БЛАГОВЕЩЕНИЕ ПРЕСВЯТОЙ БОГОРОДИЦЫ. ЧАС ШЕСТЫЙ
7 апрéля 2022 гóда. Благовéщение Пресвятóй Богорóдицы. Послéдование часóв, изобразúтельных и вечéрни совмещéнной с обéдницей для домáшнего (келéйного) совершéния. Слýжба мирскúм чúном.
Прежде глаголи третий час
ЧАС ШЕСТЫЙ
Прииди́те, поклони́мся Царéви нáшему Бóгу.
Прииди́те, поклони́мся и припадéм Христý, Царéви нáшему Бóгу.
Прииди́те, поклони́мся и припадéм Самомý Христý, Царéви и Бóгу нáшему.
Псалом 53
Бóже, во имя Твоé спаси мя, и в силе Твоéй суди ми. Бóже, услыши молитву мою, внуши глагóлы уст моих. Яко чýждии востáша на мя и крéпцыи взыскáша дýшу мою, и не предложи́ша Бóга пред собóю. Се бо Бог помогáет ми, и Госпóдь застýпник души́ моéй. Отврати́т злáя врагóм мои́м, и́стиною Твоéю потреби́ их. Вóлею пожрý Тебé, исповéмся и́мени Твоемý, Гóсподи, яко блáго; Яко от вся́кия печáли избáвил мя еси́, и на враги́ моя воззрé óко моé.
Псалом 54
Внуши́, Бóже, моли́тву мою и не прéзри молéния моегó. Вонми́ ми и услыши мя: возскорбéх печáлию моéю и смятóхся. От глáса врáжия и от стужéния грéшнича, яко уклони́ша на мя беззакóние и во гнéве враждовáху ми. Сéрдце мое смятéся во мне и боя́знь смéрти нападé на мя. Страх и трéпет прииде на мя и покры́ мя тьма. И рех: кто даст ми крилé, яко голуби́не, и полещý, и почи́ю; Се удалихся бéгая и водворихся в пустыни. Чáях Бóга спасáющаго мя от малодýшия и от бýри. Потопи Гóсподи, и раздели языки их: я́ко видех беззакóние и пререкáние во грáде. Днем и нóщию обыдет и по стенáм егó: беззакóние и труд посредé егó и непрáвда. И не оскудé от стогн его лихва и лесть. Яко áще бы враг поносил ми, претерпéл бых ýбо, и áще бы ненавидяй мя на мя велерéчевал, укрыл бых ся от негó. Ты же человéче равнодýшне, владыко мой и знáемый мой; Иже кýпно наслаждáлся еси со мнóю брáшен, в дóму Бóжии ходихом единомышлéнием. Да приидет же смерть на ня, и да снидут во ад живи, яко лукáвство в жилищах их, посредé их. Аз к Бóгу воззвáх, и Госпóдь услыша мя. Вéчер и заýтра, и полýдне повéм, и возвещý, и услышит глас мой. Избáвит миром дýшу мою от приближáющихся мне, яко во мнóзе бяху со мнóю. Услышит Бог и смири́т я, Сый прéжде век. Несть бо им изменéния, яко не убояшася Бóга. Прострé рýку свою на воздаяние, оскверниша завéт Егó. Разделишася от гнéва лицá Егó, и прибли́жишася сердцá их, умякнуша словесá их пáче елéа, и та суть стрéлы. Возвéрзи на Гóспода печáль твою, и Той тя препитáет, не даст в век молвы прáведнику. Ты же, Бóже, низведéши их во студенéц истлéния, мýжие кровéй и льсти не преполовя́т дней свои́х. Аз же, Гóсподи, уповáю на Тя.
