Неделя 3 по Пасхе,св. жен-мироносиц, ап. и ев. Марка. ВСЕНОЩНОЕ БДЕНИЕ. Окончание утрени.Час первый
8 мáя 2022 гóда. Недéля 3 по Пáсхе, св. жен-мvронóсиц. Глас 2. Вся воскрéсная слýжба прáздника (по Трióди) в соединéнiи с полiелéйной слýжбой Апóстола и евангелúста Мáрка. Слýжба мирскúм чúном.
Окончáние всенóщного бдéния. Начáло здесь ( великая вечерня) и здесь ( утреня) здесь ( канóн)
КОНДАК ПРАЗДНИКА ТРИОДИ (НЕДЕЛИ МИРОНОСИЦ), ГЛАС 2
Кондáк прáздника Тріóди, глас 2: Рáдоватися миронóсицам повелéл есѝ,/ плачь прамáтере Éвы утоли́л есѝ/ воскресéнiем Твои́м, Хрiстé Бóже,/ апóстолом же Твои́м проповéдати повелéл есѝ:// Спас воскрéсе от грóба.
Икос: На гроб Твой, Спáсе, миронóсицы идýщiя,/ к себé недоумевáхуся умóм, и вещáху:/ кто нам кáмень отвали́т грóбный?/ И воззрéвша ви́дят, я́ко кáмень отвалéн бе,/ зрáку же áнгелову со одея́нiем дивля́хуся:/ содержи́ми же бя́ху трéпетом, и бежáти помышля́ху./ И к ним ю́ноша возопѝ:/ не бóйтеся вы, Егóже и́щете, востá,/ прiиди́те, ви́дите мéсто, идéже лежáше тéло Iисýсово,/ и скóро шéдшiя возвести́те ученикóм:// Спас воскрéсе от грóба.
ПЕСНЬ 7
Iрмóс: Отроки от пéщи избáвивый,/ быв Человéк,/ стрáждет яко смéртен,/ и стрáстiю смéртное,/ в нетлéнiя облачит благолéпiе,/ Един благословéн// отцéв Бог, и препрослáвлен. (Двáжды)
Припéв: Хрiстóс воскрéсе из мéртвых.
Тропáрь: Жены с миры богомýдрыя в след Тебé течáху:/ Егóже, яко мéртва, со слезáми искáху,/ поклонишася рáдующiяся Живóму Бóгу,/ и Пáсху тáйную// Твоим, Христé, ученикóм благовестиша.
Припéв: Хрiстóс воскрéсе из мéртвых.
Тропáрь: Смéрти прáзднуем умерщвлéнiе,/ áдово разрушéнiе,/ инóго житiя вéчнаго начáло,/ и игрáюще поéм Винóвнаго,/ Единаго благословéннаго// отцéв Бóга, и препрослáвленнаго.
Припéв: Пресвятáя Богорóдице, спасú нас.
Богорóдичен: Умертви́в Сын Твой смерть, Всенепорóчная, днесь,/ всем смéртным пребывáющiй живóт/ во вéки векóв даровá,/ еди́н благословéнный// отцéв Бог и препрослáвленный.
Припéв: Пресвятáя Богорóдице, спасú нас.
Богорóдичен: Всем цáрствуяй создáнием, быв человéк,/ всели́ся в Твою́, Богоблагодáтная, утрóбу,/ и распя́тие претерпéв и смерть,/ воскрéсе боголéпно,// совозстáвив нас я́ко всеси́лен.
Глас 1
Припéв: Святы́й апóстоле Мáрко, молú Бóга о нас.
Тропáрь: Божéственными блистáнии освещáемь,/ возломлéнием тáйно возпосылáеши зареви́дныя лучѝ, Мáрко преблажéнне:/ Слóво бо проповéдал есѝ воплощáемое, Безлéтное,// хвáльнаго отцéв Бóга и препрослáвленнаго.
Припéв: Святы́й апóстоле Мáрко, молú Бóга о нас.
Тропáрь: Богодéльными, Вседéтелю, си́лами Богоглáснаго ученикá вооружи́в,/ чудодéйственника сегó соверши́л есѝ:/ неду́ги бо отгнá и я́зи исцели́л есть,// прехвáльнаго Тя проповéдуя Бóга и препрослáвленнаго.
Припéв: Святы́й апóстоле Мáрко, молú Бóга о нас.
Тропáрь: Учени́ческаго ли́ка старéйшаго учи́теля имéя, Божéственнаго Петрá,/ подóбен сему́ яви́лся,/ все бо испрáвил есѝ церкóвное исполнéние// прехвáльнаго отцéв Бóга и препрослáвленнаго.
