ВСЕНОЩНОЕ БДЕНИЕ. Рождество Господа и Бога и Спаса нашего Иисуса Христа, Мирским чином. УТРЕНЯ.Канон
7 января́ 2022 гóда. Рождествó Гóспода и Бóга и Спáса нáшего Iисýса Хрїстá. Прáздничная слýжба для домáшнего (келéйнаго) совершéнiя. Послéдованiе ýтрени. (канóн)
начало здесь ( великое повечерие) и здесь ( утреня)
ПСАЛОМ ИЗБРАННЫЙ
Воскли́кните Гóсподеви вся земля́./ Пóйте же и́мени Егó. Дади́те слáву хвалé Егó./ Повéдите вся чудесá Егó./ Рцы́те Бóгу: коль стрáшна делá Твоя́./ Да возвеселя́тся небесá, и возрáдуется земля́./ Воспóйте Гóсподеви, пóйте и́мени Егó./ Исповéданiе и великолéпiе дéло Егó./ Избавлéнiе послá лю́дем Свои́м./ Свя́то и стрáшно и́мя Егó./ От Сióна благолéпiе красоты́ Егó./ Бог же наш на небеси́ и на земли́ вся, ели́ка восхотé, сотвори́./ Ми́лости Твоя́, Гóсподи, во век воспою́./ Той воззовéт Мя: Отéц Мой еси́ Ты./ И Аз пéрвенца положý Егó. Высокá пáче царéй земны́х./ И поклóнятся Емý вси цáрiе зéмстiи./ Кто бог вéлiй, я́ко Бог наш? Ты еси́ Бог творя́й чудесá./ Мы́шцею си́лы Твоея́ разгнáл еси́ враги́ Твоя́./ Из чрéва прéжде денни́цы роди́х Тя./ Кля́тся Госпóдь, и не раскáется./ Ты iерéй во век, по чи́ну Мелхiседéкову./ Госпóдь речé ко Мне: Сын Мой еси́ Ты. Аз днесь роди́х Тя./ Проси́ от Менé, и дам Ти язы́ки достоя́нiе Твоé./ И одержáнiе Твоé концы́ земли́./ В глави́зне кни́жней писáся о Мне./ Престóл Твой Бóже, в век вéка./ Жезл прáвости, жезл цáрствiя Твоегó./ Сегó рáди помáза Тя Бóже, Бог Твой елéем рáдости./ Я́ко Ты наслéдиши во всех язы́цех.// Благословéн Госпóдь во век, бýди, бýди.
Хор: Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (Трúжды)
Хор: Величáем Тя,/ Живодáвче Хрїстé,/ нас рáди ныне плóтiю рóждшагося// от Безневéстныя и Пречúстыя Дéвы Марíи.
Гóсподи, поми́луй. (12 раз)
СЕДАЛЕН
Седáлен прáздника по полiелéи, глас 4: Прiиди́те, ви́дим, вéрнiи, где роди́ся Хрїстóс,/ послéдуем прóчее, áможе и́дет звездá с волхвы́, востóчными цари́;/ Егóже Áнгели пою́т непрестáнно тáмо,/ пáстырiе свиря́ют песнь достóйную,/ слáва в Вы́шних, глагóлюще,/ днесь в вертéпе Рóждшемуся от Дéвы и Богорóдицы// в Вифлеéме Iудéйстем.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Прiиди́те, ви́дим, вéрнiи, где роди́ся Хрїстóс,/ послéдуем прóчее, áможе и́дет звездá с волхвы́, востóчными цари́;/ Егóже Áнгели пою́т непрестáнно тáмо,/ пáстырiе свиря́ют песнь достóйную,/ слáва в Вы́шних, глагóлюще,/ днесь в вертéпе Рóждшемуся от Дéвы и Богорóдицы// в Вифлеéме Iудéйстем.
