Суббота мясопустная. Вселенская родительская суббота. УТРЕНЯ. КАНОН. Служба мирским чином
9 мáрта 2024 гóда. Суббóта мясопýстная. Вселéнская родúтельская суббóта. Пáмять совершáем всех от вéка усóпших правослáвных хрїстiáн, отéц и брáтiй нáших. Вся заупокóйная слýжба для домáшнего (келéйнаго) совершéнiя по Октóиху и Трióди. Слýжба мiрскúм чúном. Послéдованiе ýтрени (канóн)
Начало зри здесь ( вседнéвная вечéрня) и здесь ( ýтреня)
Твой есмь аз, спаси́ мя, я́ко оправдáнiй Твои́х взыскáх.
Припев: Спáсе, спасù мя. (На каждый стiх)
[Псалом 118 (Вторая статiя)]Менé ждáша грéшницы погуби́ти мя, свидéнiя Твоя́ разумéх. Вся́кiя кончи́ны ви́дех конéц, широкá зáповедь Твоя́ зелó. Коль возлюби́х закóн Твой, Гóсподи, весь день поучéнiе моé есть. Пáче враг мои́х умудри́л мя еси́ зáповедiю Твоéю, я́ко в век моя́ есть. Пáче всех учáщих мя разумéх, я́ко свидéнiя Твоя́ поучéнiе моé есть. Пáче стáрец разумéх, я́ко зáповеди Твоя́ взыскáх. От вся́каго пути́ лукáва возбрани́х ногáм мои́м, я́ко да сохраню́ словесá Твоя́. От судéб Твои́х не уклони́хся, я́ко Ты законоположи́л ми еси́. Коль сладкá гортáни моемý словесá Твоя́, пáче мéда устóм мои́м. От зáповедей Твои́х разумéх, сегó рáди возненави́дех всяк путь непрáвды. Свети́льник ногáма мои́ма закóн Твой, и свет стезя́м мои́м. Кля́хся и постáвих сохрани́ти судьбы́ прáвды Твоея́. Смири́хся до зелá, Гóсподи, живи́ мя по словеси́ Твоемý. Вóльная уст мои́х благоволи́ же, Гóсподи, и судьбáм Твои́м научи́ мя. Душá моя́ в рукý Твоéю вы́ну, и закóна Твоегó не забы́х. Положи́ша грéшницы сеть мне, и от зáповедей Твои́х не заблуди́х. Наслéдовах свидéнiя Твоя́ во век, я́ко рáдованiе сéрдца моегó суть. Приклони́х сéрдце моé сотвори́ти оправдáнiя Твоя́ в век за воздая́нiе. Законопрестýпныя возненави́дех, закóн же Твой возлюби́х. Помóщник мой и Застýпник мой еси́ Ты, на словесá Твоя́ уповáх. Уклони́теся от менé лукáвнующiи, и испытáю зáповеди Бóга моегó. Заступи́ мя по словеси́ Твоемý, и жив бýду, и не посрами́ менé от чáянiя моегó. Помози́ ми, и спасýся, и поучýся во оправдáнiих Твои́х вы́ну. Уничижи́л еси́ вся отступáющiя от оправдáнiй Твои́х, я́ко непрáведно помышлéнiе их. Преступáющiя непщевáх вся грéшныя земли́, сегó рáди возлюби́х свидéнiя Твоя́. Пригвозди́ стрáху Твоемý плóти моя́, от судéб бо Твои́х убоя́хся. Сотвори́х суд и прáвду, не предáждь менé оби́дящим мя. Воспрiими́ рабá Твоегó во блáго, да не оклеветáют менé гóрдiи. Óчи мои́ исчезóсте во спасéнiе Твоé, и в слóво прáвды Твоея́. Сотвори́ с рабóм Твои́м по ми́лости Твоéй, и оправдáнiем Твои́м научи́ мя. Раб Твой есмь аз: вразуми́ мя, и увéм свидéнiя Твоя́. Врéмя сотвори́ти Гóсподеви: разори́ша закóн Твой. Сегó рáди возлюби́х зáповеди Твоя́ пáче злáта и топáзiя. Сегó рáди ко всем зáповедем Твои́м направля́хся, всяк путь непрáвды возненави́дех. Ди́вна свидéнiя Твоя́, сегó рáди испытá я́ душá моя́. Явлéнiе словéс Твои́х просвещáет и вразумля́ет младéнцы. Устá моя́ отверзóх, и привлекóх дух, я́ко зáповедей Твои́х желáх. При́зри на мя и поми́луй мя, по судý лю́бящих и́мя Твоé. Стопы́ моя́ напрáви по словеси́ Твоемý, и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просвети́ на рабá Твоегó, и научи́ мя оправдáнiем Твои́м. Исхóдища воднáя изведóсте óчи мои́, понéже не сохрани́х закóна Твоегó. Прáведен еси́, Гóсподи, и прáви суди́ Твои́. Заповéдал еси́ прáвду свидéнiя Твоя́, и и́стину зелó. Истáяла мя есть рéвность Твоя́, я́ко забы́ша словесá Твоя́ врази́ мои́. Разжжéно слóво Твоé зелó, и раб Твой возлюби́ é. Юнéйшiй аз есмь и уничижéн, оправдáнiй Твои́х не забы́х. Прáвда Твоя́ прáвда во век, и закóн Твой и́стина. Скóрби и нýжды обретóша мя, зáповеди Твоя́ поучéнiе моé. Прáвда свидéнiя Твоя́ в век, вразуми́ мя, и жив бýду. Воззвáх всем сéрдцем мои́м, услы́ши мя, Гóсподи, оправдáнiя Твоя́ взыщу́. Воззвáх