Неделя 11 по Пятидесятнице. Сретение Владимирской иконы Божией Матери. ВСЕНОЩНОЕ БДЕНИЕ УТРЕНЯ КАНОН
8 сентября́ 2024 гóда. Недéля 11 по Пятидеся́тнице. Срéтенiе чудотвóрныя iкóны Пресвяты́я Богорóдицы, я́же нарицáется «Владúмирская». Мýчеников Адрiáна и Натáлiи. Глас 2. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
(И далее хор продолжает чередовать стiхи 135 псалма и Аллилуиа)
Исповéдайтеся Бóгу богóв, я́ко в век ми́лость Егò./ Исповéдайтеся Гóсподеви господéй, я́ко в век ми́лость Егò./ Сотвóршему чудесà вéлiя еди́ному, я́ко в век ми́лость Егò./ Сотвóршему небесà рáзумом, я́ко в век ми́лость Егò./ Утверди́вшему зéмлю на водáх, я́ко в век ми́лость Егò./ Сотвóршему свети́ла вéлiя еди́ному, я́ко в век ми́лость Егò./ Сóлнце во óбласть дне, я́ко в век ми́лость Егò./ Лунý и звéзды во óбласть нóщи, я́ко в век ми́лость Егò./ Порази́вшему Еги́пта с пéрвенцы eгò, я́ко в век ми́лость Егò,/ и извéдшему Iзрáиля от среды̀ их, я́ко в век ми́лость Егò./ Рукóю крéпкою и мы́шцею высóкою, я́ко в век ми́лость Егò./ Раздéльшему Чермнóе мóре в разделéнiя, я́ко в век ми́лость Егò./ И провéдшему Iзрáиля посредè eгò, я́ко в век ми́лость Егò./ И истря́сшему фараóна и си́лу eгò в мóре Чермнóе, я́ко в век ми́лость Егò./ Провéдшему лю́ди Своя́ в пусты́ни, я́ко в век ми́лость Егò./ Порази́вшему царѝ вéлiя, я́ко в век ми́лость Егò,/ и уби́вшему царѝ крéпкiя, я́ко в век ми́лость Егò:/ Сиóна, царя́ Аморрéйска, я́ко в век ми́лость Егò,/ и Óга, царя́ Васáнска, я́ко в век ми́лость Егò./ И дáвшему зéмлю их достоя́нiе, я́ко в век ми́лость Егò./ Достоя́нiе Iзрáилю, рабý Своемý, я́ко в век ми́лость Егò./ Я́ко во смирéнiи нáшем помянý ны Госпóдь, я́ко в век ми́лость Егò./ И избáвил ны есть от врагóв нáших, я́ко в век ми́лость Егò./ Дая́й пи́щу вся́кой плóти, я́ко в век ми́лость Егò.
Исповéдайтеся Бóгу Небéсному, я́ко в век ми́лость Егò.
Аллилýїа (трúжды)
ВЕЛИЧАНИЕ БОГОРОДИЦЫ
Хор: Величáем тя,/ Пресвятáя Дéво,/ и чтим óбраз Твой святы́й,/ úмже тóчиши исцелéнiя/ всем, с вéрою притекáющим к немý.
(И далее хор продолжает чередовать стiхи Избранного псалма и Величанiе)
ПСАЛОМ ИЗБРАННЫЙ
Бóже суд Твой царéви даждь,/ И прáвду Твою́ сы́ну царéву./ Суди́ти лю́дем Твои́м в прáвде,/ И ни́щим Твои́м в судè./ Сýдит ни́щим людски́м, и спасéт сы́ны убóгих./ Благовести́те день от дне спасéнiе Бóга нáшего./ Госпóдь даст глагóл благовествýющим си́лою мнóгою./ Кля́тся Госпóдь Давíду и́стиною, и не отвéржется ея́./ От плодà чрéва твоегò посаждý на престóле твоéм./ Сни́дет я́ко дождь на рунò,/ И я́ко кáпля кáплющая на зéмлю./ И приклони́ небесà и сни́де, и мрак под ногáма Егò./ Я́ко избрà Госпóдь Сióна, извóли егò в жили́ще Себè./ Освяти́л есть селéнiе Своè Вы́шнiй./ Бог посредè егò, и не подви́жится./ Пощади́т ни́ща и убóга, и дýши убóгих спасéт./ Вси язы́цы порабóтают Емý./ Весь день благословя́т Егò./ Бýдет утверждéнiе на земли́ на версéх гор./ Бýдет И́мя Егò благословéно во вéки./ И благословя́тся в Нем вся колéна земнáя./ Благословéн Госпóдь Бог Iзрáилев, творя́й чудесà Еди́н./ И благословéно И́мя слáвы Егò в век, и в век вéка./ И испóлнится слáвы Егò вся земля́:// Бýди, бýди.
Хор: Величáем тя,/ Пресвятáя Дéво,/ и чтим óбраз Твой святы́й,/ úмже тóчиши исцелéнiя/ всем, с вéрою притекáющим к немý.
ТРОПАРИ ВОСКРЕСНЫЕ, ГЛАС 5
Благословéн есù, Гóсподи,/научù мя оправдáнiем Твоúм.(Пс.118:12)
Áнгельскiй собóр удиви́ся,/ зря Тебè в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есù, Гóсподи,/научù мя оправдáнiем Твоúм.
Почтò ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есù, Гóсподи,/научù мя оправдáнiем Твоúм.
Зелò рáно мvронóсицы течáху/ ко грóбу Твоемý рыдáющiя,/ но предстà к ним Áнгел и речè:/ рыдáнiя врéмя престà, не плáчите,/ воскресéнiе же апóстолом рцы́те.
