Неделя 32 по Пятидесятнице,перед Богоявлением.ОБРЕЗАНИЕ ГОСПОДНЕ. Свт.Василия Великого. УТРЕНЯ КАНОН
14 января́ 2024 гóда. Недéля 32 по Пятидеся́тнице, пéред Богоявлéнiем, Обрéзанiе Госпóда нáшего Iисýса Хрїстà. Святúтеля Васíлiя Велúкаго, архiепúскопа Кесарíи Каппадокíйскiя. Глас 7. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
(И далее хор продолжает чередовать стiхи 135 псалма и Аллилуиа)
[Псалом 135 Аллилуиа]Исповéдайтеся Бóгу богóв, я́ко в век ми́лость Егò./ Исповéдайтеся Гóсподеви господéй, я́ко в век ми́лость Егò./ Сотвóршему чудесà вéлiя еди́ному, я́ко в век ми́лость Егò./ Сотвóршему небесà рáзумом, я́ко в век ми́лость Егò./ Утверди́вшему зéмлю на водáх, я́ко в век ми́лость Егò./ Сотвóршему свети́ла вéлiя еди́ному, я́ко в век ми́лость Егò./ Сóлнце во óбласть дне, я́ко в век ми́лость Егò./ Лунý и звéзды во óбласть нóщи, я́ко в век ми́лость Егò./ Порази́вшему Еги́пта с пéрвенцы eгò, я́ко в век ми́лость Егò,/ и извéдшему Iзрáиля от среды́ их, я́ко в век ми́лость Егò./ Рукóю крéпкою и мы́шцею высóкою, я́ко в век ми́лость Егò./ Раздéльшему Чермнóе мóре в разделéнiя, я́ко в век ми́лость Егò./ И провéдшему Iзрáиля посредè eгò, я́ко в век ми́лость Егò./ И истря́сшему фараóна и си́лу eгò в мóре Чермнóе, я́ко в век ми́лость Егò./ Провéдшему лю́ди Своя́ в пусты́ни, я́ко в век ми́лость Егò./ Порази́вшему царѝ вéлiя, я́ко в век ми́лость Егò,/ и уби́вшему царѝ крéпкiя, я́ко в век ми́лость Егò:/ Сиóна, царя́ Аморрéйска, я́ко в век ми́лость Егò,/ и Óга, царя́ Васáнска, я́ко в век ми́лость Егò./ И дáвшему зéмлю их достоя́нiе, я́ко в век ми́лость Егò./ Достоя́нiе Iзрáилю, рабý Своемý, я́ко в век ми́лость Егò./ Я́ко во смирéнiи нáшем помянý ны Госпóдь, я́ко в век ми́лость Егò./ И избáвил ны есть от врагóв нáших, я́ко в век ми́лость Егò./ Дая́й пи́щу вся́кой плóти, я́ко в век ми́лость Егò.
Исповéдайтеся Бóгу Небéсному, я́ко в век ми́лость Егò.
Аллилýїа (трúжды)
ВЕЛИЧАНИЕ ПРАЗДНИКА
Хор: Величáем Тя,/ святúтелю óтче Васíлiе,/ и чтим святýю пáмять твою́,/ ты бо мóлиши о нас // Хрїстà Бóга нáшего.
(И далее хор продолжает чередовать стiхи Избранного псалма и Величанiе)
ПСАЛОМ ИЗБРАННЫЙ
Услы́шите сiя́ вси язы́цы, внуши́те вси́, живýщiи по вселéнней. Устá моя́ возглагóлют премýдрость, и поучéнiе сéрдца моегó рáзум./ Прiиди́те, чáда, послýшайте менé, стрáху Госпóдню научý вас./ Благовести́х прáвду в цéркви вели́цей./ И҆́стину Твою́ и спасéнiе Твоé рех./ Повéм И҆́мя Твоé брáтiи моéй, посредé цéркве воспою́ Тя./ Услы́шати ми глас хвалы́ Твоея́ и повéдати вся чудесá Твоя́./ Гóсподи, возлюби́х благолéпiе дóму Твоегó, и мéсто селéнiя слáвы Твоея́./ Возненави́дех цéрковь лукáвнующих, и с нечести́выми не ся́ду./ Я́ко сохрани́х пути́ Госпóдни и не нечéствовах от Бóга моегó./ Устá прáведнаго поучáтся премýдрости, и язы́к егó возглагóлет суд./ Прáвда Егó пребывáет в век вéка./ Свящéнницы Твои́ облекýтся прáвдою, и преподóбнiи Твои́ возрáдуются.// Блажéни живýщiи в домý Твоéм, в вéки векóв восхвáлят Тя.
