Неделя 9 по Пятидесятнице. Попразднство Преображения Господня, глас 8 ВСЕНОЩНОЕ БДЕНИЕ УТРЕНЯ КАНОН
25 áвгуста 2024 гóда. Недéля 9 по Пятидеся́тнице. Попрáзднство Преображéнiя Гóспода нáшего Iисýса Хрїстà и святых мýчеников Фóтiя и Анiкúты. Глас 8. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
ПОЛИЕЛЕЙ
Хор: Хвали́те И҆́мя Госпóдне, хвали́те, рабѝ Гóспода.
Аллилýїа (трúжды)
(И далее хор продолжает чередовать стiхи 134 псалма и Аллилуиа)
стоя́щiи во хрáме Госпóдни, во двóрех дóму Бóга нáшего./ Хвали́те Гóспода, я́ко Благ Госпóдь, пóйте и҆́мени Егò, я́ко добрò:/ я́ко Iáкова избрà Себè Госпóдь, Iзрáиля в достоя́нiе Себè./ Я́ко аз познáх, я́ко Вéлiй Госпóдь, и Госпóдь наш над всéми бóги./ Вся ели́ка восхотè Госпóдь, сотворѝ на небесѝ и на землѝ, в моря́х и во всех бéзднах./ Возводя́ óблаки от послéдних землѝ, мóлнiи в дождь сотворѝ, изводя́й вéтры от сокрóвищ Свои́х./ И҆́же поразѝ пéрвенцы Еги́петскiя, от человéка до скотà./ Послà знáменiя и чудесà посредè Тебè, Еги́пте, на фараóна и на вся рабы̀ eгò./ И҆́же поразѝ язы́ки мнóги и избѝ царѝ крéпки:/ Сиóна, царя Аморрéйска, и Óга, царя́ Васáнска, и вся цáрствiя Ханаáнска,/ и дадè зéмлю их достоя́нiе, достоя́нiе Iзрáилю, лю́дем Свои́м./ Гóсподи, и҆́мя Твоè в век и пáмять Твоя́ в род и род:/ я́ко суди́ти и҆́мать Госпóдь лю́дем Свои́м, и о рабéх Свои́х умóлится./ Íдоли язы́к, сребрò и злáто, делà рук человéческих/ Устà и҆́мут, и не возлагóлют, óчи и҆́мут, и не ýзрят,/ ýши и҆́мут, и не услы́шат, нижè бо есть дух во устéх их./ Подóбни им да бýдут творя́щiи я́, и вси надéющiися на ня./ Дóме Iзрáилев, благослови́те Гóспода, дóме Аарóнь, благослови́те Гóспода, дóме Левíин, благослови́те Гóспода./ Боя́щiися Гóспода, благослови́те Гóспода.
Благословéн Госпóдь от Сióна, живы́й во Iерусали́ме.
Аллилýїа (трúжды)
Исповéдайтеся Гóсподеви, я́ко Благ, я́ко в век ми́лость Егò.
Аллилýїа (трúжды)
(И далее хор продолжает чередовать стiхи 135 псалма и Аллилуиа)
Исповéдайтеся Бóгу богóв, я́ко в век ми́лость Егò./ Исповéдайтеся Гóсподеви господéй, я́ко в век ми́лость Егò./ Сотвóршему чудесà вéлiя еди́ному, я́ко в век ми́лость Егò./ Сотвóршему небесà рáзумом, я́ко в век ми́лость Егò./ Утверди́вшему зéмлю на водáх, я́ко в век ми́лость Егò./ Сотвóршему свети́ла вéлiя еди́ному, я́ко в век ми́лость Егò./ Сóлнце во óбласть дне, я́ко в век ми́лость Егò./ Лунý и звéзды во óбласть нóщи, я́ко в век ми́лость Егò./ Порази́вшему Еги́пта с пéрвенцы eгò, я́ко в век ми́лость Егò,/ и извéдшему Iзрáиля от среды̀ их, я́ко в век ми́лость Егò./ Рукóю крéпкою и мы́шцею высóкою, я́ко в век ми́лость Егò./ Раздéльшему Чермнóе мóре в разделéнiя, я́ко в век ми́лость Егò./ И провéдшему Iзрáиля посредè eгò, я́ко в век ми́лость Егò./ И истря́сшему фараóна и си́лу eгò в мóре Чермнóе, я́ко в век ми́лость Егò./ Провéдшему лю́ди Своя́ в пусты́ни, я́ко в век ми́лость Егò./ Порази́вшему царѝ вéлiя, я́ко в век ми́лость Егò,/ и уби́вшему царѝ крéпкiя, я́ко в век ми́лость Егò:/ Сиóна, царя́ Аморрéйска, я́ко в век ми́лость Егò,/ и Óга, царя́ Васáнска, я́ко в век ми́лость Егò./ И дáвшему зéмлю их достоя́нiе, я́ко в век ми́лость Егò./ Достоя́нiе Iзрáилю, рабý Своемý, я́ко в век ми́лость Егò./ Я́ко во смирéнiи нáшем помянý ны Госпóдь, я́ко в век ми́лость Егò./ И избáвил ны есть от врагóв нáших, я́ко в век ми́лость Егò./ Дая́й пи́щу вся́кой плóти, я́ко в век ми́лость Егò.
Исповéдайтеся Бóгу Небéсному, я́ко в век ми́лость Егò.
