Неделя 8-я по Пасхе. День Святой Троицы. Пятидесятница. ВСЕНОЩНОЕ БДЕНИЕ. УТРЕНЯ. Канон. 20/06/2021
20 ию́ня 2021 го́да. День Свято́й Тро́ицы. Неделя 8-я по Пасхе. Пятидеся́тница. Всенощное бдение для домашнего (келейного) совершения состоит из Великой вечерни, утрени с чтением евангелия, также канона и первого часа. Вся служба праздника (по Триоди)
Канон утрени. Начало здесь (великая вечерня), здесь (утреня) и здесь (продолжение утрени)
ПЕРВЫЙ КАНОН ПЯТИДЕСЯТНИЦЫ, ГЛАС 7
ПЕСНЬ 1
Ирмóс: По́нтом покры́/ фарао́на с колесни́цами/ сокруша́яй бра́ни мы́шцею высо́кою,// пои́м Ему́, я́ко просла́вися. (Дважды)
Припéв: Пресвятáя Трóице, Бóже наш, слáва Тебé.
Тропáрь: Де́лом, я́коже дре́вле ученико́м обеща́л еси́, Уте́шителя Ду́ха посла́вый Христе́, возсия́л еси́ ми́ру свет Человеколю́бче. (Трижды)
Припéв: Пресвятáя Трóице, Бóже наш, слáва Тебé.
Тропáрь: Зако́ном дре́вле пропове́данное и проро́ки, испо́лнися: Боже́ственнаго бо Ду́ха днесь всем ве́рным благода́ть излия́ся. (Трижды)
ВТОРОЙ КАНОН ПЯТИДЕСЯТНИЦЫ, ГЛАС 4
Ирмóс: Боже́ственным покрове́н/ медленоязы́чный мра́ком,/ извити́йствова богопи́санный зако́н:/ ти́ну бо отря́с очесе́ у́мнаго,/ ви́дит Су́щаго,/ и науча́ется Ду́ха ра́зуму,// хваля́ Боже́ственными пе́сньми. (Дважды)
Припéв: Пресвятáя Трóице, Бóже наш, слáва Тебé.
Тропáрь: Реко́ша чи́стая и честна́я уста́:/ разлуче́ния вам не бу́дет, о дру́зи!/ Аз бо на О́тчем вы́шнем престо́ле соседя́, излию́ Ду́ха,// возсия́ти жела́ющим благода́ть незави́стную. (Трижды)
Припéв: Пресвятáя Трóице, Бóже наш, слáва Тебé.
Тропáрь: Преде́л преше́дшее и́стиннейшее Сло́во, тихообра́зно соверша́ет се́рдце: де́ло бо сконча́в, возвесели́ дру́ги, дыха́нием ну́жным и о́гненными язы́ки, пода́в Ду́ха Христо́с, я́коже обеща́ся.
Слáва Отцу́ и Сы́ну и Святóму Ду́ху.
Тропáрь: Преде́л преше́дшее и́стиннейшее Сло́во, тихообра́зно соверша́ет се́рдце: де́ло бо сконча́в, возвесели́ дру́ги, дыха́нием ну́жным и о́гненными язы́ки, пода́в Ду́ха Христо́с, я́коже обеща́ся.
И ны́не и при́сно и во вéки векóв. Ами́нь.
Тропáрь: Преде́л преше́дшее и́стиннейшее Сло́во, тихообра́зно соверша́ет се́рдце: де́ло бо сконча́в, возвесели́ дру́ги, дыха́нием ну́жным и о́гненными язы́ки, пода́в Ду́ха Христо́с, я́коже обеща́ся.
Катава́сия Пятидеся́тницы (глас 7): По́нтом покры́/ фарао́на с колесни́цами/ сокруша́яй бра́ни мы́шцею высо́кою,// пои́м Ему́, я́ко просла́вися.
Катава́сия Пятидеся́тницы (глас 4): Боже́ственным покрове́н,/ медленоязы́чный мра́ком,/ извити́йствова Богопи́санный зако́н:/ ти́ну бо оттря́с очесе́ у́мнаго,/ ви́дит Су́щаго,/ и науча́ется Ду́ха ра́зуму,// хваля́ Боже́ственными пе́сньми.
ПЕСНЬ 3
Ирмóс: С высоты́ си́лою,/ ученико́м Христе́, до́ндеже облеце́теся, рекл еси́,/ седи́те во Иерусали́ме:/ Аз же я́ко Мене́, Уте́шителя ино́го,/ Ду́ха Моего́ же и О́тча послю́,// в Не́мже утвердите́ся. (Дважды)
Припéв: Пресвятáя Трóице, Бóже наш, слáва Тебé.
Тропáрь: Боже́ственнаго Ду́ха наше́дшая си́ла, разде́льшийся дре́вле глас, зле согласи́вшихся, во еди́но прили́чие боже́ственне совокупи́, ве́дением Тро́ицы вразумля́ющи ве́рныя, в Не́йже утверди́хомся. (6 раз)
Глас 4
Ирмóс: Разве́рзе утро́бы неча́дствовавшия у́зы,/ доса́ду же неудоботерпи́му благоча́дствующия,/ еди́на моли́тва проро́чицы дре́вле А́нны,/ нося́щия дух сокруше́н,// к си́льному и Бо́гу ра́зумов. (Дважды)
Припéв: Пресвятáя Трóице, Бóже наш, слáва Тебé.
