреля и 18 июня)
[9] Прав. Александр (Юнгеров), пресвитер Чагринский (†1900, память 22 декабря и 9 июня)
[10] Свят. Гурий (Карпов), архиеп. Таврический и Херсонский (†1882, память 17 марта)
[11] Преп. Иларион (Пономарев) иеросхимонах, старец Оптинский (†1873, память 18 сентября и 11 октября)
[12] Свщмч. Герман (Косолапов), еп. Вольский (†1919, память 27 сентября)
[13] Свщмч. Михаил (Платонов) пресвитер (†1919, память 27 сентября)
[14] Свщмч. Константин (Голубев) пресвитер (†1918, память 19 сентября)
[15] Свщмч. Иоанн (Днепровский) пресвитер (†1937, память 2 декабря)
[16] Свщмч. Феофан (Ильменский), еп. Соликамский (†1918, память 11 декабря)
[17] Свщмч. Петр (Кравец) протодиакон (†1937, память 20 октября)
[18] Свщмч. Косма (Петриченко) пресвитер (†1937, память 3 ноября)
[19] Свщмч. Дионисий (Щёголев) пресвитер (†1937, память 10 ноября)
[20] Свщмч. Сергий (Кудрявцев) пресвитер (†1937, память 2 декабря)
[21] Свщмч. Иоанн (Миротворцев) пресвитер (†1938, память 5 марта)
[22] Свщмч. Иоанн (Заседателев) пресвитер (†1942, память 16 октября)
[23] Свщмч. Николай (Амасийский) пресвитер (†1938, память 13 декабря)
[24] Свщмч. Петр (Покровский) пресвитер (†1937, память 17 декабря)
В Неделю близ 31 августа
Собор святых, в земле Саратовской просиявших
На велицей вечерни
На Господи, воззвах: стихиры воскресны гласа.
Таже стихиры святых, глас 8.
Подобен: Радуйся, Египте верный:Радуйся, земле Саратовская, / ликовствуй и красуйся днесь, / се бо, прозябения твоя / ныне от нас похвалами венчаются, / граждане суще Царствия Небеснаго. / Сии об отечествии своем прилежно ходатайствуют, / лик совокупный составивше, / древлии вкупе и новейшии, / именованнии и безыменнии, / славою почтенныя от Церкве земныя / и в Небеснем Граде похваляемии, // всех же на молитву призывати потщимся.
Радуйся, Ермогене священномучениче [1], / градов и весей волжских мудрый архипастырю, / людей новопросвещенных красный светильниче, / земли прежде дивия ко Христу приведый, / Божия Матере избранниче пречудный. / Како словесы похвальными украсим тя, / како по достоянию тя ублажим, / но земли нашея ходатая усерднаго тя ведуще, // помилование нам исходатайствовати молим усердно.
Радуйся, святый царю Феодоре [2], / градов поволжских зиждителю, / земли сии ныне светом Православныя веры озаришася, / храмы честыми украшеннии, / сонмом угодников Божиих от Господа почтенныя, / мы же яко первоначальника нашего воспеваем тя, / и благодарение приносяще, / со страхом и трепетом взываем: / о угодниче Божий пречудный, / не престай заступати чад твоих, / помилование просяще душам нашим.
Слава, глас 5:Ангельския силы и человеческий род / составим днесь совокупный лик, / во псалмех и песнех и пениих духовных / прославити святых земли Саратовския, / яко светильники всесветлыя нам сияющия / и души верных просвещающия. / Несть нам излити словесе довольство / еже по достоянию ублажити подвизи их, / но и сие убогое приношение не отвергните, молим вас, / земли нашея небеснии предстатели, / венцы нетленными от Господа почтенныя / и в Небесныя обители вселившиеся, / яко да вас споспешники имеюще, / прославим Бога дивнаго во святых Своих, / и милости от Него сподобимся, // венцы Небесныя уготовляющаго любящим Его.
И ныне, догматик гласа.
Вход. Прокимен дне. И чтения три мученическия.
