Неделя 12 по Пятидесятнице. Перенесение мощей блгвв. кн. Петра и кн. Февронии, глас 3. УТРЕНЯ КАНОН
15 сентября́ 2024 гóда. Недéля 12 по Пятидеся́тнице. Перенесéнiе мощéй благовéрных кня́зя Петрà, в úночестве Давíда, и княги́ни Феврóнiи, в úнокинях Евфросúнiи, Мýромских чудотвóрцев. Глас 3. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
(И далее хор продолжает чередовать стiхи 134 псалма и Аллилуиа)
[Псалом 134 Аллилуиа]стоя́щiи во хрáме Госпóдни, во двóрех дóму Бóга нáшего./ Хвали́те Гóспода, я́ко Благ Госпóдь, пóйте и҆́мени Егò, я́ко добрò:/ я́ко Iáкова избрà Себè Госпóдь, Iзрáиля в достоя́нiе Себè./ Я́ко аз познáх, я́ко Вéлiй Госпóдь, и Госпóдь наш над всéми бóги./ Вся ели́ка восхотè Госпóдь, сотворѝ на небесѝ и на землѝ, в моря́х и во всех бéзднах./ Возводя́ óблаки от послéдних землѝ, мóлнiи в дождь сотворѝ, изводя́й вéтры от сокрóвищ Свои́х./ И҆́же поразѝ пéрвенцы Еги́петскiя, от человéка до скотà./ Послà знáменiя и чудесà посредè Тебè, Еги́пте, на фараóна и на вся рабы̀ eгò./ И҆́же поразѝ язы́ки мнóги и избѝ царѝ крéпки:/ Сиóна, царя Аморрéйска, и Óга, царя́ Васáнска, и вся цáрствiя Ханаáнска,/ и дадè зéмлю их достоя́нiе, достоя́нiе Iзрáилю, лю́дем Свои́м./ Гóсподи, и҆́мя Твоè в век и пáмять Твоя́ в род и род:/ я́ко суди́ти и҆́мать Госпóдь лю́дем Свои́м, и о рабéх Свои́х умóлится./ Íдоли язы́к, сребрò и злáто, делá рук человéческих/ Устà и҆́мут, и не возлагóлют, óчи и҆́мут, и не ýзрят,/ ýши и҆́мут, и не услы́шат, нижè бо есть дух во устéх их./ Подóбни им да бýдут творя́щiи я́, и вси надéющiися на ня./ Дóме Iзрáилев, благослови́те Гóспода, дóме Аарóнь, благослови́те Гóспода, дóме Левíин, благослови́те Гóспода./ Боя́щiися Гóспода, благослови́те Гóспода.
Благословéн Госпóдь от Сióна, живы́й во Iерусали́ме.
Аллилýїа (трúжды)
Исповéдайтеся Гóсподеви, я́ко Благ, я́ко в век ми́лость Егò.
Аллилýїа (трúжды)
(И далее хор продолжает чередовать стiхи 135 псалма и Аллилуиа)
[Псалом 135 Аллилуиа]Исповéдайтеся Бóгу богóв, я́ко в век ми́лость Егò./ Исповéдайтеся Гóсподеви господéй, я́ко в век ми́лость Егò./ Сотвóршему чудесà вéлiя еди́ному, я́ко в век ми́лость Егò./ Сотвóршему небесà рáзумом, я́ко в век ми́лость Егò./ Утверди́вшему зéмлю на водáх, я́ко в век ми́лость Егò./ Сотвóршему свети́ла вéлiя еди́ному, я́ко в век ми́лость Егò./ Сóлнце во óбласть дне, я́ко в век ми́лость Егò./ Лунý и звéзды во óбласть нóщи, я́ко в век ми́лость Егò./ Порази́вшему Еги́пта с пéрвенцы eгò, я́ко в век ми́лость Егò,/ и извéдшему Iзрáиля от среды̀ их, я́ко в век ми́лость Егò./ Рукóю крéпкою и мы́шцею высóкою, я́ко в век ми́лость Егò./ Раздéльшему Чермнóе мóре в разделéнiя, я́ко в век ми́лость Егò./ И провéдшему Iзрáиля посредè eгò, я́ко в век ми́лость Егò./ И истря́сшему фараóна и си́лу eгò в мóре Чермнóе, я́ко в век ми́лость Егò./ Провéдшему лю́ди Своя́ в пусты́ни, я́ко в век ми́лость Егò./ Порази́вшему царѝ вéлiя, я́ко в век ми́лость Егò,/ и уби́вшему царѝ крéпкiя, я́ко в век ми́лость Егò:/ Сиóна, царя́ Аморрéйска, я́ко в век ми́лость Егò,/ и Óга, царя́ Васáнска, я́ко в век ми́лость Егò./ И дáвшему зéмлю их достоя́нiе, я́ко в век ми́лость Егò./ Достоя́нiе Iзрáилю, рабý Своемý, я́ко в век ми́лость Егò./ Я́ко во смирéнiи нáшем помянý ны Госпóдь, я́ко в век ми́лость Егò./ И избáвил ны есть от врагóв нáших, я́ко в век ми́лость Егò./ Дая́й пи́щу вся́кой плóти, я́ко в век ми́лость Егò.
Исповéдайтеся Бóгу Небéсному, я́ко в век ми́лость Егò.
