Неделя 34 по Пятидесятнице. Прпп. Павла Фивейского и Иоанна Кущника. глас 1. УТРЕНЯ КАНОН
28 января́ 2024 гóда. Недéля 34 по Пятидеся́тнице. Преподóбных отéц нáших Пáвла Фивéйскаго и Iоáнна Кýщника. Глас 1. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
(И далее хор продолжает чередовать стiхи 135 псалма и Аллилуиа)
[Псалом 135 Аллилуиа]Исповéдайтеся Бóгу богóв, я́ко в век ми́лость Егò./ Исповéдайтеся Гóсподеви господéй, я́ко в век ми́лость Егò./ Сотвóршему чудесà вéлiя еди́ному, я́ко в век ми́лость Егò./ Сотвóршему небесà рáзумом, я́ко в век ми́лость Егò./ Утверди́вшему зéмлю на водáх, я́ко в век ми́лость Егò./ Сотвóршему свети́ла вéлiя еди́ному, я́ко в век ми́лость Егò./ Сóлнце во óбласть дне, я́ко в век ми́лость Егò./ Лунý и звéзды во óбласть нóщи, я́ко в век ми́лость Егò./ Порази́вшему Еги́пта с пéрвенцы eгò, я́ко в век ми́лость Егò,/ и извéдшему Iзрáиля от среды́ их, я́ко в век ми́лость Егò./ Рукóю крéпкою и мы́шцею высóкою, я́ко в век ми́лость Егò./ Раздéльшему Чермнóе мóре в разделéнiя, я́ко в век ми́лость Егò./ И провéдшему Iзрáиля посредè eгò, я́ко в век ми́лость Егò./ И истря́сшему фараóна и си́лу eгò в мóре Чермнóе, я́ко в век ми́лость Егò./ Провéдшему лю́ди Своя́ в пусты́ни, я́ко в век ми́лость Егò./ Порази́вшему царѝ вéлiя, я́ко в век ми́лость Егò,/ и уби́вшему царѝ крéпкiя, я́ко в век ми́лость Егò:/ Сиóна, царя́ Аморрéйска, я́ко в век ми́лость Егò,/ и Óга, царя́ Васáнска, я́ко в век ми́лость Егò./ И дáвшему зéмлю их достоя́нiе, я́ко в век ми́лость Егò./ Достоя́нiе Iзрáилю, рабý Своемý, я́ко в век ми́лость Егò./ Я́ко во смирéнiи нáшем помянý ны Госпóдь, я́ко в век ми́лость Егò./ И избáвил ны есть от врагóв нáших, я́ко в век ми́лость Егò./ Дая́й пи́щу вся́кой плóти, я́ко в век ми́лость Егò.
Исповéдайтеся Бóгу Небéсному, я́ко в век ми́лость Егò.
Аллилýїа (трúжды)
ТРОПАРИ ВОСКРЕСНЫЕ, ГЛАС 5
Благословéн есù, Гóсподи,/научù мя оправдáнiем Твоúм.(Пс.118:12)
Áнгельскiй собóр удиви́ся,/ зря Тебè в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есù, Гóсподи,/научù мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есù, Гóсподи,/научù мя оправдáнiем Твоúм.
Зелó рáно мvронóсицы течáху/ ко грóбу Твоемý рыдáющiя,/ но предстà к ним Áнгел и речè:/ рыдáнiя врéмя престà, не плáчите,/ воскресéнiе же апóстолом рцы́те.
Благословéн есù, Гóсподи,/научù мя оправдáнiем Твоúм.
Мvронóсицы жены̀ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речè, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егò Сы́нови, и Святóму Дýху,/ Святéй Трóице во еди́ном существè,/ с Серафíмы зовýще:/ Свят, Свят, Свят есѝ, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехà, Дéво, Адáма избáвила есѝ,/ рáдость же Éве/ в печáли мéсто подалà есѝ,/ пáдшiя же от жи́зни/ к сей напрáви/ из Тебè воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 1: Разбóйничо покая́нiе рай окрáде,/ плачь же мvронóсиц рáдость возвестѝ,/ я́ко воскрéсл есѝ, Хрїстè Бóже,// подая́й мíрови вéлiю ми́лость.
СТЕПЕННА, ГЛАС 1
1 АНТИФОН
Хор: Внегдá скорбéти ми, услы́ши моя́ болéзни,// Гóсподи, Тебè зовý.(Двáжды)
Пусты́нным непрестáнное Божéственное желáнiе бывáет,// мíра сýщим сýетнаго кромè.(Двáжды)
Слáва Отцý и Сы́ну и Святóму Дýху.
Святóму Дýху честь и слáва,/ я́коже Отцý подобáет, кýпно же и Сы́ну,// сегó рáди да поéм Трóице Единодержáвiе.
И ны́не и прúсно и во вéки векóв. Амúнь.
Святóму Дýху честь и слáва,/ я́коже Отцý подобáет, кýпно же и Сы́ну,// сегó рáди да поéм Трóице Единодержáвiе.
2 АНТИФОН
На гóры Твоúх вознéсл есù мя закóнов,// добродéтельми просветù, Бóже, да пою́ Тя.(Двáжды)
Деснóю Твоéю рукóю прiи́м Ты, Слóве,/ сохранѝ мя, соблюдѝ,// да не огнь менé опали́т грехóвный.(Двáжды)
Слáва Отцý и Сы́ну и Святóму Дýху.