Псалом 90
Живый в пóмощи Вышняго, в крóве Бóга Небéснаго водвори́тся. Речéт Гóсподеви: застýпник мой еси и прибéжище моé, Бог мой, и уповáю на Негó. Яко Той избáвит тя от сéти лóвчи, и от словесé мятéжна; Плещмá Свои́ма осени́т тя, и под крилé Егó надéешися: орýжием обыдет тя и́стина Егó. Не убои́шися от стрáха нощнáго, от стрелы летя́щия во дни; От вéщи во тме преходя́щия, от сря́ща и бéса полýденнаго. Падéт от страны твоея́ тысяща, и тма одеснýю тебé, к тебé же не прибли́жится; Обáче очи́ма твои́ма смóтриши, и воздаяние грéшников ýзриши. Яко Ты, Гóсподи, уповáние моé, Вы́шняго положи́л еси прибéжище твоé. Не прии́дет к тебé зло, и рáна не прибли́жится телеси́ твоемý; Яко Áнгелом Свои́м заповéсть о тебé, сохрани́ти тя во всех путéх твои́х. На рукáх вóзмут тя, да не когдá преткнéши о кáмень нóгу твою; На áспида и васили́ска настýпиши, и поперéши льва и змия. Яко на Мя уповá, и избáвлю и: покры́ю и, я́ко познá имя Моé. Воззовéт ко Мне, и услышу егó: с ним есмь в скóрби, измý егó, и прослáвлю егó; Долготóю дней испóлню егó, и явлю емý спасéние Моé.
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помúлуй. (3 раза)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
КАФИСМА ОДИННАДЦАТАЯ
И чтем кафúсму 11-ю ( или одúн псалóм, или до 1-й Слáвы)
[Псалом 77]Внемли́те, лю́дие мои́, зако́ну моему́, приклони́те у́хо ва́ше во глаго́лы уст мои́х. Отве́рзу в при́тчах уста́ моя́, провеща́ю гана́ния испе́рва. Ели́ка слы́шахом и позна́хом я́, и отцы́ на́ши пове́даша нам: не утаи́шася от чад их в род ин, возвеша́юще хвалы́ Госпо́дни и си́лы Его́, и чудеса́ Его́, я́же сотвори́. И воздви́же свиде́ние во Иа́кове, и зако́н положи́ во Изра́или: ели́ка запове́да отце́м на́шим, сказа́ти я́ сыново́м свои́м, я́ко да позна́ет род ин, сы́нове родя́щиися, и воста́нут и пове́дят я́ сыново́м свои́м: да положа́т на Бо́га упова́ние свое́, и не забу́дут дел Бо́жиих, и за́поведи Его́ взы́щут. Да не бу́дут я́коже отцы́ их, род стропти́в и преогорчева́яй, род и́же не испра́ви се́рдца своего́, и не уве́ри с Бо́гом ду́ха своего́. Сы́нове Ефре́мли наляца́юще и стреля́юще лу́ки, возврати́шася в день бра́ни: не сохрани́ша заве́та Бо́жия, и в зако́не Его́ не восхоте́ша ходи́ти. И забы́ша благодея́ния Его́, и чудеса́ Его́, я́же показа́ им пред отцы́ их, я́же сотвори́ чудеса́ в земли́ Еги́петстей, на по́ли Танео́се. Разве́рзе мо́ре, и проведе́ их, предста́ви во́ды я́ко мех. И наста́ви я́ о́блаком во дни, и всю нощь просвеще́нием огня́. Разве́рзе ка́мень в пусты́ни, и напои́ я́ я́ко в бе́здне мно́зе, и изведе́ во́ду из ка́мене, и низведе́ я́ко ре́ки во́ды. И приложи́ша еще́ согреша́ти Ему́, преогорчи́ша Вы́шняго в безво́дней; и искуси́ша Бо́га в сердца́х свои́х, вопроси́ти бра́шна душа́м свои́м. И клевета́ша на Бо́га, и ре́ша: еда́ возмо́жет Бог угото́вати трапе́зу в пусты́ни? Поне́же порази́ ка́мень, и потеко́ша во́ды, и пото́цы наводни́шася: еда́ и хлеб мо́жет да́ти, или́ угото́вати трапе́зу лю́дем Свои́м? Сего́ ра́ди слы́ша Госпо́дь и презре́: и огнь возгоре́ся во Иа́кове, и гнев взы́де на Изра́иля, я́ко не ве́роваша Бо́гови, ниже́ упова́ша на спасе́ние Его́. И запове́да облако́м свы́ше, и две́ри небесе́ отве́рзе, и одожди́ им ма́нну я́сти, и хлеб небе́сный даде́ им. Хлеб а́нгельский яде́ челове́к, бра́шно посла́ им до сы́тости. Воздви́же юг с небесе́, и наведе́ си́лою Свое́ю ли́ва, и одожди́ на ня я́ко прах пло́ти, и я́ко песо́к морски́й пти́цы перна́ты. И нападо́ша посреде́ ста́на их, о́крест жили́щ их. И ядо́ша и насы́тишася зело́, и жела́ние их принесе́ им. Не лиши́шася от жела́ния своего́: еще́ бра́шну су́щу во усте́х их: и гнев Бо́жий взы́де на ня, и уби́ мно́жайшая их, и избра́нным Изра́илевым запя́т. Во всех сих согреши́ша еще́, и не ве́роваша чудесе́м Его́. И исчезо́ша в суете́ дни́е их, и ле́та их со тща́нием. Егда́ убива́ше я́, тогда́ взыска́ху Его́, и обраща́хуся, и у́треневаху к Бо́гу: и помяну́ша, я́ко Бог Помо́щник им есть, и Бог Вы́шний Изба́витель им есть. И возлюби́ша Его́ усты́ свои́ми, и язы́ком свои́м солга́ша Ему́: се́рдце же их не бе пра́во с Ним, ниже́ уве́ришася в заве́те Его́. То́йже есть щедр, и очи́стит грехи́ их, и не растли́т, и умно́жит отврати́ти я́рость Свою́, и не разжже́т всего́ гне́ва Своего́. И помяну́, я́ко плоть суть, дух ходя́й и не обраща́яйся. Колькра́ты преогорчи́ша Его́ в пусты́ни, прогне́ваша Его́ в земли́ безво́дней? И обрати́шася, и искуси́ша Бо́га, и Свята́го Изра́илева раздражи́ша, и не помяну́ша руки́ Его́ в день, во́ньже изба́ви я́ из руки́ оскорбля́юшаго, я́коже положи́ во Еги́пте зна́мения Своя́, и чудеса́ Своя́ на по́ли Танео́се, и преложи́ в кровь ре́ки их, и исто́чники их, я́ко да не пию́т. Посла́ на ня пе́сия му́хи и поядо́ша я́: и жа́бы, и растли́ я́. И даде́ рже плоды́ их, и труды́ их пруго́м. Уби́ гра́дом виногра́ды их, и черни́чие их сла́ною, и предаде́ гра́ду скоты́ их, и име́ние их огню́. Посла́ на ня гнев я́рости Своея́, я́рость и гнев и скорбь, посла́ние а́нгелы лю́тыми. Путесотвори́ стезю́ гне́ву Своему́, и не пощаде́ от сме́рти душ их: и скоты́ их в сме́рти заключи́, и порази́ вся́кое перворо́дное в земли́ Еги́петстей, нача́ток вся́каго труда́ их в селе́ниих Ха́мовых. И воздви́же я́ко о́вцы лю́ди Своя́, и возведе́ я́ я́ко ста́до в пусты́ни, и наста́ви я́ на упова́ние, и не убоя́шася, и враги́ их покры́ мо́ре. И введе́ я́ в го́ру святы́ни Своея́, го́ру сию́, ю́же стяжа́ десни́ца Его́. И изгна́ от лица́ их язы́ки, и по жре́бию даде́ им [зе́млю] у́жем жребодая́ния, и всели́ в селе́ниих их коле́на Изра́илева. И искуси́ша и преогорчи́ша Бо́га Вы́шняго, и свиде́ний Его́ не сохрани́ша, и отврати́шася, и отверго́шася, я́коже и отцы́ их, преврати́шася в лук развраще́н, и прогне́ваша Его́ в хо́лмех свои́х и во истука́нных свои́х раздражи́ша Его́. Слы́ша Бог и презре́, и уничижи́ зело́ Изра́иля, и отри́ну ски́нию Сило́мскую, селе́ние, е́же всели́ся в челове́цех. И предаде́ в плен кре́пость их, и добро́ту их в ру́ки враго́в, и затвори́ во ору́жии лю́ди Своя́, и достоя́ние Свое́ презре́. Ю́ноши их пояде́ огнь, и де́вы их не осе́тованы бы́ша; свяще́нницы их мече́м падо́ша, и вдови́цы их не опла́каны бу́дут. И воста́ я́ко спя́ Госпо́дь, я́ко си́лен и шу́мен от вина́, и порази́ враги́ Своя́ вспять, поноше́ние ве́чное даде́ им. И отри́ну селе́ние Ио́сифово, и коле́но Ефре́мово не избра́, и избра́ коле́но Иу́дово, го́ру Сио́ню, ю́же возлюби́, и созда́ я́ко единоро́га святи́лище Свое́, на земли́ основа́ и́ в век. И избра́ Дави́да раба́ Своего́, и восприя́т eго́ от стад о́вчих. От дои́лиц поя́т eго́ пасти́ Иа́кова раба́ Своего́ и Изра́иля достоя́ние Свое́. И упасе́ я́ в незло́бии се́рдца своего́, и в ра́зумех руку́ свое́ю наста́вил я́ есть.