Святых славных и всехвальных первоверховных апостолов ПЕТРА И ПАВЛА. ВСЕНОЩНОЕ БДЕНИЕ. УТРЕНЯ
12 ию́ля 2024 гóда. Пя́тница 3-й недéли по Пятидеся́тнице. Святы́х слáвных и всехвáльных первоверхóвных апóстолов Петрà и Пáвла. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени.
УТРЕНЯ
Начáло зри здесь ( великая вечéрня)
ШЕСТОПСАЛМИЕ
Слáва в вы́шних Бóгу, и на землѝ мир, в человéцех благоволéнiе. (трúжды) Гóсподи, устнè моѝ отвéрзеши, и устà моя́ возвестя́т хвалý Твою́. (двáжды)
Псалом 3
Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгò. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы̀ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоè.
Аз уснýх, и спах, востáх, я́ко Госпóдь застýпит мя.
Псалом 37
Гóсподи, да не я́ростiю Твоéю обличи́ши менè, нижè гнéвом Твои́м накáжеши менè. Яко стрéлы Твоя́ унзóша во мне, и утверди́л есѝ на мне рýку Твою́. Несть исцелéнiя в плóти моéй от лицà гнéва Твоегò, несть ми́ра в костéх мои́х от лицà грех мои́х. Яко беззакóнiя моя́ превзыдóша главý мою́, я́ко брéмя тя́жкое отяготéша на мне. Возсмердéша и согни́ша рáны моя́ от лицà безýмiя моегò. Пострадáх и слякóхся до концà, весь день сéтуя хождáх. Яко ля́двiя моя́ напóлнишася поругáнiй, и несть исцелéнiя в плóти моéй. Озлóблен бых и смири́хся до зелà, рыкáх от воздыхáнiя сéрдца моегò. Гóсподи, пред Тобóю все желáнiе моè и воздыхáнiе моè от Тебè не утаи́ся. Сéрдце моè смятéся, остáви мя си́ла моя́, и свет óчiю моéю, и той несть со мнóю. Дрýзи моѝ и и҆́скреннiи моѝ пря́мо мне прибли́жишася и стáша, и бли́жнiи моѝ отдалéче менè стáша и нуждáхуся и҆́щущiи дýшу мою́, и и҆́щущiи злáя мне глагóлаху сýетная и льсти́вным весь день поучáхуся. Аз же я́ко глух не слы́шах и я́ко нем не отверзáяй уст свои́х. И бых я́ко человéк не слы́шай и не имы́й во устéх свои́х обличéнiя. Яко на Тя, Гóсподи, уповáх, Ты услы́шиши, Гóсподи Бóже мой. Яко рех: да не когдà порáдуют ми ся вразѝ моѝ: и внегдà подвижáтися ногáм мои́м, на мя велерéчеваша. Яко аз на рáны готóв, и болéзнь моя́ предо мнóю есть вы́ну. Яко беззакóнiе моè аз возвещý и попекýся о гресè моéм. Вразѝ же моѝ живýт и укрепи́шася пáче менè, и умнóжишася ненави́дящiи мя без прáвды. Воздаю́щiи ми злáя возблагáя оболгáху мя, занè гоня́х благосты́ню. Не остáви менè, Гóсподи Бóже мой, не отступѝ от менè. Вонмѝ в пóмощь мою́, Гóсподи спасéнiя моегò.
Не остáви менè, Гóсподи Бóже мой, не отступѝ от менè. Вонмѝ в пóмощь мою́, Гóсподи спасéнiя моегò.
Псалом 62
Бóже, Бóже мой, к Тебè ýтренюю, возжадà Тебè душà моя́, коль мнóжицею Тебè плоть моя́, в землѝ пýсте и непрохóдне, и безвóдне. Тáко во святéм яви́хся Тебè, ви́дети си́лу Твою́ и слáву Твою́. Я́ко лýчши ми́лость Твоя́ пáче живóт, устнè моѝ похвали́те Тя. Тáко благословлю́ Тя в животè моéм, о и҆́мени Твоéм воздежý рýце моѝ. Я́ко от тýка и мáсти да испóлнится душà моя́, и устнáма рáдости восхвáлят Тя устà моя́. Áще поминáх Тя на постéли моéй, на ýтренних поучáхся в Тя. Я́ко был есѝ Помóщник мой, и в крóве крилý Твоéю возрáдуюся. Прильпè душà моя́ по Тебè, менè же прiя́т десни́ца Твоя́. Тíи же всýе искáша дýшу мою́, вни́дут в преиспóдняя землѝ, предадя́тся в рýки орýжiя, чáсти ли́совом бýдут. Царь же возвесели́тся о Бóзе, похвáлится всяк клены́йся И҆м, я́ко загради́шася устà глагóлющих непрáведная.
На ýтренних поучáхся в Тя. Яко был есѝ Помóщник мой, и в крóве крилý Твоéю возрáдуюся. Прильпè душà моя́ по Тебè, менè же прiя́т десни́ца Твоя́.
Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Псалом 87
Гóсподи Бóже спасéнiя моегò, во дни воззвáх, и в нощѝ пред Тобóю. Да вни́дет пред Тя моли́тва моя́: приклонѝ ýхо Твоè к молéнiю моемý, я́ко испóлнися зол душà моя́, и живóт мой áду прибли́жися. Привменéн бых с низходя́щими в ров, бых я́ко человéк без пóмощи, в мéртвых свобóдь, я́ко я́звеннiи спя́щiи во грóбе, и҆́хже не помянýл есѝ ктомý, и тíи от рукѝ Твоея́ отриновéни бы́ша. Положи́ша мя в рóве преиспóднем, в тéмных и сéни смéртней. На мне утверди́ся я́рость Твоя́, и вся вóлны Твоя́ навéл есѝ на мя. Удáлил есѝ знáемых мои́х от менè, положи́ша мя мéрзость себè: прéдан бых и не исхождáх. Óчи моѝ изнемогóсте от нищеты̀, воззвáх к Тебè, Гóсподи, весь день, воздéх к Тебè рýце моѝ. Едà мéртвыми твори́ши чудесà? Илѝ врáчеве воскреся́т, и исповéдятся Тебè? Едà повéсть кто во грóбе ми́лость Твою́, и и҆́стину Твою́ в поги́бели? Едà познáна бýдут во тьме чудесà Твоя́, и прáвда Твоя́ в землѝ забвéнней? И аз к Тебè, Гóсподи, воззвáх и ýтро моли́тва моя́ предвари́т Тя. Вскýю, Гóсподи, отрéеши дýшу мою́, отвращáеши лицè Твоè от менè? Нищ есмь аз, и в трудéх от ю́ности моея́; вознéс же ся, смири́хся, и изнемогóх. На мне преидóша гнéви Твоѝ, устрашéнiя Твоя́ возмути́ша мя, обыдóша мя я́ко водà, весь день одержáша мя вкýпе. Удáлил есѝ от менè дрýга и и҆́скренняго, и знáемых моих от страстéй.
Гóсподи Бóже спасéнiя моегò, во дни воззвáх, и в нощѝ пред Тобóю. Да вни́дет пред Тя моли́тва моя́: приклонѝ ýхо Твоè к молéнiю моемý.
Псалом 102
Благословѝ, душè моя, Гóспода, и вся внýтренняя моя и҆́мя святóе Егò. Благословѝ, душè моя, Гóспода, и не забывáй всех воздая́ній Егò, очищáющаго вся беззакóнїя твоя́, исцеля́ющаго вся недýги твоя́, избавля́ющаго от истлéнiя живóт твой, венчáющаго тя ми́лостію и щедрóтами, исполня́ющаго во благи́х желáнїе твоè: обновится я́ко óрля юность твоя́. Творя́й ми́лостыни Госпóдь, и судьбý всем оби́димым. Сказà путѝ Своя́ Моисéови, сыновóм Iзрáилевым хотéнїя Своя́: Щедр и Ми́лостив Госпóдь, Долготерпели́в и Многоми́лостив. Не до концà прогнéвается, нижè во век враждýет, не по беззакóнїем нáшим сотвори́л есть нам, нижè по грехóм нáшым воздáл есть нам. Я́ко по высотè небéсней от землѝ, утверди́л есть Госпóдь ми́лость Свою́ на боя́щихся Егò. Ели́ко отстоят востóцы от зáпад, удáлил есть от нас беззакóнїя нáша. Я́коже щéдрит отéц сы́ны, ущéдри Госпóдь боя́щихся Егò. Я́ко Той познà создáнїе нáше, помянý, яко персть есмы̀. Человéк, яко травà днíе eгò, яко цвет сéльный, тáко оцветéт, яко дух прóйде в нем, и не бýдет, и не познáет ктомý мéста своегò. Ми́лость же Госпóдня от вéка и до вéка на боя́щихся Егò, и прáвда Егò на сынéх сынóв, храня́щих завéт Егò, и пóмнящих зáповеди Егò твори́ти я. Госпóдь на Небесѝ уготóва Престóл Свой, и Цáрство Егò всéми обладáет. Благослови́те Гóспода вси Áнгели Егò, си́льнїи крéпостїю, творя́щїи слóво Егò, услышати глас словéс Егò. Благослови́те Гóспода вся Си́лы Егò, слýги Егò, творя́щїи вóлю Егò. Благослови́те Гóспода вся делà Егò, на вся́ком мéсте влады́чества Егò, благословѝ, душè моя́, Гóспода.
На вся́ком мéсте влады́чества Егò, благословѝ, душè моя́, Гóспода.
Псалом 142
Гóсподи, услы́ши моли́тву мою́, внушѝ молéнiе моè во и҆́стине Твоéй, услы́ши мя в прáвде Твоéй и не вни́ди в суд с рабóм Твои́м, я́ко не оправди́тся пред Тобóю всяк живы́й. Яко погнà враг дýшу мою́, смири́л есть в зéмлю живóт мой, посади́л мя есть в тéмных, я́ко мéртвыя вéка. И уны̀ во мне дух мой, во мне смятéся сéрдце моè. Помянýх дни дрéвнiя, поучи́хся во всех дéлех Твои́х, в творéнiих рукý Твоéю поучáхся. Воздéх к Тебè рýце моѝ, душà моя́, я́ко земля́ безвóдная Тебè. Скóро услы́ши мя, Гóсподи, исчезè дух мой, не отвратѝ лицà Твоегò от менè, и уподóблюся низходя́щым в ров. Слы́шану сотворѝ мне заýтра ми́лость Твою́, я́ко на Тя уповáх. Скажѝ мне, Гóсподи, путь вóньже пойдý, я́ко к Тебè взях дýшу мою́. Измѝ мя от враг мои́х, Гóсподи, к Тебè прибегóх. Научѝ мя твори́ти вóлю Твою́, я́ко Ты есѝ Бог мой. Дух Твой Благíй настáвит мя на зéмлю прáву. И҆́мене Твоегò рáди, Гóсподи, живи́ши мя, прáвдою Твоéю изведéши от печáли дýшу мою́. И ми́лостiю Твоéю потреби́ши врагѝ моя́ и погуби́ши вся стужáющыя душѝ моéй, я́ко аз раб Твой есмь.
Услы́ши мя, Гóсподи, в прáвде Твоéй и не вни́ди в суд с рабóм Твои́м. Услы́ши мя, Гóсподи, в прáвде Твоéй и не вни́ди в суд с рабóм Твои́м.
Дух Твой Благíй настáвит мя на зéмлю прáву.