Благословéн есù, Гóсподи,/научù мя оправдáнiем Твоúм.
Мvронóсицы жены̀ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речè, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егò Сы́нови, и Святóму Дýху,/ Святéй Трóице во еди́ном существè,/ с Серафíмы зовýще:/ Свят, Свят, Свят есѝ, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехà, Дéво, Адáма избáвила есѝ,/ рáдость же Éве/ в печáли мéсто подалà есѝ,/ пáдшiя же от жи́зни/ к сей напрáви/ из Тебè воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 2: По стрáсти шéдша во гроб жены̀,/ во éже помáзати тéло Твоè, Хрїстè Бóже,/ ви́деша áнгелы во грóбе, и ужасóшася:/ глас бо слы́шаху от них, яко воскрéсе Госпóдь,// дáруя мíрови вéлiю ми́лость.
СЕДАЛЬНЫ ПО ПОЛИЕЛЕИ
Глас 4 (по 1‑м стiхослóвiи): Божéственными заря́ми просвети́ пою́щия Тя и умы́ утверди́, Непорóчная Дéво,/ крéпкая Засту́пнице ми́ра всего́./ Тéмже торжеству́ем вси, любóвiю пою́ще Тя и пришéствiе Твоего́ óбраза слáвяще:/ не престáй, Дéво, моли́твами Твои́ми спасáющи рабы́ Твоя́ от вся́кiя беды́,// еди́на Благословéнная.
Ин, глас 4 (по 1‑м стiхослóвiи): Всю Тя Бог освятѝ, Дéву дóбрую и Невéсто Неискусобрáчная, прему́дрости село́ показáся утрóба Твоя́ Бóга Слóва:/ Ты бо еди́на, Мáти Бóжiя, благи́х Ходáтаица яви́вшися,// вся́ких страстéй избáви рабы́ Твоя́, непрестáнно воспевáющия слáву Твою́.
Глас 2 (по 2‑м стiхослóвiи): Я́ко звезда́ многосвéтлая, взы́де от востóка к зáпаду Твой óбраз, Богомáти,/ озари́ скóрби тьмóю одержи́мых, и прещéнiя враг избáви,/ и, вся тех сéти разруши́в, яви́ся Предстáтельница крéпкая,/ ору́жiе непобеди́мое на враги́ ми́ру всему́:// из Тебе́ бо всех Влады́ка плоть прiи́м, вся человéки обожи́.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Седáлен прáздника по полiелéе, глас 1: Блажéнна еси́ Ты, Богорóдице Чи́стая, вели́чествiя Твоя́ кто воспéти мóжет?/ Е́же чу́до стрáшно и чу́до вéлiе содéявши,/ Твои́ми моли́твами, Богомáти, чту́щiй Тя град всегда́ свобождáется от всех бед,/ тьмы и меча́, погáных пленéнiя и вся́каго гнéва./ Тéмже мы, зря́ще честнóе óбраза Твоего́ пришéствiе,/ хвáлим, я́ко Цари́цу воспевáюще, вéрнiи,/ словесы́ Тя, Чи́стая, блажáще, глагóлем:// Богорóдице Чи́стая, моли́ воплощéннаго из Тебе́ спасти́ся душáм нáшим.
СТЕПЕННА, ГЛАС 2
1 АНТИФОН
Хор: На нéбо óчи пущáю моегò сéрдца, к Тебè, Спасè,// спасù мя Твоúм осiя́нiем. (Двáжды)
Поми́луй нас согрешáющих Тебè мнóго,/ на вся́кiй час, о Хрїстè мой,// и даждь óбраз прéжде концà покáятися Тебè. (Двáжды)
Слáва Ѻтцý и Сы́ну и Святóму Дýху.
Святóму Дýху, Éже цáрствовати подобáет,/ освящáти, подвизáти тварь:// Бог бо есть, Единосýщен Ѻтцý и Слóву.
И ны́не и прúсно и во вéки векóв. Амúнь.
Святóму Дýху, Éже цáрствовати подобáет,/ освящáти, подвизáти тварь:// Бог бо есть, Единосýщен Ѻтцý и Слóву.
2 АНТИФОН
Áще не Госпóдь бы был в нас,/ кто довóлен цел сохранéн бы́ти от врагà,// кýпно и человекоубíйцы? (Двáжды)
Зубóм их не предáждь, Спáсе, Твоегò рабà:// и҆́бо львóвым óбразом на мя подвизáются вразѝ мои. (Двáжды)
Слáва Ѻтцý и Сы́ну и Святóму Дýху.
Святóму Дýху живоначáлiе и честь:/ вся бо создáнная,/ я́ко Бог сый си́лою,// соблюдáет во Ѻтцè, Сы́ном же.
И ны́не и прúсно и во вéки векóв. Амúнь.
Святóму Дýху живоначáлiе и честь:/ вся бо создáнная,/ я́ко Бог сый си́лою,// соблюдáет во Ѻтцè, Сы́ном же.
3 АНТИФОН
Надéющiися на Гóспода, уподóбишася горè святéй:// и҆́же никáкоже двúжутся прилóги врáжiими. (Двáжды)
В беззакóнiи рук свои́х, да не прóструт божéственне живýщiи:// не оставля́ет бо Хрїстóс жезлà на жрéбiи Своéм. (Двáжды)
Слáва Ѻтцý и Сы́ну и Святóму Дýху.