СТЕПЕННА, ГЛАС 4
1 АНТИФОН
Хор: От ю́ности моея́/ мнóзи бóрют мя стрáсти,/ но Сам мя заступú// и спасú, Спáсе мой. (Двáжды)
Ненави́дящiи Сióна,/ посрами́теся от Гóспода,/ я́ко травá бо огнéм// бýдете изсóхше. (Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Святы́м Дýхом/ вся́ка душá живи́тся,/ и чистотóю возвышáется,// светлéется Трóйческим еди́нством, священнотáйне. (Двáжды)
ПРОКИМЕН И ЧТЕНИЕ ЕВАНГЕЛИЯ
Чтец: Прокíмен, глас четвéртый. Воскресни́, Гóсподи, помози́ нам и избáви нас и́мене Твоегó рáди. (Пс.43:26)
Хор: Воскреснú, Гóсподи, помозù нам/ и избáви нас úмене Твоегó рáди.
Чтец: Бóже, уши́ма нáшима услы́шахом, и отцы́ нáши возвести́ша нам. (Пс.43:2А)
Хор: Воскреснú, Гóсподи, помозù нам/ и избáви нас úмене Твоегó рáди.
Чтец: Воскресни́, Гóсподи, помози́ нам.
Хор: И избáви нас úмене Твоегó рáди.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
Господи, помилуй. (3раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
ЕВАНГЕЛИЕ
Чтец: От Матфéя Святáго Евáнгелiя чтéнiе.
Слáва Тебé, Гóсподи, слáва Тебé.
(Мф.зач.2): Iисýс Хрїстóво Рождествó си́це бе: обручéнней ýбо бы́вши Мáтери Егó Марíи Ióсифови, прéжде дáже не сни́тися и́ма, обрéтеся имýщи во чрéве от Дýха Свя́та. Ióсиф же, муж Ея́, прáведен сый и, не хотя́ Ея́ обличи́ти, восхотé тай пусти́ти Ю. Сiя́ же емý помы́слившу, се Áнгел Госпóдень во сне яви́ся емý, глагóля: Ióсифе, сы́не Давíдов, не убóйся прiя́ти Марiáм, жены́ твоея́: рóждшее бо ся в Ней от Дýха есть Свя́та. Роди́т же Сы́на, и наречéши и́мя Емý Iисýс. Той бо спасéт лю́ди Своя́ от грех их. Сié же все бысть, да сбýдется речéнное от Гóспода прорóком, глагóлющим: Сé Дéва во чрéве прiи́мет и роди́т Сы́на, и нарекýт и́мя Емý Емманýил, éже есть сказáемо, с нáми Бог. Востáв же Ióсиф от сна, сотвори́, я́коже повелé емý Áнгел Госпóдень, и прiя́т Женý свою́. И не знáяше Ея́, дóндеже роди́ Сы́на Своегó пéрвенца, и наречé и́мя Емý Iисýс.
[Русский синодальный перевод](Рождество Иисуса Христа было так: по обручении Матери Его Марии с Иосифом, прежде нежели сочетались они, оказалось, что Она имеет во чреве от Духа Святаго. Иосиф же муж Ее, будучи праведен и не желая огласить Ее, хотел тайно отпустить Ее. Но когда он помыслил это,- се, Ангел Господень явился ему во сне и сказал: Иосиф, сын Давидов! не бойся принять Марию, жену твою, ибо родившееся в Ней есть от Духа Святаго; родит же Сына, и наречешь Ему имя Иисус, ибо Он спасет людей Своих от грехов их. А все сие произошло, да сбудется реченное Господом через пророка, который говорит: се, Дева во чреве приимет и родит Сына, и нарекут имя Ему Еммануил, что значит: с нами Бог. Встав от сна, Иосиф поступил, как повелел ему Ангел Господень, и принял жену свою, и не знал Ее, как наконец Она родила Сына Своего первенца, и он нарек Ему имя: Иисус .(Мф.1:18-25)
Слáва Тебé, Гóсподи, слáва Тебé.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твои́х очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Еди́ному согреши́х, и лукáвая пред Тобóю сотвори́х; яко да оправди́шися во словесéх Твои́х и победи́ши, внегдá суди́ти Ти. Се бо в беззакóнiих зачáт есмь, и во гресéх родѝ мя мáти моя́. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелю́ся. Слýху моемý дáси рáдость и весéлiе, возрáдуются кóсти смирéнныя. Отвратѝ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менé от лицá Твоегó, и Дýха Твоегó Святáго не отымѝ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твои́м, и нечести́вiи к Тебé обратя́тся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою. Яко áще бы восхотéл есѝ жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Отцý и Сы́ну и Святóму Дýху.