Ти, спаси́ мя, и сохраню́ свидéнiя Твоя́. Предвари́х в безгóдiи и воззвáх, на словесá Твоя́ уповáх. Предвари́сте óчи мои́ ко ýтру, поучи́тися словесéм Твои́м. Глас мой услы́ши, Гóсподи, по ми́лости Твоéй: по судьбé Твоéй живи́ мя. Прибли́жишася гоня́щiи мя беззакóнiем, от закóна же Твоегó удали́шася. Близ еси́ Ты, Гóсподи, и вси путié Твои́ и́стина. Испéрва познáх от свидéнiй Твои́х, я́ко в век основáл я́ еси́. Виждь смирéнiе моé и изми́ мя, я́ко закóна Твоегó не забы́х. Суди́ суд мой и избáви мя, словесé рáди Твоегó живи́ мя. Далéче от грéшник спасéнiе, я́ко оправдáнiй Твои́х не взыскáша. Щедрóты Твоя́ мнóги, Гóсподи, по судьбé Твоéй живи́ мя. Мнóзи изгоня́щiи мя и стужáющiи ми, от свидéнiй Твои́х не уклони́хся. Ви́дех неразумевáющiя и истáях, я́ко словéс Твои́х не сохрани́ша. Виждь, я́ко зáповеди Твоя́ возлюби́х, Гóсподи, по ми́лости Твоéй живи́ мя. Начáло словéс Твои́х и́стина, и во век вся судьбы́ прáвды Твоея́. Кня́зи погнáша мя тýне, и от словéс Твои́х убоя́ся сéрдце моé. Возрáдуюся аз о словесéх Твои́х, я́ко обретáяй коры́сть мнóгу. Непрáвду возненави́дех и омерзи́х, закóн же Твой возлюби́х. Седмери́цею днем хвали́х Тя о судьбáх прáвды Твоея́. Мир мног лю́бящим закóн Твой, и несть им соблáзна. Чáях спасéнiя Твоегó, Гóсподи, и зáповеди Твоя́ возлюби́х. Сохрани́ душá моя́ свидéнiя Твоя́ и возлюби́ я́ зелó. Сохрани́х зáповеди Твоя́ и свидéнiя Твоя́, я́ко вси путié мои́ пред Тобóю, Гóсподи. Да прибли́жится молéнiе моé пред Тя, Гóсподи, по словеси́ Твоемý вразуми́ мя. Да вни́дет прошéнiе моé пред Тя, Гóсподи, по словеси́ Твоемý избáви мя. Отры́гнут устнé мои́ пéнiе, егдá научи́ши мя оправдáнiем Твои́м. Провещáет язы́к мой словесá Твоя́, я́ко вся зáповеди Твоя́ прáвда. Да бýдет рукá Твоя́ éже спасти́ мя, я́ко зáповеди Твоя́ извóлих. Возжелáх спасéнiе Твоé, Гóсподи, и закóн Твой поучéнiе моé есть. Живá бýдет душá моя́ и восхвáлит Тя, и судьбы́ Твоя́ помóгут мне. Живá бýдет душá моя́ и восхвáлит Тя, и судьбы́ Твоя́ помóгут мне. Живá бýдет душá моя́ и восхвáлит Тя, и судьбы́ Твоя́ помóгут мне. Заблуди́х, я́ко овчá поги́бшее, взыщи́ рабá Твоегó, я́ко зáповедей Твои́х не забы́х. Заблуди́х, я́ко овчá поги́бшее, взыщи́ рабá Твоегó, я́ко зáповедей Твои́х не забы́х. Заблуди́х, я́ко овчá поги́бшее, взыщи́ рабá Твоегó, я́ко зáповедей Твои́х не забы́х.
По непорочных тропари глас 5
Благословéн есù, Гóсподи,/научù мя оправдáнiем Твоúм. (Пс.118:12)
Святы́х лик обрéте истóчник жи́зни и дверь рáйскую,/ да обря́щу и аз путь покая́нiем:/ поги́бшее овчá аз есмь,// воззови́ мя Спáсе, и спаси́ мя.
Благословéн есù, Гóсподи,/научù мя оправдáнiем Твоúм.
Áгнца Бóжiя проповéдавше,/ и заклáни бы́вше я́коже áгнцы,/ и к жи́зни нестарéемей святíи,/ и присносýщней престáвльшеся./ Тогó прилéжно мýченицы моли́те,// долгóв разрешéнiе нам даровáти.
Благословéн есù, Гóсподи,/научù мя оправдáнiем Твоúм.
В путь ýзкiй хóждшiи прискóрбный,/ вси в житiи́ крест я́ко ярéм взéмшiи,/ и Мне послéдовавшiи вéрою,/ прiиди́те наслади́теся,/ и́хже уготóвах вам пóчестей,// и венцóв небéсных.
Благословéн есù, Гóсподи,/научù мя оправдáнiем Твоúм.
Óбраз есмь неизречéнныя Твоея́ слáвы,/ áще и я́звы ношý прегрешéнiй:/ ущéдри Твоé создáнiе Влады́ко,/ и очи́сти Твои́м благоутрóбiем,/ и возжелéнное отéчество подáждь ми,// рая́ пáки жи́теля мя сотворя́я.
Благословéн есù, Гóсподи,/научù мя оправдáнiем Твоúм.
Дрéвле ýбо от не сýщих создáвый мя,/ и óбразом Твои́м Божéственным почты́й,/ преступлéнiем же зáповеди/ пáки мя возврати́вый в зéмлю, от нея́же взят бых,/ на éже по подóбiю возведи́// дрéвнею добрóтою возобрази́тися.
Благословéн есù, Гóсподи,/научù мя оправдáнiем Твоúм.
Упокóй Бóже рабы́ Твоя́,/ и учини́ я в раи́,/ идéже ли́цы святы́х Гóсподи,/ и пра́ведницы сiя́ют я́ко свети́ла,/ усóпшiя рабы́ Твоя́ упокóй,/ презирáя их вся согрешéнiя.