Святы́м Дýхом тóчится вся́ка премýдрость:/ отсю́ду благодáть апóстолом,// и страдáльчествы венчáются мýченицы, и прорóцы зрят.
И ны́не и прúсно и во вéки векóв. Амúнь.
Святы́м Дýхом тóчится вся́ка премýдрость:/ отсю́ду благодáть апóстолом,// и страдáльчествы венчáются мýченицы, и прорóцы зрят.
ПРОКИМЕН
Чтец: Прокíмен, глас вторы́й, псалóм Давíдов: Востáни, Гóсподи, Бóже мой, повелéнiем, и҆́мже заповéдал есѝ, и сонм людéй обы́дет Тя. (Пс.7:7Б-8А)
Хор: Востáни, Гóсподи, Бóже мой, повелéнiем, и҆́мже заповéдал есù,/ и сонм людéй обы́дет Тя.
Чтец: Гóсподи Бóже мой, на Тя уповáх, спасѝ мя. (Пс.7:2А)
Хор: Востáни, Гóсподи, Бóже мой, повелéнiем, úмже заповéдал есù,/ и сонм людéй обы́дет Тя.
Чтец: Востáни, Гóсподи, Бóже мой, повелéнiем, и҆́мже заповéдал есѝ.
Хор: И сонм людéй обы́дет Тя.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егò, хвали́те Егò во утвержéнiи си́лы Егò.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Iоáнна Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Ин.зач.67): Во врéмя óно, яви́ся Iисýс ученикóм Свои́м, востáв от мéртвых, и глагóла Сíмону Петрý: Сíмоне Ióнин лю́биши ли мя, пáче сих? Глагóла Емý: ей Гóсподи, Ты вéси, я́ко люблю́ Тя. Глагóла емý: пасѝ áгнцы Моя́. Глагóла емý пáки вторóе: Сíмоне Ióнин, лю́биши ли Мя? Глагóла Емý: ей Гóсподи, Ты вéси, я́ко люблю́ Тя. Глагóла емý: пасѝ óвцы Моя́. Глагóла емý трéтiе: Сíмоне Ióнин, лю́биши ли Мя? Оскорбè же Петр, я́ко речè емý трéтiе, лю́биши ли Мя? И глагóла Емý: Гóсподи, Ты вся вéси, Ты вéси, я́ко люблю́ Тя. Глагóла емý Iисýс: пасѝ óвцы Моя́. Ами́нь, ами́нь глагóлю тебè: егдà бе юн, поя́сашеся сам, и хождáше, áможе хотя́ше: егдà же состарéешися, и воздéжеши рýце твоѝ: и ин тя поя́шет, и ведéт áможе не хóщеши. Сiè же речè, назнáменуя кóею смéртiю прослáвит Бóга. И сiя́ рек, глагóла емý: идѝ по Мне. Обрáщься же Петр ви́де ученикà егóже любля́ше Iисýс, во след идýща, и҆́же и возлежè на вéчери на пéрси Егò, и речè: Гóсподи, кто есть предая́й Тя? Сегò ви́дев Петр, глагóла Iисýсови: Гóсподи, сей же что? Глагóла емý Iисýс: áще хощý, да той пребывáет дóндеже прiидý, что к тебè? Ты по Мне грядѝ. Изы́де же слóво се в брáтiю, я́ко учени́к той не ýмрет: и не речè емý Iисýс, я́ко не ýмрет: но áще хощý томý пребывáти дóндеже прiидý, что к тебè? Сей есть учени́к свидéтельствуяй о сих, и҆́же и написà сiя: и вем, я́ко и҆́стинно есть свидéтельство егò. Суть же и и҆́на мнóга, я́же сотворѝ Iисýс: я́же áще по еди́ному пи́сана бывáют, ни самомý мню всемý мíру вмести́ти пи́шемых книг, ами́нь.
В те дни явился Иисус ученикам своим, и говорит Симону Петру: Симон Ионин! любишь ли ты Меня больше, нежели они? Петр говорит Ему: так, Господи! Ты знаешь, что я люблю Тебя. Иисус говорит ему: паси агнцев Моих. Еще говорит ему в другой раз: Симон Ионин! любишь ли ты Меня? Петр говорит Ему: так, Господи! Ты знаешь, что я люблю Тебя. Иисус говорит ему: паси овец Моих. Говорит ему в третий раз: Симон Ионин! любишь ли ты Меня? Петр опечалился, что в третий раз спросил его: любишь ли Меня? и сказал Ему: Господи! Ты все знаешь; Ты знаешь, что я люблю Тебя. Иисус говорит ему: паси овец Моих. Истинно, истинно говорю тебе: когда ты был молод, то препоясывался сам и ходил, куда хотел; а когда состаришься, то прострешь руки твои, и другой препояшет тебя, и поведет, куда не хочешь. Сказал же это, давая разуметь, какою смертью Петр прославит Бога. И, сказав сие, говорит ему: иди за Мною. Петр же, обратившись, видит идущего за ним ученика, которого любил Иисус и который на вечери, приклонившись к груди Его, сказал: Господи! кто предаст Тебя? Его увидев, Петр говорит Иисусу: Господи! а он что? Иисус говорит ему: если Я хочу, чтобы он пребыл, пока приду, что тебе до того? ты иди за Мною. И пронеслось это слово между братиями, что ученик тот не умрет. Но Иисус не сказал ему, что не умрет, но: если Я хочу, чтобы он пребыл, пока приду, что тебе до того? - Сей ученик и свидетельствует о сем, и написал сие; и знаем, что истинно свидетельство его. Многое и другое сотворил Иисус; но, если бы писать о том подробно, то, думаю, и самому миру не вместить бы написанных книг. Аминь. (Ин.21:15-25)
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстè, и святóе Воскресéнiе Твоè поéм и слáвим: Ты бо есѝ Бог наш, рáзве Тебè инóго не знáем, и҆́мя Твоè именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдà благословя́ще Гóспода, поéм Воскресéнiе Егò: распя́тiе бо претерпéв, смéртiю смерть разрушѝ.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегò, и от грехà моегò очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдà суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелю́ся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицà Твоегò, и Дýха Твоегò Святáго не отымѝ от менè. Воздáждь ми рáдость спасéнiя Твоегò, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегò, возрáдуется язык мой прáвде Твоéй. Гóсподи, устнè мои отвéрзеши, и устà моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдà благоволи́ши жéртву прáвды, возношéнiе и всесожегáемая; тогдà возложáт на олтáрь Твой тельцы̀.