Припéв: Пресвятáя Богорóдице, спасú нас.
Богородичен: Столп сам во Еги́пте постáвил еси́, Евáнгелия твоегó писáние/ Рóждшемуся без сéмене от Богомáтере,/ речéнием послéдуя Исáии, преслáвне,// прехвáльнаго возвещáя Бóга и препрослáвленнаго.
Глас 2
Припéв: Слáва Тебé, Бóже наш, слáва Тебé.
Тропáрь: Ты храм телéсный воздви́гл есѝ разорéнный,/ триднéвно из грóба, я́коже обещáл есѝ Блáже:/ да вои́стинну скáжеши слáву Твою́,/ ю́же нам источáеши вéрою,// ýзы разреши́в, и́хже держáше дрéвле ад свя́занных.
Припéв: Слáва Тебé, Бóже наш, слáва Тебé.
Тропáрь: О iудéйское безýмiе! О неи́стовство беззакóнных!/ Что невéрное ви́девше, не вéровасте Хрiстý;/ я́ко немощны́я, не слóвом ли воздви́же?/ Или я́ко весь мiр Той не спасé ли,// да уверя́ют вас понé вóини, или́ воскрéсшiе из мéртвых.
Слáва Отцу и Сыну и Святóму Духу.
Трóичен: Со Отцéм слáвим Сы́на, и Дýха Святáго,/ вопiю́ще непрестáнным глáсом:/ Трóице, еди́нственное Существó, поми́луй, спаси́ вся,/ в трiéх Ли́цех Еди́нице, ущéдри ны,// препрослáвленный Бóже, во вéки.
И ныне и присно и во вéки векóв. Аминь.
Богорóдичен: Во чрéве Твоéм, Пречи́стая, кáко вмести́ла есѝ Младéнца,/ Егóже трепéщут си́лы áнгельскiя я́ко Бóга?/ Рáзве я́коже восхотé, я́коже весть всели́ся,/ вся спасти́ хотя́й от Адáма земнорóдныя,// разреши́вый Адáма кля́твы óныя, снéдiю гóрькою.
Катавáсія: Ѻ́троки от пéщи избáвивый,/ быв Человéк,/ стрáждет яко смéртен,/ и стрáстiю смéртное,/ в нетлéнiя облачи́т благолéпiе,/ Еди́н благословéн// отцéв Бог, и препрослáвлен.
ПЕСНЬ 8
Ирмóс: Сей наречéнный и святы́й день,/ Еди́н суббóт Царь и Госпóдь,/ прáздников прáздник/ и торжествó есть торжéств,// вóньже благослови́м Хрiстá во вéки. (Двáжды)
Припéв: Христóс воскрéсе из мéртвых.
Тропáрь: Прiиди́те, нóваго виногрáда рождéнiя,/ Божéственнаго весéлiя,/ в нарóчитом дни Воскресéнiя,/ Цáрствiя Христóва приобщи́мся,/ пою́ще Егó// яко Бóга во вéки.
Припéв: Христóс воскрéсе из мéртвых.
Тропáрь: Возведи óкрест óчи твои, Сióне, и виждь:/ се бо прiидóша к тебé,/ яко богосвéтлая свети́ла,/ от зáпада, и сéвера, и мóря,/ и востóка чáда твоя,// в тебé благословящая Хрiстá во вéки.
Припéв: Пресвятáя Богорóдице, спаси нас.
Богорóдичен: Прiи́де Тобóю в мiр Госпóдь, Дéво Богорóдице,/ и чрéво áдово растóрг,/ смéртным нам воскресéнiе даровá:// Тéмже благослови́м Егó во вéки.
Припéв: Пресвятáя Богорóдице, спаси нас.
Богорóдичен: Всю низложи́в смéрти держáву Сын Твой, Дéво,/ Свои́м воскресéнiем,/ я́ко Бог крéпкiй совознесé нас и обожи́:// тéмже воспевáем Егó во вéки.
Глас 1
Припéв: Святы́й апóстоле Мáрко, молú Бóга о нас.
Тропáрь: Рóждшееся Слóво от Отцá прéжде всех век,/ в естествó человéческое облéкшася Хрiстá, проповéдал еси́, слáвне, и вопiя́л:// вся делá Госпóдня, Гóспода пóйте и превозноси́те во вся вéки.
Припéв: Святы́й апóстоле Мáрко, молú Бóга о нас.
