(И далее хор продолжает чередовать стiхи 134 псалма и Аллилуиа)
[Псалом 134 Аллилуиа]стоя́щiи во хрáме Госпóдни, во двóрех дóму Бóга нáшего./ Хвали́те Гóспода, я́ко Благ Госпóдь, пóйте и҆́мени Егò, я́ко добрò:/ я́ко Iáкова избрà Себè Госпóдь, Iзрáиля в достоя́нiе Себè./ Я́ко аз познáх, я́ко Вéлiй Госпóдь, и Госпóдь наш над всéми бóги./ Вся ели́ка восхотè Госпóдь, сотворѝ на небесѝ и на землѝ, в моря́х и во всех бéзднах./ Возводя́ óблаки от послéдних землѝ, мóлнiи в дождь сотворѝ, изводя́й вéтры от сокрóвищ Свои́х./ И҆́же поразѝ пéрвенцы Еги́петскiя, от человéка до скотà./ Послà знáменiя и чудесà посредè Тебè, Еги́пте, на фараóна и на вся рабы̀ eгò./ И҆́же поразѝ язы́ки мнóги и избѝ царѝ крéпки:/ Сиóна, царя Аморрéйска, и Óга, царя́ Васáнска, и вся цáрствiя Ханаáнска,/ и дадè зéмлю их достоя́нiе, достоя́нiе Iзрáилю, лю́дем Свои́м./ Гóсподи, и҆́мя Твоè в век и пáмять Твоя́ в род и род:/ я́ко суди́ти и҆́мать Госпóдь лю́дем Свои́м, и о рабéх Свои́х умóлится./ Íдоли язы́к, сребрò и злáто, делá рук человéческих/ Устà и҆́мут, и не возлагóлют, óчи и҆́мут, и не ýзрят,/ ýши и҆́мут, и не услы́шат, нижè бо есть дух во устéх их./ Подóбни им да бýдут творя́щiи я́, и вси надéющiися на ня./ Дóме Iзрáилев, благослови́те Гóспода, дóме Аарóнь, благослови́те Гóспода, дóме Левíин, благослови́те Гóспода./ Боя́щiися Гóспода, благослови́те Гóспода.
Благословéн Госпóдь от Сióна, живы́й во Iерусали́ме.
Аллилýїа (трúжды)
Исповéдайтеся Гóсподеви, я́ко Благ, я́ко в век ми́лость Егò.
Аллилýїа (трúжды)
(И далее хор продолжает чередовать стiхи 135 псалма и Аллилуиа)
[Псалом 135 Аллилуиа]Исповéдайтеся Бóгу богóв, я́ко в век ми́лость Егò./ Исповéдайтеся Гóсподеви господéй, я́ко в век ми́лость Егò./ Сотвóршему чудесà вéлiя еди́ному, я́ко в век ми́лость Егò./ Сотвóршему небесà рáзумом, я́ко в век ми́лость Егò./ Утверди́вшему зéмлю на водáх, я́ко в век ми́лость Егò./ Сотвóршему свети́ла вéлiя еди́ному, я́ко в век ми́лость Егò./ Сóлнце во óбласть дне, я́ко в век ми́лость Егò./ Лунý и звéзды во óбласть нóщи, я́ко в век ми́лость Егò./ Порази́вшему Еги́пта с пéрвенцы eгò, я́ко в век ми́лость Егò,/ и извéдшему Iзрáиля от среды̀ их, я́ко в век ми́лость Егò./ Рукóю крéпкою и мы́шцею высóкою, я́ко в век ми́лость Егò./ Раздéльшему Чермнóе мóре в разделéнiя, я́ко в век ми́лость Егò./ И провéдшему Iзрáиля посредè eгò, я́ко в век ми́лость Егò./ И истря́сшему фараóна и си́лу eгò в мóре Чермнóе, я́ко в век ми́лость Егò./ Провéдшему лю́ди Своя́ в пусты́ни, я́ко в век ми́лость Егò./ Порази́вшему царѝ вéлiя, я́ко в век ми́лость Егò,/ и уби́вшему царѝ крéпкiя, я́ко в век ми́лость Егò:/ Сиóна, царя́ Аморрéйска, я́ко в век ми́лость Егò,/ и Óга, царя́ Васáнска, я́ко в век ми́лость Егò./ И дáвшему зéмлю их достоя́нiе, я́ко в век ми́лость Егò./ Достоя́нiе Iзрáилю, рабý Своемý, я́ко в век ми́лость Егò./ Я́ко во смирéнiи нáшем помянý ны Госпóдь, я́ко в век ми́лость Егò./ И избáвил ны есть от врагóв нáших, я́ко в век ми́лость Егò./ Дая́й пи́щу вся́кой плóти, я́ко в век ми́лость Егò.