(При пении избранного псалма в воскресные дни заключительное «Слава, и ныне» и «Аллилуия» не поется. Сразу после последнего стиха избранного псалма - величание и тропари воскресные «Ангельский собор...»)
Хор: Величáем Тя,/ святúтелю óтче Васíлiе,/ и чтим святýю пáмять твою́,/ ты бо мóлиши о нас // Хрїстà Бóга нáшего.
ТРОПАРИ ВОСКРЕСНЫЕ, ГЛАС 5
Благословéн есù, Гóсподи,/научù мя оправдáнiем Твоúм.(Пс.118:12)
Áнгельскiй собóр удиви́ся,/ зря Тебè в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есù, Гóсподи,/научù мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есù, Гóсподи,/научù мя оправдáнiем Твоúм.
Зелó рáно мvронóсицы течáху/ ко грóбу Твоемý рыдáющiя,/ но предстà к ним Áнгел и речè:/ рыдáнiя врéмя престà, не плáчите,/ воскресéнiе же апóстолом рцы́те.
Благословéн есù, Гóсподи,/научù мя оправдáнiем Твоúм.
Мvронóсицы жены̀ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речè, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егò Сы́нови, и Святóму Дýху,/ Святéй Трóице во еди́ном существè,/ с Серафíмы зовýще:/ Свят, Свят, Свят есѝ, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехà, Дéво, Адáма избáвила есѝ,/ рáдость же Éве/ в печáли мéсто подалà есѝ,/ пáдшiя же от жи́зни/ к сей напрáви/ из Тебè воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 7: И҆́же наш зрак воспрiéмый,/ и претерпéвый Крест плóтски,/ спаси́ мя воскресéнiем Твои́м Хрїстè Бóже,// я́ко Человеколю́бец.
СЕДАЛЬНЫ СВЯТИТЕЛЯ ПО ПОЛИЕЛЕИ
Глас 5 (по 1‑м стiхослóвiи): Я́ко цáрское украшéнiе Цéркве, Васíлiя вси да восхвáлим,/ учéнiй сокрóвище неоскýдное,/ си́ми бо той наказá нас Трóицу почитáти Святýю,// соединéну ýбо Существóм, разделéну же Ипостáсьми.
Глас 1 (ин по 1‑м стiхослóвiи): Васíлiе премýдре, предстоя́й Трóице,/ моли́ся получи́ти в День судá нам, пою́щим тя и чтýщим пáмять твою́,/ благодáть, ми́лость и очищéнiе прегрешéнiй,// я́ко да усты́ прославля́ем и сéрдцем Еди́наго Человеколю́бца.
Глас 8 (по 2‑м стiхослóвiи): Неизречéнныя премýдрости Богови́дне почéрпл еси́ богáтство тáйное,/ всем источи́л еси́ правослáвiя вóды,/ вéрных ýбо сердцá Божéственне веселя́щiя,/ невéрных же велéнiя достóйне потопля́ющiя./ Отню́дуже обою́ду благочéстiя пóты/ показáлся еси́ непобеди́м Трóицы побóрник, святи́телю Васíлiе./ Моли́ся Хрїстý Бóгу прегрешéнiй оставлéнiе даровáти// прáзднующим любóвiю святýю пáмять твою́.
Глас 3 (ин по 2‑м стiхослóвiи): Всю напои́л еси́ вселéнную, я́коже водáми,/ учéнiи твои́ми, благочéстiя собрáнными догмáты,/ жи́зни бо Истóчник в тебé препочивáше вои́стинну, Васíлiе./ Егóже моли́, я́ко дерзновéнiе стяжáвый, Богодохновéнне,// даровáти нам вéлiю ми́лость.
Седáльны свт. Васíлiя по полiелéе, глас 8: Си́лою словéс Божéственных éреси низложи́л еси́ мрáчныя,/ вся шатáнiя Евнóмiева погрузи́л еси́,/ человéком бо Дýха Бóга бы́ти проповéдал еси́/ и рук воздéнiем враги́ умертви́л еси́./ Все прогнáл еси́ Савéллiево служéнiе,/ вся же мудровáнiя Нестóрiева упраздни́л еси́,/ святи́телю Васíлiе./ Моли́ся Хрїстý Бóгу/ прегрешéнiй оставлéнiе даровáти// прáзднующим любóвiю святýю пáмять твою́.
Слáва Ѻтцý и Сы́ну и Святóму Дýху.