Тропáрь: Дáвшаго избавлéнiе себé за нáше согрешéнiе/ и страсть пáдших, воздви́гшаго Хрiстá прослáвил еси́, слáвне, вопiя́:// вся делá Госпóдня, Гóспода пóйте и превозноси́те во вся вéки.
Припéв: Святы́й апóстоле Мáрко, молú Бóга о нас.
Тропáрь: Петрóву Марк повинýяся премýдрому учи́тельству,/ премýдре писáнiи вообрази́л еси́ вéрным честнóе Евáнгелiе, вопiю́щим:// вся делá Госпóдня, Гóспода пóйте и превозноси́те во вся вéки.
Припéв: Пресвятáя Богорóдице, спасú нас.
Богородичен: Дéва, Емманýила нося́щи я́ко Младéнца, предстá еги́птяном,/ и́мже, я́ко свéтлая звездá, Марк посылáется, взывáя:// вся делá Госпóдня, Гóспода пóйте и превозноси́те во вся вéки.
Глас 2
Припéв: Слáва Тебé, Бóже наш, слáва Тебé.
Тропáрь: Зовéт кáмень сáмый, печáти вопiю́т, я́же вы положи́вше,/ постáвисте стрáжу храня́щую гроб:// вои́стинну воскрéсе Хрiстóс, и живéт во вéки.
Припéв: Слáва Тебé, Бóже наш, слáва Тебé.
Тропáрь: Вои́стинну воскрéсе Хрiстóс,/ пленéн бысть ад, умертви́ся змiй,/ избáвися Адáм, потрясóшася дóльнiи:// что не вéруете прóчее, врази́ и престýпницы?
Благословúм Отцá, и Сы́на, и Святáго Дýха, Гóспода.
Трóичен: Со Отцéм Сы́на, и Дýха Святáго/ Святýю Трóицу в Божествé еди́ном прославля́ем, вопiю́ще:// Свят, Свят, Свят еси́ во вéки.
И ныне и прúсно и во вéки векóв, амúнь.
Богорóдичен: Во чрéве Твоéм, Чи́стая, присноживóтный хлеб,/ смешéный несмéсно, смешéнiем нáшим,// родила́ еси́ непрелóжно еди́наго Хрiстá Бóга во двою́ существý.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсія: Сей наречéнный и святы́й день,/ Еди́н суббóт Царь и Госпóдь,/ прáздников прáздник/ и торжествó есть торжéств,// вóньже благослови́м Хрiстá во вéки.
ПЕСНЬ 9
Ирмóс: Свети́ся, свети́ся,/ нóвый Iерусали́ме:/ слáва бо Госпóдня/ на тебé возсiя́./ Ликýй ны́не/ и весели́ся, Сióне./ Ты же, Чи́стая, красýйся, Богорóдице,// о востáнiи Рождествá Твоегó. (Двáжды)
Припéв: Хрiстóс воскрéсе из мéртвых.
Тропáрь: О Божéственнаго, о любéзнаго,/ о сладчáйшаго Твоегó глáса!/ С нáми бо нелóжно/ обещáлся еси бы́ти,/ до скончáнiя вéка Хрiстé:/ Егóже, вéрнiи,// утверждéнiе надéжди имýще, рáдуемся.
Припéв: Хрiстóс воскрéсе из мéртвых.
Тропáрь: О Пáсха вéлiя и свящéннейшая, Хрiстé!/ О мýдросте, и Слóве Бóжiй, и сило!/ Подавáй нам истее Тебé причащáтися,// в невечéрнем дни Цáрствiя Твоегó.
Припéв: Пресвятáя Богорóдице, спаси нас.
Богорóдичен: Соглáсно, Дéво, Тебé блажи́м вéрнiи:/ рáдуйся, двéре Госпóдня:/ рáдуйся, грáде одушевлéнный:/ рáдуйся, Ея́же рáди нам ны́не возсiя́ свет,// из Тебé Рождéннаго из мéртвых Воскресéнiя.
Припéв: Пресвятáя Богорóдице, спаси нас.
Богорóдичен: Весели́ся и рáдуйся божéственная двéре Свéта:/ зашéдый бо Iисýс во гроб возсiя́,/ просiя́в сóлнца светлéе,/ и вéрныя вся озари́в,// Богорáдованная Влады́чице.
Глас 1
Припéв: Святы́й апóстоле Мáрко, молú Бóга о нас.
