Служба святителю Антонию (Смирницкому), архиепископу Воронежскому и Задонскому, чудотворцу (+1847)
Примечание: Служба святителю Антонию (Смирницкому), архиепископу Воронежскому и Задонскому, чудотворцу воспроизводится с оригенального текста, хранящегося в Благовещенском кафедральном соборе г. Воронеж. Молитвословия данной службы используются при совершении памяти святителя Антония в день его блаженной кончины - 20 декабря (2 января) в Благовещенском кафедральном соборе Воронежской епархии.
МЕСЯЦА ДЕКАБРЯ В 20-Й ДЕНЬ
ПРЕДПРАЗДСТВО ПО ПЛОТИ РОЖДЕСТВА ГОСПОДА БОГА И СПАСА НАШЕГО ИИСУСА ХРИСТА
И СВЯТИТЕЛЯ АНТОНИЯ, АРХИЕПИСКОПА ВОРОНЕЖСКАГО И ЗАДОНСКАГО, ЧУДОТВОРЦА.
На велицей вечерни.
Блажен муж:
На Господи, воззвах: стихиры на 8. Предпразднства 3 и святителя 5.
Стихиры святителя Антония, глас 2.
Подобен: Киими похвальными:
Киими похвальными гласы / величаем тя, святителю Антоние, / от юности всею душею Бога возжадавшаго / и паче всего службу церковную возлюбившаго, / тихостию нрава и смирением украшеннаго, / града Воронежа похвалу / и всея России светильника / тя бо воистину Христос Бог избра, / имеяй велию милость.
Киими достойными песньми / прославим тя, святителю Антоние, / мира тленнаго отрекшагося, / постника, не токмо телом, но и душею, / узким путем заповедей шествовавшаго, / града Воронежа похвалу / и всея России светильника, / тебе бо воистину Христос Бог благодать дарова, / имеяй велию милость.
Киими церковными хвалами / воспоем тя, святителю Антоние, / словом Божиим ум питавшаго, / и подвиги святых отец волю укрепльшаго, / молитвою сердечною чувства освятившаго, / града Воронежа похвалу / и всея России светильника, / тя бо воистину Христос Бог просвети, / имеяй велию милость.
Киими песненными добротами / воспоим тя, святителю Антоние, / пастыря монашествующих изряднаго, / перваго по чину, но всем всяко служившаго, / достойнаго тезоименника Антония первоначальника, / града Воронежа похвалу / и всея России светильника, / тя бо воистину Христос Бог умудри, имеяй велию милость.
Слава, глас 8:
Что тя наречем, святителю Антоние?/ Монахов украшение, / яко целомудрием, нищетою и послушанием / Богу всего себе предал еси; / архиереев похвалу, / яко душу твою за паству положил еси; / святителей Митрофана и Тихона достойна преемника, / яко светильник Церкве Воронежския утвердил еси. / Сего ради со дерзновением молися Христу Богу / о спасении душ наших.
И ныне, глас тойже: Восприми, Вифлееме:
Вход. Прокимен дне. И чтения святительская.
На литии стихира храма. Слава, Святителя Антония, глас 3:
Отче, святителю Антоние, / ты во дни смертоносныя язвы / и глада губительнаго, / умолял еси твоею святительскою молитвою, / о еже отступити наказанию Божию / ради покаяния всенароднаго, / сего ради и ныне моли усердно / о милости Божией к нам, / да избавимся от нашествия иноплеменных и безбожнаго гонения, / таже огненнаго запаления, / и неистовства водныя стихии, / глада хлебнаго и недорода / и иных бедствий, по грехом нашим находящим на ны. / Но да дарует Господь молитвами твоими / людем православным и всей стране Российстей / мир и велию милость.
И ныне, предпразднства от стиховны, глас 2: Се, время приближися:
На стиховне стихиры святителя, глас 2.
Подобен: Доме Евфрафов:
Дом добродетелей / и обитель Святаго Духа / явился еси, святе Антоние, / Воронежская похвало / и всея России украшение.
Стих: Священницы Твои облекутся в правду / и преподобнии твои возрадуются.
Пастырю добрый / и молитвенниче присный, / святе Антоние, / огради стадо твое / от волков, губящих е.
Стих: Восхвалятся преподобнии во славе / и возрадуются на ложах своих.
Бедствующих помощниче, / иже во узах за правду томящихся укрепление, / святче Божий Антоние, / не престай молитися / о призывающих тя.