Ин седáлен святителя, глас 8: Неизречéнныя премýдрости Богови́дне почéрпл еси́ богáтство тáйное,/ всем источи́л еси́ правослáвiя вóды,/ вéрных ýбо сердцá Божéственне веселя́щiя,/ невéрных же велéнiя достóйне потопля́ющiя./ Отню́дуже обою́ду благочéстiя пóты/ показáлся еси́ непобеди́м Трóицы побóрник, святи́телю Васíлiе./ Моли́ся Хрїстý Бóгу прегрешéнiй оставлéнiе даровáти// прáзднующим любóвiю святýю пáмять твою́.
И ны́не и прúсно и во вéки векóв. Амúнь.
Обрéзанiя, глас 4 (по 2‑м стiхослóвiи): И́же естествóм Неви́димый, ны́не ви́дим есть плóтiю:/ Слóво Несоздáнное, ны́не из Дéвы Чи́стыя раждáемо, зи́ждется./ Тéмже и по закóну нас рáди, человéков,/ я́коже осмоднéвен, обрéзуется Младéнец.// Томý ýбо поклони́мся, я́ко Спáсу нáшему.
СТЕПЕННА, ГЛАС 7
1 АНТИФОН
Хор: Плен Сióнь от лéсти обратúв,/ и менè Спáсе, оживù,// изимáя рабóтныя стрáсти. (Двáжды)
В юг сéяй скóрби пóстныя со слéзами,// сей рáдостныя пóжнет рукоя́ти присноживопитáнiя. (Двáжды)
Слáва Отцý и Сы́ну и Святóму Дýху.
Святы́м Дýхом истóчник Божéственных сокрóвищ,/ от Негóже премýдрость, рáзум, страх:// Томý хвалá и слáва, честь и держáва.
И ны́не и прúсно и во вéки векóв. Амúнь.
Святы́м Дýхом истóчник Божéственных сокрóвищ,/ от Негóже премýдрость, рáзум, страх:// Томý хвалá и слáва, честь и держáва.
2 АНТИФОН
Áще не Госпóдь созúждет дом душéвный, всýе труждáемся:// рáзве бо Тогó ни дея́нiе, ни слóво совершáется. (Двáжды)
Плодá чрéвна, святíи духодви́жно прозябáют// отéческая предáнiя, сыноположéнiя. (Двáжды)
Слáва Отцý и Сы́ну и Святóму Дýху.
Святы́м Дýхом, вся́ческая éже бы́ти и҆́мут:/ прéжде бо всех Бог, всех Госпóдьство,// свет непристýпен, живóт всех.
И ны́не и прúсно и во вéки векóв. Амúнь.
Святы́м Дýхом, вся́ческая éже бы́ти и҆́мут:/ прéжде бо всех Бог, всех Госпóдьство,// свет непристýпен, живóт всех.
3 АНТИФОН
Боя́щiися Гóспода, путù животá обрéтше,// ны́не и прúсно ублажáются слáвою нетлéнною. (Двáжды)
Óкрест трапéзы твоея́, я́ко стéблiе ви́дя исчáдiя твоя́,// рáдуйся и весели́ся, приводя́ сiя́ Хрїстóви пастыреначáльнику. (Двáжды)
Слáва Отцý и Сы́ну и Святóму Дýху.
Святы́м Дýхом глубинá даровáнiй,/ богáтство слáвы, судéб глубинá вéлiя:// единослáвен Отцý, и Сы́ну, служи́мь бо.
И ны́не и прúсно и во вéки векóв. Амúнь.
Святы́м Дýхом глубинá даровáнiй,/ богáтство слáвы, судéб глубинá вéлiя:// единослáвен Отцý, и Сы́ну, служи́мь бо.
ПРОКИМЕН
Чтец: Прокíмен, глас седьмы́й, псалóм Давíдов: Воскресни́, Гóсподи Бóже мой, да вознесéтся рукá Твоя́, не забýди убóгих Твои́х до концá. (Пс.9:33)
Хор: Воскреснù, Гóсподи Бóже мой, да вознесéтся рукá Твоя́,// не забýди убóгих Твоúх до концá.
Чтец: Исповéмся Тебé Гóсподи всем сéрдцем мои́м, повéм вся чудесá Твоя́.(Пс.9:2)
Хор: Воскреснù, Гóсподи Бóже мой, да вознесéтся рукá Твоя́,// не забýди убóгих Твоúх до концá.
Чтец: Воскресни́, Гóсподи Бóже мой, да вознесéтся рукá Твоя́.