Аллилýїа (трúжды)
ТРОПАРИ ВОСКРЕСНЫ ПО НЕПОРОЧНАХ, ГЛАС 5
Благословéн есù, Гóсподи,/научù мя оправдáнiем Твоúм.(Пс.118:12)
Áнгельскiй собóр удиви́ся,/ зря Тебè в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есù, Гóсподи,/научù мя оправдáнiем Твоúм.
Почтò ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есù, Гóсподи,/научù мя оправдáнiем Твоúм.
Зелò рáно мvронóсицы течáху/ ко грóбу Твоемý рыдáющiя,/ но предстà к ним Áнгел и речè:/ рыдáнiя врéмя престà, не плáчите,/ воскресéнiе же апóстолом рцы́те.
Благословéн есù, Гóсподи,/научù мя оправдáнiем Твоúм.
Мvронóсицы жены̀ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речè, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егò Сы́нови, и Святóму Дýху,/ Святéй Трóице во еди́ном существè,/ с Серафíмы зовýще:/ Свят, Свят, Свят есѝ, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехà, Дéво, Адáма избáвила есѝ,/ рáдость же Éве/ в печáли мéсто подалà есѝ,/ пáдшiя же от жи́зни/ к сей напрáви/ из Тебè воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 3: Удивля́я видéнiем,/ орошáя глагóланiи,/ блистáяйся Áнгел миронóсицам глагóлаше:/ что живáго и́щете во грóбе;/ востà истощи́вый грóбы./ Тли Премени́теля разумéйте Непремéннаго./ Рцы́те Бóгови: коль стрáшна делà Твоя́,// я́ко род спасл есѝ человéческiй!
СТЕПЕННА, ГЛАС 3
1 АНТИФОН
Плен Сióнь Ты изъя́л есù от Вавилóна:// и менè от страстéй к животý привлецы̀, Слóве. (Двáжды)
В юг сéющiи слезáми Божéственными,// жнут клáсы рáдостiю присноживóтiя. (Двáжды)
Слáва Ѻтцý и Сы́ну и Святóму Дýху.
Святóму Дýху вся́кое благодáрiе,/ я́коже Отцý и Сы́ну сооблистáет,// в Нéмже вся живýт и дви́жутся.
И ны́не и прúсно и во вéки векóв. Амúнь.
Святóму Дýху вся́кое благодáрiе,/ я́коже Отцý и Сы́ну сооблистáет,// в Нéмже вся живýт и дви́жутся.
2 АНТИФОН
Аще не Госпóдь созúждет дом добродéтелей, всýе труждáемся:// дýшу же покрывáющу, никтóже наш разорúт град.(Дважды)
Плодà чрéвна Дýхом сынотворéное// Тебè, Хрїстý, я́коже и Отцý, святíи всегдà суть.(Двáжды)
Слáва Ѻтцý и Сы́ну и Святóму Дýху.
Святы́м Дýхом прозри́тся вся́кая святы́ня, премýдрость:/ осуществýет бо вся́кую тварь: Томý послýжим:// Бог бо, я́ко Отцý же и Слóву.
И ны́не и прúсно и во вéки векóв. Амúнь.
Святы́м Дýхом прозри́тся вся́кая святы́ня, премýдрость:/ осуществýет бо вся́кую тварь: Томý послýжим:// Бог бо, я́ко Отцý же и Слóву.
3 АНТИФОН
Боя́щiися Гóспода блажéни, в путù ходя́ще зáповедей:// снедя́т бо живóтное всеплóдiе.(Двáжды)
Ѻ́крест трапéзы Твоея́ возвесели́ся,// зря Твоя́, Пастыреначáльниче, исчáдiя, нося́ща вéтви благодéланiя.(Двáжды)
Слáва Ѻтцý и Сы́ну и Святóму Дýху.
Святы́м Дýхом вся́кое богáтство слáвы,/ от Негóже благодáть, и живóт вся́кой твáри:// со Отцéм бо воспевáемь есть, и с Слóвом.
И ны́не и прúсно и во вéки векóв. Амúнь.
Святы́м Дýхом вся́кое богáтство слáвы,/ от Негóже благодáть, и живóт вся́кой твáри:// со Отцéм бо воспевáемь есть, и с Слóвом.
ПРОКИМЕН
Чтец: Прокíмен, глас трéтiй, псалóм Давíдов. Рцы́те во язы́цех, я́ко Госпóдь воцари́ся, и҆́бо испрáви вселéнную, я́же не подви́жится. (Пс.95:10А)
Хор: Рцы́те во язы́цех, я́ко Госпóдь воцарúся,/ и҆́бо испрáви вселéнную, я́же не подвúжится.
Чтец: Воспóйте Гóсподеви песнь нóву, воспóйте Гóсподеви вся земля́. (Пс.95:1)
Хор: Рцы́те во язы́цех, я́ко Госпóдь воцарúся,/ и҆́бо испрáви вселéнную, я́же не подвúжится.
Чтец: Рцы́те во язы́цех, я́ко Госпóдь воцари́ся,
Хор: И҆́бо испрáви вселéнную, я́же не подвúжится.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егò, хвали́те Егò во утвержéнiи си́лы Егò.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Матфéя Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Мф.зач.116): Во врéмя óно, единiинáдесять ученицы̀ идóша в Галiлéю, в гóру, áможе повелè им Iисýс: И ви́девше Егò, поклони́шася Емý: óви же усумнéшася. И пристýпль Iисýс, речè им, глагóля: дадéся Ми вся́ка власть на небесѝ и на землѝ: Шéдше научи́те вся язы́ки, крестя́ще их во и́мя Отцá, и Сы́на, и Святáго Дýха, учáще их блюстѝ вся, ели́ка заповéдах вам. И се, Аз с вáми есмь во вся дни, до скончáнiя вéка. Ами́нь.