Глас 6: Вся́ческая днесь рáдости исполня́ются,// Хрїстóс роди́ся от Дéвы.
И ны́не и прúсно и во вéки векóв. Амúнь.
Вся́ческая днесь рáдости исполня́ются,// Хрїстóс роди́ся в Вифлеéме.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра Рождествá, глас 6: Слáва в Вы́шних Бóгу,/ и на земли́ мир,/ днесь воспрiéмлет Вифлеéм седя́щаго при́сно со Отцéм,/ днесь Áнгели Младéнца, рождéннаго боголéпно, славослóвят:/ слáва в Вы́шних Бóгу, и на земли́ мир,// в человéцех благоволéнiе.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
ПЕСНЬ 1, ПЕРВЫЙ КАНОН ПРАЗДНИКА, ГЛАС 1
Iрмóс: Хрiстóс раждáется - слáвите,/ Хрiстóс с Небéс - сря́щите./ Хрiстóс на земли́ - возноси́теся./ Пóйте Гóсподеви, вся земля́,/ и весéлiем воспóйте, лю́дiе,/ я́ко прослáвися. (Двáжды)
Хор (припéв): Слава Тебе, Боже наш, слава Тебе.
Чтец (тропáрь): Истлевша преступлением, по Божию образу бывшаго, всего тления суща,/ лучшия отпадша Божественныя жизни,// паки обновляет мудрый Содетель, яко прославися. (Двáжды)
Хор: Слава Тебе, Боже наш, слава Тебе.
Чтец: Видев Зиждитель гиблема человека, руками егоже созда, приклонив Небеса, сходит; Сего же от Девы Божественныя Чистыя всего́ осуществует, воистинну воплощься, яко прославися. (Двáжды)
Хор: Слава Тебе, Боже наш, слава Тебе.
Чтец: Мудрость, Слово и Сила, Сын Сый Отчий и сияние, Христос Бог, сил утаився,/ елико премирных и елико на земли,/ и, вочеловечся, обновил есть нас, яко прославися. (Двáжды)
ВТОРОЙ КАНОН ПРАЗДНИКА, ГЛАС 1:
Хор: Слава Отцу и Сыну и Святому Духу.
Чтец: Изнесе чрево священное Слово, яве неопально живописанное купиною, смешена зраком человечим Бога, Евы окаянную утробу клятвы древния разрешающее горькия, Его́же, земни́и славим. (Трúжды)
Хор: И ныне и присно и во веки веков. Аминь.
Чтец: Показа звезда прежде солнца Слово, пришедшее уставити грехи, волхвом яве во убозем вертепе, милостиваго Тебе, пеленами повита, Егоже, радующеся, видяху Самого - и Человека, и Господа.(Трúжды)
Катавáсiя Рождествá (глас 4): Хрiстóс раждáется - слáвите,/ Хрiстóс с Небéс - сря́щите./ Хрiстóс на земли́ - возноси́теся./ Пóйте Гóсподеви, вся земля́,/ и весéлiем воспóйте, лю́дiе,/ я́ко прослáвися.
Спасé лю́ди чудодéйствуяй Влады́ка,/ мóкрую мóря вóлну оземлени́в дрéвле;/ вóлею же рóждся от Дéвы,/ стезю́ прохóдну Небесé полагáет нам.// Егóже, по Существý рáвна же Отцý и человéком, слáвим.
ПЕСНЬ 3
Iрмóс: Прéжде век от Отцá рождéнному нетлéнно Сы́ну/ и в послéдняя от Дéвы/ воплощéнному безсéменно,/ Хрiстý Бóгу возопiи́м:/ вознесы́й рог наш,// свят еси́, Гóсподи.
Хор: Слава Тебе, Боже наш, слава Тебе.
Иже дохновенiя причащся лучшаго Адам перстный и к тлению поползся женскою лестию, Христа от Жены видя, вопиет: Иже мене ради по мне быв, Свят еси, Господи.
Хор: Слава Тебе, Боже наш, слава Тебе.
Сообразен бренному умалению растворением, Христе, быв и причастием плоти горшия, подав Божественнаго естества, землен быв, и пребыв Бог, и возвысивый рог наш, Свят еси, Господи.
Хор: Слава Тебе, Боже наш, слава Тебе.
