Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел миронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоú воскрéсны, глас 2: По стрáсти шéдша во гроб жены́,/ во éже помáзати тéло Твоé, Хрїстé Бóже,/ ви́деша áнгелы во грóбе, и ужасóшася:/ глас бо слы́шаху от них, яко воскрéсе Госпóдь,// дáруя мíрови вéлiю ми́лость.
СЕДАЛЬНЫ УСПЕНИЯ
Глас 1 (по 1‑м стiхослóвiи): Всечестны́й лик премýдрых апóстол собрáся,/ чýдно погребсти́ слáвно тéло Твоé пречи́стое, Богорóдице Всепéтая./ С ни́миже воспéша и Áнгел мнóжество, преставлéнiе Твоé чéстно хвáляще,// éже вéрою прáзднуем.
Глас 3 (по 2‑м стiхослóвiи): В рождествé Твоéм зачáтiе безсéменное,/ во успéнiи Твоéм мéртвость нетлéнная,/ чýдо в чудеси́ сугýбо стечéся, Богорóдице:/ кáко бо Неискусомýжная Младопитáтельница чистá сýщи?/ Кáко же Мáти Бóгу мертвонóсна мироухáющи?/ Тéмже со Áнгелом вопiéм Ти:// рáдуйся, Благодáтная.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Седáлен прáздника по полiелéе, глас 4: Возопíй, Давíде, что сей прáздник,/ егóже воспéл еси́ дрéвле в кни́зе псалóмстей?/ Я́ко Дщерь, Богоотрокови́цу и Дéву, преложи́ Ю́ на óны оби́тели Хрiстóс,/ И҆́же из Нея́ без сéмене рóждся./ И сегó рáди рáдуются мáтери, и дщéри, и невéсты Хрiстóвы, вопiю́ще:// рáдуйся, престáвившаяся к Вы́шнему Цáрствiю.
СТЕПЕННА, ГЛАС 2
1 АНТИФОН
Хор: На нéбо óчи пущáю моего сéрдца, к Тебé, Спасé,// спасú мя Твоúм осiянiем. (Двáжды)
Поми́луй нас согрешáющих Тебé мнóго,/ на вся́кiй час, о Хрїстé мой,// и даждь óбраз прéжде концá покáятися Тебé. (Двáжды)
Слáва Ѻтцý и Сы́ну и Святóму Дýху.
Святóму Дýху, Éже цáрствовати подобáет,/ освящáти, подвизáти тварь:// Бог бо есть, Единосýщен Ѻтцý и Слóву.
И ны́не и прúсно и во вéки векóв. Амúнь.
Святóму Дýху, Éже цáрствовати подобáет,/ освящáти, подвизáти тварь:// Бог бо есть, Единосýщен Ѻтцý и Слóву.
2 АНТИФОН
Áще не Госпóдь бы был в нас,/ кто довóлен цел сохранéн бы́ти от врагá,// кýпно и человекоубíйцы? (Двáжды)
Зубóм их не предáждь, Спáсе, Твоегó рабá:// и҆́бо львóвым óбразом на мя подвизáются вразѝ мои. (Двáжды)
Слáва Ѻтцý и Сы́ну и Святóму Дýху.
Святóму Дýху живоначáлiе и честь:/ вся бо создáнная,/ я́ко Бог сый си́лою,// соблюдáет во Ѻтцé, Сы́ном же.
И ны́не и прúсно и во вéки векóв. Амúнь.
Святóму Дýху живоначáлiе и честь:/ вся бо создáнная,/ я́ко Бог сый си́лою,// соблюдáет во Ѻтцé, Сы́ном же.
В беззакóнiи рук свои́х, да не прóструт божéственне живýщiи:// не оставля́ет бо Хрїстóс жезлá на жрéбiи Своéм. (Двáжды)
Слáва Ѻтцý и Сы́ну и Святóму Дýху.
