Неделя 35 по Пятидесятнице. Собор новомучеников Церкви Русской, глас 2 УТРЕНЯ (окончание) первый час
4 февраля́ 2024 гóда. Недéля 35 по Пятидеся́тнице. Собóр новомýчеников и исповéдников Цéркви Рýсской. Глас 2. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
ПЕСНЬ 8
Iрмóс: Пещь иногдà óгненная в Вавилóне дéйства разделя́ше,/ Бóжiим велéнiем халдéи опаля́ющая,/ вéрныя же орошáющая, пою́щiя:// благословúте вся делà Госпóдня, Гóспода.
Хор: Слáва, Гóсподи, Святóму Воскресéнiю Твоемý.
Чтец: Крóвiю Твоéю, Хрїстè,/ очервлéно плóти Твоея́ зря́ще одея́нiе,/ трéпетом ужасáхуся мнóгому Твоемý долготерпéнiю áнгельстiи чи́ни, зовýще:// благослови́те вся делà Госпóдня, Гóспода.
Хор: Слáва, Гóсподи, Святóму Воскресéнiю Твоемý.
Чтец: Ты моè смéртное одéял есѝ, Щéдре,/ в безсмéртiе востáнiем Твои́м./ Тéмже веселя́щеся благодáрственно воспевáют Тя/ избрáннiи лю́дiе, Хрїстè, зовýще Тебè:// пожéрта бысть вои́стинну смерть побéдою.
Хор: Пресвятáя Богорóдице, спасù нас.
Богорóдичен: Ты, И҆́же Отцý неразлýчнаго,/ во утрóбе богомýжно пожи́вша безсéменно зачалà есѝ,/ и неизречéнно родилà есѝ, Богороди́тельнице Пречи́стая:// тéмже Тя спасéнiе всех нас свéмы.
Глас 2
Хор: Пресвятáя Богорóдице, спасù нас.
Чтец: Ви́ден бысть на землѝ Тобóю, и с человéки поживè,/ И҆́же блáгостiю несравнéнный и си́лою,/ Емýже пою́ще вси вéрнiи зовéм:/ осуществовáнная да поéт Гóспода вся тварь,// и превознóсит во вся вéки.
Хор: Пресвятáя Богорóдице, спасù нас.
Чтец: Вои́стинну Тя, Чи́стую проповéдающе, слáвим Богорóдицу:/ Ты бо еди́на родилà есѝ от Трóицы воплощéнна,/ Емýже со Отцéм и Дýхом вси поéм:/ да поéт Гóспода вся тварь,// и превознóсит во вся вéки.
Глас 6
Хор: Святíи новомýченицы и исповéдницы Цéркве Рýсскiя,/ молúте Бóга о нас.
Чтец: Закóны Хрїстóвы возлюби́ша новомýченицы и исповéдницы Россíйстiи,/ безбóжная же повелéнiя отри́нуша/ и, рéвностiю о Бóзе связýемiи,/ Бóгу побéдную песнь воспевáху:// да благослови́т Гóспода Русь Святáя и превознóсит Егò во вéки.(Трúжды)
Хор: Святíи новомýченицы и исповéдницы Цéркве Рýсскiя,/ молúте Бóга о нас.
Чтец: Егдà земля́ Россíйская тьмóю безбóжiя и Кáiновым озлоблéнiем объя́та бысть,/ тогдà мнóзи хрїстолюби́вiи лю́дiе на гóрькiя рабóты изгнáни бы́ша/ и глад, мраз, зной и смерть лю́тую мýжественне претерпéша,/ вéрою же, надéждею и любóвiю совокýплени,/ достóйную воспевáху песнь:// да благослови́т Гóспода Русь Святáя и превознóсит Егò во вéки.(Двáжды)
Хор: Святíи новомýченицы и исповéдницы Цéркве Рýсскiя,/ молúте Бóга о нас.
Чтец: Áнгелов хвалý и новомýчеников славослóвiе ми́лостивно прiéмляй,/ не отри́ни, Трiипостáсный Бóже, от сóнма их и нас, недостóйных,/ но сподóби вкýпе с ни́ми воспевáти:// да благослови́т Гóспода Русь Святáя и превознóсит Егò во вéки.
