ПРОЩЕНОЕ ВОСКРЕСЕНИЕ. Неделя сыропустная. Глас 4. УТРЕНЯ (продолжение) ЕВАНГЕЛИЕ. КАНОН
6 мáрта 2022 гóда. Недéля сыропýстная. Прощéное воскресéнье. Воспоминáние Адáмова изгнáния. Заговенье на Велúкий пост. Глас 4. Воскрéсная прáздничная слýжба для домáшнего (келéйного) совершéния. Слýжба мирскúм чúном.
Начало зри здесь ( великая вечерня) и здесь ( утреня)
КАФИЗМА ТРЕТЬЯ
(3-я cтатия или 3-я слава)
[Псалом 21]Бóже, Бóже мой, вонми ми, вскую остáвил мя еси? Далéче от спасéния моегó словесá грехопадéний моих. Бóже мой, воззову во дни, и не услышиши, и в нощи, и не в безýмие мне. Ты же во Святéм живéши, хвалó Изрáилева. На Тя уповáша отцы нáши, уповáша и избáвил еси я. К Тебé воззвáша, и спасóшася, на Тя уповáша, и не постыдéшася. Аз же есмь червь, а не человéк, поношéние человéков и уничижéние людéй. Вси видящии мя поругáша ми ся, глагóлаша устнáми, покивáша главóю: уповá на Гóспода, да избáвит eгó, да спасéт eгó, яко хóщет eгó. Яко Ты еси истóргий мя из чрéва, уповáние моé от сосцý мáтере моея. К Тебé привéржен есмь от ложéсн, от чрéва мáтере моея Бог мой еси Ты. Да не отстýпиши от менé, яко скорбь близ, яко несть помогáяй ми. Обыдóша мя тельцы мнóзи, юнцы тýчнии одержáша мя. Отверзóша на мя устá своя, яко лев восхищáяй и рыкáяй. Яко водá излияхся, и разсыпашася вся кóсти моя, бысть сéрдце моé яко воск, тáяй посредé чрéва моегó. Изсше яко скудéль крéпость моя, и язык мой прильпé гортáни моему, и в персть смéрти свел мя еси. Яко обыдóша мя пси мнóзи, сонм лукáвых одержáша мя, ископáша рýце мои и нóзе мои. Исчетóша вся кóсти моя, тии же смотриша и презрéша мя. Разделиша ризы моя себé, и о одéжди моéй метáша жрéбий. Ты же, Гóсподи, не удали пóмощь Твою от менé, на заступлéние моé вонми. Избáви от оружия дýшу мою, и из руки пéсии единорóдную мою. Спаси мя от уст львóвых и от рог единорóжь смирéние моé. Повéм имя Твоé брáтии моéй, посредé цéркве воспою Тя. Боящиися Гóспода, восхвалите Егó, все сéмя Иáковле, прослáвите Егó, да убоится же от Негó все сéмя Изрáилево. Яко не уничижи, нижé негодовá молитвы нищаго, нижé отврати лицé Своé от менé, и егдá воззвáх к Немý, услыша мя. От Тебé похвалá моя, в цéркви велицей исповéмся Тебé, молитвы моя воздáм пред боящимися Егó. Ядят убóзии и насытятся, и восхвáлят Гóспода взыскáющии Егó, живá бýдут сердцá их в век вéка. Помянýтся и обратятся ко Гóсподу вси концы земли, и поклóнятся пред Ним вся отéчествия язык. Яко Госпóдне есть цáрствие, и Той обладáет языки. Ядóша и поклонишася вси тýчнии земли, пред Ним припадýт вси низходящии в зéмлю, и душá моя Томý живéт. И сéмя моé порабóтает Емý, возвестит Гóсподеви род грядýщий. И возвестят прáвду Егó людем рóждшымся, яже сотвори Госпóдь.
[Псалом 22]Госпóдь пасéт мя, и ничтóже мя лишит. На мéсте злáчне, тáмо всели мя, на водé покóйне воспитá мя. Дýшу мою обрати, настáви мя на стези прáвды, имене рáди Своегó. Аще бо и пойдý посредé сéни смéртныя, не убоюся зла, яко Ты со мнóю еси, жезл Твой и пáлица Твоя, та мя утéшиста. Уготóвал еси предо мнóю трапéзу сопротив стужáющым мне, умáстил еси елéом главý мою, и чáша Твоя упоявáющи мя, яко держáвна. И милость Твоя поженéт мя вся дни животá моегó, и éже вселити ми ся в дом Госпóдень, в долготу дний.
[Псалом 23]Госпóдня земля, и исполнéние ея, вселéнная и вси живýщии на ней. Той на морях основáл ю есть, и на рекáх уготóвал ю есть. Кто взыдет на гóру Госпóдню? или кто стáнет на мéсте святéм Егó? Неповинен рукáма и чист сéрдцем, иже не прият всýе дýшу свою, и не клятся лéстию искреннему своемý. Сей приимет благословéние от Гóспода, и милостыню от Бóга, Спáса своегó. Сей род ищущих Гóспода, ищущих лицé Бóга Иáковля. Возмите вратá князи вáша, и возмитеся вратá вéчная, и внидет Царь слáвы. Кто есть сей Царь слáвы? Госпóдь крéпок и силен, Госпóдь силен в брáни. Возмите вратá князи вáша, и возмитеся вратá вéчная, и внидет Царь слáвы. Кто есть сей Царь слáвы? Госпóдь сил, Той есть Царь слáвы.