Святы́м Дýхом тóчится вся́ка премýдрость:/ отсю́ду благодáть апóстолом,// и страдáльчествы венчáются мýченицы, и прорóцы зрят.
И ны́не и прúсно и во вéки векóв. Амúнь.
Святы́м Дýхом тóчится вся́ка премýдрость:/ отсю́ду благодáть апóстолом,// и страдáльчествы венчáются мýченицы, и прорóцы зрят.
ПРОКИМЕН
Чтец: Прокíмен, глас четвéртый. Помянý и҆́мя Твоé во вся́ком рóде и рóде.
Хор: Помянý и҆́мя Твоé/ во вся́ком рóде и рóде.(Пс.44:18А)
Чтец: Слы́ши, Дщи, и виждь, и приклони́ ýхо Твоé. (Пс.44:11А)
Хор: Помянý и҆́мя Твоé/ во вся́ком рóде и рóде.
Чтец: Помянý и҆́мя Твоé.
Хор: Во вся́ком рóде и рóде.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Луки́ Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Лк.зач.4): Во дни óны, востáвши, Марiáм, и҆́де в гóрняя со тщáнiем, во град Iýдов. И вни́де в дом Захáрiин, и целовá Елисавéт. И бысть я́ко услы́ша Елисавéт целовáнiе Марíино, взыгрáся младéнец во чрéве ея́: и испóлнися Дýха Свя́та Елисавéт. И возопи́ глáсом вéлiим, и речé: благословéна Ты в женáх, и благословéн плод чрéва Твоегó. И откýду мне сié, да прiи́де Мáти Гóспода моегó ко мне? Се бо, я́ко бысть глас целовáнiя Твоегó во ýшiю моéю, взыгрáся младéнец рáдощами во чрéве моéм. И блажéнна Вéровавшая, яко бýдет совершéнiе глагóланным Ей от Гóспода. И речé Марiáм: вели́чит душá Моя́ Гóспода, и возрáдовася дух Мой о Бóзе Спáсе Моéм. Я́ко призрé на смирéние Рабы́ Своея́: се бо, отны́не ублажáт Мя вси рóди. Я́ко сотвори́ Мне вели́чiе Си́льный, и свя́то и҆́мя Егó. Пребы́сть же Марiáмь с нею я́ко три мéсяцы, и возврати́ся в дом Свой.
[Русский синодальный перевод](Встав же Мария во дни сии, с поспешностью пошла в нагорную страну, в город Иудин, и вошла в дом Захарии, и приветствовала Елисавету. Когда Елисавета услышала приветствие Марии, взыграл младенец во чреве ее; и Елисавета исполнилась Святого Духа, и воскликнула громким голосом, и сказала: благословенна Ты между женами, и благословен плод чрева Твоего! И откуда это мне, что пришла Матерь Господа моего ко мне? Ибо когда голос приветствия Твоего дошел до слуха моего, взыграл младенец радостно во чреве моем. И блаженна Уверовавшая, потому что совершится сказанное Ей от Господа. И сказала Мария: величит душа Моя Господа, и возрадовался дух Мой о Боге, Спасителе Моем, что призрел Он на смирение Рабы Своей, ибо отныне будут ублажать Меня все роды; что сотворил Мне величие Сильный, и свято имя Его; Пребыла же Мария с нею около трех месяцев, и возвратилась в дом Свой.(1:39-49,56)
Хор: Слáва Тебé, Гóсподи, слáва Тебé.