Аллилýїа (трúжды)
ТРОПАРИ ВОСКРЕСНЫ ПО НЕПОРОЧНАХ, ГЛАС 5
Благословéн есù, Гóсподи,/научù мя оправдáнiем Твоúм.(Пс.118:12)
Áнгельскiй собóр удиви́ся,/ зря Тебè в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есù, Гóсподи,/научù мя оправдáнiем Твоúм.
Почтò ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есù, Гóсподи,/научù мя оправдáнiем Твоúм.
Зелò рáно мvронóсицы течáху/ ко грóбу Твоемý рыдáющiя,/ но предстà к ним Áнгел и речè:/ рыдáнiя врéмя престà, не плáчите,/ воскресéнiе же апóстолом рцы́те.
Благословéн есù, Гóсподи,/научù мя оправдáнiем Твоúм.
Мvронóсицы жены̀ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речè, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егò Сы́нови, и Святóму Дýху,/ Святéй Трóице во еди́ном существè,/ с Серафíмы зовýще:/ Свят, Свят, Свят есѝ, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехà, Дéво, Адáма избáвила есѝ,/ рáдость же Éве/ в печáли мéсто подалà есѝ,/ пáдшiя же от жи́зни/ к сей напрáви/ из Тебè воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 8: Мvронóсицы Жизнодáвца предстоя́ща грóбу,/ Влады́ку искáху в мéртвых, Безсмéртнаго,/ и рáдость благовéщенiя от Áнгела прiéмша, апóстолом возвещáху:/ я́ко воскрéсе Хрїстóс Бог,// подая́й мíрови вéлiю ми́лость.
СТЕПЕННА, ГЛАС 8
1 АНТИФОН
Хор: От ю́ности моея́ враг мя искушáет, сластьмù палúт мя:// аз же надéяся на Тя, Гóсподи, побеждáю сегò. (Двáжды)
Ненави́дящiи Сióна,/ да бýдут ýбо прéжде исторжéнiя я́ко травà:// ссéчет бо Хрїстóс вы́я их, усечéнiем мук. (Двáжды)
Слáва Ѻтцý и Сы́ну и Святóму Дýху.
Святы́м Дýхом, Éже жи́ти вся́ческим:/ Свет от Свéта, Бог Вели́к:// со Отцéм поéм Емý, и с Слóвом.
И ны́не и прúсно и во вéки векóв. Амúнь.
Святы́м Дýхом, Éже жи́ти вся́ческим:/ Свет от Свéта, Бог Вели́к:// со Отцéм поéм Емý, и с Слóвом.
2 АНТИФОН
Сéрдце моé стрáхом Твоúм да покры́ется смиренномýдрствующее:// да не вознéсшееся отпадéт от Тебè, Всещéдре. (Двáжды)
На Гóспода имéвый надéжду, не устраши́тся тогдà,// егдà огнéм вся суди́ти и҆́мать, и мýкою. (Двáжды)
Слáва Ѻтцý и Сы́ну и Святóму Дýху.
Святы́м Дýхом, всяк кто божéственный ви́дит, и предглагóлет,/ чудодéйствует вы́шняя, в Трiéх Еди́наго Бóга поя́:// áще бо и трисiя́ет, единоначáльствует Божествó.
И ны́не и прúсно и во вéки векóв. Амúнь.
Святы́м Дýхом, всяк кто божéственный ви́дит, и предглагóлет,/ чудодéйствует вы́шняя, в Трiéх Еди́наго Бóга поя́:// áще бо и трисiя́ет, единоначáльствует Божествó.
3 АНТИФОН
Воззвáх Тебè, Гóсподи, вонмù,/ приклонù ми ýхо Твоè вопiю́щу, и очúсти,// прéжде дáже не вóзмеши менè отсю́ду. (Двáжды)
В мáтери своéй землѝ отходя́й всяк, пáки разрешáется,// прiя́ти мýки, илѝ пóчести пожи́вших. (Двáжды)
Слáва Ѻтцý и Сы́ну и Святóму Дýху.
Святы́м Дýхом богослóвiе, Еди́ница Трисвятáя:/ Отéц бо Безначáлен: от Негóже роди́ся Сын безлéтно,// и Дух Сопрестóлен, Сообрáзен, от Отцà спросiя́вшiй.
И ны́не и прúсно и во вéки векóв. Амúнь.
Святы́м Дýхом богослóвiе, Еди́ница Трисвятáя:/ Отéц бо Безначáлен: от Негóже роди́ся Сын безлéтно,// и Дух Сопрестóлен, Сообрáзен, от Отцà спросiя́вшiй.
4 АНТИФОН
Се ны́не что добрò, илù что краснò; но éже жúти брáтiи вкýпе:// в сем бо Госпóдь обещà живóт вéчный. (Двáжды)
О ри́зе своéй, И҆́же кри́ны сéльныя украшáяй,// повелевáет, я́ко не подобáет пещи́ся. (Двáжды)
Слáва Ѻтцý и Сы́ну и Святóму Дýху.
Святы́м Дýхом, Единови́дною винóю,/ вся содержáтся мироподáтельне:// Бог бо Сей есть, Отцý же и Сы́нови Единосýщен Госпóдственне.
И ны́не и прúсно и во вéки векóв. Амúнь.
Святы́м Дýхом, Единови́дною винóю,/ вся содержáтся мироподáтельне:// Бог бо Сей есть, Отцý же и Сы́нови Единосýщен Госпóдственне.
