Рождество Пресвятой Владычицы нашей Богородицы и Приснодевы Марии. ВСЕНОЩНОЕ БДЕНИЕ. УТРЕНЯ
21 сентября́ 2024 гóда. Суббóта 13-й седмúцы по Пятидеся́тнице, пéред Воздвиженiем. Рождествò Пресвяты́я Влады́чицы нáшея Богорóдицы и Приснодéвы Марíи. Прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени.
Начáло зри здесь ( великая вечéрня)
ШЕСТОПСАЛМИЕ
Слáва в вы́шних Бóгу, и на землѝ мир, в человéцех благоволéнiе. (трúжды) Гóсподи, устнè моѝ отвéрзеши, и устà моя́ возвестя́т хвалý Твою́. (двáжды)
Псалом 3
Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгò. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы̀ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоè.
Аз уснýх, и спах, востáх, я́ко Госпóдь застýпит мя.
Псалом 37
Гóсподи, да не я́ростiю Твоéю обличи́ши менè, нижè гнéвом Твои́м накáжеши менè. Яко стрéлы Твоя́ унзóша во мне, и утверди́л есѝ на мне рýку Твою́. Несть исцелéнiя в плóти моéй от лицà гнéва Твоегò, несть ми́ра в костéх мои́х от лицà грех мои́х. Яко беззакóнiя моя́ превзыдóша главý мою́, я́ко брéмя тя́жкое отяготéша на мне. Возсмердéша и согни́ша рáны моя́ от лицà безýмiя моегò. Пострадáх и слякóхся до концà, весь день сéтуя хождáх. Яко ля́двiя моя́ напóлнишася поругáнiй, и несть исцелéнiя в плóти моéй. Озлóблен бых и смири́хся до зелà, рыкáх от воздыхáнiя сéрдца моегò. Гóсподи, пред Тобóю все желáнiе моè и воздыхáнiе моè от Тебè не утаи́ся. Сéрдце моè смятéся, остáви мя си́ла моя́, и свет óчiю моéю, и той несть со мнóю. Дрýзи моѝ и и҆́скреннiи моѝ пря́мо мне прибли́жишася и стáша, и бли́жнiи моѝ отдалéче менè стáша и нуждáхуся и҆́щущiи дýшу мою́, и и҆́щущiи злáя мне глагóлаху сýетная и льсти́вным весь день поучáхуся. Аз же я́ко глух не слы́шах и я́ко нем не отверзáяй уст свои́х. И бых я́ко человéк не слы́шай и не имы́й во устéх свои́х обличéнiя. Яко на Тя, Гóсподи, уповáх, Ты услы́шиши, Гóсподи Бóже мой. Яко рех: да не когдà порáдуют ми ся вразѝ моѝ: и внегдà подвижáтися ногáм мои́м, на мя велерéчеваша. Яко аз на рáны готóв, и болéзнь моя́ предо мнóю есть вы́ну. Яко беззакóнiе моè аз возвещý и попекýся о гресè моéм. Вразѝ же моѝ живýт и укрепи́шася пáче менè, и умнóжишася ненави́дящiи мя без прáвды. Воздаю́щiи ми злáя возблагáя оболгáху мя, занè гоня́х благосты́ню. Не остáви менè, Гóсподи Бóже мой, не отступѝ от менè. Вонмѝ в пóмощь мою́, Гóсподи спасéнiя моегò.
Не остáви менè, Гóсподи Бóже мой, не отступѝ от менè. Вонмѝ в пóмощь мою́, Гóсподи спасéнiя моегò.
Псалом 62
Бóже, Бóже мой, к Тебè ýтренюю, возжадà Тебè душà моя́, коль мнóжицею Тебè плоть моя́, в землѝ пýсте и непрохóдне, и безвóдне. Тáко во святéм яви́хся Тебè, ви́дети си́лу Твою́ и слáву Твою́. Я́ко лýчши ми́лость Твоя́ пáче живóт, устнè моѝ похвали́те Тя. Тáко благословлю́ Тя в животè моéм, о и҆́мени Твоéм воздежý рýце моѝ. Я́ко от тýка и мáсти да испóлнится душà моя́, и устнáма рáдости восхвáлят Тя устà моя́. Áще поминáх Тя на постéли моéй, на ýтренних поучáхся в Тя. Я́ко был есѝ Помóщник мой, и в крóве крилý Твоéю возрáдуюся. Прильпè душà моя́ по Тебè, менè же прiя́т десни́ца Твоя́. Тíи же всýе искáша дýшу мою́, вни́дут в преиспóдняя землѝ, предадя́тся в рýки орýжiя, чáсти ли́совом бýдут. Царь же возвесели́тся о Бóзе, похвáлится всяк клены́йся И҆м, я́ко загради́шася устà глагóлющих непрáведная.
На ýтренних поучáхся в Тя. Яко был есѝ Помóщник мой, и в крóве крилý Твоéю возрáдуюся. Прильпè душà моя́ по Тебè, менè же прiя́т десни́ца Твоя́.
Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Псалом 87
Гóсподи Бóже спасéнiя моегò, во дни воззвáх, и в нощѝ пред Тобóю. Да вни́дет пред Тя моли́тва моя́: приклонѝ ýхо Твоè к молéнiю моемý, я́ко испóлнися зол душà моя́, и живóт мой áду прибли́жися. Привменéн бых с низходя́щими в ров, бых я́ко человéк без пóмощи, в мéртвых свобóдь, я́ко я́звеннiи спя́щiи во грóбе, и҆́хже не помянýл есѝ ктомý, и тíи от рукѝ Твоея́ отриновéни бы́ша. Положи́ша мя в рóве преиспóднем, в тéмных и сéни смéртней. На мне утверди́ся я́рость Твоя́, и вся вóлны Твоя́ навéл есѝ на мя. Удáлил есѝ знáемых мои́х от менè, положи́ша мя мéрзость себè: прéдан бых и не исхождáх. Óчи моѝ изнемогóсте от нищеты̀, воззвáх к Тебè, Гóсподи, весь день, воздéх к Тебè рýце моѝ. Едà мéртвыми твори́ши чудесà? Илѝ врáчеве воскреся́т, и исповéдятся Тебè? Едà повéсть кто во грóбе ми́лость Твою́, и и҆́стину Твою́ в поги́бели? Едà познáна бýдут во тьме чудесà Твоя́, и прáвда Твоя́ в землѝ забвéнней? И аз к Тебè, Гóсподи, воззвáх и ýтро моли́тва моя́ предвари́т Тя. Вскýю, Гóсподи, отрéеши дýшу мою́, отвращáеши лицè Твоè от менè? Нищ есмь аз, и в трудéх от ю́ности моея́; вознéс же ся, смири́хся, и изнемогóх. На мне преидóша гнéви Твоѝ, устрашéнiя Твоя́ возмути́ша мя, обыдóша мя я́ко водà, весь день одержáша мя вкýпе. Удáлил есѝ от менè дрýга и и҆́скренняго, и знáемых моих от страстéй.