Хор: Не забýди убóгих Твоúх до концá.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егò, хвали́те Егò во утвержéнiи си́лы Егò.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Iоáнна Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Ин.зач.66): Во врéмя óно, яви́ся Iисýс ученикóм Свои́м, востáв от мéртвых, на мóри Тiверiáдстем. яви́ся же си́це. Бя́ху вкýпе Сíмон Петр, и Фомá нарицáемый Близнéц, и Нафанáил, и҆́же бе от Кáны Галiлéйскiя, и сы́на Зеведéова, и и҆́на от учени́к Егó два. Глагóла им Сíмон Петр: идý ры́бы лови́ти. Глагóлаша емý: и҆́дем и мы с тобóю. Изыдóша же и вседóша áбiе в корáбль, и в ту нощь не я́ша ничесóже. У́тру же бы́вшу, ста Iисýс при брéзе: не познáша же ученицы́, я́ко Iисýс есть. Глагóла же им Iисýс: дéти, едá что снéдно и҆́мате? Отвещáша Емý: ни. Он же речé им: ввéрзите мрéжу о деснýю странý корабля́ и обря́щете. Ввергóша же, и ктомý не можáху привлещи́ ея́ от мнóжества рыб. Глагóла же учени́к той, егóже любля́ше Iисýс, Петрóви: Госпóдь есть. Сíмон же Петр слы́шав, я́ко Госпóдь есть, епенди́том препоя́сася, бе бо наг, и ввéржеся в мóре. А друзíи ученицы́ кораблецéм прiидóша, [не бéша бо далéче от земли́, но я́ко две сте лактéй,] влекýще мрéжу рыб. Я́коже излезóша на зéмлю, ви́деша огнь лежáщь, и ры́бу на нем лежáщу и хлеб. И глагóла им Iисýс: принеси́те от рыб, я́же я́сте ны́не. Влез же Сíмон Петр, извлечé мрéжу на зéмлю, пóлну вели́ких рыб, сто и пятьдеся́т, и три: и толи́ко сýщим, не протóржеся мрéжа. Глагóла им Iисýс: прiиди́те, обéдуйте. Ни еди́н же смéяше от учени́к истязáти Егó, Ты кто еси́; вéдяще, я́ко Госпóдь есть. Прiи́де же Iисýс, и прiя́т хлеб, и дадé им, и ры́бу тáкожде. Се ужé трéтiе яви́ся Iисýс ученикóм Свои́м, востáв от мéртвых.
[Cинодальный перевод]В те дни явился Иисус ученикам Своим при море Тивериадском. Явился же так: были вместе Симон Петр, и Фома, называемый Близнец, и Нафанаил из Каны Галилейской, и сыновья Зеведеевы, и двое других из учеников Его. Симон Петр говорит им: иду ловить рыбу. Говорят ему: идем и мы с тобою. Пошли и тотчас вошли в лодку, и не поймали в ту ночь ничего. А когда уже настало утро, Иисус стоял на берегу; но ученики не узнали, что это Иисус. Иисус говорит им: дети! есть ли у вас какая пища? Они отвечали Ему: нет. Он же сказал им: закиньте сеть по правую сторону лодки, и поймаете. Они закинули, и уже не могли вытащить сети от множества рыбы. Тогда ученик, которого любил Иисус, говорит Петру: это Господь. Симон же Петр, услышав, что это Господь, опоясался одеждою, - ибо он был наг, - и бросился в море. А другие ученики приплыли в лодке, - ибо недалеко были от земли, локтей около двухсот, - таща сеть с рыбою. Когда же вышли на землю, видят разложенный огонь и на нем лежащую рыбу и хлеб. Иисус говорит им: принесите рыбы, которую вы теперь поймали. Симон Петр пошел и вытащил на землю сеть, наполненную большими рыбами, которых было сто пятьдесят три; и при таком множестве не прорвалась сеть. Иисус говорит им: придите, обедайте. Из учеников же никто не смел спросить Его: кто Ты? зная, что это Господь. Иисус приходит, берет хлеб и дает им, также и рыбу. Это уже в третий раз явился Иисус ученикам Своим по воскресении Своем из мертвых. (Ин.21:1-14)
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстè, и святóе Воскресéнiе Твоè поéм и слáвим: Ты бо есѝ Бог наш, рáзве Тебè инóго не знáем, и҆́мя Твоè именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдà благословя́ще Гóспода, поéм Воскресéнiе Егò: распя́тiе бо претерпéв, смéртiю смерть разрушѝ.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегò, и от грехà моегò очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдà суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелю́ся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицà Твоегò, и Дýха Твоегò Святáго не отымѝ от менè. Воздáждь ми рáдость спасéнiя Твоегò, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегò, возрáдуется язык мой прáвде Твоéй. Гóсподи, устнè мои отвéрзеши, и устà моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдà благоволи́ши жéртву прáвды, возношéнiе и всесожегáемая; тогдà возложáт на олтáрь Твой тельцы̀.