Исповéдайтеся Бóгу Небéсному, я́ко в век ми́лость Егò.
Áнгельскiй собóр удиви́ся,/ зря Тебè в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Зелó рáно мvронóсицы течáху/ ко грóбу Твоемý рыдáющiя,/ но предстà к ним Áнгел и речè:/ рыдáнiя врéмя престà, не плáчите,/ воскресéнiе же апóстолом рцы́те.
Мvронóсицы жены̀ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речè, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егò Сы́нови, и Святóму Дýху,/ Святéй Трóице во еди́ном существè,/ с Серафíмы зовýще:/ Свят, Свят, Свят есѝ, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехà, Дéво, Адáма избáвила есѝ,/ рáдость же Éве/ в печáли мéсто подалà есѝ,/ пáдшiя же от жи́зни/ к сей напрáви/ из Тебè воплоти́выйся Бог и Человéк.
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 2: По стрáсти шéдша во гроб жены̀,/ во éже помáзати тéло Твоè, Хрїстè Бóже,/ ви́деша áнгелы во грóбе, и ужасóшася:/ глас бо слы́шаху от них, яко воскрéсе Госпóдь,// дáруя мíрови вéлiю ми́лость.
СТЕПЕННА, ГЛАС 2
1 АНТИФОН
Хор: На нéбо óчи пущáю моегò сéрдца, к Тебè, Спасè,// спасù мя Твоúм осiя́нiем. (Двáжды)
Поми́луй нас согрешáющих Тебè мнóго,/ на вся́кiй час, о Хрїстè мой,// и даждь óбраз прéжде концà покáятися Тебè. (Двáжды)
Слáва Ѻтцý и Сы́ну и Святóму Дýху.
Святóму Дýху, Éже цáрствовати подобáет,/ освящáти, подвизáти тварь:// Бог бо есть, Единосýщен Ѻтцý и Слóву.
И ны́не и прúсно и во вéки векóв. Амúнь.
Святóму Дýху, Éже цáрствовати подобáет,/ освящáти, подвизáти тварь:// Бог бо есть, Единосýщен Ѻтцý и Слóву.
2 АНТИФОН
Áще не Госпóдь бы был в нас,/ кто довóлен цел сохранéн бы́ти от врагà,// кýпно и человекоубíйцы? (Двáжды)
Зубóм их не предáждь, Спáсе, Твоегò рабà:// и҆́бо львóвым óбразом на мя подвизáются вразѝ мои. (Двáжды)
Слáва Ѻтцý и Сы́ну и Святóму Дýху.
Святóму Дýху живоначáлiе и честь:/ вся бо создáнная,/ я́ко Бог сый си́лою,// соблюдáет во Ѻтцè, Сы́ном же.
И ны́не и прúсно и во вéки векóв. Амúнь.
Святóму Дýху живоначáлiе и честь:/ вся бо создáнная,/ я́ко Бог сый си́лою,// соблюдáет во Ѻтцè, Сы́ном же.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егò, хвали́те Егò во утвержéнiи си́лы Егò.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Мáрка Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Мк.зач.71): Во врéмя óно воскрéс Iисýс заýтра, в пéрвую суббóту, яви́ся прéжде Марíи Магдали́ни, из нея́же изгнá седмь бесóв. Онá же шéдши возвестѝ с Ним бы́вшим, плáчущимся и рыдáющим. И онѝ слы́шавше, яко жив есть, и ви́ден бысть от нея́, не я́ша вéры. По сих же двемá от них грядýщема яви́ся инéм óбразом, идýщема на селó. И та шéдша возвести́ста прóчим: и ни тéма вéры я́ша. Последѝ же возлежáщим им единомунáдесяте яви́ся, и поносѝ невéрствiю их и жестосéрдiю, яко ви́девшим Егó востáвша не я́ша вéры. И речè им: шéдше в мiр весь, проповéдите Евáнгелiе всей твáри. И҆́же вéру имéт и крести́тся, спасéн бýдет, а и҆́же не имéт вéры, осуждéн бýдет. Знáменiя же вéровавшим сiя́ послéдуют: и҆́менем Мои́м бéсы ижденýт; язы́ки возглагóлют нóвы; змiя́ возмýт; áще и что смéртно испiю́т, не вреди́т их; на недýжныя рýки возложáт, и здрáви бýдут. Госпóдь же ýбо, по глагóланiи Егó к ним, вознесéся на нéбо, и сéде одеснýю Бóга. Онѝ же изшéдше проповéдаша всю́ду, Гóсподу поспéшствующу и слóво утвержáющу послéдствующими знáменьми. Ами́нь.