Гóсподи Бóже спасéнiя моегò, во дни воззвáх, и в нощѝ пред Тобóю. Да вни́дет пред Тя моли́тва моя́: приклонѝ ýхо Твоè к молéнiю моемý.
Псалом 102
Благословѝ, душè моя, Гóспода, и вся внýтренняя моя и҆́мя святóе Егò. Благословѝ, душè моя, Гóспода, и не забывáй всех воздая́ній Егò, очищáющаго вся беззакóнїя твоя́, исцеля́ющаго вся недýги твоя́, избавля́ющаго от истлéнiя живóт твой, венчáющаго тя ми́лостію и щедрóтами, исполня́ющаго во благи́х желáнїе твоè: обновится я́ко óрля юность твоя́. Творя́й ми́лостыни Госпóдь, и судьбý всем оби́димым. Сказà путѝ Своя́ Моисéови, сыновóм Iзрáилевым хотéнїя Своя́: Щедр и Ми́лостив Госпóдь, Долготерпели́в и Многоми́лостив. Не до концà прогнéвается, нижè во век враждýет, не по беззакóнїем нáшим сотвори́л есть нам, нижè по грехóм нáшым воздáл есть нам. Я́ко по высотè небéсней от землѝ, утверди́л есть Госпóдь ми́лость Свою́ на боя́щихся Егò. Ели́ко отстоят востóцы от зáпад, удáлил есть от нас беззакóнїя нáша. Я́коже щéдрит отéц сы́ны, ущéдри Госпóдь боя́щихся Егò. Я́ко Той познà создáнїе нáше, помянý, яко персть есмы̀. Человéк, яко травà днíе eгò, яко цвет сéльный, тáко оцветéт, яко дух прóйде в нем, и не бýдет, и не познáет ктомý мéста своегò. Ми́лость же Госпóдня от вéка и до вéка на боя́щихся Егò, и прáвда Егò на сынéх сынóв, храня́щих завéт Егò, и пóмнящих зáповеди Егò твори́ти я. Госпóдь на Небесѝ уготóва Престóл Свой, и Цáрство Егò всéми обладáет. Благослови́те Гóспода вси Áнгели Егò, си́льнїи крéпостїю, творя́щїи слóво Егò, услышати глас словéс Егò. Благослови́те Гóспода вся Си́лы Егò, слýги Егò, творя́щїи вóлю Егò. Благослови́те Гóспода вся делà Егò, на вся́ком мéсте влады́чества Егò, благословѝ, душè моя́, Гóспода.
На вся́ком мéсте влады́чества Егò, благословѝ, душè моя́, Гóспода.
Псалом 142
Гóсподи, услы́ши моли́тву мою́, внушѝ молéнiе моè во и҆́стине Твоéй, услы́ши мя в прáвде Твоéй и не вни́ди в суд с рабóм Твои́м, я́ко не оправди́тся пред Тобóю всяк живы́й. Яко погнà враг дýшу мою́, смири́л есть в зéмлю живóт мой, посади́л мя есть в тéмных, я́ко мéртвыя вéка. И уны̀ во мне дух мой, во мне смятéся сéрдце моè. Помянýх дни дрéвнiя, поучи́хся во всех дéлех Твои́х, в творéнiих рукý Твоéю поучáхся. Воздéх к Тебè рýце моѝ, душà моя́, я́ко земля́ безвóдная Тебè. Скóро услы́ши мя, Гóсподи, исчезè дух мой, не отвратѝ лицà Твоегò от менè, и уподóблюся низходя́щым в ров. Слы́шану сотворѝ мне заýтра ми́лость Твою́, я́ко на Тя уповáх. Скажѝ мне, Гóсподи, путь вóньже пойдý, я́ко к Тебè взях дýшу мою́. Измѝ мя от враг мои́х, Гóсподи, к Тебè прибегóх. Научѝ мя твори́ти вóлю Твою́, я́ко Ты есѝ Бог мой. Дух Твой Благíй настáвит мя на зéмлю прáву. И҆́мене Твоегò рáди, Гóсподи, живи́ши мя, прáвдою Твоéю изведéши от печáли дýшу мою́. И ми́лостiю Твоéю потреби́ши врагѝ моя́ и погуби́ши вся стужáющыя душѝ моéй, я́ко аз раб Твой есмь.
Услы́ши мя, Гóсподи, в прáвде Твоéй и не вни́ди в суд с рабóм Твои́м. Услы́ши мя, Гóсподи, в прáвде Твоéй и не вни́ди в суд с рабóм Твои́м.
Дух Твой Благíй настáвит мя на зéмлю прáву.
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
БОГ ГОСПОДЬ, глас 4
Чтец: Бог Госпóдь, и яви́ся нам, благословéн Гряды́й во И҆́мя Госпóдне.(Пс.117:27А,26А)
Чтец: И҆сповéдайтеся Гóсподеви, я́ко благ, я́ко в век ми́лость Егò.(Пс.117:1)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Обышéдше обыдóша мя и и҆́менем Госпóдним противля́хся им.(Пс.117:11)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Не умрý, но жив бýду и повéм делà Госпóдня.(Пс.117:17)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Кáмень, Егóже небрегóша зи́ждущiи, Сей бысть во главý ýгла, от Гóспода бысть Сей, и есть ди́вен во очесéх нáших. (Пс.117:22-23)
Хор: Бог Госпóдь, и явúся нам, благословéн Гряды́й во И҆́мя Госпóдне.