Чтец: Слáва Отцу и Сыну и Святóму Духу, и ныне и присно и во вéки векóв, аминь.
Аллилуиа, аллилуиа, аллилуиа, слáва Тебé Бóже. (3 раза)
Гóсподи, помилуй. (12 раз)
Хор (по кафисме седальны воскрéсные, глас 4): Воскре́сл еси́ я́ко Безсме́ртный от гро́ба, Спа́се,/ совоздви́гл еси́ мир Твой си́лою Твое́ю, Христе́ Бо́же наш,/ сокруши́л еси́ в кре́пости сме́рти держа́ву,/ показа́л еси́, Ми́лостиве, воскресе́ние всем:// те́мже Тя и сла́вим, Еди́не Человеколю́бче.
Стих: Исповéмся Тебé Гóсподи всем сéрдцем моúм,/ повéм вся чудесá Твоя́.
С гóрних высóт соше́д Гаврии́л,/ и к ка́меню присту́пль, иде́же Ка́мень жи́зни,/ белонося́й взыва́ше ко пла́чущим:/ преста́ните вы от рыда́ния вóпля, име́ющия и ны́не ми́лостивное:/ Егóже бо и́щете пла́чуща, дерза́йте, я́ко вои́стинну воста́л есть./ Те́мже возопи́йте апóстолом: я́ко воскре́се Госпóдь,/ Воста́вшему поклони́теся ра́дость прие́мша.// Дерза́йте у́бо, да дерза́ет у́бо и Éва.
Слáва Отцý и Сыну и Святóму Дýху, и ны́не и прúсно и во вéки векóв, амúнь.
Богорóдичен: Удиви́шася Чи́стая, вси а́нгелов ли́цы та́инству Твоегó рождéния стра́шному:/ ка́ко И́же вся содержа́й ма́нием еди́нем,/ объя́тии Твои́ми я́ко человéк содержава́ется,/ и приéмлет нача́ло Превéчный и млекóм пита́ется,/ И́же вся́кое дыха́ние пита́яй неизречéнною бла́гостию;// и Тя, я́ко вои́стинну Бóжию Ма́терь хва́ляще, сла́вят.
ПОЛИЕЛЕЙ
Хор: Хвали́те Имя Госпóдне, хвали́те, раби́ Гóспода.
Аллилýиа (трúжды)
Благословéн Госпóдь от Сиóна, живы́й во Иерусали́ме.
Аллилýиа (трúжды)
Исповéдайтеся Гóсподеви, я́ко Благ, я́ко в век ми́лость Егó.
Аллилýиа (трúжды)
Исповéдайтеся Бóгу Небéсному, я́ко в век ми́лость Егó.
Аллилýиа (трúжды)
ПСАЛОМ 136
На река́х Вавило́нских, та́мо седóхом и пла́кахом, внегда́ помянýти нам Сиóна. Аллилýиа.
На вéрбиих посредé егó обéсихом орга́ны на́ша. Аллилýиа.
Я́ко та́мо вопроси́ша ны плéншии нас о словесéх пéсней и вéдшии нас о пении. Аллилýиа.
Воспóйте нам от пéсней Сиóнских. Аллилýиа.
Ка́ко воспоéм пéснь Госпóдню на земли́ чуждéй? Аллилýиа.
А́ще забýду тебé, Иерусали́ме, забвéна бýди десни́ца моя́. Аллилýиа.
Прильпни́ язы́к мой горта́ни моему́, а́ще не помянý тебé, а́ще не предложý Иерусали́ма, я́ко в нача́ле весéлия моегó. Аллилýиа.
Помяни́, Гóсподи, сы́ны Едóмския, в день Иерусали́мль глагóлющия: истоща́йте, истоща́йте до основа́ний егó. Аллилýиа.
Дщи́ Вавилóня окая́нная, блажéн и́же возда́ст тебé воздая́ние твоé, éже воздала́ еси́ нам. Аллилýиа.
Блажéн и́же и́мет и разбиéт младéнцы твоя́ о ка́мень. Аллилýиа.
ТРОПАРИ ВОСКРЕСНЫЕ, глас 5
Благословéн есú, Гóсподи,/ научú мя оправдáнием Твоúм.
Ангельски́й собóр удиви́ся,/ зря́ Тебé в мéртвых вмени́вшася,/ смéртную же, Спа́се, крéпость разори́ша,/ и с Собóю Ада́ма воздви́гша,// и от ада вся свобóждша.
Благословéн есú, Гóсподи,/ научú мя оправдáнием Твоúм.
Почто́ ми́ра с ми́лостивными слеза́ми,/ о учени́цы растворя́ете?/ Блиста́яйся во грóбе А́нгел/ мироно́сицам веща́ше:/ ви́дите вы грóб и уразумéйте,// Спас бо воскрéсе от грóба.
Благословéн есú, Гóсподи,/ научú мя оправдáнием Твоúм.
Зелó ра́но мироно́сицы теча́ху/ ко грóбу Твоему́ рыда́ющия,/ но предста́ к ним А́нгел, и речé:/ рыда́ния врéмя преста́, не пла́чите,// воскресéние же апóстолом рцы́те.
Благословéн есú, Гóсподи,/ научú мя оправдáнием Твоúм.
Миронóсицы жены́, с ми́ры пришéдша/ ко грóбу Твоемý, Спа́се, рыда́ху,/ А́нгел же к ним речé, глагóля:/ что с мéртвыми Жива́го помышля́ете?// Я́ко Бог бо воскрéсе от грóба.