Слáва Ѻтцý и Сы́ну и Святóму Дýху.
Глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Тáже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè.(Пс.50:3)
Стiхúра, глас 6: Воскрéс Iисýс от грóба,/ я́коже проречè,/ дадè нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 7
(совмещенный с канóнами Обрéзанiя, глас 2, и свт. Васíлiя Велúкаго, глас 2)
ПЕСНЬ 1
Iрмóс: Мáнiем Твоúм/ на земны́й óбраз преложúся/ прéжде удоборазливáемое/ воднóе естествò, Гóсподи./ Тéмже немóкренно пешешéствовав Iзрáиль,// поéт Тебè песнь побéдную.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Осуди́ся смéртное мучи́тельство дрéвом,/ непрáведною смéртiю осуждéну Ти, Гóсподи:/ отню́дуже князь тьмы Тебè не одолéв,// прáведно изгнáн бысть.
Хор: Слáва, Гóсподи, Святóму Воскресéнiю Твоемý.
Чтец: Ад Тебè прибли́жися,/ и зубы́ не возмóг стéрти тéло Твоè,/ челюстьмѝ сокруши́ся./ Отню́дуже Спáсе, болéзни разрýш смéртныя,// воскрéсл есѝ триднéвен.
Хор: Пресвятáя Богорóдице, спасù нас.
Богорóдичен: Разреши́шася болéзни прамáтере Éвы:/ болéзни бо избежáвше, неискусомýжно родилá есѝ.// Отню́дуже я́ве Богорóдицу, Пречи́стая, вéдуще Тя, вси слáвим.
Канон Обрезания, глас 2
Хор: Слáва Тебè, Бóже наш, слáва Тебè.
Чтец: Осмери́ца дней, нося́щая óбраз бýдущаго,/ Твоéю, Хрїстé, просвещáется и освящáется вóльною нищетóю,// в сей бо закóнно обрéзался еси́ плóтiю. (Двáжды)
Хор: Слáва Тебè, Бóже наш, слáва Тебè.
Чтец: Обрéзанiе прiéмлет осмоднéвное Хрїстóс Своегó рождествá,/ и сегó днесь сень спря́тает,// свет возсiявáя нóвыя благодáти. (Двáжды)
Канон св. Василия, глас 2
Хор: Святúтелю óтче Васíлiе, молù Бóга о нас.
Чтец: Твоемý глáсу подобáше прiити́, Васíлiе, начáти хотя́щим хвалы́ твоя́,// но, óтче, мольбý прiéм, благодáть подавáй незави́стно нам.(Двáжды)
Хор: Святúтелю óтче Васíлiе, молù Бóга о нас.
Чтец: Добродéтелей ты жестóкiй шéствовал еси́ путь,/ в глáдкiй дости́гл еси́ и несопроти́вный Небéсный восхóд// и всем яви́лся еси́ óбраз, Васíлiе.(Двáжды)
Хор: Святúтелю óтче Васíлiе, молù Бóга о нас.
Чтец: Страстнóе взыгрáнiе, томя́щее плоть, любомýдрiя желáнiем наказáл еси́,/ тéмже в нетлéнных водворя́ешися Цáрствiих,// óтче Васíлiе.
Хор: Святúтелю óтче Васíлiе, молù Бóга о нас.
Чтец: Душéвныя стрáсти благопотрéбно, Васíлiе,/ вкýпе же и телéсныя, духóвным посéкл еси́ мечéм,// себé же Влады́це жéртву принéсл еси́.
Хор: Слáва Отцý и Сы́ну и Святóму Дýху.
Тропáрь: Ты, быв неизречéнных таи́нник, Васíлiе,/ Хрїстóву Цáрствiю тайнонаучи́л еси́, свящéнне óтче,// я́ве Трóйческiй свет облистáл еси́ нам.
Хор: И ны́не и прúсно и во вéки векóв. Амúнь.
Богорóдичен: Кто изрещи́ Твоé по достóинству возмóжет, éже пáче слóва зачáтiе? Бóга бо родилá еси́ плóтiю, Всечи́стая,// нам я́вльшася Спáса и Гóспода.
Катавáсiи Богоявлéнiя (глас 2): Глубины̀ откры́л есть дно/ и сýшею Своя́ влечéт,/ в ней покры́в протúвныя,/ крéпкiй во бранéх Госпóдь,// я́ко прослáвися.
Шéствует морскýю волня́щуюся бýрю,/ сýшу áбiе Iзрáиль я́вльшуюся./ Чермны́й же понт тристáты егúпетскiя покры̀ кýпно,/ водостлáнен гроб,// сúлою крéпкою деснúцы Влады́чни.
