Неделя 7 по Пасхе, святых отцов I Вселенского Собора, Попразднство Вознесения. УТРЕНЯ(ок) ЧАС ПЕРВЫЙ
16 iюня 2024 гóда. Недéля седьмáя по Пáсхе, святых 318 богонóсных отéц Пéрвaго Вселéнского Собóра, úже в Нiкéи. Попрáзднство Вознесéнiя. Глас 6. Воскрéсная прáздничная слýжба для домáшнего (келéйнаго) совершéнiя. Слýжба совершáется по Трióди. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Благословúм Отцà, и Сы́на, и Святáго Дýха, Гóспода.
Тропáрь: Священноначáльницы, пáстырiе достослáвнiи,/ Хрiстóву Цéрковь просвещáют,// ины́й и́нуду сiю́ освещáюще, и превознося́ще во вся вéки.
И ны́не и прúсно и во вéки векóв, амúнь.
Богорóдичен: Тáйно во óбразех предви́деша Тебé прорóцы вси, Слóво рóждшую,/ плоть бо из Тебé взéмый, Сей прóйде сугýб:// Егóже превознóсим во вся вéки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя Пятидеся́тницы (глас 4): Разрешáет ýзы,/ и орошáет плáмень,/ трисвéтлый Богоначáлiя Óбраз:/ пою́т óтроцы,/ благословúт же Еди́наго Спáса и Вседéтеля,/ я́ко Благодéтеля// сотворéнная вся́ческая тварь.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душà Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На кáждый стiх)
Я́ко призрè на смирéнiе рабы̀ Своея́,/ се бо от ны́не ублажáт Мя вси рóди.
Я́ко сотворѝ Мне вели́чiе Си́льный,/ и свя́то И҆́мя Егò, и ми́лость Егò в рóды родóв боя́щимся Егò.
Сотворѝ держáву мы́шцею Своéю,/ расточѝ гóрдыя мы́слiю сéрдца их.
Низложѝ си́льныя со престóл, и вознесè смирéнныя;/ áлчущiя испóлни благ, и богатя́щiяся отпустѝ тщи.
Воспрiя́т Iзрáиля óтрока Своегò, помянýти ми́лости,/ я́коже глагóла ко отцéм нáшим, Авраáму и сéмени егò, дáже до вéка.
ПЕСНЬ 9
Iрмóс: Бóга/ человéком невозмóжно вúдети,/ на Негóже не смéют чúни Áнгельстiи взирáти;/ Тобóю бо, Всечúстая, явúся человéком/ Слóво воплощéнно,/ Егóже величáюще,// с Небéсными вóи Тя ублажáем.
Хор: Слáва, Гóсподи, Святóму Воскресéнiю Твоемý.
Чтец: Страстéй непричáстен Ты пребы́л есѝ, Слóве Бóжiй,/ плóтiю прiобщи́вся страстéм:/ но реши́ши от страстéй человéка,/ страстéм быв страсть, Спáсе наш:// еди́н бо есѝ безстрáстен, и всеси́лен.
Хор: Слáва, Гóсподи, Святóму Воскресéнiю Твоемý.
Чтец: Тлю смéртную прiéм, тлéнiя соблю́л есѝ тéло Твоé невкýсно,/ Твоя́ же животворя́щая и божéственная, Влады́ко, душá, во áде не остáвлена бысть:// но я́коже от сна воскрéс, нас совоздви́гл есѝ.
Хор: Пресвятáя Трóице, Бóже наш, слáва Тебè.
Трóичен: Бóга Отцá, Сы́на собезначáльна,/ вси человéцы устнáми ýбо чистыми слáвим,/ неизречéнную же и преслáвную Дýха Всесвятáго силу чтим:// едина бо есѝ всесильная Трóица неразлýчная.
Глас 5
Хор: Слáва Тебè, Бóже наш, слáва Тебè.
Чтец: Тебé Избáвителя ми́ра Хрiстá Бóга,/ апóстоли ви́дяще Божéственно возвышáема,// со стрáхом игрáюще величáху.
Хор: Слáва Тебè, Бóже наш, слáва Тебè.
Чтец: Твою́ обожи́вшуюся плоть/ зря́ще Хрiстé, на высотé Áнгели,/ друг ко дрýгу глагóлаху:// вои́стинну Сей есть Бог наш.