[Синодальный перевод]В то время воскреснув рано в первый день недели, Иисус явился сперва Марии Магдалине, из которой изгнал семь бесов. Она пошла и возвестила бывшим с Ним, плачущим и рыдающим; но они, услышав, что Он жив и она видела Его,- не поверили. После сего явился в ином образе двум из них на дороге, когда они шли в селение. И те, возвратившись, возвестили прочим; но и им не поверили. Наконец, явился самим одиннадцати, возлежавшим на вечери, и упрекал их за неверие и жестокосердие, что видевшим Его воскресшего не поверили. И сказал им: идите по всему миру и проповедуйте Евангелие всей твари. Кто будет веровать и креститься, спасен будет; а кто не будет веровать, осужден будет. Уверовавших же будут сопровождать сии знамения: именем Моим будут изгонять бесов; будут говорить новыми языками; будут брать змей; и если что́ смертоносное выпьют, не повредит им; возложат руки на больных, и они будут здоровы. И так Господь, после беседования с ними, вознесся на небо и воссел одесную Бога. А они пошли и проповедовали везде, при Господнем содействии и подкреплении слова последующими знамениями. Аминь.(Мк.16:9-20)
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстè, и святóе Воскресéнiе Твоè поéм и слáвим: Ты бо есѝ Бог наш, рáзве Тебè инóго не знáем, и҆́мя Твоè именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдà благословя́ще Гóспода, поéм Воскресéнiе Егò: распя́тiе бо претерпéв, смéртiю смерть разрушѝ. (3 раза)
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегò, и от грехà моегò очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдà суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелю́ся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицà Твоегò, и Дýха Твоегò Святáго не отымѝ от менè. Воздáждь ми рáдость спасéнiя Твоегò, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегò, возрáдуется язык мой прáвде Твоéй. Гóсподи, устнè мои отвéрзеши, и устà моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдà благоволи́ши жéртву прáвды, возношéнiе и всесожегáемая; тогдà возложáт на олтáрь Твой тельцы̀.
Тáже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè.(Пс.50:3)
Стiхúра, глас 6: Воскрéс Iисýс от грóба,/ я́коже проречè,/ дадè нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ПАСХИ, ГЛАС 1
(Канóн Пáсхи с Богорóдичнами, совмещéнный с канóном Трióди, жен-миронóсиц, глас 2)
ПЕСНЬ 1
Iрмóс: Воскресéнiя день,/ просветúмся, лю́дiе./ Пáсха, Госпóдня Пáсха:/ от смéрти бо к жúзни,/ и от землù к небесù,/ Хрїстóс Бог нас преведè,// побéдную пою́щiя.(2 раза)
Хор.Припéв: Хрїстóс воскрéсе из мéртвых.
Тропáрь: Очи́стим чýвствiя, и ýзрим/ непристýпным свéтом/ Воскресéнiя, Хрїстà/ блистáющася,/ и рáдуйтеся, рекýща,/ я́сно да услы́шим,// побéдную пою́ще.
Хор: Хрїстóс воскрéсе из мéртвых.
Чтец: Небесà ýбо достóйно да веселя́тся,/ земля́ же да рáдуется,/ да прáзднует же мiр,/ ви́димый же весь и неви́димый:/ Хрїстóс бо востà,// весéлiе вéчное.
Ин канон Богородичен, глас 1
Хор: Пресвятáя Богорóдице, спасù нас.
Богорóдичен: Умерщвлéнiя предéл сломи́ла еси,/ вéчную жизнь рóждшая Хрїстá,/ из грóба возсiя́вшаго днесь,/ Дéво Всенепорóчная,// и мiр просвети́вшаго.
Хор: Пресвятáя Богорóдице, спасù нас.
Богорóдичен: Воскрéсшаго ви́девши Сына Твоегó и Бóга,/ рáдуйся со апóстолы Богоблагодáтная Чи́стая:/ и éже рáдуйся пéрвее,/ яко всех рáдости винá, воспрiя́ла еси,// Богомáти Всенепорóчная.
Канон цветной Триоди, жен-мироносиц, глас 2
Хор: Слáва Тебè, Бóже наш, слáва Тебè.