Слáва Отцý и Сыну и Святóму Дýху.
Трисiя́тельное еди́наго Божествá, благочéстно поéм вопiю́ще:/ Свят еси́ Óтче Безначáльный,/ Собезначáльный Сы́не, и Божéственный Дýше:/ просвети́ нас вéрою Тебé служáщих,// и вéчнаго огня́ исхити́.
И ныне и прúсно и во вéки векóв. Амúнь.
Рáдуйся Чи́стая, Бóга плóтiю рóждшая во спасéнiе всех,/ Е́юже род человéческiй обрéте спасéнiе:/ Тобóю да обря́щем рай,// Богорóдице Чи́стая благословéнная.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, помилуй. (12 раз)
Гóсподи, помилуй. (40 раз)
СЕДАЛЬНЫ, ГЛАС 5
Седáлен Трióди: Покóй Спáсе наш,/ с прáведными рабы́ Твоя́,/ и сiя́ всели́ во дворы́ Твоя́,/ я́коже есть пи́сано:/ презирáя я́ко благ прегрешéнiя их/ вóльная и невóльная,// и вся я́же в вéденiи и не в вéденiи, Человеколю́бче.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Богорóдичен Трióди: От Дéвы возсiя́вый мíру Хрїстé Бóже,// и сы́ны свéта Тóю показáвый, поми́луй нас.
Гóсподи, поми́луй. (3 раз)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегò, и от грехà моегò очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдà суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелю́ся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицà Твоегò, и Дýха Твоегò Святáго не отымѝ от менè. Воздáждь ми рáдость спасéнiя Твоегò, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегò, возрáдуется язык мой прáвде Твоéй. Гóсподи, устнè мои отвéрзеши, и устà моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдà благоволи́ши жéртву прáвды, возношéнiе и всесожегáемая; тогдà возложáт на олтáрь Твой тельцы̀.
КАНОН ИЗ ТРИОДИ, ГЛАС 8
ПЕСНЬ 1
Iрмóс: Песнь возслéм лю́дiе/ чýдному Бóгу нáшему,/ свободúвшему Iзрáиля от рабóты,/ песнь побéдную пою́ще и вопiю́ще:// поúм Тебè едúному Влады́це. (Двáжды)
Хор (припéв): Упокóй, Гóсподи, дýши усóпших раб Твоúх.
Чтец (тропáрь): Вси помóлимся Хрiстý,/ творя́ще пáмять днесь от вéка мéртвых,/ да вéчнаго огня́ избáвит я́ в вéре усóпшiя,// и надéжде жи́зни вéчныя.
Хор: Упокóй, Гóсподи, дýши усóпших раб Твоúх.
Чтец: Глубинóю судéб Твои́х Хрiстé,/ Всепремýдре Ты предопредели́л еси́/ коегóждо кончи́ну жи́зни, предéл и óбраз./ Тéмже я́же покры́ гроб во вся́кой странé,// на судé спаси́ Всещéдрый.
Хор: Упокóй, Гóсподи, дýши усóпших раб Твоúх.
Чтец: Предéлы жи́зни нáшея дáвый,/ тéмже усóпшiя от житéйскiя нóщи,/ дне невечéрняго сы́ны покажи́ Гóсподи,/ свящéнники правослáвныя, и вся вéрныя лю́ди Твоя́.
Хор: Упокóй, Гóсподи, дýши усóпших раб Твоúх.
Чтец: Я́же покры́ водá, и брань пожáт,/ трус же я́же объя́т, и убíйцы уби́ша,/ и óгнь я́же попали́, вéрныя,/ Ми́лостиве в чáсти учини́ прáведных.
Хор: Упокóй, Гóсподи, дýши усóпших раб Твоúх.
Чтец: Вся презирáяй плотскíя дóлги нáша Спáсе наш,/ во вся́ком вóзрасте всегó рóда человéча,/ пред суди́щем Твои́м постáви неосуждéны,/ Тебé Создáтелю отвещáющiя.
Хор: Слáва Отцý и Сыну и Святóму Дýху.
Трóичен: Три еди́наго Естествá пою́, Ли́ца самоипостáсная,/ нерождéнна Отцá, Сы́на рóждшагося, и Дýха Святáго:/ безначáльное Цáрство, власть, Божествó еди́но.
Хор: И ныне и прúсно и во вéки векóв. Амúнь.
Богорóдичен: Вои́стинну Ты яви́лася еси́ нéбо на земли́,/ бóльшее вы́шняго небесé, Безневéстная Дéво:/ из Тебé бо возсiя́ Сóлнце в мíре, влады́чествуяй прáвдою.
Катавáсия Трióди (глас 8): Песнь возслéм лю́дiе/ чýдному Бóгу нáшему,/ свободúвшему Iзрáиля от рабóты,/ песнь побéдную пою́ще и вопiю́ще:// поúм Тебè едúному Влады́це.
ПЕСНЬ 2
Iрмóс: Вúдите вúдите,/ я́ко Аз есмь Бог ваш,/ прéжде век рождéнный от Отцà,/ и от Дéвы в послéдняя без мýжа зачéншiйся// и разрушúвый грех прáотца Адáма, я́ко Человеколю́бец. (Двáжды)
Хор: Упокóй, Гóсподи, дýши усóпших раб Твоúх.
Чтец: Ви́дите ви́дите, я́ко Аз есмь Бог ваш,/ прáведным судóм водрузи́вый предéлы жи́зни,/ в нетлéнiе от тли прiéмляй вся усóпшiя// в надéжди вéчнаго воскрéсенiя.
Хор: Упокóй, Гóсподи, дýши усóпших раб Твоúх.