ПРОКИМЕН
Чтец: Прокíмен, глас осьмы́й, псалóм Давíдов. Воцари́тся Госпóдь во век, Бог твой, Сióне, в род и род. (Пс.145:10)
Хор: Воцарúтся Госпóдь во век,/ Бог твой, Сióне, в род и род.
Чтец: Хвалѝ, душè моя, Гóспода, восхвалю́ Гóспода в животè моéм. (Пс.145:1-2А)
Хор: Воцарúтся Госпóдь во век,/ Бог твой, Сióне, в род и род.
Чтец: Воцари́тся Госпóдь во век.
Хор: Бог твой, Сióне, в род и род.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егò, хвали́те Егò во утвержéнiи си́лы Егò.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Iоáнна Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Ин.зач.65А): Сýщу пóзде в день той, во еди́ну от суббóт, и двéрем затворéнным, идéже бя́ху ученицы̀ Егò сóбрани, стрáха рáди iудéйска, прiи́де Iисýс и ста посредè, и глагóла им: мир вам. И сiè рек, показà им рýце и нóзе и рéбра Своя. Возрáдовашася же ученицы̀, ви́девше Гóспода. Речè же им Iисýс пáки: мир вам. Якоже послà Мя Отéц, и Аз посылáю вы. И сiè рек, дýну и глагóла им: прiими́те Дух Свят. Имже отпуститè грехѝ, отпýстятся им: и и́мже держитè, держáтся. Фомà же, еди́н от обоюнáдесяте, глагóлемый Близнéц, не бе ту с ни́ми, егдà прiи́де Iисýс. Глагóлаху же емý друзíи ученицы̀: ви́дехом Гóспода. Он же речè им: áще не ви́жу на рукý Егò я́звы гвозди́нныя, и вложý пéрста моегò в я́звы гвозди́нныя, и вложý рýку мою́ в рéбра Егò, не имý вéры. И по днех осми́х пáки бя́ху внутрь ученицы̀ Егò, и Фомà с ни́ми. Прiи́де Iисýс двéрем затворéнным, и ста посредè их и речè: мир вам. Потóм глагóла Фомè: принесѝ перст твой сéмо, и виждь рýце Моѝ, и принесѝ рýку твою́, и вложѝ в рéбра Моя, и не бýди невéрен, но вéрен. И отвещà Фомà и речè Емý: Госпóдь мой и Бог мой. Глагóла емý Iисýс: яко ви́дев Мя, вéрова: блажéни не ви́девшiи и вéровавше. Мнóга же и и́на знáменiя сотвори Iисýс пред ученикѝ Свои́ми, я́же не суть пи́сана в кни́гах сих. Сiя же пи́сана бы́ша, да вéруете, я́ко Iисýс есть Хрїстóс Сын Бóжiй, и да вéрующе животà и́мате во и́мя Егò.
[Синодальный перевод]В тот первый день недели вечером, когда двери дома, где собирались ученики Его, были заперты из опасения от Иудеев, пришел Иисус, и стал посреди, и говорит им: мир вам! Сказав это, Он показал им руки и ноги и ребра Свои. Ученики обрадовались, увидев Господа. Иисус же сказал им вторично: мир вам! как послал Меня Отец, так и Я посылаю вас. Сказав это, дунул, и говорит им: примите Духа Святого. Кому простите грехи, тому простятся; на ком оставите, на том останутся. Фома же, один из двенадцати, называемый Близнец, не был тут с ними, когда приходил Иисус. Другие ученики сказали ему: мы видели Господа. Но он сказал им: если не увижу на руках Его ран от гвоздей, и не вложу перста моего в раны от гвоздей, и не вложу руки моей в ребра Его, не поверю. После восьми дней опять были в доме ученики Его, и Фома с ними. Пришел Иисус, когда двери были заперты, стал посреди них и сказал: мир вам! Потом говорит Фоме: подай перст твой сюда и посмотри руки Мои; подай руку твою и вложи в ребра Мои; и не будь неверующим, но верующим. Фома сказал Ему в ответ: Господь мой и Бог мой! Иисус говорит ему: ты поверил, потому что увидел Меня; блаженны невидевшие и уверовавшие. Много сотворил Иисус пред учениками Своими и других чудес, о которых не писано в книге сей. Это же написано, дабы вы уверовали, что Иисус есть Христос, Сын Божий, и, веруя, имели жизнь во имя Его.(Ин.20:19-31)
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстè, и святóе Воскресéнiе Твоè поéм и слáвим: Ты бо есѝ Бог наш, рáзве Тебè инóго не знáем, и҆́мя Твоè именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдà благословя́ще Гóспода, поéм Воскресéнiе Егò: распя́тiе бо претерпéв, смéртiю смерть разрушѝ.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегò, и от грехà моегò очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдà суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелю́ся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицà Твоегò, и Дýха Твоегò Святáго не отымѝ от менè. Воздáждь ми рáдость спасéнiя Твоегò, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегò, возрáдуется язык мой прáвде Твоéй. Гóсподи, устнè мои отвéрзеши, и устà моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдà благоволи́ши жéртву прáвды, возношéнiе и всесожегáемая; тогдà возложáт на олтáрь Твой тельцы̀.
Слáва Ѻтцý и Сы́ну и Святóму Дýху.
Глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Тáже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè.(Пс.50:3)
Стiхúра, глас 6: Воскрéс Iисýс от грóба,/ я́коже проречè,/ дадè нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 8
(совмещéнный с канóном Богорóдицы (глас 8), канóном Преображéнiя Гóсподня (вторóй) глас 8 и канóном мýчеников Фóтiя и Анiкúты, глас 4)
ПЕСНЬ 1
Iрмóс: Колесницегонúтеля фараóня погрузù/ чудотворя́й иногдà/ Моисéйскiй жезл, крестообрáзно поразúв,/ и разделúв мóре,/ Iзрáиля же беглецà, пешехóдца спасè,// песнь Бóгови воспевáюща.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Всеси́льну Хрїстóву Божествý кáко не диви́мся;/ от страстéй ýбо всем вéрным, безстрáстiе и нетлéнiе точáщу,/ от ребрà же Святáго истóчник безсмéртiя искáпающу,// и Живóт из грóба Присносýщный.
Хор: Слáва, Гóсподи, Святóму Воскресéнiю Твоемý.
Чтец: Я́ко благолéпен женáм Áнгел ны́не яви́ся,/ свéтлыя нося́ óбразы естéственныя невещéственныя чистоты̀,// зрáком же возвещáя свет воскресéнiя, зовы́й: воскрéсе Госпóдь.
Хор: Пресвятáя Богорóдице, спасù нас.
Богорóдичен: Преслáвная возглагóлашася о Тебè в родéх родóв,/ Бóга Слóва во чрéве вмéщшая,/ чистà же пребы́вши Богорóдице Марíе.// Тéмже Тя вси почитáем, сýщее по Бóзе заступлéнiе нáше.
Канон Богородицы, глас 8
Хор: Пресвятáя Богорóдице, спасù нас.
Чтец: Пречи́стая Богорóдице,/ воплóщшееся Присносýщное и Пребожéственное Слóво,// пáче естествà рóждши, поéм Тя.
Хор: Пресвятáя Богорóдице, спасù нас.
Чтец: Грозд Тя Живонóсен,/ всемíрнаго искáпающ слáдость спасéнiя,// Дéва, Хрїстè, родѝ.
Канон Преображения (второй), глас 8
Хор: Слáва Тебè, Бóже наш, слáва Тебè.
Чтец: Моисéй, на мóри прорóчески ви́дев/ óблаком и столпóм дрéвле óгненным слáву Госпóдню, вопiя́ше:// Избáвителю и Бóгу нáшему пои́м. (Двáжды)
Хор: Слáва Тебè, Бóже наш, слáва Тебè.
Чтец: Я́ко кáменем, тéлом покры́вся,/ обожéнiем, Неви́димаго зря, Моисéй Богови́дец взывáше:// Избáвителю и Бóгу нáшему пои́м.
Хор: Слáва Тебè, Бóже наш, слáва Тебè.
Чтец: Ты на горè закóнней и на Фавóрстей/ ви́ден был еси́ Моисéем во мрáце дрéвле,// во Свéте же ны́не непристýпнем Божествá.
Канон мучеников, глас 4
Хор: Святíи мýченицы Фóтiе и Анiкúто, молúте Бóга о нас.
Чтец: Болéзни тела, прехвáльнiи, претерпéвше, твердéйшим пóмыслом вéры,/ к неболéзненней жи́зни, рáдующеся, престáвистеся,// о нас при́сно моля́щеся.
Хор: Святíи мýченицы Фóтiе и Анiкúто, молúте Бóга о нас.
Чтец: Божéственными огрáждся, Анiки́то, орýжiи вéры,/ к борéнiю безплóтных враг твéрдо отлучи́лся есѝ// и тех вóинства Божéственною си́лою потреби́л есѝ.
Слáва Ѻтцý и Сы́ну и Святóму Дýху.
Чтец: Вiтíйское глумлéнiе, слáвне, и ум неискýсен éллинскiй,/ рáзумом Божéственным просвещáемь, посрами́л есѝ// и себè самáго, Анiки́то, всегò к страдáнiю отдáл есѝ.
И ны́не и прúсно и во вéки векóв. Амúнь.
Богорóдичен: Дéва и прéжде рождествà, Чи́стая,/ и по рождествè я́ко вои́стинну яви́лася есѝ,/ Бóга бо пáче слóва роди́ла есѝ,// святы́я мýченики страдáвшыя венчáвшаго.
Катавáсiя Преображéнiя (глас 4): Лúцы iзрáильтестiи,/ невлáжными стопáми/ понт Чермны́й и влáжную глубинý прогнáвше,/ всáдники тристáты врагù вúдяще в ней погружéны,/ с весéлiем поя́ху:// поúм Бóгу нáшему, я́ко прослáвися.
ПЕСНЬ 3
Iрмóс: Утверждéй в начáле Небесà рáзумом,/ и зéмлю на водáх основáвый,/ на кáмени мя, Хрїстè, зáповедей Твоúх утвердù,/ я́ко несть свят, пáче Тебè// Едúне Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Осуждéна бы́вша Адáма вкушéнiем грехà,/ плóти Твоея́ спаси́тельною стрáстiю оправдáл есѝ, Хрїстè:// Сам бо непови́нен смéртнаго искýса был есѝ, Безгрéшне.
Хор: Слáва, Гóсподи, Святóму Воскресéнiю Твоемý.
Чтец: Воскресéнiя свет возсiя́/ сýщим во тьме, и сéни смéртней седя́щим,/ Бог мой Iисýс,/ и Свои́м Божествóм крéпкаго связáв,// сегó сосýды расхи́тил есть.
Хор: Пресвятáя Богорóдице, спасù нас.