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýиа, аллилýиа, аллилýиа, слáва Тебé Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 78]Бо́же, приидо́ша язы́цы в достоя́ние Твое́, оскверни́ша храм святы́й Твой, положи́ша Иерусали́м я́ко ово́щное храни́лище, положи́ша тру́пия раб Твои́х бра́шно пти́цам небе́сным, пло́ти преподо́бных Твои́х звере́м земны́м. Пролия́ша кровь их я́ко во́ду о́крест Иерусали́ма, и не бе погреба́яй. Бы́хом поноше́ние сосе́дом на́шим, подражне́ние и поруга́ние су́щим о́крест нас. Доко́ле, Го́споди, прогне́ваешися до конца́? Разжже́тся я́ко огнь рве́ние Твое́? Проле́й гнев Твой на язы́ки не зна́ющия Тебе́, и на ца́рствия, я́же и́мене Твоего́ не призва́ша, я́ко поядо́ша Иа́кова, и ме́сто eго́ опустоши́ша. Не помяни́ на́ших беззако́ний пе́рвых: ско́ро да предваря́т ны щедро́ты Твоя́, Го́споди, я́ко обнища́хом зело́. Помози́ нам, Бо́же, Спаси́телю наш, сла́вы ра́ди и́мене Твоего́, Го́споди, изба́ви ны, и очи́сти грехи́ на́ша и́мене ра́ди Твоего́. Да не когда́ реку́т язы́цы, где есть Бог их? И да уве́стся во язы́цех пред очи́ма на́шима отмще́ние кро́ве раб Твои́х пролиты́я. Да вни́дет пред Тя воздыха́ние окова́нных, по вели́чию мы́шцы Твоея́ снабди́ сы́ны умерщвле́нных. Возда́ждь сосе́дом на́шим седмери́цею в не́дро их поноше́ние их, и́мже поноси́ша Тя, Го́споди. Мы же, лю́дие Твои́ и о́вцы па́жити Твоея́, испове́мыся Тебе́, Бо́же, во век, в род и род возвести́м хвалу́ Твою́.
[Псалом 79]Пасы́й Изра́иля вонми́: наставля́яй я́ко овча́ Ио́сифа, седя́й на Херуви́мех, яви́ся, пред Ефре́мом и Beниами́ном и Манасси́ем, воздви́гни си́лу Твою́, и прииди́ во е́же спасти́ нас. Бо́же, обрати́ ны, и просвети́ лице́ Твое́, и спасе́мся. Го́споди Бо́же сил, доко́ле гне́ваешися на моли́тву раб Твои́х? Напита́еши нас хле́бом сле́зным, и напои́ши нас слеза́ми в ме́ру. Положи́л еси́ нас в пререка́ние сосе́дом на́шим, и врази́ на́ши подражни́ша ны. Го́споди Бо́же сил, обрати́ ны, и просвети́ лице́ Твое́, и спасе́мся. Виногра́д из Еги́пта прене́сл еси́, изгна́л еси́ язы́ки, и насади́л еси́ и́. Путесотвори́л еси́ пред ним, и насади́л еси́ коре́ния eго́, и испо́лни зе́млю. Покры́ го́ры сень eго́, и ве́твия eго́ ке́дры Бо́жия; простре́ ро́зги eго́ до мо́ря, и да́же до рек о́трасли eго́. Вску́ю низложи́л еси́ опло́т eго́, и объима́ют и́ вси мимоходя́щии путе́м? Озоба́ и́ вепрь от дубра́вы, и уедине́нный ди́вий пояде́ и́. Бо́же сил, обрати́ся у́бо, и при́зри с Небесе́ и виждь, и посети́ виногра́д сей, и соверши́ и́, eго́же насади́ десни́ца Твоя́, и на сы́на челове́ческаго, eго́же укрепи́л еси́ Себе́. Пожже́н огне́м и раско́пан, от запреще́ния лица́ Твоего́ поги́бнут. Да бу́дет рука́ Твоя́ на му́жа десни́цы Твоея́, и на сы́на челове́ческаго, eго́же укрепи́л еси́ Себе́, и не отсту́пим от Тебе́; оживи́ши ны, и и́мя Твое́ призове́м. Го́споди Бо́же сил, обрати́ ны, и просвети́ лице́ Твое́, и спасе́мся.