Чтец: Слáва Отцý и Сыну и Святóму Дýху.
Поклони́мся Отцý,/ и Егó Сы́нови, и Святóму Дýху,/ Святéй Трóице во еди́ном существé, с Серафи́мы зову́ще:/ Свят, Свят, Свят еси́, Гóсподи.
И ныне и прúсно и во вéки векóв. Амúнь.
Жизнода́вца рóждши,/ греха́, Дéво, Ада́ма изба́вила еси́,/ ра́дость же Éве в печа́ли ме́сто подала́ еси́;/ па́дшия же от жи́зни/ к сей напра́ви,// из Тебé воплоти́выйся Бог и Человéк.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помилуй. (12 раз)
ИПАКОИ
Глас 4: Я́же Твоегó преслáвнаго востáния, предтéкша миронóсицы,/ апóстолом проповéдаху Христé,/ я́ко воскрéсл еси́ я́ко Бог,// подая́ ми́рови вéлию ми́лость.
СТЕПЕННА, ГЛАС 4
1 АНТИФОН
Хор: От ю́ности моея́/ мнóзи бóрют мя стрáсти,/ но Сам мя заступи́// и спаси́, Спáсе мой. (Двáжды)
Ненави́дящии Сиóна,/ посрами́теся от Гóспода,/ я́ко травá бо огнéм// бýдете изсóхше. (Двáжды)
Слáва Отцу и Сыну и Святóму Духу.
Святы́м Дýхом/ вся́ка душá живи́тся,/ и чистотóю возвышáется,// светлéется Трóйческим еди́нством, священнотáйне.
И ныне и прúсно и во вéки векóв. Амúнь.
Святы́м Дýхом/ вся́ка душá живи́тся,/ и чистотóю возвышáется,// светлéется Трóйческим еди́нством, священнотáйне.
2 АНТИФОН
Воззвáх Тебé Гóсподи тéпле,/ из глубины́ души́ моея́,/ и мне да бýдут на послушáние// Божéственная Твоя́ ушесá. (Двáжды)
На Гóспода надéжду всяк кто стяжáв,// вы́шший есть всех скорбя́щих. (Двáжды)
Слáва Отцý и Сыну и Святóму Дýху.
Святы́м Дýхом/ тóчатся благодáтныя струи́,/ напая́юща вся́ку тварь// ко оживлéнию.
И ныне и присно и во вéки векóв. Аминь.
Святы́м Дýхом/ тóчатся благодáтныя струи́,/ напая́юща вся́ку тварь// ко оживлéнию.
3 АНТИФОН
Сéрдце моé/ к Тебé, Слóве, да возвы́сится,/ и да ничтóже услади́т мя// от мирски́х красóт на слáбость. (Двáжды)
К мáтери своéй/ я́коже и́мать кто любóвь,/ ко Гóсподу тéпльше// люблéнием дóлжни есмы́. (Двáжды)
Слáва Отцý и Сыну и Святóму Дýху.
Святы́м Дýхом/ боговéдения богáтство,/ зрéния, и премýдрости:// вся бо в сем отéческая велéния слóво открывáет.
И ныне и присно и во вéки векóв. Аминь.
Святы́м Дýхом/ боговéдения богáтство,/ зрéния, и премýдрости:// вся бо в сем отéческая велéния слóво открывáет.
ПРОКИМЕН
Чтец: Прокимен, глас четвéртый. Воскресни́, Гóсподи, помози́ нам/ и избáви нас и́мене Твоегó рáди.
Хор: Воскреснú, Гóсподи, помозú нам/ и избáви нас úмене Твоегó рáди.
Чтец: Бóже, уши́ма нáшима услы́шахом, и отцы́ нáши возвести́ша нам.
Хор: Воскреснú, Гóсподи, помозú нам/ и избáви нас úмене Твоегó рáди.
Чтец: Воскресни́, Гóсподи, помози́ нам.
Хор: И избáви нас úмене Твоегó рáди.
Чтец: Гóсподу помóлимся.
Хор: Гóсподи, помилуй.
Слáва Отцу и Сыну и Святóму Духу, и ныне и прúсно и во вéки векóв, амúнь.
Чтец: Всякое дыхáние да хвáлит Гóспода.
Хор: Всякое дыхáние да хвáлит Гóспода.
Чтец: Хвалите Бóга во святых Егó, хвалите Егó во утвержéнии силы Егó.
Хор: Всякое дыхáние да хвáлит Гóспода.
Чтец:Всякое дыхáние.
Хор: Да хвáлит Гóспода.
ЕВАНГЕЛИЕ
Чтец: От Луки́ Святáго Евáнгелия чтéние
Хор: Слáва Тебé, Гóсподи, слáва Тебé.
(Лк.зач.112) Во врéмя óно, во еди́ну от суббóт, зелó рáно, приидóша жены́ на гроб, нося́ще я́же уготóваша аромáты, и други́я с ни́ми. Обретóша же кáмень отвалéн от грóба, и вшéдше, не обретóша телесé Гóспода Иисýса. И бысть не домышля́ющимся им о сем, и се мýжа два стáста в них в ри́зах блещáщихся. Пристрáшным же бы́вшим им, и поклóншим ли́ца на зéмлю, рекóста к ним: что и́щете живáго с мéртвыми? Несть зде, но востá. Помяни́те, я́коже глагóла вам, еще́ сый в Галилéи, глагóля, я́ко подобáет Сы́ну Человéческому прéдану бы́ти в рýце человéк грéшник, и прóпяту бы́ти, и в трéтий день воскрéснути. И помянýша глагóлы Егó. И возврáщшася от грóба, возвести́ша вся сия́ единомунáдесяте и всем прóчим. Бя́ше же Магдали́на Мари́я, и Иоáнна, и Мари́я Иáковля, и прóчия с ни́ми, я́же глагóлаху ко апóстолом сия́. И яви́шася пред ни́ми я́ко лжа глагóлы их, и не вéроваху им. Петр же востáв течé ко грóбу, и прини́к ви́де ри́зы еди́ны лежáща, и оты́де, в себé дивя́ся бы́вшему.