Слáва Ѻтцý и Сы́ну и Святóму Дýху.
Глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Тáже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè.(Пс.50:3)
Стiхúра, глас 6: Воскрéс Iисýс от грóба,/ я́коже проречè,/ дадè нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 2
(совмещéнный с канóном Богорóдицы Владúмирская (глас 4) и канóном мчч. Адрiáна и Натáлiи, глас 6)
ПЕСНЬ 1
Iрмóс: Во глубинè постлà иногдà/ фараонúтское всевóинство преоружéнная сúла;/ воплóщшееся же Слóво всезлóбный грех потребúло есть,/ препрослáвленный Госпóдь,// слáвно бо прослáвися.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Мiрскíй князь Блáже, емýже написáхомся,/ зáповеди Твоея́ не послýшавше, крестóм Твои́м осуди́ся:/ прирази́ся бо Ти я́ко смéртну:/ отпадè же влáсти Твоея́ держáвою,// и немощны́й обличи́ся.
Хор: Слáва, Гóсподи, Святóму Воскресéнiю Твоемý.
Чтец: Избáвитель рóда человéческаго,/ и нетлéнному животý Начáльник/ в мiр пришéл есѝ:/ Воскресéнiем бо Твои́м раздрáл есѝ смéртныя пелены̀,// Éже славослóвим вси: слáвно бо прослáвися.
Хор: Пресвятáя Богорóдице, спасù нас.
Богорóдичен: Превы́шши яви́лася есѝ, Чи́стая Приснодéво,/ вся́кiя неви́димыя же и ви́димыя твáри:/ Зижди́теля бо родилà есѝ,/ я́ко благоволѝ воплоти́тися во утрóбе Твоéй,// Егóже со дерзновéнiем молѝ, спастѝ дýшы нáшя.
Канон Богородицы Владимирская, глас 4
Хор: Пресвятáя Богорóдице, спасù нас.
Чтец: Просветѝ, Влады́чице, дýши нáша зарéю Божéственною, пáче умà благодáтiю Твоéю,/ и незави́стный дар подáждь ми воспéти Тя,/ я́ко Помóщницу человéческому существý, Препéтая,// вéрное заступлéнiе, на врагѝ побéду отéчеству нáшему.(Двáжды)
Хор: Пресвятáя Богорóдице, спасù нас.
Чтец: Прiиди́те, собери́теся, Россíйстiи собóри,/ в пречестны́й храм Всенепорóчныя Влады́чицы/ и возопíйте, уми́льно моля́щеся, к честнóму óбразу взирáюще:// Богорóдице Безневéстная, хвáлящыя Тя спасѝ.(Двáжды)
Хор: Пресвятáя Богорóдице, спасù нас.
Чтец: Твой, Богомáти, всечестны́й óбраз/ Богоглáсный Евáнгелiя Хрїстóва списáтель, пребожéственный Лукà, написáв,/ Творцà всех на Твои́х честны́х рукáх вообразѝ,/ к немýже притекáющыя напáсти и печáли избавля́еши// и вся покрывáеши Твоéю ми́лостiю.
Хор: Пресвятáя Богорóдице, спасù нас.
Чтец: Храм прекрáсный, Содéтель всех еди́ну Тя обрéт,/ в Тя всели́ся и человéки обожѝ./ К Немýже за ны, Богорóдице, моли́ся,/ спастѝ ны от погáных пленéнiя и вся́кiя ины́я скóрби, находя́щiя на ны,// да Твоегò днесь óбраза срéтенiе всечéстно прáзднуем.
Канон мучеников, глас 6
Хор: Святíи мýченицы молúте Бóга о нас.
Чтец: В нощѝ мя житiя́, сном лю́тым одержи́ма дея́нiй,/ к свéту покая́нiя, Бóже, воздви́гни моли́твами мýченик Твои́х, Хрїстè,// да слáвлю Тя.
Хор: Святíи мýченицы молúте Бóга о нас.
Чтец: Востóком мы́сленнаго сóлнца озари́вшеся мýченицы/ и дне сы́нове бы́вше,// всю íдольскую мглу крéпко потреби́сте.
Слáва Ѻтцý и Сы́ну и Святóму Дýху.
Чтец: От устéн, искáпающих слáдости Божéственнаго рáзума, наслади́вся, Адрiáне,// яд изблевáл есѝ прéжняго неразýмiя, вои́стинну, Богоблажéнне.
И ны́не и прúсно и во вéки векóв. Амúнь.
Богорóдичен: Твоегò прiéмши Содéтеля, я́ко Сам восхотè,/ от безсéменна Твоегò чрéва пáче умà воплощáема, Чи́стая,// твáрей вои́стинну яви́лася есѝ Влады́чица.