[Псалом 80]Ра́дуйтеся Бо́гу, Помо́щнику на́шему, воскли́кните Бо́гу Иа́ковлю, приими́те псало́м и дади́те тимпа́н, псалти́рь красе́н с гу́сльми, воструби́те в новоме́сячии трубо́ю, во благознамени́тый день пра́здника ва́шего, я́ко повеле́ние Изра́илеви есть, и судьба́ Бо́гу Иа́ковлю. Свиде́ние во Ио́сифе положи́ е́, внегда́ изы́ти eму́ от земли́ Еги́петския, язы́ка eго́же не ве́дяше услы́ша. Отъя́т от бре́мене хребе́т eго́, ру́це eго́ в коши́ порабо́тасте. В ско́рби призва́л Мя еси́, и изба́вих тя, услы́шах тя в та́йне бу́рне, искуси́х тя на воде́ пререка́ния. Слы́шите, лю́дие мои́, и засвиде́тельствую вам, Изра́илю, а́ще послу́шаеши Мене́. Не бу́дет Тебе́ бог нов , ниже́ поклони́шися бо́гу чужде́му. Аз бо есмь Госпо́дь Бог твой, изведы́й тя от земли́ Еги́петския, разшири́ уста́ Твоя́, и испо́лню я́. И не послу́шаша лю́дие мои́ гла́са Моего́, и Изра́иль не внят Ми: и отпусти́х я́ по начина́нием серде́ц их, по́йдут в начина́ниих свои́х. А́ще бы́ша лю́дие Мои́ послу́шали Мене́, Изра́иль а́ще бы в пути́ Моя́ ходи́л, ни о чесо́м же у́бо враги́ eго́ смири́л бых, и на оскорбля́юшия их возложи́л бых ру́ку Мою́. Врази́ Госпо́дни солга́ша Eму́, и бу́дет вре́мя их в век. И напита́ их от ту́ка пшени́чна, и от ка́мене ме́да насы́ти их.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýиа, аллилýиа, аллилýиа, слáва Тебé Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 81]Бог ста в со́нме бого́в, посреде́ же бо́ги разсу́дит. Доко́ле су́дите непра́вду, и ли́ца гре́шников прие́млете? Суди́те си́ру и убо́гу, смире́на и ни́ща оправда́йте. Изми́те ни́ща и убо́га, из руки́ гре́шничи изба́вите eго́. Не позна́ша, ниже́ уразуме́ша, во тьме хо́дят: да подви́жатся вся основа́ния земли́. Аз рех: бо́зи есте́, и сы́нове Вы́шняго вси. Вы же я́ко челове́цы умира́ете, и я́ко еди́н от князе́й па́даете. Воскресни́, Бо́же, суди́ земли́: я́ко Ты насле́диши во всех язы́цех.
[Псалом 82]Бо́же, кто уподо́бится Тебе́? Не премолчи́ ниже́ укроти́, Бо́же. Я́ко се врази́ Твои́ возшуме́ша, и ненави́дящии Тя воздвиго́ша главу́. На лю́ди Твоя́ лука́вноваша во́лею, и совеща́ша на святы́я Твоя́. Ре́ша: прииди́те и потреби́м я́ от язы́к, и не помяне́тся и́мя Изра́илево ктому́. Я́ко совеща́ша единомышле́нием вку́пе, на Тя заве́т завеща́ша: селе́ния Идуме́йска, и Исма́илите, Моа́в и Ага́ряне: Гева́л и Аммо́н и Амали́к, иноплеме́нницы с живу́щими в Ти́ре, и́бо и Ассу́р прии́де с ни́ми, бы́ша в заступле́ние сыново́м Ло́товым. Сотвори́ им я́ко Мадиа́му и Сиса́ре, я́ко Иави́му в пото́це Ки́ссове. Потреби́шася во Аендо́ре, бы́ша я́ко гной земны́й. Положи́ кня́зи их, я́ко Ори́ва и Зи́ва, и Зеве́а и Салма́на, вся кня́зи их, и́же ре́ша: да насле́дим себе́ святи́лише Бо́жие. Бо́же мой, положи́ я́ я́ко ко́ло, я́ко трость пред лице́м ве́тра. Я́ко огнь попаля́яй дубра́вы, я́ко пла́мень пожига́яй го́ры, та́ко пожене́ши я́ бу́рею Твое́ю, и гне́вом Твои́м смяте́ши я́. Испо́лни ли́ца их безче́стия, и взы́щут и́мене Твоего́, Го́споди. Да постыдя́тся и смяту́тся в век ве́ка, и посра́мятся и поги́бнут. И да позна́ют, я́ко и́мя Тебе́ Госпо́дь, Ты еди́н Вы́шний по всей земли́.