[Синодальный перевод]В то время одиннадцать учеников пошли в Галилею, на гору, куда повелел им Иисус, и, увидев Его, поклонились Ему, а иные усомнились. И приблизившись Иисус сказал им: дана Мне всякая власть на небе и на земле. Итак идите, научите все народы, крестя их во имя Отца и Сына и Святого Духа, уча их соблюдать всё, что Я повелел вам; и вот, Я с вами во все дни до скончания века. Аминь.(Мф.28:16-20)
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстè, и святóе Воскресéнiе Твоè поéм и слáвим: Ты бо есѝ Бог наш, рáзве Тебè инóго не знáем, и҆́мя Твоè именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдà благословя́ще Гóспода, поéм Воскресéнiе Егò: распя́тiе бо претерпéв, смéртiю смерть разрушѝ.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегò, и от грехà моегò очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдà суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелю́ся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицà Твоегò, и Дýха Твоегò Святáго не отымѝ от менè. Воздáждь ми рáдость спасéнiя Твоегò, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегò, возрáдуется язык мой прáвде Твоéй. Гóсподи, устнè мои отвéрзеши, и устà моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдà благоволи́ши жéртву прáвды, возношéнiе и всесожегáемая; тогдà возложáт на олтáрь Твой тельцы̀.
Слáва Ѻтцý и Сы́ну и Святóму Дýху.
Глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Тáже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè.(Пс.50:3)
Стiхúра, глас 6: Воскрéс Iисýс от грóба,/ я́коже проречè,/ дадè нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 3
(совмещéнный с канóном крестовоскрéсным (глас 3), Богорóдицы (глас 3) и канóном блгвв. кн. Петрà и Феврóнiи, глас 8)
ПЕСНЬ 1
Iрмóс: Вóды дрéвле/ мáнiем Божéственным/ во едúно сóнмище совокупúвый/ и разделúвый мóре Iзрáильтеским лю́дем,/ Сей Бог наш/ препрослáвлен есть.// Томý Едúному поúм, я́ко прослáвися.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): И҆́же зéмлю осуди́в,/ престýпльшему пóтом изнестѝ плодà тéрнiе,/ от тéрнiя венéц из рукѝ законопрестýпныя,/ Сей Бог наш, плóтски прiéмый,// кля́тву разруши́л есть, я́ко прослáвися.
Хор: Слáва, Гóсподи, Святóму Воскресéнiю Твоемý.
Чтец: Победи́тель и Одолéтель смéрти,/ и҆́же смéрти убоя́вся, яви́ся:/ стрáстную бо плоть одушевлéнную прiéм,/ Сей Бог наш, и брáвся с мучи́телем,// вся совоскресѝ, я́ко прослáвися.
Хор: Пресвятáя Богорóдице, спасù нас.
Богорóдичен: И҆́стинную Богорóдицу вси язы́цы слáвят Тя, без сéмене рóждшую:/ сошéд бо во утрóбу освящéнную Твою́,/ Сей Бог наш, Éже по нам осуществовáся,// Бог же и Человéк из Тебè роди́ся.
Канон крестовоскресный, глас 3
Хор: Слáва, Гóсподи, Крестý Твоемý Честнóму и Воскресéнiю.
Чтец: Род человéчь порабощéн мучи́телем грехолю́бным,/ крóвiю Божéственною Хрїстóс искупѝ,// и обоготвори́в обнови́л есть, я́ко прослáвися.
Хор: Слáва, Гóсподи, Крестý Твоемý Честнóму и Воскресéнiю.
Чтец: Я́ко ýбо смéртен, смéрти хотя́й,/ И́же животý сокрóвищник, Хрїстóс вкусѝ,/ а я́ко безсмéртен сый естествóм,// мéртвыя оживотвори́л есть, я́ко прослáвися.
Канон Богородицы, глас 3
Хор: Пресвятáя Богорóдице, спасù нас.
Чтец: Колéно приклоня́ет вся́ко естествò небéсных, Дéво,/ воплóщшемуся из Тебè,// со земны́ми же достолéпно преиспóдняя, я́ко прослáвися.
Хор: Пресвятáя Богорóдице, спасù нас.
Чтец: О примирéнiй Я́же в Тебè!/ Благи́х бо незави́стно Подáтель,/ я́ко Бог Дýха Божéственнаго подáвый нам,// плоть от Тебè, Отрокови́це, прiя́т, я́ко прослáвися.
Канон блгвв. кн. Петра и Февронии, глас 8
Хор: Святíи благовéрнiи кня́же Пéтре и княгúне Феврóнiе,/ молúте Бóга о нас.
Чтец: Песнь Твоемý угóднику, на землѝ Тебè прослáвльшему,/ Петрý принестѝ, Бóже, дáруй ми,// я́ко да Смыслодáвца пéсньми возвели́чу Тя.(Двáжды)
Хор: Святíи благовéрнiи кня́же Пéтре и княгúне Феврóнiе,/ молúте Бóга о нас.
Чтец: Вас, преблажéннiи, отéчеству вáшему,/ я́ко пресвéтлое сóлнце, Хрїстóс показà,// чудесы̀ всех озаря́ющее, вéрою к вам приходя́щих.(Двáжды)
Слáва Ѻтцý и Сы́ну и Святóму Дýху.