Благословúм Отцà, и Сы́на, и Святáго Дýха, Гóспода.
Тропáрь: Áнгелов хвалý и новомýчеников славослóвiе ми́лостивно прiéмляй,/ не отри́ни, Трiипостáсный Бóже, от сóнма их и нас, недостóйных,/ но сподóби вкýпе с ни́ми воспевáти:// да благослови́т Гóспода Русь Святáя и превознóсит Егò во вéки.
И ны́не и прúсно и во вéки векóв. Амúнь.
Богорóдичен: Зря́щи поругáнiе святáго удéла Своегò,/ скорбя́ше Пречи́стая Мáти и держáвную пóмощь вéрным лю́дем простирáше,/ Сы́на же Своегò усéрдно моля́ше, взывáющи:// да благослови́т Гóспода Русь Святáя и превознóсит Егò во вéки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя Срéтенiя (глас 3): Нестерпúмому огню́ соединúвшеся,/ Богочéстiя предстоя́ще, ю́ноши,/ плáменем же невреждéни,/ Божéственную песнь поя́ху:/ благословúте, вся делà Госпóдня, Гóспода// и превозносúте во вся вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душà Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На кáждый стiх)
Я́ко призрè на смирéнiе рабы̀ Своея́,/ се бо от ны́не ублажáт Мя вси рóди.
Я́ко сотворѝ Мне вели́чiе Си́льный,/ и свя́то И҆́мя Егò, и ми́лость Егò в рóды родóв боя́щимся Егò.
Сотворѝ держáву мы́шцею Своéю,/ расточѝ гóрдыя мы́слiю сéрдца их.
Низложѝ си́льныя со престóл, и вознесè смирéнныя;/ áлчущiя испóлни благ, и богатя́щiяся отпустѝ тщи.
Воспрiя́т Iзрáиля óтрока Своегò, помянýти ми́лости,/ я́коже глагóла ко отцéм нáшим, Авраáму и сéмени егò, дáже до вéка.
ПЕСНЬ 9
Iрмóс: Безначáльна Родúтеля Сын, Бог и Госпóдь,/ воплóщься от Дéвы, нам явúся,/ омрачéнная просветúти,/ собрáти расточéнная,// тем Всепéтую Богорóдицу величáем.
Хор: Слáва, Гóсподи, Святóму Воскресéнiю Твоемý.
Чтец: Я́ко в раи́ насаждéно на лóбнем, Спáсе,/ требогáтое дрéво Твоегò пречи́стаго Крестà,/ крóвiю и водóю Божéственною,/ я́ко от истóчника Божéственнаго,/ ребрà Твоегò, Хрїстè, напоя́емо,// живóт нам прозяблò есть.
Хор: Слáва, Гóсподи, Святóму Воскресéнiю Твоемý.
Чтец: Низложи́л есѝ си́льныя, распны́йся, Всеси́льне,/ и éже ни́зу лежáщее во áдове тверды́ни,/ естествò человéческое вознéс,/ на Ѻ́тчем посади́л есѝ престóле.// С Ни́мже Тебè грядýщу покланя́ющеся, величáем.
Хор: Пресвятáя Трóице, Бóже наш, слáва Тебé.
Трóичен: Еди́ницу Тричи́сленную, Трóицу Единосýщную/ правослáвно пою́ще вéрнiи, слáвим:/ непресекóмо Пребожéственное Естествò,/ трисвéтлую, невечéрнюю зарю́,// Еди́ну нетлéнную нам свет возсiя́вшую.
Глас 2
Хор: Пресвятáя Богорóдице, спасù нас.
Чтец: Жезл крéпости дадéся естествý тлéнному,/ Слóво Бóжiе во утрóбе Твоéй, Чи́стая:/ и сiè воскресѝ, до áда попóлзшееся.// Тéмже Тя, Всечи́стая, я́ко Богорóдицу, величáем.
Хор: Пресвятáя Богорóдице, спасù нас.