Святы́м Дýхом вся́кая тварь обновля́ется,/ пáки текýщи на пéрвое,// равномóщен бо есть Отцý и Слóву.
И ны́не и прúсно и во вéки векóв. Амúнь.
Святы́м Дýхом вся́кая тварь обновля́ется,/ пáки текýщи на пéрвое,// равномóщен бо есть Отцý и Слóву.
3 АНТИФОН
О рéкших мне, внúдем во дворы̀ Госпóдни,// возвеселúся мой дух, срáдуется сéрдце.(Двáжды)
В домý Давíдове страх вели́к:/ тáмо бо престóлом постáвленным,// сýдятся вся племенá земнáя, и язы́цы.(Двáжды)
Слáва Отцý и Сы́ну и Святóму Дýху.
Святóму Дýху, честь, поклонéнiе, слáву и держáву,/ я́коже Отцý достóит, и Сы́нови подобáет приноси́ти:// Еди́ница бо есть Трóица Естествóм, но не Ли́цы.
И ны́не и прúсно и во вéки векóв. Амúнь.
Святóму Дýху, честь, поклонéнiе, слáву и держáву,/ я́коже Отцý достóит, и Сы́нови подобáет приноси́ти:// Еди́ница бо есть Трóица Естествóм, но не Ли́цы.
ПРОКИМЕН
Чтец: Прокíмен, глас пéрвый, псалóм Давíдов. Ны́не воскреснý, глагóлет Госпóдь, положýся во Спасéнiе, не обиню́ся о нем.(Пс.11:6Б)
Хор: Ны́не воскреснý, глагóлет Госпóдь,/ положýся во Спасéнiе, не обиню́ся о нем.
Чтец: Словесá Госпóдня, словесá чи́ста.(Пс.11:7А)
Хор: Ны́не воскреснý, глагóлет Госпóдь,/ положýся во Спасéнiе, не обиню́ся о нем.
Чтец: Ны́не воскреснý, глагóлет Госпóдь.
Хор: Положýся во Спасéнiе, не обиню́ся о нем.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егò, хвали́те Егò во утвержéнiи си́лы Егò.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Матфéя Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Мф.зач.116): Во врéмя óно, единiинáдесять ученицы́ идóша в Галiлéю, в гóру, áможе повелé им Iисýс: И ви́девше Егó, поклони́шася Емý: óви же усумнéшася. И пристýпль Iисýс, речè им, глагóля: дадéся Ми вся́ка власть на небеси́ и на земли́: Шéдше научи́те вся язы́ки, крестя́ще их во и́мя Отцá, и Сына, и Святáго Духа, учáще их блюсти́ вся, ели́ка заповéдах вам. И се, Аз с вáми есмь во вся дни, до скончáнiя вéка. Ами́нь.
[Cинодальный перевод]В то время одиннадцать учеников пошли в Галилею, на гору, куда повелел им Иисус, и, увидев Его, поклонились Ему, а иные усомнились. И приблизившись Иисус сказал им: дана Мне всякая власть на небе и на земле. Итак идите, научите все народы, крестя их во имя Отца и Сына и Святого Духа, уча их соблюдать всё, что Я повелел вам; и вот, Я с вами во все дни до скончания века. Аминь.(Мф.28:16-20)
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстè, и святóе Воскресéнiе Твоè поéм и слáвим: Ты бо есѝ Бог наш, рáзве Тебè инóго не знáем, и҆́мя Твоè именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдà благословя́ще Гóспода, поéм Воскресéнiе Егò: распя́тiе бо претерпéв, смéртiю смерть разрушѝ.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегò, и от грехà моегò очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдà суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелю́ся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицà Твоегò, и Дýха Твоегò Святáго не отымѝ от менè. Воздáждь ми рáдость спасéнiя Твоегò, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегò, возрáдуется язык мой прáвде Твоéй. Гóсподи, устнè мои отвéрзеши, и устà моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдà благоволи́ши жéртву прáвды, возношéнiе и всесожегáемая; тогдà возложáт на олтáрь Твой тельцы̀.
Слáва Ѻтцý и Сы́ну и Святóму Дýху.
Глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Тáже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè.(Пс.50:3)
Стiхúра, глас 6: Воскрéс Iисýс от грóба,/ я́коже проречè,/ дадè нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 1
(совмещéнный с канóном Богорóдицы глас 1, и канóнами прпп. Пáвла Фивéйского, глас 8, и Iоáнна Кýщника, глас 2)
ПЕСНЬ 1
Iрмóс: Твоя́ победúтельная деснúца/ Боголéпно в крéпости прослáвися:/ та бо, Безсмéртне,/ я́ко всемогýщая, протúвныя сотрè,// Iзрáильтяном путь глубины̀ новосодéлавшая.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): И҆́же рукáма пречи́стыма от пéрсти/ богодéтельне испéрва создáв мя,/ рýце распростéрл есѝ на крестè,/ от землѝ взывáя тлéнное моè тéло,// éже от Дéвы прiя́л есѝ.
Хор: Слáва, Гóсподи, Святóму Воскресéнiю Твоемý.
Чтец: Умерщвлéнiе подъя́л есѝ менè рáди,/ и дýшу смéрти прéдал есѝ,/ И҆́же вдохновéнiем божéственным дýшу ми вложи́вый,/ и отреши́в вéчных уз, и совоскреси́в// нетлéнiем прослáвил есѝ.
Хор: Пресвятáя Богорóдице, спасù нас.