Тропáрь: Я́ко о телéсных небрéгше, и земнáя, я́ко тлéнная, возненави́девше,/ и сегò рáди мíра отрéкшеся, преподóбных чéсти сподóбистеся,// с ни́миже о мíре моли́теся.
И ны́не и прúсно и во вéки векóв. Амúнь.
Богорóдичен: Пречи́стая Богорóдице, рóждшая плóтiю присносýщное Слóво Безначáльнаго Отцà, Приснодéво,/ Емýже ны́не взывáем:// Избáвителю Бóгу нáшему пои́м.
Катавáсiя (глас 8): Крест начертáв, Моисéй/ впря́мо жезлóм Чермнóе пресечè,/ Iзрáилю пешеходя́щу;/ тóже обрáтно фараóновым колеснúцам, удáрив, совокупù,/ вопрекù написáв непобедúмое орýжiе.// Тем Хрїстý поúм, Бóгу нáшему, я́ко прослáвися.
ПЕСНЬ 3
Iрмóс: И҆́же от не сýщих вся Приведы́й,/ Слóвом созидáемая,/ совершáемая Дýхом,/ Вседержúтелю Вы́шнiй,// в любвù Твоéй утвердù менè.
Хор: Слáва, Гóсподи, Святóму Воскресéнiю Твоемý.
Чтец: Крестóм Твои́м постыдéся нечести́вый,/ содéла бо я́му, ю́же ископà, впадè:/ смирéнных же вознесéся, Хрїстè, рог,// во Твоéм воскресéнiи.
Хор: Слáва, Гóсподи, Святóму Воскресéнiю Твоемý.
Чтец: Благочéстiя проповéданiе язы́ком,/ я́ко водà покры̀ моря́, Человеколю́бче:// воскрéс бо от грóба, Трóическiй откры́л есѝ свет.
Хор: Пресвятáя Богорóдице, спасù нас.
Богорóдичен: Преслáвная глагóлана бы́ша о Тебè,/ Грáде Одушевлéнный при́сно Цáрствующаго:// Тобóю бо, Влады́чице, сýщим на землѝ Бог спожи́л есть.
Глас 3
Хор: Слáва, Гóсподи, Крестý Твоемý Честнóму и Воскресéнiю.
Чтец: Очищéнiе, Пречи́стый Крéсте, и́дольских яви́лся есѝ Ты нечистóт:// я́ко Iисýс Пребожéственный на Тебè рýце распростéрл есть.
Хор: Слáва, Гóсподи, Крестý Твоемý Честнóму и Воскресéнiю.
Чтец: Да вси вéрнiи,/ живопрiéмный Грóбе, тебè покланя́емся:/ погребéся бо в тебè// и востà Хрїстóс вои́стинну Бог наш.
Глас 3
Хор: Пресвятáя Богорóдице, спасù нас.
Чтец: Жезл из кóрене Iессéова, прорóчески прозя́бши Дéва,/ цвет Тя, Хрїстè, возсiя́ нам:// Свят есѝ, Гóсподи.
Хор: Пресвятáя Богорóдице, спасù нас.
Чтец: Да Божéственному причáстiю земнорóдныя содéлаеши,/ от Дéвы плоть нáшу Ты, обнищáл есѝ, прiéм:// Свят есѝ, Гóсподи.
Глас 8
Хор: Святíи благовéрнiи кня́же Пéтре и княгúне Феврóнiе,/ молúте Бóга о нас.
Чтец: Безпомóщным бýди помóщник, блажéнне Пéтре,/ и печáльным ми́лостивное утешéнiе,// да, твои́ми моли́твами избавля́еми, почитáем тя.(Двáжды)
Хор: Святíи благовéрнiи кня́же Пéтре и княгúне Феврóнiе,/ молúте Бóга о нас.
Чтец: Я́коже иногдà змíя уби́в, конéчному безвéстiю прéдал есѝ,/ тáко и ны́не твоè отéчество борю́щих победѝ, треблажéнне,// да тя прославля́ем.(Двáжды)
Слáва Ѻтцý и Сы́ну и Святóму Дýху.
Тропáрь: Виждь уны́нiе, виждь печáль, виждь бедý, на ны напáдающую от проти́вных,/ тéмже моли́твою твоéю ко Гóсподу пременѝ, Пéтре,// да благочéстно тя почитáем.
И ны́не и прúсно и во вéки векóв. Амúнь.
Богорóдичен: Тебè вси стяжáхом, хрїстiáне, прибéжище и стéну// и Тебè славослóвим немóлчно, Безневéстная.
Катавáсiя (глас 8): Жезл во óбраз тáйны прiéмлется,/ прозябéнiем бо предразсуждáет свящéнника;/ неплодя́щей же прéжде Цéркви/ ны́не процветè Дрéво Крестà// в держáву и утверждéнiе.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк блгвв. князéй, глас 8: Мíра сегò княжéнiе и слáву врéменну помышля́я,/ сегò рáди благочéстно в мíре пожúл есù, Пéтре,/ кýпно и с супрýжницею твоéю премýдрою Феврóнiею,/ мúлостынею и молúтвами Бóгу угодúвше./ Тéмже, и по смéрти неразлýчно во грóбе лежáще,/ исцелéнiе невúдимо подавáете,/ и ны́не Хрїстý молúтеся// сохранúти град же и лю́ди, úже вас слáвящих.