Чтец: Ю́же извóлил есѝ, Влады́ко,/ прiимѝ ми́лостивно Моли́твенницу,/ Мáтерь Твою́, о нас,/ и Твоея́ блáгости вся́ческая испóлняется:// да Тя вси, я́ко Благодéтеля, величáем.
Глас 6
Хор: Святíи новомýченицы и исповéдницы Цéркве Рýсскiя,/ молúте Бóга о нас.
Чтец: Безсмéртныя трапéзы и жи́зни вéчныя во Цáрствiи Бóжiем/ наслаждáются ны́не новомýченицы и исповéдницы Россíйстiи,/ испóлнися бо на них обетовáнiе Госпóдне:// побеждáющим дам сéсти со Мнóю на Престóле Моéм.
Хор: Святíи новомýченицы и исповéдницы Цéркве Рýсскiя,/ молúте Бóга о нас.
Чтец: Да прослáвятся с ли́ки новомýчеников и исповéдников Россíйских жены̀ богомýдрыя земли́ нáшея,/ я́же, миронóсиц воспрiéмша чин и мýжески Хрїстý послéдовавша,/ страдáнiя за и́мя Егò претерпéша/ и вéрно отцéм, мужéм и брáтiям нáшим, Хрїстà рáди мýчимым, послужи́ша./ Сегò рáди ны́не в жи́зни вéчней вкýпе с ни́ми// трапéзы безсмéртныя наслаждáются.
Слáва Ѻтцý и Сы́ну и Святóму Дýху.
Тропáрь: Жизнодáвче Гóсподи,/ моли́твами новомýчеников и исповéдников Россíйских/ упокóй со всéми прáведными вéрныя рабы̀ Твоя́, за и́мя Твоè пострадáвшыя:/ святи́тели и iерéи, монáхи и мiрскíя,/ стáрыя, ю́ныя и всяк вóзраст, именýемыя и неименýемыя,// я́ко и́стинныя сы́ны и дрýги Бóжiя.
И ны́не и прúсно и во вéки векóв. Амúнь.
Богорóдичен: Я́ко взбрáнная Воевóда вóинства новомýчеников и исповéдников Россíйских,/ держáвный покрóв и ми́лостивное заступлéнiе яви́ла есѝ, Пресвятáя Дéво, землѝ нáшей,/ опустошáемей скóрбными и безбóжными наведéнiи./ Сегò рáди ны́не мóлим Тя:// простѝ лю́ди согрéшшыя и сохранѝ Святýю Русь.
Катавáсiя Срéтенiя (глас 3): В закóне сéни и писáнiй/ óбраз вúдим, вéрнiи:/ всяк мýжескiй пол, ложеснà разверзáя, свят Бóгу./ Тем перворождéнное Слóво,/ Отцà Безначáльна,/ Сы́на Первородя́щася Мáтерiю неискусомýжно,// величáем.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьмѝ Бог наш.
Хор: Свят Госпóдь Бог наш
Ексапостiлáрiй воскрéсный вторы́й: Кáмень узрéвша отвалéн, миронóсицы рáдовахуся,/ ви́деша бо ю́ношу седя́ща во грóбе,/ и той тем речè: се Хрїстóс востáл есть,/ рцы́те с Петрóм ученикóм:/ на гóру приспéйте Галiлéйскую, тáмо вам яви́тся,// я́коже предречè другóм.
Слáва Ѻтцý и Сы́ну и Святóму Дýху.
Светúлен новомýчеников: Я́ко отрéбiе ми́ру бы́ша святíи новомýченицы и исповéдницы Россíйстiи,/ кáменiем побiéни бы́ша, претрéни бы́ша,/ искушéни бы́ша, убíйством мечà умрóша,// свидéтельствующе о Свéте И́стиннем, Iисýсе Хрїстè, Гóсподе нáшем.
И ны́не и прúсно и во вéки векóв. Амúнь.
Богорóдичен воскрéснаго Ексапостiлáрiя: Áнгел ýбо принесè Дéве, éже рáдуйся,/ прéжде Твоегò зачáтiя, Хрїстè,/ Áнгел же кáмень отвали́ грóба Твоегò,/ вмéсто печáли ов ýбо рáдости неизречéнныя знáменiя,/ ов же в смéрти мéсто подáтеля Тя жи́зни проповéдуя и величáя,/ и глагóля воскресéнiе женáм, и таи́нником.