Богорóдичен: Рáдуйся, благодáти истóчниче,/ рáдуйся лéствице, и двéре небéсная,/ рáдуйся свéщнице, и рýчко златáя, и горò несекóмая,// Я́же Жизнодáвца Хрїстà мíрови рóждшая.
Канон Богородицы, глас 1
Хор: Пресвятáя Богорóдице, спасù нас.
Чтец: Кýю Ти достóйную песнь нáше принесéт неможéнiе?/ тóчiю обрáдовательную,/ éйже нас Гаврiи́л тáйно научи́л есть:// рáдуйся, Богорóдице Дéво, Мáти Неневéстная.
Хор: Пресвятáя Богорóдице, спасù нас.
Чтец: Приснодéве и Мáтери Царя́ вы́шних сил,/ от чистéйша сéрдца, вéрнiи, духóвне возопiи́м:// рáдуйся, Богорóдице Дéво, Мáти Неневéстная.
Канон прп. Павла фивейского, глас 8
Хор: Преподóбне óтче Пáвле, молù Бóга о нас.
Чтец: Пáвла Богонóснаго, я́ко монáшествующих удобрéнiе,// вéрнiи, сошéдшеся, пéсньми по дóлгу почитáем.
Хор: Преподóбне óтче Пáвле, молù Бóга о нас.
Чтец: Был есѝ пусты́ни пéрвый жи́тель, Пáвле слáвне,// и Небéснаго Цáрствiя наслéдник показáлся есѝ пощéнiем.
Хор: Преподóбне óтче Пáвле, молù Бóга о нас.
Чтец: Всегò себè воздержáнiем очи́стив, всеблажéнне,// жили́ще яви́лся есѝ Бóжiе и Áнгелов единосéльник.
Хор: Пресвятáя Богорóдице, спасù нас.
Чтец: Пречи́стая Богорóдице,/ яже воплощéнно Присносýщное и Пребожéственное Слóво// пáче естествà рóждшая, поéм Тя.
Канон прп. Иоанна кущника, глас 2
Хор: Преподóбне óтче Iоáнне, молù Бóга о нас.
Чтец: Обогáтився Божéственными добродéтельми,/ богáтство преоби́дел есѝ земнóе и Небéсное получи́л есѝ./ Тéмже мя, обнищáвша, Божéственнаго рáзума обогатѝ благодáтiю,// я́ко да твоè воспою́, óтче, жи́тельство равноáнгельное.
Хор: Преподóбне óтче Iоáнне, молù Бóга о нас.
Чтец: Ярéм Госпóдень благíй, блажéнне, от ю́ности ты подъéм,/ пóстническими борéнiи врагà смири́л есѝ,/ смирéнiем Хрiстóвым воорýжся,// и́мже возвы́сился есѝ на высотý, Iоáнне, к Небесѝ.
Слáва Ѻтцý и Сы́ну и Святóму Дýху.
Тропáрь: Я́ко шéствовав стезéю тéсною,/ скорбьмѝ, и слезáми, и стенáньми, и озлоблéнiи, преподóбне,/ к прострáннейшей широтè дости́гл есѝ,/ обрéт оби́тель достóйну болéзней,// óтче Iоáнне досточýдне.
И ны́не и прúсно и во вéки векóв. Амúнь.
Богорóдичен: Лю́тыми страстéй навéты, Отрокови́це, обуревáемь и прилóги грехóвными преклонéн,/ ко Твоемý неусы́пному и непобеди́мому предстáтельству, Всепéтая, любóвiю прибегáю,// ущéдри мя и спасѝ, Приснодéво.
Катавáсiя Срéтенiя (глас 3): Сýшу глубородúтельную зéмлю/ сóлнце нашéствова иногдà:/ я́ко стенà бо, огустè обапóлы водà/ лю́дем пешомореходя́щим и Богоугóдно пою́щим:// поúм, Гóсподеви, слáвно бо прослáвися.
ПЕСНЬ 3
Iрмóс: Едúне вéдый человéческаго существà нéмощь/ и мúлостивно в не вообрáжся,/ препоя́ши мя с высоты̀ сúлою,/ éже вопúти Тебè, Святы́й,/ одушевлéнный хрáме// неизречéнныя слáвы Твоея́, Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Бог Сый мне, Блáже, пáдшаго ущéдрил есѝ,/ и сни́ти ко мне благоволи́в, вознéсл мя есѝ распя́тiем,/ éже вопи́ти Тебè, Святы́й:// Хрáме одушевлéнный неизречéнныя Твоея́ слáвы, Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Живóт ипостáсный Хрїстè сый,/ в истлéвша мя, я́ко Милосéрдый Бог, обóлкся,/ в персть смéртную сошéд, Влады́ко,/ смéртную держáву разруши́л есѝ,/ и мертв триднéвен воскрéс,// в нетлéнiе мя облéкл есѝ.
Хор: Пресвятáя Богорóдице, спасù нас.
Богорóдичен: Бóга зачéнши во чрéве, Дéво, Дýхом Пресвяты́м,/ пребылà есѝ неопали́ма,/ понéже Тя купинà законополóжнику Моисéю,/ пали́мую нежегóмо, я́ве предвозвестѝ,// огнь нестерпи́мый прiéмшую.
Глас 1
Хор: Пресвятáя Богорóдице, спасù нас.
Чтец: Óблак Тя лéгкiй нелóжно, Дéво, именýем,/ прорóческим возслéдующе речéнiем:/ прiи́де бо на Тебè Госпóдь/ низложи́ти еги́петскiя прéлести рукотворéнiя,// и просвети́ти сим служáщiя.