Вифлееме, веселися, князей Иудовых Сый Царь: Израиля бо пасый на рамех херувимских, из тебе пройде Христос яве и вознесый рог наш над всеми воцарися.
Ин.
Слава Отцу и Сыну и Святому Духу.
Невесты Пречистыя пребогатое Рождество видети паче ума сподобився, лик свиряющих преклоняшеся странным образом, чин же поющих Безплотных, Царя Христа, безсеменно воплощшагося.
И ныне и присно и во веки веков. Аминь.
Высотою царствуяй Небес милосердием совершает о нас из Безневестныя Отроковицы: невеществен Сый прежде, но послежде Слово, одебелевшо плотию, да падшаго к Себе привлечет первозданнаго.
Катавáсiя Рождествá (глас 4): Прéжде век от Отцá рождéнному нетлéнно Сы́ну/ и в послéдняя от Дéвы/ воплощéнному безсéменно,/ Хрiстý Бóгу возопiи́м:/ вознесы́й рог наш,// свят еси́, Гóсподи.
При́зри на пéнiя рабóв, Благодéтелю,/ врагá смиря́я вознесéнную горды́ню,/ нося́й же, Всеви́дче, грехá превы́шше,/ непоколéблемо утверждéнныя, Блáже, певцы́// основáнiем вéры.
Господи, помилуй (раза)
Слава Отцу и Сыну и Святому Духу и ныне и присно и во веки веков. Аминь.
Ипакои, глас 8-й.
Начаток языков Небо Тебе принесе, лежащему Младенцу во яслех, звездою волхвы призвавый, яже и ужасаше не скиптры и престоли, но последняя нищета: что бо хуждше вертепа? Что же смиреншее пелен? в нихже просия Божества Твоего богатство, Господи, слава Тебе.
Песнь 4
Iрмóс: Жезл из кóрене Иессéева/ и цвет от негó, Христé,/ от Дéвы прозя́бл еси́,/ из горы́, Хвáльный, приосенéнныя чáщи,/ пришéл еси́, воплóщся от Неискусому́жныя,/ Невещéственный и Бóже:// слáва си́ле Твоéй, Гóсподи.
Хор: Слава Тебе, Боже наш, слава Тебе.
Егоже древле прорече Иаков, языков ожидание, Христе, от колена Иудова возсиял еси и силу Дамаскову, Самарийскую же корысть пришел еси испроврещи, лесть пременяя в веру боголепну: слава силе Твоей, Господи.
Хор: Слава Тебе, Боже наш, слава Тебе.
Волхва древле Валаама словесы ученики, мудрыя звездоблюстители, радости исполнил еси, звезда от Иакова, возсияв, Владыко, языков начаток вводимый приял же еси яве: слава силе Твоей, Господи.
Хор: Слава Тебе, Боже наш, слава Тебе.
Яко на руно, во чрево Девы сшел еси дождь, Христе, и яко капли, на землю каплющия. Ефиопия, и Фарсис, и Аравитстии острови же, Сава, Мидов всю землю держащии, припадоша Тебе, Спасе: слава силе Твоей, Господи.
Ин
Хор: Слава Тебе, Боже наш, слава Тебе.
Равен произыде человеком Вышний, волею плоть приим от Девы, яд очистити змиевы главы, приводя вся к Свету живоносному, Бог Сый, от врат безсолнечных.
Слава Отцу и Сыну и Святому Духу.
Языцы, иже древле тлею погружени, пагубы зело вражия убежавше, возносят руки с похвальными песньми, единаго чтуще Христа, яко Благодетеля, к нам милостивно пришедшаго.
И ныне и присно и во веки веков. Аминь.
Из корене израстши Иессеева, Дево, уставы прешла еси человеческаго существа, Отчее рождши Превечное Слово, яко благоволи Сам запечатанную утробу проити истощанием странным.
Катавáсiя Рождествá (глас 4): Жезл из кóрене Iессéева/ и цвет от негó, Хрiстé,/ от Дéвы прозя́бл еси́,/ из горы́, Хвáльный, приосенéнныя чáщи,/ пришéл еси́, воплóщся от Неискусомýжныя,/ Невещéственный и Бóже:// слáва си́ле Твоéй, Гóсподи.