ХВАЛИТНЫ
Хор, глас 2: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егò в вы́шних.// Тебè подобáет песнь Бóгу.
Хвали́те Егò вси áнгели Егò,/ хвалите Егò вся си́лы Егò.// Тебè подобáет песнь Бóгу.
[В приходской практике пропускается до стихир]Хвали́те Егò, сóлнце и лунà, хвали́те Егò, вся звéзды и свет. Хвали́те Егò Небесà небéс и водà, я́же превы́ше небéс. Да восхвáлят и҆́мя Госпóдне: я́ко Той речè, и бы́ша, Той повелè, и создáшася. Постáви я́ в век и в век вéка, повелéнiе положѝ, и не ми́мо и҆́дет. Хвали́те Гóспода от землѝ, змíеве и вся бéздны: огнь, град, снег, гóлоть, дух бýрен, творя́щая слóво Егò, гóры и вси хóлми, древà плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiѝ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогò Еди́наго, исповéданiе Егò на землѝ и на небесѝ. И вознесéт рог людéй Свои́х, песнь всем преподóбным Егò, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егò в цéркви преподóбных. Да возвеселится Iзрáиль о сотвóршем Егò, и сы́нове Сióни возрáдуются о Царè своéм. Да восхвáлят и҆́мя Егò в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечѝ обою́ду острѝ в рукáх их: сотвори́ти отмщéнiе во языцех, обличéнiя в лю́дех, связáти царѝ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егò.
Стiхúры воскрéсные, глас 2: Вся́кое дыхáнiе и вся тварь,/ Тя слáвит, Гóсподи,/ я́ко Крестóм смерть упраздни́л есѝ,/ да покáжеши лю́дем, éже из мéртвых Твоè Воскресéнiе,// я́ко еди́н Человеколю́бец.
Хвалúте Бóга во святых Егò,/ хвалúте Егò в утвержéнiи сúлы Егò.
Стiхúра: Да рекýт iудéе, кáко вóини погуби́ша стрегýщiи Царя́; почтò бо кáмень не сохранѝ кáмене жи́зни; илѝ погребéннаго да дадя́т, илѝ воскрéсшему да поклóнятся, глагóлюще с нáми: слáва мнóжеству щедрóт твои́х, Спáсе наш, слáва тебѣ́.
На 6: Хвалúте Егò на сúлах Егò, хвалúте Егò по мнóжеству велúчествiя Егò.
Стiхúра: Рáдуйтеся лю́дiе и весели́теся, áнгел сѣдя́й на кáмени грóбнѣм, той нам благовѣстѝ, рек: Хрїстóс воскрéсе из мéртвых, Спас мíра, и испóлни вся́ческая благоухáнiя: рáдуйтеся лю́дiе и весели́теся.
Хвалúте Егò во глáсе трýбнем, хвалúте Егò во псалтúри и гýслех.
Стiхúра: Áнгел ýбо éже рáдуйся, прéжде твоегò зачáтiя Гóсподи, благодáтнѣй принесè: áнгел же кáмень слáвнаго твоегò грóба въ твоè воскресéнiе отвалѝ: ѻ́в ýбо в печáли мѣ́сто, весéлiя óбразы возвѣщáя: сей же въ смéрти мѣ́сто, Влады́ку жизнодáвца проповѣ́дуя нам, тѣ́мже вопiéм ти: благодѣ́телю всѣх, Гóсподи слáва тебѣ́.
На 4. Хвалúте Егò в тимпáне и лúце, хвалúте Егò во стрýнах и оргáне.
Стiхúры новомýчеников, глас 8: О, преслáвнаго чудесè!/ В послéдняя временà возсiявáют мýченицы/ и прéлести мрак отгоня́ют,/ вéра хрїстiáнская ны́не возвышáется/ и пáдает нечéстiе,/ рáдуются вéрнiи/ и прáздник новоявлéнным составля́ют,/ вопiю́ще Хрїстý Бóгу:// мýчеников похвалà и побéда Ты есѝ, Всеси́льне.