Хор: Слáва Тебè, Бóже наш, слáва Тебè.
Чтец: Тебé безплóтных чи́нове Хрiстé Бóже,/ на óблацех взéмлема ви́дяще, взывáху:// слáвы Царю́, вратá возми́те.
Хор: Пресвятáя Богорóдице, спасù нас.
Богорóдичен: Херувíмов превы́шшая яви́лася еси́ Богорóдице Чи́стая,/ во чрéве Твоéм си́ми Носи́маго носи́вшая:// Егóже со безплóтными, человéцы славослóвим во вся вéки.
Глас 6
Припéв: Святíи отцы́, молúте Бóга о нас.
Тропáрь: Обрéт вы спобóрники собрá,/ держáвною си́лою вооружи́в Дýха,/ Отцý собезначáльное, и сопрестóльное Слóво, прéжде век сýщее:/ Егóже ны́не всесвящéннiи,// с небéсными вóинствы при́сно слáвите. (Двáжды)
Припéв: Святíи отцы́, молúте Бóга о нас.
Чтец: Пáжить Áрiеву лю́тыя éреси,/ я́ко врáчеве душáм же и телесéм устáвисте,/ свящéнный вéры Симвóл всем изложи́вше,/ и́же ны́не держáще,// пáмять вáшу священнодéтелiе при́сно слáвим. (двáжды)
Слáва Отцý и Сыну и Святóму Дýху.
Тропáрь: Я́ко свет сый Хрiстé пречи́стый,/ от страстéй мглы дýшу мою́ очи́сти,/ моли́твами Влады́ко Твои́х служи́телей,/ ны́не Тебé проповéдавших безначáльна, несоздáнна,// Зижди́теля же всех и Бóга, и Отцý собезначáльна.
И ныне и прúсно и во вéки векóв, амúнь.
Богорóдичен: Мéртвым воскресéнiе ны́не даровáся/ Твои́м неизречéнным и неизглагóланным Рождествóм, Богорóдице Влады́чице:/ жизнь бо из Тебé плóтiю обложéна всем возсiя́,// и смéрти неусклáбное я́ве разруши́.
Катавáсiя Пятидеся́тницы (глас 4): Рáдуйся Царúце,/ Матеродéвственная слáво:/ вся́ка бо удобообращáтельная благоглагóливая устà/ витíйствовати не мóгут,/ Тебè пéти достóйно:/ низумевáет же ум всяк, Твоè Рождествò разумéти.// Тéмже Тя соглáсно слáвим.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьмѝ Бог наш.
Хор: Свят Госпóдь Бог наш
Ексапостилáрiй воскрéсный деся́тый: Тiверiáдское мóре с детьми́ Зеведéевыми,/ Нафанáила с Петрóм же и со други́ма двемá дрéвле,/ и Фомý имя́ше на лóве,/ и҆́же Хрiстóвым повелéнiем одеснýю ввéргше,/ мнóжество извлекóша рыб:/ Егóже Петр познáв, к Немý бродя́ше,/ и҆́мже трéтiе явлéйся,// и хлеб показá, и ры́бу на ýглех.
Слáва Ѻтцý и Сы́ну и Святóму Дýху.
Светúлен св. отцéв: Отéц божéственных днесь пáмять прáзднующе,/ молéньми тех мóлим Всещéдре:/ вся́каго врéда ересéй избáви лю́ди Твоя́ Гóсподи,// и вся сподóби, Отцá Слóва слáвити, и Всесвятáго Дýха.
И ны́не и прúсно и во вéки векóв. Амúнь.
Ексапостiлáрiй (светúлен прáздника) самоглáсен: Ученикóм зря́щим Тя,/ вознéслся есѝ Хрїстè ко Отцý соседя́,/ Áнгели предтекýще зовя́ху:/ возми́те вратà, возми́те,// Царь бо взы́де к начáльному Свéту слáвы.
ХВАЛИТНЫ
Хор, глас 6: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егò в вы́шних.// Тебè подобáет песнь Бóгу.
Хвали́те Егò вси áнгели Егò,/ хвалите Егò вся си́лы Егò.// Тебè подобáет песнь Бóгу.
