Служба преподобной Елене Киевской
Текст бденной службы преподобной Елене, инокине Флоровской, предоставлен для публикации ее автором, eliyahy, клириком г. Одессы.
СЛУЖБА
преподобной матери Елене Киево-Флоровской
НА ВЕЛИЦЕЙ ВЕЧЕРНИ
На Господи, воззвах: стихиры на 8, глас 4:Днесь возсия нам пресветлая память твоя, / Елено Богомудрая, / мати инокиням, Христова невесто, / ученьми святителя Тихона Задонскаго воспитана,/ землю Русскую чудесы своими просветила еси,/ силою Духа Святаго просвещенна,/ Егоже моли о творящих любовию память твою.
Приидите, вернии, / песньми хвалебными почтим преподобную Елену, / присную о нас к Богу молитвенницу, / Воронежския земли преславное прозябение, / града Киева покров и верное охранение, / обители Флоровския богодарованное сокровище / и всем христианом скорое вспоможение и заступление.
Преподобная мати Елено, / твоя преславная память постницам украшение, / твоим бо житием чудес Христос благодать дарует / с верою приходящим к раце мощей твоих, / Егоже моли даровати душам нашим / мир и велию милость.
Земную славу и красная мира презрела еси, / достоблаженная мати Елено, / острою одеялася еси власяницею, / странствия, гонения и болезни претерпела еси / будущего ради наслаждения, / еже ныне получивши / и Престолу Владыхи Христа предстоящи, / помяни и нас, мати преподобная.
Ины стихиры, глас 2:Девства чистотою украсивши душу твою, / преподобная мати Елено, / благородство плотское усугубила еси душевною красотою, / со светельником горящим возшла еси во дворы Господа твоего, / Егоже моли непрестанно, / да и мы сподобимся причтени быти к лику избранных Его.
Заповеди Господни от юности возлюбивши, / досточудная мати Елено, / многим была еси наставница монашескаго жития, / многи ко Христу привела еси; / темже днесь празднующе всечестную память твою, / возхваляем Бога, прославляющаго святыя Своя.
Преподобная мати Елено, / ни кая скорбь возможе отлучити тя от любве Христовы: / ни гонения, ни странствия, ни крова лишение, / ни злоба бесовская, ни зависть человеческая - / вся сия претерпевши, / очистилася еси от привременных, яко злато в горниле, / и духовными дарми обогатилася еси, достоблаженная, / от тех подающи нам велия милости.
Радостно совершающе память твою, / преподобная мати Елено, / прославляем дивныя подвиги твоя, / на молитвенный покров твой уповаем, / исцеления душевная и телесная приемлем, / Христа непрестанно величающе.
Слава, глас 1:Возвеличаем днесь, вернии, всеблаженную Елену, / сия бо от младенства Христову красоту возлюбила еси, / наученьми Задонскаго святителя Тихона утверждаема, / духовною пищею насладитися паче всех вожделела еси, / земныя красоты не восхотела еси, / и бысть Небесным Силам собеседница, / с ними же ныне у Престола Божия ликовствующе, / молится о всех почитающих святую память ея.
И ныне, Богородичен: Всемирную славу:
Вход. Прокимен дня и чтения 3 преподобническия.
На литии сихира, глас 5.
Подобен: Радуйся:Радуйся, преподобная мати, / в скорбех утешительница скорая, / в напастех помощница, / болезней всечудная целительница, / призри днесь на моления наша / и прилежно молися Христу Богу / даровати нам мир и велию милость.
Слава, глас и подобен тойже:Радуйся, блаженная мати Елено, / жилище Духа Святаго, / сосуде избранный Божия благодати, / настави всех нас ходити путем Христовым / и приклонися днесь к гласом хвалебным, / имиже чествуем святую память твою, / и помяни нас в молитвах твоих ко Господу, / и испроси нам у благости Его велию милость.
И ныне, Богородичен, глас и подобен тойже:Радуйся, пророческая печате / и богогласных апостолов проповедание: / Бога бо воистину сущаго воплощена, / паче ума и слова родила еси, Чистая, / Имже первое восприимше благородие / и райския пищи наслаждающеся, / Тебе ходатаицу таковыя светлости / и молитвенницу благоприятну песньми почитаем. / Тобою, Пречистая, обогатившеся, / присносущныя сподобляемся жизни Сына Твоего, / подающаго богатно велию милость.
На стиховне стихиры, глас 2.
Подобен: Доме Евфрафов:Дом и жилище / Пресвятому Духу / была еси, мати Елено, / просветивши свою душу / благодатию Утешителя.
Стих: Честна пред Господем / смерть преподобных Его.
Прославим, вернии, / иже во граде Киеве / Богомудрую Елену, / нищетою духовною / благодать Господню стяжавшую.
Стих: Что воздам Господеви о всех, / яже воздаде ми?
Молитвою и терпением, / паче же ко Господу любовию / стяжала еси дарования духовная, / чудесами украсившеся, / мати Елено блаженная.
Слава, глас и подобен тойже:Услыши наша моления, / преподобная мати Елено, / любовию к тебе прибегающих, / и сердечная подавай прошения / чтущим святую память твою.
И ныне, Богородичен, глас и подобен тойже:Прославляем Тя, Пресвятая Дево, / во удел Свой Киев-град избравшую / и сонм святых в нем ко Христу приведшую, / с ними же Елену пречудную, / юже днесь всечестно ублажаем.
Тропарь, глас 1:От юности нищету Христову возлюбивши / и крест скорбей и странствий восприимши, / славу и богатство нивочтоже вменила еси, / Богомудрая мати Елено, / моли Христа Бога / спастися душам нашим.