Íкос: Уяснѝ язы́к мой, Спáсе, и умирѝ сéрдце моè,/ разширѝ устà моя́ и напóлни Дýха и премýдрости,/ да и́миже возглагóлю и воспою́ си́це Твоя́ чудотвóрцы:/ рáдуйся, Пéтре блажéнне с прехвáльною Феврóнiею вкýпе./ Рáдуйтеся, землѝ Россíйстей застýпницы и князéм правослáвным помóщницы./ Рáдуйтеся, отéчеству вáшему храни́тели и грáду нáшему утверждéнiе./ О пречестнáя двóице и благóе сопряжéнiе, Хрїстý моли́теся// сохрани́ти град и лю́ди, и́же вас слáвящих.
Седáлен блгвв. князéй, глас 4: Благословéнному и светонóсному торжествý,/ я́коже сóлнцу возсiя́вшему, Петрà и Феврóнiи, во всем мíре,/ к ни́мже стецéмся, вéрнiи, и непрестáнно вопiéм си́це:/ áще и преидóсте от землѝ, преслáвнiи, но нас не отлучи́стеся/ и тáмо со Áнгелы Трóице предстоитè,// Ю́же моли́те спастѝ дýшы нáшя.(Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Богорóдичен из Минéи, глас 4: Слóво Óтчее, Хрїстà Бóга нáшего, от Тебè воплоти́вшагося, познáхом, Богорóдице Дéво,/ Еди́на Чи́стая, Еди́на Благословéнная.// Тем непрестáнно Тя, воспевáюще, величáем.
ПЕСНЬ 4
Iрмóс: Положúл есù к нам твéрдую любóвь, Гóсподи,/ Единорóднаго бо Твоегò Сы́на за ны на смерть дал есù./ Тéмже Ти зовéм, благодаря́ще:// слáва сúле Твоéй, Гóсподи.
Хор: Слáва, Гóсподи, Святóму Воскресéнiю Твоемý.
Чтец: Я́звы, Хрїстè, и рáны ми́лостивно подъя́л есѝ,/ досáду по лани́тома ударéнiй терпя́, и долготерпели́вне оплевáнiя нося́,/ и҆́миже содéлал есѝ мне Спасéнiе:// слáва си́ле Твоéй, Гóсподи.
Хор: Слáва, Гóсподи, Святóму Воскресéнiю Твоемý.
Чтец: Тéлом смéртным, Животè, смéрти причасти́лся есѝ,/ стрáсти рáди ни́щих, и воздыхáнiя убóгих Твои́х,/ и растли́в тлéющаго, Препрослáвленне,// всех совоскреси́л есѝ, я́ко прослáвися.
Хор: Пресвятáя Богорóдице, спасù нас.
Богорóдичен: Помянѝ, Хрїстè, éже стяжáл есѝ стáдо стрáстiю Твоéю:/ Препрослáвленныя Твоея́ Мáтере ми́лостивныя мольбы̀ прiéм,/ и посети́в озлóбленное,// избáви си́лою Твоéю, Гóсподи.
Глас 3
Хор: Слáва, Гóсподи, Крестý Твоемý Честнóму и Воскресéнiю.
Чтец: Создáвый по óбразу Твоемý, Человеколю́бче, человéка,/ и умерщвлéна грехóм преступлéнiя рáди,// распéнся на лóбнем, спасл есѝ.
Хор: Слáва, Гóсподи, Крестý Твоемý Честнóму и Воскресéнiю.
Чтец: Мéртвыя ýбо, и́хже пожрè смерть, отдадè,/ разори́ся же и áдово тлетвóрное цáрство,// воскрéсшу Ти из грóба, Гóсподи.
Глас 3
Хор: Пресвятáя Богорóдице, спасù нас.
Чтец: И҆́же постáвивый гóры, Влады́ко, мéрилом Божéственнаго рáзума,/ отсечéн есѝ от Дéвы Кáмень, кромè рук:// си́ле Твоéй слáва, Человеколю́бче.
Хор: Пресвятáя Богорóдице, спасù нас.
Чтец: Недýгующее исцели́л есѝ нáше естествò, Влады́ко,/ скорéйшую из Дéвы сiю́ соедини́в цельбý,// Твоè Пречи́стое, Слóве, Божествò.
Глас 8
Хор: Святíи благовéрнiи кня́же Пéтре и княгúне Феврóнiе,/ молúте Бóга о нас.
Чтец: Я́ко ходáтай и застýпник отéчеству твоемý,/ я́ко сопроти́вных реши́тель бýди, заступáя лю́ди твоя́,// тебè, Пéтре, слáвящыя.(Двáжды)
Хор: Святíи благовéрнiи кня́же Пéтре и княгúне Феврóнiе,/ молúте Бóга о нас.
Чтец: Я́ко в Небéсных оби́телех с преподóбными и прáведными веселя́ся,/ преблажéнне Пéтре кýпно с Феврóнiею,// не престáй моля́ о лю́дех твои́х.(Двáжды)
Слáва Ѻтцý и Сы́ну и Святóму Дýху.
Тропáрь: Тебè мóлимся, преблажéнне, сопроти́вных шатáнiе низложѝ/ и недýги человéков облегчѝ,// я́ко да во глáсех хвалéнiя тебè величáем.
И ны́не и прúсно и во вéки векóв. Амúнь.
Богорóдичен: Очищéнiе нáшым дáруй прегрешéнiем, я́ко Преблáг,// и умирѝ мiр Твой, Бóже, моли́твами рóждшiя Тя.