Катавáсiя (глас 8): Крест начертáв, Моисéй/ впря́мо жезлóм Чермнóе пресечè,/ Iзрáилю пешеходя́щу;/ тóже обрáтно фараóновым колеснúцам, удáрив, совокупù,/ вопрекù написáв непобедúмое орýжiе.// Тем Хрїстý поúм, Бóгу нáшему, я́ко прослáвися.
ПЕСНЬ 3
Iрмóс: Процвелà есть пусты́ня, я́ко крíн, Гóсподи,/ язы́ческая неплодя́щая цéрковь,/ пришéствiем Твоúм,// в нéйже утвердúся моè сéрдце.
Хор: Слáва, Гóсподи, Святóму Воскресéнiю Твоемý.
Чтец: Тварь в стрáсти Твоéй изменя́шеся,/ зря́щи Тя в нищéтне óбразе от беззакóнных поругáема,// основáвшаго вся Божéственным мановéнiем.
Хор: Слáва, Гóсподи, Святóму Воскресéнiю Твоемý.
Чтец: От пéрсти по óбразу мя рукóю Твоéю создáл есѝ:/ и сокрушéнна пáки в персть смéртную за грех,// Хрїстè сошéд во ад, совоскреси́л есѝ.
Хор: Пресвятáя Богорóдице, спасù нас.
Богорóдичен: Чи́ни удиви́шася áнгельстiи, Пречи́стая,/ и человéческая устраши́шася сердцà о Рождествè Твоéм:// тéмже Тя, Богорóдицу, вéрою чтим.
Глас 2
Хор: Пресвятáя Богорóдице, спасù нас.
Чтец: Все помышлéнiе отвéргше, Богомýдрiи, прiиди́те в срéтенiе прекрáсныя зарѝ,/ держáщiя пресвéтлую лучý, вся просвещáющую// и ми́лостiю весь мiр обогáщшую.(Двáжды)
Хор: Пресвятáя Богорóдице, спасù нас.
Чтец: Твою́, Богомáти, всечестнýю и чудотвóрную iкóну Россíйстiи лю́ди стяжáвше,/ я́ко заступлéнiе крéпко и стéну неруши́му,// мóлятся Ти, на врагѝ побéду даровáти отéчеству нáшему.(Двáжды)
Хор: Пресвятáя Богорóдице, спасù нас.
Чтец: Óблак светозáрный показáся,/ росóю благодáти вся омывáющи телéсныя сквéрны// и дýши просвещáющи, еди́на Всепéтая.
Хор: Пресвятáя Богорóдице, спасù нас.
Чтец: Дрéво многоплóдно яви́лася есѝ, пи́щею неги́блющею вся насыщáющи,/ дýши же веселя́щи, Богоневéсто Чи́стая,/ добродея́нiя всем источѝ// и от скорбéй нýждных спасѝ.
Глас 6
Хор: Святíи мýченицы молúте Бóга о нас.
Чтец: Уз избежáв íдольскаго сýетства, мýчениче,/ связáлся есѝ желáнiем любвè Хрїстóвы// и ýзам страдáлец егò рáдостiю приобщи́лся есѝ.
Хор: Святíи мýченицы молúте Бóга о нас.
Чтец: Завóрами желéзными гóлени сокрушáеми, страстотéрпцы Госпóдни,// нечéстiя кóсти терпéнiя завóрами и мýжеством вои́стинну сокруши́сте.
Слáва Ѻтцý и Сы́ну и Святóму Дýху.
Чтец: Огнéм любвè Божéственныя дýшу опаля́ему супрýга/ распали́ла есѝ желáнiем ко Хрїстý,// любóвь плотскýю, Натáлiе, до концà возненави́девши.
И ны́не и прúсно и во вéки векóв. Амúнь.
Богорóдичен: Божéственнаго рождествà Твоегò, Чи́стая,/ вся́кiй естествà чин превосхóдит чýдо:/ Бóга бо преестéственне зачалà есѝ во чрéве,// и, рóждши, пребывáеши Приснодéва.
Катавáсiя (глас 8): Жезл во óбраз тáйны прiéмлется,/ прозябéнiем бо предразсуждáет свящéнника;/ неплодя́щей же прéжде Цéркви/ ны́не процветè Дрéво Крестà// в держáву и утверждéнiе.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк Богорóдицы (Владúмирская), глас 8: Взбрáнной Воевóде победúтельная,/ я́ко избáвльшеся от злых,/ благодáрственная восписýем Ти рабù Твоù, Богорóдице;/ но я́ко имýщая держáву непобедúмую,/ от вся́ких нас бед свободù, да зовéм Ти:// рáдуйся, Невéсто Неневéстная.
Íкос: Áнгел Предстáтель с Небесè пóслан бысть рещѝ Богорóдице: рáдуйся,/ и, со безплóтным глáсом воплощáема Тя зря, Гóсподи, ужасáшеся,/ и стоя́ше, зовы́й к Ней таковáя:/ рáдуйся, Éюже рáдость возсiя́ет;/ рáдуйся, Éюже кля́тва исчéзнет./ Рáдуйся, пáдшаго Адáма воззвáнiе;/ рáдуйся, слез Éвиных избавлéнiе./ Рáдуйся, высотò неудобовосходи́мая человéческими пóмыслы;/ рáдуйся, глубинò неудобозри́мая и áнгельскима очи́ма./ Рáдуйся, я́ко есѝ Царéво седáлище;/ рáдуйся, я́ко нóсиши Нося́щаго вся./ Рáдуйся, звездò, явля́ющая сóлнце;/ рáдуйся, утрóбо Божéственнаго воплощéнiя./ Рáдуйся, Éюже обновля́ется тварь;/ рáдуйся, Éюже покланя́емся Творцý.// Рáдуйся, Невéсто Неневéстная.