Хор: Пресвятáя Богорóдице, спасù нас.
Чтец: Тя запечáтанный вои́стинну лик прорóческiй истóчник,/ и заключéнную дверь именовà, дéвства Твоегò, Всепéтая,/ я́вственне знáменiя нам пи́шуще:// éже сохрани́ла есѝ и по рождествè.
Глас 8
Хор: Преподóбне óтче Пáвле, молù Бóга о нас.
Чтец: К Бóгу óком твоея́ душѝ взирáя, óтче,/ Тогò возлюби́л есѝ, возненави́дев земнáя// и Áнгельскую соверши́в жизнь.
Хор: Преподóбне óтче Пáвле, молù Бóга о нас.
Чтец: Лучáми, óтче, добродéтелей, страстéй отгнáл есѝ мглу я́ве,// просвещéнiе Дýха во твоéм сéрдцы прiéм.
Хор: Преподóбне óтче Пáвле, молù Бóга о нас.
Чтец: Небéсным хлéбом питáяся, я́ко Илiя́ дрéвле врáном,// мы́сленныя отбéгл есѝ, óтче, Iезавéли, к покрóву Хрiстóву.
Хор: Пресвятáя Богорóдице, спасù нас.
Чтец: Царь слáвы и Творéц, обагри́в кровьмѝ, Богороди́тельнице,// Свою́ багряни́цу омочи́в, тáинственно очервленѝ.
Глас 2
Хор: Преподóбне óтче Iоáнне, молù Бóга о нас.
Чтец: Кади́ло благовóнно Всеви́дцу, преподóбне, твоя́ моли́твы принéсл есѝ,// я́же обоня́в и прiéм, пóстническим ликóм причтè тя.
Хор: Преподóбне óтче Iоáнне, молù Бóга о нас.
Чтец: Яви́лся есѝ чýдо величáйше, сердцà, преподóбне, благочести́вых ужасáя:// кáко пред враты̀ претерпéл есѝ роди́телей, нищéтствуя и оскорбля́емь.
Слáва Ѻтцý и Сы́ну и Святóму Дýху.
Тропáрь: Закóнно в моли́твах и пощéнiях, преподóбне, претерпевáя,/ в безстрáстiе облéклся есѝ,// плóти мудровáнiя смири́в крéпостiю Божéственнаго Дýха.
И ны́не и прúсно и во вéки векóв. Амúнь.
Богорóдичен: Я́ко мироухáнен ши́пок от удóлiй, Пречи́стая, Чи́стый Тя обрéте/ и посредè Тебè всели́ся,// благовóнiя испóлнив человéчество.
Катавáсiя Срéтенiя (глас 3): Утверждéнiе на Тя надéющихся,/ утвердù, Гóсподи, Цéрковь,/ ю́же стяжáл есù// честнóю Твоéю Крóвiю.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Кондáк прп. Iоáнна, глас 2: Возлюби́в, премýдре, нищетý неокрáдому,/ роди́телей твои́х богáтство возненави́дел есѝ/ и, Евáнгелiе в рукáх твои́х держà,/ послéдовал есѝ Хрiстý Бóгу, Iоáнне,// моля́ся непрестáнно о всех нас.
Íкос: Кто довóлен достóйно воспéти твоя́ труды̀, и болéзни,/ и дéланiя мнóгая, и слáву, и вели́чество?/ Но моли́твами твои́ми к Бóгу благопрiя́тными/ Дýха благодáть мне ны́не подáждь,/ я́ко да твоя́ пáче естествà пóдвиги изрекý вéрно/ и воспою́, éже пáче слóва, терпéнiе твоè и сóвести пождáнiе, всеблажéнне,/ и́мже льсти́ваго врагà посрами́л есѝ.// Не престáй моля́ся о всех нас.
Кондáк прп. Пáвла Фивéйскаго, глас 3: Я́ко свети́ло незаходя́щее мы́сленнаго Сóлнца,/ сошéдшеся, днесь восхвáлим в пéснех:/ возсiя́л бо есѝ сýщым во тьме неразýмiя,/ вся возводя́ к Божéственней высотè,// фивéев украшéнiе, Пáвле преподóбне, отцéв и пóстников твéрдое основáнiе.
Седáлен прп. Пáвла, глас 1: Мíра крáсная от сéрдца возненави́дев/ и Еди́наго Бóга от душѝ возлюби́в,/ пусты́ню, я́ко во обитáтельный град, Пáвле, пости́гл есѝ./ В еди́нех тóкмо видéнiих упражня́яся,/ яви́лся есѝ, я́ко Áнгел, с плóтiю живы́й.// Тем тя почитáем.
Слáва Ѻтцý и Сы́ну и Святóму Дýху.
Седáлен прп. Iоáнна, глас 3: Богáтство тлéнное и слáву мимотекýщую остáвив,/ Небéсное богáтство воспрiя́л есѝ и слáву, óтче,/ и́стинно вéчнующую, блажéнне./ Тем блажи́м святóе твоè успéнiе/ и, торжествýюще в нем, вопiéм тебè:// помянѝ нас ко Гóсподу, я́ко имéя, Iоáнне, дерзновéнiе.
И ны́не и прúсно и во вéки векóв. Амúнь.