[Русский синодальный перевод]В первый же день недели, очень рано, неся приготовленные ароматы, пришли они ко гробу, и вместе с ними некоторые другие; но нашли камень отваленным от гроба. И, войдя, не нашли тела Господа Иисуса. Когда же недоумевали они о сем, вдруг предстали перед ними два мужа в одеждах блистающих. И когда они были в страхе и наклонили лица свои к земле, сказали им: что вы ищете живого между мертвыми? Его нет здесь: Он воскрес; вспомните, как Он говорил вам, когда был еще в Галилее, сказывая, что Сыну Человеческому надлежит быть предану в руки человеков грешников, и быть распяту, и в третий день воскреснуть. И вспомнили они слова Его; и, возвратившись от гроба, возвестили всё это одиннадцати и всем прочим. То были Магдалина Мария, и Иоанна, и Мария, мать Иакова, и другие с ними, которые сказали о сем апостолам. И показались им слова их пустыми, и не поверили им. Но Петр, встав, побежал ко гробу и, наклонившись, увидел только пелены лежащие, и пошел назад, дивясь сам в себе происшедшему. (24:1-12)
Хор: Слáва Тебé, Гóсподи, слáва Тебé.
Воскресéние Христóво ви́девше, поклони́мся Святóму Гóсподу Иисусу, еди́ному безгрéшному, Крестý Твоемý покланя́емся, Христé, и святóе Воскресéние Твоé поéм и слáвим: Ты бо еси Бог наш, рáзве Тебé инóго не знáем, и́мя Твоé именýем. Прииди́те вси вéрнии, поклони́мся Святóму Христóву Воскресéнию: се бо прии́де Крестóм рáдость всемý миру. Всегдá благословя́ще Гóспода, поéм Воскресéние Егó:/ распя́тие бо претерпéв, смéртию смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóние моé. Наипáче омы́й мя от беззакóния моегó, и от грехá моегó очи́сти мя. Яко беззакóние моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóниих зачáт есмь, и во гресéх роди́ мя мáти моя. Се бо и́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлие, возрáдуются кóсти смирéнныя. Отврати́ лицé Твоé от грех мои́х, и вся беззакóния моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéния Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вии к Тебé обратятся. Избáви мя от кровéй, Бóже, Бóже спасéния моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестят хвалý Твою. Яко áще бы восхотéл еси жéртвы, дал бых ýбо, всесожжéния не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнием Твои́м Сиóна, и да сози́ждутся стéны Иерусали́мския. Тогдá благоволи́ши жéртву прáвды, возношéние и всесожегáемая; тогдá возложáт на олтáрь Твой тельцы.
Слáва Отцу и Сыну и Святóму Духу.
глас 8: Покая́ния отвéрзи ми двéри Жизнодáвче,/ ýтренюет бо дух мой ко хрáму святóму Твоемý,/ храм нося́й телéсный весь осквернéн:/ но я́ко щедр, очи́сти// благоутрóбною Твоéю ми́лостию.
И ныне и прúсно и во вéки векóв, амúнь.
На спасéния стези́ настáви мя Богорóдице,/ стýдными бо окаля́х дýшу грехми́,/ и в лéности все житиé моé ижди́х:/ но Твои́ми моли́твами// избáви мя от вся́кия нечистоты́.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóние моé.
Стихúра прáздника, глас 6: Мнóжества содéянных мнóю лю́тых, помышля́я окая́нный,/ трепéщу стрáшнаго дне сýднаго:/ но надéяся на ми́лость благоутрóбия Твоегó,/ я́ко Дави́д вопию́ Ти:/ поми́луй мя Бóже// по вели́цей Твоéй ми́лости.
Гóсподи, помилуй. (12 раз)
Слáва Отцý и Сыну и Святóму Дýху, и ныне и прúсно и во вéки векóв, амúнь.
КАНОН ВОСКРЕСНЫЙ, ГЛАС 4
(совмещенный с каноном крестовоскресным (глас 4) и Богородицы (глас 4) и каноном Триоди, глас 6)
ПЕСНЬ 1
Ирмóс: Мóря чермнýю пучи́ну/ невлáжными стопáми/ дрéвний пешешéствовав Изрáиль,/ крестообрáзныма Моисéовыма рукáма// Амали́кову си́лу в пусты́ни победи́л есть.
Хор (припéв): Слáва, Гóсподи, Святóму Воскресéнию Твоемý.
Чтец (тропáрь): Вознéслся еси́ на пречи́стем дрéве крéстнем,/ нáше отпадéние исправля́я,/ éже на дрéве исцеля́я всегуби́тельство, Влады́ко,// я́ко Благ и Всеси́лен.
Хор: Слáва, Гóсподи, Святóму Воскресéнию Твоемý.