Воскресéнiе Хрiстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрiстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрiстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра Успéнiя, глас 6: Егдá преставлéнiе пречи́стаго Твоегó тéла готовля́шеся,/ тогдá апóстоли, обстоя́ще одр,/ с трéпетом зря́ху Тя;/ и óви ýбо, взирáюще на тéло,/ ýжасом одержи́ми бя́ху,/ Петр же со слезáми вопiя́ше Ти:/ О Дéво,/ ви́жду Тя я́сно простéрту прóсту,/ Животá всех, и удивля́юся,/ в Нéйже всели́ся бýдущiя жи́зни наслаждéнiе./ Но, о Пречи́стая,/ моли́ся прилéжно Сы́ну и Бóгу Твоемý// спасти́ся стáду Твоемý невреди́му.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 2
(совмещенный с канóном Борóдицы (глас 2) и первым и вторым канóнами Успéнiя, глас 1 и глас 4)
ПЕСНЬ 1
Iрмóс: Во глубинé постлá иногдá/ фараони́тское всевóинство преоружéнная си́ла;/ воплóщшееся же Слóво всезлóбный грех потреби́ло есть,/ препрослáвленный Госпóдь,// слáвно бо прослáвися.
Чтец (тропáрь): Мiрскíй князь Блáже, емýже написáхомся,/ зáповеди Твоея́ не послýшавше, крестóм Твои́м осуди́ся:/ прирази́ся бо Ти я́ко смéртну:/ отпадé же влáсти Твоея́ держáвою,// и немощны́й обличи́ся.
Чтец: Избáвитель рóда человéческаго,/ и нетлéнному животý Начáльник/ в мiр пришéл еси́:/ Воскресéнiем бо Твои́м раздрáл еси́ смéртныя пелены́,// Éже славослóвим вси: слáвно бо прослáвися.
Хор: Пресвятáя Богорóдице, спасú нас.
Богорóдичен: Превы́шши яви́лася еси́, Чи́стая Приснодéво,/ вся́кiя неви́димыя же и ви́димыя твáри:/ Зижди́теля бо родилá еси́,/ я́ко благоволи́ воплоти́тися во утрóбе Твоéй,// Егóже со дерзновéнiем моли́, спасти́ дýши нáша.
Канон Богородицы, глас 2
Хор: Пресвятáя Богорóдице, спасú нас.
Чтец: Невещéственная дрéвле лéствица,/ и стрáнно оледенéвшiй путь мóря,/ Твоé явля́ше Рождествó, Чи́стая,// éже поéм вси: я́ко прослáвися.
Хор: Пресвятáя Богорóдице, спасú нас.
Чтец: Си́ла Вы́шняго, Ипостáсь Совершéнная, Бóжiя Мýдрость,/ воплóщшися, Пречи́стая, из Тебé,// к человéком бесéдова: я́ко прослáвися.
Канон Успения, глас 1
Хор: Пресвятáя Богорóдице, спасú нас.
Чтец: Да провождáют невещéственнiи чи́нове/ небошéственное в Сióн Божéственное тéло Твоé,/ внезáпу же стéкшеся апóстол мнóжество от конéц, Богорóдице, Тебé предстáша áбiе,/ с ни́миже, Чи́стая, Твою́ честнýю, Дéво, пáмять слáвим. (Двáжды)
Хор: Пресвятáя Богорóдице, спасú нас.
Чтец: Побéдныя пóчести взялá еси́ на естествó, Чи́стая, Бóга рóждши,/ обáче же, подóбящися Творцу́ Твоемý и Сы́ну,/ пáче естествá повинýешися естéственным закóном.// Тéмже умéрши, с Сы́ном востаéши, вéчнующи. (Двáжды)
Канон Успения, глас 4
Хор: Пресвятáя Богорóдице, спасú нас.
Чтец: Дéвы отрокови́цы, с Марiямíею прорóчицею песнь исхóдную ны́не воскли́кните:/ Дéва бо и еди́на Богомáти ко прiя́тiю Небéсному преставля́ется. (Двáжды)
Слáва Ѻтцý и Сы́ну и Святóму Дýху.
Тропáрь: Достóйно, я́ко одушевлéнное Тя Нéбо, прiя́ша Небéсная, Пречи́стая, Божéственная селéнiя,// и предстá, свéтло укрáшена, я́ко Невéста, Всенепорóчная, Царю́ и Бóгу.
И҆ ны́не и прúсно и во вéки векóв. Амúнь.