Богорóдичен из минéи, глас 3: Я́ко невоздéланная, Дéво, лозà,/ краснéйшiй Грозд прозяблà есѝ, источáющ нам винò спаси́тельное,/ всех веселя́щее дýши и телесà./ Тéмже, я́ко винý Тя дóбрых блажáще при́сно,/ со Áнгелом вопiéм Тебè:// рáдуйся, Благодáтная.
ПЕСНЬ 4
Iрмóс: Гóру Тя благодáтiю Бóжiею прiосенéнную,/ прозорлúвыма Аввакýм/ усмотрúв очúма,/ из Тебè изы́ти Iзрáилеву провозглашáше Святóму,/ во Спасéнiе нáше// и обновлéнiе.
Хор: Слáва, Гóсподи, Святóму Воскресéнiю Твоемý.
Чтец: Кто сей Спас и҆́же из Едóма исходя́, венéц нося́ тернóвен,/ очервлéнну ри́зу имы́й, на дрéве ви́ся;/ Iзрáилев есть Сей Святы́й,// во Спасéнiе нáше и обновлéнiе.
Хор: Слáва, Гóсподи, Святóму Воскресéнiю Твоемý.
Чтец: Ви́дите лю́дiе непокори́вiи, и устыди́теся:/ Егóже бо я́ко злодéя вы вознестѝ на крест у Пiлáта испроси́сте умоврéдне,// смéрти разруши́в си́лу, боголéпно воскрéс из грóба.
Хор: Пресвятáя Богорóдице, спасù нас.
Богорóдичен: Дрéво Тя, Дéво, жи́зни вéмы:/ не бо снéди плод смертонóсный человéком из Тебè прозябè,/ но животà присносýщнаго наслаждéнiе,// во Спасéнiе нас пою́щих Тя.
Глас 1
Хор: Пресвятáя Богорóдице, спасù нас.
Чтец: Слы́ши чудéс нéбо, и внушáй землè,/ я́ко Дщи пéрстнаго ýбо пáдшаго Адáма, Бóгу наречéна бысть,/ и Своемý Содéтелю Роди́тельница,// на Спасéнiе нáше и обновлéнiе.
Хор: Пресвятáя Богорóдице, спасù нас.
Чтец: Поéм вели́кое и стрáшное Твоè тáинство,/ премéрных бо утаи́вся чиноначáлiй,/ на Тя И҆́же сый сни́де я́ко дождь на рунò, Всепéтая,// на Спасéнiе нас пою́щих Тя.
Глас 8
Хор: Преподóбне óтче Пáвле, молù Бóга о нас.
Чтец: Насаждéн в домý Бóжiи, добродéтелей благоплóдiе прозя́бл есѝ// и плотскáя увяди́л есѝ востáнiя пóстничеством твои́м.
Хор: Преподóбне óтче Пáвле, молù Бóга о нас.
Чтец: Огнéм любвè Бóжiя страстéй тéрнiе попали́л есѝ// и тебè самáго Дýха, óтче, жили́ще показáл есѝ.
Хор: Преподóбне óтче Пáвле, молù Бóга о нас.
Чтец: Жезлóм добродéтельныя твоея́ жи́зни, я́коже звéри, стрáсти отгнáл есѝ,// тéмже и твоя́ смерть звéри на погребéнiе твоè собрà.
Хор: Пресвятáя Богорóдице, спасù нас.
Чтец: Багряни́ца исткáся тáинственная из чи́стых кровéй Твои́х всех Бóгу,// в ню́же одéявся, Богорóдице, соединѝ нас Бóгу и Отцý.
Глас 2
Хор: Преподóбне óтче Iоáнне, молù Бóга о нас.
Чтец: В рýбищах убóгих сокрóвище сокровéно яви́лся есѝ, Богодохновéнне:/ Божéственную бо одéжду возлюби́л есѝ// и, одéявся, в чертóг Вы́шнiй вшел есѝ.
Хор: Преподóбне óтче Iоáнне, молù Бóга о нас.
Чтец: Прiéм Небéсное сéмя, Богодохновéнне, сéрдца браздóю клас красéн воздéлал есѝ,// умы́ препитавáющ преподóбно пáмять твою́ чтýщим.
Слáва Ѻтцý и Сы́ну и Святóму Дýху.
Тропáрь: Претерпéл есѝ в тéснейшей кýщи, чýдне, нищ,/ я́коже другíй Лáзарь, вóлею быв.// Тéмже почи́л есѝ Авраáма ны́не в нéдрех, óтче преподóбне.
И ны́не и прúсно и во вéки векóв. Амúнь.
Богорóдичен: Упрáви моея́ душѝ движéнiя, Всенепорóчная,/ к Божéственным повелéнiем Возсiя́вшаго из чрéва Твоегò,// бýри избавля́ющи мя житéйских соблáзнов ходáтайством Твои́м.
Катавáсiя Срéтенiя (глас 3): Покры́ла есть небесà добродéтель Твоя́, Хрїстè,/ из кiвóта бо прошéд святы́ни Твоея́ нетлéнныя Мáтере,/ в хрáме слáвы Твоея́ явúлся есù/ я́ко младéнец руконосúмь,// и испóлнишася вся Твоегò хвалéнiя.
ПЕСНЬ 5
Iрмóс: Просветúвый сiя́нiем пришéствiя Твоегó, Хрїстè,/ и осветúвый Крестóм Твоúм/ мíра концы̀,/ сердцá просветù/ свéтом Твоегó Богоразýмiя,// правослáвно пою́щих Тя.