Рóда человéча обновлéнiе/ дрéвле, поя́, прорóк Аввакýм предвозвещáет,/ ви́дети неизречéнно сподóбився óбраз:/ млады́й Младéнец бо из горы́ - Дéвы изы́де// людéй во обновлéнiе, Слóво.
Песнь 5
Iрмóс: Бог сый ми́ра, Отéц щедрóт,/ Вели́каго Совéта Твоегó А́нгела,/ мир подавáюща, послáл еси́ нам:/ тем, Богоразу́мия к свéту настáвльшеся,/ от нóщи у́тренююще,// славослóвим Тя, Человеколю́бче.
Припев: Слава Тебе, Боже наш, слава Тебе.
В рабех кесаревым повелением написатися покорься, и нас, рабы сущия, врага и греха свободил еси, Христе, весь же по нам обнищав, и перстнаго от самаго единения и общения богосоделал еси.
Припев: Слава Тебе, Боже наш, слава Тебе.
Се Дева, якоже древле рече, во чреве приемши, родила есть Бога вочеловечшася и пребывает Дева. Еяже ради примирившеся Богу, грешнии, Богородицу сущую воистину, вернии, воспоим.
Ин
Слава Отцу и Сыну и Святому Духу.
Лютую вражду, юже к нам Владыка отсекая паки плотским пришествием, да держащаго разрушит душетлеющаго, мир сочетая с невещественными существы, положив приступна, Рождшаго, твари.
И ныне и присно и во веки веков. Аминь.
Людие видеша, древле омраченнии, по днех свет вышния светлости, языки же Богу наследие Сын приносит, подая тамо неизреченную благодать, идеже множайший процвете грех.
Катавáсiя Рождествá (глас 4): Бог сый ми́ра, Отéц щедрóт,/ Вели́каго Совéта Твоегó Áнгела,/ мир подавáюща, послáл еси́ нам:/ тем, Богоразýмiя к свéту настáвльшеся,/ от нóщи ýтренююще,// славослóвим Тя, Человеколю́бче.
Из нóщи дел омрачéнныя прéлести/ очищéнiе нам, Хрiстé, бóдренно ны́не совершáющим песнь, я́ко Благодéтелю,/ прiиди́, подавáяй удóбну стезю́,// по нéйже востекáюще, обря́щем слáву.
Песнь 6
Ирмóс: Из утрóбы Ióну младéнца изблевá морски́й зверь,/ яковá прiя́т,/ в Дéву же всéльшееся Слóво/ и плоть приéмшее прóйде сохрáншее нетлéнну./ Егóже бо не пострадá истлéния,// Рóждшую сохрани́ невреждéнну.
Припев: Слава Тебе, Боже наш, слава Тебе.
Прииде, воплощся, Хрiстос Бог наш из чрева, Егоже Отец прежде денницы раждает; правления же держа пречистых сил, в яслех скотиях возлежит и пеленами повивается, разрешает же многоплетенныя пленицы прегрешений.(Дважды)
Припев: Слава Тебе, Боже наш, слава Тебе.
Юно из Адама отроча смешения, родися Сын и верным дадеся, будущаго века Сей есть Отец и Начальник и нарицается Великаго Совета Ангел. Сей крепок Бог есть и держай областию всю тварь.
Ин
Слава Отцу и Сыну и Святому Духу.
Иже бе исперва к Богу, Бог Слово ныне утверждает немощное древле видев сохранити, еже по нам существо, имже Себе вторым общением абие проявляя страстей свободное.
И ныне и присно и во веки веков. Аминь.
Грядет нас ради из Авраамлих чресл темнопадшия во мраце прегрешений сыны воздвигнути, долу поникших, иже во свете обитаяй и яслех чрез достояние, ныне благоволив в человеческое спасение.
Катавáсия Рождествá (глас 4): Из утрóбы Иóну младéнца изблевá морски́й зверь,/ яковá прия́т,/ в Дéву же всéльшееся Слóво/ и плоть приéмшее прóйде сохрáншее нетлéнну./ Егóже бо не пострадá истлéния,// Рóждшую сохрани́ невреждéнну.
Обитáя Ióна в преиспóдних морски́х,/ прiити́ моля́шеся и бýрю утоли́ти;/ унзéн же аз мучáщаго стрелóю,/ Хрiстý воспевáю, зол губи́телю,// скóро прiити́ Тебé к моéй лéности.