НА УТРЕНИ
На Бог Господь: тропарь преподобной, дважды. Слава, и ныне: Гавриилу вещавшу:
По 1-м стихословии седелаен, глас 3:Днесь призывает нас обретение честных мощей твоих,/преподобная мати Елено, / светло праздновати память твою,/ днесь вси людие веселятся, / приимше тя заступницу пред Господем./ Ты же, о блаженная, молися о нас, / верою и любовию тя почитающих.
Слава, и ныне, Богородичен:Свет, от Света происходяй, во Твою Девичу утробу вниде / и плотию обложися недомысленно и несказанно, / рождеством же Его вся тварь обновися и идольская лесть разорися. / Тем молим Тя, Пречистая: / моли, да спасет души наша.
По 2-м стихословии седален, глас 7:Доблественне Богу работавши, / злокозненнаго врага низложила еси / и в терпении мнозе земное житие препроводила еси, / преподобная мати Елено, / и ныне радостно предстоиши Престолу Господню, / молящися о всех нас.
Слава, и ныне, Богородичен:Труждает мя буря греховная / и возмущение безместных помышлений: / умилосердися, Всенепорочная, / и руку помощи, яко Милосердная, простри ми, / да величаю Тя, спасаемый.
Величание:Ублажаем тя, / преподобная мати Елено, / и чтим святую память твою, / ты бо молиши о нас / Христа, Бога нашего.
Псалом избранный:1. Терпя потерпех Господа, и внят ми, и услыша молитву мою. 2. Бог нам Прибежище и Сила, Помощник в скорбех, обретших ны зело. 1. Многи скорби праведным и от всех их избавит я Господь. 2. Приведутся Царю девы, приведутся в веселии и радовании. 1. Девы да восхвалят имя Господне. 2. Пролию пред Ним моление мое, печаль мою пред Ним возвещу. 1. Колена моя изнемогосте от поста, и плоть моя изменися елея ради. 2. Утрудихся воздыханием моим, слезами постелю мою омочу. 1. Се удалихся, бегая, и водворихся в пустыни, чаях Бога, спасающаго мя. 2. Сеющии слезами радостию пожнут.
По полиелеи седален, глас 8:Всеславная Христова невесто, Елено преблаженная, / постническими подвиги своими / все плотское мудрование умертвивши, / всякими добродетельми украсила еси житие твое / и к Богу дерзновение стяжала еси, / Емуже прилежно молися / помиловатися душам нашим.
Слава, и ныне, Богородичен:Тя надежду, прибежище и Предстательницу обретше, вернии, / к Тебе притекаем и прилежно вопием: / помилуй, Богородице, на Тя уповающия / и прегрешений оставление нам испроси / молитвами Твоими, Пречистая.
Степенна, 1-й антифон 4-го гласа.Прокимен, глас 4: Восхвалятся преподобнии во славе / и возрадуются на ложах своих. Стих: Воспойте Господеви песнь нову, / яко дивна сотвори Господь.
Всякое дыхание: Евангелие от Матфея, зачало 104.
По 50-м псалме стихира, глас 6:Приидите, вси чистоты рачителие, / согласно воспоим Елену преславную: / издетска бо возлюбивши чистоту, / непорочное девства сокровище сохранила есть, / телесную красоту постническими труды увядивши, / душу же украсивши благообразием добродетелей. / Темже ангельски на земли поживши / и во гробе наставника своего святителя Тихона упокоившеся, / со Ангелы ныне ликует в обителех Небесных / и молится о душах наших.
Канон Богородицы со ирмосом на 6 и преподобной канон на 8, глас 2.
Песнь 1Ирмос: Грядите, людие, / поим песнь Христу Богу, / раздельшему море, / и наставльшему люди, яже изведе из работы египетския, / яко прославися.
Прославляюще Господа, усты немолчными восхвалим днесь Елену блаженную, средь земнаго суетства Небесныя славы взыскавшую и в Царствии Христовом ныне о нас молящуюся.
Родительский дом в юности оставила еси, мати преподобная Елено, и сокрылася еси от метежа мирскаго во обители Господней, желанием всем и тщанием обратившеся ко единому Содетелю.
Исполнилася еси, мати, Божественнаго Духа и, яко свеща от свещи воспламенилася еси огнем любови ко Господу от души наставника твоего святителя Тихона Задонскаго, земное презревши и на Небесное взирающи.
Богородичен: Светлыми лучами Твоего Сына, Богородице, просвети омраченную мою душу, страстей смущение отжени, Твоими, Чистая, ходатайствы.
Песнь 3Ирмос: На камени мя веры утвердив, / разширил еси уста моя на враги моя. / Возвесели бо ся дух мой, внегда пети: / несть свят, якоже Бог наш, / и несть праведен паче Тебе, Господи.
Небесная возлюбивши, вся красная мира сего оставила еси, преподобная, и, во обитель всельшися, неленостными труды постничества Богу угодила еси, Елено славная. Егоже моли спастися душам нашим.
Огнем божественныя любве и благодатию Святаго Духа вопитавшися, на высоту добродетелей востекла еси, мати Елено всечудная, ихже стезею шествовати и нас укрепи молитвами твоими.
Шествовала еси, мати, узким путем терпения скорбей и лишений многих, благодарно и радостно воспевающе Спасителю твоему: несть свят, якоже Бог наш, и несть праведен паче Тебе, Господи.
Богородичен: Прогоняющее оружие грехи и страсти души моея буди, Дево, и покажи мя, якоже другий рай, безнаветен и соблюден Тобою и приносящий цветы Духа.