Слава, глас 1:
Приидите, вернии, / прославим угодника Божия, / святителя Антония, / иже по преставлении от земных к небесным / чудесы сияет паче солнечных луч: / болящия исцеляет, / бедствующим помогает, / скорбящия утешает, / путешествующия охраняет, / немощныя в вере укрепляет, / неверующия вразумляет, / злонамеренныя наказует, / небрегущия о законе и правде обличает / и всем всяко ко спасению способствует. / Господи, слава Тебе.
И ныне, глас тойже: Предпразднуим, людие, Христово Рождество:
Тропарь, глас 4:
Предивного житель селения Божия Матере, / от Нея смирением изрядно украшаемь, / Воронежу третье светило благодати / святых Митрофана и Тихона сонаследниче, / святителю отче наш Антоние, / моли Милостиваго Бога, / граду твоему мир даровати // и душам нашим велию милость.
Ин тропарь, глас 4:
Правило веры и благочестия / был еси, святителю Антоние, / слово истины проповедуя / и о пастве твоей усердно моляся. / Сего ради дерзновение имеяй на Небеси, / и ныне моли Христа Бога/ спастися душам нашим.
Слава и ныне, предпразднства, глас тойже: Готовися, Вифрееме:
На утрени.
На Бог Господь: тропарь предпразднства. Готовися, Вифлееме: дважды. Слава, святителя. И ныне, предпразднства.
По 1-м стихословии седален, глас 1:
Аще и сокровени быша подвиги твои, святе Антоние, / преподобнии отцы Киево-Печерстии Вассиан и Парфений, / яко угодника Божия тя почитаху.
Слава, и ныне, предпразднства глас той же: Приклонивый Небеса:
По 2-м стихословии седален, глас 4:
Святителие Московстии Платон и Филарет, таже Филарет Киевский / мудрость и благочестие твое ублажиша, святе Антоние, / ты же, воистину таков быв, / смирением и простотою добродетели сия сокрывал еси.
Слава, и ныне, предпразднства глас тойже: Радуйся, Сионе:
По Хвалите имя Господне: Величаем тя, святителю отче наш Антоние, и чтим святую память твою: ты бо молиши о нас Христа Бога нашего.
Псалом избранный: Услышите сия, вси языцы:
По полиелеи седален, глас 5:
С радостию беседовал еси, святе Антоние, / с подвижниками задонскими Георгием затворником, старцем Нафанаилом, таже старицами Мариею и Евгениею , богомудрым советом тых внимая, / ты бо, яко пчела многотрудная, / мудрость Божию отовсюду со смирением собирал еси.
Слава, и ныне, предпразднства, глас тойже: Вифлееме, готовися:
Таже степенна, 1-й антифон 4-го гласа. Прокимен, глас 4: Уста моя возглаголют премудрость, / и поучение сердца моего разум.
Стих: Услышите сия, ecu языцы, внушите, ecu, живущий по вселенней. Всякое дыхание: Евангелие от Иоанна, зачало 36.
По 50-м псалме стихира, глас 6: Святителю отче Антоние, / пастырю наш добрый, / града Воронежа похвало, / скорый пред Богом ходатаю о пастве твоей, / моли спасти души наша.
Канон предпразднства со ирмосом на б и святителя Антония канон на 8, глас 1.
Песнь 1.
Ирмос: Песнь победную поим вси Богу, / сотворшему дивная чудеса мышцею высокою / и спасшему Израиля, яко прославися.
Даждь ми слово, Христе Боже, / воспети по достоянию святителя Воронежскаго Антония, / иже днесь предпразднство Рождества Твоего / с нами вкупе славословит.
От священническаго рода земнаго быв, святе Антоние, / еще во' младенчестве всею душею к Небесному устремился еси. / Сего ради Бог сохрани тя во всех путех твоих.
Еще отрок сый, святе Антоние, / Часослов и Псалтирь навыкл еси читати, / сего ради, словом Божиим наставляемь, / алфавит духовный возлюбил еси.
Богородицей: Едеме, украсися, / Евфрафа бо Создателю уготовася, / родитися хотящу от Девы Матере в вертепе Вифлеемстем / за благоутробие многое.
Песнь 3.
Ирмос: Камень, егоже небрегоша зиждущий, / сей бысть во главу угла, / той есть Камень, / на Немже утверди Церковь Христос, / юже от язык искупи.
Тихостию нрава и смирением украшен, святе Антоние, / Смирницким был еси наречен во училищи духовнем, / да по житию прозвание твое будет.
От юности Богу всем сердцем служити восхотел еси, святее Антоние, / сего ради пострижения монашескаго во святей Киевстей Лавре и покровения преподобнаго Антония сподобился еси.