ПЕСНЬ 3
Iрмóс: В начáле Небесà/ всесúльным Слóвом Твоúм утверждéй Гóсподи Спáсе,/ и Вседéтельным и Бóжiим Дýхом,/ всю сúлу их,/ на недвúжимем мя кáмени// исповéданiя Твоегò утвердù.
Хор: Слáва, Гóсподи, Святóму Воскресéнiю Твоемý.
Чтец: Ты возшéд на дрéво,/ о нас болéзнуеши вóлею, благоутрóбне Спáсе,/ и терпи́ши я́зву, примирéнiя ходáтайственну, и спасéнiя вéрным:// éюже Твоемý, Ми́лостиве, вси примири́хомся Роди́телю.
Хор: Слáва, Гóсподи, Святóму Воскресéнiю Твоемý.
Чтец: Ты мя очи́стив от я́звы,/ душéю уя́звленнаго змíевым угрызéнiем, Хрїстè,/ и показáл еси́ свет, во тьме дрéвле мне слежáщу и во тлéнiи:// Крестóм бо во ад сошéд, менè совоскреси́л есѝ.
Хор: Пресвятáя Богорóдице, спасù нас.
Богорóдичен: Неискусомýжныя Твоея́ Мáтере мольбáми/ мир мíрови подáждь, Спáсе,// и несказáнныя Твоея́ слáвы славослóвящiя Тя сподóби.
Глас 2
Хор: Слáва Тебè, Бóже наш, слáва Тебè.
Чтец: Слóво воплóщшееся Пресýщественное в престáтiе закóна обрéзася,// начáток же Божéственныя благодáти и жи́зни нетлéнныя нам подадè.(Двáжды)
Хор: Слáва Тебè, Бóже наш, слáва Тебè.
Чтец: Закóна исполни́тель, не я́ко сопроти́вен Бóгу сый, Хрїстóс воплоти́выйся показáся// и сподóбися вóлею обрéзатися осмоднéвен. (Двáжды)
Глас 2
Хор: Святúтелю óтче Васíлiе, молù Бóга о нас.
Чтец: Спритечè Хрїстóву и спросiя́ пáмять твоя́, óтче, Рождествý,// Егóже несказáнное тáинство твои́ми учéньми я́ве сотвори́л еси́.(Двáжды)
Хор: Святúтелю óтче Васíлiе, молù Бóга о нас.
Чтец: Стрáхом Госпóдним утверждáем, начáло бо мýдрости сей есть,// любóвiю лýчшею впери́лся еси́ премýдрости, о Васíлiе.(Двáжды)
Хор: Святúтелю óтче Васíлiе, молù Бóга о нас.
Чтец: Наказáнiя быв вся́каго испóлнен,/ не тóкмо дóльнаго и попирáемаго, мнóго же пáче лýчшаго,// показáлся еси́ мíру свет, Васíлiе.(Двáжды)
Хор: Слáва Отцý и Сы́ну и Святóму Дýху.
Тропáрь: Васíлiе премýдре, вшел еси́ дея́нiем,/ и дея́нiе вшéствiе видéнiя Божéственнейшаго показáл еси́,// и сýщих рáзуму научи́лся еси́ я́ве.
Хор: И ны́не и прúсно и во вéки векóв. Амúнь.
Богорóдичен: Безсéменно во чрéве Бóга зачалà еси́/ и раждáеши несказáнно воплощéнна,// на Негóже зрéти не смéют, Чи́стая, Небéсных си́лы, Приснодéво.
Катавáсiи Богоявлéнiя (глас 2): Крéпость дая́й царéм нáшим Госпóдь/ и рог помáзанных Своúх вознося́й/ от Дéвы раждáется, грядéт же ко Крещéнiю./ Томý, вéрнiи, возопiéм:// несть свят, я́ко Бог наш.
Елúцы дрéвних изрешúхомся сéтей/ брáшен львов, сотрéнных членóвными,/ рáдуимся и разширúм устà, слóво плетýще от словéс сладкопéнiя,// úмже к нам наслаждáется даровáнiй.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Кондáк прáздника, глас 3: Всех Госпóдь обрéзанiе терпи́т/ и человéческая прегрешéнiя, я́ко Благ, обрéзует,/ даéт спасéнiе днесь мíру./ Рáдуется же в Вы́шних и Создáтелев iерáрх,// и светонóсный, Божéственный таи́нник Хрїстóв Васíлiй.