Чтец: От четы́рех конéц Гóсподи, прiéмляй вéрно усóпшiя,/ в мóри, или́ на земли́, или́ в рекáх, истóчницех, или́ éзерех,// или́ в ровéнницех снедь зверéм бы́вшiя, и пти́цам, и гадóм, вся упокóй.
Хор: Упокóй, Гóсподи, дýши усóпших раб Твоúх.
Чтец: В Твоéй длáни вся́ческая Гóсподи,/ предразсуди́л еси́, разрéшшiяся в состáвы четы́ри:/ в пришéствiи Твоéм собрáв воскреси́,// вся я́же в невéденiи, и рáзуме, прощáя тем прегрешéнiя.
Хор: Упокóй, Гóсподи, дýши усóпших раб Твоúх.
Чтец: О стрáшнаго Твоегó вторáго, Гóсподи, пришéствiя!/ Занé я́ко в ви́де мóлнiи на зéмлю пришéд,/ воздви́гнеши все создáнiе Твоé суди́тися,/ в вéре Тебé тогдá пожи́вших,// срéтших Тя с Тобóю бы́ти сподóби.
Хор: Слáва Отцý и Сыну и Святóму Дýху.
Трóичен: Пресовершéнная Еди́нице, Пребожéственная, Трiипостáсная,/ нерождéнне О́тче и Сы́не Единорóдне, Дýше от Отцá исходя́й, Сы́ном же явля́яйся:// Существó еди́но и Естествó, Госпóдьство, Цáрство, спаси́ всех нас.
Хор: И ныне и прúсно и во вéки векóв. Амúнь.
Богорóдичен: Неизглагóланное чýдо Твоегó Рождествá Мáти Дéво:/ кáко бо и раждáеши, и Чистá еси́ в тóмже?/ Кáко Отрочá раждáеши, и не вéси искýса мýжеска отню́д?/ Я́коже весть пáче естествá от Менé новолéпно Слóво Бóжiе рóждшееся.
Катавáсiя Трióди (глас 8): Вúдите вúдите,/ я́ко Аз есмь Бог ваш,/ прéжде век рождéнный от Отцà,/ и от Дéвы в послéдняя без мýжа зачéншiйся// и разрушúвый грех прáотца Адáма, я́ко Человеколю́бец.
ПЕСНЬ 3
Iрмóс: Утверждéй рукóю Твоéю, Слóве Бóжiй небесà,/ просвещéнiем Твоегò úстиннаго познáнiя,// утвердù и нас на Тя надéющихся сердцà. (Двáжды)
Хор: Упокóй, Гóсподи, дýши усóпших раб Твоúх.
Чтец: Прешéдшiя житiя́ течéнiе,/ в слáве благочéстной прáведным одéятися венцéм сподóби Бóже,// и вéчных благ наслади́тися.
Хор: Упокóй, Гóсподи, дýши усóпших раб Твоúх.
Чтец: Напрáсно восхищéнныя, попаля́емыя от мóлнiи,/ и измéрзшiя мрáзом, и вся́кою рáною,// упокóй Бóже, егдá огнéм вся искýсиши.
Хор: Упокóй, Гóсподи, дýши усóпших раб Твоúх.
Чтец: Присномýтное житiя́ мóре преплы́вшiя, Хрiстé,/ в нетлéнное Твоегó житiя́ сподóби пристáнище притещи́,// правослáвным житiéм окормлéныя.
Хор: Упокóй, Гóсподи, дýши усóпших раб Твоúх.
Чтец: И́хже вся́кое естествó морски́х и птиц небéсных,/ прiя́т снедéнiе Хрiстé, Твои́ми судьбáми,// воскреси́ Бóже, в послéднiй день со слáвою.
Хор: Слáва Отцý и Сыну и Святóму Дýху.
Трóичен: У́мно Божéственную Еди́ницу,/ в три Ли́ца прóсто кýпно éже пресещи́ совокупля́ю несекóмая:// я́коже бо скóрость мóлнiи, трисiя́ющая ви́дится во еди́нстве.
Хор: И ныне и прúсно и во вéки векóв. Амúнь.
Богорóдичен: Недоумéнное Твоé чýдо: без мýжа бо раждáеши,/ и дéвство Твоé Чи́стая, соблюдáеши рóждши.// Тéмже А́нгел мнóжество, и человéческiй род поéт Тя во вéки.
Катавáсiя Трióди (глас 8): Утверждéй рукóю Твоéю, Слóве Бóжiй небесà,/ просвещéнiем Твоегò úстиннаго познáнiя,// утвердù и нас на Тя надéющихся сердцà.
Гóсподи, помилуй. (3 раза)
Седáлен Трióди, глaс 5: Нас рáди претерпéвый Крест и смерть,/ и умертви́вый ад, и совоскреси́вый мéртвыя,/ престáвльшiяся от нас Спáсе, упокóй, я́ко Человеколю́бец Бог,/ и в трéпетное и стрáшное пришéствiе Твоé Жизнодáвче,/ я́ко имéяй мнóжество ми́лости,// Цáрствiя Твоегó сподóби.
Слáва Отцý и Сыну и Святóму Дýху.
Нас рáди претерпéвый Крест и смерть,/ и умертви́вый ад, и совоскреси́вый мéртвыя,/ престáвльшiяся от нас Спáсе, упокóй, я́ко Человеколю́бец Бог,/ и в трéпетное и стрáшное пришéствiе Твоé Жизнодáвче,/ я́ко имéяй мнóжество ми́лости,// Цáрствiя Твоегó сподóби.
И ныне и прúсно и во вéки векóв. Амúнь.