На литии стихиры святых, глас 2:Невинности тезоименитаго святителя, / церковных догматов защитника, / Иннокентия многострадальнаго почтим, вернии, / сей бо правды ради изгнан бысть, / темже блажен показася воистину, / чудесы от Господа прославленный, / паствы своея заступник усердный, // у Престола Господня молится о всех нас.
Иные стихиры, глас 8:Приидите, мучениколюбцы, днесь, / песньми почтим Гермогена дивнаго, / о вере и Отечествии ревнителя усерднаго, / благочестия твердаго зиждителя, / безбожия льсти обличителя, / страданий от богоборцев не убоявшагося, / пастве своей взывавшаго: / не скорбите убо, братия моя, / сии бо страдания // училище нам духовное есть.
Видим ныне Германа добропобеднаго, / на судище неправеднем безбожным судиям противоставшаго, / верою крепкою гонителей злобу превозмогшаго, / тии бо победу непщеваша во убиении его, / но прослави его во Царствии Небеснем Христос Бог, / венцы небесными увенчавающаго любящих Его.
Слава, глас тойже:Приидите, возрадуемся Господеви / и воспоем Ему песнь благодарственную, / се бо сонм святых сродник наших / Церковию земною и Небесною прославляется. / Срадуются нам умная чиноначалия, / таковых изрядных граждан Иерусалима Вышняго зряще: / святители доблественныя, / правыя веры блюстителие, / иноцы ангелоподобныя, / постом и послушанием украшенныя, / мученицы добропобедныя, / кровьми своими ризы своя убелившия, / священномученицы многострадальныя, / Агнцу принесшияся яко жертва непорочная, / с ними же и вси прочии святии земли нашея, / именовании и безыменнии, / всякий град и всякую весь / кровьми и подвиги своими освятившия, / на свещнице церковнем уставленныя / и в вертепех и пропастех земных до времени от мира сокровенныя, / вкупе же от Господа прославленныя, / и молитвы своя тепле к Нему проливающия, / да избавит землю нашу и всякий град и страну / от губительства льстиваго и падений греховных, / яко да и мы, чада их недостойнии, / подвизи их зде на земли воспевающия, / от Господа воприимем // благодать и велию милость.
И ныне, Богородичен:Видите Царицу Богородицу, / Покров Свой над миром простирающую, / к Сыну Своему руце Своя молебне воздвизающия, / глаголюще: о Сыне Мой и Боже, / не престай люди сия миловати, / иже Мене на заступление призывают, / огради их от бесовских прилогов / и наветований злых человек, / Аз бо их Помощница и Предстательница, / в сердце Своем вмещающи скорби их и нужды, / да помилование обрящут от Тебе // егда возсядеши судити мертвыя и живыя.
Таже в молитве Спаси, Боже, люди Твоя: поминает диакон:…иже во святых отца нашего Иннокентия, епископа Саратовскаго и Пензенскаго, святых священномучеников Гермогена, епископа Тобольскаго, Германа, епископа Вольскаго, Дионисия, Иоанна, Космы, Михаила, Сергия, Иоанна, Николая и Петра пресвитеров, святаго преподобномученика Нифонта, святаго мученика болярина Александра и всех прочих святых, в земле Саратовской просиявших.
На стиховне стихиры воскресны гласа.
Слава, святых, глас 8.
Подобен: Что вас наречем:Что вы наречем, святии? / Закона ли вестники, / яко заповеди Господни пред беззаконники ясно исповедаша? / Благодати ли стяжатели, / яко посреде нечестия Имя Божие возглашаша небоязненно? / Но яко обоих Подателя вернии служители, / заступайте нас, в беззакония ежеденно впадающия, / да не лишимся всеконечно благодати Божия, // животворящия всякое дыхание.
И ныне, Богородичен по гласу Славы.
По Ныне отпущаеши: и Трисвятом Богородице Дево: дважды
и тропарь святых единожды.
Тропарь, глас 5:Днесь да празднует земля Саратовская / и да красуется песненными добротами, / яко ныне прииде день всекраснаго торжества, / память общая святых, произшедших от нея: / святителей честных и дивных праведников, / мучеников добропобедных и преподобных отцев, / имже ныне с верою вси возопиим: / о полче пресветлый и богоизбранный, / не оставьте вашими святыми молитвами // иже на земли память вашу совершающих.