[В приходской практике пропускается до стихир]Хвали́те Егò, сóлнце и лунà, хвали́те Егò, вся звéзды и свет. Хвали́те Егò Небесà небéс и водà, я́же превы́ше небéс. Да восхвáлят и҆́мя Госпóдне: я́ко Той речè, и бы́ша, Той повелè, и создáшася. Постáви я́ в век и в век вéка, повелéнiе положѝ, и не ми́мо и҆́дет. Хвали́те Гóспода от землѝ, змíеве и вся бéздны: огнь, град, снег, гóлоть, дух бýрен, творя́щая слóво Егò, гóры и вси хóлми, древà плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiѝ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогò Еди́наго, исповéданiе Егò на землѝ и на небесѝ. И вознесéт рог людéй Свои́х, песнь всем преподóбным Егò, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егò в цéркви преподóбных. Да возвеселится Iзрáиль о сотвóршем Егò, и сы́нове Сióни возрáдуются о Царè своéм. Да восхвáлят и҆́мя Егò в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечѝ обою́ду острѝ в рукáх их: сотвори́ти отмщéнiе во языцех, обличéнiя в лю́дех, связáти царѝ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егò.
Стiхúры воскрéсные, глас 6: Крест Твой, Гóсподи,/ жизнь и воскресéнiе лю́дем Твои́м есть,/ и надéющеся нань,// Тебè воскрéсшаго Бóга нáшего поéм: поми́луй нас.
Хвалúте Бóга во святых Егò,/ хвалúте Егò в утвержéнiи сúлы Егò.
Стiхúра: Погребéнiе Твоè, Влады́ко,/ рай отвéрзе рóду человéческому:/ и от истлéнiя избáвльшеся,// Тебé воскрéсшаго Бóга нáшего поéм: поми́луй нас.
На 6: Хвалúте Егò на сúлах Егò, хвалúте Егò по мнóжеству велúчествiя Егò.
Стiхúра: Со Отцéм и Дýхом Хрїстá воспои́м,/ воскрéсшаго из мéртвых,/ и к Немý вопiи́м:// Ты Живóт есѝ наш и Воскресéнiе, поми́луй нас.
Хвалúте Егò во глáсе трýбнем, хвалúте Егò во псалтúри и гýслех.
Стiхúра: Триднéвен воскрéсл есѝ, Хрїстè, от грóба/ я́коже есть пи́сано,/ совоздви́гнувый прáотца нáшего./ Тéмже Тя и слáвит род человéческiй,// и воспевáет Твоé воскресéнiе.
На 4. Хвалúте Егò в тимпáне и лúце, хвалúте Егò во стрýнах и оргáне.
Стiхúры св. отцéв, глас 6: Все собрáвше душéвное худóжество,/ и Божéственным Дýхом сразсмотри́вше,/ небéсный и честны́й Симвóл вéры,/ честнíи отцы́ богопи́санне начертáша:/ в нéмже я́вственнейше Рóждшему собезначáльнаго Слóва научáют,/ и всеи́стинно единосýщнаго,/ апóстольским послéдующе проявлéнно учéнiем,/ благослáвнiи и пребогáтiи и́стинно,// и богомýдрiи.
Хвалúте Егò в кимвáлех доброглáсных, хвалúте Егò в кимвáлех восклицáнiя. Всякое дыхáнiе да хвáлит Гóспода.
Стiхúра: Все прiéмше ýмное сiя́нiе Святáго Дýха,/ преестéственнейшее благослóвiе,/ крáткими глагóлы, и мнóгим рáзумом/ богодухновéнно провещáша:/ я́ко Хрiстóвы проповéдницы,/ евáнгельских предстáтелiе учéнiй блажéннiи,/ и благочести́вых предáнiй,/ свы́ше прiéмше сих откровéнiе я́ве, и просвéщшеся,// изложи́ша вéру богонаучéнную.
На 2. Благословéн есù, Гóсподи Бóже отéц нáших,/ и хвáльно и прослáвлено И҆́мя Твоè во вéки.(Дан.3:26)
Стiхúра: Все собрáвше пáстырское искýсство,/ и я́рость подви́гше ны́не прáведнейшую,/ отмсти́тельне тя́жкiя отгнáша и пáгубныя вóлки,/ прáщею Дýха извéргше от церкóвнаго исполнéнiя,/ пáдшiя я́ко к смéрти, и я́ко неисцéльно недýговавшiя/ божéственнiи пáстырiе,/ и я́ко раби́ и́стиннейшiи Хрiстóвы,// и божéственнаго проповéданiя таи́нницы свящéннейшiи.