Господи, помилуй (раза)
Слава Отцу и Сыну и Святому Духу и ныне и присно и во веки веков. Аминь.
Кондáк прáздника, глас 3: Дéва днесь Пресýщественнаго раждáет, и земля́ вертéп Непристýпному принóсит. Áнгели с пáстырьми славослóвят, волсви́ же со звездóю путешéствуют: нас бо рáди роди́ся Oтрочá Млáдо, Превéчный Бог.
Íкос: Едем Вифлеем отверзе, приидите, видим, пищу в тайне обретохом; приидите, приимем сущая райская внутрь вертепа: тамо явися корень ненапоен, прозябая отпущение, тамо обретеся кладязь неископан, из негоже Давид пити древле возжадася. Тамо Дева рождши Младенца, жажду устави абие Адамову и Давидову. Сего ради к Нему идем, где родися Отроча Младо, Превечный Бог.
Песнь 7
Iрмóс: Óтроцы, благочéстiю совоспитáни,/ злочести́ваго велéнiя небрéгше,/ óгненнаго прещéнiя не убоя́шася,/ но, посредé плáмени стоя́ще, поя́ху:// отцéв Бóже, благословéн еси́.
Припев: Слава Тебе, Боже наш, слава Тебе.
Пастырiе, свиряюще, ужасно светоявленiе получиша: слава бо Господня облиста их, и Ангел, воспойте,- вопiя,- яко родися Хрiстос, отцев Бог благословенный.
Припев: Слава Тебе, Боже наш, слава Тебе.
Внезапу с словом Ангеловым Небесная воинства, слава, - вопияху, - Богу в Вышних, на земли мир, в человецех благоволение: Христос возсия, отцев Бог благословенный.
Припев: Слава Тебе, Боже наш, слава Тебе.
Глагол что сей? - рекоша пастырие,- пришедше, увидим бывшее, Божественнаго Христа. Вифлеема же дошедше, с Рождшею покланяхуся, воспевающе: отцев Боже, благословен еси.
Ин
Припев: Слава Тебе, Боже наш, слава Тебе.
Слуги убо неистовно попаляет, спасает же всепалящая со страхом юныя, седмочисленным разжжением возвышена; ихже венча пламень, независтно Господу подающу благочестия ради росу.
Слава Отцу и Сыну и Святому Духу.
Помощниче, Христе, человеком, противное гадание, воплощение неизглаголанное имеяй, посрамил еси; богатство обожения носяй, воображся ныне, Егоже ради упованием свыше в преисподний приидохом мрак.
И ныне и присно и во веки веков. Аминь.
Зле неудержанно возвышаемый, нечестно бесящийся от развращения мира, низложил еси всемощне грех, яже привлече прежде, днесь же от сетей спасаеши, воплощся волею, Благодетелю.
Катавáсия Рождествá (глас 4): Óтроцы, благочéстию совоспитáни,/ злочести́ваго велéния небрéгше,/ óгненнаго прещéния не убоя́шася,/ но, посредé плáмени стоя́ще, поя́ху:// отцéв Бóже, благословéн еси́.
Всецаря́ любóвiю уловлéннiи, óтроцы/ укори́ша безчи́сленно яря́щася мучи́теля злобóжное языковрéдiе,/ и́мже повинýся огнь мнóгiй,/ Влады́це глагóлющим:// во вéки благословéн еси́.
Песнь 8
Ирмóс: Чýда преестéственнаго/ росодáтельная изобрази́ пещь óбраз:/ не бо, я́же прия́т, пали́т ю́ныя,/ я́ко нижé огнь Божествá Дéвы,/ в Ню́же вни́де утрóбу./ Тем воспевáюще, воспоéм:/ да благослови́т тварь вся Гóспода// и превознóсит во вся вéки.
Припев: Слава Тебе, Боже наш, слава Тебе.
Влечет Вавнилоня дщи отроки плененныя Давидовы от Сиона к себе, дароносцы же слет волхвы дети, Давидове Богоприятней дщери молящияся. Тем, воспевающе, воспоим: да благословит тварь вся Господа и превозносит во вся веки.
Припев: Слава Тебе, Боже наш, слава Тебе.
Органы уклониша плачевныя песни, не пояху бо в земли чуждей отроцы Сионовы, вавилонскую же разрешает лесть всю и мусикийския составы, в Вифлееме возсияв, Христос. Тем, воспевающе, воспоим: да благословит тварь вся Господа и превозносит во вся веки.
Припев: Слава Тебе, Боже наш, слава Тебе.
Корысти Вавилон царства Сионя и плененное богатство прият, сокровища же Христос в Сион сего, и цари звездою наставляя, звездоблюстители влечет. Тем, воспевающе, воспоим: да благословит тварь вся Господа и превозносит во вся веки.
Припев: Слава Тебе, Боже наш, слава Тебе.
Ин
Слава Отцу и Сыну и Святому Духу.
Пагубы убежавши, еже обожитися прелестию, непрестанно поет излиявшагося Слова юношески вся с трепетом тварь, неславну хвалу, боящися, приносит, тленна сущи, аще и мудре терпяше.
И ныне и присно и во веки веков. Аминь.
Грядеши, заблуждшее на пажить обращая цветотворную из пустынных холмов языков востание, человеческое естество, силу нужную человекоубийцы угасити, муж же явився и Бог промышлением.
Катавасия:
Хвалим, благословим, покланяемся Господеви,// поюще и превозносяще во вся веки.
Катавáсия Рождествá (глас 4): Чýда преестéственнаго/ росодáтельная изобрази́ пещь óбраз:/ не бо, я́же прия́т, пали́т ю́ныя,/ я́ко нижé огнь Божествá Дéвы,/ в Ню́же вни́де утрóбу./ Тем воспевáюще, воспоéм:/ да благослови́т тварь вся Гóспода// и превознóсит во вся вéки.
Утрóбу неопáльну образу́ют Отрокови́цы/ и́же в Вéтсем опаля́емии ю́ноши,/ преестéственно раждáющую запечатлéнну./ Обоя́ же, содевáющи чудодéйство еди́но,// лю́ди к пéнию возставля́ет благодáть.
Песнь 9:
Величай, душе моя,// Честнейшую и Славнейшую Горних воинств, Деву Пречистую, Богородицу.
Ирмóс: Тáинство стрáнное ви́жу и преслáвное:/ Нéбо - вертéп, Престóл Херуви́мский - Дéву,/ я́сли - вмести́лище,/ в ни́хже возлежé Невмести́мый - Христóс Бог,// Егóже, воспевáюще, величáем.
Величай, душе моя,// Честнейшую и Славнейшую Горних воинств, Деву Пречистую, Богородицу.
Ирмóс: Тáинство стрáнное ви́жу и преслáвное:/ Нéбо - вертéп, Престóл Херуви́мский - Дéву,/ я́сли - вмести́лище,/ в ни́хже возлежé Невмести́мый - Христóс Бог,// Егóже, воспевáюще, величáем.
Припев: Величай, душе моя, от Девы Бога, плотию рождшагося.
Изрядное течéние зряще волсви необычныя нóвыя звезды новосияющия, Небесá просвещáющия, Христá Царя знáменующия на земли, рóждшагося в Вифлеéме на спасéние нáше.
Припев: Величай, душе моя, в вертепе рождшагося Царя.
Изрядное течение зряще волсви необычныя новыя звезды новосияющия, Небеса просвещающия, Христа Царя знаменующия на земли, рождшагося в Вифлееме на спасение наше.
Припев: Величай, душе моя, от волхвов Бога покланяемаго.
Новорожденное,- волхвом, глаголющим,- Отроча Царь, Егоже звезда яви, где есть? Тому бо поклонитися приидохом. Яряся, Ирод смущашеся, Христа убити богоборец шатаяся.
Припев: Величай, душе моя, от звезды волхвом Возвещеннаго.
Новорожденное,- волхвом, глаголющим,- Отроча Царь, Егоже звезда яви, где есть? Тому бо поклонитися приидохом. Яряся, Ирод смущашеся, Христа убити богоборец шатаяся.
Припев: Величай, душе моя, Чистую Деву и Едину Богородицу, рождшую Христа Царя.
Испыта Ирод время звезды, еяже вождением волсви в Вифлееме покланяхуся Христу с дары; еюже, ко отечеству наставляеми, лютаго детоубийцу оставиша поругана.