Богорóдичен Трióди, глaс 5: Скóрый Твой покрóв, и пóмощь и ми́лость покажи́ на рабéх Твои́х,/ и вóлны Чи́стая, укроти́ сýетных помышлéнiй,/ и пáдшую дýшу мою́ возстáви Богорóдице:// вем бо, вем Дéво, я́ко мóжеши, ели́ка и хóщеши.
ПЕСНЬ 4
Iрмóс: Из горы̀ прiосенéнныя Слóве, прорóк,/ едúныя Богорóдицы,/ хотя́ще воплотúтися, боговúдно усмотрù,// и со стрáхом славослóвяше сúлу Твою́. (Двáжды)
Хор: Упокóй, Гóсподи, дýши усóпших раб Твоúх.
Чтец: Отцы́ и прáотцы, дéды и прáдеды,/ от пéрвых и дáже до послéдних,/ во благозакóнiи умéршiя и благовéрiи,// вся помяни́ Спáсе наш.
Хор: Упокóй, Гóсподи, дýши усóпших раб Твоúх.
Чтец: В горé, на пути́, на мéстех пусты́х житié остáвльшiя в вéре,/ монáхи же и бельцы́, ю́ноши и стáрцы,// со святы́ми Хрiстé всели́.
Хор: Упокóй, Гóсподи, дýши усóпших раб Твоúх.
Чтец: От печáли и рáдости прешéдшiя ненадéжно,/ вéрою áбiе премени́вшiя житié,/ в благодéнствiи пострадáвшiя, или́ злодéнствiи,// вся упокóй Спáсе наш.
Хор: Упокóй, Гóсподи, дýши усóпших раб Твоúх.
Чтец: Я́же уби́ мечь, и конь совосхи́ти,/ град, снег и ту́ча умнóженная:/ я́же удави́ пли́нфа, или́ персть посы́па,// Хрiстé Спáсе наш упокóй.
Хор: Слáва Отцý и Сыну и Святóму Дýху.
Трóичен: Стрáнно я́ко еди́но, и три,/ Божество́ все по еди́ному Лицу́ нераздéльно:// Отéц бо, Сын, и Дух Святы́й есть покланя́емь, я́ко един Бог.
Хор: И ныне и прúсно и во вéки векóв. Амúнь.
Богорóдичен: Напрáви нас Дéво, моли́твами Твои́ми,/ окормля́ющи обуревáемыя волнóю греха́,/ во спаси́тельная пристáнища, Господороди́тельнице,// избавля́ющи от вся́ких лю́тых.
Катавáсия Триóди (глас 8): Из горы̀ прiосенéнныя Слóве, прорóк,/ едúныя Богорóдицы,/ хотя́ще воплотúтися, боговúдно усмотрù,// и со стрáхом славослóвяше сúлу Твою́.
ПЕСНЬ 5
Iрмóс: У́тренюет дух мой к Тебé Бóже,/ занé свет повелéнiя пришéствiя Твоегò:/ úмиже ýбо озарù ум наш Влады́ко,// и настáви на стезю́ жúзни. (Двáжды)
Хор: Упокóй, Гóсподи, дýши усóпших раб Твоúх.
Чтец: Коегóждо пáмять умéрших благочéстно/ от вéка днесь творя́ще Гóсподи,/ прилéжно Ти вопiéм:// вся упокóй со святы́ми Твои́ми.
Хор: Упокóй, Гóсподи, дýши усóпших раб Твоúх.
Чтец: От вся́каго, я́же прiя́л еси́, рóда и рóда/ в царéх, в князéх, или́ монáшествующих правослáвныя, Щéдре,// вéчнаго избáви мучéнiя.
Хор: Упокóй, Гóсподи, дýши усóпших раб Твоúх.
Чтец: Всех я́же создáл еси́ полéзная вéдый,/ и́мже попусти́л еси́ Гóсподи, внезáпными падéжьми ненаде́жно умрéти,// избáви му́ки вся́кiя Бóже наш.
Хор: Упокóй, Гóсподи, дýши усóпших раб Твоúх.
Чтец: Огня́ при́сно паля́щаго, и от тьмы несвети́мыя,/ скрéжета зу́бнаго, и чéрвiя безконéчно му́чащаго и вся́каго мучéнiя// избáви Спáсе наш, вся вéрно умéршiя.
Хор: Слáва Отцý и Сыну и Святóму Дýху.
Трóичен: Единопрестóльная, безначáльная, Триипостáсная Еди́нице,/ разделéнiем Еди́нство, и вопроти́в Ли́цы Естество́ иму́щая,// во еди́но нас совокупи́ хотéнiе Твои́х зáповедей.
Хор: И ныне и прúсно и во вéки векóв. Амúнь.
Богорóдичен: Пáче огнезрáчных серафи́мов яви́лася еси́ Чи́стая Честнéйшая,/ порóждши сим непристу́пнаго Iису́са Спáса,// воплощéнiем обожи́вшаго земнорóдных смешéнiе.
Катавáсiя Трióди (глас 8): У́тренюет дух мой к Тебé Бóже,/ занé свет повелéнiя пришéствiя Твоего́:/ и́миже у́бо озари́ ум наш Влады́ко,// и настáви на стезю́ жи́зни.
ПЕСНЬ 6
Iрмóс: Содержúма мя прiимù Человеколю́бче, грехù мнóгими/ и припáдающа щедрóтам Твоúм,// я́ко прорóка Гóсподи, и спасù мя. (Двáжды)
Хор: Упокóй, Гóсподи, дýши усóпших раб Твоúх.
Чтец: Смéрти разреши́в болéзни, пострадáв Начáльниче жи́зни Бóже наш,// усóпшiя от вéка рабы́ Твоя́ упокóй.
Хор: Упокóй, Гóсподи, дýши усóпших раб Твоúх.