Собери́те Емý преподóбныя Егò, завещáющiя завéт Егò о жéртвах. (Пс.49:5)
Стiхúра: Все собрáвше душéвное худóжество,/ и Божéственным Дýхом сразсмотри́вше,/ небéсный и честны́й Симвóл вéры,/ честнíи отцы́ богопи́санне начертáша:/ в нéмже я́вственнейше Рóждшему собезначáльнаго Слóва научáют,/ и всеи́стинно единосýщнаго,/ апóстольским послéдующе проявлéнно учéнiем,/ благослáвнiи и пребогáтiи и́стинно,// и богомýдрiи.
Слáва Отцý и Сы́ну и Святóму Дýху.
Стiхúра св. отцéв, глас 8: Святы́х отцéв лик,/ от конéц вселéнныя стéкшiйся,/ Отцá и Сы́на и Дýха Святáго,/ еди́но Существó научи́ша и Естествó,/ и тáйну богослóвiя я́сно предáша Цéркви:/ и́хже похваля́юще вéрою ублажи́м, глагóлюще:/ о божéственный пóлче,/ богоглагóливiи орýжницы ополчéнiя Госпóдня,/ звéзды многосвéтлыя мы́сленныя твéрди,/ тáинственнаго Сióна необори́мiи столпи́,/ миродохновéннiи цвéти рáйстiи,/ всезлатáя устá Слóва,/ Нiкéйская похвалó, вселéнныя украшéнiе,// прилéжно моли́теся о душáх нáших.
И ны́не и прúсно и во вéки векóв. Амúнь.
Глас 2: Преблагословéнна есѝ, Богорóдице Дéво,/ Воплóщшим бо ся из Тебè ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебè.
Вóзглас: Слáва Тебè, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстè, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцà, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцà, ами́нь.
На всяк день благословлю́ Тя и восхвалю́ и҆́мя Твоè во вéки, и в век вéка.
Сподóби, Гóсподи, в день сей без грехà сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоè во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был есѝ нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебè. Гóсподи, к Тебè прибегóх, научѝ мя твори́ти вóлю Твою́, яко Ты есѝ Бог мой, яко у Тебè истóчник животà, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, помúлуй нас. (3 рáза)
Хор: Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Хор: Святы́й Безсмéртный, помúлуй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помúлуй нас.
Тропáрь воскрéсный, глас 2: Воскрéс из грóба и ýзы растерзáл еси áда,/ разруши́л еси осуждéнiе смéрти, Гóсподи,/ вся от сетéй врагá избáвивый;/ яви́вый же Себè апóстолом Твоим,/ послáл еси я на прóповедь,/ и тéми мир Твой пóдал еси вселéнней,// Еди́не Многоми́лостиве.
Гóсподи поми́луй (40 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи поми́луй (12 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
ОТПУСТ
Воскресы́й из мéртвых, Хрїстè, и҆́стинный Бог наш, моли́твами пречи́стыя Своея́ Мáтере, святы́х слáвных и всехвáльных Апóстол, святых и прáведных богоотéц Iоакíма и Áнны, и всех святых, поми́луй и спасѝ нас, яко Благ и Человеколю́бец. Ами́нь.
МНОГОЛЕТИЕ
Слáва Отцý и Сы́ну и Святóму Дýху, и ны́не и прúсно и во вéки векóв. Амúнь.
Стiхúра евáнгельская деся́тая, глас 6: По éже во ад сошéствiи,/ и éже из мéртвых воскресéнiи,/ скорбя́ще я́коже достóяше,/ о разлучéнiи Твоéм, Хрiстé,/ ученицы́ на дéланiе обрати́шася,/ и пáки корабли́ и мрéжи, и лóва нигдéже./ Но Ты, Спáсе, яви́вся я́ко Влады́ка всех,/ одеснýю мрéжи повелева́еши воврещи́,/ и бысть слóво дéло вскóре,/ и мнóжество рыб мнóгое,/ и вéчеря стрáнная готóва на земли́:/ ея́же причасти́вшимся тогдá Твои́м ученикóм,/ и нас ны́не мы́сленно сподóби наслади́тися,// человеколю́бче Гóсподи.