Кондáк мчч. Адрiáна и Натáлiи, глас 4: Мýченик возсiя́ Божéственная пáмять/ и земны́я озарù вся концы̀ свéтло, с весéлiем зовýщих:// Ты есù мýчеников, Хрїстè, рáдованiе.
Íкос: На Дрéве Крéстнем плóтiю пригвождéннаго Хрїстà Царя́ возжелáвше дóблественне, вóини,/ усéрдно болéзни лю́тыя и мýки стрáшныя претерпéша,/ попрáвше íдольское нечéстiе все и беззакóнных сопротивлéнiя низлóжше,/ десяти́ца сугýбая и трóица мýченик./ Тéмже Адрiáн и Натáлiя, супрýг крáсный сих зря́ще,/ поревновáша им и, рáдующеся, вопiю́т:// Ты есѝ мýчеников, Хрїстè, рáдованiе.
И҆́н кондáк мчч. Адрiáна и Натáлiи, глас 4: Жены̀ Богомýдрыя Божéственная словесà в сéрдце положúв,/ Адрiáне, мýчениче Хрїстóв, к мучéнiем усердно устремúлся есù,// с супрýгою венец прiéмь.
Седáлен мчч. Адрiáна и Натáлiи, глас 1: Нечéстiя запалéнiе благочéстiя орошéнiем угаси́л есѝ, страстотéрпче,/ сокрушéнiем твои́х удóв íдольскую крéпость истни́л есѝ,/ супрýжницу обрéт помóщницу ко всем лю́тым, мýчениче, ополчéнiем,/ с нéюже в Вы́шнее всели́лся есѝ Цáрство, Адрiáне, крепкодýшне.// Хрїстý моли́ся дáти всем, чтýщым тя, ми́лость.
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Седáлен Богорóдицы (Владúмирская), глас 4: Нарóди боголюби́вiи, прiиди́те в срéтенiе:/ се бо приходи́т Дéва, всех прорóков превы́шши,/ честны́м Свои́м óбразом, Жи́знодателя мíру на рукáх имéющи,/ град Свой сохраня́ти стрáждущiй, вáрварскую дéрзость низложи́ти,/ вообрази́тися всем Храни́тельница твердà,// держáва и ограждéнiе вéрно моля́щимся.
ПЕСНЬ 4
Iрмóс: Пришéл есù от Дéвы, не ходáтай, ни Áнгел,/ но Сам, Гóсподи, воплóщься,/ и спасл есù всегó мя человéка./ Тем зовý Ти:// слáва сúле Твоéй, Гóсподи.
Хор: Слáва, Гóсподи, Святóму Воскресéнiю Твоемý.
Чтец: Предстои́ши суди́щу я́ко суди́мь, Бóже мой,/ не вопiя́ Влады́ко, суд износя́ язы́ком:/ и́мже стрáстiю Твоéю, Хрїстè// вселéнней содéлал есѝ Спасéнiе.
Хор: Слáва, Гóсподи, Святóму Воскресéнiю Твоемý.
Чтец: Стрáстiю Твоéю, Хрїстè,/ врагý оскудéша орýжiя,/ проти́вным же éже во ад схождéнiем Твои́м, грáды разруши́шася,// и мучи́телева дéрзость низложéна бысть.
Хор: Пресвятáя Богорóдице, спасù нас.
Богорóдичен: Тя пристáнище спасéнiя, и стéну недви́жиму,/ Богорóдице Влады́чице, вси вéрнiи свéмы:// Ты бо моли́твами Твои́ми избавля́еши от бед дýшы нáшя.
Глас 2
Хор: Пресвятáя Богорóдице, спасù нас.
Чтец: Гóру превéлiю, ю́же Данiи́л ви́де, от нея́же кáмень отсечéся без рукѝ/ и вся соблáзны истнѝ, вéрныя же просветѝ,// и́стинное светозáрное сóлнце показà, лучáми просвещáющи, Богорóдице Приснодéво.(Двáжды)
Хор: Пресвятáя Богорóдице, спасù нас.
Чтец: Вооружáются на лю́ди Твоя́, Чи́стая Богорóдице, сы́нове Агáрины,/ злый совéт творя́ще, грáды разоря́юще, вéрныя же погубля́юще,/ но Ты, Всепéтая, Твоéю ми́лостiю вся низложѝ,// iсмáильтяны врагѝ покаря́ющи отéчеству нáшему.(Двáжды)
Хор: Пресвятáя Богорóдице, спасù нас.
Чтец: Нéбо одушевлéно, еди́на Богомáти, Свет вéлiй прiéмши,/ вся просвещáющи, тьму обдержáщих бед разженѝ// и нас Вы́шняго причáстiя сподóби.
Хор: Пресвятáя Богорóдице, спасù нас.
Чтец: Давíд пред кiвóтом ликовствýет, левíти же воспевáют,/ пáче же пред Тобóю, Богороди́тельнице Чи́стая,/ Россíя хвалáми я́ко Цари́цу воспевáет,/ глáсы молéбными прилéжно Ти вопiю́щи:// рáдуйся, Застýпнице грáда нáшего.
Глас 6
Хор: Святíи мýченицы молúте Бóга о нас.
Чтец: Хрїстà мýченицы крéпость стяжáвше,/ некрéпкое суровствò гони́телей вои́стинну попрáвше// и венцы̀ побéды с Небесè прiя́ша.