Тропáрь: Непостижи́ма есть Богонача́льнейшая: вети́я бо изъяви́ безкни́жныя, ры́бари прему́дрыя, зауша́ющия сло́вом, и от глубо́кия но́щи изыма́ющия лю́ди безчи́сленны, блиста́нием Ду́ха. (Трижды)
Припéв: Пресвятáя Трóице, Бóже наш, слáва Тебé.
Тропáрь: Бя́ше исхо́ден от нерожде́нна Све́та, всеси́льный сия́ющий Свет, Его́же Сы́ном Оте́ческия вла́сти, ны́не явля́ет сра́сленное озаре́ние, о́гненный глас в Сио́не язы́ком.
Слáва Отцу́ и Сы́ну и Святóму Ду́ху.
Тропáрь: Бя́ше исхо́ден от нерожде́нна Све́та, всеси́льный сия́ющий Свет, Его́же Сы́ном Оте́ческия вла́сти, ны́не явля́ет сра́сленное озаре́ние, о́гненный глас в Сио́не язы́ком.
И ны́не и при́сно и во вéки векóв. Ами́нь.
Тропáрь: Бя́ше исхо́ден от нерожде́нна Све́та, всеси́льный сия́ющий Свет, Его́же Сы́ном Оте́ческия вла́сти, ны́не явля́ет сра́сленное озаре́ние, о́гненный глас в Сио́не язы́ком.
Катавáсия Пятидеся́тницы (глас 7): С высоты́ си́лою,/ ученико́м Христе́, до́ндеже облеце́теся, рекл еси́,/ седи́те во Иерусали́ме:/ Аз же я́ко Мене́, Уте́шителя ино́го,/ Ду́ха Моего́ же и О́тча послю́,// в Не́мже утвердите́ся.
Катавáсия Пятидеся́тницы (глас 4): Разве́рзе утро́бы неча́дствовавшия у́зы,/ доса́ду же неудоботерпи́му благоча́дствующия,/ еди́на моли́тва проро́чицы дре́вле А́нны,/ нося́щия дух сокруше́н,// к Си́льному, и Бо́гу ра́зумов.
Гóсподи, помилуй. (3 раза)
Седáлен прáздника, глaс 8: Спа́совы рачи́тилие ра́дости испо́лнишася,/ и дерзнове́ние прия́ша, пре́жде боя́щиеся:/ я́ко Дух Святы́й днесь свы́ше сни́де на дом учени́ческий,/ и ин ина́я глаго́лаше к лю́дем./ Язы́цы бо разсе́яшася, ви́дими я́ко огнь:// и сих не опали́, но па́че ороси́.
Слáва Отцу и Сыну и Святóму Духу, и ныне и присно и во вéки векóв, аминь.
Седáлен прáздника, глaс 8: Спа́совы рачи́тилие ра́дости испо́лнишася,/ и дерзнове́ние прия́ша, пре́жде боя́щиеся:/ я́ко Дух Святы́й днесь свы́ше сни́де на дом учени́ческий,/ и ин ина́я глаго́лаше к лю́дем./ Язы́цы бо разсе́яшася, ви́дими я́ко огнь:// и сих не опали́, но па́че ороси́.
ПЕСНЬ 4
Ирмóс: Смотря́яй проро́к/ в после́дняя Твое́ Христе́ прише́ствие, вопия́ше:/ Твою́ услы́шах Го́споди си́лу,// я́ко вся спасти́ пома́занныя Твоя́ прише́л еси́. (Дважды)
Припéв: Пресвятáя Трóице, Бóже наш, слáва Тебé.
Тропа́рь: Во проро́цех глаго́лавый, и зако́ном пропове́данный пе́рвее несоверше́нным, Бог И́стинный Уте́шитель, Сло́ва служи́телем и свиде́телем познава́ется днесь. (Трижды)
Припéв: Пресвятáя Трóице, Бóже наш, слáва Тебé.
Тропа́рь: Зна́мение Божества́ нося́й, апо́столом во огни́ Дух раздели́ся, и стра́нными язы́ки явля́шеся, я́ко Оте́ческая Боже́ственная си́ла гряду́щая есть, самоповели́тельная. (Трижды)
Глас 4
Ирмóс: Царю́ царе́й,/ яковы́й от якова́го еди́н Сло́ве произше́дый/ от Отца́ безвино́внаго,/ равномо́щнаго Твоего́ Ду́ха/ апо́столом и́стинно посла́л еси́,/ я́ко Благоде́теля пою́щим:// сла́ва держа́ве Твое́й Го́споди. (Дважды)
Припéв: Пресвятáя Трóице, Бóже наш, слáва Тебé.
Тропа́рь: Ба́ню Боже́ственную пакибытия́ сло́вом раствори́в, ссложе́нное естество́, дождоточи́ши ми струю́ от нетленнопрободе́ннаго Твоего́ ребра́, о Бо́жий Сло́ве, запечатле́я теплото́ю Ду́ха. (Дважды)
Припéв: Пресвятáя Трóице, Бóже наш, слáва Тебé.
Тропа́рь: Преклоня́ют вся Уте́шителю коле́на, Сы́ну же О́тчу, Отцу́ сра́сленному, в Ли́цех бо ви́деша трегу́бых Существо́ и́стинное, неприкоснове́нное, безле́тное, еди́ное: возсия́ бо свет благода́ть Ду́ха. (Дважды)
Слáва Отцу́ и Сы́ну и Святóму Ду́ху.