Чтец: Распя́лся еси плóтiю, безстрáстный естествóм Ѻ́тчим:/ прободéн был еси в рéбра, источивый ми́рови кровь и вóду:// Ты Бог наш, и прославля́ем Тя.
Хор: Слáва Тебè, Бóже наш, слáва Тебè.
Чтец: Крест Твой почитаю, и погребéнiе слáвлю Блáже,/ и пою́, и покланя́юся востáнiю Твоемý, и взывáю:// Ты Бог наш, и прославля́ем Тя.
Хор: Слáва Тебè, Бóже наш, слáва Тебè.
Чтец: Áще и вкуси́л еси жéлчи, слáдосте церкóвная,/ но источи́л еси́ нам нетлéнiе от ребр Твои́х:// Ты Бог наш, и прославля́ем Тя.
Хор: Слáва Тебè, Бóже наш, слáва Тебè.
Чтец: Вмени́лся еси́, Спáсе, с мéртвыми, мéртвыя воздви́гнувый,/ вкуси́л еси тли:/ истлéнiя бо вся́ко не познáл еси:// Ты Бог наш, и прославля́ем Тя.
Хор: Слáва Тебè, Бóже наш, слáва Тебè.
Чтец: Да весели́тся Сióн, да рáдуется и нéбо,/ воскрéсе Хрїстóс, мéртвыя воздви́гнувый, песнослóвящiя:// Ты Бог наш, и прославля́ем Тя.
Хор: Слáва Тебè, Бóже наш, слáва Тебè.
Чтец: Предвари́вшiя ýтро жены́, ви́деша Хрїстá,/ и божéственным вопiя́ху ученикóм:/ вои́стинну Хрїстóс воскрéсе,// прiиди́те с нáми воспóйте Егó.
Слáва Ѻтцý и Сы́ну и Святóму Дýху.
Трóичен: Всесвятáя Трóице, еди́но Божествó, безначáльная Еди́нице,/ Ѻ́тче и Сыне и Божéственный Дýше, спасáй мир:// Ты Бог наш, и прославля́ем Тя.
И ны́не и прúсно и во вéки векóв. Амúнь.
Богорóдичен: Дрéвнюю кля́тву разреши́вши, Чи́стая, во утрóбе Твоéй/ возрасти́ла еси́ нам благословéнiе, Младéнца роди́вши:// Сей бо Бог, áще и плоть нóсит.
Катавáсiя Пáсхи: Воскресéнiя день,/ просветúмся, лю́дiе./ Пáсха, Госпóдня Пáсха:/ от смéрти бо к жúзни,/ и от землù к небесù,/ Хрїстóс Бог нас преведè,// побéдную пою́щiя.
ПЕСНЬ 3
Iрмóс: Прiидúте, пúво пiéм нóвое,/ не от кáмене неплóдна чудодéемое,/ но нетлéнiя истóчник/ из грóба одождúвша Хрїстà,// в Нéмже утверждáемся.(2 раза)
Хор: Хрїстóс воскрéсе из мéртвых.
Чтец: Ныне вся испóлнишася свéта,/ нéбо же и земля́, и преиспóдняя:/ да прáзднует ýбо вся тварь/ востáнiе Хрїстóво,// в нéмже утверждáется.
Хор: Хрїстóс воскрéсе из мéртвых.
Чтец: Вчерà спогребóхся Тебè Хрїстè,/ совостаю́ днесь/ воскрéсшу Тебè,/ сраспинáхся Тебè вчерà,// Сам мя спрослáви Спáсе во Цáрствiи Твоéм.
Хор: Пресвятáя Богорóдице, спасù нас.
Богорóдичен: На нетлéнную жизнь прихождý днесь/ блáгостiю рóждшагося из Тебé, Чи́стая,// и всем концéм свет облистáвшаго.
Хор: Пресвятáя Богорóдице, спасù нас.
Богорóдичен: Бóга, Егóже родилá еси́ плóтiю,/ из мéртвых, я́коже речé,/ востáвша ви́девши, Чи́стая, ликýй,// и Сегó я́ко Бóга Пречи́стая возвеличáй.
Глас 2
Хор: Слáва Тебè, Бóже наш, слáва Тебè.
Чтец: Длáни на Крестé простéрл еси́ Iисýсе,/ язы́ки вся от прéлести собрáв,// к познáнiю Твоемý созвáл еси́ Спáсе.
Чтец: Распéншуся Тебé, Хрiстé, помрачи́ся свет, земля́ потрясéся,// и из гробóв мéртвiи востáша мнóзи, стрáхом держáвы Твоея́.
Хор: Слáва Тебè, Бóже наш, слáва Тебè.