[Псалом 83]Коль возлю́бленна селе́ния Твоя́, Го́споди сил́ Жела́ет и скончава́ется душа́ моя́ во дворы́ Госпо́дни, се́рдце мое́ и плоть моя́ возра́довастася о Бо́зе жи́ве. И́бо пти́ца обре́те себе́ хра́мину, и го́рлица гнездо́ себе́, иде́же положи́т птенцы́ своя́, олтари́ Твоя́, Го́споди сил, Царю́ мой и Бо́же мой. Блаже́ни живу́щии в дому́ Твое́м, в ве́ки веко́в восхва́лят Тя. Блаже́н муж, eму́же есть заступле́ние eго́ у Тебе́; восхожде́ния в се́рдце свое́м положи́, во юдо́ль плаче́вную, в ме́сто е́же положи́, и́бо благослове́ние даст законополага́яй. По́йдут от си́лы в си́лу: яви́тся Бог бого́в в Сио́не. Го́споди Бо́же сил, услы́ши моли́тву мою́, внуши́, Бо́же Иа́ковль. Защи́тниче наш, виждь, Бо́же, и при́зри на лице́ христа́ Твоего́. Я́ко лу́чше день еди́н во дво́рех Твои́х па́че ты́сящ: изво́лих примета́тися в дому́ Бо́га моего́ па́че, не́же жи́ти ми в селе́ниих гре́шничих. Я́ко ми́лость и и́стину лю́бит Госпо́дь, Бог благода́ть и сла́ву даст, Госпо́дь не лиши́т благи́х ходя́щих незло́бием. Го́споди Бо́же сил, Блаже́н челове́к упова́яй на Тя.
[Псалом 84]Благоволи́л еси́, Го́споди, зе́млю Твою́, возврати́л еси́ плен Иа́ковль: оста́вил еси́ беззако́ния люде́й Твои́х, покры́л еси́ вся грехи́ их. Укроти́л еси́ весь гнев Твой, возврати́лся еси́ от гне́ва я́рости Твоея́. Возврати́ нас, Бо́же спасе́ний на́ших, и отврати́ я́рость Твою́ от нас. Еда́ во ве́ки прогне́ваешися на ны? Или́ простре́ши гнев Твой от ро́да в род? Бо́же, Ты обра́щься оживи́ши ны, и лю́дие Твои́ возвеселя́тся о Тебе́. Яви́ нам, Го́споди, ми́лость Твою́, и спасе́ние Твое́ даждь нам. Услы́шу, что рече́т о мне Госпо́дь Бог: я́ко рече́т мир на лю́ди Своя́, и на преподо́бныя Своя́, и на обраща́ющия сердца́ к Нему́. Оба́че близ боя́щихся Его́ спасе́ние Его́, всели́ти сла́ву в зе́млю на́шу. Ми́лость и и́стина срето́стеся, пра́вда и мир облобыза́стася. И́стина от земли́ возсия́, и пра́вда с Небесе́ прини́че, и́бо Госпо́дь даст бла́гость, и земля́ на́ша даст плод свой. Пра́вда пред Ним предъи́дет, и положи́т в путь стопы́ своя́.
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помúлуй. (3 раза)
Слáва Отцý и Сыну и Святóму Дýху.
Тропáрь Благовéщения, глас 4: Днесь спасéния нáшего глави́зна и éже от вéка тáинства явлéние: Сын Бóжий Сын Дéвы бывáет, и Гаврии́л благодáть благовествýет. Тéмже и мы с ним Богорóдице возопии́м: рáдуйся, Благодáтная, Госпóдь с Тобóю.
И ныне и прúсно и во вéки векóв. Амúнь.
Богорóдичен: Яко не и́мамы дерзновéния за премнóгия грехи́ нáша, Ты Иже от Тебé Рóждшагося моли́, Богорóдице Дéво: мнóго бо мóжет молéние Мáтернее ко благосéрдию Владыки: не прéзри грéшных мольбы, Всечи́стая, яко ми́лостив есть и спасти́ моги́й, Иже и страдáти о нас извóливый.