Чтец: Во грóбе плóтски, во áде же с душéю, я́ко Бог:/ в раи́ же с разбóйником, и на Престóле был еси́, Христé, со Отцéм и Дýхом,// вся исполня́я Неопи́санный.
Хор: Пресвятáя Богорóдице, спаси нас.
Богорóдичен: Без сéмене Óтчею вóлею/ от Божéственнаго Дýха Бóжия зачалá еси́ Сы́на,/ и плóтию родилá еси́:/ И́же из Отцá без мáтере,// нас же рáди, из Тебé без отцá.
Канон крестовоскресный, глас 4
Хор: Слáва, Гóсподи, Крестý Твоемý Честнóму и Воскресéнию.
Чтец: Исцели́л еси́ сокрушéние человéчества, Гóсподи,/ Божéственною Твоéю Крóвию обнови́вый то:/ и сокруши́л еси́ си́льнаго в крéпости,// и́же дрéвле сокруши́вшаго Твоé создáние.
Хор: Слáва, Гóсподи, Крестý Твоемý Честнóму и Воскресéнию.
Чтец: Мéртвых востáние, умерщвлéнием был еси́:/ крéпость бо отъя́тся умерщвлéния, брáвшися с Жи́знию вéчною,// И́же всéми влады́чествующу воплощéнному Бóгу.
Канон Богородицы, глас 4
Хор: Пресвятáя Богорóдице, спасú нас.
Чтец: Сотрясóшася лю́дие, смятóшася язы́цы,/ цáрствия же держáвная уклони́шася, Чи́стая, от стрáха рождествá Твоегó:/ прии́де бо Царь мой, и низложи́ мучи́теля,// и мир от тли избáви.
Хор: Пресвятáя Богорóдице, спасú нас.
Чтец: Жили́ще Своé, живы́й в вы́шних,/ к человéком сошéд, освяти́ Христé, и непоколеби́мо яви́:/ Еди́на бо по рождествé дéвства сокрóвище,// Зижди́теля рóждши пребылá еси́.
Канон Триоди, глас 6
Хор: Помúлуй мя, Бóже, помúлуй мя.
Чтец: Гряди́ душé моя́ стрáстная, плáчи твоя́ дея́ния днесь,/ поминáющи пéрвое обнажéние во Едéме,// и́мже изгнáна еси́ от слáдости, и непрестáнныя рáдости. (двáжды)
Хор: Помúлуй мя, Бóже, помúлуй мя.
Чтец: От мнóгаго благоутрóбия и щедрóт,/ Создáтелю твáри, и Твóрче всех,/ от пéрсти оживи́в мя прéжде,// заповéдал еси́ пéти Тя со áнгелы Твои́ми.
Хор: Помúлуй мя, Бóже, помúлуй мя.
Чтец: Рáди богáтства блáгости, Ты сади́ши Создáтелю и Гóсподи,/ рáйскую слáдость во Едéме,/ повелевáя ми наслаждáтися крáсных и слáдких,// и немимотекýщих плодóв.
Слáва Отцý и Сыну и Святóму Дýху.
Тропáрь: Увы́ мне душé моя́ окая́нная,/ сýщих во Едéме наслаждáтися прия́ла еси́ власть от Бóга,/ не я́сти же вéдения плодá повелéна былá еси́:// вскýю преступи́ла еси́ закóн Бóжий?
И ныне и прúсно и во вéки векóв, амúнь.
Богорóдичен: Богороди́тельнице Дéво, я́ко Адáмова дщи по рóду,/ по благодáти же Христý Бóгу роди́тельница,// менé изгнáннаго от Едéма, ны́не воззови́.
Катавáсия (глас 6): Я́ко по сýху пешешéствовав Изрáиль,/ по бéздне стопáми,/ гони́теля фараóна/ ви́дя потопля́ема,// Бóгу побéдную песнь пои́м, вопия́ше.
ПЕСНЬ 3
Ирмóс: Весели́тся о Тебé Цéрковь Твоя́, Христé, зовýщи:/ Ты моя́ крéпость, Гóсподи,// и прибéжище, и утверждéние.
Хор: Слáва, Гóсподи, Святóму Воскресéнию Твоемý.
Чтец: Дрéво живóтное, мы́сленный и́стинный виногра́д,// на Крестé ви́сит, всем источа́я нетлéние.
Хор: Слáва, Гóсподи, Святóму Воскресéнию Твоемý.
Чтец: Я́ко вели́к, я́ко стрáшен, я́ко áдово низлóжь шатáние,// и я́ко Бог нетлéнен, ны́не плóтски воскрéсе.
Хор: Пресвятáя Богорóдице, спаси нас.
Богорóдичен: Ты еди́на сýщим на земли́,/ я́же пáче естествá благи́х Ходáтаица,/ Мáти Бо́жия былá еси́:// те́мже Ти, рáдуйся, прино́сим.
Глас 4
Хор: Слáва, Гóсподи, Крестý Твоемý Честнóму и Воскресéнию.
Чтец: Я́дом испо́лнены в мя змий зýбы вонзе́, Спáсе,/ я́же, Вседержи́телю Влады́ко, гвоздьми́ рук Твои́х сокруши́л еси́:// я́ко несть свят во святы́х, пáче Тебе́, Человеколю́бче.
Хор: Слáва, Гóсподи, Крестý Твоемý Честнóму и Воскресéнию.