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
БОГ ГОСПОДЬ, глас 4
Чтец: Бог Госпóдь, и яви́ся нам, благословéн Гряды́й во И҆́мя Госпóдне.(Пс.117:27А,26А)
Чтец: И҆сповéдайтеся Гóсподеви, я́ко благ, я́ко в век ми́лость Егò.(Пс.117:1)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Обышéдше обыдóша мя и и҆́менем Госпóдним противля́хся им.(Пс.117:11)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Не умрý, но жив бýду и повéм делà Госпóдня.(Пс.117:17)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Кáмень, Егóже небрегóша зи́ждущiи, Сей бысть во главý ýгла, от Гóспода бысть Сей, и есть ди́вен во очесéх нáших. (Пс.117:22-23)
Хор: Бог Госпóдь, и явúся нам, благословéн Гряды́й во И҆́мя Госпóдне.
ТРОПАРИ
Тропáрь апóстолов, глас 4: Апóстолов первопрестóльницы/ и вселéнныя учúтелiе,/ Влады́ку всех молúте/ мир вселéнней даровáти// и душáм нáшим вéлiю мúлость. (Двáжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Богорóдичен воскрéсный (отпуст.), глас 4: Éже от вéка утаéное,/ и Áнгелом несвéдомое тáинство,/ Тобóю Богорóдице сýщым на землù явúся Бог,/ в неслúтном соединéнiи воплощáемь,/ и Крeст вóлею нас рáди воспрiúм,/ и҆́мже воскресúв первоздáннаго,// спасè от смéрти дýшы нáша.
Гóсподи, помúлуй. (трúжды)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
КАФИЗМЫ И СЕДАЛЬНЫ
КАФИЗМА ДЕВЯТНАДЦАТАЯ
И чтем кафíсму 19-ю (или одúн псалóм, или до 1-й Слáвы)
Псалом 134
Хвали́те И҆́мя Госпóдне, хвали́те, рабѝ Гóспода, стоя́щiи во хрáме Госпóдни, во двóрех дóму Бóга нáшего. Хвали́те Гóспода, я́ко Благ Госпóдь, пóйте и҆́мени Егò, я́ко добрò: я́ко Iáкова избрà Себè Госпóдь, Iзрáиля в достоя́нiе Себè. Я́ко аз познáх, я́ко Вéлiй Госпóдь, и Госпóдь наш над всéми бóги. Вся ели́ка восхотè Госпóдь, сотворѝ на небесѝ и на землѝ, в моря́х и во всех бéзднах. Возводя́ óблаки от послéдних землѝ, мóлнiи в дождь сотворѝ, изводя́й вéтры от сокрóвищ Свои́х. И҆́же поразѝ пéрвенцы Еги́петскiя, от человéка до скотà. Послà знáменiя и чудесà посредè Тебè, Еги́пте, на фараóна и на вся рабы̀ eгò. И҆́же поразѝ язы́ки мнóги и избѝ царѝ крéпки: Сиóна, царя Аморрéйска, и Óга, царя́ Васáнска, и вся цáрствiя Ханаáнска, и дадè зéмлю их достоя́нiе, достоя́нiе Iзрáилю, лю́дем Свои́м. Гóсподи, и҆́мя Твоè в век и пáмять Твоя́ в род и род: я́ко суди́ти и҆́мать Госпóдь лю́дем Свои́м, и о рабéх Свои́х умóлится. Íдоли язы́к, сребрò и злáто, делá рук человéческих Устà и҆́мут, и не возлагóлют, óчи и҆́мут, и не ýзрят, ýши и҆́мут, и не услы́шат, нижè бо есть дух во устéх их. Подóбни им да бýдут творя́щiи я́, и вси надéющiися на ня. Дóме Iзрáилев, благослови́те Гóспода, дóме Аарóнь, благослови́те Гóспода, дóме Левíин, благослови́те Гóспода. Боя́щiися Гóспода, благослови́те Гóспода. Благословéн Госпóдь от Сióна, живы́й во Iерусали́ме.
Псалом 135
Исповéдайтеся Гóсподеви, я́ко Благ, я́ко в век ми́лость Егò. Исповéдайтеся Бóгу богóв, я́ко в век ми́лость Егò. Исповéдайтеся Гóсподеви господéй, я́ко в век ми́лость Егò. Сотвóршему чудесà вéлiя еди́ному, я́ко в век ми́лость Егò. Сотвóршему небесà рáзумом, я́ко в век ми́лость Егò. Утверди́вшему зéмлю на водáх, я́ко в век ми́лость Егò. Сотвóршему свети́ла вéлiя еди́ному, я́ко в век ми́лость Егò. Сóлнце во óбласть дне, я́ко в век ми́лость Егò. Лунý и звéзды во óбласть нóщи, я́ко в век ми́лость Егò. Порази́вшему Еги́пта с пéрвенцы eгò, я́ко в век ми́лость Егò, и извéдшему Iзрáиля от среды̀ их, я́ко в век ми́лость Егò. Рукóю крéпкою и мы́шцею высóкою, я́ко в век ми́лость Егò. Раздéльшему Чермнóе мóре в разделéнiя, я́ко в век ми́лость Егò. И провéдшему Iзрáиля посредè eгò, я́ко в век ми́лость Егò. И истря́сшему фараóна и си́лу eгò в мóре Чермнóе, я́ко в век ми́лость Егò. Провéдшему лю́ди Своя́ в пусты́ни, я́ко в век ми́лость Егò. Порази́вшему царѝ вéлiя, я́ко в век ми́лость Егò, и уби́вшему царѝ крéпкiя, я́ко в век ми́лость Егò: Сиóна, царя́ Аморрéйска, я́ко в век ми́лость Егò, и Óга, царя́ Васáнска, я́ко в век ми́лость Егò. И дáвшему зéмлю их достоя́нiе, я́ко в век ми́лость Егò. Достоя́нiе Iзрáилю, рабý Своемý, я́ко в век ми́лость Егò. Я́ко во смирéнiи нáшем помянý ны Госпóдь, я́ко в век ми́лость Егò. И избáвил ны есть от врагóв нáших, я́ко в век ми́лость Егò. Дая́й пи́щу вся́кой плóти, я́ко в век ми́лость Егò. Исповéдайтеся Бóгу Небéсному, я́ко в век ми́лость Егò.