Седален, глас 3:Явилася еси, мати преподобная Елено, / во граде Киеве, яко солнце иное, / озаряющи верных лучами чудес твоих / и исцеления подающи всем, с верою приходящим к тебе / и мощем твоим кланяющимся, и вопиющим ти: / радуйся, в мире благочестно живущих похвало и монашествующих украшение.
Слава, и ныне, Богородичен:Пречистыя Твои руце, Дево Мати, простерши, / покрый уповающия на Тя и к Сыну Твоему зовущия: / всем подаждь, Христе, Твоя милости.
Песнь 4Ирмос: Пришел еси от Девы, / не ходатай, ни Ангел, / но Сам, Господи, воплощся, / и спасл еси всего мя человека. / Тем зову Ти: / слава силе Твоей, Господи.
Евангельским словесем внемлющи, крест иноческаго жития на рамена твоя восприяла еси и Христу последовала еси усердно, мати Елено, инокиням наставница явилася еси, преподобная.
Нищету самовольну Христа ради стяжала еси, едино сокровище в житии имела еси, мати преподобная, - гроб святителя Тихона, и едиными добродетельми богатеющи.
Имеющи ум, безстрастием просвещен, мати Богомудрая Елено, Божественным смирением украшаема, дарования духовная прияла еси отгоняти духи и разрешати недуги, верою чтущим тя.
Богородичен: Возсия из утробы Твоея, Отроковице Неискусобрачная, Отчее сияние - Христос, и просвети вселенную, распинаемь, и бесовскую тьму потребил есть.
Песнь 5Ирмос: Света подателю и веков Творче, Господи, / во свете Твоих повелений настави нас; / разве бо Тебе иного бога не знаем.
Ежечастно волнами житейскими погружаеми и бурею искушений потопляеми, к тебе, мати Елено, прибегаем и тепле вопием: испроси у Бога душам нашим мир и спасение.
Изволением Божиим, яко сокровище многоценное, нетлением процветшия мощи твоя в земли обретошася, Елено святая, от них же подаеши всем богатая исцеления.
Любовию Божественною сердца людей согревала еси, мати Елено всечестная, таже милостынями и смирением главу прегордаго змия непрестанно сокрушала еси, от егоже наветов и нас соблюди твоими молитвами.
Богородичен: Закона исполнение, высшая Херувим, родила еси Божия Слова воплощена, Сына Единородна, Егоже о рабех Твоих умоли.
Песнь 6Ирмос: В бездне греховней валяяся, / неизследную милосердия Твоего / призываю бездну: / от тли, Боже, мя возведи.
Истинный Свет - Христос, яко звезду тя светозарную, показал есть, мати Елено всечестная, блуждающим во мраце путеводящую, во искушениих и вражиих наветех скорую помощницу.
Исцеления недужным источают святыя твоя мощи, мати Елено, и сих демони трепещут, ихже насилия свободи и нас твоими богоприятными молитвами.
Попечения сугубаго о тебе и явления святителя Тихона сподобилася еси, мати блаженная, егда утеши тя Задонский чудотворец от скорби велией, сподвижницу в трудех твоих пославше ти - Евгению, инокиню всечестную.
Богородичен: Милости Твоея, Богородице, сподоби мя, премилостиваго Слова рождшая, своею кровию от тли человеки избавльшаго.
Кондак, глас 4:Наставленьми святителя Тихона просвещена, / лесть мира сего отринула еси, / преподобная мати Елено, / и, якоже некое сокровище,/ гроб Задонскаго святителя сохраняла еси, / в немже и по преставлении упокоившися, / жизнь вечную наследовала еси, мати достоблаженная, / и точиши чудеса неоскудно, / память твою почитающим любовию.
ИкосВозсияла еси, яко пресветлая звезда, во граде Киеве, преподобная мати Елено, чистым и непорочным твоим житием, посреде инокинь совершенными твоими труды и подвиги прославилася еси: скорби многоразличныя, гонения и скитания, зависть людскую и злобу бесовскую мужественне претерпевши, взошла еси к Вышнему граду, радующися и веселящися. И ныне честныя твоя мощи, аки сокровище многоценное, явишася, на исцеление всем, приходящим с верою и память твою почитающим любовию.
Песнь 7Ирмос: Телу златому премудрыя дети не послужиша, / и в пламень сами поидоша, / и боги их обругаша, / среди пламене возопиша, и ороси я Ангел: / услышася уже уст ваших молитва.
Радовашеся душа твоя, мати Елено, егда по мнозех летех скитаний обрела еси утешение во обители Флоровстей, еяже добродетельми и чудесы своими обогатила еси.
Избавление от бед и скорбей молитвами твоими испроси нам, чтущим память твою, мати Елено, да взываем: благословен еси, Боже отец наших.
Молитву, воздержание и любовь стяжавши, мати преподобная Елено, иноческаго жития образ явилася еси, в немже преуспевати пособствуй всем, во обители Флоровстей живущим, присным ходатайством твоим.
Богородичен: Тьмою лютою жития объят быв, соскорбящаго и сболезнующаго не обретох: Твоею, Дево, светлостию разреши тьму прегрешений и озари пети Тебе, Благословенная, Яже Бога плотию рождшая.
Песнь 8Ирмос: Пещь иногда огненная в Вавилоне действа разделяше, / Божиим велением халдеи опаляющая, / верныя же орошающая, поющия: / благословите, вся дела Господня, Господа.
Имать тя заступницу и молитвенницу всяк притекающий к тебе, мати достославная Елено, от напастей бо и бед изымаеши святыми твоими молитвами.