Чтец: Ви́ден был еси́, Человеколю́бче, вóлею во грóбе мертв, Животвóрче,/ и вратá разве́ргл еси́ áдова, я́же от векóв душáм:// я́ко несть свят во святы́х рáзве Тебе́, Человеколю́бче.
Глас 4
Хор: Пресвятáя Богорóдице, спасú нас.
Чтец: Очищáется челове́ков существó,/ Тобóю присовокýпльшееся нестерпи́мому Боже́ственному Огню́:/ я́ко сокрове́нный, Пречи́стая Де́во, в Тебе́ Хлеб испе́кшееся,// И́же и Тебе́ неврежде́нну сохрáншему.
Хор: Пресвятáя Богорóдице, спасú нас.
Чтец: Ка́я сия́ я́же вои́стинну близ Бóга;/ я́ко превозше́дши вся áнгельския чи́ны,/ еди́на добрóтою де́вства,// я́ко Мáти сия́ющи Вседержи́теля.
Глас 6
Хор: Помúлуй мя, Бóже, помúлуй мя.
Чтец: Змий льсти́вый не́когда че́сти мое́й позави́дев,/ пошептá ле́стию Е́ве во у́ши,/ от нея́же аз прельсти́вся изгнáн бых,// увы́ мне, от ли́ка жи́зни. (двáжды)
Хор: Помúлуй мя, Бóже, помúлуй мя.
Чтец: Рýку просте́р де́рзостно, вкуси́х дре́ва разýмнаго,/ егóже повеле́ мне Бог никáкоже причасти́тися,// и Боже́ственныя слáвы отвáржен бых гóрце. (двáжды)
Слáва Отцý и Сыну и Святóму Дýху.
Тропáрь: Увы́ мне стрáстная моя́ душе́, кáко не познáла еси́ пре́лести?/ Кáко не ощути́ла еси́ льще́ния, и за́висти врáжия?// Но помрачи́лася еси́ умóм, и преступи́ла еси́ зáповедь Создáтеля твоегó.
И ныне и прúсно и во вéки векóв, амúнь.
Богорóдичен: Уповáние и покро́в мой Чи́стая,/ обнаже́ние дре́вле покры́вшая, еди́на, пáдшаго Адáма,// Рождествóм Твои́м Чи́стая, в нетле́ние пáки облецы́ мя.
Катавáсия (глас 6): Несть свят,/ я́коже Ты, Гóсподи Бóже мой,/ вознесы́й рог вéрных Твои́х, Блáже,/ и утверди́вый нас на кáмени// исповéдания Твоегó.
Гóсподи, помилуй. (3 раза)
Седáлен Триóди, глaс 4: Изгнáн бысть Адáм от рáйския слáдости,/ снéдию гóрькою в невоздержáнии/ зáповеди не сохрани́ Влады́чни,/ и осуди́ся дéлати зéмлю, от нея́же взят бысть сам:/ пóтом же мнóгим я́сти хлеб свой./ Тéмже мы возлю́бим воздержáние,// да не вне рая́ возрыдáим, я́коже он, но в негó вни́дем.
Слáва Отцý и Сыну и Святóму Дýху.
Седáлен Триóди, глaс 4: Ны́не врéмя добродéтелей яви́ся,/ и при двéрех Судия́, не скорби́м,/ но прииди́те постя́щеся принесéм слéзы,/ умилéние и ми́лостыню, зовýще:/ согреши́хом пáче пескá морскáго,/ но ослáби всем всех Свободи́телю,// да восприи́мем нетлéнный венéц.
И ныне и прúсно и во вéки векóв, амúнь.
Богорóдичен, Триóди, глас 4: Не умолчи́м никогдá Богорóдице,/ си́лы Твоя́ глагóлати недостóйнии:/ áще бо Ты не бы предстоя́ла моля́щи,/ кто бы нас избáвил от толи́ких бед,/ кто же бы сохрани́л до ны́не свобóдны?/ Не отстýпим Влады́чице, от Тебе́:// Твоя́ бо рабы́ спасáеши при́сно от вся́ких лю́тых.
ПЕСНЬ 4
Ирмóс: Вознесéна Тя ви́девши Цéрковь на Крестé,/ Сóлнце Прáведное,/ ста в чи́не своéм,/ достóйно взывáющи:// слáва си́ле Твоéй, Гóсподи.
Хор: Слáва, Гóсподи, Святóму Воскресéнию Твоемý.
Чтец: Возше́л еси́, стрáсти моя́ исцеля́я, на Крест/ стрáстию Пречи́стыя плóти Твоея́,/ в ню́же вóлею облéклся еси́./ Тéмже Ти взывáем:// слáва си́ле Твоéй, Гóсподи.
Хор: Слáва, Гóсподи, Святóму Воскресéнию Твоемý.
Чтец: Безгрéшнаго смерть вкуси́вши,/ Животворя́щаго Тéла Твоегó,/ достóйно, Влады́ко, умертви́ся:/ мы же вопиéм Ти,// слáва си́ле Твоей, Гóсподи.
Хор: Пресвятáя Богорóдице, спаси нас.
Богорóдичен: Неискусобрáчно родилá еси́, Дéво,/ и по рождествé яви́лася еси́ дéвствующи пáки:/ тéмже немо́лчными глáсы,/ éже рáдуйся, Тебé, Влады́чице,// вéрою несумнéнною взывáем.
Глас 4
Хор: Слáва, Гóсподи, Крестý Твоемý Честнóму и Воскресéнию.