Псалом 136
На рекáх Вавилóнских, тáмо седóхом и плáкахом, внегдà помянýти нам Сióна. На вéрбiих посредè eгò обéсихом оргáны нáша. Я́ко тáмо вопроси́ша ны плéншiи нас о словесéх пéсней и вéдшiи нас о пéнiи: воспóйте нам от пéсней Сióнских. Кáко воспоéм песнь Госпóдню на землѝ чуждéй? Áще забýду тебè, Iерусали́ме, забвéна бýди десни́ца моя́. Прильпнѝ язы́к мой гортáни моемý, áще не помянý тебè, áще не предложý Iерусали́ма, я́ко в начáле весéлiя моегò. Помянѝ, Гóсподи, сы́ны Едóмскiя, в день Iерусали́мль глагóлющыя: истощáйте, истощáйте до основáнiй eгò. Дщи Вавилóня окая́нная, блажéн и҆́же воздáст тебè воздая́нiе твоè, éже воздалà есѝ нам. Блажéн и҆́же имéт и разбiéт младéнцы твоя́ о кáмень.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
Псалом 137
Исповéмся Тебè, Гóсподи, всем сéрдцем мои́м, и пред Áнгелы воспою́ Тебè, я́ко услы́шал есѝ вся глагóлы уст мои́х. Поклоню́ся ко хрáму святóму Твоемý и исповéмся и҆́мени Твоемý о ми́лости Твоéй и и҆́стине Твоéй, я́ко возвели́чил есѝ над всем и҆́мя Твоè святóе. Вóньже áще день призовý Тя, скóро услы́ши мя: умнóжиши мя в душѝ моéй си́лою Твоéю. Да исповéдятся Тебè, Гóсподи, вси цáрiе зéмстiи, я́ко услы́шаша вся глагóлы уст Твои́х, и да воспою́т в путéх Госпóдних, я́ко вéлiя слáва Госпóдня, я́ко Высóк Госпóдь, и смирéнныя призирáет, и высóкая издалéча весть. Áще пойдý посредè скóрби, живи́ши мя, на гнев враг мои́х простéрл есѝ рукý Твою́, и спасè мя десни́ца Твоя́. Госпóдь воздáст за мя. Гóсподи, ми́лость Твоя́ во век, дел рукý Твоéю не прéзри.
Псалом 138
Гóсподи, искуси́л мя есѝ и познáл мя еси́. Ты познáл еси́ седáнiе моé и востáнiе моé. Ты разумéл еси́ помышлéнiя моя́ издалéча: стезю́ мою́ и ýже моé Ты еси́ изслéдовал, и вся пути́ моя́ прови́дел еси́. Я́ко несть льсти в язы́це моéм: се, Гóсподи, Ты познáл еси́. Вся послéдняя и дрéвняя: Ты создáл еси́ мя, и положи́л еси́ на мне рýку Твою́. Удиви́ся рáзум Твой от менé, утверди́ся, не возмогý к немý. Кáмо пойдý от Дýха Твоегó? И от лицá Твоегó кáмо бежý? Áще взы́ду на нéбо - Ты тáмо еси́, áще сни́ду во ад - тáмо еси́. Áще возмý крилé мои́ рáно и вселю́ся в послéдних мóря - и тáмо бо рукá Твоя́ настáвит мя и удержи́т мя десни́ца Твоя́. И рех: едá тма поперéт мя, и нощь просвещéнiе в слáдости моéй? Я́ко тма не помрачи́тся от Тебé, и нощь, я́ко день, просвети́тся, я́ко тма ея́, тáко и свет ея́. Я́ко Ты создáл еси́ утрóбы моя́, воспрiя́л мя еси́ из чрéва мáтере моея́. Исповéмся Тебé, я́ко стрáшно удиви́лся еси́: чýдна делá Твоя́, и душá моя́ знáет зелó. Не утаи́ся кость моя́ от Тебé, ю́же сотвори́л еси́ в тáйне, и состáв мой в преиспóдних земли́. Несодéланное моé ви́десте óчи Твои́, и в кни́зе Твоéй вси напи́шутся, во днех сози́ждутся и никтóже в них. Мне же зелó чéстни бы́ша дрýзи Твои́, Бóже, зелó утверди́шася влады́чествiя их. Изочтý их, и пáче пескá умнóжатся; востáх, и ещé есмь с Тобóю. Áще избiéши грéшники, Бóже, мýжiе кровéй, уклони́теся от менé. Я́ко ревни́ви естé в помышлéнiих, прiи́мут в суетý грáды Твоя́. Не ненави́дящыя ли Тя, Гóсподи, возненави́дех, и о вразéх Твои́х истáях? Совершéнною нéнавистiю возненави́дех я́, во враги́ бы́ша ми. Искуси́ мя, Бóже, и увéждь сéрдце моé, истяжи́ мя и разумéй стези́ моя́, и виждь, áще путь беззакóнiя во мне, и настáви мя на путь вéчен.