Хор: Святíи мýченицы молúте Бóга о нас.
Чтец: Гнóем, всю́ду обтекáющым святы́х телесéм,/ ми́ро Бóгу вои́стинну принесéся,// гноéнiе прéлести очи́щающее держáвно.
Слáва Ѻтцý и Сы́ну и Святóму Дýху.
Чтец: Твои́ми кровьмѝ одéжду обагри́л есѝ себè нетлéнiя,/ совлéк тлéнiя одéжду,// и Хрїстý, Адрiáне, со слáвою ны́не предстои́ши.
И ны́не и прúсно и во вéки векóв. Амúнь.
Богорóдичен: Я́ко вои́стинну неизвещáнна и непостижи́ма/ я́же Твоегò боголéпнаго, Богорóдице, суть рождествà,// сýщим на землѝ и на Небесѝ, Приснодéво, тáинства.
Катавáсiя (глас 8): Услы́шах, Гóсподи,/ смотрéнiя Твоегò тáинство,/ разумéх делà Твоя́// и прослáвих Твоè Божествò.
ПЕСНЬ 5
Iрмóс: Ходáтай Бóгу и человéком был есù, Хрїстè Бóже;/ Тобóю, бо Влады́ко, к Светоначáльнику, Ѻтцý Твоемý,/ от нóщи невéденiя// приведéнiе úмамы.
Хор: Слáва, Гóсподи, Святóму Воскресéнiю Твоемý.
Чтец: Я́ко кéдры, Хрїстè, язы́ков шатáнiе сокруши́л есѝ вóлею, Влады́ко:/ я́ко извóлил есѝ на кипарíсе, и на пéвке, и кéдре,// плóтiю совозвышáемь.
Хор: Слáва, Гóсподи, Святóму Воскресéнiю Твоемý.
Чтец: В рóве, Хрїстè, преиспóднем положи́ша Тя бездыхáнна мéртва:/ но Твоéю я́звою забвéнныя мéртвыя, и́же во гробéх спя́щiя, уя́звен// с Собóю воскреси́л есѝ.
Хор: Пресвятáя Богорóдице, спасù нас.
Богорóдичен: Молѝ Сы́на Твоегò и Гóспода, Дéво Чи́стая,/ на Тя уповáющим мир даровáти, пленéнным избавлéнiе,// от сопроти́вных настоя́нiй.
Глас 2
Хор: Пресвятáя Богорóдице, спасù нас.
Чтец: Тебè, Богомáти, вели́кiй во прорóцех Исáiя прови́де дýхом,/ Угль имéющу во чрéве, вéрныя просвещáющ и соблáзны вся пожигáющ,// спасáя род человéч.(Двáжды)
Хор: Пресвятáя Богорóдице, спасù нас.
Чтец: Жезл Аарóнов прозяблà есѝ/ и злóбный кóрень истóргнула есѝ, Дéво Богоневéстная,/ Жизнодáтеля рóждши мíру,// Егóже молѝ семý грáду спасти́ся от мнóгих напáстей.(Двáжды)
Хор: Пресвятáя Богорóдице, спасù нас.
Чтец: Ны́не ýбо приступи́те с весéлiем, Богоизбрáнное стáдо, Россíйстiи собóри,/ ко Всечестнéй Бóжiей Мáтери и честны́й Ея́ óбраз любéзно прiими́те:/ се бо благодáть неисчерпáемая, вóды точáщи Божéственныя неоскýдно,// Ю́же, вéрнiи, почти́м и честнóму óбразу Ея́ поклони́мся.
Хор: Пресвятáя Богорóдице, спасù нас.
Чтец: От кóрене Iессéева дрéво возрастè всем живóтное,/ Плод ýбо прозяблà есѝ во утрóбе Твоéй, Дéво Чи́стая,// вся лю́ди насыщáющи Твоéю ми́лостiю.
Глас 6
Хор: Святíи мýченицы молúте Бóга о нас.
Чтец: Десяти́ца сугýба страдáлец с прóстою трóицею, Хрїстà ны́не моля́ще,/ разреши́ша соýз нечéстiя,// сýща безкрéпостна, крéпостiю Трóичною, дóблественнiи.
Хор: Святíи мýченицы молúте Бóга о нас.
Чтец: Я́коже сóлнце, посредè стоя́ звезд свéтлых, Адрiáне,/ с тобóю стрáждущих облистáл есѝ свéтом благочéстiя,// нечéстiя мглу отгнáв, и просвети́л есѝ мíра концы̀.
Слáва Ѻтцý и Сы́ну и Святóму Дýху.
Чтец: Росà глагóл твои́х честны́х/ исцелéнiе болéзней вои́стинну твоемý супрýжнику бысть,// вкуси́вшу лýчших любóвь, Богомýдрая Натáлiе, мýчеников сожи́тельнице.
И ны́не и прúсно и во вéки векóв. Амúнь.
Богорóдичен: Богорóдицу Тя от душѝ, Влады́чице мíра Благáя, исповéдающих спасѝ:/ Тя бо предстáтельство непобори́мое и́мамы,// и́стинную Богороди́тельницу.
Катавáсiя (глас 8): О треблажéнное Дрéво,/ на нéмже распя́ся Хрїстóс, Царь и Госпóдь!/ И҆́мже падè дрéвом прельстúвый,/ тобóю прельстúвся,/ Бóгу пригвоздúвшуся плóтiю,// подаю́щему мир душáм нáшым.