Тропáрь: Достóйно, я́ко одушевлéнное Тя Нéбо, прiя́ша Небéсная, Пречи́стая, Божéственная селéнiя,// и предстá, свéтло укрáшена, я́ко Невéста, Всенепорóчная, Царю́ и Бóгу.
Катавáсiя (глас 1): Преукрашéнная Божéственною слáвою,/ свящéнная и слáвная, Дéво, пáмять Твоя́/ вся собрá к весéлiю вéрныя,/ начинáющей Марiáме, с ли́ки и тимпáны,/ Твоемý пою́щiя Единорóдному:// слáвно я́ко прослáвися.
Катавáсiя (глас 4): Отвéрзу устá моя́,/ и напóлнятся Дýха,/ и слóво отры́гну Цари́це Мáтери,/ и явлю́ся, свéтло торжествýя,/ и воспою́, рáдуяся, Тоя́ успéнiе.
ПЕСНЬ 3
Iрмóс: Процвелá есть пусты́ня, я́ко крин, Гóсподи,/ язы́ческая неплодя́щая цéрковь,/ пришéствiем Твои́м,// в нéйже утверди́ся моé сéрдце.
Чтец: Женý Тя мéртвенну, но пáче естествá и Мáтерь Бóжiю/ ви́девше, Всенепорóчная, слáвнiи апóстоли/ ужáсно прикасáхуся рукáми слáвою облистáющей,// я́ко богопрiя́тное Селéнiе ви́дяще.(Двáжды)
Хор: Пресвятáя Богорóдице, спасú нас.
Чтец: Пости́же рýце досади́тельныя дéрзаго, усечéнiем суд нанéс,/ Бóгу сохрáньшу честь одушевлéнному Кивóту, слáвою Божествá,// в Нéмже Слóво плоть бысть. (Двáжды)
Глас 4
Хор: Пресвятáя Богорóдице, спасú нас.
Чтец: От мéртвых чресл произвéдшися, естествóм подóбна, Чи́стая, исхождéнiе разреши́,/ рóждши же сýщую Жизнь,// к Жи́зни престáвися Божéственней и Ипостáсней. (Двáжды)
Слáва Ѻтцý и Сы́ну и Святóму Дýху.
Тропáрь: Лик Богослóвов от конéц, свы́ше же Áнгел мнóжества/ к Сióну идя́ху всеси́льным мановéнiем,// достодóлжно, Влады́чице, Твоемý погребéнiю служáще.
И҆ ны́не и прúсно и во вéки векóв. Амúнь.
Тропáрь: Лик Богослóвов от конéц, свы́ше же Áнгел мнóжества/ к Сióну идя́ху всеси́льным мановéнiем,// достодóлжно, Влады́чице, Твоемý погребéнiю служáще.
Катавáсiя (глас 1): Содéтельная и содержи́тельная всех/ Бóжiя Мýдросте и Си́ло,/ непреклóнну, недви́жиму Цéрковь утверди́, Хрiстé,/ еди́н бо еси́ Свят,// во святы́х почивáяй.
Катавáсiя (глас 4): Твоя́ песнослóвцы, Богорóдице,/ живы́й и незави́стный Истóчниче,/ лик себé совокýпльшiя, духóвно утверди́,/ в Божéственней пáмяти Твоéй// венцéв слáвы сподóби.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 2: Воскрéсл еси́ от грóба, Всеси́льне Спáсе,/ и ад, ви́дев чýдо, ужасéся,/ и мéртвiи востáша;/ тварь же ви́дящи срáдуется Тебé,/ и Адáм свесели́тся,// и мiр, Спáсе мой, воспевáет Тя при́сно.
И҆́кос: Ты еси́ Свет омрачéнным,/ Ты еси́ Воскресéнiе всех, и Живóт человéков,/ и всех совоскреси́л еси́,/ смéртную держáву, Спáсе, разóрь,/ и áдова вратá сокруши́вый, Слóве:/ и мéртвiи ви́девше чýдо, чудя́хуся,/ и вся́ка тварь срáдуется о Воскресéнiи Твоéм, Человеколю́бче./ Тéмже и вси слáвим и поéм Твоé снизхождéнiе,// и мiр, Спáсе мой, воспевáет Тя при́сно.