ТРОПАРИ
Тропáрь прáздника, глас 4: Рождествò Твоè, Богорóдице Дéво,/ рáдость возвестù всей вселéнней:/ из Тебè бо возсiя́ Сóлнце Прáвды, Хрїстóс Бог наш,/ и, разрушúв кля́тву, дадè благословéнiе,// и, упразднúв смерть, даровà нам живóт вéчный.(Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Рождествò Твоè, Богорóдице Дéво,/ рáдость возвестù всей вселéнней:/ из Тебè бо возсiя́ Сóлнце Прáвды, Хрїстóс Бог наш,/ и, разрушúв кля́тву, дадè благословéнiе,// и, упразднúв смерть, даровà нам живóт вéчный.
Гóсподи, помúлуй. (трúжды)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
КАФИЗМЫ И СЕДАЛЬНЫ
КАФИЗМА ШЕСТНАДЦАТАЯ
И чтем кафíсму 16-ю ( или одúн псалóм, или до 1-й Слáвы)
Псалом 109
Речè Госпóдь Гóсподеви моемý: седѝ одеснýю Менè, дóндеже положý врагѝ Твоя́ поднóжiе ног Твои́х. Жезл си́лы пóслет ти Госпóдь от Сióна, и госпóдствуй посредè врагóв Твои́х. С Тобóю начáло в день си́лы Твоея́, во свéтлостех святы́х Твои́х, из чрéва прéжде денни́цы роди́х Тя. Кля́тся Госпóдь и не раскáется: Ты iерéй во век, по чи́ну Мелхiседéкову. Госпóдь одеснýю Тебè сокруши́л есть в день гнéва Своегò царѝ. Сýдит во язы́цех, испóлнит падéнiя, сокруши́т главы̀ на землѝ мнóгих. От потóка на путѝ пiéт, сегò рáди вознесéт главý.
Псалом 110
Исповéмся Тебè, Гóсподи, всем сéрдцем мои́м в совéте прáвых и сóнме. Вéлiя делà Госпóдня, изы́скана во всех вóлях Егò. Исповéданiе и великолéпiе дéло Егò и прáвда Егò пребывáет в век вéка. Пáмять сотвори́л есть чудéс Свои́х, Ми́лостив и Щедр Госпóдь. Пи́щу дадè боя́щимся Егò, помянéт в век завéт Свой. Крéпость дел Свои́х возвести́ лю́дем Свои́м, дáти им достоя́нiе язы́к. Делà рук Егò и́стина и суд, вéрны вся зáповеди Егò, утвержéны в век вéка, сотворéны во и́стине и правотè. Избавлéнiе послà лю́дем Свои́м: заповéда в век завéт Свой. Свя́то и стрáшно и́мя Егò. Начáло премýдрости страх Госпóдень, рáзум же благ всем творя́щим ѝ. Хвалà Егò пребывáет в век вéка.
Псалом 111
Блажéн муж, боя́йся Гóспода, в зáповедех Егò восхóщет зелò. Си́льно на землѝ бýдет сéмя eгò, род прáвых благослови́тся: слáва и богáтство в домý eгò, и прáвда eгò пребывáет в век вéка. Возсiя́ во тме свет прáвым, ми́лостив и щедр, и прáведен. Благ муж, щéдря и дая́: устрóит словесà своя́ на судè, я́ко в век не подви́жится. В пáмять вéчную бýдет прáведник. От слýха зла не убои́тся, готóво сéрдце eгò уповáти на Гóспода. Утверди́ся сéрдце eгò, не убои́тся, дóндеже воззри́т на врагѝ своя́. Расточѝ, дадé убóгим, прáвда eгò пребывáет во век вéка, рог eгò вознесéтся в слáве. Грéшник ýзрит и прогнéвается, зубы̀ свои́ми поскрежéщет и растáет, желáнiе грéшника поги́бнет.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
Псалом 112
Хвали́те, óтроцы, Гóспода, хвали́те и́мя Госпóдне. Бýди и́мя Госпóдне благословéнно отны́не и до вéка. От востóк сóлнца до зáпад хвáльно и́мя Госпóдне. Высóк над всéми язы́ки Госпóдь: над небесы̀ слáва Егó. Кто я́ко Госпóдь Бог наш? На высóких живы́й и на смирéнныя призирáяй на небеси́ и на земли́, воздвизáяй от земли́ ни́ща и от гнóища возвышáяй убóга, посади́ти eгó с кня́зи, с кня́зи людéй свои́х, вселя́я неплóдовь в дом мáтерь о чáдех веселя́щуся.
Псалом 113
Во исхóде Iзрáилеве от Еги́пта, дóму Iáковля из людéй вáрвар, бысть Iудéа святы́ня Егó, Iзрáиль óбласть Eгó. Мóре ви́де и побéже, Iордáн возврати́ся вспять, гóры взыгрáшася, я́ко овни́, и хóлми, я́ко áгнцы óвчiи. Что ти есть, мóре, я́ко побéгло еси́? И тебé, Iордáне, я́ко возврати́лся еси́ вспять? Гóры, я́ко взыгрáстеся, я́ко овни́, и хóлми, я́ко áгнцы óвчiи? От лицá Госпóдня подви́жеся земля́, от лицá Бóга Iáковля, обрáщшаго кáмень во езéра воднáя и несекóмый во истóчники водны́я. Не нам, Гóсподи, не нам, но и́мени Твоемý даждь слáву, о ми́лости Твоéй и и́стине Твоéй. Да не когдá рекýт язы́цы: где есть Бог их? Бог же наш на небеси́ и на земли́, вся ели́ка восхотé, сотвори́. Íдоли язы́к сребрó и злáто, делá рук человéческих. Устá и́мут, и не возглагóлют, óчи и́мут и не ýзрят, ýши и́мут, и не услы́шат, нóздри и́мут, и не обоня́ют, рýце и́мут, и не ося́жут, нóзе и́мут, и не пóйдут, не возглася́т гортáнем свои́м. Подóбни им да бýдут творя́щiи я́, и вси надéющiися на ня. Дом Iзрáилев уповá на Гóспода: Помóщник и Защи́титель им есть. Дом Аарóнь уповá на Гóспода: Помóщник и Защи́титель им есть. Боя́щiися Гóспода уповáша на Гóспода: Помóщник и Защи́титель им есть. Госпóдь помянýв ны благослови́л есть нас, благослови́л есть дом Iзрáилев, благослови́л есть дом Аарóнь, благослови́л есть боя́щiяся Гóспода, мáлыя с вели́кими. Да приложи́т Госпóдь на вы, на вы и на сы́ны вáша. Благословéни вы Гóсподеви, сотвóршему нéбо и зéмлю. Нéбо небесé Гóсподеви, зéмлю же дадé сыновóм человéческим. Не мéртвiи восхвáлят Тя, Гóсподи, нижé вси низходя́щiи во ад, но мы, живи́и, благослови́м Гóспода отны́не и до вéка.