Егоже от юности всем сердцем возлюбила еси, Христа Бога, Тому во всей жизни усердно поработала еси, мати преподобная, средь многих скорбей прерадостно взывающи: благословите, вся дела Господня, Господа.
Лишения терпящи и точащи слезы, яко ароматы, облаговонилася еси, яко миро многоценное, и возвеличилася еси в терпении твоем пречудном, и Богу принеслася еси дева нерастленна.
Богородичен: Славы Отчую зарю рождши, Богородице, безславием прегрешений сетующее сердце мое уясни, и славы присносущныя покажи мя причастника, яко да верою славлю Тя.
Песнь 9Ирмос: Безначальна Родителя Сын, Бог и Господь, / воплощься от Девы нам явися, / омраченная просветити, / собрати расточенная: / тем всепетую Богородицу величаем.
Единомудренно и благочестно вкупе со инокению Евгению пожила еси, мати Елено, в возлюбленной тобою обители Флоровстей и преставилася еси в вечныя обители, отнюдуже призераеши на нас и посещаеши дивными чудесы.
Ныне с лики Ангельскими на Небесех предстоиши Владыце всех, всечестная мати Елено, молящи о граде твоем и обители, и о чтущих верою святую память твою, недугующим же подающи исцеление от честных мощей твоих, тем тя поем и величаем.
Образ твой святый целуем, воспоминающе болезни и скорби твоя, таже добродетельное и равноангельное житие твое, мати Елено славная, и, яко живей тебе сущей с нами приносим похвалы сия и молитв твоих просим.
Богородичен: Нам, поющим Тя и верою славящим, и божественному Твоему покрову присно притекающим, подаждь с Небесе разрешение лютых и мучащих страстей, Богоневесто, и муки и суда избави.
Светилен:Предстоще ныне Трисиянному Великому Свету и пребывающе в неизреченней светлости со всеми святыми, мати Елено Богомудрая, помяни всех нас, память твою светоносно совершающих.
Слава, и ныне, Богородичен:Света Превечнаго родила еси нам, Христа, Бога нашего, Пречистая Дево, избавльшаго весь мир от лести диавола. Темже молим Тя: не престай молящи, да подаст нам милость Свою в День Судный.
На хвалитех стихиры, глас 1.
Подобен: Небесных чинов:Небесных чинов радование / и земнородных всеславное похваление, / преблаженная мати Елено, / в твою священную память / верных собрание благословением осени, / и чудес твоих благодать нам даруй, / и Христу Богу молися / даровати душам нашим мир и велию милость.
Солнца светлейши / священная возсия память твоя, / досточудная мати Елено, / пресветлыми светлостьми озаряющи всех, / подвиги твоя почитающия. / Не престай моляся, блаженная, / Прославлюшему святую память твою / и чудес сокровище тя всем Даровавшему.
Небеснии чини сретоша тебе, / и правдных собори возвеселишася, / и от Вседетельныя десницы Владычни венчалася еси, / мати Елено всечестная, / темже достойно тя величаем / и раку, идеже лежит честное тело твое, / источник вемы чудес, / к нейже притекающе, от всякия скверны и страстей избавляемся.
Воздержанием многим / мудрования плоти умертвила еси, / преподобная мати Елено, / душу украсив одеждею безстрастия, / слезныя капли с непрестанною молитвою совокупила еси, / прешед умом к Благому Промыслителю, / от Негоже испроси нам велию милость.
Слава, глас 8:Приидите, христоименитии людие, / усердно вси стецемся, / верно торжествуем честную память матери предивной, / песньми воспевающе всечестное и равноангельное житие ея, / и, многоцелебную и чудотворную раку ея обстояще, / любезно лобызаем, глаголюще: / радуйся, Богомудрая мати Елено, / града Киева благодатное прославление; / радуйся, монашествующих и мирских спасения ходатаица; / радуйся, яко Троице предстоиши со Ангелы, / Ея же непрестанно моли о нас, / любовию совершающих память твою.
Слава, и ныне, Богородичен, глас тойже:Владычице, приими молитвы раб Твоих / и избави нас / от всякия нужды и печали.
Славословие великое и отпуст.
НА ЛИТУРГИИ Блаженны от канона песнь 3-я и 6-я. Прокимен, глас 7: Честна пред Господем / смерть преподобных Его. Стих: Что воздам Господеви о всех, яже воздаде ми? Апостол к Галатом, зачало 213. Аллилуиа, глас 4: Праведник, яко финикс, процветет, / яко кедр, иже в Ливане, умножится. Стих: Насажденнии в дому Господни во дворех Бога нашего процветут. Евангелие от Матфея, зачало 18. Причастен: Девы да восхвалят имя Господне.
МолитваО преподобная и преблаженная мати Елено, скорая наша помощница и заступница, и неусыпная о нас молитвенница! Предстояще ныне святей иконе твоей (или: святым мощем твоим) и на сию (или: сии) со умилением взирающе, яко живей тебе, сущей с нами молимся усердно: приими славословия и прошения наша и принеси их ко Престолу Божию, яко дерзновение многое к Нему имущая. Испроси притекающим к тебе и всем православным христианом вечное спасение и временное благоденствие, на вся же благая дела и начинания наша щедрое благословение и от всяких болезней, бед и нападений вражиих избавление. Ей, Богомудрая мати наша! Тебе, предстоящей Престолу Божию, ведомы суть нужды наша духовныя и житейския: призри на нас матерним оком и твоими молитвами всякое зло от нас отврати, паче же злых и богопротивных обычаев умножение. Утверди же во всех веры согласное ведение, взаимную любовь и единомыслие, да всем житием нашим славится всесвятое имя Отца и Сына и Святаго Духа, Единаго Бога, в Троице покланяемаго, Емуже честь и слава во веки веков. Аминь.