На утрени
По стихословиям седальны воскресны.
Полиелей, и величание:Величаем вас, святии вси, в земли Саратовстей просиявшия, и чтим святую память вашу, вы бо молите за нас Христа Бога нашего.
Ипакои гласа, таже седальны святых, глас 2:Ангелом веселие, человеком же наставление бысть подвиги и страдания ваша, святии, ныне же ублажающе вы, части общия с вами улучити надеемся.
Странники, зде пребывающаго града не имущия, но грядущий обретшия, вемы вы, святии, мы же долу приклоненныя предстательства вашего всеусердно желаем, да во Град Горний внити возможем.
Слава, глас тойже:«Аз есмь путь и истина и живот», - глаголет Господь, вы же, приснославнии, путем Его шествующе, истины Его алчуще, жизни вечныя от Него сподобишася, и ныне испросите и нам тояжде жизни вечныя причащения.
И ныне, Богородичен:Мати Божия, Солнце правды Христа рождшая, помози и ныне нам, грехми омраченным, да сподобимся по исходе от жития сего временнаго во свете пребывати невечернем, со всеми святыми земли нашея.
Степенны, прокимен и Евангелие воскресны.
ЗРИ: Аще храм святых, прокимен и Евангелие храма.Прокимен, глас 4: Праведник яко финикс процветет / и яко кедр, иже в Ливане, умножится. Стих: Насаждени в дому Господни, во дворех Бога нашего процветут.
Евангелие, от Иоанна, зачало 51.
По 50-м псалме стихира, глас 6:Не оскуде любовь ваша, святии, / егда изыдосте от сего временнаго жития, / но паче распростреся на всякаго, / в молитвах призывающаго вас. / Мы же в любве оскудевающии, / слезныя своя воздыхания приносим вам, / да предстательством вашим укрепляемии, / душам нашим приобрящем от Господа // благодать и велию милость.
Канон святых, глас 5,
имый краестрочие: Святым земли Саратовския похвалу пою.
Песнь 1.Ирмос: Коня и всадника в море Чермное / сокрушаяй брани мышцею высокою / Христос истрясе, Израиля же спасе, / победную песнь поюща.
Припев: Вси святии земли Саратовския, молите Бога о нас.
Сошедшеся ныне, чада земли Саратовския, в день нашаго светлаго торжества, прославим дивнаго во святых Своих Бога, сонм святых в земли нашей явившаго, песни победныя Тому поюще.
Величие наше и похвала еси ты, Гермогене [3] боговенчанне, пастырю ревностный и хранителю Церкви усердный. Како крови твоя мученическия по достоянию воспети мощно, како терпение твое возможем возвеличити, но обаче дерзаем с тобою купно тебе прославльшему Богу воспевати песни победныя.
Яко светильника всесветлаго, восхвалим Иннокентия [4] чуднаго, от Света Тихаго Самаго Христа огнь в души своей приемый и сквозе искушения велия пронесый. Сим ныне осияваемыя, песнь Подвигоположнику Богу воспеваем.
Богородичен: Творец и Избавитель Твой, Пречистая, от Твоих чистых кровей в наше облекийся естество, из утробы Твоея пройде, наше все изцеливый смешение, темже любовию песни победными ублажаем Тя.
Песнь 3Ирмос: Водрузивый на ничесомже землю повелением Твоим / и повесивый неодержимо тяготеющую / на недвижимем, Христе, камени заповедей Твоих, / Церковь Твою утверди, Едине Блаже и Человеколюбче.
Инаго языка рождение, от чуждаго исповедания к Свету Истиному прешел еси, правое хваление Имене Божия вседушевне восприем, страданием за Христа житие многотрудное увенчавый, мучениче всечестне Александре [5], предстательствуй за ны ко Единому Человеколюбцу.
Множицею разжегошася гнавшия Церковь Божию, зело возмятошася ненавистницы обетов иноческих, но возсташа доблии воини Христовы, Нифонт [6] с Феодором [7], меч прием Слова Божия и в броню оболкшеся правды Его, темже превозмогоша кровьми своими лаяние безбожное, и мощьми своими землю нашу украсиша, слузи вернии Бога благаго и Человеколюбца.