Ипакоú Успéнiя, глас 8: Блажи́м Тя, вси рóди, Богорóдице Дéво,/ в Тя бо Невмести́мый Хрiстóс Бог наш вмести́тися благоволи́./ Блажéни есмы́ и мы, предстáтельство Тя имýще:/ день бо и нощь мóлишися о нас и рóди хрiстiáнстiи Твои́ми моли́твами утверждáются./ Тем, воспевáюще, вопiéм Ти:// рáдуйся, Благодáтная, Госпóдь с Тобóю.
ПЕСНЬ 4
Iрмóс: Пришéл еси́ от Дéвы, не ходáтай, ни Áнгел,/ но Сам, Гóсподи, воплóщься,/ и спасл еси́ всегó мя человéка./ Тем зовý Ти:// слáва си́ле Твоéй, Гóсподи.
Чтец: Стрáстiю Твоéю, Хрiстé,/ врагý оскудéша орýжiя,/ проти́вным же éже во ад схождéнiем Твои́м, грáды разруши́шася,// и мучи́телева дéрзость низложéна бысть.
Хор: Пресвятáя Богорóдице, спасú нас.
Богорóдичен: Тя пристáнище спасéнiя, и стéну недви́жиму,/ Богорóдице Влады́чице, вси вéрнiи свéмы:// Ты бо моли́твами Твои́ми избавля́еши от бед дýши нáша.
Глас 2
Хор: Пресвятáя Богорóдице, спасú нас.
Чтец: Се превознесéся Божéственная Горá дóму Госпóдня,// превы́шше сил, Богомáтерь я́вственнейше.
Чтец: Ви́дите, лю́дiе, и чуди́теся:/ Горá бо святáя и я́вственная Бóгу в Небéсныя оби́тели превы́шше взéмлется,// Нéбо земнóе в Небéсное и нетлéнное селéнiе вселя́емо. (Двáжды)
Хор: Пресвятáя Богорóдице, спасú нас.
Чтец: Жи́зни присносýщныя и лýчшiя смерть Твоя́ бысть прехождéнiе, Чи́стая,/ от приврéменныя к Божéственней вои́стинну и непреходи́мей преставля́я Тя, Чи́стая,// в весéлiи Сы́на зрéти Твоегó и Гóспода.
Хор: Пресвятáя Богорóдице, спасú нас.
Чтец: Взя́шася двéри Небéсныя, и Áнгели воспéша,/ и прiя́т Хрiстóс дéвства Своея́ Мáтере сосýд;/ Херувíми подъя́ша Тя с весéлiем,// Серафíми же слáвят, рáдующеся.
Тропáрь: В преставлéнiи Твоéм, Мáти Бóжiя, прострáннейшее тéло Твоé и богопрiя́тное// Áнгельская вóинства свящéнными кри́лы трéпетом и рáдостiю покрывáху.
Катавáсiя (глас 1): Рéчи прорóков и гадáнiя/ воплощéнiе прояви́ша от Дéвы Твоé, Хрiстé:/ сiя́нiе блистáнiя Твоегó во свет язы́ков изы́дет,/ и возгласи́т Тебé бéздна с весéлiем:// си́ле Твоéй слáва, Человеколю́бче.
Iрмóс: Ходáтай Бóгу и человéком был еси́, Хрiстé Бóже;/ Тобóю, бо Влады́ко, к Светоначáльнику, Ѻтцý Твоемý,/ от нóщи невéденiя// приведéнiе и́мамы.
Чтец: В рóве, Хрiстé, преиспóднем положи́ша Тя бездыхáнна мéртва:/ но Твоéю я́звою забвéнныя мéртвыя, и҆́же во гробéх спя́щiя, уя́звен// с Собóю воскреси́л еси́.