Чтец: Предстоя́щи Крестý Áгница Твоя́, Iисýсе, плáчем вопiя́ше:/ кáмо и́деши, Сы́не;// кáмо грядéши, Áгнче, за всех заклáвыйся?
Хор: Слáва Тебè, Бóже наш, слáва Тебè.
Чтец: Воскрéсшу Тебé, Хрiстé,/ сокруши́шася вереи́ и вратá áдова,// и смéртныя ýзы разруши́шася, áбiе стрáхом держáвы Твоея́.
Хор: Слáва Тебè, Бóже наш, слáва Тебè.
Чтец: Да рáдуется с нáми ученикóв двоенадеся́тица,/ с миронóсицами женáми и Ióсифом,// и со други́ми ученики́ и учени́цами Хрiстóвыми.
Слáва Ѻтцý и Сы́ну и Святóму Дýху.
Трóичен: Со Отцéм и Сы́ну и Дýху Прáвому,/ еди́ному Естествý покланя́юся и воспевáю,// Ли́цы разделя́я, и Существóм соединя́я.
И ны́не и прúсно и во вéки векóв. Амúнь.
Богорóдичен: Блажéнна еси́, Чи́стая, из кóрене Iессéова сýщая,// из негóже жезл и цвет Хрiстá, по плóти нас рáди возрасти́вшая.
Катавáсiя Пáсхи: Прiидúте, пúво пiéм нóвое,/ не от кáмене неплóдна чудодéемое,/ но нетлéнiя истóчник/ из грóба одождúвша Хрїстà,// в Нéмже утверждáемся.
Гóсподи, поми́луй. (3 рáза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Кондáк, глас 8: Áще и во гроб снизшéл есù, Безсмéртне,/ но áдову разрушúл есù сúлу,/ и воскрéсл есù, я́ко победúтель, Хрїстè Бóже,/ женáм миронóсицам вещáвый: рáдуйтеся,/ и Твоúм апóстолом мир дáруяй,// пáдшим подая́й воскресéнiе.
Íкос: Éже прéжде сóлнца Сóлнце зашéдшее иногдà во гроб,/ предвари́ша ко ýтру, и́щущыя я́ко дне миронóсицы дéвы,/ и другà ко друзéй вопiя́ху:/ о други́ни! Прiиди́те, воня́ми помáжем тéло живонóсное и погребéное,/ плоть воскреси́вшаго пáдшаго Адáма, лежáщую во грóбе./ И́дем, потщи́мся я́коже волсвѝ, и поклони́мся,/ и принесéм ми́ра я́ко дáры, не в пеленáх, но в плащани́це обви́тому,/ и плáчим, и возопiи́м: о Влады́ко, востáни,// пáдшим подая́й воскресéнiе.
Седáлен Трióди (жен-миронóсиц), глас 2: Ми́ра тéпле грóбу принóсят жены́, Спáсе,/ Áнгела свéтлостiю дýши веселя́ху,/ и Бóга Тя всех проповéдаху, и ученикóм вопiя́ху:// вои́стинну воскрéсе из грóба всех Жизнь.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
И҆́н седáлен Трióди (жен-миронóсиц), глас 2: Ученикóв Твои́х лик с миронóсицами женáми рáдуется соглáсно:/ óбщiй бо прáздник с ни́ми прáзднуют,/ в слáву и честь Твоегó Воскресéнiя./ И тéми вопiéм Ти, Человеколю́бче Гóсподи:// лю́дем Твои́м подáждь вéлiю ми́лость.
ПЕСНЬ 4
Iрмóс: На Божéственней стрáжи/ богоглагóливый Аввакýм/ да стáнет с нáми, и покáжет/ светонóсна Áнгела,/ я́сно глагóлюща:/ днесь спасéнiе мíру,/ я́ко воскрéсе Хрїстóс,// я́ко всесúлен.(2 раза)
Чтец: Я́ко единолéтный áгнец,/ благословéнный нам венéц Хрїстóс,/ вóлею за всех заклáн бысть,/ Пáсха чисти́тельная,/ и пáки из грóба крáсное// прáвды нам возсiя́ Сóлнце.
Хор: Пресвятáя Богорóдице, спасù нас.
Богорóдичен: Создáвый Адáма, Твоегó прáотца, Чи́стая,/ зи́ждется от Тебé,/ и смéртное жили́ще разори́ Своéю смéртiю днесь,/ и озари́ вся// божéственными блистáньми воскресéнiя.
Хор: Пресвятáя Богорóдице, спасù нас.
Богорóдичен: Егóже родилá еси́ Хрiстá,/ прекрáсно из мéртвых возсiя́вша, Чи́стая, зря́щи,/ дóбрая и непорóчная в женáх и крáсная,/ днесь во спасéнiе всех,// со апóстолы рáдующися, Тогó прославля́й.
Глас 2
Хор: Слáва Тебè, Бóже наш, слáва Тебè.
Чтец: Крестóм плени́л еси́ áдово чрéво,/ и совоздви́гл еси́ мéртвыя,/ и смéрти разруши́л еси́ мучи́тельство:/ тéмже и́же от Адáма покланя́ющiися,// поéм погребéнiе Твоé и востáнiе Хрiстé.
Хор: Слáва Тебè, Бóже наш, слáва Тебè.
Чтец: Благоволи́вый, Спáсе наш,/ за благоутрóбiе ми́лости пригвозди́тися на Крестé,/ и от прáотчiя избáвити ны кля́твы,/ разреши́ ýзы мнóгих мои́х согрешéнiй:// мóжеши бо, ели́ка хóщеши, твори́ти.
Хор: Слáва Тебè, Бóже наш, слáва Тебè.
Чтец: На Крестé пригвозди́вый мою́ дрéвнюю кля́тву,/ и источи́вый мне, Спáсе, благословéнiе крóвiю от ребр Твои́х,/ разреши́ ýзы мнóгих мои́х согрешéнiй:// мóжеши бо, ели́ка хóщеши, твори́ти.
Хор: Слáва Тебè, Бóже наш, слáва Тебè.
Чтец: Ад Спáсе, срет Тя в преиспóдних, огорчи́ся/ помышля́я, я́ко я́же дрéвле пожрéти возмогíй,/ ны́не невóлею отдáв, истязýется в дóльних,// и пленя́емь и обнажáемь бывáет мéртвых.
Хор: Слáва Тебè, Бóже наш, слáва Тебè.
Чтец: Вои́стинну постыди́теся беззакóннiи,/ Хрiстóс бо воскрéсе, и совоздви́же мéртвыя, зовы́й:/ дерзáйте, аз победи́х мiр./ Вéруйте ýбо Емý, или́ умолчи́те лестцы́,// отметáющiися Воскресéнiя Егó.
Хор: Слáва Тебè, Бóже наш, слáва Тебè.
Чтец: Ióсифа благообрáзнаго,/ ревни́теля благочéстiя, совéтника и ученикá,/ с миронóсицами почти́м, и апóстолами, зовýще с ни́ми,// и вéрно воспевáюще Спáсово Воскресéнiе свéтло.
Слáва Ѻтцý и Сы́ну и Святóму Дýху.
Трóичен: Пресýщнаго Божествá нераздéльную слáву, кто возмóжет изрещи́?/ Еди́но бо Естествóм сýщи Трóица поéтся безначáльная,/ срáсленная я́ко Еди́ница,// в Трóице певáемая Ипостáсьми просты́ми.
Катавáсiя Пáсхи: У́тренюем ýтреннюю глубокý,/ и вмéсто мúра песнь принесéм Влады́це,/ и Хрїстà ýзрим/ прáвды Сóлнце,// всем жизнь возсiя́юща.
ПЕСНЬ 6
Iрмóс: Снизшéл есù в преиспóдняя землù,/ и сокрушúл есù вереù вéчныя,/ содержáщiя свя́занныя, Хрїстè,/ и триднéвен, я́ко от кúта Ióна,// воскрéсл есù от грóба.(2 раза)
Хор: Хрїстóс воскрéсе из мéртвых.
Чтец: Сохрани́в цéла знáменiя Хрїстè,/ воскрéсл есѝ от грóба,/ ключѝ Дéвы не вреди́вый в рождествè Твоéм,// и отвéрзл есѝ нам рáйскiя двéри.
Хор: Хрїстóс воскрéсе из мéртвых.
Чтец: Спáсе мой,/ живóе же и нежéртвенное заколéнiе,/ я́ко Бог Сам Себè/ вóлею привéд Отцý,/ совоскреси́л есѝ всерóднаго Адáма,// воскрéс от грóба.
Хор: Пресвятáя Богорóдице, спасù нас.
Богорóдичен: Возведéся дрéвле держи́мое смéртiю и тлéнiем,/ воплоти́вшимся от Твоегó пречи́стаго чрéва,/ к нетлéнней и присносу́щней жи́зни,// Богорóдице Дéво.
Хор: Пресвятáя Богорóдице, спасù нас.