Псалом 114
Возлюби́х, я́ко услы́шит Госпóдь глас молéнiя моегó, я́ко приклони́ ýхо Своé мне, и во дни моя́ призовý. Объя́ша мя болéзни смéртныя, беды́ áдовы обретóша мя, скорбь и болéзнь обретóх, и и́мя Госпóдне призвáх: о, Гóсподи, избáви дýшу мою́. Ми́лостив Госпóдь и Прáведен, и Бог наш ми́лует. Храня́й младéнцы Госпóдь: смири́хся, и спасé мя. Обрати́ся, душé моя́, в покóй твой, я́ко Госпóдь благодéйствова тя. Я́ко изъя́т дýшу мою́ от смéрти, óчи мои́ от слез и нóзе мои́ от поползновéнiя. Благоугождý пред Гóсподем во странé живы́х.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
Псалом 115
Вéровах, тéмже возглагóлах, аз же смири́хся зелò. Аз же рех во изступлéнiи моéм: всяк человéк ложь. Что воздáм Гóсподеви о всех, я́же воздадè ми? Чáшу спасéнiя прiимý и и́мя Госпóдне призовý, моли́твы моя́ Гóсподеви воздáм пред всéми людьми́ Егò. Честнá пред Гóсподем смерть преподóбных Егò. О, Гóсподи, аз раб Твой, аз раб Твой и сын рабы́ни Твоея́; растерзáл есѝ ýзы моя́. Тебè пожрý жéртву хвалы́, и во и́мя Госпóдне призовý. Моли́твы моя́ Гóсподеви воздáм пред всéми людьмѝ Егò, во двóрех дóму Госпóдня, посредè тебè, Iерусали́ме.
Псалом 116
Хвали́те Гóспода вси язы́цы, похвали́те Егò вси лю́дiе, я́ко утверди́ся ми́лость Егò на нас, и и́стина Госпóдня пребывáет во век.
Псалом 117
Исповéдайтеся Гóсподеви, я́ко Благ, я́ко в век ми́лость Егò. Да речéт ýбо дом Iзрáилев: я́ко Благ, я́ко в век ми́лость Егò. Да речéт ýбо дом Аарóнь: я́ко Благ, я́ко в век ми́лость Егò. Да рекýт ýбо вси боя́щiися Гóспода: я́ко Благ, я́ко в век ми́лость Егò. От скóрби призвáх Гóспода, и услы́ша мя в прострáнство. Госпóдь мне Помóщник, и не убою́ся, что сотвори́т мне человéк. Госпóдь мне Помóщник, и аз воззрю́ на врагѝ моя́. Блáго есть надéятися на Гóспода, нéжели надéятися на человéка. Блáго есть уповáти на Гóспода, нéжели уповáти на кня́зи. Вси язы́цы обыдóша мя, и и́менем Госпóдним противля́хся им, обышéдше обыдóша мя, и и́менем Госпóдним противля́хся им, обыдóша мя, я́ко пчéлы сот, и разгорéшася, я́ко огнь в тéрнiи, и и́менем Госпóдним противля́хся им. Отриновéн преврати́хся пáсти, и Госпóдь прiя́т мя. Крéпость моя́ и пéнiе моè Госпóдь, и бысть ми во спасéнiе. Глас рáдости и спасéнiя в селéнiих прáведных: десни́ца Госпóдня сотвори́ си́лу. Десни́ца Госпóдня вознесè мя, десни́ца Госпóдня сотвори́ си́лу. Не умрý, но жив бýду, и повéм делá Госпóдня. Наказýя наказá мя Госпóдь, смéрти же не предадè мя. Отвéрзите мне вратá прáвды, вшед в ня исповéмся Гóсподеви. Сiя́ вратá Госпóдня, прáведнiи вни́дут в ня. Исповéмся Тебè, я́ко услы́шал мя еси́, и был еси́ мне во спасéнiе. Кáмень, eгóже небрегóша зи́ждущiи, сей бысть во главý ýгла: от Гóспода бысть сей, и есть ди́вен во очесéх нáших. Сей день, eгóже сотвори́ Госпóдь, возрáдуемся и возвесели́мся в онь. О, Гóсподи, спаси́ же, о Гóсподи, поспеши́ же. Благословéн гряды́й во и́мя Госпóдне, благослови́хом вы из дóму Госпóдня. Бог Госпóдь, и яви́ся нам: состáвите прáздник во учащáющих до рог олтарéвых. Бог мой есѝ Ты, и исповéмся Тебè, Бог мой есѝ Ты, и вознесý Тя. Исповéмся Тебè, я́ко услы́шал мя есѝ, и был есѝ мне во спасéнiе. Исповéдайтеся Гóсподеви, я́ко Благ, я́ко в век ми́лость Егò.