Хвалúте Егò в кимвáлех доброглáсных, хвалúте Егò в кимвáлех восклицáнiя. Всякое дыхáнiе да хвáлит Гóспода.
Стiхúра (Творéнiе святúтеля Афанáсiя Коврóвскаго): Вéры броня́ми,/ и щитóм благодáти,/ и крестà копiéм вооружи́вшеся,/ сопроти́вным си́лам непобеди́ми бы́сте/ и, я́ко Божéственнiи храбóрницы,/ дéмонская ополчéнiя победи́вше,/ со Áнгелы ликýете,/ вéрныя же заступáете, и освящáете,// и спасáете, призывáемiи.
Гóсподи, Госпóдь наш,/ я́ко чýдно úмя Твоè по всей землù. (Пс.8:2А)
Стiхира: О, преслáвнаго чудесè!/ Чудéс светлостьмѝ/ сóлнца светлéйше/ при́сно святíи срóдницы нáши/ свéтят концéм Рýсскiя землѝ,/ от невечéрняго Свéта облистáеми,/ и́хже сiя́нiи/ óблацы от страны̀ нáшея отгоня́ются вáрварстiи// и дéмони побеждáются.
Святы́м, úже суть на землù Егò,/ удивù Госпóдь вся хотéнiя Своя́ в них. (Пс.15:3)
Глас 6: Новоявлéнныя звéзды днесь/ на церкóвней показáшася твéрди,/ во мнóзех мéстех бы́вшiи мýченицы Хрїстóвы,/ и́хже ублажáюще, мучениколю́бцы,/ по дóлгу им прирцéм, глагóлюще:/ рáдуйтеся, благочéстiя утверждéнiе и нечéстiя обуздáнiе;/ рáдуйтеся, Россíйскiя Цéркве слáво и безбóжных посрамлéнiе;/ рáдуйтеся, óбрази терпéнiя и за Хрїстà страдáнiя./ Стáните, непобеди́мiи, посредè нас ýмне,/ от бед и искушéнiй избавля́юще,// и моли́теся о спасéнiи душ нáших.
Слáва Отцý и Сы́ну и Святóму Дýху.
Стiхúра евáнгельская вторáя, глас 2: С ми́ры пришéдшим я́же с Марíею женáм,/ и недоумевáющимся,/ кáко бýдет им улучи́ти желáнiе,/ яви́ся кáмень взят,/ и Божéственный ю́ноша утоля́я мятéж душ их,/ востà бо, глагóлет, Iисýс Госпóдь./ Тéмже проповéдите проповéдником Егò,/ ученикóм в Галiлéю тещѝ,/ и ви́дети Егò воскрéсша из мéртвых,// я́ко Жизнодáвца и Гóспода.
И ны́не и прúсно и во вéки векóв. Амúнь.
Глас 2: Преблагословéнна есѝ, Богорóдице Дéво,/ Воплóщшим бо ся из Тебè ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебè.
Вóзглас: Слáва Тебè, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстè, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцà, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцà, ами́нь.
На всяк день благословлю́ Тя и восхвалю́ и҆́мя Твоè во вéки, и в век вéка.
Сподóби, Гóсподи, в день сей без грехà сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоè во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был есѝ нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебè. Гóсподи, к Тебè прибегóх, научѝ мя твори́ти вóлю Твою́, яко Ты есѝ Бог мой, яко у Тебè истóчник животà, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, помúлуй нас. (3 рáза)
Хор: Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Хор: Святы́й Безсмéртный, помúлуй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помúлуй нас.
Тропáрь воскрéсный, глас 2: Воскрéс из грóба и ýзы растерзáл еси áда,/ разруши́л еси осуждéнiе смéрти, Гóсподи,/ вся от сетéй врагà избáвивый;/ яви́вый же Себè апóстолом Твоим,/ послáл еси я на прóповедь,/ и тéми мир Твой пóдал еси вселéнней,// Еди́не Многоми́лостиве.