Чтец: Взакóнен сый Изрáиль,/ Тебé, Христé, взакóнившаго Бóга не познá:/ но я́ко беззакóнника, законопреступáя, на Крестé пригвозди́,// и́же законоположéнию недостóйный.
Хор: Слáва, Гóсподи, Крестý Твоемý Честнóму и Воскресéнию.
Чтец: Обоже́на Твоя́, Спáсе, Душá,/ áдова сокро́вища плени́вши,/ я́же от вéка совоскреси́ дýши:// живонóсное же Тéло всем нетлéние источи́.
Глас 4
Хор: Пресвятáя Богорóдице, спасú нас.
Чтец: Поживé с человéки, ви́димь быв Неви́димый,/ во зрáце сый Непостижи́маго Божествá,/ и вообрáжься из Тебé, Отрокови́це, в чуждéе,// вéдущих Тя, Чи́стую Богомáтерь, спасáет.
Хор: Пресвятáя Богорóдице, спасú нас.
Чтец: Прия́т в вещéственне Дéва Невещéственнаго, в прича́стии вещества́,/ Младéнца от Нея́ бы́вша./ Тéмже во дву существý, Еди́н познава́ется// плотонóсец Бог, и Человéк Пресýщественный.
Глас 6
Хор: Помúлуй мя, Бóже, помúлуй мя.
Чтец: Чéсти сподóбихся аз стрáстный,/ от Тебé Влады́ки во Едéме:/ увы́ мне, кáко прельсти́вся, и диа́волом позави́девся// отвéржен бых от лицá Твоегó? (двáжды)
Хор: Помúлуй мя, Бóже, помúлуй мя.
Чтец: Менé рыдáйте áнгельстии чи́нове,/ рая́ добрóты, и садóв тáмошнее благолéпие,// прельсти́вшагося злополýчно, и Бóга отвéргшагося.
Хор: Помúлуй мя, Бóже, помúлуй мя.
Чтец: Лýже блажéнный, сáдове богосаждéннии, рая́ красотó,/ ны́не о мне слéзы проливáйте,/ от листóв, я́коже от óчию,// обнажéннем и стрáннем слáвы Бóжия.
Слáва Отцý и Сыну и Святóму Дýху.
Тропáрь: Не ктомý ви́жу тебé,/ ни наслаждáюся преслáдкия твоея́ и божéственныя свéтлости, всечестны́й раю́:// наг бо повергóхся в зéмлю, прогнéвая Сотвóршаго.
И ныне и прúсно и во вéки векóв, амúнь.
Богорóдичен: Святáя Влады́чице, отвéрзшая рая́ вратá всем вéрным,/ я́же Адáм заключи́ преступлéнием иногдá,// вратá ми́лости мне отвéрзи.
Катавáсия (глас 6): Христóс моя́ си́ла,/ Бог и Госпóдь,/ честнáя Цéрковь/ боголéпно поéт, взывáющи,// от смы́сла чи́ста, о Гóсподе прáзднующи.
ПЕСНЬ 5
Ирмóс: Ты, Гóсподи мой,/ Свет в мир пришéл еси́,/ Свет Святы́й, обращáяй из мрáчна невéдения// вéрою воспевáющия Тя.
Хор: Слáва, Гóсподи, Святóму Воскресéнию Твоемý.
Чтец: Ты, Гóсподи, к земли́ ми́лостивно соше́л еси́:// Ты вознéсл еси́ пáдшее человéческое существó, на дрéве воздвизáемь.
Хор: Слáва, Гóсподи, Святóму Воскресéнию Твоемý.
Чтец: Ты взял ми еси́, Христé, прегреше́ний осуждéние:// Ты разруши́л еси́ болéзни смéртныя, Щéдре, Божéственным воскресéнием Твои́м.
Хор: Пресвятáя Богорóдице, спаси нас.
Богорóдичен: Тя ору́жие непобеди́мое на враги́ предлагáем,// Тя утверждéние, и надéжду нáшего спасéния, Богоневéсто, стяжáхом.
Глас 4
Хор: Слáва, Гóсподи, Крестý Твоемý Честнóму и Воскресéнию.
Чтец: Прия́т Тя всегó усты́ ад безу́мный:/ на Крестé бо пригвождéна Тя ви́дев,/ копиéм прободéна, бездыхáнна,/ Живáго Бóга прóста вменя́ше человéка.// Разумé же искуси́вый крéпость Твоегó Божествá.
Хор: Слáва, Гóсподи, Крестý Твоемý Честнóму и Воскресéнию.
Чтец: Разрушéный, Человеколю́бче, Храм Твоегó Телесé,/ гроб раздели́вый и ад невóлею óба судá истязу́еми суть:/ ов у́бо святы́х Твои́х ду́ши,// телесá же други́й соотсылáюще, Безсмéртне.
Глас 4
Хор: Пресвятáя Богорóдице, спасú нас.
Чтец: Дом Тя слáвы, Гóру Бóжию Святу́ю, Чи́стая,/ Невéсту, Чертóг, Храм освящéния,/ Сын Бóжий, в Тя всели́вся,// и рай слáдости присносу́щныя нам содéла.
Хор: Пресвятáя Богорóдице, спасú нас.
Чтец: Плоть от крóве Дéвственныя прия́л еси́, Христé,/ Безсéменну, Пречи́сту, Ипостáсну,/ и словéсну и у́мну, одушевлéнну,/ дéйственну, хотéтельну,// Самовлады́чну и Самовлáстну.
Глас 6
Хор: Помúлуй мя, Бóже, помúлуй мя.