Чтец: Неизглагóланными Твои́ми судьбáми,/ я́же уби́ша чарóвная напоéнiя, отрáвы, кóстная удавлéнiя,// со святы́ми Гóсподи упокóй.
Хор: Упокóй, Гóсподи, дýши усóпших раб Твоúх.
Чтец: Егда́ суди́ти бу́деши вся́ческим,/ стоя́щим наги́м и откровéным пред лицéм Твои́м:// тогда́ Щéдре, пощади́ послужи́вшiя Ти вéрно Бóже.
Хор: Упокóй, Гóсподи, дýши усóпших раб Твоúх.
Чтец: Послéднею у́бо трубóю воструби́вшу Твоему́ Архáнгелу,/ в воскресéнiе жи́зни// всех, тогда́ Хрiстé, рабы́ Твоя́ упокóй.
Хор: Упокóй, Гóсподи, дýши усóпших раб Твоúх.
Чтец: От вéка я́же прiя́л еси́ вéрныя Бóже,/ род вся́кiй человéческiй сподóби,// во вéки со служáщими Тебé, слáвити Тя.
Хор: Слáва Отцý и Сыну и Святóму Дýху.
Трóичен: Богоначáлiе Трисвятóе, единопрестóльное,/ О́тче, Сы́не со Святы́м Ду́хом,// Ты еси́ Бог мой, вседержи́тельством Твои́м содержáй все.
Хор: И ныне и прúсно и во вéки векóв. Амúнь.
Богорóдичен: От кóрене твоего́ возсiя́ цвет жи́зни,/ Iессéе прáотче взыгрáй// спасáяй мир, от Чи́стыя Отрокови́цы Хрiстóс Бог.
Катавáсiя Трióди (глас 8): Содержúма мя прiимù Человеколю́бче, грехù мнóгими/ и припáдающа щедрóтам Твоúм,// я́ко прорóка Гóсподи, и спасù мя.
Кондáк Трióди, глас 8: Со святы́ми упокóй/ Хрiстé, ду́ши раб Твои́х,/ идéже несть болéзнь, ни печáль,/ ни воздыхáнiе,// но жизнь безконéчная.
Íкос: Сам еди́н еси́ безсмéртный,/ сотвори́вый и создáвый человéка:/ земни́и у́бо от земли́ создáхомся,/ и в зéмлю ту́южде пóйдем,/ я́коже повелéл еси́, создáвый мя и реки́й ми:/ я́ко земля́ еси́, и в зéмлю оты́деши:/ а́може вси человéцы пóйдем,/ надгрóбное рыдáнiе, творя́ще песнь:// аллилу́iя.
ПЕСНЬ 7
Iрмóс: В начáле зéмлю основáвый,/ и небесà Слóвом утвердúвый,/ благословéн есù во вéки,// Гóсподи Бóже Отéц нáших. (Двáжды)
Хор: Упокóй, Гóсподи, дýши усóпших раб Твоúх.
Чтец: Благочéстно от вéка престáвльшихся пáмять творя́ще, вопiéм:// благословéн еси́ во вéки, Гóсподи Бóже Отéц нáших.
Хор: Упокóй, Гóсподи, дýши усóпших раб Твоúх.
Чтец: Внезáпу благочéстно умéршiя, и от стремни́ны вся́ческiя пáдшiя,/ дрéва, желéза, вся́каго кáмене,// упокóй Бóже усóпшiя вéрныя.
Хор: Упокóй, Гóсподи, дýши усóпших раб Твоúх.
Чтец: В стрáшное Твоé пришéствiе Щéдре, одесну́ю овéц Твои́х постáви,// правослáвно Ти в жи́зни послужи́вшiя Хрiстé, и престáвльшiяся к Тебé.
Хор: Упокóй, Гóсподи, дýши усóпших раб Твоúх.
Чтец: В ли́це Хрiстé, избрáнных Твои́х вчини́ Твоя́ рабы́, вопи́ти Тебé:// благословéн еси́ во вéки, Гóсподи Бóже Отéц нáших.
Хор: Упокóй, Гóсподи, дýши усóпших раб Твоúх.
Чтец: От земли́ персть содéтельствовавый,/ плоть Ду́хом оживотвори́вый, Спáсе Щéдрый,// я́же прiя́л еси́, упокóй Бóже, в нестарéющем животé.
Хор: Слáва Отцý и Сыну и Святóму Дýху.
Трóичен: Я́коже треми́ сóлнцы Божество́,/ еди́ным свéта срастворéнiем да воспоéтся,/ Отéц, и Сын, и Божéственный Дух,// еди́н Естествóм, но три Ипостáсьми.
Хор: И ныне и прúсно и во вéки векóв. Амúнь.
Богорóдичен: Дави́дское соглáсно воспевáем Ти пéнiе,/ гóру Тя Бóжiю нарицáюще Дéво,/ в нéйже всели́вся плóтiю Слóво,// обоготвори́ нас духóвно в Себé.
Катавáсiя Трióди (глас 8): В начáле зéмлю основáвый,/ и небесà Слóвом утвердúвый,/ благословéн есù во вéки,// Гóсподи Бóже Отéц нáших.
ПЕСНЬ 8
Iрмóс: На горè святéй прослáвльшася,/ и в купинè огнéм Приснодéвы Моисéови тáйну я́вльшаго,// Гóспода пóйте и превозносúте во вся вéки. (Двáжды)
Хор: Упокóй, Гóсподи, дýши усóпших раб Твоúх.
Чтец: Сокруши́вый пéрвее сень смéртную,/ возсiя́в я́ко сóлнце из грóба,/ сы́ны Воскресéнiя Твоего́ сотвори́, Гóсподи слáвы,// вся умéршiя в вéре, во вéки.
Хор: Упокóй, Гóсподи, дýши усóпших раб Твоúх.