СЛУЖБА
преподобной матери Елене Киево-Флоровской
НА ВЕЛИЦЕЙ ВЕЧЕРНИ
На Господи, воззвах: стихиры на 8, глас 4:Днесь возсия нам пресветлая память твоя, / Елено Богомудрая, / мати инокиням, Христова невесто, / ученьми святителя Тихона Задонскаго воспитана,/ землю Русскую чудесы своими просветила еси,/ силою Духа Святаго просвещенна,/ Егоже моли о творящих любовию память твою.
Приидите, вернии, / песньми хвалебными почтим преподобную Елену, / присную о нас к Богу молитвенницу, / Воронежския земли преславное прозябение, / града Киева покров и верное охранение, / обители Флоровския богодарованное сокровище / и всем христианом скорое вспоможение и заступление.
Преподобная мати Елено, / твоя преславная память постницам украшение, / твоим бо житием чудес Христос благодать дарует / с верою приходящим к раце мощей твоих, / Егоже моли даровати душам нашим / мир и велию милость.
Земную славу и красная мира презрела еси, / достоблаженная мати Елено, / острою одеялася еси власяницею, / странствия, гонения и болезни претерпела еси / будущего ради наслаждения, / еже ныне получивши / и Престолу Владыхи Христа предстоящи, / помяни и нас, мати преподобная.
Ины стихиры, глас 2:Девства чистотою украсивши душу твою, / преподобная мати Елено, / благородство плотское усугубила еси душевною красотою, / со светельником горящим возшла еси во дворы Господа твоего, / Егоже моли непрестанно, / да и мы сподобимся причтени быти к лику избранных Его.
Заповеди Господни от юности возлюбивши, / досточудная мати Елено, / многим была еси наставница монашескаго жития, / многи ко Христу привела еси; / темже днесь празднующе всечестную память твою, / возхваляем Бога, прославляющаго святыя Своя.
Преподобная мати Елено, / ни кая скорбь возможе отлучити тя от любве Христовы: / ни гонения, ни странствия, ни крова лишение, / ни злоба бесовская, ни зависть человеческая - / вся сия претерпевши, / очистилася еси от привременных, яко злато в горниле, / и духовными дарми обогатилася еси, достоблаженная, / от тех подающи нам велия милости.
Радостно совершающе память твою, / преподобная мати Елено, / прославляем дивныя подвиги твоя, / на молитвенный покров твой уповаем, / исцеления душевная и телесная приемлем, / Христа непрестанно величающе.
Слава, глас 1:Возвеличаем днесь, вернии, всеблаженную Елену, / сия бо от младенства Христову красоту возлюбила еси, / наученьми Задонскаго святителя Тихона утверждаема, / духовною пищею насладитися паче всех вожделела еси, / земныя красоты не восхотела еси, / и бысть Небесным Силам собеседница, / с ними же ныне у Престола Божия ликовствующе, / молится о всех почитающих святую память ея.
И ныне, Богородичен: Всемирную славу:
Вход. Прокимен дня и чтения 3 преподобническия.
На литии сихира, глас 5.
Подобен: Радуйся:Радуйся, преподобная мати, / в скорбех утешительница скорая, / в напастех помощница, / болезней всечудная целительница, / призри днесь на моления наша / и прилежно молися Христу Богу / даровати нам мир и велию милость.
Слава, глас и подобен тойже:Радуйся, блаженная мати Елено, / жилище Духа Святаго, / сосуде избранный Божия благодати, / настави всех нас ходити путем Христовым / и приклонися днесь к гласом хвалебным, / имиже чествуем святую память твою, / и помяни нас в молитвах твоих ко Господу, / и испроси нам у благости Его велию милость.
И ныне, Богородичен, глас и подобен тойже:Радуйся, пророческая печате / и богогласных апостолов проповедание: / Бога бо воистину сущаго воплощена, / паче ума и слова родила еси, Чистая, / Имже первое восприимше благородие / и райския пищи наслаждающеся, / Тебе ходатаицу таковыя светлости / и молитвенницу благоприятну песньми почитаем. / Тобою, Пречистая, обогатившеся, / присносущныя сподобляемся жизни Сына Твоего, / подающаго богатно велию милость.
На стиховне стихиры, глас 2.
Подобен: Доме Евфрафов:Дом и жилище / Пресвятому Духу / была еси, мати Елено, / просветивши свою душу / благодатию Утешителя.
Стих: Честна пред Господем / смерть преподобных Его.
Прославим, вернии, / иже во граде Киеве / Богомудрую Елену, / нищетою духовною / благодать Господню стяжавшую.
Стих: Что воздам Господеви о всех, / яже воздаде ми?
Молитвою и терпением, / паче же ко Господу любовию / стяжала еси дарования духовная, / чудесами украсившеся, / мати Елено блаженная.
Слава, глас и подобен тойже:Услыши наша моления, / преподобная мати Елено, / любовию к тебе прибегающих, / и сердечная подавай прошения / чтущим святую память твою.
И ныне, Богородичен, глас и подобен тойже:Прославляем Тя, Пресвятая Дево, / во удел Свой Киев-град избравшую / и сонм святых в нем ко Христу приведшую, / с ними же Елену пречудную, / юже днесь всечестно ублажаем.
Тропарь, глас 1:От юности нищету Христову возлюбивши / и крест скорбей и странствий восприимши, / славу и богатство нивочтоже вменила еси, / Богомудрая мати Елено, / моли Христа Бога / спастися душам нашим.