Чтец: Слáва Отцý и Сыну и Святóму Дýху, и ныне и присно и во вéки векóв, аминь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
СЕДАЛЬНЫ
Хор (по кафíсме седáлен прáздника, глас 4): Возопíй, Давíде, что кля́тся тебè Бог?/ Я́же мне кля́тся, речè, и испóлни ужè:/ от плодà чрéва моегò дáвый Деви́цу,/ из Нея́же Содéтель Хрїстóс, Нóвый Адáм роди́ся, Царь на престóле моéм;/ и цáрствует днесь, имéяй Цáрство недви́жимо.// Неплóды раждáет Богорóдицу и Питáтельницу Жи́зни нáшея.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Возопíй, Давíде, что кля́тся тебè Бог?/ Я́же мне кля́тся, речè, и испóлни ужè:/ от плодà чрéва моегò дáвый Деви́цу,/ из Нея́же Содéтель Хрїстóс, Нóвый Адáм роди́ся, Царь на престóле моéм;/ и цáрствует днесь, имéяй Цáрство недви́жимо.// Неплóды раждáет Богорóдицу и Питáтельницу Жи́зни нáшея.
КАФИЗМА СЕМНАДЦАТАЯ
Псалом 118
Блажéни непорóчнiи в путь, ходя́щiи в закóне Госпóдни. Блажéни испытáющiи свидéнiя Егò, всем сéрдцем взы́щут Егò, не дéлающiи бо беззакóнiя, в путéх Егò ходи́ша. Ты заповéдал еси́ зáповеди Твоя́ сохрани́ти зелò. Дабы́ испрáвилися путiè мои́, сохрани́ти оправдáнiя Твоя́. Тогдà не постыжýся, внегдà призрéти ми на вся зáповеди Твоя́. Исповéмся Тебè в прáвости сéрдца, внегдà научи́ти ми ся судьбáм прáвды Твоея́. Оправдáнiя Твоя́ сохраню́, не остáви менè до зелà. В чесóм испрáвит юнéйшiй путь свой; внегдà сохрани́ти словесà Твоя́. Всем сéрдцем мои́м взыскáх Тебè, не отри́ни менè от зáповедей Твои́х. В сéрдце моéм скрых словесà Твоя́, я́ко да не согрешý Тебè. Благословéн еси́, Гóсподи: научи́ мя оправдáнiем Твои́м. Устнáма мои́ма возвести́х вся судьбы́ уст Твои́х. На пути́ свидéнiй Твои́х наслади́хся, я́ко о вся́ком богáтстве. В зáповедех Твои́х поглумлю́ся, и уразумéю пути́ Твоя́. Во оправдáнiих Твои́х поучýся, не забýду словéс Твои́х. Воздáждь рабý Твоемý: живи́ мя, и сохраню́ словесà Твоя́. Откры́й óчи мои́, и уразумéю чудесà от закóна Твоегò. Пришлéц аз есмь на земли́: не скрый от менè зáповеди Твоя́. Возлюби́ душà моя́ возжелáти судьбы́ Твоя́ на вся́кое врéмя. Запрети́л еси́ гóрдым: прóкляти уклоня́ющiися от зáповедей Твои́х. Отьими́ от менè понóс и уничижéнiе, я́ко свидéнiй Твои́х взыскáх. И́бо седóша кня́зи, и на мя клеветáху, раб же Твой глумля́шеся во оправдáнiих Твои́х: И́бо свидéнiя Твоя́ поучéнiе моè есть, и совéти мои́ оправдáнiя Твоя́. Прильпè земли́ душà моя́: живи́ мя по словеси́ Твоемý. Пути́ моя́ возвести́х, и услы́шал мя еси́: научи́ мя оправдáнiем Твои́м: Путь оправдáнiй Твои́х вразуми́ ми, и поглумлю́ся в чудесéх Твои́х. Воздремà душà моя́ от уны́нiя: утверди́ мя в словесéх Твои́х. Путь непрáвды отстáви от менè, и закóном Твои́м поми́луй мя. Путь и́стины извóлих, и судьбы́ Твоя́ не забы́х. Прилепи́хся свидéнiем Твои́м, Гóсподи, не посрами́ менè. Путь зáповедей Твои́х текóх, егдà расшири́л еси́ сéрдце моè. Законоположи́ мне, Гóсподи, путь оправдáнiй Твои́х, и взыщý и́ вы́ну: Вразуми́ мя, и испытáю закóн Твой, и сохраню́ и́ всем сéрдцем мои́м. Настáви мя на стезю́ зáповедей Твои́х, я́ко тýю восхотéх. Приклони́ сéрдце моè во свидéнiя Твоя́, а не в лихои́мство. Отврати́ óчи мои́, éже не ви́дети суеты́, в пути́ Твоéм живи́ мя. Постáви рабý Твоемý слóво Твоè в страх Твой. Отьими́ поношéнiе моè, éже непщевáх: я́ко судьбы́ Твоя́ блáги. Се возжелáх зáповеди Твоя́, в прáвде Твоéй живи́ мя. И да прiи́дет на мя ми́лость Твоя́, Гóсподи, спасéнiе Твоè по словеси́ Твоемý. И отвещáю поношáющим ми слóво: я́ко уповáх на словесà Твоя́. И не отьими́ от уст мои́х словесè и́стинна до зелà, я́ко на судьбы́ Твоя́ уповáх. И сохраню́ закóн Твой вы́ну, в век и в век вéка. И хождáх в широтè, я́ко зáповеди Твоя́ взыскáх. И глагóлах о свидéнiих Твои́х пред цари́, и не стыдя́хся: И поучáхся в зáповедех Твои́х, я́же возлюби́х зелò: И воздвигóх рýце мои́ к зáповедем Твои́м, я́же возлюби́х, и глумля́хся во оправдáнiих Твои́х. Помяни́ словесà Твоя́ рабý Твоемý, и́хже уповáнiе дал ми еси́. То мя утéши во смирéнiи моéм, я́ко слóво Твоè живи́ мя. Гóрдiи законопреступовáху до зелà: от закóна же Твоегò не уклони́хся. Помянýх судьбы́ Твоя́ от вéка, Гóсподи, и утéшихся. Печáль прiя́т мя от грéшник, оставля́ющих