Хор: Слáва, Гóсподи, Святóму Воскресéнiю Твоемý.
Чтец: Пáстыря овцáм вели́каго и Гóспода,/ iудéи дрéвом крéстным умертви́ша:/ но Той я́ко óвцы, мéртвыя, во áде погребéнныя,// держáвы смéртныя избáви.
Хор: Слáва, Гóсподи, Святóму Воскресéнiю Твоемý.
Чтец: Крестóм Твои́м мiр благовести́в,/ и проповéдав плéнным, Спáсе мой, оставлéнiе,/ держáву имýщаго посрами́л есѝ, Хрїстè:// нáга, обнищáвша показáвый Божéственным востáнiем Твои́м.
Хор: Пресвятáя Богорóдице, спасù нас.
Богорóдичен: Прошéнiя вéрно прося́щих, Всепéтая, не прéзри:/ но прiимѝ, и сiя́ доношáй Сы́ну Твоемý, Пречи́стая,/ Бóгу Еди́ному Благодéтелю,// Тебè бо Предстáтельницу стяжáхом.
Глас 1
Хор: Пресвятáя Богорóдице, спасù нас.
Чтец: Веселя́тся небéсныя си́лы зря́ще Тя:/ рáдуются с ни́ми человéков собрáнiя:/ Рождествóм бо Твои́м совокупи́шася, Дéво Богорóдице,// éже достóйно слáвим.
Хор: Пресвятáя Богорóдице, спасù нас.
Чтец: Да дви́жатся вси язы́цы человéчестiи и мы́сли,/ к похвалè человéческаго вои́стинну удобрéнiя,/ Дéва предстои́т я́ве слáвящи,// вéрою Тоя́ пою́щих чудесà.
Глас 8
Хор: Преподóбне óтче Пáвле, молù Бóга о нас.
Чтец: В пéнiих и пощéнiих, моли́твах же и бдéнiих пожи́в, преподóбне,// к Бóгу всели́лся есѝ.
Хор: Преподóбне óтче Пáвле, молù Бóга о нас.
Чтец: Житiè твоè всечестнóе бысть в Гóсподе, Пáвле всеблажéнне,// и погребéнiе твоè преслáвно.
Хор: Преподóбне óтче Пáвле, молù Бóга о нас.
Чтец: Течéнiе пощéнiя, преподóбне, скончáв,// Вы́шним си́лам собесéдник, óтче, был есѝ.
Хор: Пресвятáя Богорóдице, спасù нас.
Чтец: Дéву по Рождествè поéм Тя, Богорóдице,// Ты бо Бóга Слóва плóтiю мíру родилà есѝ.
Глас 2
Хор: Преподóбне óтче Iоáнне, молù Бóга о нас.
Чтец: Стрáнен земны́х сластéй был есѝ,/ стрáнен свои́х, стрáнен роди́телей твои́м изволéнiем,/ и, воздержáнiем себè очи́стив,// усвóился есѝ Вседержи́телю, óтче Iоáнне, обнищáв дýхом.
Хор: Преподóбне óтче Iоáнне, молù Бóга о нас.
Чтец: Храм себè Святы́я Трои́цы соверши́в, претерпéл есѝ, утесня́емь кýщею,/ Божéственными поучéнiи дýшу очищáя// и добрóту Бóжiю неизглагóланную, óтче Iоáнне, при́сно зря.
Слáва Ѻтцý и Сы́ну и Святóму Дýху.
Тропáрь: Закóна Бóжiя испóлнитель яви́лся есѝ,/ ничтóже предсуди́в пáче Сегò любвè, Богомýдре óтче,/ ни брáтiй бо, ни роди́телей тя любóвь,// нижè богáтство, нижè достóинство, нижè плóти слáдость разслáбиша.
И ны́не и прúсно и во вéки векóв. Амúнь.
Богорóдичен: Емманýила, всех Влады́ку, раждáеши нетлéнно,/ пребы́вши Дéва и по рождествè, Дéво Мáти./ Егóже непрестáнно моли́// искушéнiй врáжiих избáвити под кров Твой прибегáющiя.
Катавáсiя Срéтенiя (глас 3): Я́ко вúде Исáiа обрáзно/ на Престóле превознесéна Бóга,/ от áнгел слáвы дориносúма,/ о окая́нный, вопiя́ше, аз:/ провúдех бо воплощáема Бóга,// Свéта Невечéрня, и мíром влады́чествующа.
ПЕСНЬ 6
Iрмóс: Обы́де нас послéдняя бéздна,/ несть избавля́яй,/ вменúхомся,/ я́ко óвцы заколéнiя,/ спасù лю́ди Твоя́, Бóже наш,// Ты бо крéпость немощствýющих и исправлéнiе.
Хор: Слáва, Гóсподи, Святóму Воскресéнiю Твоемý.
Чтец: Согрешéнiем первоздáннаго, Гóсподи, лю́те уязви́хомся,/ рáною же исцели́хомся Твоéю,/ éюже за ны уязви́лся есѝ, Хрїстè:// Ты бо крéпость немощствýющих и исправлéнiе.
Хор: Слáва, Гóсподи, Святóму Воскресéнiю Твоемý.
Чтец: Возвéл ны есѝ из áда, Гóсподи,/ ки́та уби́в всея́дца, Всеси́льне,/ Твоéю держáвою низложи́в тогò си́лу:// Ты бо Живóт, и Свет есѝ, и Воскресéнiе.
Хор: Пресвятáя Богорóдице, спасù нас.