Чтец: Позави́дев дрéвле мне враг,/ в раи́ благополу́чна жития́ человеконенави́стник,/ в видéнии зми́я мне запя́т,// и слáвы присносу́щныя стрáнна мя показá. (двáжды)
Хор: Помúлуй мя, Бóже, помúлуй мя.
Чтец: Рыдáю и плáчу душéю,/ и очесéм ищу́ мнóжества слез прилагáти,/ егдá воззрю́ и познáю мою́ наготу́,// ю́же имéх от преступлéния. (двáжды)
Слáва Отцý и Сыну и Святóму Дýху.
Тропáрь: От земли́ сóздан бых рукóю Бóжиею,/ пáки же возврати́тися в зéмлю аз стрáстный слы́шах:/ кто менé не восплáчет, отриновéннаго от Бóга,// и Едéмом ад измени́вшаго?
И ныне и прúсно и во вéки векóв, амúнь.
Богорóдичен: Чертóг слáвы Тя тáйный вси возвещáем вéрнии, Богороди́тельнице Всенепорóчная./ Тéмже молю́ Тя Чи́стая:// испáдшаго мя чертóга рáйска, свóйственна сотвори́.
Катавáсия (глас 6): Бóжиим свéтом Твои́м, Блáже,/ у́тренюющих Ти ду́ши любо́вию озари́, молю́ся,/ Тя вéдети, Слóве Бóжий,/ и́стиннаго Бóга,// от мрáка грехóвнаго взывáюща.
ПЕСНЬ 6
Ирмóс: Пожру́ Ти со гла́сом хвалéния, Гóсподи,/ Цéрковь вопиéт Ти,/ от бесóвския крóве очи́щшися/ ра́ди ми́лости от ребр Твои́х// истéкшею Крóвию.
Хор: Слáва, Гóсподи, Святóму Воскресéнию Твоемý.
Чтец: Возшéл еси́ на Крест, си́лою препоя́сався,/ и соплéтся с мучи́телем, я́ко Бог, с высоты́ свергл еси́,// Ада́ма же непобеди́мою си́лою воскреси́л еси́.
Хор: Слáва, Гóсподи, Святóму Воскресéнию Твоемý.
Чтец: Воскре́сл еси́ блиста́яйся кра́сный из грóба, Христé,/ и разгна́л еси́ вся враги́ Божéственною си́лою Твоéю,// и вся, я́ко Бог, весéлия испóлнил еси́.
Хор: Пресвятáя Богорóдице, спаси нас.
Богорóдичен: О чу́до всех чудéс новéйшее!/ Я́ко Дéва во утрóбе, вся́ческая обдержа́щаго// неискусому́жно зачéнши, не тесновмести́.
Глас 4
Хор: Слáва, Гóсподи, Крестý Твоемý Честнóму и Воскресéнию.
Чтец: Отвéрзе горта́нь свой ад, и пожрé мя,/ и ду́шу разшири́ безу́мный:// но Христóс сошéд, возведé жизнь мою́, я́ко Человеколю́бец.
Хор: Слáва, Гóсподи, Крестý Твоемý Честнóму и Воскресéнию.
Чтец: Поги́бе смéртию смерть,/ умéрый бо воскрéсе, нетлéние мне да́руя:// я́влься же жена́м провеща́ ра́дость Безсмéртный.
Глас 4
Хор: Пресвятáя Богорóдице, спасú нас.
Чтец: Дрéвле у́бо прельсти́ мя змий, и умори́ мя,/ прама́терию моéю Е́вою:// ны́не же, Чи́стая, Тобóю созда́вый мя из истлéния воззва́.
Хор: Пресвятáя Богорóдице, спасú нас.
Чтец: Бéздна Тя бéздну неизречéнно,/ благоутрóбия Отрокови́це, избра́нную показа́ чудéс:/ и́бо из Тебé мóлниею Божества́,// би́сер Христóс возсия́.
Глас 6
Хор: Помúлуй мя, Бóже, помúлуй мя.
Чтец: Одéждею мя облéкл еси́ боготка́нною Спа́се, во Едéме, я́ко благоутрóбен:/ аз же Твою́ преступи́х за́поведь, вéровав льсти́вому,// и наг ви́дехся окая́нный. (двáжды)
Хор: Помúлуй мя, Бóже, помúлуй мя.
Чтец: Душé всестра́стная моя́, удали́лася еси́ от Бóга,/ невнима́нием твои́м ра́йскаго лиши́лася еси́ наслаждéния,/ от а́нгел разлучи́лася еси́, во тлю ввела́ся еси́:// о падéния! (двáжды)
Слáва Отцý и Сыну и Святóму Дýху.
Тропáрь: Поми́луй, ущéдри Вседержи́телю Бóже,/ Твоéю руку́ творéние,/ не прéзри менé, молю́ся, Бла́же,// отлучи́вшаго себé самагó от ли́ка а́нгел Твои́х.
И ныне и прúсно и во вéки векóв, амúнь.
Богорóдичен: Мари́е Богозва́нная, Госпожé вся́ческих,/ я́ко рóждшая Гóспода Царя́ всех и Изба́вителя,// пленéна мя су́ща от ра́йския сла́вы, воззови́.
Катавáсия (глас 6): Житéйское мóре,/ воздвиза́емое зря напа́стей бу́рею,/ к ти́хому приста́нищу Твоему́ притéк, вопию́ Ти:/ возведи́ от тли живóт мой,// Многоми́лостиве.
Продолжение здесь