Богорóдичен: Херувíмов и Серафíмов превы́шши яви́лася есѝ, Богорóдице:/ Ты бо Еди́на прiя́ла есѝ Невмести́маго Бóга в Твоéм чрéве, Несквéрная:// тéмже Тя вéрнiи вси пéсньми, Чи́стая, ублажáем.
Глас 8
Хор: Пресвятáя Богорóдице, спасù нас.
Чтец: Даждь нам пóмощь Твои́ми моли́твами, Всечи́стая,// прилóги отражáющи лю́тых обстоя́нiй.
Хор: Пресвятáя Богорóдице, спасù нас.
Чтец: Éве прамáтери Ты исправлéнiе бы́ла есѝ,// Начáльника жи́зни мíрови, Хрїстà Богорóдице, рóждши.
Глас 8
Хор: Слáва Тебè, Бóже наш, слáва Тебè.
Чтец: Осеня́ющая слáва в сéни пéрвее и Моисéеви бесéдующи, Твоемý угóднику,/ óбраз бысть облистáвшаго неизречéнно// на Фавóре, Влады́ко, Твоегò преображéнiя. (Двáжды)
Хор: Слáва Тебè, Бóже наш, слáва Тебè.
Чтец: Совзыдóша Ти, Слóве Единорóдный,/ Вы́шнiи апóстольстiи версѝ на гóру Фавóрскую,// и сопредстáша Ти Моисéй же и Илiя́, я́ко Бóжiя слугѝ, Еди́не Человеколю́бче.
Хор: Слáва Тебè, Бóже наш, слáва Тебè.
Чтец: Бог Слóво сый, весь зéмлен бысть,/ всемý Бóжеству смеси́в человéчество во ипостáси Своéй,// ю́же во двою́ сýществу Моисéй и Илiя́ же ви́деша на горè Фавóре.
Глас 4
Хор: Святíи мýченицы Фóтiе и Анiкúто, молúте Бóга о нас.
Чтец: Победи́в со Хрїстóм ополчéнiя врáжiя,// венéц побéдный прiя́л есѝ, мýчениче страстотéрпче Анiки́то.
Хор: Святíи мýченицы Фóтiе и Анiкúто, молúте Бóга о нас.
Чтец: Неради́ша о плóти я́ко тлéющей Хрїстóвы мýченицы// и лю́тая мучéнiя рáзумом твéрдым претерпéша.
Слáва Ѻтцý и Сы́ну и Святóму Дýху.
Чтец: Вод животвóрных испóлнени,/ мýтныя тóки прéлести, мýдрiи мýченицы,// течéнiи крóвными устáвисте.
И ны́не и прúсно и во вéки векóв. Амúнь.
Богорóдичен: Всели́ся во утрóбу Твою́ живы́й на Небесéх Госпóдь// и от нас вся́ку прéлесть, Богорóдице, отгнáл есть.
Катавáсiя Преображéнiя (глас 4): Лук сúльных изнемóже,/ и немощствýющiи препоя́сашася сúлою,// сегò рáди утвердúся в Гóсподе сéрдце моè.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк Преображéнiя, глас 7: На горè преобразúлся есù,/ и я́коже вмещáху ученицы̀ Твоù,/ слáву Твою́, Хрїстè Божè, вúдеша,/ да егдà Тя ýзрят распинáема,/ страдáнiе ýбо уразумéют вóльное,/ мíрови же проповéдят,// я́ко Ты есù воúстинну Ѻ́тчее сiя́нiе.
Íкос: Востáните, лени́вiи, и́же всегдà ни́зу пони́кшiи в зéмлю душѝ моея́ пóмыслы,/ возми́теся и возвы́ситеся на высотý Божéственнаго восхождéнiя./ Притецéм к Петрý и к Зеведéевым/ и вкýпе со óнеми Фавóрскую гóру дости́гнем,/ да ви́дим с ни́ми слáву Бóга нáшего, глас же услы́шим,// егóже свы́ше слы́шаша и проповéдаша О́тчее сiя́нiе.
Седáлен мчч. Фóтiя и Анiкúты, глас 2: Низлóжше врáжiя возношéнiя терпéнiем лю́тых мук, страстотéрпцы,/ на Небесéх живетè ны́не, рáдующеся, Фóтiе слáвный и Анiки́то блажéнне./ Тéмже ублажáетеся во вéки векóв, о нас моля́щеся Хрїстý,// творя́щих вáшу пáмять.
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Седáлен Попрáзднства Преображéнiя, глас 3: Божéственныя Твоéя слáвы сiя́нiе, я́коже можáху,/ показáл есѝ, Слóве Бóжiй, ученикóм Твои́м, на Фавóрстей горè преобразýющiйся,/ и́миже просвети́хомся и мы, пою́щiи Тя,/ Еди́не Неизмéнне и Безсмéртне Гóсподи./ Тебè бо вéрою вопiéм:// слáва, Хрїстè, Цáрствiю Твоемý.
ПЕСНЬ 4
Iрмóс: Ты моя́ крéпость Гóсподи,/ Ты моя́ и сúла,/ Ты мой Бог, Ты моè рáдованiе,/ не остáвль нéдра Ѻ́тча,/ и нáшу нищетý посетúв./ Тем с прорóком Аввакýмом зовý Ти:// сúле Твоéй слáва, Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Ты врагà сýща мя зелò возлюби́л есѝ:/ Ты истощáнiем стрáнным сошéл есѝ на зéмлю, Благоутрóбне Спáсе,/ послéдняго моегó досаждéнiя не отвéргся,/ и пребы́в на высотé пречи́стыя Твоея́ слáвы,// прéжде безчéствованнаго прослáвил есѝ.