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моè. Вонмѝ глáсу молéнiя моегò, Царю́ мой и Бóже мой, яко к Тебè помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебè лукáвнуяй, нижè пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебè лю́бящiи имя Твоè. Яко Ты благослови́ши прáведника, Гóсподи: яко орýжiем благоволéнiя венчáл есѝ нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты есѝ. Не отвратѝ человéка во смирéнiе, и рекл есѝ: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травà мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л есѝ беззакóнiя нáша пред Тобóю: век наш в просвещéнiе лицà Твоегò. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегò, и от стрáха Твоегò, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы̀ Твоя́. Испóлнихомся заýтра ми́лости Твоея́, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны есѝ, лéта в ня́же ви́дехом злáя. И при́зри на рабы̀ Твоя́, и на делà Твоя́, и настáви сы́ны их. И бýди свéтлость Гóспода Бóга нáшего на нас, и делà рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебè, Гóсподи. Пою́ и разумéю в путѝ непорóчне, когдà прiи́деши ко мне? Прехождáх в незлóбiи сéрдца моегò посредè дóму моегò. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпè мне сéрдце стропти́во, уклоня́ющагося от менè лукáваго не познáх. Оклеветáющаго тай и҆́скренняго своегò, сегò изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредè дóму моегò творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Тропáрь воскрéсный, глас 6: Áнгельскiя Си́лы на грóбе Твоéм, и стрегýщiи омертвéша; и стоя́ше Марíя во грóбе, и҆́щущи Пречи́стаго Тéла Твоегò. Плени́л есѝ ад, не искуси́вся от негò; срéтил есѝ Дéву, дáруяй живóт. Воскресы́й из мéртвых, Гóсподи, слáва Тебè.
Слáва Отцý и Сы́ну и Святóму Дýху.
Тропáрь Вознесéнiя, глас 4: Вознéслся есѝ во слáве, Хрїстè Бóже наш, рáдость сотвори́вый ученикóм, обетовáнiем Святáго Дýха, извещéнным им бы́вшим благословéнiем, я́ко Ты есѝ Сын Бóжiй, Избáвитель мíра.
И ны́не и прúсно и во вéки векóв. Амúнь.
Богорóдичен 1‑го часá: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблà есѝ цвет нетлéнiя. Дéву, я́ко пребылà есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогò молѝ спасти́ся душáм нáшым.
Стопы̀ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы̀ человéческiя, и сохраню́ зáповеди Твоя́. Лицè Твоè просветѝ на рабà Твоегò и научѝ мя оправдáнiем Твои́м.
Да испóлнятся устà моя хвалéнiя Твоегò, Гóсподи, я́ко да воспою́ слáву Твою́, весь день великолéпiе Твоè.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
КОНДАК
Кондáк Вознесéнiя, глас 6: Éже о нас испóлнив смотрéнiе, и я́же на землѝ соедини́в Небéсным, вознéслся есѝ во слáве, Хрїстè Бóже наш, никáкоже отлучáяся, но пребывáя неотстýпный, и вопiя́ лю́бящым Тя: Аз есмь с вáми, и никтóже на вы.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстè Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýшы нáша освятѝ, телесà очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицà Твоегò, да в нем ýзрим Свет Непристýпный: и испрáви стопы̀ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк Вознесéнiя, глас 6: Éже о нас испóлнив смотрéнiе,/ и я́же на землù соедини́в Небéсным,/ вознéслся есù во слáве, Хрїстè Бóже наш,/ никáкоже отлучáяся,/ но пребывáя неотстýпный,/ и вопiя́ лю́бящым Тя:// Аз есмь с вáми, и никтóже на вы.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 рáза)
Гóсподи, благословᴎ́.
Гóсподи, Iисýсе Хрїстè, Сыне Бóжій, моли́твами Пречи́стыя Своея́ Мáтере, преподóбных и Богонóсных отéц нáших и всех святы́х, поми́лует и спасéт нас, яко Благ и Человеколю́бец. Ами́нь.
Хор: Гóсподи, помúлуй. (3 рáза)
И глаголи часы и обéдницу