Тропа́рь: Да испо́лнятся вси Богонача́льнейшим, ели́цы служи́телие Трисве́тлаго Существа́: па́че естества́ бо соверша́ет я́ко благоде́тель, и огнесве́тит Христо́с во спасе́ние, всю дая́ благода́ть Ду́ха.
И ны́не и при́сно и во ве́ки векóв, ами́нь.
Тропа́рь: Да испо́лнятся вси Богонача́льнейшим, ели́цы служи́телие Трисве́тлаго Существа́: па́че естества́ бо соверша́ет я́ко благоде́тель, и огнесве́тит Христо́с во спасе́ние, всю дая́ благода́ть Ду́ха.
Катавáсия Пятидеся́тницы (глас 7):Смотря́яй проро́к/ в после́дняя Твое́ Христе́ прише́ствие, вопия́ше:/ Твою́ услы́шах Го́споди си́лу,// я́ко вся спасти́ пома́занныя Твоя́ прише́л еси́.
Катавáсия Пятидеся́тницы (глас 4): Царю́ царе́й,/ Яковы́й от Якова́го еди́н Сло́ве произше́дый,/ от Отца́ безвино́внаго,/ равномо́щнаго Твоего́ Ду́ха апо́столом и́стинно посла́л еси́,/ я́ко Благоде́теля пою́щим:// сла́ва держа́ве Твое́й Го́споди.
ПЕСНЬ 5
Ирмос: Стра́ха ра́ди Твоего́/ зача́тый Го́споди во чре́ве проро́ков,/ и рожде́нный на земли́ Дух спасе́ния,/ апо́стольская сердца́ созида́ет чи́ста/ и в ве́рных пра́вый обновля́ется:// свет бо и мир зане́ Твоя́ повеле́ния. (Дважды)
Припéв: Пресвятáя Трóице, Бóже наш, слáва Тебé.
Тропа́рь: Наше́дшая си́ла днесь сия́, Дух Благи́й,/ Дух прему́дрости Бо́жия, Дух от Отца́ исходя́й,/ и Сы́ном ве́рным нам явле́йся подава́телен,// в ни́хже вселя́ется естество́м святы́ни, в не́йже зри́тся. (6 раз)
Глас 4
Ирмóс: Реши́тельное очище́ние грехо́в,/ огнедохнове́нную приими́те Ду́ха ро́су,/ о ча́да светообра́зная церко́вная./ Ны́не от Сио́на бо изы́де зако́н,// языкоогнеобра́зная Ду́ха благода́ть. (Дважды)
Припéв: Пресвятáя Трóице, Бóже наш, слáва Тебé.
Тропáрь: Я́коже благоволи́ самовла́стно, необлада́нный исхо́дит Дух от Отца́, умудря́я в язы́цех апо́столы, печатле́я живоно́сное Сло́во, Отчеси́льное, сообра́зное, Его́же Спас рече́. (Трижды)
Припéв: Пресвятáя Трóице, Бóже наш, слáва Тебé.
Тропáрь: Да исцели́т у́бо смы́слы от греха́, и се устроя́ше апо́столов, Бог Сло́во всенача́льное, пречи́стый дом, в не́мже единомо́щнаго же и ссу́щественнаго ны́не вселя́ется Ду́ха свет.
Сла́ва Отцу́ и Сы́ну и Святóму Ду́ху.
Тропáрь: Да исцели́т у́бо смы́слы от греха́, и се устроя́ше апо́столов, Бог Сло́во всенача́льное, пречи́стый дом, в не́мже единомо́щнаго же и ссу́щественнаго ны́не вселя́ется Ду́ха свет.
И ны́не и при́сно и во ве́ки векóв, ами́нь.
Тропáрь: Да исцели́т у́бо смы́слы от греха́, и се устроя́ше апо́столов, Бог Сло́во всенача́льное, пречи́стый дом, в не́мже единомо́щнаго же и ссу́щественнаго ны́не вселя́ется Ду́ха свет.
Катавáсия Пятидеся́тницы (глас 7): Стра́ха ра́ди Твоего́/ зача́тый Го́споди во чре́ве проро́ков,/ и рожде́нный на земли́ Дух спасе́ния,/ апо́стольская сердца́ созида́ет чи́ста/ и в ве́рных пра́вый обновля́ется:// свет бо и мир зане́ Твоя́ повеле́ния.
Катавáсия Пятидеся́тницы (глас 4): Реши́тельное очище́ние грехо́в,/ огнедохнове́нную приими́те Ду́ха ро́су,/ о ча́да светообра́зная церко́вная./ Ны́не от Сио́на бо изы́де зако́н,// языкоогнеобра́зная Ду́ха благода́ть.
ПЕСНЬ 6
Ирмóс: Пла́вающего в молве́ жите́йских попече́ний/ с корабле́м потопля́ема грехи́,/ и душетле́нному зве́рю примета́ема,/ я́ко Ио́на Христе́, вопию́ Ти:// из смертоно́сныя глубины́ возведи́ мя. (Дважды)
Припéв: Пресвятáя Трóице, Бóже наш, слáва Тебé.
Тропáрь: От Ду́ха Твоего́ на плоть вся́кую,/ я́коже рекл еси́, бога́тно излия́л еси́,/ и испо́лнишася вся́ческая Твоего́ ве́дения Го́споди,/ я́ко из Отца́ Сын нетле́нно роди́лся еси́,// и Дух Неразде́льный изы́де. (6 раз)
Глас 4
Ирмос: Очище́ние нам Христе́/ и спасе́ние Влады́ко,/ возсия́л еси́ от Де́вы,/ да я́ко проро́ка/ от зве́ря морска́го пе́рсей Ио́ну,// от тли исхити́ши, всего́ Ада́ма всеро́дна па́дшаго. (Дважды)
Припéв: Пресвятáя Трóице, Бóже наш, слáва Тебé.
Тропáрь: И́стинный нам пра́вый во утро́бах ве́чно прии́мшим Дух,/ да обнови́ши Отчеисхо́дный, и всесовокупле́нно,/ вещества́ ненави́стнаго пали́тельный скверн,// ка́ла же смы́слов чисти́тельный, Вседержи́телю. (Трижды)
Припéв: Пресвятáя Трóице, Бóже наш, слáва Тебé.
Тропáрь: Жела́тельное достоя́ние апо́столом,/ сио́няном ча́ющим Твоего́ прише́ствия, позна́ние/ Дух Отчерожде́нна Сло́ва,/ речь жесто́кую язы́ческих ласка́тельств ско́ро показа́в,// огнедохнове́нно утвержда́еши.
Сла́ва Отцу́ и Сы́ну и Свято́му Ду́ху.
Тропáрь: Жела́тельное достоя́ние апо́столом,/ сио́няном ча́ющим Твоего́ прише́ствия, позна́ние/ Дух Отчерожде́нна Сло́ва,/ речь жесто́кую язы́ческих ласка́тельств ско́ро показа́в,// огнедохнове́нно утвержда́еши.И ны́не и при́сно и во ве́ки веко́в, ами́нь.
Тропáрь: Жела́тельное достоя́ние апо́столом,/ сио́няном ча́ющим Твоего́ прише́ствия, позна́ние/ Дух Отчерожде́нна Сло́ва,/ речь жесто́кую язы́ческих ласка́тельств ско́ро показа́в,// огнедохнове́нно утвержда́еши.
Катавáсия Пятидеся́тницы (глас 7): Пла́вающего в молве́ жите́йских попече́ний/ с корабле́м потопля́ема грехи́,/ и душетле́нному зве́рю примета́ема,/ я́ко Ио́на Христе́, вопию́ Ти:// из смертоно́сныя глубины́ возведи́ мя.
Катавáсия Пятидеся́тницы (глас 4): Очище́ние нам Христе́/ и спасе́ние Влады́ко,/ возсия́л еси́ от Де́вы,/ да я́ко проро́ка/ от зве́ря морска́го пе́рсей Ио́ну,// от тли исхити́ши, всего́ Ада́ма всеро́дна па́дшаго.
Го́споди, поми́луй. (Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Конда́к пра́здника, глас 8: Егда́ снизше́д язы́ки слия́,/ разделя́ше язы́ки Вы́шний,/ егда́ же о́гненныя язы́ки раздая́ше,/ в соедине́ние вся призва́,// и согла́сно сла́вим Всесвята́го Ду́ха.
И́кос:
Ско́рое и изве́стное даждь утеше́ние рабо́м Твои́м Иису́се,/ внегда́ уныва́ти духо́м на́шим,/ не разлуча́йся от душ на́ших в ско́рбех,/ не удаля́йся от мы́слей на́ших во обстоя́ниих,/ но при́сно нас предвари́./ Прибли́жися нам, прибли́жися везде́ Сый,/ я́коже со апо́столы Твои́ми всегда́ еси́,/ си́це и Тебе́ жела́ющим соедини́ Себе́ Ще́дре:/ да совоку́плени Тебе́ пое́м,/ и славосло́вим Всесвята́го Ду́ха Твоего́.
ПЕСНЬ 7
Ирмос: В пещь о́гненную/ вве́ржени преподо́бнии о́троцы,/ огнь в ро́су преложи́ша,/ воспева́нием си́це вопию́ще:// благослове́н еси́ Го́споди Бо́же оте́ц на́ших. (Дважды)
Припéв: Пресвятáя Трóице, Бóже наш, слáва Тебé.
Тропа́рь: Вету́ющим Боже́ственная вели́чия апо́столом, Ду́ха де́йство непщева́шеся пия́нство неве́рствующим, и́мже Тро́ица познава́ется, еди́н Бог оте́ц на́ших. (Трижды)
Припéв: Пресвятáя Трóице, Бóже наш, слáва Тебé.
Тропа́рь: Неразде́льное естество́ правосла́вно богосло́вим Бо́га Отца́ Безнача́льнаго, тоя́жде вла́сти Сло́ва и Ду́ха, благослове́н еси́, зову́ще, Бо́же оте́ц на́ших. (Трижды)
Глас 4
Ирмос: Согла́сная возшуме́ орга́нская песнь,/ почита́ти златосотворе́нный безду́шный истука́н:/ Уте́шителева же светоно́сная благода́ть почеству́ет,/ е́же вопи́ти:// Тро́ице Еди́ная, равноси́льная, безнача́льная, благослове́на еси́. (Дважды)
Припéв: Пресвятáя Трóице, Бóже наш, слáва Тебé.
Тропа́рь: Гла́са пророковеща́тельнаго не разуме́вше, глаго́лаху безу́мнии виносотворе́нное пия́нство, ре́чи я́ко стра́нны слы́шаша апо́столов: благочести́вии же Тебе́ вопие́м боже́ственно: Богоде́телю всех, благослове́н еси́. (Дважды)
Припéв: Пресвятáя Трóице, Бóже наш, слáва Тебé.