Богорóдичен: Веселя́тся о Тебè, Дéво Пречи́стая,/ рóда нáшего прáотцы, Едéм воспрiéмше Тобóю,/ егóже преступлéнiем погуби́ша:// Ты бо, Чи́стая, и прéжде Рождествà, и по Рождествè есѝ.
Глас 1
Хор: Пресвятáя Богорóдице, спасù нас.
Чтец: Предстоя́т раболéпне Рождествý Твоемý чи́ни небéснiи,/ дивя́щеся достóйно Твоемý безсéменному Рождествý, Приснодéво:// Ты бо, Чи́стая, и прéжде Рождествà, и по Рождествè есѝ.
Хор: Пресвятáя Богорóдице, спасù нас.
Чтец: Воплоти́ся прéжде сый Безплóтен, Слóво из Тебè, Пречи́стая,/ вся́ческая вóлею творя́й,// безтелéсных вóинства приведы́й от небытiя́, я́ко Всеси́лен.
Глас 8
Хор: Преподóбне óтче Пáвле, молù Бóга о нас.
Чтец: Рýки простéр к Бóгу, дýшу твою́, преподóбне, Томý преложи́л есѝ,// во дни и нощѝ благоугождáя Емý.
Хор: Преподóбне óтче Пáвле, молù Бóга о нас.
Чтец: Прослáвиша успéнiе твоè Áнгелов вóинства,// прорóков же чи́ни и святы́х апóстолов, óтче преподóбне.
Хор: Преподóбне óтче Пáвле, молù Бóга о нас.
Чтец: Бýрю страстéй пребéг, вéтрилом, преподóбне, крáйняго пóстничества// в небýрное пристáнище устреми́лся есѝ Хрiстóво.
Хор: Пресвятáя Богорóдице, спасù нас.
Чтец: Еди́на слóвом плóтiю Слóво Рóждшая,// избáви, мо́лимся, сетéй врагà дýши нáша.
Глас 2
Хор: Преподóбне óтче Iоáнне, молù Бóга о нас.
Чтец: Гóрдаго змíя низложи́л есѝ смиреномýдрiя орýжiи, всеблажéнне,// и, возвы́сився дýхом, во оби́тели присножи́зненныя всели́лся есѝ.
Хор: Преподóбне óтче Iоáнне, молù Бóга о нас.
Чтец: Даровáнiй испóлнился есѝ Дýха и лукáвствiя покори́л есѝ дýхи,// я́ко смы́слен, и премýдр, и Бóгу весьмà возложéн.
Слáва Ѻтцý и Сы́ну и Святóму Дýху.
Тропáрь: Безстрáстiя сiя́я высóтами, óтче Iоáнне,/ коли́бою утесня́емь и напáстьми облагáемь,// терпéл есѝ, Божéственне укрепля́емь.
И ны́не и прúсно и во вéки векóв. Амúнь.
Богорóдичен: Равнодéтельна Рóждшему и сопрестóльна Слóва/ из утрóбы Твоея́, Чи́стая, воплоти́ла есѝ,// за благоутрóбiе неизречéнное нáше все понéсшаго.
Катавáсiя Срéтенiя (глас 3): Возопù к Тебè вúдев стáрец очúма спасéнiе,/ éже лю́дем прiúде от Бóга,// Хрїстè, Ты Бог мой.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 1: Воскрéсл есѝ, я́ко Бог, из грóба во слáве,/ и мiр совоскреси́л есѝ;/ и естествó человéческое я́ко Бóга воспевáет Тя, и смерть исчезè;/ Адáм же ликýет, Влады́ко;/ Éва ны́не от уз избавля́ема рáдуется, зовýщи:// Ты есѝ, И҆́же всем подая́, Хрїстè, воскресéнiе.
Íкос: Воскрéсшаго триднéвно воспои́м я́ко Бóга Всеси́льна,/ и вратà áдова стéршаго,/ и я́же от вéка из грóба воздви́гшаго,/ миронóсицам я́вльшагося, я́коже благоизвóлил есть,/ прéжде сим éже рáдуйтеся, рекíй:/ и апóстолом рáдость возвещáя, я́ко Еди́н Жизнодáвец./ Тéмже вéрою жены̀ ученикóм знáменiя побéды благовествýют,/ и ад стенéт, и смерть рыдáет:/ мiр же весели́тся, и вси с ним рáдуются.// Ты бо пóдал есѝ, Хрїстè, всем Воскресéнiе.
ПЕСНЬ 7
Iрмóс: Тебè ýмную, Богорóдице, пещь/ разсмотря́ем, вéрнiи,/ я́коже бо óтроки спасè три Превозносúмый,/ мiр обновù,/ во чрéве Твоéм всецéл,// хвáльный отцéв Бог и препрослáвлен.
Хор: Слáва, Гóподи, Святóму Воскресéнiю Твоемý.
Чтец: Убоя́ся земля́, сокры́ся сóлнце, и помéрче свет,/ раздрáся церкóвная божéственная завéса,/ кáменiе же разсéдеся:/ на крестè бо ви́сит Прáведный,// Хвáльный отцéв Бог, и препрослáвлен.
Хор: Слáва, Гóсподи, Святóму Воскресéнiю Твоемý.
Ты быв áки безпомóщен,/ и уя́звен в мéртвых вóлею нас рáди/ превозноси́мый, вся свободи́л есѝ,/ и держáвною рукóю совоскреси́л есѝ,// хвáльный отцéв Бог, и препрослáвлен.