Псалом 139
Измѝ мя, Гóсподи, от человéка лукáва, от мýжа непрáведна избáви мя, и҆́же помы́слиша непрáвду в сéрдце, весь день ополчáху брáни, изостри́ша язы́к свой, я́ко змiи́н, яд áспидов под устнáми их. Сохрани́ мя, Гóсподи, из руки́ грéшничи, от человéк непрáведных изми́ мя, и҆́же помы́слиша запя́ти стопы́ моя́. Скры́ша гóрдiи сеть мне, и у́жы препя́ша сеть ногáма мои́ма. При стези́ соблáзны положи́ша ми. Рех Гóсподеви: Бог мой еси́ Ты, внуши́, Гóсподи, глас молéнiя моегó. Гóсподи, Гóсподи, си́ло спасéнiя моегó, осени́л еси́ над главóю моéю в день брáни. Не предáждь менé, Гóсподи, от желáнiя моегó грéшнику: помы́слиша на мя, не остáви менé, да не когдá вознесýтся. Главá окружéнiя их, труд устéн их покры́ет я́. Падýт на них ýглiя óгненная, низложи́ши я́ в страстéх, и не постоя́т. Муж язы́чен не испрáвится на земли́: мýжа непрáведна злáя уловя́т во истлéнiе. Познáх, я́ко сотвори́т Госпóдь суд ни́щым и месть убóгим. Обáче прáведнiи исповéдятся и҆́мени Твоемý, и вселя́тся прáвiи с лицéм Твои́м.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
Псалом 140
Гóсподи, воззвáх к Тебè, услы́ши мя: вонмѝ глáсу молéнiя моегò, внегдà воззвáти ми к Тебè. Да испрáвится моли́тва моя́, я́ко кади́ло пред Тобóю, воздея́нiе рукý моéю - жéртва вечéрняя. Положѝ, Гóсподи, хранéнiе устóм мои́м, и дверь ограждéнiя о устнáх мои́х. Не уклонѝ сéрдце моè в словесà лукáвствiя, непщевáти вины̀ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы̀ моея́, я́ко ещè и моли́тва моя́ во благоволéнiих их. Пожéрты бы́ша при кáмени судiѝ их: услы́шатся глагóли моѝ, я́ко возмогóша. Я́ко тóлща землѝ просéдеся на землѝ, расточи́шася кóсти их при áде. Я́ко к Тебè, Гóсподи, Гóсподи, óчи моѝ: на Тя уповáх, не отымѝ дýшу мою́. Сохранѝ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
Псалом 141
Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моè, печáль мою́ пред Ним возвещý. Внегдà исчезáти от менè дýху моемý: и Ты познáл есѝ стезѝ моя́: на путѝ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менè: поги́бе бéгство от менè, и несть взыскáяй дýшу мою́. Воззвáх к Тебè, Гóсподи, рех: Ты есѝ уповáнiе моè, часть моя́ есѝ на землѝ живы́х. Вонмѝ молéнiю моемý, я́ко смири́хся зелò, избáви мя от гоня́щих мя, я́ко укрепи́шася пáче менè. Изведѝ из темни́цы дýшу мою́, исповéдатися и́мени Твоемý. Менè ждут прáведницы, дóндеже воздáси мне.
Псалом 142
Гóсподи, услы́ши моли́тву мою́, внушѝ молéнiе моè во и҆́стине Твоéй, услы́ши мя в прáвде Твоéй и не вни́ди в суд с рабóм Твои́м, я́ко не оправди́тся пред Тобóю всяк живы́й. Яко погнà враг дýшу мою́, смири́л есть в зéмлю живóт мой, посади́л мя есть в тéмных, я́ко мéртвыя вéка. И уны̀ во мне дух мой, во мне смятéся сéрдце моè. Помянýх дни дрéвнiя, поучи́хся во всех дéлех Твои́х, в творéнiих рукý Твоéю поучáхся. Воздéх к Тебè рýце моѝ, душà моя́, я́ко земля́ безвóдная Тебè. Скóро услы́ши мя, Гóсподи, исчезè дух мой, не отвратѝ лицà Твоегò от менè, и уподóблюся низходя́щым в ров. Слы́шану сотворѝ мне заýтра ми́лость Твою́, я́ко на Тя уповáх. Скажѝ мне, Гóсподи, путь вóньже пойдý, я́ко к Тебè взях дýшу мою́. Измѝ мя от враг мои́х, Гóсподи, к Тебè прибегóх. Научѝ мя твори́ти вóлю Твою́, я́ко Ты есѝ Бог мой. Дух Твой Благíй настáвит мя на зéмлю прáву. И҆́мене Твоегò рáди, Гóсподи, живи́ши мя, прáвдою Твоéю изведéши от печáли дýшу мою́. И ми́лостiю Твоéю потреби́ши врагѝ моя́ и погуби́ши вся стужáющыя душѝ моéй, я́ко аз раб Твой есмь.
Чтец: Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
СЕДАЛЬНЫ
Хор (по кафíсме седáлен апóстолов, глас 8): Глубинý ловлéнiя остáвль,/ с Небесè прiéм от Отцà Божéственное откровéнiе Слóва воплощéнiя,/ и со дерзновéнiем вéрно вопiя́л есѝ Зижди́телю Твоемý:/ Бóжiя Тя вем Сы́на Единосýщна./ Тéмже по достоя́нiю вои́стинну показáлся есѝ кáмень вéры/ и ключáрь благодáти, Пéтре апóстоле./ Молѝ Хрїстà Бóга грехóв оставлéнiе даровáти// прáзднующим любóвiю святýю пáмять твою́.
Слáва Отцý и Сы́ну и Святóму Дýху.
Ин седáлен апóстолов, глас 1: Церкóвнаго кáменя, всехвáльнаго Петрà, и побóрника Пáвла,/ мирскýю мрéжу, достóйно восхвáлим, вéрнiи, я́ко имýща ключѝ Небéсныя:/ от них бо просвети́ся вселéнная вéрою Трóйческою./ Слáва Прослáвльшему вас,/ слáва Укрéпльшему вы,// слáва Даровáвшему вас рáди жизнь вéчную.
И ны́не и прúсно и во вéки векóв, амúнь.
Богорóдичен: Рýце Твоѝ Божéственнiи,/ и́миже Создáтеля понеслà есѝ,/ Дéво Пресвятáя, воплóщшагося благосты́нею,/ простéрши, умолѝ Егò избáвити нас от искушéнiй, и страстéй, и бед,/ хвáлящих Тя любóвiю и вопiю́щих:/ слáва Всéльшемуся в Тя,/ слáва Прошéдшему из Тебè,// слáва Избáвльшему нас рождествóм Твои́м.