Хор: Пресвятáя Богорóдице, спасú нас.
Богорóдичен: Моли́ Сы́на Твоегó и Гóспода, Дéво Чи́стая,/ на Тя уповáющим мир даровáти, пленéнным избавлéнiе,// от сопроти́вных настоя́нiй.
Глас 2
Хор: Пресвятáя Богорóдице, спасú нас.
Чтец: Ѻ́блацы весéлiя слáдость кропи́те сýщим на земли́:/ я́ко Отрочá дадéся,/ И҆́же сый прéжде век,// от Дéвы воплóщься Бог наш. (Двáжды)
Хор: Пресвятáя Богорóдице, спасú нас.
Чтец: Житiю́ и плóти моéй свет возсiя́,/ и дря́хлость грехá разруши́:// напослéдок от Дéвы без сéмене воплóщься Вы́шнiй.
Глас 1
Хор: Пресвятáя Богорóдице, спасú нас.
Чтец: Я́ко на óблаце, Дéво, апóстольскiй лик носи́мь,/ к Сióну от конéц служи́ти Тебé, О́блаку лéгкому, собирáшеся:// от Нея́же Вы́шнiй Бог сýщим во тьме и сéни Прáведное возсiя́ Сóлнце. (Двáжды)
Чтец: Да возглася́т трубы́ богослóвов днесь,/ язы́к же многовещáнный человéческiй ны́не да восхвáлит,/ да огласи́т же воздýх, безмéрным сiя́я свéтом,/ Áнгели да пою́т Пречи́стыя Дéвы успéнiе. (Двáжды)
Слáва Ѻтцý и Сы́ну и Святóму Дýху.
Тропáрь: Сосýд подобáше избрáнный, пéнiем Ти весь удивля́емь, Деви́це, исхóден,/ весь освящéн Бóгови, всем богопрiя́тен,// и сей и҆́стинно явля́емый, Богорóдице Всепéтая.
И҆ ны́не и прúсно и во вéки векóв. Амúнь.
Тропáрь: Сосýд подобáше избрáнный, пéнiем Ти весь удивля́емь, Деви́це, исхóден,/ весь освящéн Бóгови, всем богопрiя́тен,// и сей и҆́стинно явля́емый, Богорóдице Всепéтая.
Катавáсiя (глас 1): Бóжiю и неизречéнную добрóту/ добродéтелей Твои́х, Хрiстé, исповéм:/ от Присносýщныя бо Слáвы/ Соприсносýщное и Ипостáсное возсiя́вый Сiя́нiе,/ из дéвственныя утрóбы/ сýщим во тьме и сéни воплóщся,// возсiя́л еси́ Сóлнце.
Катавáсiя (глас 4): Ужасóшася вся́ческая/ о честнéм успéнiи Твоéм:/ Ты бо, Неискусобрáчная Дéво,/ от земли́ престáвилася еси́ к вéчным оби́телем и к безконéчней жи́зни,/ всем, воспевáющим Тя,// спасéнiе подавáющая.
ПЕСНЬ 6
Iрмóс: В бéздне грехóвней валя́яся,/ неизслéдную милосéрдiя Твоегó призывáю бéздну:// от тли Бóже, мя возведи́.
Чтец: Еди́нем ýбо человéком,/ пéрвым Адáмом дрéвле в мiр вни́де смерть,// и Еди́нем Воскресéнiе Сы́ном Бóжiим яви́ся.
Хор: Пресвятáя Богорóдице, спасú нас.
Богорóдичен: Неискусомýжно, Дéво, родилá еси́,/ и вéчнуеши Дéва, явля́ющи И҆́стиннаго Божествá,// Сы́на и Бóга Твоегó óбразы.
Глас 2
Хор: Пресвятáя Богорóдице, спасú нас.
Чтец: Естествó человéческое рабóтающее грехý,/ Влады́чице Чи́стая, Тобóю свобóду улучи́:// Твой бо Сын, я́ко áгнец, за всех закалáется. (Двáжды)
Хор: Пресвятáя Богорóдице, спасú нас.
Чтец: Вопiéм Ти вси, и҆́стинней Богомáтери,/ прогнéвавшiя рабы́ избáви:// Еди́на бо дерзновéнiе к Сы́ну и҆́маши.
Глас 1
Хор: Пресвятáя Богорóдице, спасú нас.
Чтец: Даéт Тебé я́же превы́ше естествá Царь всех Бог:/ в рождествé бо Дéву я́коже сохрани́, тáко во грóбе тéло соблюдé нетлéнно/ и спрослáви Божéственным преставлéнiем,// честь Тебé, я́ко Сын Мáтери, дáруя. (Двáжды)
Чтец: Из Тебé Жизнь возсiя́, ключи́ дéвства не руши́вши;/ кáко ýбо пречи́стое и живоначáльное Твоé тéло// искушéнiя смéрти бысть причáстно? (Двáжды)
Слáва Ѻтцý и Сы́ну и Святóму Дýху.
Тропáрь: Жи́зни бы́вши храм, жизнь присносýщную улучи́ла еси́:/ смéртiю бо к животý преминýла еси́,// Я́же Жизнь рóждши воипостáсную.
И҆ ны́не и прúсно и во вéки векóв. Амúнь.
Тропáрь: Жи́зни бы́вши храм, жизнь присносýщную улучи́ла еси́:/ смéртiю бо к животý преминýла еси́,// Я́же Жизнь рóждши воипостáсную.
Катавáсiя (глас 1): Морскíй пучинорóдный ки́тов внýтреннiй огнь -/ триднéвнаго Твоегó погребéнiя проображéнiе,/ егóже Ióна прорóк показáся./ Спасéн бо, я́ко и предпослáся, невреждéн, вопiя́ше:// пожрý Ти со глáсом хвалéнiя, Гóсподи.
Катавáсiя (глас 4): Божéственное сié и всечестнóе/ совершáюще прáзднество,/ Богомýдрiи, Богомáтере,/ прiиди́те, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк Успéнiя, глас 2: В моли́твах Неусыпáющую Богорóдицу/ и в предстáтельствах непрелóжное уповáнiе/ гроб и умерщвлéнiе не удержáста:/ я́коже бо Животá Мáтерь/ к животý престáви// во утрóбу Всели́выйся приснодéвственную.
И҆́кос: Огради́ моя́ помышлéния, Хрiстé мой,/ и҆́бо Стéну мíра воспéти дерзáю, Чи́стую Мáтерь Твою́,/ на столпé глагóл укрепи́ мя и в тя́жких мы́слех заступи́ мя,/ Ты бо взывáющим и прося́щим вéрою молéнiя исполня́еши./ Ты мне ýбо дáруй язы́к принóсен и пóмысл непосты́ден:/ вся́кое бо дая́нiе сiя́нiя от Тебé низпосылáется, Светоподáтелю,// во утрóбу всели́выйся приснодéвственную.
ПЕСНЬ 7
Iрмóс: Богопроти́вное велéнiе/ беззакóннующаго мучи́теля/ высóк плáмень вознеслó есть;/ Хрiстóс же прострé Богочести́вым отрокóм рóсу духóвную,// Сый благословéн и препрослáвлен.
Чтец: Не терпéл еси́, Влады́ко, за благоутрóбiе/ смéртiю человéка зрéти мýчима,/ но пришéл и спасл еси́ Твоéю крóвiю, человéк быв:// Сый благословéн и Препрослáвлен, Бог отец нáших.
Чтец: Ви́девше Тя, Хрiстé, оболчéна во одéжду отмщéнiя,/ ужасóшася врáтницы áдовы:/ безу́мнаго бо мучи́теля рабá, Влады́ко, пришéл еси́ уби́ти:// Сый благословéн и Препрослáвлен, Бог отéц нáших.
Хор: Пресвятáя Богорóдице, спасú нас.
Богорóдичен: Святы́х Святéйшую Тя разумéем,/ я́ко Еди́ну рóждшую Бóга Непремéннаго,/ Дéво Несквéрная, Мáти Безневéстная:/ всем бо вéрным источи́ла еси́ нетлéнiе,// Божéственным Рождествóм Твои́м.
Глас 2
Хор: Пресвятáя Богорóдице, спасú нас.
Чтец: Зря́ще в нощи́ ýбо Iáков,/ я́ко в гадáнiи Бóга воплощéнна,/ из Тебé же свéтлостiю яви́ся пою́щим:// Пребожéственный отцéв Бог, и Препрослáвлен.
Хор: Пресвятáя Богорóдице, спасú нас.
Чтец: Знáменiя я́же в Тебé, неизречéннаго проявля́я сня́тiя, со Iáковом бóрется:/ и҆́мже вóлею соедини́ся человéком, Чи́стая:// Пребожéственный отцéв Бог, и Препрослáвлен.
Глас 1
Хор: Пресвятáя Богорóдице, спасú нас.
Чтец: Богодéланныя скрижáли Моисéй, пи́санныя Божéственным Дýхом, я́ростiю сокруши́,/ но сегó Влады́ка Рóждшую невреждéнну в Небéсныя сохрáнь дóмы ны́не внутрь всели́./ С Нéю игрáюще, вопiéм Хрiстý:// препрослáвленный отцéв и наш Бóже, благословéн еси́. (Двáжды)
Хор: Пресвятáя Богорóдице, спасú нас.
Чтец: В кимвáлех - усты́ чи́стыми, мусики́йски же - сéрдцем свéтлым,/ доброглáсною трубóю - высóкою мы́слiю,/ Дéвы и Чи́стыя в нарóчитый избрáнный день преставлéнiя,/ дéтельными плéщуще рукáми, вопiéм:// препрослáвленный отцéв и наш Бóже, благословéн еси́.
Хор: Пресвятáя Богорóдице, спасú нас.
Чтец: Богомýдрiи, собери́теся, лю́дiе:/ Бóжiя бо слáвы Селéнiе от Сióна преставля́ется к Небéсному жили́щу,/ идéже глас чист прáзднующих,/ глас несказáннаго рáдованiя, и в весéлiи вопiю́щих Хрiстý:/ препрослáвленный отцéв и наш Бóже, благословéн еси́.
Глас 4
Хор: Пресвятáя Богорóдице, спасú нас.
Чтец: Ю́ноши и дéвы, Дéвыя же и Богомáтере пáмять чтýще,/ стáрцы, и монáси, цáрiе и судiи́, пóйте:// отéц на́ших Гóсподи и Бóже, благословéн еси́(Двáжды)
Слáва Ѻтцý и Сы́ну и Святóму Дýху.
Тропáрь: Да вострýбят трубóю духóвною гóры Небéсныя,/ да рáдуются хóлми, и да игрáют Божéственнiи апóстоли:// Цари́ца к Сы́ну преставля́ется, с Ним цáрствующи.
И҆ ны́не и прúсно и во вéки векóв. Амúнь.
Тропáрь: Всесвящéнное преставлéнiе Божéственныя Твоея́ и Нетлéнныя Мáтере/ преми́рныя Вы́шних сил совокупи́ чи́ны,/ весели́тися с сýщими на земли́, Тебé пою́щими:// Бóже, благословéн еси́.
Катавáсiя (глас 1): Безсту́дней я́рости же и огню́/ Боже́ственное жела́ние сопротивля́яся,/ огнь у́бо ороша́ше,/ я́рости же смея́шеся,/ богодохнове́нною слове́сною преподо́бных тривеща́нною цевни́цею/ противовеща́я мусики́йским орга́ном посреди́ пла́мене:// препросла́вленный отце́в и наш Бо́же, благослове́н еси́.
Катавáсiя (глас 4): Не послужи́ша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн еси́.