закóн Твой. Пéта бя́ху мне оправдáнiя Твоя́, на мéсте пришéльствiя моегò. Помянýх в нощи́ И́мя Твоè, Гóсподи, и сохрани́х закóн Твой. Сей бысть мне, я́ко оправдáнiй Твои́х взыскáх. Часть моя́ еси́, Гóсподи, рех сохрани́ти закóн Твой. Помоли́хся лицý Твоемý всем сéрдцем мои́м: поми́луй мя по словеси́ Твоемý. Помы́слих пути́ Твоя́, и возврати́х нóзе мои́ во свидéнiя Твоя́. Уготóвихся и не смути́хся сохрани́ти зáповеди Твоя́. У́жя грéшник обязáшася мне, и закóна Твоегò не забы́х. Полýнощи востáх исповéдатися Тебè о судьбáх прáвды Твоея́. Причáстник аз есмь всем боя́щимся Тебè, и храня́щим зáповеди Твоя́. Ми́лости Твоея́, Гóсподи, испóлнь земля́: оправдáнiем Твои́м научи́ мя. Блáгость сотвори́л еси́ с рабóм Твои́м, Гóсподи, по словеси́ Твоемý. Блáгости, и наказáнiю и рáзуму научи́ мя, я́ко зáповедем Твои́м вéровах. Прéжде дáже не смири́ти ми ся, аз прегреши́х: сегò рáди слóво Твоè сохрани́х. Благ еси́ Ты, Гóсподи, и блáгостiю Твоéю научи́ мя оправдáнiем Твои́м. Умнóжися на мя непрáвда гóрдых, аз же всем сéрдцем мои́м испытáю зáповеди Твоя́. Усыри́ся я́ко млекò сéрдце их, аз же закóну Твоемý поучи́хся. Блáго мне, я́ко смири́л мя еси́, я́ко да научýся оправдáнiем Твои́м. Благ мне закóн уст Твои́х, пáче ты́сящ злáта и сребрà.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
Рýце Твоѝ сотвори́сте мя, и создáсте мя: вразумѝ мя, и научýся зáповедем Твои́м. Боя́щiися Тебè ýзрят мя и возвеселя́тся, я́ко на словесà Твоя́ уповáх. Разумéх Гóсподи, я́ко прáвда судьбы́ Твоя́, и вои́стинну смири́л мя есѝ. Бýди же ми́лость Твоя́, да утéшит мя по словесѝ Твоемý рабý Твоемý. Да прiи́дут мне щедрóты Твоя́, и жив бýду, я́ко закóн Твой поучéнiе моè есть. Да постыдя́тся гóрдiи, я́ко непрáведно беззакóнноваша на мя, аз же поглумлю́ся в зáповедех Твои́х. Да обратя́т мя боя́щiися Тебè, и вéдящiи свидéнiя Твоя́. Бýди сéрдце моè непорóчно во оправдáнiих Твои́х, я́ко да не постыжýся. Исчезáет во спасéнiе Твоè душà моя́, на словесà Твоя́ уповáх. Исчезóша óчи моѝ в слóво Твоè, глагóлюще: когдà утéшиши мя; Занè бых я́ко мех на слáне: оправдáнiй Твои́х не забы́х. Коли́ко есть дней рабà Твоегò; когдà сотвори́ши ми от гоня́щих мя суд; Повéдаша мне законопрестýпницы глумлéнiя, но не я́ко закóн Твой, Гóсподи. Вся зáповеди Твоя́ и́стина: непрáведно погнáша мя, помозѝ ми. Вмáле не скончáша менè на землѝ: аз же не остáвих зáповедей Твои́х. По ми́лости Твоéй живѝ мя, и сохраню́ свидéнiя уст Твои́х. Во век, Гóсподи, слóво Твоè пребывáет на Небесѝ. В род и род и́стина Твоя́. Основáл есѝ зéмлю, и пребывáет. Учинéнiем Твои́м пребывáет день, я́ко вся́ческая рабóтна Тебè. Я́ко áще бы не закóн Твой поучéнiе моè был, тогдà ýбо поги́бл бых во смирéнiи моéм. Я́ко áще бы не закóн Твой поучéнiе моè был, тогдà ýбо поги́бл бых во смирéнiи моéм. Я́ко áще бы не закóн Твой поучéнiе моè был, тогдà ýбо поги́бл бых во смирéнiи моéм. Во век не забýду оправдáнiй Твои́х, я́ко в них оживи́л мя есѝ. Твой есмь аз, спаси́ мя, я́ко оправдáнiй Твои́х взыскáх. Менé ждáша грéшницы погуби́ти мя, свидéнiя Твоя́ разумéх. Вся́кiя кончи́ны ви́дех конéц, широкà зáповедь Твоя́ зелò. Коль возлюби́х закóн Твой, Гóсподи, весь день поучéнiе моé есть. Пáче враг мои́х умудри́л мя еси́ зáповедiю Твоéю, я́ко в век моя́ есть. Пáче всех учáщих мя разумéх, я́ко свидéнiя Твоя́ поучéнiе моé есть. Пáче стáрец разумéх, я́ко зáповеди Твоя́ взыскáх. От вся́каго пути́ лукáва возбрани́х ногáм мои́м, я́ко да сохраню́ словесà Твоя́. От судéб Твои́х не уклони́хся, я́ко Ты законоположи́л ми еси́. Коль сладкà гортáни моемý словесà Твоя́, пáче мéда устóм мои́м. От зáповедей Твои́х разумéх, сегò рáди возненави́дех всяк путь непрáвды. Свети́льник ногáма мои́ма закóн Твой, и свет стезя́м мои́м. Кля́хся и постáвих сохрани́ти судьбы́ прáвды Твоея́. Смири́хся до зелà, Гóсподи, живи́ мя по словеси́ Твоемý. Вóльная уст мои́х благоволи́ же, Гóсподи, и судьбáм Твои́м научи́ мя. Душà моя́ в рукý Твоéю вы́ну, и закóна Твоегò не забы́х. Положи́ша грéшницы сеть мне, и от зáповедей Твои́х не заблуди́х. Наслéдовах свидéнiя Твоя́ во век, я́ко рáдованiе сéрдца моегò суть. Приклони́х сéрдце моé сотвори́ти оправдáнiя Твоя́ в век за