Хор: Слáва, Гóсподи, Святóму Воскресéнiю Твоемý.
Чтец: Кто зря, Влады́ко, ны́не не ужасáется,/ стрáстiю смерть разрушáему;/ Крестóм бежáщее тлéнiе,/ и смéртiю ад богáтства истощавáемый,/ Божéственною си́лою Тебè распя́таго;// чýдно дéло, Человеколю́бче!
Хор: Пресвятáя Богорóдице, спасù нас.
Богорóдичен: Ты вéрным похвалà есѝ, Безневéстная, Ты Предстáтельнице,/ Ты и прибéжище хрїстiáн, стенà и пристáнище:/ к Сы́ну бо Твоемý мольбы̀ нóсиши, Всенепорóчная, и спасáеши от бед,// вéрою и любóвiю Богорóдицу Чи́стую Тебè знáющих.
Глас 8
Хор: Пресвятáя Богорóдице, спасù нас.
Чтец: Клас возрасти́вшая животвóрный, неорáнная Ни́во,/ подаю́щаго мíрови жизнь, Богорóдице,// спасáй пою́щiя Тя.
Хор: Пресвятáя Богорóдице, спасù нас.
Чтец: Богорóдицу Тя, Всечи́стая, просвéщшiися вси проповéдуем:// Сóлнце бо прáвды родилà есѝ, Приснодéво.
Глас 8
Хор: Слáва Тебè, Бóже наш, слáва Тебè.
Чтец: И́же купинý сохрани́вый невреждéну, прикоснýвшуюся огню,/ Моисéю богосiя́нную плоть показáл есѝ, Влады́ко, пою́щему:// слáва си́ле Твоéй, Гóсподи. (Двáжды)
Хор: Слáва Тебè, Бóже наш, слáва Тебè.
Чтец: Скры́ся зарéю Божествà чýвственное сóлнце,/ я́ко на горè Фавóре ви́дев Тя преобразýющася, Iисýсе мой:// слáва си́ле Твоéй, Гóсподи.
Хор: Слáва Тебè, Бóже наш, слáва Тебè.
Чтец: Огнь, не опаля́я вéщи телéсныя, ви́ден бысть невещéствен,/ я́коже Моисéю и апóстолом яви́лся есѝ, Илiѝ же, Влады́ко,// еди́н от двою́, во дву совершéнну естествý.
Глас 4
Хор: Святíи мýченицы Фóтiе и Анiкúто, молúте Бóга о нас.
Чтец: Распалáеми любóвiю Бóжiею,/ усéрдно плáмень огня́ проидóсте,/ пребы́вше росóю неопáльни духóвною, непобеди́мiи мýченицы,// Божéственнiи моли́твенницы о душáх нáших.
Хор: Святíи мýченицы Фóтiе и Анiкúто, молúте Бóга о нас.
Чтец: Отвергóшася тéла, разли́чными óбразы страдáльцы стрýжеми,/ всем бо умóм к Бóгу взирáху,// сим подаю́щему терпéнiе вéры рáди.
Слáва Ѻтцý и Сы́ну и Святóму Дýху.
Чтец: Дремáнiем не воздремáсте злочéстiя,/ но бóдростiю Божéственною, мýченицы,// спя́щiя всегдà в смéрти к Свéту настáвисте богорáзумiя благодáтiю.
И ны́не и прúсно и во вéки векóв. Амúнь.
Богорóдичен: Я́ко краснà породилà есѝ Крáснаго, Дéво Мáти Чи́стая,/ крáсны показáвшаго мýченики,// твéрдо пострадáвшiя и безбóжiе потрéбльшiя.
Катавáсiя Преображéнiя (глас 4): Услы́шах слáвное смотрéнiе Твоè, Хрїстè Бóже,/ я́ко родúлся есù от Дéвы,/ да от лéсти избáвиши зовýщыя:// слáва сúле Твоéй, Гóсподи.
ПЕСНЬ 5
Iрмóс: Вскýю мя отрúнул есù/ от лицà Твоегò, Свéте Незаходúмый,/ и покры́ла мя есть чуждáя тьма, окая́ннаго;/ но обратù мя,/ и к свéту зáповедей Твоúх// путù моя́ напрáви, молю́ся.
Хор: Слáва, Гóсподи, Святóму Воскресéнiю Твоемý.
Чтец: Одéятися претерпéл есѝ в багряни́цу/ прéжде стрáсти Твоея́, Спáсе, поругáемь,/ первоздáннаго покрывáя безобрáзное обнажéнiе:/ и наг пригвозди́лся есѝ на Крестé плóтiю,// совлачáя, Хрїстè, ри́зу умерщвлéнiя.
Хор: Слáва, Гóсподи, Святóму Воскресéнiю Твоемý.
Чтец: От пéрсти смéртныя,/ Ты пáдшее моè пáки наздáл есѝ существó, воскрéс:/ и нестарéющееся, Хрїстè устрóил есѝ,/ яви́в пáки я́коже цáрскiй óбраз,// нетлéнiя жизнь блистáющ.
Хор: Пресвятáя Богорóдице, спасù нас.
Богорóдичен: Мáтернее дерзновéнiе, éже к Сы́ну Твоемý имýщи, Всечи́стая,/ срóднаго промышлéнiя, éже о нас, не прéзри, мóлимся:// я́ко Тебè и Еди́ну хрїстiáне ко Влады́це очищéнiе ми́лостивно предлагáем.