Богорóдичен: Сни́де в преиспóдняя земли́,/ в ложеснá Твоя́, Чи́стая, сшéдый,/ и всели́выйся и воплоти́выйся пáче умá,/ и воздви́же с Собóю Адáма,// воскрéс от грóба.
Глас 2
Хор: Слáва Тебè, Бóже наш, слáва Тебè.
Чтец: Мертв есть ад, дерзáйте земнорóднiи,/ Хрiстóс бо на Дрéве ви́сяй,/ вéрже орýжiе нань, и лежи́т мертв:// я́же бо имя́ше, плени́ся обнажи́вся.
Хор: Слáва Тебè, Бóже наш, слáва Тебè.
Чтец: Плени́ся ад, дерзáйте мéртвiи, и грóби отверзóшася,/ востáните от áда, вопiéт вам Хрiстóс,// вся пришéдый избáвити от смéрти и тли.
Хор: Слáва Тебè, Бóже наш, слáва Тебè.
Чтец: Мéртвыя я́коже возмóг пожéрл еси́ иногдá, ны́не истязýемь/ áде, отдáждь Ми, вопiéт тебé Жизнодáвец и Бог,// вся пришéдый избáвити от несы́таго твоегó чрéва.
Хор: Слáва Тебè, Бóже наш, слáва Тебè.
Чтец: Жены́ миронóсицы, что тщитéся прóчее;/ что же живóму ми́ра принóсите,/ воскрéсе Хрiстóс, я́коже предречé.// Да престáнут вáша слéзы, прешéдшiя на рáдость.
Хор: Слáва Тебè, Бóже наш, слáва Тебè.
Чтец: Плащани́цею Тя, Хрiстé, обви́в Ióсиф благообрáзный, во грóбе положи́:/ миропомáзав же разорéнный Твоегó телесé храм,// привали́ кáмень вели́кiй ко грóбу.
Хор: Слáва Тебè, Бóже наш, слáва Тебè.
Чтец: Госпóдь воскрéсе плени́вый врагá,/ и ýзники истóргнув, возведé вся,/ и первоздáннаго Адáма, тогó возставля́я,// я́ко Благоутрóбен и Человеколю́бец Бог.
Слáва Ѻтцý и Сы́ну и Святóму Дýху.
Трóичен: Трóицу во Еди́нстве воспои́м вéрнiи,/ с Сы́ном Отцá слáвяще, и Дýха единосýщна Сы́ну, и сýща во Отцé// собезначáльнаго и присносýщнаго Бóга.
И ны́не и прúсно и во вéки векóв. Амúнь.
Богорóдичен: Во чрéве невоздéланно зачалá еси́, Чи́стая, нетлéнiя грозд, я́ко лозá:/ из нея́же безсмéртiя тóки,// я́коже винó нам источáют вéчную жизнь.
Катавáсiя Пáсхи: Снизшéл есù в преиспóдняя землù,/ и сокрушúл есù вереù вéчныя,/ содержáщiя свя́занныя, Хрїстè,/ и триднéвен, я́ко от кúта Ióна,// воскрéсл есù от грóба.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Íкос: На гроб Твой, Спáсе, миронóсицы идýщiя,/ к себé недоумевáхуся умóм, и вещáху:/ кто нам кáмень отвали́т грóбный?/ И воззрéвша ви́дят, я́ко кáмень отвалéн бе,/ зрáку же áнгелову со одея́нiем дивля́хуся:/ содержи́ми же бя́ху трéпетом, и бежáти помышля́ху./ И к ним ю́ноша возопѝ:/ не бóйтеся вы, Егóже и́щете, востá,/ прiиди́те, ви́дите мéсто, идéже лежáше тéло Iисýсово,/ и скóро шéдшiя возвести́те ученикóм:// Спас воскрéсе от грóба.
ПЕСНЬ 7
Iрмóс: Óтроки от пéщи избáвивый,/ быв Человéк,/ стрáждет я́ко смéртен,/ и стрáстiю смéртное,/ в нетлéнiя облачúт благолéпiе,/ Едúн благословéн// отцéв Бог, и препрослáвлен.(2 раза)
Хор: Хрїстóс воскрéсе из мéртвых.
Чтец: Жены̀ с ми́ры богомýдрыя в след Тебè течáху:/ Егóже, я́ко мéртва, со слезáми искáху,/ поклони́шася рáдующыяся Живóму Бóгу,/ и Пáсху тáйную// Твои́м, Хрїстè, ученикóм благовести́ша.
Хор: Хрїстóс воскрéсе из мéртвых.