Седáлен святúтеля Васíлiя, глас 8: Премýдрости слóва навы́к и писáнiе закóна отложи́в,/ всем проповéдал еси́ благодáти слóво/ и душ скрижáли углáдил еси́ словесы́ твои́ми,/ в ни́хже начертáл еси́ Божéственная учéнiя./ Тéмже и мрак прошéд óблаком покрóва телесè,/ и просiя́л еси́ дýхом, святи́телю Васíлiе./ Моли́ Хрїстà Бóга/ грехóв оставлéнiе подáти// чтýщим любóвiю святýю пáмять твою́. (Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Седáлен прáздника, глас 4: Я́ко Сый бéздна человеколю́бiя,/ одéялся еси́, Влады́ко, в зрак рáбiй/ и плóтiю обрéзался еси́,// дáруя всем человéком вели́кую Твою́ ми́лость.
ПЕСНЬ 4
Iрмóс: Óтча нéдра не остáвль,/ и сошéд на зéмлю, Хрїстè Бóже,/ тáйну услы́шах смотрéнiя Твоегò,// и прослáвих Тя, Едúне Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Своя́ плещи́ дав, и҆́же от Дéвы воплóщься, на рáны, рабý прегреши́вшу,/ бiéн бывáет Влады́ка непови́нен,// разрешáя моя́ согрешéнiя.
Хор: Слáва, Гóсподи, Святóму Воскресéнiю Твоемý.
Чтец: Предстоя́в суди́щу судíй законопрестýпных,/ я́ко осуди́мый пови́нен бывáет, и заушáется брéнною рукóю,// создáвый человéка я́ко Бог, и судя́й прáведно земли́.
Хор: Пресвятáя Богорóдице, спасù нас.
Богорóдичен: Я́ко вои́стинну Мáти Бóжiя, Творцá Твоегò и Сы́на моли́,// к спаси́тельному напрáвити мя пристáнищу, Всенепорóчная, слáвнаго Егò хотéнiя.
Глас 2
Хор: Слáва Тебè, Бóже наш, слáва Тебè.
Чтец: Обрéзанiе престà, отнéлеже Хрїстóс вóлею обрéзася,// язы́к мнóжество спасáя благодáтiю. (Двáжды)
Хор: Слáва Тебè, Бóже наш, слáва Тебè.
Чтец: Бýдущаго непрестáнную осмáго вéка жизнь изображáет,// в ню́же Влады́ка обрéзася плóтiю. (Двáжды)
Глас 2
Хор: Святúтелю óтче Васíлiе, молù Бóга о нас.
Чтец: Украшáется я́коже Рождествóм Хрїстóва невéста Цéрковь,// тáко и пáмятiю твоéю, всеблажéнне. (Двáжды)
Хор: Святúтелю óтче Васíлiе, молù Бóга о нас.
Чтец: Непребори́м яви́лся еси́, по Бóзе боря́, Васíлiе,// во всех Тогò повелéнiю покаря́яся. (Двáжды)
Хор: Святúтелю óтче Васíлiе, молù Бóга о нас.
Чтец: Цéркви подадéся от Бóга ограждéнiе и стенà твердà,// Васíлiе всеблажéнне. (Двáжды)
Хор: Слáва Отцý и Сы́ну и Святóму Дýху.
Тропáрь: Сопротивобóжным сéчиво ты секáтельное// и огнь, поядáяй прéлесть, яви́лся еси́, óтче Васíлiе.
Хор: И ны́не и прúсно и во вéки векóв. Амúнь.
Богорóдичен: Мóлим Тя, Чи́стая,/ я́же Бóга безсéменно зачéнши,// при́сно моли́ти за рабы̀ Твоя́.
Катавáсiи Богоявлéнiя (глас 2): Услы́шах, Гóсподи, глас Твой, егóже рекл есù,/ глас вопiю́щаго в пусты́ни,/ я́ко возгремéл есù над водáми мнóгими,/ Твоемý свидéтельствуяй Сы́ну,/ весь быв сошéдшаго Дýха, возопù:// Ты есù Хрїстóс, Бóжiя мýдрость и сúла.
Огнéм очúщся тáйнаго зрéнiя,/ поя́ прорóк человéков новодéйство,/ возглашáет глас, Дýхом плéщущ,/ воплощéнiе явля́ющ Неизречéнна Слóва,// И́мже сúльных держáвы сотрóшася.
ПЕСНЬ 5
Iрмóс: Нощь не светлà невéрным Хрїстè,/ вéрным же просвещéнiе в слáдости словéс Твоúх./ Сегò рáди к Тебè ýтренюю,// и воспевáю Твоè Божествò.
Хор: Слáва, Гóсподи, Святóму Воскресéнiю Твоемý.