Глас 8
Хор: Пресвятáя Богорóдице, спасù нас.
Чтец: Утолѝ нестерпи́мую бýрю страстéй мои́х,// Я́же Бóга рóждшая, Окорми́теля и Гóспода.
Хор: Пресвятáя Богорóдице, спасù нас.
Чтец: Слýжат рождествý Твоемý, Пречи́стая Богорóдице,// Áнгельстiи чи́нове, и человéков собрáнiе.
Глас 8
Хор: Слáва Тебè, Бóже наш, слáва Тебè.
Чтец: Вети́йствующiй язы́к Твоегò вели́чества не мóжет вещáти:/ я́ко бо, Держáй живóт и смéртiю Влады́й,/ предстáвил еси́ на Фавóрстей горè Моисéя и Илiю́,// свидéтельствующiя твоè Божествò. (Двáжды)
Хор: Слáва Тебè, Бóже наш, слáва Тебè.
Чтец: И́же рукáми неви́димыми создáв по óбразу Твоемý, Хрїстè, человéка,/ началообрáзную Твою́ в создáнiи добрóту показáл есѝ,/ не я́ко во óбразе, но я́ко Сам Сый по сýществу,// Бог был есѝ и Человéк.
Хор: Слáва Тебè, Бóже наш, слáва Тебè.
Чтец: Сраствори́вся неслiя́нно, угль горя́щ показáл есѝ нам Божествà,/ попаля́ющ ýбо грехѝ, дýши же просвещáющ, на Фавóрстей горè,// Моисея́ со Илiéю, ученикóв же старéйшiя удиви́л есѝ.
Глас 4
Хор: Святíи мýченицы Фóтiе и Анiкúто, молúте Бóга о нас.
Чтец: Премнóгими рáнами умерщвлéно тéло твоè, Анiки́то,// живóт тебè нестарéемый, преблажéнне, преподóбно исходáтаи.
Хор: Святíи мýченицы Фóтiе и Анiкúто, молúте Бóга о нас.
Чтец: Потреблéнiе огню́ жгýщему был есѝ, о Фóтiе,/ Божéственнаго сiя́нiя сопричáстниче/ и дне незаходи́маго чáдо при́сное!
Слáва Ѻтцý и Сы́ну и Святóму Дýху.
Чтец: Текýщих тлéнiе до концà отри́нуша,/ возжелéвше пребывáющая крáсная,/ единодýшно, мýченицы слáвнiи.
И ны́не и прúсно и во вéки векóв. Амúнь.
Богорóдичен: Кто мóжет сказáти Твоè тáинство, о Влады́чице Богорóдице?/ Пáче умà бо и слóва Бóга неизречéнно роди́ла есѝ.
Катавáсiя Преображéнiя (глас 4): От свéта пресекíй перворóдный свет,/ я́ко во свéте делà пою́т Тя, Хрїстè, Содéтеля,// во свéте Твоéм путù нáша напрáви.
ПЕСНЬ 6
Iрмóс: Очúсти мя, Спáсе,/ мнóга бо беззакóнiя моя́,/ и из глубины̀ зол возведù, молю́ся:/ к Тебè бо возопúх, и услы́ши мя,// Бóже спасéнiя моегò.
Хор: Слáва, Гóсподи, Святóму Воскресéнiю Твоемý.
Чтец: Дрéвом крéпко низложѝ мя началозлóбный:/ Ты же, Хрїстè, вознéсся на Крестè,/ крепчáе низложи́л есѝ, посрами́в сегò,// пáдшаго же воскреси́л есѝ.
Хор: Слáва, Гóсподи, Святóму Воскресéнiю Твоемý.
Чтец: Ты ущéдрил есѝ Сióна, возсiя́вый от грóба,/ нóваго вмéсто вéтхаго соверши́в, я́ко Благоутрóбен, Божéственною Твоéю крóвiю:// и ны́не цáрствуеши в нем во вéки, Хрїстè.
Хор: Пресвятáя Богорóдице, спасù нас.
Богорóдичен: Да избáвимся от лю́тых прегрешéнiй,/ мольбáми Твои́ми, Богороди́тельнице Чи́стая,/ и да улучи́м, Пречи́стая, Божéственное сiя́нiе,// из Тебè неизречéнно воплощéннаго Сы́на Бóжiя.
Глас 8
Хор: Пресвятáя Богорóдице, спасù нас.
Чтец: Храм Тя Бóжiй и Ковчéг,/ и чертóг одушевлéнный, и дверь Небéсную,// Богорóдице, вéрнiи возвещáем.
Хор: Пресвятáя Богорóдице, спасù нас.
Чтец: Трéбищ разруши́тель, я́ко Бог,/ бы́вшее рождествò Твоè, Марíе Богоневéсто,// покланя́емо есть со Отцéм и Дýхом.
Глас 8
Хор: Слáва Тебè, Бóже наш, слáва Тебè.
Чтец: Я́ко вéлiе и стрáшное узрéся ви́денiе днесь:/ с небесè ýбо чýвственное, от землѝ же несравнéнное// облистà Сóлнце прáвды мы́сленное на горè Фавóрстей. (Двáжды)
Хор: Слáва Тебè, Бóже наш, слáва Тебè.
Чтец: Прéйде ýбо сень закóнная, изнемóгшая,/ прiи́де же я́ве Хрїстóс и́стина, - Моисéй возопѝ,// на Фавóре ви́дев твоè Божествò.