Чтец: Смéрти прáзднуем умерщвлéнiе,/ áдово разрушéнiе,/ инóго житiя́ вéчнаго начáло,/ и игрáюще поéм Винóвнаго,/ Еди́наго благословéннаго// отцéв Бóга, и препрослáвленнаго.
Хор: Пресвятáя Богорóдице, спасù нас.
Богорóдичен: Умертви́в Сын Твой смерть, Всенепорóчная, днесь,/ всем смéртным пребывáющiй живóт/ во вéки векóв даровá,/ еди́н благословéнный// отцéв Бог и препрослáвленный.
Хор: Пресвятáя Богорóдице, спасù нас.
Богорóдичен: Всем цáрствуяй создáнiем, быв человéк,/ всели́ся в Твою́, Богоблагодáтная, утрóбу,/ и распя́тiе претерпéв и смерть,/ воскрéсе боголéпно,// совозстáвив нас я́ко всеси́лен.
Глас 2
Хор: Слáва Тебé, Бóже наш, слáва Тебé.
Чтец: Ты, я́ко Человеколю́бец, хотя́й вся спасти́ от прéлести, я́же создáл еси́,/ претерпéл еси́ пригвозди́тися на Крестé:/ да погребéнный óбраз страстьми́, сей плóтiю Твоéю обнови́ши, Спáсе,// и ад низложи́в, воскреси́л еси́ и умéршiя с Собóю.
Хор: Слáва Тебé, Бóже наш, слáва Тебé.
Чтец: На Крестé возвышáемь, вся призвáл еси́/ к Себé Щéдре, я́коже обещáл еси́ Блáже:/ я́ко вои́стинну вся сiя́ грехóв рáди нáших пострадáти благоволи́л еси́.// Тéмже и разбóйнику рáйская вратá отвéрзл еси́, Спáсе.
Хор: Слáва Тебé, Бóже наш, слáва Тебé.
Чтец: Ты храм телéсный воздви́гл есѝ разорéнный,/ триднéвно из грóба, я́коже обещáл есѝ Блáже:/ да вои́стинну скáжеши слáву Твою́,/ ю́же нам источáеши вéрою,// ýзы разреши́в, и́хже держáше дрéвле ад свя́занных.
Хор: Слáва Тебé, Бóже наш, слáва Тебé.
Чтец: О iудéйское безýмiе! О неи́стовство беззакóнных!/ Что невéрное ви́девше, не вéровасте Хрiстý;/ я́ко немощны́я, не слóвом ли воздви́же?/ Или я́ко весь мiр Той не спасé ли,// да уверя́ют вас понé вóини, или́ воскрéсшiе из мéртвых.
Хор: Слáва Тебé, Бóже наш, слáва Тебé.
Чтец: Омертвéвшии стрáжiе ны́не да глагóлют,/ кáко укрáден бысть, Егóже не ви́деша неразýмнiи всегдá?/ Áще бо воскрéсша не ви́деша, ни ощути́ша,/ кáко укрáдена Сегó разумéти можáху когдá?// Да увéрит вы понé кáмень сей, и погребáльная Хрiстóва.
Хор: Слáва Тебé, Бóже наш, слáва Тебé.
Чтец: Что я́ко мéртва блюдéте;/ что печáти на кáмени положи́сте еврéе, стрáхом боя́щеся крадéнiя?/ Се вои́стинну гроб запечатлéся:/ кáко ýбо воскрéсе, áще не бы Бог был Хрiстóс?// Да уверя́ют вы воскрéсшiи, и ви́дени бы́вшiи мнóгими.
Слáва Ѻтцý и Сы́ну и Святóму Дýху.
Трóичен: Со Отцéм слáвим Сы́на, и Дýха Святáго,/ вопiю́ще непрестáнным глáсом:/ Трóице, еди́нственное Существó, поми́луй, спаси́ вся,/ в трiéх Ли́цех Еди́нице, ущéдри ны,// препрослáвленный Бóже, во вéки.
Катавáсiя Пáсхи: Óтроки от пéщи избáвивый,/ быв Человéк,/ стрáждет я́ко смéртен,/ и стрáстiю смéртное,/ в нетлéнiя облачúт благолéпiе,/ Едúн благословéн// отцéв Бог, и препрослáвлен.
ПЕСНЬ 8
Iрмóс: Сей наречéнный и святы́й день,/ Едúн суббóт Царь и Госпóдь,/ прáздников прáздник/ и торжествò есть торжéств,// вóньже благословúм Хрїстà во вéки.(2 раза)