Чтец: Тропарь прорóчества, глас шестый. Благоутрóбне, долготерпели́ве Вседержи́телю Гóсподи, низпосли́ ми́лость Твою́ на лю́ди Твоя́.
Слáва Отцу и Сыну и Святóму Духу, и ныне и присно и во вéки векóв. Аминь.
Благоутрóбне, долготерпели́ве Вседержи́телю Гóсподи, низпосли́ ми́лость Твою́ на лю́ди Твоя́.
Чтец: Прокимен, глас шестый. Госпóдь воцари́ся, да рáдуется земля́.
Хор: Госпóдь воцарúся, да рáдуется земля́.
Чтец: Да веселя́тся óстрови мнóзи.
Хор: Госпóдь воцарúся, да рáдуется земля́.
Чтец: Госпóдь воцари́ся.
Хор: Да рáдуется земля́.
Чтец: Прорóчества Исáиина чтéние.
(Из главы 42) Тáко глагóлет Госпóдь Бог, сотвори́вый не́бо, и водрузи́вый е́, утвержде́й зе́млю, и я́же на ней, и дая́й дыхáние лю́дем, и́же на ней, и дух ходя́щим на ней. Аз Госпóдь Бог, призвáх тя в прáвде, и удержу́ за ру́ку твою́, и укреплю́ тя: и дах тя в заве́т рóда Изрáилева, во свет язы́ков, Отве́рсти óчи слепы́х, извести́ от уз свя́занныя, и из дóму темни́цы, и седя́щия во тьме. Аз Госпóдь Бог, сие́ Мое́ есть и́мя: слáвы Моея́ инóму не дам, ниже́ доброде́телей Мои́х истукáнным. Я́же из начáла, се приидóша: и нóвая, я́же Аз возвещу́, и пре́жде не́же возвести́ти, яви́шася вам. Воспóйте Гóсподеви песнь нóву: начáльство Егó, прослáвите и́мя Егó от коне́ц земли́: сходя́щии в мóре, и плáвающии по нему́, óстрови и живу́щии на них. Возвесели́ся пусты́не, и ве́си ея́, придвóрия, и живу́щии в Кидáре: возвеселя́тся живу́щии на кáмени, от крáя гор возопию́т. Дадя́т Бóгу слáву, доброде́тели егó во óстровех возвестя́т. Госпóдь Бог сил изы́дет, и сокруши́т рать, воздви́гнет рве́ние, и возопие́т на враги́ Своя́ с кре́постию. Молчáх, едá и всегдá умолчу́, и потерплю́? терпе́х я́ко раждáющая, истреблю́ и изсушу́ вку́пе: Опустошу́ гóры и хóлми, и вся́ку траву́ их изсушу́, и положу́ ре́ки во óстровы, и лу́ги изсушу́. И наведу́ слепы́я на путь, егóже не ви́деша, и по стезя́м, и́хже не знáша, ходи́ти сотворю́ и́м: сотворю́ им тьму во свет, и стрóпотная в прáвая. сия́ глагóлы сотворю́, и не остáвлю их.
()
Чтец: Прокимен, глас шестый. Воспóйте Гóсподеви пéснь нóву я́ко ди́вна сотвори́ Госпóдь, спасé егó десни́ца Егó.
Хор: Воспóйте Гóсподеви пéснь нóву я́ко дúвна сотворú Госпóдь, спасé егó деснúца Егó.
Чтец: Ви́деша вси́ концы́ земли́ спасéние Бóга на́шего.
Хор: Воспóйте Гóсподеви пéснь нóву я́ко дúвна сотворú Госпóдь, спасé егó деснúца Егó.
Чтец: Воспóйте Гóсподеви пéснь нóву я́ко ди́вна сотвори́ Госпóдь.
Хор: Спасé егó деснúца Егó.
Чтец: Скóро да предварят ны щедрóты Твоя, Гóсподи, яко обнищáхом зелó: помози́ нам, Бóже Спáсе наш, слáвы рáди и́мене Твоегó; Гóсподи, избáви нас, и очи́сти грехи́ нáша, и́мене рáди Твоегó.
Посем Трисвятое по Отче наш
Святы́й Бóже, Святый Крéпкий, Святый Безсмéртный, помилуй нас. (3 раза)
Слáва Отцý и Сыну и Святóму Дýху, и ныне и присно и во вéки векóв, аминь.
Пресвятая Трóице, помилуй нас, Гóсподи, очисти грехи нáша, Владыко, прости беззакóния нáша, Святы́й, посети и исцели нéмощи нáша и́мене Твоегó рáди.