Жития и творения святых отец, / яко путь к Солнцу Правды - Христу возлюбил еси, / писания же языческая яко тьму и суесловие отверг еси, святе Антоние.
Богородичен: Гряди, Исайе, возопий: / се Дева имать во чреве Избавителя мира и родит в вертепе, / и будет Имя раждаемаго Иисус, / Бог с нами, Еммануил Саваоф.
Кондак и икос предпразднства.
Ин кондак, глас 3:
Днесь земля Воронежская веселия исполняется, / во иерарсех великаго Антония память чествующи: / той бо любовию Христовою воспламенився, / молитвами, бдением и пощением храм Духа Святаго себе устроил еси, / от Негоже вразумляем, паству церковную премедре упасл еси; / мы же, таковаго ходатая ко Христу Богу имуще, с верою вопием: // спасай нас молитвами твоими, Антоние отче наш.
Седален святителя Антония, глас 8:
Стопам преподобнаго Антония последовал еси, святче, / он бо в подземная места Киевския пещеры затворився, / начальник русскаго монашества бысть, / ты же, блаженне, монашеское пострижение с именем его прием, / послежде начальником Ближних пещер и наместником Киево-Печерския Лавры был еси.
Слава и ныне, предпразднства, глас той же: Из чрева прежде век:
Песнь 4.
Ирмос: Духом провидя, пророче Аввакуме, Словесе воплощение, / проповедал еси, вопия: / внегда приближитися летом - познаешися, / внегда прийти времени - покажешися. / Слава силе Твоей, Господи.
Подвиги воздержания, поста и молитвами просиял еси, святе Антоние,/ разумом же богопросвещен, типографом и начальником Ближних пещер поставлен был еси.
Предстательством Пресвятыя Богородицы укрепляемь, блаженне Антоние, / яко чадолюбивый отец и искусный кормчия Киево-Печерскою Лаврою свято управлял еси, / темже и благоволения венценосца Александра Благословеннаго удостоился еси.
На престол Церкве Воронежския Божиим изволением призван был еси, святе Антоние, / да ветхая обновиши, немощная укрепиши, злонамеренная же отсечеши.
Богородичен: В вертепе земленем родитися нас ради, Бог Сый, изволил еси, / обнищав, Блаже, нищею нищетою за милосердие / и, из Девы прошед, воплощен, / пребыв един Сын из Отца и матере.
Песнь 5.
Ирмос: Твой мир даждь нам, / Сыне Божий: / иного бо разве Тебе Бога не знаем, / Имя Твое именуем, / яко Бог живых и мертвых еси.
Худа и неупорядочена бысть Воронежская епархия в пришествие твое, святителю Антоние, / якоже прежде показа ти Господь в чуднем видении, / обаче не отчаявся, всю надежду на Него возложил еси.
Денно и нощно Божию службу совершал еси, святителю Антоние, / народ Церкве Воронежския словом благодатным назидал еси.
Нищия питал еси во множестве, / богатыя побуждал еси ближним служити, святителю Антоние, / наипаче же заключенныя в темницех милостынею и упованием на Бога утешал еси.
Богородичен: Бог человеком подобен быв из Тебе, / Младенец нас ради раждается, Богоневесто, и пребывает весь неизменен, / и во плоти видится Бог вочеловечивыйся.
Песнь 6.
Ирмос: Пророка Иону подражая, вопию: / живот мой, Блаже, свободи из тли / и спаси мя, Спасе мира, зовуща: слава Тебе.
Во дни нашествия смертоносныя язвы холерныя и глада губительнаго / призывал еси паству твою, святителю Антоние, / усердно Богу молитися, каятися и святых Тайн приобщатися, да помиловании будут.
Яко великаго архиерея Божия и старшаго брата / почиташе тя, святителю Антоние, угодник Божий Серафим Саровский, / ты же, любовию к нему исполнен, / преставление его к Богу духом провидел еси.
Яко духовнаго отца и старца искуснаго почитаху тя, святителю Антоние, / Георгий затворник, Антоний Муромский, Николай Мотовилов и множество твоих духовных чад, / на нихже явлены быша чрез тебе чудеса и знамения Божия.
Богородичен: Украсися, Вифлееме, уготовися Евфрафо: / без матере бо от Отца / и без отца Материю чревоносится / и раждается, спасая ны.
Кондак, глас 3:
Днесь святитель Антоний у престола Небеснаго / вкупе с Митрофаном и Тихоном за ны предстоит Святей Троице: / архиереи и священницы ликовствует / и вси вернии радуются, / о нас бо молят Превечнаго Бога.