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
КАФИЗМА ДВАДЦАТАЯ
И чтем кафíсму 20-ю (или одúн псалóм, или до 1-й Слáвы)
Псалом 143
Благословéн Госпóдь Бог мой, научáяй рýце моѝ на ополчéнiе, пéрсты моя́ на брань. Ми́лость моя́ и прибéжище моè, Застýпник мой и Избáвитель мой, Защи́титель мой, и на Негò уповáх: повинýяй лю́ди моя́ под мя. Гóсподи, что есть человéк, я́ко познáлся есѝ eмý? Илѝ сын человéчь, я́ко вменя́еши eгò? Человéк суетè уподóбися: днíе eгò я́ко сень прехóдят. Гóсподи, приклонѝ небесà, и сни́ди, косни́ся горáм, и воздымя́тся. Блеснѝ мóлнiю, и разженéши я́, послѝ стрéлы Твоя́, и смятéши я́. Послѝ рýку Твою́ с высоты̀, измѝ мя и избáви мя от вод мнóгих, из рукѝ сынóв чужди́х, и҆́хже устà глагóлаша суетý, и десни́ца их - десни́ца непрáвды. Бóже, песнь нóву воспою́ Тебè, во псалти́ри десятострýннем пою́ Тебè, даю́щему спасéнiе царéм, избавля́юшему Давíда, рабà Своегò, от мечà лю́та. Избáви мя, и измѝ мя из рýки сынóв чужди́х, и҆́хже устà глагóлаша суетý, и десни́ца их - десни́ца непрáвды. И҆́хже сы́нове их я́ко новосаждéнiя водружéнная в ю́ности своéй. Дщéри их удóбрены, преукрáшены, я́ко подóбiе хрáма. Храни́лища их испóлнена, отрыгáющая от сегò в сiè, óвцы их многоплóдны, мнóжащыяся во исхóдищах свои́х, волóве их тóлсти. Несть падéнiя оплóту, нижè прохóда, нижè вóпля в стóгнах их. Ублажи́ша лю́ди, и҆́мже сiя́ суть. Блажéни лю́дiе, и҆́мже Госпóдь Бог их.
Псалом 144
Вознесý Тя, Бóже мой, Царю́ мой, и благословлю́ и҆́мя Твоé в век и в век вéка. На всяк день благословлю́ Тя и восхвалю́ и҆́мя Твоé в век и в век вéка. Вéлiй Госпóдь и хвáлен зелó, и вели́чiю Егó несть концá. Род и род восхвáлят делá Твоя́ и си́лу Твою́ возвестя́т. Великолéпiе слáвы святы́ни Твоея́ возглагóлют и чудесá Твоя́ повéдят. И си́лу стрáшных Твои́х рекýт и вели́чiе Твоé повéдят. Пáмять мнóжества блáгости Твоея́ отры́гнут и прáвдою Твоéю возрáдуются. Щедр и Ми́лостив Госпóдь, Долготерпели́в и Многоми́лостив. Благ Госпóдь вся́ческим, и щедрóты Егó на всех дéлех Егó. Да исповéдятся Тебé, Гóсподи, вся делá Твоя́, и преподóбнiи Твои́ да благословя́т Тя. Слáву Цáрствiя Твоегó рекýт, и силу Твою́ возглагóлют, сказáти сыновóм человéческим си́лу Твою́, и слáву великолéпiя Цáрствiя Твоегó. Цáрство Твоé, Цáрство всех векóв, и влады́чество Твоé во вся́ком рóде и рóде. Вéрен Госпóдь во всех словесéх Свои́х и Преподóбен во всех дéлех Свои́х. Утверждáет Госпóдь вся низпáдающыя и возставля́ет вся низвéрженныя. Óчи всех на Тя уповáют, и Ты даéши им пи́щу во благоврéменiи. Отверзáеши Ты рýку Твою́ и исполня́еши вся́кое живóтно благоволéнiя. Прáведен Госпóдь во всех путéх Свои́х и Преподóбен во всех дéлех Свои́х. Близ Госпóдь всем призывáющым Егó, всем призывáющым Егó во и҆́стине. Вóлю боя́щихся Егó сотвори́т и моли́тву их услы́шит и спасéт я́. Храни́т Госпóдь вся лю́бящыя Егó и вся грéшники потреби́т. Хвалý Госпóдню возглагóлют устá моя́, и да благослови́т вся́ка плоть и҆́мя святóе Егó в век и в век вéка.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
Псалом 145
Хвалѝ, душè моя́, Гóспода. Восхвалю́ Гóспода в животè моéм, пою́ Бóгу моемý, дóндеже есмь. Не надéйтеся на кня́зи, на сы́ны человéческiя, в ни́хже несть спасéнiя. Изы́дет дух егò и возврати́тся в зéмлю свою́. В той день поги́бнут вся помышлéнiя егò. Блажéн, емýже Бог Iáковль Помóщник егò, уповáнiе егò на Гóспода Бóга своегò, сотвóршаго нéбо и зéмлю, мóре и вся, я́же в них, храня́щаго и́стину в век, творя́щаго суд оби́димым, даю́щаго пи́щу áлчушим. Госпóдь реши́т оковáнныя. Госпóдь умудря́ет слепцы̀. Госпóдь возвóдит низвéрженныя. Госпóдь лю́бит прáведники. Госпóдь храни́т пришéльцы, си́ра и вдовý прiи́мет и путь грéшных погуби́т. Воцари́тся Госпóдь во век, Бог твой, Сióне, в род и род.