Хор: Слáва Тебè, Бóже наш, слáва Тебè.
Чтец: Столп óгненный - Хрїстà преобразýющася,/ óблак же - яве благодáть Дýха, осени́вшую на Фавóре,// предсказáша явлéннейше.
Глас 4
Хор: Святíи мýченицы Фóтiе и Анiкúто, молúте Бóга о нас.
Чтец: Возвы́шен был есѝ, неми́лостивно на дрéве стрýжемь,/ умерщвлéнiя дебельствò отметая,// в Божéственную одéжду с Небесè одевáемь, мýчениче Анiки́то.
Хор: Святíи мýченицы Фóтiе и Анiкúто, молúте Бóга о нас.
Чтец: Растóргше ýзы прéлести, святíи, внегдà свя́зани бы́сте крéпко,/ терпéнiем же и пождáнiем, Божéственными ýжи,// предстáтеля тьмы удави́сте.
Слáва Ѻтцý и Сы́ну и Святóму Дýху.
Чтец: Яви́стеся я́ко вели́цыи свети́льницы,/ просвещáюще лучáми исцелéнiй и заря́ми Божéственных пóдвиг всю тварь,// страдáльцы Хрїстóвы предóблiи.
И ны́не и прúсно и во вéки векóв. Амúнь.
Богорóдичен: Закóнных породилà есѝ кромè, Всенепорóчная, и́стиннаго Закóноположника,// Егóже молѝ закóном грехà побеждáемую дýшу мою́ ущéдрити и спастѝ мя.
Катавáсiя Преображéнiя (глас 4): Внегдà скорбéти ми,/ возопúх ко Гóсподу,// и услы́ша мя Бог спасéнiя моегò.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 8: Воскрéс из грóба, умéршыя воздвúгл есù,/ и Адáма воскресúл есù,/ и Éва ликýет во Твоéм Воскресéнiи,/ и мiрстíи концы̀ торжествýют// éже из мéртвых востáнiем Твоúм, Многомúлостиве.
Íкос: Áдова цáрствiя плени́вый, и мéртвыя воскреси́вый, Долготерпели́ве,/ жены̀ мvронóсицы срéтил есѝ, вмéсто печáли рáдость принесы́й:/ и апóстолом Твои́м возвести́л есѝ победи́тельная Спáсе мой знáменiя Живодáтелю,/ и тварь просвещáеши, Человеколю́бче.// Сегò рáди и мiр срáдуется, éже из мéртвых востáнiю Твоемý, Многоми́лостиве.
ПЕСНЬ 7
Iрмóс: Бóжiя снизхождéнiя/ огнь устыдéся в Вавилóне иногдà./ Сегò рáди óтроцы в пещù рáдованною ногóю,/ я́ко во цвéтнице ликýюще поя́ху:// благословéн есù, Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Слáвное истощáнiе,/ Божéственное богáтство Твоея́ нищеты́, Хрїстè, удивля́ет Áнгелы,/ на Крестè зря́щiя Тя пригвождáема,/ за éже спасти́ вéрою зовýщiя:// благословéн еси́ Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Божéственным Твои́м сошéствiем свéта испóлнил еси́ преиспóдняя,/ и тьма прогнáна бысть прéжде гоня́щая./ Отню́дуже воскресóша и҆́же от вéка ю́зницы, зовýще:// благословéн Бог отéц нáших.
Хор: Пресвятáя Трóице, Бóже наш, слáва Тебè.
Трóичен: Всем ýбо Гóспода,/ Еди́наго же еди́ному Единорóдному Сы́ну правослáвно Отцá,/ богослóвяще Тя возвещáем,/ и Еди́наго вéдяще от Тебè исходя́ща Дýха Прáваго,// Соестéственна и Соприсносýщна.
Глас 8
Хор: Пресвятáя Богорóдице, спасù нас.
Чтец: От Дéвственных ложéсн воплóщься,/ яви́лся еси́ на Спасéнiе нáше./ Тéмже Твою́ Мáтерь вéдяще Богорóдицу, правослáвно зовéм:// отцéв Бóже, благословéн еси́.
Хор: Пресвятáя Богорóдице, спасù нас.
Чтец: Жезл прорасти́ла еси́, Дéво,/ от кóрене Iессéова, Всеблажéнная,/ Плод цветонося́щи спаси́тельный,/ вéрою Сы́ну Твоемý зовýщим:// отцéв Бóже, благословéн еси́.
Глас 8
Хор: Слáва Тебè, Бóже наш, слáва Тебè.
Чтец: Ны́не ви́дена бы́ша апóстолом неви́димая Божествà во плóти,/ на горè Фавóрстей облистáвша, вопiю́щим:// благословéн еси́, Гóсподи Бóже, во вéки.
Хор: Слáва Тебè, Бóже наш, слáва Тебè.
Чтец: Ужасóшася стрáхом, уди́вльшеся благолéпiю Божéственнаго Цáрства,/ на горè Фавóрстей апóстоли, вопiю́ще:// благословéн еси́, Гóсподи Бóже, во вéки.
Хор: Слáва Тебè, Бóже наш, слáва Тебè.
Чтец: Ны́не неуслы́шанная услы́шана бы́ша:/ без отцà бо Сын от Дéвы Отéческим гласом слáвно свидéтельствуется,// я́ко Бог и человéк Тóйже во вéки.
Продолжéнiе здесь