Икос:
Земнаго ангела Церкве Воронежския / и Небеснаго иерарха / Антония святителя, вернии / воспоим: / Радуйся, яко от младенства храм Божий возлюбил еси, / радуйся, яко мудрость Божию человеческому суемудрию предпочел еси; / радуйся, яко от юности обеты монашеския избрал еси, / радуйся, яко множество монашествующих Киево-Печерския Лавры добре управил еси; / радуйся, яко обветшавшую епархию Воронежскую обновил еси, / радуйся, яко пастыри Церкве Воронежския достойно упасл еси; / радуйся, яко во дни нашествия язвы холерныя и глада губительнаго Бога усердно умолял еси, / радуйся, яко множество пасомых словом истины питал еси; / радуйся, яко святителя Митрофана прославил еси, / радуйся, яко нетленныя мощи святителя Тихона обрел еси; / радуйся, яко паству твою и по отшествии от земных к небесным не оставил еси, / радуйся, яко во дни гонения безбожнаго иже в темницех и в горьких работах с Небес утешал еси; / радуйся, яко во дни нашествия иноплеменных воинству Российскому помогал еси, / радуйся, яко чудесы твоими верныя укрепил еси, неверныя же к Богу обратил еси; радуйся, яко всем призывающим тя, скорый помощник являешися и о нас молиши Превечнаго Бога.
Песнь 7.
Ирмос: Сущим в пещи отроком Твоим, Спасе, / не прикоснуся, ниже стужи, огнь. / Тогда трие, яко, единеми усты, пояху / и благословляху, глаголюще: / благословен Бог отец наших.
Воистину Ангел Церкви Воронежстей был еси, святителю Антоние, / охраняяй и снабдеваяй ю, / егда же молился еси, да призрит Господь с Небесе и посетит виноград Свой, / пламень огненный из уст твоих исхождаше.
Кротостию, трудом и терпением вверенныя ти Богом пастырей окормлял еси, святителю Антоние, / наставляя тыя, да, яко ревностнии служителие и строителие Тайн Божиих, / добрый ответ дадут на Страшном Судище Христовом.
Сугубое попечение имел еси о юных, отче Антоние, / любовию, милостию и молитвою святительскою / насаждая в тых начало премудрости -страх Божий.
Богородичен: Пророком древле прореченный / приближается мне Младенец, из Девы рождейся, / радуется Адам и прамати Ева болезней разрешения, / и сликовствует Давид, раждающия отец.
Песнь 8.
Ирмос: Егоже ужасаются Ангели и вся воинства, / яко Творца и Господа, / пойте, священницы, прославите, отроцы, /благословите, людие, / и превозносите во вся веки.
Память предшественника твоего / Митрофана, перваго епископа Воронежскаго, свято почитая, отче Антоние, / потщался еси его нетленныя мощи обрести и яко Всероссийскаго чудотворца прославите.
Истинный монахолюбец сый, святителю Антоние, / обитель в честь Благовещения Пресвятыя Богородицы в Воронеже основал еси, / идеже и честныя мощи святителя Митрофана, / яко драгоценное сокровище, положены быша.
Телом болезнуя, святителю Антоние, / возжелел еси в Киево-Печерскую Лавру удалитися и токмо о спасении твоея души пещися, / обаче, вразумленный явлением святителя Митрофана / до конца дний твоих паству Воронежскую не оставил еси.
Богородичен: Звезда возсия, Христос от Иакова, / и волсви стекаются во град Вифлеем пети, чествовати и поклонитися Ему, / рожденному из ложесн Чистыя Богородицы.
Песнь 9.
Ирмос: Живоприемный Источник приснотекущий, / светоносный светильник благодати, / храм одушевленный, сень пречистую, / Небесе и земли пространнейшую, / Богородицу, вернии, величаем.
Сподоби Господь тя, святителю Антоние, на исходе дний твоих / обрести нетленныя мощи святителя Тихона, / да явлен будет пред очию всех светильник веры и добрых дел на свещнице Воронежстем.
Подвигом добрым подвизался еси, / течение жития твоего непостыдно скончал еси, / веру соблюл еси, святителю Антоние, / сего ради уготова ти Господь венец правды.
Се ныне время благоприятно, се ныне день спасения! / Паства Воронежская и вся Церковь Русская радуется, / яко святитель Антоний, / молитвенным предстательством и чудесы Богом прославленный, / нами ныне достойно величается.
Богородичен: Радуйся, Чистая, Божий граде одушевленный, / в нем же Бог вместитися благоволи, / не оставль бо горних, к Тебе сниде, / яко дождь на землю, Богородительнице, / и во граде Вифлееме Младенец раждается.