Псалом 146
Хвали́те Гóспода, я́ко благ псалóм. Бóгови нáшему да услади́тся хвалéнiе. Зи́ждай Iерусали́ма Госпóдь, разсéянiя Iзрáилева соберéт. Исцеля́яй сокрушéнныя сéрдцем и обязýяй сокрушéнiя их. Исчитáяй мнóжество звезд и всем им именà нарицáяй. Вéлiй Госпóдь наш, и вéлiя крéпость Егò, и рáзума Егò несть числà, Прiéмляй крóткiя Госпóдь, смиря́яй же грéшники до землѝ. Начни́те Гóсподеви во исповéданiи, пóйте Бóгови нáшему в гýслех. Одевáющему нéбо óблаки, уготовля́ющему землѝ дождь, прозябáющему на горáх травý и злак на слýжбу человéком, даю́щему скотóм пи́щу их, и птенцéм врáновым призывáющим Егò. Не в си́ле кóнстей восхóщет, нижè в лы́стех мýжеских благоволи́т. Благоволи́т Госпóдь в боя́щихся Егò и во уповáющих на ми́лость Егò.
Псалом 147
Похвалѝ, Iерусали́ме, Гóспода, хвалѝ Бóга Твоегò, Сióне, я́ко укрепѝ вереѝ врат Твои́х, благословѝ сы́ны твоя́ в тебè. Полагáяй предéлы Твоя́ мир, и тýка пшени́чна насыщáяй тя. Посылáяй слóво Своè землѝ, до скóрости течéт слóво Егò, даю́щаго снег Свой, я́ко вóлну, мглу, я́ко пéпел, посыпáющаго, метáющаго гóлоть Свой, я́ко хлéбы. Проти́ву лицà мрáза Егò кто постои́т? Пóслет слóво Своè, и истáет я́, дхнет дух Егò, и потекýт вóды. Возвещáяй слóво Своè Iáкову, оправдáнiя и судьбы́ Своя́ Iзрáилеви. Не сотворѝ тáко вся́кому язы́ку, и судьбы̀ Своя́ не явѝ им.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
Псалом 148
Хвали́те Гóспода с небéс, хвали́те Егò в вы́шних. Хвали́те Егò вси Áнгели Егò, хвалите Егò вся си́лы Егò. Хвали́те Егò, сóлнце и лунà, хвали́те Егò, вся звéзды и свет. Хвали́те Егò Небесà небéс и водà, я́же превы́ше небéс. Да восхвáлят и҆́мя Госпóдне: я́ко Той речè, и бы́ша, Той повелè, и создáшася. Постáви я́ в век и в век вéка, повелéнiе положѝ, и не ми́мо и҆́дет. Хвали́те Гóспода от землѝ, змíеве и вся бéздны: огнь, град, снег, гóлоть, дух бýрен, творя́щая слóво Егò, гóры и вси хóлми, древà плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiѝ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогò Еди́наго, исповéданiе Егò на землѝ и на небесѝ. И вознесéт рог людéй Свои́х, песнь всем преподóбным Егò, сыновóм Iзрáилевым, лю́дем, приближáющымся Емý.
Псалом 149
Воспóйте Гóсподеви песнь нóву, хвалéнiе Егò в цéркви преподóбных. Да возвеселится Iзрáиль о сотвóршем Егò, и сы́нове Сióни возрáдуются о Царè своéм. Да восхвáлят и҆́мя Егò в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечѝ обою́ду острѝ в рукáх их: сотвори́ти отмщéнiе во языцех, обличéнiя в лю́дех, связáти царѝ их пýты, и слáвныя их ручными окóвы желéзными: сотвори́ти в них суд напи́сан. Слáва сiя бýдет всем преподóбным Егò.
Псалом 150
Хвали́те Бóга во святы́х Егò, хвали́те Егò в утвержéнiи си́лы Егò. Хвали́те Егò на си́лах Егò, хвали́те Егò по мнóжеству вели́чествiя Егò. Хвали́те Егò во глáсе трýбнем, хвали́те Егò во псалти́ри и гýслех. Хвали́те Егò в тимпáне и ли́це, хвали́те Егò во стрýнах и оргáне. Хвали́те Егò в кимвáлех доброглáсных, хвали́те Егò в кимвáлех восклицáнiя. Вся́кое дыхáнiе да хвáлит Гóспода.
Чтец: Слáва Ѻтцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
Хор (по кафíсме седáлен апóстолов, глас 8): С Небесè звáнiе от Хрiстà прiи́м, яви́лся есѝ проповéдник Свéта,/ всех благодáти озари́л есѝ учéньми:/ закóна бо служéнiе пи́смене изстругáв, вéрным облистáл есѝ рáзум Дýха./ Тéмже и в трéтiе нéбо достóйне взя́тся превы́спренно,/ и в рай дости́гл есѝ, Пáвле апóстоле./ Молѝ Хрiстà Бóга согрешéнiй оставлéнiе даровáти// прáзднующям любóвiю святýю пáмять твою́.
Слáва Отцý и Сы́ну и Святóму Дýху.
Ин седáлен апóстолов, глас 4: Светолýчными сiя́нiи, я́коже звéзды, земны́я концы̀ просвещáете учéнiи святы́я прóповеди,// Небéснiи таи́нницы, Госпóдни апóстоли.
И ны́не и прúсно и во вéки векóв, амúнь.
Богорóдичен: Тéплое заступлéнiе сýщим в бедáх, и Помóщницу нáшу,/ и к Бóгу пременéнiе, Éюже тли избáвихомся,// Богорóдицу, вéрнiи, ублажáем.
ПОЛИЕЛЕЙ
Хор: Хвали́те И҆́мя Госпóдне, хвали́те, рабѝ Гóспода.