Тропа́рь: Боже́ственное уче́ние возгреме́ ви́дяй виде́ния боже́ственный Ио́иль, Богонача́льнейшаго, и́мже излию́, рек, я́коже Сло́ва, Ду́ха Моего́ свозопию́щим: Естество́ Тривеща́нное Све́тлое, благослове́н еси́. (Дважды)
Сла́ва Отцу́ и Сы́ну и Свято́му Ду́ху.
Тропа́рь: Тро́ичную у́бо раздели́ зря благода́ть, я́ко да яви́т три Ипоста́си, почита́ти в простоте́ вла́сти, но во еди́ном ны́не дни Госпо́дьском, Сын, Оте́ц и Дух благослове́н.
И ны́не и при́сно и во ве́ки веко́в, ами́нь.
Тропáрь: Тро́ичную у́бо раздели́ зря благода́ть, я́ко да яви́т три Ипоста́си, почита́ти в простоте́ вла́сти, но во еди́ном ны́не дни Госпо́дьском, Сын, Оте́ц и Дух благослове́н.
Катавáсия Пятидеся́тницы (глас 7): В пещь о́гненную/ вве́ржени преподо́бнии о́троцы,/ огнь в ро́су преложи́ша,/ воспева́нием си́це вопию́ще:// благослове́н еси́ Го́споди Бо́же оте́ц на́ших.
Катава́сия Пятидеся́тницы (глас 4): Согла́сная возшуме́ орга́нская песнь,/ почита́ти златосотворе́нный безду́шный истука́н:/ Уте́шителева же светоно́сная благода́ть почеству́ет,/ е́же вопи́ти:// Тро́ице Еди́ная, равноси́льная, безнача́льная, благослове́на еси́.
ПЕСНЬ 8
Ирмóс: Неопа́льная огню́ в Сина́и прича́щшаяся купина́,/ Бо́га яви́ медленноязы́чному и гугни́вому Моисе́ови,/ и о́троки ре́вность Бо́жия/ три непребори́мыя во огни́ певцы́ показа́:/ вся дела́ Госпо́дня Го́спода по́йте,// и превозноси́те во вся ве́ки. (Дважды)
Припéв: Пресвятáя Трóице, Бóже наш, слáва Тебé.
Тропа́рь: Живо́тну свы́ше бу́рну носи́му гласо́вне, Ду́ха Всесвята́го дыха́нию рыбаре́м, о́гненных ви́дом язы́к вели́чия Бо́жия вети́йствоваху: вся дела́ Го́спода по́йте, и превозноси́те во вся ве́ки. (Трижды)
Припéв: Пресвятáя Трóице, Бóже наш, слáва Тебé.
Тропáрь: Я́ко на некаса́емую превосходя́ще го́ру, не боя́щеся огня́ страша́ща, прииди́те и ста́нем на горе́ Сио́нской, во гра́де Жива́го Бо́га, духоно́сным ученико́м ны́не слику́юще: вся дела́ Го́спода по́йте, и превозноси́те во вся ве́ки. (Трижды)
Глас 4
Ирмос: Разреша́ет у́зы,/ и ороша́ет пла́мень,/ трисве́тлый Богонача́лия О́браз:/ пою́т о́троцы,/ благослови́т же Еди́наго Спа́са и Вседе́теля,/ я́ко Благоде́теля// сотворе́нная вся́ческая тварь. (Дважды)
Припéв: Пресвятáя Трóице, Бóже наш, слáва Тебé.
Тропáрь: Па́мять Христо́с человекоспаси́тельных слове́с, я́же от Отца́ слы́шав апо́столом рече́, Дух устроя́ет языкоо́гненным виде́нием, посажда́я благослове́нно усвое́нную, учуже́нная же пое́т Тя тварь. (Дважды)
Припéв: Пресвятáя Трóице, Бóже наш, слáва Тебé.
Тропáрь: Спаси́тельно самовлады́чний Еди́н, Свет самосия́тельный, и пода́тельный све́та сый, прише́л еси́ исполня́я апо́столы, честны́й я́ко верх Твои́м рабо́м, насыти́тельный же Дух подава́еши. (Дважды)
Благослови́м Отца́, и Сы́на, и Свята́го Ду́ха, Го́спода.
Тропáрь: Поя́ху проро́к духонасыще́нная уста́, Твое́ теле́сное, о Царю́, прише́ствие,/ и Дух от недр О́тчих произше́дший, несозда́нный, зданноде́телен, сопресто́лен Тебе́, еди́наго вочелове́чения ве́рным честь.
И ны́не и при́сно и во ве́ки веко́в, ами́нь.
Тропáрь: Поя́ху проро́к духонасыще́нная уста́, Твое́ теле́сное, о Царю́, прише́ствие, и Дух от недр О́тчих произше́дший, несозда́нный, зданноде́телен, сопресто́лен Тебе́, еди́наго вочелове́чения ве́рным честь.
Хор: Хва́лим, благослови́м, покланя́емся Го́сподеви, пою́ще и превознося́ще во вся ве́ки.
Катавáсия Пятидеся́тницы (глас 7): Неопа́льная огню́ в Сина́и прича́щшаяся купина́,/ Бо́га яви́ медленноязы́чному и гугни́вому Моисе́ови,/ и о́троки ре́вность Бо́жия/ три непребори́мыя во огни́ певцы́ показа́:/ вся дела́ Госпо́дня Го́спода по́йте,// и превозноси́те во вся ве́ки.