воздая́нiе. Законопрестýпныя возненави́дех, закóн же Твой возлюби́х. Помóщник мой и Застýпник мой еси́ Ты, на словесà Твоя́ уповáх. Уклони́теся от менé лукáвнующiи, и испытáю зáповеди Бóга моегò. Заступи́ мя по словеси́ Твоемý, и жив бýду, и не посрами́ менé от чáянiя моегò. Помози́ ми, и спасýся, и поучýся во оправдáнiих Твои́х вы́ну. Уничижи́л еси́ вся отступáющiя от оправдáнiй Твои́х, я́ко непрáведно помышлéнiе их. Преступáющiя непщевáх вся грéшныя земли́, сегò рáди возлюби́х свидéнiя Твоя́. Пригвозди́ стрáху Твоемý плóти моя́, от судéб бо Твои́х убоя́хся. Сотвори́х суд и прáвду, не предáждь менé оби́дящим мя. Воспрiими́ рабà Твоегò во блáго, да не оклеветáют менé гóрдiи. Óчи мои́ исчезóсте во спасéнiе Твоé, и в слóво прáвды Твоея́. Сотвори́ с рабóм Твои́м по ми́лости Твоéй, и оправдáнiем Твои́м научи́ мя. Раб Твой есмь аз: вразуми́ мя, и увéм свидéнiя Твоя́. Врéмя сотвори́ти Гóсподеви: разори́ша закóн Твой. Сегò рáди возлюби́х зáповеди Твоя́ пáче злáта и топáзiя. Сегò рáди ко всем зáповедем Твои́м направля́хся, всяк путь непрáвды возненави́дех. Ди́вна свидéнiя Твоя́, сегò рáди испытà я́ душà моя́. Явлéнiе словéс Твои́х просвещáет и вразумля́ет младéнцы. Устà моя́ отверзóх, и привлекóх дух, я́ко зáповедей Твои́х желáх.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
При́зри на мя и поми́луй мя, по судý лю́бящих и́мя Твоè. Стопы̀ моя́ напрáви по словесѝ Твоемý, и да не обладáет мнóю вся́кое беззакóнiе. Избáви мя от клеветы̀ человéческiя, и сохраню́ зáповеди Твоя́. Лицè Твоè просветѝ на рабà Твоегò, и научѝ мя оправдáнiем Твои́м. Исхóдища воднáя изведóсте óчи моѝ, понéже не сохрани́х закóна Твоегò. Прáведен есѝ, Гóсподи, и прáви судѝ Твоѝ. Заповéдал есѝ прáвду свидéнiя Твоя́, и и́стину зелò. Истáяла мя есть рéвность Твоя́, я́ко забы́ша словесà Твоя́ вразѝ моѝ. Разжжéно слóво Твоè зелò, и раб Твой возлюбѝ è. Юнéйшiй аз есмь и уничижéн, оправдáнiй Твои́х не забы́х. Прáвда Твоя́ прáвда во век, и закóн Твой и́стина. Скóрби и нýжды обретóша мя, зáповеди Твоя́ поучéнiе моè. Прáвда свидéнiя Твоя́ в век, вразумѝ мя, и жив бýду. Воззвáх всем сéрдцем мои́м, услы́ши мя, Гóсподи, оправдáнiя Твоя́ взыщý. Воззвáх Ти, спасѝ мя, и сохраню́ свидéнiя Твоя́. Предвари́х в безгóдiи и воззвáх, на словесà Твоя́ уповáх. Предвари́сте óчи моѝ ко ýтру, поучи́тися словесéм Твои́м. Глас мой услы́ши, Гóсподи, по ми́лости Твоéй: по судьбé Твоéй живѝ мя. Прибли́жишася гоня́щiи мя беззакóнiем, от закóна же Твоегò удали́шася. Близ есѝ Ты, Гóсподи, и вси путiè Твоѝ и́стина. Испéрва познáх от свидéнiй Твои́х, я́ко в век основáл я́ есѝ. Виждь смирéнiе моè и измѝ мя, я́ко закóна Твоегò не забы́х. Судѝ суд мой и избáви мя, словесè рáди Твоегò живѝ мя. Далéче от грéшник спасéнiе, я́ко оправдáнiй Твои́х не взыскáша. Щедрóты Твоя́ мнóги, Гóсподи, по судьбè Твоéй живѝ мя. Мнóзи изгоня́щiи мя и стужáющiи ми, от свидéнiй Твои́х не уклони́хся. Ви́дех неразумевáющiя и истáях, я́ко словéс Твои́х не сохрани́ша. Виждь, я́ко зáповеди Твоя́ возлюби́х, Гóсподи, по ми́лости Твоéй живѝ мя. Начáло словéс Твои́х и́стина, и во век вся судьбы̀ прáвды Твоея́. Кня́зи погнáша мя тýне, и от словéс Твои́х убоя́ся сéрдце моè. Возрáдуюся аз о словесéх Твои́х, я́ко обретáяй коры́сть мнóгу. Непрáвду возненави́дех и омерзи́х, закóн же Твой возлюби́х. Седмери́цею днем хвали́х Тя о судьбáх прáвды Твоея́. Мир мног лю́бящим закóн Твой, и несть им соблáзна. Чáях спасéнiя Твоегò, Гóсподи, и зáповеди Твоя́ возлюби́х. Сохрани́ душà моя́ свидéнiя Твоя́ и возлюбѝ я́ зелò. Сохрани́х зáповеди Твоя́ и свидéнiя Твоя́, я́ко вси путiè моѝ пред Тобóю, Гóсподи. Да прибли́жится молéнiе моé пред Тя, Гóсподи, по словесѝ Твоемý вразумѝ мя. Да вни́дет прошéнiе моè пред Тя, Гóсподи, по словесѝ Твоемý избáви мя. Отры́гнут устнè моѝ пéнiе, егдà научи́ши мя оправдáнiем Твои́м. Провещáет язы́к мой словесà Твоя́, я́ко вся зáповеди Твоя́ прáвда. Да бýдет рукà Твоя́ éже спасти́ мя, я́ко зáповеди Твоя́ извóлих. Возжелáх спасéнiе Твоè, Гóсподи, и закóн Твой поучéнiе моè есть. Живà бýдет душà моя́ и восхвáлит Тя, и судьбы̀ Твоя́ помóгут мне. Заблуди́х, я́ко овчà поги́бшее, взыщѝ рабà Твоегò, я́ко зáповедей Твои́х не забы́х.