Тропáрь: Рóждшееся Слóво от Отцá прéжде всех век,/ в естествó человéческое облéкшася Хрiстá, проповéдал есѝ, слáвне, и вопiя́л:// вся делá Госпóдня, Гóспода пóйте и превозноси́те во вся вéки.
Припéв: Святы́й апóстоле Мáрко, молú Бóга о нас.
Тропáрь: Дáвшаго избавлéнiе себé за нáше согрешéнiе/ и страсть пáдших, воздви́гшаго Хрiстá прослáвил еси́, слáвне, вопiя́:// вся делá Госпóдня, Гóспода пóйте и превозноси́те во вся вéки.
Припéв: Святы́й апóстоле Мáрко, молú Бóга о нас.
Тропáрь: Петрóву Марк повинýяся премýдрому учи́тельству,/ премýдре писáнiи вообрази́л есѝ вéрным честнóе Евáнгелiе, вопiю́щим:// вся делá Госпóдня, Гóспода пóйте и превозноси́те во вся вéки.
Припéв: Пресвятáя Богорóдице, спасú нас.
Богорóдичен: Дéва, Емманýила нося́щи я́ко Младéнца, предстá еги́птяном,/ и́мже, я́ко свéтлая звездá, Марк посылáется, взывáя:// вся делá Госпóдня, Гóспода пóйте и превозноси́те во вся вéки.
Глас 2
Припéв: Слáва Тебé, Бóже наш, слáва Тебé.
Тропáрь: Воскрéсл есѝ Iисýсе, свя́зан бысть враг, плѣни́ся ад, испраздни́шася грóби, востáша дóльнiи, покланя́ющеся тебѣ́ Хрiстé.
Припéв: Слáва Тебé, Бóже наш, слáва Тебé.
Тропáрь: Ióсифа чýднаго да восхвáлим вéрнiи,/ кýпно с Нiкоди́мом, и мvронóсицами вéрными,// вопию́щiя: Госпóдь воскрéсе вои́стинну.
Слáва Отцý и Сыну и Святóму Дýху.
Трóичен: Безначáлен еси́ Ѻ́тче,/ несоздáнен еси́ Сы́не,/ сопрестóлен и Дýше Святы́й,/ еди́но [Сiя́ три] Естествóм, и три Ли́цы,// еди́не Бóже и́стинный.
И ныне и присно и во вéки векóв. Аминь.
Богорóдичен: Да весели́тся Иессéй, да ликовствýет и Дави́д:/ се бо Дéва Богорáсленный жезл прозябé,// цвет присноживóтный Христá.
Катавáсiя: Свети́ся, свети́ся,/ нóвый Iерусали́ме:/ слáва бо Госпóдня/ на тебé возсiя́./ Ликýй ны́не/ и весели́ся, Сióне./ Ты же, Чи́стая, красýйся, Богорóдице,// о востáнiи Рождествá Твоегó.
Гóсподи, помилуй. (3 раза)
Слáва Отцý и Сыну и Святóму Дýху, и ныне и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьмѝ Бог наш.
Хор: Свят Госпóдь Бог наш
Светилен Пáсхи, самоглáсен: Плóтiю уснýв,/ я́ко мертв,/ Царю́ и Гóсподи,/ триднéвен воскрéсл есѝ,/ Адáма воздви́г от тли,/ и упраздни́в смерть:/ Пáсха нетлéнiя,// мíра спасéнiе.
Слáва Отцу и Сыну и Святóму Духу.
Светúлен ап. Мáрка: Премýдрости Небéсныя научи́вся, апóстоле,/ плетéнiя витíйская и чи́сла звездослóвцев разори́л еси́ язы́ком твои́м,/ о Мáрко преслáвне, и, учени́к быв Петрóв,// мíру проповéдал еси́ Евáнгельская словесá.
И ныне и присно и во вéки векóв. Аминь.
Светúлен Трióди (Недéли Миронóсиц): Жены́ услы́шите глас рáдованiя:/ мучи́теля áда попрáвый, от тли мiр воздви́же,/ тецы́те, другóм рцы́те Мои́м благовéстiя:/ хощý бо создáнiе Своé рáдостiю озари́ти,// отонýдуже прiи́де печáль.
ХВАЛИТНЫ
Хор, глас 4: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике ропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéние положи́, и не ми́мо и́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и́мя Госпóдне, я́ко вознесéся и́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике ропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сынове Сióни возрáдуются о Царé своéм. Да восхвáлят и́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обоюду остри́ в рукáх их: сотвори́ти отмщéнiе во языцех, обличéнiя в людех, связáти цари́ их пýты, и слáвныя их ручными окóвы желéзными,
На 8.Чтец, стих: Сотворúти в них суд напúсан:/ слáва сíя бýдет всем преподóбным Егó.