НА УТРЕНИ
На Бог Господь: тропарь преподобной, дважды. Слава, и ныне: Гавриилу вещавшу:
По 1-м стихословии седелаен, глас 3:Днесь призывает нас обретение честных мощей твоих,/преподобная мати Елено, / светло праздновати память твою,/ днесь вси людие веселятся, / приимше тя заступницу пред Господем./ Ты же, о блаженная, молися о нас, / верою и любовию тя почитающих.
Слава, и ныне, Богородичен:Свет, от Света происходяй, во Твою Девичу утробу вниде / и плотию обложися недомысленно и несказанно, / рождеством же Его вся тварь обновися и идольская лесть разорися. / Тем молим Тя, Пречистая: / моли, да спасет души наша.
По 2-м стихословии седален, глас 7:Доблественне Богу работавши, / злокозненнаго врага низложила еси / и в терпении мнозе земное житие препроводила еси, / преподобная мати Елено, / и ныне радостно предстоиши Престолу Господню, / молящися о всех нас.
Слава, и ныне, Богородичен:Труждает мя буря греховная / и возмущение безместных помышлений: / умилосердися, Всенепорочная, / и руку помощи, яко Милосердная, простри ми, / да величаю Тя, спасаемый.
Величание:Ублажаем тя, / преподобная мати Елено, / и чтим святую память твою, / ты бо молиши о нас / Христа, Бога нашего.
Псалом избранный:1. Терпя потерпех Господа, и внят ми, и услыша молитву мою. 2. Бог нам Прибежище и Сила, Помощник в скорбех, обретших ны зело. 1. Многи скорби праведным и от всех их избавит я Господь. 2. Приведутся Царю девы, приведутся в веселии и радовании. 1. Девы да восхвалят имя Господне. 2. Пролию пред Ним моление мое, печаль мою пред Ним возвещу. 1. Колена моя изнемогосте от поста, и плоть моя изменися елея ради. 2. Утрудихся воздыханием моим, слезами постелю мою омочу. 1. Се удалихся, бегая, и водворихся в пустыни, чаях Бога, спасающаго мя. 2. Сеющии слезами радостию пожнут.
По полиелеи седален, глас 8:Всеславная Христова невесто, Елено преблаженная, / постническими подвиги своими / все плотское мудрование умертвивши, / всякими добродетельми украсила еси житие твое / и к Богу дерзновение стяжала еси, / Емуже прилежно молися / помиловатися душам нашим.
Слава, и ныне, Богородичен:Тя надежду, прибежище и Предстательницу обретше, вернии, / к Тебе притекаем и прилежно вопием: / помилуй, Богородице, на Тя уповающия / и прегрешений оставление нам испроси / молитвами Твоими, Пречистая.
Степенна, 1-й антифон 4-го гласа.Прокимен, глас 4: Восхвалятся преподобнии во славе / и возрадуются на ложах своих. Стих: Воспойте Господеви песнь нову, / яко дивна сотвори Господь.
Всякое дыхание: Евангелие от Матфея, зачало 104.
По 50-м псалме стихира, глас 6:Приидите, вси чистоты рачителие, / согласно воспоим Елену преславную: / издетска бо возлюбивши чистоту, / непорочное девства сокровище сохранила есть, / телесную красоту постническими труды увядивши, / душу же украсивши благообразием добродетелей. / Темже ангельски на земли поживши / и во гробе наставника своего святителя Тихона упокоившеся, / со Ангелы ныне ликует в обителех Небесных / и молится о душах наших.
Канон Богородицы со ирмосом на 6 и преподобной канон на 8, глас 2.
Песнь 1Ирмос: Грядите, людие, / поим песнь Христу Богу, / раздельшему море, / и наставльшему люди, яже изведе из работы египетския, / яко прославися.
Прославляюще Господа, усты немолчными восхвалим днесь Елену блаженную, средь земнаго суетства Небесныя славы взыскавшую и в Царствии Христовом ныне о нас молящуюся.
Родительский дом в юности оставила еси, мати преподобная Елено, и сокрылася еси от метежа мирскаго во обители Господней, желанием всем и тщанием обратившеся ко единому Содетелю.
Исполнилася еси, мати, Божественнаго Духа и, яко свеща от свещи воспламенилася еси огнем любови ко Господу от души наставника твоего святителя Тихона Задонскаго, земное презревши и на Небесное взирающи.
Богородичен: Светлыми лучами Твоего Сына, Богородице, просвети омраченную мою душу, страстей смущение отжени, Твоими, Чистая, ходатайствы.
Песнь 3Ирмос: На камени мя веры утвердив, / разширил еси уста моя на враги моя. / Возвесели бо ся дух мой, внегда пети: / несть свят, якоже Бог наш, / и несть праведен паче Тебе, Господи.
Небесная возлюбивши, вся красная мира сего оставила еси, преподобная, и, во обитель всельшися, неленостными труды постничества Богу угодила еси, Елено славная. Егоже моли спастися душам нашим.
Огнем божественныя любве и благодатию Святаго Духа вопитавшися, на высоту добродетелей востекла еси, мати Елено всечудная, ихже стезею шествовати и нас укрепи молитвами твоими.
Шествовала еси, мати, узким путем терпения скорбей и лишений многих, благодарно и радостно воспевающе Спасителю твоему: несть свят, якоже Бог наш, и несть праведен паче Тебе, Господи.
Богородичен: Прогоняющее оружие грехи и страсти души моея буди, Дево, и покажи мя, якоже другий рай, безнаветен и соблюден Тобою и приносящий цветы Духа.
Седален, глас 3:Явилася еси, мати преподобная Елено, / во граде Киеве, яко солнце иное, / озаряющи верных лучами чудес твоих / и исцеления подающи всем, с верою приходящим к тебе / и мощем твоим кланяющимся, и вопиющим ти: / радуйся, в мире благочестно живущих похвало и монашествующих украшение.
Слава, и ныне, Богородичен:Пречистыя Твои руце, Дево Мати, простерши, / покрый уповающия на Тя и к Сыну Твоему зовущия: / всем подаждь, Христе, Твоя милости.
Песнь 4Ирмос: Пришел еси от Девы, / не ходатай, ни Ангел, / но Сам, Господи, воплощся, / и спасл еси всего мя человека. / Тем зову Ти: / слава силе Твоей, Господи.
Евангельским словесем внемлющи, крест иноческаго жития на рамена твоя восприяла еси и Христу последовала еси усердно, мати Елено, инокиням наставница явилася еси, преподобная.
Нищету самовольну Христа ради стяжала еси, едино сокровище в житии имела еси, мати преподобная, - гроб святителя Тихона, и едиными добродетельми богатеющи.
Имеющи ум, безстрастием просвещен, мати Богомудрая Елено, Божественным смирением украшаема, дарования духовная прияла еси отгоняти духи и разрешати недуги, верою чтущим тя.
Богородичен: Возсия из утробы Твоея, Отроковице Неискусобрачная, Отчее сияние - Христос, и просвети вселенную, распинаемь, и бесовскую тьму потребил есть.
Песнь 5Ирмос: Света подателю и веков Творче, Господи, / во свете Твоих повелений настави нас; / разве бо Тебе иного бога не знаем.
Ежечастно волнами житейскими погружаеми и бурею искушений потопляеми, к тебе, мати Елено, прибегаем и тепле вопием: испроси у Бога душам нашим мир и спасение.
Изволением Божиим, яко сокровище многоценное, нетлением процветшия мощи твоя в земли обретошася, Елено святая, от них же подаеши всем богатая исцеления.
Любовию Божественною сердца людей согревала еси, мати Елено всечестная, таже милостынями и смирением главу прегордаго змия непрестанно сокрушала еси, от егоже наветов и нас соблюди твоими молитвами.
Богородичен: Закона исполнение, высшая Херувим, родила еси Божия Слова воплощена, Сына Единородна, Егоже о рабех Твоих умоли.
Песнь 6Ирмос: В бездне греховней валяяся, / неизследную милосердия Твоего / призываю бездну: / от тли, Боже, мя возведи.
Истинный Свет - Христос, яко звезду тя светозарную, показал есть, мати Елено всечестная, блуждающим во мраце путеводящую, во искушениих и вражиих наветех скорую помощницу.
Исцеления недужным источают святыя твоя мощи, мати Елено, и сих демони трепещут, ихже насилия свободи и нас твоими богоприятными молитвами.
Попечения сугубаго о тебе и явления святителя Тихона сподобилася еси, мати блаженная, егда утеши тя Задонский чудотворец от скорби велией, сподвижницу в трудех твоих пославше ти - Евгению, инокиню всечестную.
Богородичен: Милости Твоея, Богородице, сподоби мя, премилостиваго Слова рождшая, своею кровию от тли человеки избавльшаго.
Кондак, глас 4:Наставленьми святителя Тихона просвещена, / лесть мира сего отринула еси, / преподобная мати Елено, / и, якоже некое сокровище,/ гроб Задонскаго святителя сохраняла еси, / в немже и по преставлении упокоившися, / жизнь вечную наследовала еси, мати достоблаженная, / и точиши чудеса неоскудно, / память твою почитающим любовию.
ИкосВозсияла еси, яко пресветлая звезда, во граде Киеве, преподобная мати Елено, чистым и непорочным твоим житием, посреде инокинь совершенными твоими труды и подвиги прославилася еси: скорби многоразличныя, гонения и скитания, зависть людскую и злобу бесовскую мужественне претерпевши, взошла еси к Вышнему граду, радующися и веселящися. И ныне честныя твоя мощи, аки сокровище многоценное, явишася, на исцеление всем, приходящим с верою и память твою почитающим любовию.
Песнь 7Ирмос: Телу златому премудрыя дети не послужиша, / и в пламень сами поидоша, / и боги их обругаша, / среди пламене возопиша, и ороси я Ангел: / услышася уже уст ваших молитва.
Радовашеся душа твоя, мати Елено, егда по мнозех летех скитаний обрела еси утешение во обители Флоровстей, еяже добродетельми и чудесы своими обогатила еси.
Избавление от бед и скорбей молитвами твоими испроси нам, чтущим память твою, мати Елено, да взываем: благословен еси, Боже отец наших.
Молитву, воздержание и любовь стяжавши, мати преподобная Елено, иноческаго жития образ явилася еси, в немже преуспевати пособствуй всем, во обители Флоровстей живущим, присным ходатайством твоим.
Богородичен: Тьмою лютою жития объят быв, соскорбящаго и сболезнующаго не обретох: Твоею, Дево, светлостию разреши тьму прегрешений и озари пети Тебе, Благословенная, Яже Бога плотию рождшая.
Песнь 8Ирмос: Пещь иногда огненная в Вавилоне действа разделяше, / Божиим велением халдеи опаляющая, / верныя же орошающая, поющия: / благословите, вся дела Господня, Господа.
Имать тя заступницу и молитвенницу всяк притекающий к тебе, мати достославная Елено, от напастей бо и бед изымаеши святыми твоими молитвами.
Егоже от юности всем сердцем возлюбила еси, Христа Бога, Тому во всей жизни усердно поработала еси, мати преподобная, средь многих скорбей прерадостно взывающи: благословите, вся дела Господня, Господа.