Чтец: Безвéстных и сокровéнных Свéдетелю,/ егда́ и́маши откры́ти дела́ тьмы и совéты сердéц нáших,// тогда́ не истяжи́ слóва со всéми вéрою усóпшими.
Хор: Упокóй, Гóсподи, дýши усóпших раб Твоúх.
Чтец: Егда́ и́маши сéсти на престóле, и повели́ши на суд предстáти,/ сóбранным трубóю от конéц земли́:// тогда́ пощади́ всех Хрiстé, я́ко Ми́лостивый.
Хор: Упокóй, Гóсподи, дýши усóпших раб Твоúх.
Чтец: Умéршим напрáсно от слу́чаев,/ от кли́ча же зéльнаго и скóраго течéнiя,/ заушéнiя, удавлéнiя же, и лягáнiя,// Гóсподи слáвы, вéрою усóпшим ослáби во вéки.
Хор: Благословúм Отцà, и Сы́на, и Святáго Дýха, Гóспода.
Трóичен: Я́ко Еди́ницу Существóм пою́ Тя,/ я́ко Трóицу Ли́цы Тя чту:/ О́тче, и Сы́не, и Ду́ше Пресвяты́й,// безначáльную держáву Твоего́ Цáрствiя слáвлю во вéки.
Хор: И ныне и прúсно и во вéки векóв. Амúнь.
Богорóдичен: Струи́ живы́я истóчник запечатлéнный, показáлася еси́ Богорóдице Дéво:/ без му́жа бо Гóспода рóждши,// безсмéртiя вéрныя напая́еши водóю во вéки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя Трióди (глас 8):На горè святéй прослáвльшася,/ и в купинè огнéм Приснодéвы Моисéови тáйну я́вльшаго,// Гóспода пóйте и превозносúте во вся вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душà Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На кáждый стiх)
Я́ко призрè на смирéнiе рабы̀ Своея́,/ се бо от ны́не ублажáт Мя вси рóди.
Я́ко сотворѝ Мне вели́чiе Си́льный,/ и свя́то И҆́мя Егò, и ми́лость Егò в рóды родóв боя́щимся Егò.
Сотворѝ держáву мы́шцею Своéю,/ расточѝ гóрдыя мы́слiю сéрдца их.
Низложѝ си́льныя со престóл, и вознесè смирéнныя;/ áлчущiя испóлни благ, и богатя́щiяся отпустѝ тщи.
Воспрiя́т Iзрáиля óтрока Своегò, помянýти ми́лости,/ я́коже глагóла ко отцéм нáшим, Авраáму и сéмени егò, дáже до вéка.
ПЕСНЬ 9
Iрмóс: Проявлéнное на горè законополóжнику во огнù и купинè/ Рождествò Приснодéвы,/ в нáше вéрных спасéнiе,// пéсньми немóлчными величáем. (Двáжды)
Хор: Упокóй, Гóсподи, дýши усóпших раб Твоúх.
Чтец: Идéже есть веселя́щихся жили́ще святы́х Твои́х Гóсподи,// вся от вéка усóпшiя, в вéре же и надéжди ра́доватися сподóби.
Хор: Упокóй, Гóсподи, дýши усóпших раб Твоúх.
Чтец: Умéршия Бóжiим прещéнiем,/ смéртных громóв вся́ких с небесé изнесéнных,/ земли́ разсéдшейся, мóрю возшумéвшуся,// вся вéрныя Хрiстé, упокóй.
Хор: Упокóй, Гóсподи, дýши усóпших раб Твоúх.
Чтец: Вся́кiй вóзраст, ста́рцы и ю́ныя,/ младéнцы и дéти, и ссýщiя млеко́,/ мýжеское естество́ и жéнское,// упокóй Бóже, я́же прiя́л еси́ вéрныя.
Хор: Упокóй, Гóсподи, дýши усóпших раб Твоúх.
Чтец: От ядови́тых угрызéнiй умéршiя,/ от поглощéнiя змiéв, от попрáнiя кóней,/ и от удавлéнiя, и обéшенiя от и́скренняго,// вéрою Ти послужи́вшiя упокóй.
Хор: Упокóй, Гóсподи, дýши усóпших раб Твоúх.
Чтец: Коегóждо по и́мени в вéре умéршiя,/ от вéка и от рóда родóв,/ неосуждéнно предстáти Тебé Слóве,// в пришéствiи Твоéм сподóби.
Хор: Слáва Отцý и Сыну и Святóму Дýху.
Трóичен: Еди́ный в Трóице Бóже, слáва Тебé непрестáнно:/ áще бо и Бог Ки́йждо, но еди́н Естествóм есть,// Отéц, и Сын, и Дух, трисвéтлыми свóйствы.
Хор: И ныне и прúсно и во вéки векóв. Амúнь.
Богорóдичен: Пáче ума́ Рождество́ Твоé: раждáеши бо прéжде Сýщаго,/ и млекóм питáеши несказáнно, Пищедáвца ми́ру:/ держи́ши же содержáщаго вся, Хрiста́ еди́наго// Избáвителя нáшего, Всенепорóчная.
Катавáсiя Трióди (глас 8): Проявлéнное на горè законополóжнику во огнù и купинè/ Рождествò Приснодéвы,/ в нáше вéрных спасéнiе,// пéсньми немóлчными величáем.
Достойно есть
Хор: Достóйно есть я́ко воúстинну блажúти Тя, Богорóдицу,/Присноблажéнную и Пренепорóчную и Мáтерь Бóга нáшего./ Честнéйшую Херувíм и слáвнeйшую без сравнéнiя Серафíм,/ без истлéнiя Бóга Слóва рóждшую, сýщую Богорóдицу Тя величáем.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи, поми́луй. (3 рáза)
Светúлен Трióди: Живы́ми и мéртвыми обладáяй я́ко Бог,/ упокóй Твоя́ рабы́ в селéнiих избрáнных:// áще бо и согреши́ша, Спáсе, но не отступи́ша от Тебé.