Катавáсiя (глас 8): Услы́шах, Гóсподи,/ смотрéнiя Твоегò тáинство,/ разумéх делà Твоя́// и прослáвих Твоè Божествò.
ПЕСНЬ 5
Iрмóс: К Тебé ýтреннюю, всех Творцý,/ преимýщему всяк ум мíрови,/ занé свет повелéнiя Твоя́,// в нúхже настáви мя.
Хор: Слáва, Гóсподи, Святóму Воскресéнiю Твоемý.
Чтец: Судiѝ непрáведному,/ еврéйскою зáвистiю прéдан быв, Всеви́дче,/ и всей прáведне судя́й землѝ,// Адáма дрéвняго избáвил есѝ осуждéнiя.
Хор: Слáва, Гóсподи, Святóму Воскресéнiю Твоемý.
Чтец: Твой мир цéрквам Твои́м, Хрїстè,/ непобеди́мою си́лою Крестà Твоегò,// из мéртвых воскресы́й, подáждь, и спасѝ дýши нáша.
Хор: Пресвятáя Богорóдице, спасù нас.
Богорóдичен: Ски́нiя Святáя, и прострáннейши небéс,/ я́ко И҆́же во всей твáри Невмести́маго Слóва Бóжiя прiéмши,// Еди́на яви́лася есѝ, Приснодéво.
Глас 3
Хор: Слáва, Гóсподи, Крестý Твоемý Честнóму и Воскресéнiю.
Чтец: Копiéм в ребрò Твоè, о Хрїстè мой, прободéн быв,/ от ребрà человéча создáнную,/ губи́тельства всем человéком бы́вшую ходáтаицу,// кля́твы свободи́л есѝ.
Хор: Слáва, Гóсподи, Крестý Твоемý Честнóму и Воскресéнiю.
Чтец: Рáвен Отцý по Существý сый,/ свящéнный храм Пречи́стаго Твоегò и Всечестнáго телесè,// из мéртвых воскреси́л есѝ, Хрїстè Спáсе наш.
Глас 3
Хор: Пресвятáя Богорóдице, спасù нас.
Чтец: Слóво Бóжiе Сын Твой, Дéво,/ Содéтель Адáма первоздáннаго,/ не создáнiе, áще и плоть одушевлéну// Себè из Тебè создáл есть.
Хор: Пресвятáя Богорóдице, спасù нас.
Чтец: Рáвен Отцý Сын Твой, Дéво,/ Слóво Бóжiе, Ипостáсь совершéнна во двою́ естествý,// Iисýс Госпóдь, Бог совершéн и Человéк.
Глас 8
Хор: Святíи благовéрнiи кня́же Пéтре и княгúне Феврóнiе,/ молúте Бóга о нас.
Чтец: Земля́ освяти́ся, прiéмши честнáя телесà вáша,/ Богоблажéннiи Пéтре и Феврóнiе,/ человéцы же, прiéмлюще вáми исцелéнiе, Хрiстà слáвят,// и́скренно вас прослáвльшаго.(Двáжды)
Хор: Святíи благовéрнiи кня́же Пéтре и княгúне Феврóнiе,/ молúте Бóга о нас.
Чтец: Áще и преидóсте от землѝ, но к Небéсным доспéсте/ и тáмо со Áнгелы Трóице предстáсте,// Ю́же моли́те спастѝ любóвiю вас почитáющих, блажéннiи.(Двáжды)
Слáва Ѻтцý и Сы́ну и Святóму Дýху.
Тропáрь: Я́ко звéзды пресвéтлыя и я́ко незаходи́мое сóлнце, стяжáвше вас,/ отéчество вáше хвáлится,// почитáюще пáмять вáшу пречестнýю, Пéтре и Феврóнiе.
И ны́не и прúсно и во вéки векóв. Амúнь.
Богорóдичен: Дéву поéм Тя по рождествè, Богорóдице,/ Ты бо плóтiю Бóга Слóва нам родилà есѝ,/ Емýже вси си́це зовéм:// путѝ нáшя напрáви, мóлим Ти ся.
Катавáсiя (глас 8): О треблажéнное Дрéво,/ на нéмже распя́ся Хрїстóс, Царь и Госпóдь!/ И҆́мже падè дрéвом прельстúвый,/ тобóю прельстúвся,/ Бóгу пригвоздúвшуся плóтiю,// подаю́щему мир душáм нáшым.
ПЕСНЬ 6
Iрмóс: Бéздна послéдняя грехóв обы́де мя,/ и исчезáет дух мой;/ но простры́й, Влады́ко, высóкую Твою́ мы́шцу,// я́ко Петрà, мя, Упрáвителю, спасù.
Хор: Слáва, Гóсподи, Святóму Воскресéнiю Твоемý.
Чтец: Бéздна ми́лости и щедрóт обы́де мя,/ благоутрóбным сни́тiем Твои́м:/ воплóщься бо, Влады́ко,// и быв в рáбiи зрáце, обожи́л есѝ, с Собóю сопрослáвив.
Хор: Слáва, Гóсподи, Святóму Воскресéнiю Твоемý.
Чтец: Умерщвлéнiе подъя́т умертви́тель,/ умерщвлéнаго оживлéнно ви́дя:/ Твоегò воскресéнiя сíи суть, Хрїстè, óбразы,// и стрáсти Твоея́ пречи́стыя победи́тельная.
Хор: Пресвятáя Богорóдице, спасù нас.