Чтец: Слáва Отцý и Сы́ну и Святóму Дýху, и ны́не и при́сно и во вéки векóв, аминь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
Хор (по кафíсме седáлен прáздника, глас 4): От кóрене Iессéева и от чресл Давíдовых/ Богоотрокови́ца Марiáм раждáется днесь нам;/ рáдостiю бо рáдуются вся́ческая и обновля́ются./ Срáдуйтеся кýпно, Нéбо и земля́,/ восхвали́те Ю, отéчествия язы́к! Iоакíм весели́тся, и Áнна торжествýет, зовýщи:// неплóды раждáет Богорóдицу и Питáтальницу Жи́зни нáшея.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
От кóрене Iессéева и от чресл Давíдовых/ Богоотрокови́ца Марiáм раждáется днесь нам;/ рáдостiю бо рáдуются вся́ческая и обновля́ются./ Срáдуйтеся кýпно, Нéбо и земля́,/ восхвали́те Ю, отéчествия язы́к! Iоакíм весели́тся, и Áнна торжествýет, зовýщи:// неплóды раждáет Богорóдицу и Питáтальницу Жи́зни нáшея.
ПОЛИЕЛЕЙ
Хор: Хвали́те И҆́мя Госпóдне, хвали́те, рабѝ Гóспода.
Аллилýїа (трúжды)
(И далее хор продолжает чередовать стiхи 134 псалма и Аллилуiа)
стоя́щiи во хрáме Госпóдни, во двóрех дóму Бóга нáшего./ Хвали́те Гóспода, я́ко Благ Госпóдь, пóйте и҆́мени Егò, я́ко добрò:/ я́ко Iáкова избрà Себè Госпóдь, Iзрáиля в достоя́нiе Себè./ Я́ко аз познáх, я́ко Вéлiй Госпóдь, и Госпóдь наш над всéми бóги./ Вся ели́ка восхотè Госпóдь, сотворѝ на небесѝ и на землѝ, в моря́х и во всех бéзднах./ Возводя́ óблаки от послéдних землѝ, мóлнiи в дождь сотворѝ, изводя́й вéтры от сокрóвищ Свои́х./ И҆́же поразѝ пéрвенцы Еги́петскiя, от человéка до скотà./ Послà знáменiя и чудесà посредè Тебè, Еги́пте, на фараóна и на вся рабы̀ eгò./ И҆́же поразѝ язы́ки мнóги и избѝ царѝ крéпки:/ Сиóна, царя Аморрéйска, и Óга, царя́ Васáнска, и вся цáрствiя Ханаáнска,/ и дадè зéмлю их достоя́нiе, достоя́нiе Iзрáилю, лю́дем Свои́м./ Гóсподи, и҆́мя Твоè в век и пáмять Твоя́ в род и род:/ я́ко суди́ти и҆́мать Госпóдь лю́дем Свои́м, и о рабéх Свои́х умóлится./ Íдоли язы́к, сребрò и злáто, делá рук человéческих/ Устà и҆́мут, и не возлагóлют, óчи и҆́мут, и не ýзрят,/ ýши и҆́мут, и не услы́шат, нижè бо есть дух во устéх их./ Подóбни им да бýдут творя́щiи я́, и вси надéющiися на ня./ Дóме Iзрáилев, благослови́те Гóспода, дóме Аарóнь, благослови́те Гóспода, дóме Левíин, благослови́те Гóспода./ Боя́щiися Гóспода, благослови́те Гóспода.
Благословéн Госпóдь от Сióна, живы́й во Iерусали́ме.
Аллилýїа (трúжды)
Исповéдайтеся Гóсподеви, я́ко Благ, я́ко в век ми́лость Егò.
Аллилýїа (трúжды)
(И далее хор продолжает чередовать стiхи 135 псалма и Аллилуiа)
Исповéдайтеся Бóгу богóв, я́ко в век ми́лость Егò./ Исповéдайтеся Гóсподеви господéй, я́ко в век ми́лость Егò./ Сотвóршему чудесà вéлiя еди́ному, я́ко в век ми́лость Егò./ Сотвóршему небесà рáзумом, я́ко в век ми́лость Егò./ Утверди́вшему зéмлю на водáх, я́ко в век ми́лость Егò./ Сотвóршему свети́ла вéлiя еди́ному, я́ко в век ми́лость Егò./ Сóлнце во óбласть дне, я́ко в век ми́лость Егò./ Лунý и звéзды во óбласть нóщи, я́ко в век ми́лость Егò./ Порази́вшему Еги́пта с пéрвенцы eгò, я́ко в век ми́лость Егò,/ и извéдшему Iзрáиля от среды̀ их, я́ко в век ми́лость Егò./ Рукóю крéпкою и мы́шцею высóкою, я́ко в век ми́лость Егò./ Раздéльшему Чермнóе мóре в разделéнiя, я́ко в век ми́лость Егò./ И провéдшему Iзрáиля посредè eгò, я́ко в век ми́лость Егò./ И истря́сшему фараóна и си́лу eгò в мóре Чермнóе, я́ко в век ми́лость Егò./ Провéдшему лю́ди Своя́ в пусты́ни, я́ко в век ми́лость Егò./ Порази́вшему царѝ вéлiя, я́ко в век ми́лость Егò,/ и уби́вшему царѝ крéпкiя, я́ко в век ми́лость Егò:/ Сиóна, царя́ Аморрéйска, я́ко в век ми́лость Егò,/ и Óга, царя́ Васáнска, я́ко в век ми́лость Егò./ И дáвшему зéмлю их достоя́нiе, я́ко в век ми́лость Егò./ Достоя́нiе Iзрáилю, рабý Своемý, я́ко в век ми́лость Егò./ Я́ко во смирéнiи нáшем помянý ны Госпóдь, я́ко в век ми́лость Егò./ И избáвил ны есть от врагóв нáших, я́ко в век ми́лость Егò./ Дая́й пи́щу вся́кой плóти, я́ко в век ми́лость Егò.
Исповéдайтеся Бóгу Небéсному, я́ко в век ми́лость Егò.
Аллилýїа (трúжды)
Продолжéнiе здесь