Катавáсия Пятидеся́тницы (глас 4): Разреша́ет у́зы,/ и ороша́ет пла́мень,/ трисве́тлый Богонача́лия О́браз:/ пою́т о́троцы,/ благослови́т же Еди́наго Спа́са и Вседе́теля,/ я́ко Благоде́теля// сотворе́нная вся́ческая тварь.
Припе́в пра́здника: Апо́столи, соше́ствие Уте́шителя зря́ще, удиви́шася, ка́ко в ви́де о́гненных язы́к яви́ся Дух Святы́й.
Песнь 9
Ирмóс: Не тле́ния искуше́нием ро́ждшая,/ и Всехитрецу́ Сло́ву плоть взаимода́вшая,/ Ма́ти Неискусому́жная Де́во Богоро́дице,/ прия́телище Нестерпи́маго,/ село́ Невмести́маго Зижди́теля Твоего́,// Тя велича́ем.
Припе́в: Апо́столи, соше́ствие Уте́шителя зря́ще, удиви́шася, ка́ко в ви́де о́гненных язы́к яви́ся Дух Святы́й.
Ирмóс: Не тле́ния искуше́нием ро́ждшая,/ и Всехитрецу́ Сло́ву плоть взаимода́вшая,/ Ма́ти Неискусому́жная Де́во Богоро́дице,/ прия́телище Нестерпи́маго,/ село́ Невмести́маго Зижди́теля Твоего́,// Тя велича́ем.
Припе́в: Апо́столи, соше́ствие Уте́шителя зря́ще, удиви́шася, ка́ко в ви́де о́гненных язы́к яви́ся Дух Святы́й.
Тропа́рь: На паля́щей дре́вле о́гненной колесни́це,/ ревни́тель и огнедохнове́нный ра́дуяся носи́м,/ е́же ны́не возсия́вшее дохнове́ние свы́ше апо́столом явля́ше:// от него́же освяти́вшеся, Тро́ицу всем сказа́ша. (Трижды)
Припе́в: Апо́столи, соше́ствие Уте́шителя зря́ще, удиви́шася, ка́ко в ви́де о́гненных язы́к яви́ся Дух Святы́й.
Тропа́рь: Зако́на есте́ств кроме́, стра́нное слы́шашеся ученико́в:/ еди́ному бо гла́су глася́щу Ду́ха благода́тию,/ разли́чне оглаша́хуся лю́дие, племена́ и язы́ки боже́ственная вели́чия,// Тро́ицы ве́дению науча́юще. (Трижды)
Глас 4
Припе́в: Апо́столи, соше́ствие Уте́шителя зря́ще, удиви́шася, ка́ко в ви́де о́гненных язы́к яви́ся Дух Святы́й.
Ирмо́с: Ра́дуйся, Цари́це,/ матероде́вственная сла́во,/ вся́ка бо удобообраща́тельная/ благоглаго́ливая уста́ вити́йствовати не мо́гут,/ Тебе́ пе́ти досто́йно,/ изумева́ет же ум всяк Твое́ Рождество́ разуме́ти.// Те́мже Тя согла́сно сла́вим. (Дважды)
Припе́в: Апо́столи, соше́ствие Уте́шителя зря́ще, удиви́шася, ка́ко в ви́де о́гненных язы́к яви́ся Дух Святы́й.
Тропа́рь: Пе́ти подоба́ше естественножи́зненную Отрокови́цу:/ еди́на бо во чре́ве скры Сло́во,/ тая́щееся неду́гующаго челове́ческаго естества́./ И́же в десны́х страна́х ны́не седя́й О́тчих,// посла́ благода́ть Ду́ха. (Трижды)
Припе́в: Апо́столи, соше́ствие Уте́шителя зря́ще, удиви́шася, ка́ко в ви́де о́гненных язы́к яви́ся Дух Святы́й.
Тропа́рь: Ели́цем дхну богото́чная благода́ть,/ светя́щеся, блиста́юще,/ изменя́еми стра́нным измене́нием благоле́пнейшим,/ равноси́льствующую несеко́мую уве́девше прему́дрость,// Трисве́тлое существо́ сла́вим. (Трижды)
Катавáсия Пятидеся́тницы (глас 7): Не тле́ния искуше́нием ро́ждшая,/ и Всехитрецу́ Сло́ву плоть взаимода́вшая,/ Ма́ти Неискусому́жная Де́во Богоро́дице,/ прия́телище Нестерпи́маго,/ село́ Невмести́маго Зижди́теля Твоего́,// Тя велича́ем.
Катавáсия Пятидеся́тницы (глас 4): Ра́дуйся Цари́це,/ Матероде́вственная сла́во:/ вся́ка бо удобообраща́тельная благоглаго́ливая уста́/ вити́йствовати не мо́гут,/ Тебе́ пе́ти досто́йно:/ низумева́ет же ум всяк, Твое́ Рождество́ разуме́ти.// Те́мже Тя согла́сно сла́вим.
Го́споди, поми́луй. (Трижды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Свети́лен прáздника: Всесвяты́й Ду́ше, исходя́й из Отца́,/ и Сы́ном прише́дый к безкни́жным ученико́м,/ Тебе́ Бо́га позна́вших спаси́ и поми́луй всех. (Дважды)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Свети́лен прáздника: Свет - Оте́ц, Свет - Сло́во, Свет и Святы́й Дух,/ И́же во язы́цех о́гненных апо́столом посла́ся,/ и Тем весь мир просвеща́ется Тро́ицу почита́ти Святу́ю.