ПЕСНЬ 6
Iрмóс: В бéздне грехóвней валя́яся,/ неизслéдную милосéрдiя Твоегò призывáю бéздну:// от тли Бóже, мя возведù.
Хор: Слáва, Гóсподи, Святóму Воскресéнiю Твоемý.
Чтец: Я́ко злодéй Прáведник осуди́ся/ и со беззакóнными на дрéве пригвозди́ся,// пови́нным оставлéнiе Своéю дáруя крóвiю.
Хор: Слáва, Гóсподи, Святóму Воскресéнiю Твоемý.
Чтец: Еди́нем ýбо человéком,/ пéрвым Адáмом дрéвле в мiр вни́де смерть,// и Еди́нем Воскресéнiе Сы́ном Бóжiим яви́ся.
Хор: Пресвятáя Богорóдице, спасù нас.
Богорóдичен: Неискусомýжно, Дéво, родилà есѝ,/ и вéчнуеши Дéва, явля́ющи И҆́стиннаго Божествà,// Сы́на и Бóга Твоегò óбразы.
Глас 2
Хор: Пресвятáя Богорóдице, спасù нас.
Чтец: От Тебè, Богомáти, истечè потóк слáдкiй,/ вся напая́я лю́ди, душ измывáя сквéрны, Богорóдице Влады́чице,// спасѝ всех, покланя́ющихся вéрно честнóму óбразу Твоемý.(Двáжды)
Хор: Пресвятáя Богорóдице, спасù нас.
Чтец: Вси ýбо, совокýпльшеся вкýпе, воспоéм Чи́стую Дéву,/ Богоизбрáнную лéствицу Iáковлю, Гедеóново же рунò, рáдости Ходáтаицу,// крéпость и похвалý спасáемых, Богороди́тельницу Чи́стую.(Двáжды)
Хор: Пресвятáя Богорóдице, спасù нас.
Чтец: Се ны́не весéлiе приближáется,/ скорбь же потребля́ется, вéрнiи спасáются,/ я́ко от истóчника рáдость почерпáюще, вы́ну хвалáми воспевáют:/ рáдуйся, Чи́стая Влады́чице, спасéнiя нáшего начáток// и всех вéрных стенà и похвалà.
Хор: Пресвятáя Богорóдице, спасù нас.
Чтец: Подáждь нам пóмощь мольбáми Твои́ми, Пречи́стая Богорóдице,/ скóрби ýбо нахóдят на ны и печáли умножáются, вразѝ ополчáются,/ но Ты, Пречи́стая, предстáвши, избáви,/ врагóв нáших шатáнiе низложѝ, на врагѝ побéду дáруй,// да посрáмятся вси, явля́ющiи рабóм Твои́м злáя.
Глас 6
Хор: Святíи мýченицы молúте Бóга о нас.
Чтец: Хрїстóвою окормля́еми длáнiю благочéстно,/ безбóжiя пучи́ну преидóсте// и ко пристáнищу ти́хому Вы́шнiя свéтлости, страдáльцы Госпóдни, устреми́стеся.
Хор: Святíи мýченицы молúте Бóга о нас.
Чтец: Я́ко цвéти, благоухáют пóдвиг твои́х, мýдре, я́же пáче естествà одолéнiя,/ и́бо Бóжiе яви́лся есѝ, Адрiáне, благовóнно кади́ло,// огнéм мук опаля́емь.
Слáва Ѻтцý и Сы́ну и Святóму Дýху.
Чтец: Добрóтою вéры святáя твоя́ душà укрáшена, всечестнáя,/ и, добрóту и́щущи, я́ко вои́стинну Хрїстóву безмéрную, Натáлiе,// желáнiя не погрешѝ.
И ны́не и прúсно и во вéки векóв. Амúнь.
Богорóдичен: Всечи́стая Влады́чице, рóждшая человéком Кóрмчiя Гóспода,/ страстéй мои́х непостоя́нное и лю́тое утолѝ смущéнiе// и тишинý подáждь сéрдцу моемý.
Катавáсiя (глас 8): Вóднаго звéря во утрóбе/ длáни Ióна крестовúдно распростéр,/ спасúтельную Страсть проображáше я́ве./ Тем, триднéвен изшéд,/ премíрное Воскресéнiе прописáше/ Плóтiю пригвождéннаго Хрїстà Бóга// и триднéвным Воскресéнiем мiр просвéщшаго.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 2: Воскрéсл есù от грóба, Всесúльне Спáсе,/ и ад, вúдев чýдо, ужасéся,/ и мéртвiи востáша;/ тварь же вúдящи срáдуется Тебè,/ и Адáм свеселúтся,// и мiр, Спáсе мой, воспевáет Тя прúсно.
Íкос: Ты есѝ Свет омрачéнным,/ Ты есѝ Воскресéнiе всех, и Живóт человéков,/ и всех совоскреси́л есѝ,/ смéртную держáву, Спáсе, разóрь,/ и áдова вратà сокруши́вый, Слóве:/ и мéртвiи ви́девше чýдо, чудя́хуся,/ и вся́ка тварь срáдуется о Воскресéнiи Твоéм, Человеколю́бче./ Тéмже и вси слáвим и поéм Твоè снизхождéнiе,// и мiр, Спáсе мой, воспевáет Тя при́сно.
ПЕСНЬ 7
Iрмóс: Богопротúвное велéнiе/ беззакóннующаго мучúтеля/ высóк плáмень вознеслó есть;/ Хрїстóс же прострè Богочестúвым отрокóм рóсу духóвную,// Сый благословéн и препрослáвлен.
Продолжéнiе здесь