Гóсподи, поми́луй. (3 раза)
Слáва Отцý и Сыну и Святóму Дýху, и ныне и при́сно и во вéки векóв, аминь.
Óтче наш, Иже еси на небесéх. Да святи́тся Имя Твоé, да приии́дет Цáрствие Твоé, да бýдет вóля Твоя, я́ко на небеси́ и на земли́. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введи́ нас во искушéние, но избáви нас от лукáваго.
Гóсподи, Иисýсе Христé, Сыне Бóжий, поми́луй нас. Ами́нь.
КОНДAК
Кондáк Благовéщения, глас 8: Взбрáнной Воевóде победи́тельная, я́ко избáвльшеся от злы́х, благодáрственная восписýем Ти́ раби́ Твои́, Богорóдице; но я́ко имýщая держáву непобеди́мую, от вся́ких нас бед свободи́, да зовéм Ти́: рáдуйся, Невéсто Неневéстная.
Гóсподи, помúлуй. (40 раз)
Иже на вся́кое врéмя и на вся́кий час, на небеси́ и на земли́ покланя́емый и слáвимый Христé Бóже, долготерпели́ве, многоми́лостиве, многоблагоутрóбне, Иже прáведныя любя́й, и грéшныя ми́луяй, Иже вся зовы́й ко спасéнию обещáния рáди бýдущих благ; Сам, Гóсподи, приими́ и нáша в час сей моли́твы, и испрáви живóт наш к зáповедем Твои́м; дýши нáша освяти́, телесá очи́сти, помышлéния испрáви, мы́сли очи́сти, и избáви нас от вся́кия скóрби, зол и болéзней; огради́ нас святы́ми Твои́ми Áнгелы, да ополчéнием их соблюдáеми и наставля́еми, дости́гнем в соединéние вéры, и в рáзум непристýпныя Твоея́ слáвы, я́ко благословéн еси́ во вéки векóв, ами́нь.
Гóсподи, поми́луй. (3 раза)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Честнéйшую Херуви́м и слáвнейшую без сравнéния Серафи́м, без истлéния Бóга Слóва рóждшую, сýщую Богорóдицу, Тя величáем.
Именем Госпóдним Гóсподи, благослови́.
Моли́твами святы́х отéц нáших, Гóсподи Иисýсе Христé, Бóже наш, поми́луй нас, ами́нь.
Молитва святаго Ефрема Сирина
Гóсподи и Влады́ко животá моегó, дух прáздности, уны́ния, любоначáлия, и празднослóвия не даждь ми. (Земнóй поклóн.)
Дух же целомýдрия, смиренномýдрия, терпéния, и любвé, дáруй ми рабý Твоемý. (Земнóй поклóн.)
Ей, Гóсподи Царю́, дáруй ми зрéти моя́ прегрешéния, и не осуждáти брáта моегó, яко благословéн еси во вéки векóв, ами́нь. (Земнóй поклóн.)
Таже молитва святаго Великаго Василия
Бóже и Гóсподи сил и всея́ твáри Содéтелю, Иже за милосéрдие безприклáдныя ми́лости Твоея́ Единорóднаго Сы́на Твоегó, Гóспода нáшего Иисýса Христá, низпослáвый на спасéние рóда нáшего, и честны́м Егó Крестóм рукописáние грех нáших растерзáвый, и победи́вый тем начáла и влáсти тьмы. Сам, Влады́ко Человеколю́бче, приими́ и нас, грéшных, благодáрственныя сия и молéбныя моли́твы и избáви нас от вся́каго всегуби́тельнаго и мрáчнаго прегрешéния и всех озлóбити нас и́щущих ви́димых и неви́димых враг. Пригвозди́ стрáху Твоемý плóти нáша и не уклони́ сердéц нáших в словесá или помышлéния лукáвствия, но любóвию Твоéю уязви́ дýши нáша, да, к Тебé всегдá взирáюще и éже от Тебé свéтом наставля́еми, Тебé, непристýпнаго и присносýщнаго зря́ще Свéта, непрестáнное Тебé исповéдание и благодарéние возсылáем, Безначáльному Отцý со Единорóдным Твоим Сы́ном и Всесвяты́м, и Благи́м, и Животворя́щим Твои́м Дýхом ны́не, и при́сно, и во вéки векóв, ами́нь.
И глаголем зде девятый час.