Стихúры воскрéсные, глас 2: Вся́кое дыхáнiе и вся тварь,/ Тя слáвит, Гóсподи,/ я́ко Крестóм смерть упраздни́л есѝ,/ да покáжеши лю́дем, éже из мéртвых Твоé Воскресéнiе,// я́ко еди́н Человеколю́бец.
Хвалúте Бóга во святых Егó,/ хвалúте Егó в утвержéнiи сúлы Егó.
Стихúра: Да рекýт iудéе, кáко вóини погуби́ша стрегýщiи Царя́; почтó бо кáмень не сохрани́ кáмене жи́зни; или́ погребéннаго да дадя́т, или́ воскрéсшему да поклóнятся, глагóлюще с нáми: слáва мнóжеству щедрóт твои́х, Спáсе наш, слáва тебѣ́.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стихúра: Рáдуйтеся лю́дiе и весели́теся, áнгел сѣдя́й на кáмени грóбнѣм, той нам благовѣсти́, рек: Хрiстóс воскрéсе из мéртвых, Спас мíра, и испóлни вся́ческая благоухáнiя: рáдуйтеся лю́дiе и весели́теся.
Хвалúте Егó во глáсе трýбнем, хвалúте Егó во псалтúри и гýслех.
Стихúра: Áнгел ýбо éже рáдуйся, прéжде твоего зачáтiя Гóсподи, благодáтнѣй принесé: áнгел же кáмень слáвнаго твоегó грóба въ твоé воскресéнiе отвалѝ: ѻ́в ýбо в печáли мѣ́сто, весéлiя óбразы возвѣщáя: сей же въ смéрти мѣ́сто, Влады́ку жизнодáвца проповѣ́дуя нам, тѣ́мже вопiéм ти: благодѣ́телю всѣх, Гóсподи слáва тебѣ́.
На 4. Хвалúте Егó в тимпáне и лúце, хвалúте Егó во стрýнах и оргáне.
Стихúры ап. Мáрка, глас 1: Мáрко всеблажéнне,/ от слáдостнаго потóка пил есѝ,/ я́ко из Едéма устреми́вшаяся/ пресвéтло чи́стая рекá ми́ра,/ обливáяй водáми/ Евáнгельскiя твоея прóповеди/ землѝ лицé,/ церкóвныя твéрди напая́я// Богодохновéнными учéнiи.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стихúра: Мáрко преслáвне,/ Моисéй ýбо прéжде/ еги́птяны в мóри потопи́,/ но ты, премýдре,/ от мóря прéлести тех извлéкл еси́/ си́лою же к тем с плóтiю Пришéдшаго/ и тех рукотворéнная низложи́вша// мы́шцею высóкою.
Во всю зéмлю изы́де вещáнiе их/ и в концы́ вселéнныя глагóлы их.
О Мáрко всесвящéнне,/ во свéте Дýха живы́й,/ духóвен весь был есѝ,/ и ны́не, всебогáте,/ и́же ко Влады́це неоску́дными зрéнiи/ и блажéннейшими осия́нiи,/ положéньми обожáемь/ тáинства глави́зну,// и кончи́ну обрéл есѝ многовожделéнну.
Небесá повéдают слáву Бóжию,/ творéнiе же рукý Егó возвещáет твердь.
Глас 6: Премýдрый лóвче, святы́й ученичé,/ дéлателю Спáсов и сказáтелю Тогó страстéй,/ и́же тварь вéрою обтéк,/ и прельщéнныя язы́ки собрáв,/ и Бóгу привéд,/ я́ко кади́ло дóброе, на Небесá возведéся./ Тéмже, предстоя́ Судiѝ,/ молѝ избáвитися нам от беззакóний нáших// и в День Сýдный избáвитися мучéнiя.
Слáва Отцý и Сыну и Святóму Дýху.
Стихира евангельская, глас 2: С ми́ры пришéдшим я́же с Марíею женáм,/ и недоумевáющимся,/ кáко бýдет им улучи́ти желáние,/ яви́ся кáмень взят,/ и Божéственный ю́ноша утоля́я мятéж душ их,/ востá бо, глагóлет, Iисýс Госпóдь./ Тéмже проповéдите проповéдником Егó,/ ученикóм в Галилéю тещѝ,/ и ви́дети Егó воскрéсша из мéртвых,// я́ко Жизнодáвца и Гóспода.