ХВАЛИТНЫ
Хор: Всякое дыхáние да хвáлит Гóспода./ Хвалите Гóспода с небéс,/ хвалите Егó в вышних.// Тебé подобáет песнь Бóгу.
Хвалите Егó вси áнгели Егó,/ хвалите Егó вся силы Егó.// Тебé подобáет песнь Бóгу.
[В приходской практике пропускается до стихир]Хвали́те Его́, со́лнце и луна́, хвали́те Его́, вся зве́зды и свет. Хвали́те Его́ Небеса́ небе́с и вода́, я́же превы́ше небе́с. Да восхва́лят и́мя Госпо́дне: я́ко Той рече́, и бы́ша, Той повеле́, и созда́шася. Поста́ви я́ в век и в век ве́ка, повеле́ние положи́, и не ми́мо и́дет. Хвали́те Го́спода от земли́, зми́еве и вся бе́здны: огнь, град, снег, го́лоть, дух бу́рен, творя́щая сло́во Его́, го́ры и вси хо́лми, древа́ плодоно́сна и вси ке́дри, зве́рие и вси ско́ти, га́ди и пти́цы перна́ты. Ца́рие зе́мстии и вси лю́дие, кня́зи и вси судии́ зе́мстии, ю́ноши и де́вы, ста́рцы с ю́нотами да восхва́лят и́мя Госпо́дне, я́ко вознесе́ся и́мя Того́ Еди́наго, испове́дание Его́ на земли́ и на небеси́. И вознесе́т рог люде́й Свои́х, песнь всем преподо́бным Его́, сыново́м Изра́илевым, лю́дем, приближа́ющымся Ему́.
[В приходской практике пропускается до стихир]Воспойте Господеви песнь нову, хваление Его в церкви преподобных. Да возвеселится Израиль о сотворшем Его, и сынове Сиони возрадуются о Царе своем. Да восхвалят имя Его в лице, в тимпане и псалтири да поют Ему. Яко благоволит Господь в людех Своих, и вознесет кроткия во спасение. Восхвалятся преподобнии во славе и возрадуются на ложах своих. Возношения Божия в гортани их, и мечи обоюду остри в руках их: сотворити отмщение во языцех, обличения в людех, связати цари их путы, и славныя их ручными оковы железными,
Чтец (стихиры Пятидесятницы, глас 4, самогла́сны): Чтец: Сотворити в них суд написан./ Слава сия будет всем преподобным Его.
Стихиры Пятидесятницы, глас 4, самогла́сны: Пресла́вная днесь/ ви́деша вси язы́цы во гра́де Дави́дове,/ егда́ Дух сни́де Святы́й во о́гненных язы́цех,/ я́коже богоглаго́ливый Лука́ повеству́ет,/ глаго́лет бо:/ со́бранным ученико́м Христо́вым,/ бысть шум, я́коже носи́му дыха́нию бу́рну,/ и испо́лни дом, иде́же бя́ху седя́ще:/ и вси нача́ша глаго́лати стра́нными глаго́лы,/ стра́нными уче́нии,// стра́нными повеле́нии Святы́я Тро́ицы.
Хвали́те Бо́га во святы́х Его́,/ хвали́те Его́ в утверже́нии си́лы Его́.
Стихира: Пресла́вная днесь/ ви́деша вси язы́цы во гра́де Дави́дове,/ егда́ Дух сни́де Святы́й во о́гненных язы́цех,/ я́коже богоглаго́ливый Лука́ повеству́ет,/ глаго́лет бо:/ со́бранным ученико́м Христо́вым,/ бысть шум, я́коже носи́му дыха́нию бу́рну,/ и испо́лни дом, иде́же бя́ху седя́ще:/ и вси нача́ша глаго́лати стра́нными глаго́лы,/ стра́нными уче́нии,// стра́нными повеле́нии Святы́я Тро́ицы.
Чтец: Хвали́те Его́ на си́лах Его́,/ хвали́те Его́ по мно́жеству вели́чествия Его́.
Стихира: Дух Святы́й бе у́бо при́сно, и есть, и бу́дет:/ ниже́ начина́емь, ниже́ престая́й,/ но при́сно Отцу́ и Сы́ну счине́н и счисля́емь:/ Живо́т, и животворя́й,/ Свет, и све́та пода́тель,/ самоблаги́й и исто́чник благосты́ни:/ И́мже Оте́ц познава́ется, и Сын прославля́ется,/ и от всех познава́ется,/ еди́на си́ла, еди́но счета́ние,// еди́но поклоне́ние Святы́я Тро́ицы.
Хвали́те Его́ во гла́се тру́бнем,/ хвали́те Его́ во псалти́ри и гу́слех.
Стихира: Дух Святы́й бе у́бо при́сно, и есть, и бу́дет:/ ниже́ начина́емь, ниже́ престая́й,/ но при́сно Отцу́ и Сы́ну счине́н и счисля́емь:/ Живо́т, и животворя́й,/ Свет, и све́та пода́тель,/ самоблаги́й и исто́чник благосты́ни:/ И́мже Оте́ц познава́ется, и Сын прославля́ется,/ и от всех познава́ется,/ еди́на си́ла, еди́но счета́ние,// еди́но поклоне́ние Святы́я Тро́ицы.
Чтец: Хвали́те Его́ в тимпа́не и ли́це,/ хвали́те Его́ во стру́нах и орга́не.