Земли Саратовския всекрасное прозябение почтим, страдальца добропобеднаго Виктора [8], иноческия его подвизи во обители Святыя Троицы и Слова Божия благовествование воспоминающе, ныне же к мощем его святым и многоцелебным припадающе, хвалим Единаго Благаго и Человеколюбца.
Богородичен: Еже от Ангела «Радуйся» приявшая, радости мир весь исполнила еси, Марие Дево, мы же тебе припадем и тепле вопием: Сыну Своему принеси наша молитвы, да обрадованнии поим Единаго Благаго и Человеколюбца.
Кондак и икос святых.
Кондак, глас 8.
Подобен: Взбранной Воеводе:Избранным от земли нашея, / яко велицем угодником Христовым, / вам, о святии вси Саратовстии, / похвальное пение приносим днесь. / Вы же, у престола Господня предстоящии, / от всяких нас бед избавите молитвами вашими, да зовем вам: // радуйтеся, святии вси земли Саратовския, земли нашея небеснии предстателие.
Икос:Ангели земнии и человецы небеснии вемы вас, о святии вси чудотворцы Саратовстии, подвиги своими Православие в той утвердившия и мощьми своими ю освятившия. И како язык человечь возможет по достоянию восхвалити вы? Но обаче приимите от нас похвалы сицевая: радуйтеся, святителие святыя, яко правила веры и добродетелей учителие явльшияся; радуйтеся, отцы преподобнии, постничества подвиги и труды молитвенными просиявшия; радуйтеся, священномученицы дивнии, у Престола Божия на земли предстоявшия и путем страстотерпческим ко Престолу Пресвятыя Троицы прешедшия; радуйтеся, Христовы новии мученицы, яко заколение непорочное от земли нашея принесшияся и кровьми своими тую освятившия; радуйтеся, праведницы блаженнии, вы бо слышати глас Господень: приимите славу Мою, юже даде Ми Отец, сподобитеся; радуйтеся, вы бо есте раби Спасовы блазии и вернии; радуйтеся, святии вси земли Саратовския, земли нашея небеснии предстателие.
Седален, глас 4:Яко подобницы честнии Христовы, приснии Божии друзи и доблии венечницы да почтутся от нас песньми похвальными святии вси, в земли Саратовстей просиявшия, дерзновение ко Спасу стяжавшия, молитвам нашим немощным усерднии пособницы, от всяких лютых ограждающия ны.
Слава, и ныне:Притецем днесь, людие, ко Спасителеву Образу нерукотворенному, чрез той бо токи чудес неисякаемыя граду нашему излияшася, и велегласно возопиим: Многомилостиве и Всещедре Господи, Образ давый Свой граду Саратову, недвижим и невредим той сохрани и, молитвами всех святых его, верным даруй мир Твой и велию милость.
Песнь 4Ирмос: Божественное Твое разумев истощание прозорливо, / Аввакум, Христе, со трепетом вопияше Тебе: / во спасение людей Твоих / спасти помазанныя Твоя пришел еси.
Милости исполнен сый, всеблаженне отче Александре [9], люди от Церкви отвращенныя кротостию и о заповедех Господних ревнованием на путь покаяния наставлял еси. Сего ради и Господь тебе даром чудес украси и предстателя земли нашея яви.
Любве ради Божественныя к земли чуждей устремился еси, Гурие [10] всеблаженне, земли отдаленней и языку Христа не ведущему послужити вседушевне желая, темже апостольства почесть приял еси, горнему званию повнуяся, просветителю сущих во тме нечестия.
Иже первее раскола и лжеучений обличителю, и жизни во Христе ревнителю теплейший, Иларионе [11], показася мирови недугов душевных целитель всеусерднейший, язвы сердца человеческаго силою Божиею врачуя, в вертограде обители Оптинския пристанище тихое обретый и нас на спасения путь словесы своими наставляя.
Богородичен: Странное чудо зрим о Тебе, Отроковице: како Безконечный от утробы Твоея Отроча младо бывает, како Безсмертия источник в смертность нашу облекается, како дерзновение Матернее употребляюще, Судии Крайняго милосердие к нам доныне ходатайствуеши.