И ныне и прúсно и во вéки векóв, амúнь.
Глас 2: Преблагословéнна есѝ, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смeрть умертви́ся, и мы ожи́хом./ Тем воспевáюще вопiéм:/ благословéн Христóс Бог,// благоволи́вши тáко, слáва Тебé.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Óтче Вседержи́телю, Гóсподи Сы́не Единорóдный, Iисýсе Хрiстé, и Святы́й Дýше. Гóсподи Бóже, Áгнче Бóжiй, Сы́не Отéчь, взéмляй грех мíра, помилуй нас. Взéмляй грехѝ мíра, прiимѝ молитву нáшу. Седя́й одеснýю Отцá, помилуй нас. Яко Ты есѝ Един Свят; Ты есѝ Един Госпóдь, Iисýс Хрiстóс, в слáву Бóга Отцá, ами́нь.
На всяк день благословлю́ Тя и восхвалю́ имя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено имя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Отцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 2: Воскрéс из грóба и ýзы растерзáл еси áда,/ разрушил еси осуждéние смéрти, Гóсподи,/ вся от сетéй врагá избáвивый;/ явивый же Себé апóстолом Твоим,/ послáл еси я на прóповедь,/ и тéми мир Твой пóдал еси вселéнней,// Едине Многомилостиве.
Гóсподи помилуй (40 раз)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Гóсподи помилуй (12раз)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных христiáн во век вéка.
Честнéйшую Херувíм и слáвнейшую без сравнéния Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
ОТПУСТ
Воскресы́й из мéртвых, Христé, истинный Бог наш, молитвами Пречистыя Своея Мáтере, святы́х слáвных и всехвáльных Апóстол, Святых жен-мироносиц (Марíи Магдалины, Марии Клеóповой, Саломíи, Iоáнны, Мáрфы и Марíи, Сусáнны и иных), праведных Ióсифа Аримафейского и Никодима, ихже и пáмять ныне совершáем, святых и прáведных богоотéц Iоакима и Анны, и всех святых, помилуй и спасѝ нас, яко Благ и Человеколюбец. Аминь.
МНОГОЛЕТИЕ
ПЕРВЫЙ ЧАС
Христóс воскрéсе из мéртвых,/ смéртiю смерть попрáв/ и сýщим во гробéх живóт даровáв. (Трúжды)
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшний, и́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Óчи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 2: Егдá снизшéл есѝ к смéрти, Животé Безсмéртный, тогдá ад умертви́л есѝ блистáнiем Божествá. Егдá же и умéршыя от преиспóдних воскреси́л есѝ, вся Си́лы Небéсныя взывáху: Жизнодáвче, Христé Бóже наш, слáва Тебé.
Слáва Отцý и Сыну и Святóму Дýху.
Тропáрь ап. Мáрка, глас 3: Апóстоле святы́й и Евангели́сте Мáрко,/ моли́ Ми́лостиваго Бóга,/ да прегрешéний оставлéние// подáст душáм нáшим.
И ныне и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, прости́ беззакóнiя нáша, Святы́й, посетѝ и исцелѝ нéмощи нáша и́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Óтче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Христé, Сыне Бóжiй, поми́луй нас. Ами́нь.
КОНДАК
Кондáк Трióди (Недéли Миронóсиц), глас 2: Рáдоватися миронóсицам повелéл есѝ, плачь прамáтере Éвы утоли́л есѝ воскресéнiем Твои́м, Хрiстé Бóже, апóстолом же Твои́м проповéдати повелéл есѝ: Спас воскрéсе от грóба.
Гóсподи, помилуй. (40 раз)
И҆́же на вся́кое врéмя и на вся́кий час, на небесѝ и на землѝ покланя́емый и слáвимый Христé Бóже, долготерпели́ве, многоми́лостиве, многоблагоутрóбне, Иже прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Именем Госпóдним Гóсподи, благословѝ.
Хрiстé, Свéте Истинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланию зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
КОНДАК, ПАСХИ ГЛАС 8
Хор: Áще и во гроб снизшéл есѝ, Безсмéртне,/ но áдову разруши́л есѝ си́лу,/ и воскрéсл есѝ, я́ко победитель, Христé Бóже,/ женáм мироно́сицам вещáвый: рáдуйтеся,/ и Твои́м апóстолом мир дáруяй,// пáдшим подая́й воскресéнiе.
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
Христóс, и́стинный Бог наш, моли́твами пречи́стыя Своея́ Мáтере, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу