Тропари, кондаки и молитва священномученику Петру (Звереву), архиепископу Воронежскому (†1929)
Тропарь, глас 4:
Верою пламенною апостолу Петру подобяся, / таже и трикратным слышанием воззвания Христова, / душу твою за того положил еси, святителю отче Петре, / каменю тверды Церкве православныя: / светильниче во мраце беззаконий добродетельми сияяй, радостию страдания за Христа претерпети изволил еси, / со исповедники и страстотерпцы российскими. / Молися с ними о нас, архиерею Божий, // священномучениче.
Ин тропарь, глас 4:
Добрый пастырю и строгий исполнитель заповедей Божиих, / ревнителю благочестия и столпе утверждения, / священномучениче Петре, / пребывая во отоце анзерстем, / в годину лютых гонений не убоялся еси исповедати веру Христову, / и претерпел еси дахе до смерти. / Ныне же, яко имея дерзновение и предстоя престолу Господню, / моли Христа Бога // спастися душам нашим.
Кондак, глас 8:
Во святительстве твоем добре подвизался еси богомудре, / и мученичества венцем светло украсился еси, / прещения врагов Христовых не устрашився, / кровьми твоими землю во отоце анзерстем освятил еси; / сего ради силы небесныя удивишася терпению твоему, / мы же с верою и любовию притекаем ко святым мощем твоим, досточудне. / Ныне со всеми соловецкими святыми моли о нас Христа Бога, всеблаженне Петре, да зовем ти: // Радуйся, отче приснопамятне.
Ин кондак, глас 6.
На любовь божественную всем сердцем отозвавыйся, / вся яже возмогл еси Благая, воздаде Тому, / златоустый правды Божия проповедниче, / златосердый хранителю Тайн Господних, / фавора славнаго святительское отражение, / голгофы анзерския жертво всесовершенная; / исповедниче Христов, священномучениче Петре, // поминай нас, любовию чтущих святую память твою.
Молитва.
О священная и многострадальная главо, земный ангеле и небесный человече, священномучениче и чудотворче Петре! Ты, архиерею великий, в годину лютых гонений явился еси церковное светило и истинныя веры утверждение, зане противу богоборцев дерзновенно Христа исповедал еси, и яко кадило благовонное, в жертву Богу себе самаго принесл еси. Яви нам, смиренным игрешным, ко святым мощем твоим (или святей иконе твоей) притекающым, многомощное твое заступление, и вкупе со всеми святыми, во отоце соловецтем просиявшими, испроси у Господа всякий дар, коемуждо благопотребен ко спасению. Се бо грех наших ради не имамы дерзновения ко Господу и Владыце нашему, и праведный гнев его на ны наведохом, и всякия милости недостойны сотворихомся. Темже не смеюще возвести очеса наша к высоте небесней, ниже молебный глас ко Господу, сердцем сокрушенным и смиренным духом тебе молитвенника благоприятнаго к Нему предлагаем, и просим тя со усердием велиим: буди заступник и ходатай наш пред Богом, Судиею праведнейшим, се бо выну прогневляем Его согрешении многими. Ныне убо, во славе небесней пребывая, и с лики святых непрестанно славословя пресвятое имя Господа, призри на нас грешных, и избави всех, верою несумненною к Богу приходящих, от всяких бед душевных и телесных, от всех томлений и прилогов диавольских: укроти волны страстей и искушений, востающих на ны, да ради святых твоих молитв не объимет нас напасть, и не погрязнем в пучине греховней и в тине страстей наших. Вознеси, богоносне отче наш, сие малое моление недостойных раб твоих Владыце Христу, да утвердит страждущую страну нашу Российскую в правой вере и благочестии, Церковь Святую да сохранит от ересей и расколов, и соблюдет невредимою от всякаго зла. Испроси у великодаровитаго Христа Бога нашего скорбящым утешение, недугующым исцеление, обидимым заступление, страждущым от бесов скорое свобождение, подшым во грехи покаяние и востание, от Церкве Христовой отпадшым вразумление и на путь спасения обращение. Ты мученически душу твою за веру положил еси, даруй и нам мужество во всем подражати тебе, да ничтоже в жизни сей временней возможет отлучити ны от любве Божия. О святителю Христов, посети место сие, страдании твоими честными освященное, и укрепи молитвами мвоими святую обитель Соловецкую, да процветет в ней ревность ко спасению и благочестие. Ты, непрестанно о часе смертнем память имевый, и благую часть избранных Божиих от Господа получивый, сподоби и нас в мире и покаянии живот свой скончати, и Царствия Божия наследниками быти, идеже ты водворяешися со ангелы и всеми святыми, хваля Бога в Троице славимаго, Отца, и Сына, и Святаго Духа во веки веков. Аминь.