Богорóдичен: Пречи́стая, я́же Еди́на Создáтелю и человéком, пáче умà исходáтаившая,// Сы́на Твоегò ми́лостива прегрéшшим рабóм Твои́м, и побóрника бы́ти, помоли́ся.
Глас 3
Хор: Слáва, Гóсподи, Крестý Твоемý Честнóму и Воскресéнiю.
Чтец: Рáнами Ты искуси́вся, от áда урáненых,/ стрáстiю Крестà совоскреси́л есѝ./ Тéмже Ти зовý:// возведѝ от тли живóт мой, Человеколю́бче.
Хор: Слáва, Гóсподи, Крестý Твоемý Честнóму и Воскресéнiю.
Чтец: Отверзáются Ти Хрїстè стрáхом вратà áдова,/ сосýды же врáжiя восхищáются:/ тéмже Тя жены̀ сретóша,// вмéсто печáли рáдость прiи́мша.
Глас 3
Хор: Пресвятáя Богорóдице, спасù нас.
Чтец: Воображáется éже по нам, от Нетлéнныя Дéвы,/ И҆́же óбразом неразлýчный, óбразом быв и вéщiю,// не прелóжся Божествóм Человéк.
Хор: Пресвятáя Богорóдице, спасù нас.
Чтец: Бéздны грехóв, и бýри страстéй, Пречи́стая, избáви мя:/ есѝ бо пристáнище, и бéздна чудéс,// вéрою притекáющим к Тебè.
Глас 8
Хор: Святíи благовéрнiи кня́же Пéтре и княгúне Феврóнiе,/ молúте Бóга о нас.
Чтец: О, пречестнáя двóице!/ О вели́цыи свети́льницы!// Освяти́те и прослáвите любóвiю вас в пéснех слáвящих, чудотвóрцы.(Двáжды)
Хор: Святíи благовéрнiи кня́же Пéтре и княгúне Феврóнiе,/ молúте Бóга о нас.
Чтец: Я́ко пресвéтлая двóице и я́ко пречестнáя верстà и благосочетáнiе,// ярéм Госпóдень взéмше, Томý от душѝ порабóтасте.(Двáжды)
Слáва Ѻтцý и Сы́ну и Святóму Дýху.
Тропáрь: Я́ко совéтницы дóбрiи своемý житiю́,/ еди́ну мысль во двою́ тéлу имýще, мiр чудесы̀ просвещáете,// тéмже и нас озари́те моли́твами вáшими.
И ны́не и прúсно и во вéки векóв. Амúнь.
Богорóдичен: Уясня́ют прорóчестiи глáси Бóжiю Тя, Дéво, Роди́тельницу,/ поéм же Тя и мы, ви́дяще сбытiè честны́х прорицáнiй,// дéвству вои́стинну и чистотè вмести́лище.
Катавáсiя (глас 8): Вóднаго звéря во утрóбе/ длáни Ióна крестовúдно распростéр,/ спасúтельную Страсть проображáше я́ве./ Тем, триднéвен изшéд,/ премíрное Воскресéнiе прописáше/ Плóтiю пригвождéннаго Хрїстà Бóга// и триднéвным Воскресéнiем мiр просвéщшаго.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 3: Воскрéсл есù днесь от грóба, Щéдре,/ и нас возвéл есù от врат смéртных;/ днесь Адáм ликýет, и рáдуется Éва,/ вкýпе же и прорóцы с патрiáрхи воспевáют непрестáнно// Божéственную держáву влáсти Твоея́.
Íкос: Нéбо и земля́ днесь да ликовствýют,/ и Хрїстà Бóга единомýдренно да воспевáют,/ я́ко ýзники от гробóв воскресѝ./ Срáдуется вся тварь,/ принося́щи достóйныя пéсни Создáтелю всех,/ и Избáвителю нáшему:/ я́ко человéки из áда днесь, я́ко Жизнодáтель, совозвéд,/ на небесà совозвышáет,/ и низлагáет врáжiя возношéнiя,/ и вратà áдова сокрушáет// Божéственною держáвою влáсти Своея́.
ПЕСНЬ 7
Iрмóс: Я́коже дрéвле/ благочестúвыя три óтроки оросúл есù/ в плáмени халдéйстем,/ свéтлым Божествà огнéм/ и нас озарù,/ благословéн есù, взывáющыя,// Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Раздрáся церкóвная свéтлая катапетáсма, в распя́тiи Содéтеля,/ сокровéнную в Писáнiи явля́ющи вéрным и҆́стину,// благословéн есѝ, зовýщым, Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Прободéнным Твои́м рéбром,/ кáплями Боготóчныя Животворя́щiя Крóве, Хрїстè,/ смотри́тельно кáплющiя на зéмлю,/ сýщих от землѝ возсоздáл есѝ,// благословéн есѝ, зовýщих, Бóже отéц нáших.
Хор: Пресвятáя Трóице, Бóже наш, слáва Тебè.
Трóичен: Дýха Благáго со Отцéм прослáвим, и с Сы́ном Единорóдным,/ Еди́но в Трiéх вéрнiи чтýще Начáло, и Еди́но Божествò:// благословéн есѝ, зовýще, Бóже отéц нáших.
Глас 3
Хор: Слáва, Гóсподи, Крестý Твоемý Честнóму и Воскресéнiю.
Чтец: Не прóста сóлнце на крестè ви́сяща человéка,/ но Бóга воплощéнна зря помрачáется. Емýже и поéм:// благословéн есѝ, Гóсподи, Бóже отéц нáших.