Песнь 5Ирмос: Одеяйся светом яко ризою, / к Тебе утренюю и Тебе зову: / душу мою просвети омраченную, Христе, / яко Един Благоутробен.
Адаманта твердейша воистину показася нам верность ваша, новомученицы добропобеднии земли Саратовския, вас ни заточения, ни страдания, ни самая смерть от любве не возмогоша разлучити, яже о Христе Сладчайшем, Господе нашем.
Рекоша ваша честнии уста: несумненно веруем и вслух народа Божия сия свидетельствуем, яко небесных сладчайших обителей желаем и жизни вечныя улучити уповаем. Убиение телесе жизнь нам воистину, страдания же и муки временныя путь наш ко Христу Сладчайшему, Избавителю душ наших.
Авелю древлему уподобишася, Германе [12] честный, Вольска славнаго первопастырю, и Михаиле [13] милосердный, сирот и убогих евангельски напитавший, дела ваша добрая Небеса вам отверзоша, мы же песнь вам принесем всеусердне, славящим Христа Человеколюбца.
Богородичен: Таинственне Огнь Божественный прияла еси во утробу Свою, Мати Слова и Дево, молитву с новомученики добропобедными излей к Сыну и Богу Твоему, да огня нас избавит вечнаго.
Песнь 6Ирмос: Обыде мя бездна, / гроб мне кит бысть, / аз же возопих к Тебе, Человеколюбцу, / и спасе мя десница Твоя, Господи.
От юности Христа возлюбили есте, святии мученицы, Страстем Его подражати уповающе, в терпении своем от Онего же укрепляеми, всякое место и град кровьми своими обагриша, и телеса своя страдальческая, яко семя веры нам дароваша.
Воине Христов доблественный Константине [14], раскола всеусердный обличителю, жизнь твоя честна и кончина твоя непорочна, словесем твоим свидетельство мучения твоя явишася, темже нетлением мощи твоя прослави Бог, душетленныя пагубы нас молитвами твоими избавляяй.
Сердце твое очистися, отче Иоанне [15], во огни гонения, и дух прав обновися во утробе твоей, злостраданием очищенней, сего ради глас твой к Богу Живу возвысися от пустыни безбожныя, и жертва твоя чиста прията бысть в пренебесный жертвенник Господень.
Богородичен: Купина неопалне горящая и не сгарающая образ бысть Твоего девства и чистоты, Марие Богоневестная, огради и нас предстательством Твоим огня страстей и искушений и бед, находящих на ны.
Кондак и икос воскресные.
Песнь 7Ирмос: Превозносимый отцев Господь / пламень угаси, отроки ороси, / согласно поющия: / Боже, благословен еси.
Измлада служити Богови вожделевый, ко алтарю Господню всеусердне потщался еси, святителю всечестне Феофане [16], и овцы словесныя словом своим добре упасл еси, течение же твое мученически во стране полунощней скончал еси, со паствою твоею и чады твоими взывая: Боже, благословен еси.
Яко древле Стефану перводиакону, отверзе ти Господь в последняя дни сия Небесная врата, отче Петре [17], диаконе всечестне, силы Божия и веры исполнен сый, во узех и работех горцех выну воспевая: Боже, благословен еси.
Призвание Господне разумевый, не ниву чувственную, но пажить словесную возделати потщался еси, отче Космо [18], священства достоинство в гонениих приемый, и онаго ничимже посрами, и даже до часа смертнаго верным Господеви пребыл еси, взывая: Боже, благословен еси.
Богородичен: О Пречистая Мати Божия, Небесный Хлеб Сына Твоего и Бога нашего на руках Своих носившая, не остави нас, непотребных, крепким Твоим предстательством, да с Тобою вместе возопием, спасаемии: Боже наш, благословен еси.
Песнь 8Ирмос: Из Отца прежде век рожденнаго Сына и Бога / и в последняя лета воплощеннаго от Девы Матере, / священницы, пойте, / людие, превозносите во вся веки.
Христу Пастыреначальнику последуя, пастве своей усердно послужил еси, и в час испытания огненнаго уст своих ложным свидетельством не осквернил еси, Дионисие [19], но небесною помощию укрепляемь, глаголал еси, яко Бога нашего достойно есть воспевати и превозносити во вся веки.