Гóсподи поми́луй (40 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи поми́луй (12 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
Гóсподи, Iисýсе Хрїстè, Сыне Бóжій, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моè. Вонмѝ глáсу молéнiя моегò, Царю́ мой и Бóже мой, яко к Тебè помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебè лукáвнуяй, нижè пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебè лю́бящiи имя Твоè. Яко Ты благослови́ши прáведника, Гóсподи: яко орýжiем благоволéнiя венчáл есѝ нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты есѝ. Не отвратѝ человéка во смирéнiе, и рекл есѝ: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травà мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л есѝ беззакóнiя нáша пред Тобóю: век наш в просвещéнiе лицà Твоегò. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегò, и от стрáха Твоегò, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы̀ Твоя́. Испóлнихомся заýтра ми́лости Твоея́, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны есѝ, лéта в ня́же ви́дехом злáя. И при́зри на рабы̀ Твоя́, и на делà Твоя́, и настáви сы́ны их. И бýди свéтлость Гóспода Бóга нáшего на нас, и делà рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебè, Гóсподи. Пою́ и разумéю в путѝ непорóчне, когдà прiи́деши ко мне? Прехождáх в незлóбiи сéрдца моегò посредè дóму моегò. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпè мне сéрдце стропти́во, уклоня́ющагося от менè лукáваго не познáх. Оклеветáющаго тай и҆́скренняго своегò, сегò изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредè дóму моегò творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Тропáрь воскрéсный, глас 2: Егдà снизшéл есѝ к смéрти, Животè Безсмéртный, тогдà ад умертви́л есѝ блистáнiем Божествà. Егдà же и умéршыя от преиспóдних воскреси́л есѝ, вся Си́лы Небéсныя взывáху: Жизнодáвче, Хрїстè Бóже наш, слáва Тебè.
Слáва Отцý и Сы́ну и Святóму Дýху.
Тропáрь новомýчеников, глас 4: Днесь рáдостно ликýет Цéрковь Рýсская, прославля́ющи новомýченики и исповéдники своя́: святи́тели и iерéи, цáрственныя страстотéрпцы, благовéрныя кня́зи и княги́ни, преподóбныя мýжи и жены̀ и вся правослáвныя хрїстiáны, во дни гонéнiя безбóжнаго жизнь свою́ за вéру во Хрїстà положи́вшыя и кровьмѝ и́стину соблю́дшыя. Тех предстáтельством, долготерпели́ве Гóсподи, странý нáшу в Правослáвiи сохранѝ до скончáнiя вéка.
И ны́не и прúсно и во вéки векóв. Амúнь.
Богорóдичен 1‑го часá: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблà есѝ цвет нетлéнiя. Дéву, я́ко пребылà есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогò молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы̀ человéческiя, и сохраню́ зáповеди Твоя́. Лицè Твоè просветѝ на рабà Твоегò и научѝ мя оправдáнiем Твои́м.
Да испóлнятся устà моя хвалéнiя Твоегò, Гóсподи, я́ко да воспою́ слáву Твою́, весь день великолéпiе Твоè.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сыне Бóжїй, поми́луй нас. Ами́нь.
КОНДАК
Кондáк новомýчеников, глас 3: Днесь новомýченицы Россíйстии в ри́зах бéлых предстоя́т Áгнцу Бóжiю и со Áнгелы песнь побéдную воспевáют Бóгу: благословéнiе, и слáва, и премýдрость, и хвалá, и честь, и си́ла, и крéпость нáшему Бóгу во вéки векóв. Ами́нь.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстè Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесà очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицà Твоегò, да в нем ýзрим Свет Непристýпный: и испрáви стопы̀ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победúтельная,/ я́ко избáвльшеся от злых,/ благодáрственная восписýем Ти рабù Твоù, Богорóдице;/ но я́ко имýщая держáву непобедúмую,/ от вся́ких нас бед свободù, да зовéм Ти:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 рáза)
Гóсподи, благословᴎ́.
Гóсподи, Iисýсе Хрїстè, Сыне Бóжій, моли́твами Пречи́стыя Своея́ Мáтере, святы́х и прáведных богоотéц Iоакíма и Áнны, и всех святы́х, поми́лует и спасéт нас, яко Благ и Человеколю́бец. Ами́нь.
И глаголи часы и обéдницу