Лишения терпящи и точащи слезы, яко ароматы, облаговонилася еси, яко миро многоценное, и возвеличилася еси в терпении твоем пречудном, и Богу принеслася еси дева нерастленна.
Богородичен: Славы Отчую зарю рождши, Богородице, безславием прегрешений сетующее сердце мое уясни, и славы присносущныя покажи мя причастника, яко да верою славлю Тя.
Песнь 9Ирмос: Безначальна Родителя Сын, Бог и Господь, / воплощься от Девы нам явися, / омраченная просветити, / собрати расточенная: / тем всепетую Богородицу величаем.
Единомудренно и благочестно вкупе со инокению Евгению пожила еси, мати Елено, в возлюбленной тобою обители Флоровстей и преставилася еси в вечныя обители, отнюдуже призераеши на нас и посещаеши дивными чудесы.
Ныне с лики Ангельскими на Небесех предстоиши Владыце всех, всечестная мати Елено, молящи о граде твоем и обители, и о чтущих верою святую память твою, недугующим же подающи исцеление от честных мощей твоих, тем тя поем и величаем.
Образ твой святый целуем, воспоминающе болезни и скорби твоя, таже добродетельное и равноангельное житие твое, мати Елено славная, и, яко живей тебе сущей с нами приносим похвалы сия и молитв твоих просим.
Богородичен: Нам, поющим Тя и верою славящим, и божественному Твоему покрову присно притекающим, подаждь с Небесе разрешение лютых и мучащих страстей, Богоневесто, и муки и суда избави.
Светилен:Предстоще ныне Трисиянному Великому Свету и пребывающе в неизреченней светлости со всеми святыми, мати Елено Богомудрая, помяни всех нас, память твою светоносно совершающих.
Слава, и ныне, Богородичен:Света Превечнаго родила еси нам, Христа, Бога нашего, Пречистая Дево, избавльшаго весь мир от лести диавола. Темже молим Тя: не престай молящи, да подаст нам милость Свою в День Судный.
На хвалитех стихиры, глас 1.
Подобен: Небесных чинов:Небесных чинов радование / и земнородных всеславное похваление, / преблаженная мати Елено, / в твою священную память / верных собрание благословением осени, / и чудес твоих благодать нам даруй, / и Христу Богу молися / даровати душам нашим мир и велию милость.
Солнца светлейши / священная возсия память твоя, / досточудная мати Елено, / пресветлыми светлостьми озаряющи всех, / подвиги твоя почитающия. / Не престай моляся, блаженная, / Прославлюшему святую память твою / и чудес сокровище тя всем Даровавшему.
Небеснии чини сретоша тебе, / и правдных собори возвеселишася, / и от Вседетельныя десницы Владычни венчалася еси, / мати Елено всечестная, / темже достойно тя величаем / и раку, идеже лежит честное тело твое, / источник вемы чудес, / к нейже притекающе, от всякия скверны и страстей избавляемся.
Воздержанием многим / мудрования плоти умертвила еси, / преподобная мати Елено, / душу украсив одеждею безстрастия, / слезныя капли с непрестанною молитвою совокупила еси, / прешед умом к Благому Промыслителю, / от Негоже испроси нам велию милость.
Слава, глас 8:Приидите, христоименитии людие, / усердно вси стецемся, / верно торжествуем честную память матери предивной, / песньми воспевающе всечестное и равноангельное житие ея, / и, многоцелебную и чудотворную раку ея обстояще, / любезно лобызаем, глаголюще: / радуйся, Богомудрая мати Елено, / града Киева благодатное прославление; / радуйся, монашествующих и мирских спасения ходатаица; / радуйся, яко Троице предстоиши со Ангелы, / Ея же непрестанно моли о нас, / любовию совершающих память твою.
Слава, и ныне, Богородичен, глас тойже:Владычице, приими молитвы раб Твоих / и избави нас / от всякия нужды и печали.
Славословие великое и отпуст.
НА ЛИТУРГИИ Блаженны от канона песнь 3-я и 6-я. Прокимен, глас 7: Честна пред Господем / смерть преподобных Его. Стих: Что воздам Господеви о всех, яже воздаде ми? Апостол к Галатом, зачало 213. Аллилуиа, глас 4: Праведник, яко финикс, процветет, / яко кедр, иже в Ливане, умножится. Стих: Насажденнии в дому Господни во дворех Бога нашего процветут. Евангелие от Матфея, зачало 18. Причастен: Девы да восхвалят имя Господне.
МолитваО преподобная и преблаженная мати Елено, скорая наша помощница и заступница, и неусыпная о нас молитвенница! Предстояще ныне святей иконе твоей (или: святым мощем твоим) и на сию (или: сии) со умилением взирающе, яко живей тебе, сущей с нами молимся усердно: приими славословия и прошения наша и принеси их ко Престолу Божию, яко дерзновение многое к Нему имущая. Испроси притекающим к тебе и всем православным христианом вечное спасение и временное благоденствие, на вся же благая дела и начинания наша щедрое благословение и от всяких болезней, бед и нападений вражиих избавление. Ей, Богомудрая мати наша! Тебе, предстоящей Престолу Божию, ведомы суть нужды наша духовныя и житейския: призри на нас матерним оком и твоими молитвами всякое зло от нас отврати, паче же злых и богопротивных обычаев умножение. Утверди же во всех веры согласное ведение, взаимную любовь и единомыслие, да всем житием нашим славится всесвятое имя Отца и Сына и Святаго Духа, Единаго Бога, в Троице покланяемаго, Емуже честь и слава во веки веков. Аминь.