Воинства земнаго помощниче, Царю Небесному в лице мученичестем ввоинился еси, святе Сергие [20], несть бо нам Бога нашего отвратитися, пред мучители возгласивый, ниже на ближняго нашего клеветы изрещи, но еже Господеви пети и превозносити Его во вся веки.
Аще и ввергоша дивнаго Иоанна [21] во узилище безбожнии гонители, но не возмогоша поколебати веры его, тесноту бо крайнюю вмени сей яко росу благодати Божия, взывая от изнеможения своего: Господа пойте, людие, и превозносите Его во вся веки.
Богородичен: Лики торжествующе составим, пети Матери Господа нашего дерзающе, аще и не довлеет похвале сей словеса человеческия, но яко Благая сущи, сия от нас приими, да воспоем Сыну Твоего и превознесем Его во веки.
Песнь 9Ирмос: Исаие, ликуй, / Дева име во чреве и роди Сына Еммануила, / Бога же и Человека, Восток имя Ему, / Егоже величающе, Деву ублажаем.
Ублажим ныне Иоанна [22], Николая [23] и Петра [24], класы зрелейшия земли нашея, от степей Казахстанских в житницу Небесную приятыя, кровьми своими ризы своя убелившия, почести горняго звания восприявшия, и у Престола Божия за ны грешныя предстательствующия.
Память совершая днесь святых земли Саратовския, пение благодарственное принесем Богу, дивному во святых Своих, доныне землю нашу не оставляющему, но светом Царствия Небеснаго чрез сих молитвенников наших души наша озаряющаго.
Троичен: О Триипостасне Боже, Алфо и Омего нашего спасения, землю нашу светом Крещения просветивый и сонм святых от нея воздвигнувый, приими ныне молитвы сих, о нас грешных приносимыя, да мир Небесный и земный улучим и спасение душам нашим.
Богородичен: Юнице Божия, Агнице чистая миру Агнца Божия родившая, Покров Твой честный простри нам, грешным, несть бо нам иныя помощи и инаго ограждения, токмо Матерния молитвы Твоя и к Сыну Твоему теплейшее предстательство.
СветиленСветила всесветлыя явишася на тверди церковней, святии славнии земли Саратовския, тму зловерия и нечестия просвещающия, Солнце Правды Христа возвещающия и верным всем путь неложный в Царствие Небесное указующия.
На хвалитех стихиры воскресны гласа.
Таже святых, глас 8.
Подобен: О, преславнаго чудесе:О, преславнаго чудесе! / От земли Саратовския святых сонм возсия, / и яко светильницы чистыя / на свещнице церковнем сии уставишася, / житием своим наше течение многоскорбное осиявающия, / во еже и нам по стопам их шествующе, // славы Царствия Небеснаго достигнути.
О, преславнаго чудесе! / Святыя земли Саратовския Престолу Божию ныне предстоят. / Се, святители преславныя, / народа церковнаго вернии блюстителие, / иноцы преподобнии и пресвитеры честнии, / мужие и жены всеславныя, / всякое звание и возраст и всякий чин, / ко Христу пришедшия и Истину соблюдшия, / ихже молитвами обрящем и мы милость // в день Судный.
О, преславнаго чудесе! / Святии новии мученицы, / в земли Саратовстей явленныя, / крови своя яко жертву чистую / пред лице Господне принесоша, / и тако ослабу велию Церкви нашей испросиша. / О страдальцы велицыи, / ходатайством вашим ко Господу // доныне заступайте нас.
Слава, стихира Евангельская.
И ныне, Богородичен, глас 2: Преблагословенна еси:
На ЛитургииБлаженна гласа, на 6, и святых, песнь 5-я, на 4.
Прокимен воскресный и святых, глас 4: Святым иже суть на земли Его удиви Господь вся хотения своя в них.
Апостол ко Евреом, зачало 330.
Аллилуиа гласа и святых, глас 4: Воззваша праведнии и Господь услыша их и от всех скорбей их избави их.
Евангелие от Матфеа, зачало 10.