Припев: Величай, душе моя, Чистую Деву и Едину Богородицу, рождшую Христа Царя.
Испыта Ирод время звезды, еяже вождением волсви в Вифлееме покланяхуся Христу с дары; еюже, ко отечеству наставляеми, лютаго детоубийцу оставиша поругана.
Ин
Днесь Дева раждает Владыку внутрь вертепа.
Ирмóс: Любити убо нам яко безбедное страхом удобее молчание, любовию же, Дево, песни ткати, спротяженно сложенныя, неудобно есть; но и, Мати, силу, елико есть произволение, даждь.
Днесь Владыка раждается, яко Младенец,/ от Матере Девы.
Ирмóс: Любити убо нам яко безбедное страхом удобее молчание, любовию же, Дево, песни ткати, спротяженно сложенныя, неудобно есть; но и, Мати, силу, елико есть произволение, даждь.
Припев: Днесь пастырие видят Спаса, пеленами обвита и лежаща во яслех.
Образы несветлы и сени приведены, о Мати Чистая, видевше Слова, нова явльшагося от врат заключенных, мнящии же истинную светлость, достойно Твою благословим утробу.
Припев: Днесь Владыка рубищем пеленается, неосязанный, яко Младенец.
Образы несветлы и сени приведены, о Мати Чистая, видевше Слова, нова явльшагося от врат заключенных, мнящии же истинную светлость, достойно Твою благословим утробу.
Припев: Днесь всяка тварь веселится и радуется, яко Христос родися от Девы Отроковицы.
Образы несветлы и сени приведены, о Мати Чистая, видевше Слова, нова явльшагося от врат заключенных, мнящии же истинную светлость, достойно Твою благословим утробу.
Припев: Небесныя силы рождшагося Спаса Господа и Владыку возвещают миру.
Желание получивше и Божия пришествия христокраснии людие сподобльшеся, ныне утешаются пакибытием: яко живоносну благодать даеши, Дево Чистая, поклонитеся славе.
Припев: Величай, душе моя, Триипостаснаго и Нераздельнаго Божества державу.
Желание получивше и Божия пришествия христокраснии людие сподобльшеся, ныне утешаются пакибытием: яко живоносну благодать даеши, Дево Чистая, поклонитеся славе.
Припев: Величай, душе моя, Избавльшую нас от клятвы.
Желание получивше и Божия пришествия христокраснии людие сподобльшеся, ныне утешаются пакибытием: яко живоносну благодать даеши, Дéво Чистая, поклонитеся славе.
Катавасия:
Величай, душе моя,// Честнейшую и Славнейшую Горних воинств, Деву Пречистую, Богородицу.
Тáинство стрáнное ви́жу и преслáвное:/ Нéбо - вертéп, Престóл Херуви́мский - Дéву,/ я́сли - вмести́лище,/ в ни́хже возлежé Невмести́мый - Христóс Бог,// Егóже, воспевáюще, величáем.
Днесь Дева раждает Владыку внутрь вертепа.
Люби́ти у́бо нам, я́ко безбéдное стрáхом/ удóбее молчáние,/ любóвию же, Дéво,/ пéсни ткáти, спротяжéнно сложéнныя, неудóбно есть;// но и, Мáти, си́лу, ели́ко есть произволéние, даждь.
Гóсподи, помилуй (3 раза)
Слáва Отцý и Сыну и Святóму Дýху и ныне и прúсно и во вéки векóв. Амúнь.
СВЕТИЛЕН ПРАЗДНИКА
Чтец: Посети́л ны есть свыше Спас наш, Востóк востóков,/ и сýщии во тьме и сéни обретóхом и́стину,// и́бо от Дéвы роди́ся Госпóдь.
Слáва Отцý и Сыну и Святóму Дýху.
Посети́л ны есть свыше Спас наш, Востóк востóков,/ и сýщии во тьме и сéни обретóхом и́стину,// и́бо от Дéвы роди́ся Госпóдь.
И ныне и прúсно и во вéки векóв. Амúнь.
Посети́л ны есть свыше Спас наш, Востóк востóков,/ и сýщии во тьме и сéни обретóхом и́стину,// и́бо от Дéвы роди́ся Госпóдь.
Продолжение здесь