Светилен:
Светлостию добродетелей просияв, в месте светле водворился еси, святителю Антоние, / идеже несть болезнь, ни печаль ни воздыхание, но жизнь безконечная.
Слава, и ныне, предпразднства: Украсися, Вифлееме:
На хвалитех стихиры на 8. Предпразднства 4 и святителя Антония 4, глас 5:
Радуйся, святителю Антоние, / Ангеле Церкве Воронежская, / яко по вся дни жития твоего, / трудом, душевным попечением и молитвою / ревностно охранял еси ю, / и повеленная ти от Господа о пастве твоей / со усердием исполнял еси, / благая терпеливне возращаяй, / негодная, ничтоже сомняся, искореняяй. / И ныне непрестай молися Христу Богу нашему / даровати нам велию милость. Дважды.
Радуйся, святителю Антоние, / архипастырю истинный Церкве Воронежския, ты бо денно и нощно / умолял еси Всемогущаго Бога Человеколюбца, / да дарует ти помощники верныя служители Христовы и строители Тайн Божиих, / врачеве духовныя безмездныя, / отцы и вожди, народ путеводствующия в Царство Небесное, / сосуды избранныя, / соль земли и свет мира, / пастыри добрыя, / с радостию бдящия о душах христианских. / И ныне непрестай молися Христу Богу / даровати нам велию милость.
Радуйся, святителей Троица нераздельная, / духом и любовию присносущая единица, / Митрофане, Тихоне и Антоние, / столпи благочестия, / закона Божия проповедницы, / верныя упасший словом и деяньми, / путеводителие в Царствие Небесное, / заступницы вернии земнаго отечества нашего, / Церкве Воронежския утверждение, / всея России чудотворнии молитвенницы. / Молитеся Христу Богу нашему, / даровати нам велию милость.
Слава, глас 5:
Вострубим трубою песней, / да прославим святителя Антония: / архипастыри, священницы и монаси, / мудрии и простои, / старии и юнии и младенцы, / мужие и жены, / праведнии и грешницы кающийся, / нищий и богатой, / властителие и иже под властию сущий, / скорбящий и радующийся, / града Воронежа жителие и притекший паломницы - / всех бо созывает наш архипастырь добрый, / даровати коемуждо по сердечному прошению, / таже мир и велию милость.
И ныне, предпразднства, глас 6: Зависть же и огнь:
На Литургии
Блаженны от канона предпразднства, песнь 3-я и святителя песнь 6-я.
По входе тропарь предпразднства и святителя. Слава, кондак святителя. И ныне, предпразднства.
Прокимен, глас 1: Уста моя возглаголют премудрость / и поучение сердца моего разум. Стих: Услышите сия, всиязыцы, внушите вси, живущий по вселенней. Апостол ко Евреем, зачало 318. Аллилуйя, глас 2: Уста праведнаго поучатся премудрости / и язык его возглаголет суд. Стих: Закон Бога его в сердце его и не запнутся стопы его. Евангелие от Иоанна, зачало 35 от полу.
Причастен: В память вечную будет праведник, от слуха зла не убоится.
МОЛИТВА
Святителю отче наш Антоние, пастырю добрый Церкве Воронежския и всея России чудотворный молитвенниче и светильниче! Ты во дни жития твоего земнаго нищетою духовною, плачем покаянным, кротостию, алканием правды, милостынею, чистотою сердца, стяжанием духа мирна, служением ближним даже до конца дней твоих, наипаче же святительскою молитвою Богу угодил еси и Царствия Небеснаго достигл еси. Сего ради ныне, имеяй ходатайственное дерзновение, моли Всемогущаго Бога Человеколюбца паству твою добре управити ко спасению, отроки в целомудрии возрастите и в страсе Божием - начале премудрости - наставите, юныя во святем таинстве брака сочетати, старыя не оставленным во одиночестве и без попечения быта, болящия исцелити, скорбящия и озлобленныя утешити, грешныя к покаянию привести, неверующия вразумити, пастыри добрыя нам послати, Церкве единство сохраните, ересей, расколов и гонения безбожнаго избавитися, стране нашей благоденственное и мирное житие даровати, власти умудрити и всем веру, надежду и любовь Божию стяжати, да славится пречестное и великолепное Имя Пресвятыя Троицы ныне и присно и во веки веков. Аминь.
Примечание: Выражаем благодарсность священнику Олегу Шурупову, благочинному Благовещенского кафедрального собора за предоставленую копию данного последования.