Причастен: Радуйтеся, праведнии, о Господе, правым подобает похвала.
МолитваО божественный сонме крепкодушных страдальцев, новомученицы добропобеднии земли Саратовския! К вам, яко сродником нашим, ныне прибегаем, в день вашего общего торжества, и усердно молим: не оставите предстательством своим землю сию, юже кровьми своими страдальческими обагрили есте. Терпение изрядное во страдании своем показавшии, испросите нам у Господа мужества дар, во еже не уклонятися нам от пути заповедей Христовых, егда приидет и нам час испытаний нечаянных. Уста своя оградившия от льсти и глаголаний ложных, оградите сердца наша от помышлений суетных и ложных, по действу диаволю в нас порождаемых. Паству свою не оставившия во дни лютых обстояний, укрепите и ныне пастырей наших во еже право правити слово Христовой истины. Церкви Православныя не отвергшиеся, помозите ныне нам, ересями и расколы обуреваемым, да и мы пребудем выну во ограде двора овчаго и да будем единым стадом Единаго Пастыря. Прешедшия поприще земнаго вашего течения непостыдно и венцы победными увенчанныя во Царствии Небеснем, испросите у Господа и нам поможения на пути нашего многоскорбнаго жития, да прешедше порог смертный, возможем внити в светлый оный и неизглаголанный чертог, егоже уготовал Господь любящим Его, и тамо купно с вами прославим пречестное и великолепое Имя Отца и Сына и Святаго Духа, Троицы Единосущныя и Неразделимыя, во веки веков. Аминь.
ЗРИ: Аще прилучится память святых августа в 29 день, поем им службу в Неделю грядущую, праздника ради Предтечева.
Примечания:
[1] Свщмч. Ермоген, Патр. Московский и всея Руси (†1612, память 17 февраля и 12 мая)
[2] Благов. Феодор I Иоаннович, Царь Московский (†1598, память 7 января)
[3] Свщмч. Гермоген (Долганёв), еп. Тобольский и Сибирский (†1918, память 16 июня)
[4] Свят. Иннокентий (Смирнов), еп. Пензенский и Саратовский (†1819, память 10 октября)
[5] Муч. Александр (Медем; †1931, память 10 ноября)
[6] Прпмч. Нифонт (Выблов) священноинок (†1931, память 10 ноября)
[7] Прпмч. Феодор (Богоявленский) священноинок (†1943, память 6 июля)
[8] Свят. Виктор (Островидов) исп., еп. Глазовский и Воткинский (†1934, память 19 апреля и 18 июня)
[9] Прав. Александр (Юнгеров), пресвитер Чагринский (†1900, память 22 декабря и 9 июня)
[10] Свят. Гурий (Карпов), архиеп. Таврический и Херсонский (†1882, память 17 марта)
[11] Преп. Иларион (Пономарев) иеросхимонах, старец Оптинский (†1873, память 18 сентября и 11 октября)
[12] Свщмч. Герман (Косолапов), еп. Вольский (†1919, память 27 сентября)
[13] Свщмч. Михаил (Платонов) пресвитер (†1919, память 27 сентября)
[14] Свщмч. Константин (Голубев) пресвитер (†1918, память 19 сентября)
[15] Свщмч. Иоанн (Днепровский) пресвитер (†1937, память 2 декабря)
[16] Свщмч. Феофан (Ильменский), еп. Соликамский (†1918, память 11 декабря)
[17] Свщмч. Петр (Кравец) протодиакон (†1937, память 20 октября)
[18] Свщмч. Косма (Петриченко) пресвитер (†1937, память 3 ноября)
[19] Свщмч. Дионисий (Щёголев) пресвитер (†1937, память 10 ноября)
[20] Свщмч. Сергий (Кудрявцев) пресвитер (†1937, память 2 декабря)
[21] Свщмч. Иоанн (Миротворцев) пресвитер (†1938, память 5 марта)
[22] Свщмч. Иоанн (Заседателев) пресвитер (†1942, память 16 октября)
[23] Свщмч. Николай (Амасийский) пресвитер (†1938, память 13 декабря)
[24] Свщмч. Петр (Покровский) пресвитер (†1937, память 17 декабря)