Хор: Пресвятáя Богорóдице, спасù нас.
Богорóдичен: Рáдуйся, истóчниче присноживы́я воды̀./ Рáдуйся, раю́ пи́щный./ Рáдуйся, стенò вéрных./ Рáдуйся, Неискусобрáчная./ Рáдуйся, всемíрная Рáдосте,/ Éюже нам возсiя́// Хвáльный отцéв Бог, и препрослáвлен.
Глас 1
Хор: Пресвятáя Богорóдице, спасù нас.
Чтец: Тя, Богорóдице, лéствицу Iáков прорóчески разумевáет:/ Тобóю бо Превозноси́мый на землѝ яви́ся,/ и с человéки поживè, я́ко благоволѝ,// Хвáльный отцéв Бог и Препрослáвлен.
Хор: Пресвятáя Богорóдице, спасù нас.
Чтец: Рáдуйся, Чи́стая, из Тебè прóйде Пáстырь,/ И́же во Адáмову кóжу обóлкся вои́стинну Превозноси́мый,/ во всегó мя человéка, за благоутрóбiе непости́жное:// Хвáльный отцéв Бог и Препрослáвлен.
Глас 8
Хор: Преподóбне óтче Пáвле, молù Бóга о нас.
Чтец: Мудровáнiе плотскóе покори́в Дýху, преподóбный вопiя́ше:// благословéн есѝ во вéки, Гóсподи Бóже отéц нáших.
Хор: Преподóбне óтче Пáвле, молù Бóга о нас.
Чтец: Спасéн быв от врáжiих сéтей, преподóбне, в рáдости вопiя́ше:// благословéн есѝ во вéки, Гóсподи Бóже отéц нáших.
Хор: Преподóбне óтче Пáвле, молù Бóга о нас.
Чтец: Страстéй плáмень весь попрáв пóстнически, преподóбный вопiя́ше:// благословéн есѝ во вéки, Гóсподи Бóже отéц нáших.
Хор: Пресвятáя Богорóдице, спасù нас.
Чтец: Нéбо сотвори́вый Дéву,/ и из Нея́, я́ко сóлнце, возсiя́в,// благословéн есѝ во вéки, Гóсподи Бóже отéц нáших.
Глас 2
Хор: Преподóбне óтче Iоáнне, молù Бóга о нас.
Чтец: Тéсный предпочéл есѝ, нéжели прострáнный, путь, достослáвне,/ и, рáдуяся, претерпéл есѝ пред враты̀ роди́телей твои́х,// укоря́емь и удручáемь мнóгими болéзньми, Богоблажéнне.
Хор: Преподóбне óтче Iоáнне, молù Бóга о нас.
Чтец: Тебè самáго удобри́л есѝ краснéйшими, мýдре, восхождéнiи,/ плóти умертви́в мудровáнiе./ Тéмже всели́лся есѝ в Небéсная,// ликóм счисля́емь при́сно честны́х отцéв, досточýдне.
Слáва Ѻтцý и Сы́ну и Святóму Дýху.
Тропáрь: Путѝ шéствуя, вводя́щыя к Божéственному покóю,/ уклони́лся есѝ прóпастей дéмонских, блажéнне,/ Божéственною покрывáемь благодáтiю, вопiя́ше:// Сый благословéн и препрослáвлен.
И ны́не и прúсно и во вéки векóв. Амúнь.
Богорóдичен: Поéм Рождествò Твоè, Благословéнная,/ и́мже избáвихомся дрéвняго осуждéнiя,/ и Тя блажи́м, Богоблажéнная, Еди́ну, Ю́же возлюбѝ,// Сый благословéн и препрослáвлен.
Катавáсiя Срéтенiя (глас 3): Тебè во огнù оросúвшаго óтроки богослóвившыя,/ и в Дéву Нетлéнну всéльшагося Бóга Слóва поúм,/ благочéстно пою́ще:// благословéн Бог отéц нáших.
ПЕСНЬ 8
Iрмóс: В пещù óтроцы Iзрáилевы,/ я́коже в горнúле,/ добрóтою благочéстiя чистéе злáта блещáхуся, глагóлюще:/ благословúте, вся делá Госпóдня, Гóспода,// пóйте и превозносúте во вся вéки.
Хор: Слáва, Гóсподи, Святóму Воскресéнiю Твоемý.
Чтец: И҆́же вóлею вся творя́й, и претворя́яй,/ обращáяй сень смéртную в вéчную жизнь,/ стрáстiю Твоéю, Слóве Бóжiй,/ Тебè непрестáнно вся делà Госпóдня,// Гóспода пои́м, и превознóсим во вся вéки.
Хор: Слáва, Гóсподи, Святóму Воскресéнiю Твоемý.
Чтец: Ты разори́л есѝ сокрушéнiе, Хрїстè, и окая́нство,/ во вратéх и тверды́нях áдовых,/ воскрéс из грóба триднéвен./ Тебè непрестáнно вся делà, я́ко Гóспода, пою́т,// и превознóсят во вся вéки.
Хор: Пресвятáя Богорóдице, спасù нас.
Богорóдичен: Я́же без сéмене и преестéственне от облистáнiя Божéственнаго/ Рóждшую би́сера многоцéннаго Хрїстà, воспои́м глагóлюще:/ благослови́те вся делá Госпóдня, Гóспода,// пóйте и превозноси́те Егó во вся вéки.
Продолжéнiе здесь