Аллилýїа (трúжды)
(И далее хор продолжает чередовать стiхи 134 псалма и Аллилуиа)
стоя́щiи во хрáме Госпóдни, во двóрех дóму Бóга нáшего./ Хвали́те Гóспода, я́ко Благ Госпóдь, пóйте и҆́мени Егò, я́ко добрò:/ я́ко Iáкова избрà Себè Госпóдь, Iзрáиля в достоя́нiе Себè./ Я́ко аз познáх, я́ко Вéлiй Госпóдь, и Госпóдь наш над всéми бóги./ Вся ели́ка восхотè Госпóдь, сотворѝ на небесѝ и на землѝ, в моря́х и во всех бéзднах./ Возводя́ óблаки от послéдних землѝ, мóлнiи в дождь сотворѝ, изводя́й вéтры от сокрóвищ Свои́х./ И҆́же поразѝ пéрвенцы Еги́петскiя, от человéка до скотà./ Послà знáменiя и чудесà посредè Тебè, Еги́пте, на фараóна и на вся рабы̀ eгò./ И҆́же поразѝ язы́ки мнóги и избѝ царѝ крéпки:/ Сиóна, царя Аморрéйска, и Óга, царя́ Васáнска, и вся цáрствiя Ханаáнска,/ и дадè зéмлю их достоя́нiе, достоя́нiе Iзрáилю, лю́дем Свои́м./ Гóсподи, и҆́мя Твоè в век и пáмять Твоя́ в род и род:/ я́ко суди́ти и҆́мать Госпóдь лю́дем Свои́м, и о рабéх Свои́х умóлится./ Íдоли язы́к, сребрò и злáто, делá рук человéческих/ Устà и҆́мут, и не возлагóлют, óчи и҆́мут, и не ýзрят,/ ýши и҆́мут, и не услы́шат, нижè бо есть дух во устéх их./ Подóбни им да бýдут творя́щiи я́, и вси надéющiися на ня./ Дóме Iзрáилев, благослови́те Гóспода, дóме Аарóнь, благослови́те Гóспода, дóме Левíин, благослови́те Гóспода./ Боя́щiися Гóспода, благослови́те Гóспода.
Благословéн Госпóдь от Сióна, живы́й во Iерусали́ме.
Аллилýїа (трúжды)
Исповéдайтеся Гóсподеви, я́ко Благ, я́ко в век ми́лость Егò.
Аллилýїа (трúжды)
(И далее хор продолжает чередовать стiхи 135 псалма и Аллилуиа)
Исповéдайтеся Бóгу богóв, я́ко в век ми́лость Егò./ Исповéдайтеся Гóсподеви господéй, я́ко в век ми́лость Егò./ Сотвóршему чудесà вéлiя еди́ному, я́ко в век ми́лость Егò./ Сотвóршему небесà рáзумом, я́ко в век ми́лость Егò./ Утверди́вшему зéмлю на водáх, я́ко в век ми́лость Егò./ Сотвóршему свети́ла вéлiя еди́ному, я́ко в век ми́лость Егò./ Сóлнце во óбласть дне, я́ко в век ми́лость Егò./ Лунý и звéзды во óбласть нóщи, я́ко в век ми́лость Егò./ Порази́вшему Еги́пта с пéрвенцы eгò, я́ко в век ми́лость Егò,/ и извéдшему Iзрáиля от среды̀ их, я́ко в век ми́лость Егò./ Рукóю крéпкою и мы́шцею высóкою, я́ко в век ми́лость Егò./ Раздéльшему Чермнóе мóре в разделéнiя, я́ко в век ми́лость Егò./ И провéдшему Iзрáиля посредè eгò, я́ко в век ми́лость Егò./ И истря́сшему фараóна и си́лу eгò в мóре Чермнóе, я́ко в век ми́лость Егò./ Провéдшему лю́ди Своя́ в пусты́ни, я́ко в век ми́лость Егò./ Порази́вшему царѝ вéлiя, я́ко в век ми́лость Егò,/ и уби́вшему царѝ крéпкiя, я́ко в век ми́лость Егò:/ Сиóна, царя́ Аморрéйска, я́ко в век ми́лость Егò,/ и Óга, царя́ Васáнска, я́ко в век ми́лость Егò./ И дáвшему зéмлю их достоя́нiе, я́ко в век ми́лость Егò./ Достоя́нiе Iзрáилю, рабý Своемý, я́ко в век ми́лость Егò./ Я́ко во смирéнiи нáшем помянý ны Госпóдь, я́ко в век ми́лость Егò./ И избáвил ны есть от врагóв нáших, я́ко в век ми́лость Егò./ Дая́й пи́щу вся́кой плóти, я́ко в век ми́лость Егò.
Исповéдайтеся Бóгу Небéсному, я́ко в век ми́лость Егò.
Аллилýїа (трúжды)
ВЕЛИЧАНИЕ АПОСТОЛОВ
Хор: Величáем тя,/ апóстоли Хрїстóвы Пéтре и Пáвле,/ весь мiр учéньми своúми просветúвшыя/ и вся концы̀// ко Хрїстý привéдшыя.
(И далее хор продолжает чередовать стiхи Избранного псалма и Величанiе)
ПСАЛОМ ИЗБРАННЫЙ
Небесà повéдают слáву Бóжiю, творéнiе же рукý Егò возвещáет твердь./ Исповéдят Небесà чудесà Твоя́, Гóсподи./ Вмéсто отéц Твои́х бы́ша сы́нове Твои́./ Постáвиши я́ кня́зи по всей земли́./ Бог богóв Госпóдь глагóла и призвà зéмлю./ От востóк сóлнца до зáпад хвáльно И҆́мя Госпóдне./ Освети́ша мóлнiя Егò вселéнную,/ возвести́ша Небесà прáвду Егò,/ и ви́деша вси лю́дiе слáву Егò./ Кня́зи Iýдовы влады́ки их./ Воцари́ся Бог над язы́ки./ Бог прославля́емь в совéте святы́х./ Вéлiй и стрáшен есть над всéми окрéстными Егò./ Рцы́те во язы́цех, я́ко Госпóдь воцари́ся./ Возвести́те во язы́цех слáву Егò, во всех лю́дех чудесà Егò./ Во всю зéмлю изы́де вещáнiе их,/ и в концы́ вселéнныя глагóлы их./ Покори́ лю́ди нам и язы́ки под нóги нáша./ Вéлiй Госпóдь наш и вéлiя крéпость Егò.// Той даст си́лу и держáву лю́дем Свои́м: благословéн Бог.
Продолжéнiе здесь