Слáва Отцý и Сыну и Святóму Дýху.
Светúлен Трióди: Упокóй рабы Твоя́ во странé живы́х Гóсподи,/ отону́дуже отбежé болéзнь, печáль вку́пе и воздыхáнiе:/ очи́сти я́ко Человеколю́бец, я́же в житiи́ согреши́ша:/ еди́н бо безгрéшный еси́ и ми́лостивый,// мéртвых и живы́х Влады́ка.
И ныне и прúсно и во вéки векóв. Амúнь.
Богорóдичен Трióди: Мари́е Богоневéсто, Хрiста́ непрестáнно моли́ о нас рабéх Твои́х,/ с богоглагóливыми прорóки, и мýченик собóры,/ iерáрхи же и преподóбными, и все́ми прáведными,// снаслéдники бы́ти Небéснаго Цáрствiя.
ХВАЛИТНЫ
Псалом 148
Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егò в вы́шних.// Тебè подобáет песнь Бóгу.
Хвали́те Егò вси áнгели Егò,/ хвалите Егò вся си́лы Егò.// Тебè подобáет песнь Бóгу.
Хвали́те Егò, сóлнце и лунà, хвали́те Егò, вся звéзды и свет. Хвали́те Егò Небесà небéс и водà, я́же превы́ше небéс. Да восхвáлят и҆́мя Госпóдне: я́ко Той речè, и бы́ша, Той повелè, и создáшася. Постáви я́ в век и в век вéка, повелéнiе положѝ, и не ми́мо и҆́дет. Хвали́те Гóспода от землѝ, змíеве и вся бéздны: огнь, град, снег, гóлоть, дух бýрен, творя́щая слóво Егò, гóры и вси хóлми, древà плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiѝ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогò Еди́наго, исповéданiе Егò на землѝ и на небесѝ. И вознесéт рог людéй Свои́х, песнь всем преподóбным Егò, сыновóм Iзрáилевым, лю́дем, приближáющымся Емý.
Псалом 149
Воспóйте Гóсподеви песнь нóву, хвалéнiе Егò в цéркви преподóбных. Да возвеселится Iзрáиль о сотвóршем Егò, и сы́нове Сióни возрáдуются о Царè своéм. Да восхвáлят и҆́мя Егò в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечѝ обою́ду острѝ в рукáх их: сотвори́ти отмщéнiе во языцех, обличéнiя в лю́дех, связáти царѝ их пýты, и слáвныя их ручными окóвы желéзными: сотвори́ти в них суд напи́сан. Слáва сiя бýдет всем преподóбным Егò.
Псалом 150
Хвали́те Бóга во святы́х Егò, хвали́те Егò в утвержéнiи си́лы Егò.
На 6: Хвалúте Егò на сúлах Егò, хвалúте Егò по мнóжеству велúчествiя Егò.
Стихúры Трióди, (глас 8): Прииди́те прéжде концá вси брáтие,/ персть нáшу ви́дяще, и естествá нáшего немощнóе,/ и хýдость нáшу и конéц ýзрим,/ и оргáны сосýда плóтнаго,/ и я́ко прах человéк, снедь чéрвием и тлéние,/ я́ко сухи́я кóсти нáша вся́ко не имýщия дыхáния./ Во грóбы вни́кнем, где слáва?/ Где добрóта зрáка? Где благоглагóливый язы́к?/ Где брóви? Или́ где óко?/ Вся прах и сень:// тéмже пощади́ Спáсе, всех нас.
Хвалúте Егò во глáсе трýбнем, хвалúте Егò во псалтúри и гýслех.
Стiхúра: Что прельщáется человéк хваля́ся?/ Что всýе смущáется?/ Брéние и сам вмáле?/ Что не помышля́ет персть,/ я́ко прах, смешéние, и гнóя и тлéния отложéние?/ Áще ýбо брéние есмы́ человéцы,/ что прилепи́хомся земли́?/ И áще Христý есмы́ срóдни,/ что не притекáем к Немý?/ И вси отвéргше приврéменную и текýщую жизнь,/ жи́зни нетлéнней послéдующе, я́же есть Христóс,// просвещéние душ нáших.
На 4. Хвалúте Егò в тимпáне и лúце, хвалúте Егò во стрýнах и оргáне.
Стихúра: Рукóю Твоéю создáвый Адáма,/ и постáвивый предéл нетлéнiя и мéртвости Спáсе,/ и жи́зни во благодáти,/ тлéнiя же премени́вый, к пéрвой преложи́в жи́зни,/ Сам рабы́ Твоя́ Влады́ко, я́же прiя́л еси́ от нас,/ с прáведными упокóй, и в ли́це избрáнных:/ и сих именá написáв в кни́зе живóтней,/ и воскреси́в во глáсе архáнгелове, и трубы́ шýме,// сподóби я Небéснаго Цáрствiя Твоегó.
Хвалúте Егò в кимвáлех доброглáсных, хвалúте Егò в кимвáлех восклицáнiя. Всякое дыхáнiе да хвáлит Гóспода.
Хрїстóс воскрéсе, разреши́в ýзы Адáма первоздáннаго,/ и áдову разруши́в крéпость./ Дерзáйте вси мéртвiи: умертви́ся смерть,/ пленéн бысть и ад с нéю,/ и Хрїстóс воцари́ся, распны́йся и воскресы́й./ Той нам даровá нетлéнiе плóти,/ Той воздвизáет нас, и дáрует воскресéнiе нам,/ и слáвы óныя с весéлiем вся сподобля́ет,// в вéре непреклóнней вéровавшiя тéпле в Негó.
Продолжéнiе здесь