Стихира: Дух Святы́й бе у́бо при́сно, и есть, и бу́дет:/ ниже́ начина́емь, ниже́ престая́й,/ но при́сно Отцу́ и Сы́ну счине́н и счисля́емь:/ Живо́т, и животворя́й,/ Свет, и све́та пода́тель,/ самоблаги́й и исто́чник благосты́ни:/ И́мже Оте́ц познава́ется, и Сын прославля́ется,/ и от всех познава́ется,/ еди́на си́ла, еди́но счета́ние,// еди́но поклоне́ние Святы́я Тро́ицы.
Чтец: Хвали́те Его́ в кимва́лех доброгла́сных, хвали́те Его́ в кимва́лех восклица́ния./ Вся́кое дыха́ние да хва́лит Го́спода.
Стихира: Дух Святы́й бе у́бо при́сно, и есть, и бу́дет:/ ниже́ начина́емь, ниже́ престая́й,/ но при́сно Отцу́ и Сы́ну счине́н и счисля́емь:/ Живо́т, и животворя́й,/ Свет, и све́та пода́тель,/ самоблаги́й и исто́чник благосты́ни:/ И́мже Оте́ц познава́ется, и Сын прославля́ется,/ и от всех познава́ется,/ еди́на си́ла, еди́но счета́ние,// еди́но поклоне́ние Святы́я Тро́ицы.
Сла́ва Отцу́ и Сы́ну и Свято́му Ду́ху, и ныне и присно и во веки веков. Аминь.
Глас 6: Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Слáва Тебé, показáвшему нам свéт.
ВЕЛИКОЕ СЛАВОСЛОВИЕ
Хор: Слáва в вышних Бóгу, и на земли мир, в человéцех благоволéние. Хвáлим Тя, благословим Тя, клáняем Ти ся, славослóвим Тя, благодарим Тя великия рáди слáвы Твоея. Гóсподи, Царю Небéсный, Боже, Отче Вседержителю, Гóсподи Сыне Единорóдный, Иисусе Христé, и Святый Душе. Гóсподи Бóже, Агнче Божий, Сыне Отéчь, взéмляй грех мира, помилуй нас. Взéмляй грехи мира, приими молитву нáшу. Седяй одесную Отцá, помилуй нас. Яко Ты еси Един Свят; Ты еси Един Госпóдь, Иисус Христóс, в слáву Бóга Отцá, аминь.
На всяк день благословлю Тя и восхвалю имя Твоé во вéки, и в век вéка.
Сподóби, Гóсподи, в день сей без грехá сохранитися нам. Благословéн еси, Гóсподи Бóже отéц нáших, и хвáльно и прослáвлено имя Твоé во вéки, аминь.
Буди, Гóсподи, милость Твоя на нас, якоже уповáхом на Тя.
Благословéн еси, Гóсподи, научи мя оправдáнием Твоим. (трижды)
Гóсподи, прибéжище был еси нам в род и род. Аз рех: Гóсподи, помилуй мя, исцели душу мою, яко согреших Тебé. Гóсподи, к Тебé прибегóх, научи мя творити вóлю Твою, яко Ты еси Бог мой, яко у Тебé истóчник животá, во свéте Твоéм узрим свет. Пробáви милость Твою вéдущим Тя.
Святый Бóже,/ Святый Крéпкий,/ Святый Безсмéртный, помилуй нас. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
Святый Безсмéртный, помилуй нас.
Святый Бóже,/ Святый Крéпкий,/ Святый Безсмéртный, помилуй нас.
ТРОПАРЬ ПЯТИДЕСЯТНИЦЫ, ГЛАС 8
Благословéн еси́, Христé Бóже наш,/ И́же прему́дры ловцы́ явлéй,/ низпослáв им Ду́ха Святáго,/ и тéми уловлéй вселéнную,// Человеколю́бче, слáва Тебé.
Завершение утрени
Гóсподи, помилуй. (40 раз)
Слáва Отцу и Сыну и Святóму Духу, и ныне и присно и во вéки векóв, аминь.
Гóсподи, помилуй. (12 раз)
Слáва Отцу и Сыну и Святóму Духу, и ныне и присно и во вéки векóв, аминь.
Утверди, Бóже, святую правослáвную вéру, правослáвных христиáн во век вéка.
Честнéйшую Херувим и слáвнейшую без сравнéния Серафим, без истлéния Бóга Слóва рóждшую, сущую Богорóдицу, Тя величáем.
Слáва Отцу и Сыну и Святóму Духу, и ныне и присно и во вéки векóв, аминь.
Гóсподи, помилуй. (3 раза)
Гóсподи, благослови.
ОТПУСТ
И́же в ви́дении о́гненных язы́к, с небесе́ низпосла́вый Пресвята́го Ду́ха на святы́я Своя́ ученики́ и апо́столы, Христо́с и́стинный Бог наш, моли́твами Пречи́стыя Своея́ Ма́тере, святы́х сла́вных и всехва́льных апо́стол, и всех святы́х, поми́лует и спасе́т нас, я́ко Благи́й и Человеколю́бец.
МНОГОЛЕТИЕ
Благочестивейшаго, Самодержáвнейшаго, Великаго грядущаго Госудáря нáшего Имперáтора (его имя Ты вем) святéйшыя вселéнския патриáрхи преосвящéнныя митрополиты, архиепископы и епископы православныя, иерéи и дьяконы и весь причет церкóвный и вся правослáвныя христиáны, Гóсподи, сохрани их на мнóгая лéта!
Чти Первый час