Хор: Слáва, Гóсподи, Крестý Твоемý Честнóму и Воскресéнiю.
Чтец: Крéпкаго Божествóм прiéм ад страшли́вый, нетлéнiя Подáтеля,/ дýшы прáведных вопiю́щыя изблевà:// благословéн есѝ, Гóсподи, Бóже отéц нáших.
Глас 3
Хор: Пресвятáя Богорóдице, спасù нас.
Чтец: И҆́же слáвы Госпóдь, и держáй гóрнiя си́лы,/ И҆́же со Отцéм седя́й, дéвственныма рукáма носи́мь:/ благословéн есѝ, Гóсподи, Бóже отéц нáших.
Хор: Пресвятáя Богорóдице, спасù нас.
Чтец: Я́ра смерть, но сiю́ Тебè бесéдовавшую погуби́л есѝ,/ от Дéвы Богоипостáсная плоть быв:// благословéн есѝ, Гóсподи, Бóже отéц нáших.
Глас 8
Хор: Святíи благовéрнiи кня́же Пéтре и княгúне Феврóнiе,/ молúте Бóга о нас.
Чтец: В болéзни к тебè прибегáющих избавля́й, преблажéнне Пéтре/ кýпно с Феврóнiею, Хрїстý вопiю́щих:// отéц нáших Бóже, благословéн есѝ.(Двáжды)
Хор: Святíи благовéрнiи кня́же Пéтре и княгúне Феврóнiе,/ молúте Бóга о нас.
Чтец: Всем пристáнище бýдите, преблажéннiи,/ и небýрное оти́шiе сýщым во гресéх,/ да и мы с вáми Хрїстý возопiéм:// отéц нáших Бóже, благословéн есѝ.
Хор: Святíи благовéрнiи кня́же Пéтре и княгúне Феврóнiе,/ молúте Бóга о нас.
Чтец: Прибéжище да ми бýдите в день гнéва, Богоблажéннiи,/ я́ко посредè хождý сетéй мнóгих:// тéмже избáвите мя от них, да возмогý воспéти вас.
Слáва Ѻтцý и Сы́ну и Святóму Дýху.
Тропáрь: Днесь преслáвная пáмять Петрà и Феврóнiи, я́ко сóлнце, возсiя́ в мíре,/ в ню́же сошéдшеся, вси воспоéм си́це:// отéц нáших Бóже, благословéн есѝ.
И ны́не и прúсно и во вéки векóв. Амúнь.
Богорóдичен: Кáпля Боготóчная, от Тебè рóждшаяся, мiр освятѝ, Богорóдице Дéво:/ кáпли мне ми́лости источѝ,// освящáющыя дýшы и помышлéнiя земны́х.
Катавáсiя (глас 8): Безýмное велéнiе мучúтеля злочестúваго лю́ди поколебà,/ ды́шущее прещéнiе и злохулéнiе богомéрзкое,/ обáче три óтроки не устрашù я́рость звéрская,/ ни огнь снедáяй,/ но противоды́шущу росонóсному Дýху,/ со огнéм сýще, поя́ху:// препéтый отцéв и нас Бóже, благословéн есù.
ПЕСНЬ 8
Iрмóс: Нестерпúмому огню́ соединúвшеся,/ Богочéстiя предстоя́ще, ю́ноши,/ плáменем же невреждéни,/ Божéственную песнь поя́ху:/ благословúте, вся делà Госпóдня, Гóспода// и превозносúте во вся вéки.
Хор: Слáва, Гóсподи, Святóму Воскресéнiю Твоемý.
Чтец: Раздрáся церкóвная свéтлость,/ егдà крест Твой водрузи́ся на лóбнем,/ и тварь преклоня́шеся стрáхом, воспевáющи:/ благослови́те вся делà Госпóдня, Гóспода,// пóйте и превозноси́те Егò во вéки.
Хор: Слáва, Гóсподи, Святóму Воскресéнiю Твоемý.
Чтец: Воскрéсл есѝ Хрїстè из грóба,/ и пáдшаго прельщéнiем, дрéвом испрáвил есѝ Божéственною си́лою, зовýща и глагóлюща:/ благослови́те вся делà Госпóдня, Гóспода,// пóйте и превозноси́те Егò во век.
Хор: Пресвятáя Богорóдице, спасù нас.
Богорóдичен: Храм Бóжiй яви́лася есѝ Вмести́лище одушевлéнное, и Ковчéг:/ Творцà бо человéком, Богороди́тельнице Пречи́стая, примири́ла есѝ,/ и достóйно вся делà поéм Тя,// и превознóсим во вся вéки.
Глас 3
Хор: Слáва, Гóсподи, Крестý Твоемý Честнóму и Воскресéнiю.
Чтец: Слóво нестрáстное, безстрáстно ýбо Божествóм,/ стрáждет же плóтiю Бог, Емýже и поéм:/ благослови́те вся делá Госпóдня, Гóспода,// пóйте и превозноси́те Егó во вéки.
Хор: Слáва, Гóсподи, Крестý Твоемý Честнóму и Воскресéнiю.
Чтец: Уснýвый ýбо, я́ко смéртен,/ воскрéсл еси́, я́ко Безсмéртен, Спáсе,/ и спасáеши от смéрти пою́щих:/ благослови́те вся делá Госпóдня, Гóспода,// пóйте и превозноси́те Егó во вéки.
Продолжéнiе здесь