Чтец: За Твоя́ рабы́ продаéшися, Хрїстè,/ и по лани́те ударéнiе терпи́ши,/ свобóде ходáтайственно пою́щим:// к Тебè ýтренюю, и воспевáю Твоè Божествò.
Хор: Слáва, Гóсподи, Святóму Воскресéнiю Твоемý.
Чтец: Божéственною Твоéю си́лою, Хрїстè,/ нéмощiю плотскóю крéпкаго низложи́л еси́,// и победи́теля мя смéрти, Спáсе, воскресéнiем показáл еси́.
Хор: Пресвятáя Богорóдице, спасù нас.
Богорóдичен: Бóга родилà еси́ Мáти чи́стая,/ воплощéннаго из Тебè боголéпно, Всепéтая:/ понéже не познáла еси́ мýжеска пóла,// но от Святáго раждáеши Дýха.
Глас 2
Хор: Слáва Тебè, Бóже наш, слáва Тебè.
Чтец: Ты, от Дéвы Мáтере несказáнно прошéд, Гóсподи,/ и в человéческiй не не сподóбился еси́ одéятися óбраз,// я́ко Младéнец закóнно закóн испóлнил еси́. (Двáжды)
Хор: Слáва Тебè, Бóже наш, слáва Тебè.
Чтец: Нóщи уподóбися, я́ко сень закóнную лю́бящи Iзрáиля, Рóждшая,// из Нея́же облистáвшiй Свет мíра, Хрїстóс, яви́ся. (Двáжды)
Глас 2
Хор: Святúтелю óтче Васíлiе, молù Бóга о нас.
Чтец: Вóдит вои́стинну сугýб Цéрковь прáздник днесь обрéзанiя,/ я́ко младéнца Влады́ки, я́вльшагося на земли́,// и пáмять рабà, мýдра и треблажéнна. (Двáжды)
Хор: Святúтелю óтче Васíлiе, молù Бóга о нас.
Чтец: Непостижи́мый свет почи́в в тебé, преподóбне,/ пресвéтлу свещý мíру тя показà Хрїстóс,// тéмже пáмять твою́ поéм, Васíлiе.(Двáжды)
Хор: Святúтелю óтче Васíлiе, молù Бóга о нас.
Чтец: Всетéмно напи́санное в Сiнáи бытié Моисéем,/ ты, сказу́я от Божéственных сокрóвищ,// начертáл еси́ всем, преблажéнне Васíлiе. (Двáжды)
Хор: Слáва Отцý и Сы́ну и Святóму Дýху.
Тропáрь: Ни законополóжник Моисéй, ни пéрвее закóна Ióсиф бысть,/ и́же по тебé пи́щи пшеницомéритель:// Божéственныя бо плóти сам раздроби́тель яви́лся еси́, Васíлiе.
Хор: И ны́не и прúсно и во вéки векóв. Амúнь.
Богорóдичен: Тебé, рóждшей Хрїстà, всех Содéтеля, зовéм:/ рáдуйся, Чи́стая, рáдуйся, Свет возсiя́вшая нам,// рáдуйся, вмести́вшая Бóга Невмести́маго.
Катавáсiи Богоявлéнiя (глас 2): Iисýс, животà Начáльник,/ разрешúти осуждéнiе грядéт Адáма первоздáннаго,/ очищéнiй же, я́ко Бог, не трéбуя,/ пáдшаго очищáет во Iордáне,/ в нéмже враждý убúв,// преимýщ всяк ум мир дáрует.
Врагá тéмнаго и осквернéннаго я́да очищéнiем Дýха измовéни,/ к нóвой пристáхом неблáзненной стезù,/ водя́щей в непристýпную рáдость, едúнем пристýпну,// úмже Бог примирúся.
ПЕСНЬ 6
Iрмóс: Плáвающаго в молвè житéйских попечéнiй,/ с кораблéм потопля́ема грехù,/ и душетлéнному звéрю приметáема,/ я́ко Ióна, Хрїстè, вопiю́ Ти:// из смертонóсныя глубины̀ возведù мя.
Хор: Слáва, Гóсподи, Святóму Воскресéнiю Твоемý.
Чтец: Воспоминáху Тя заключéнныя во áде дýши, и остáвльшiяся прáведных,/ и от Тебè спасéнiя моля́хуся:/ éже Крестóм, Хрїстè, пóдал еси́ преиспóдним,// пришéд я́ко благоутрóбен.
Хор: Слáва, Гóсподи, Святóму Воскресéнiю Твоемý.
Чтец: Ко одушевлéнному Твоемý и нерукотворéнному хрáму,/ разрушéну бы́вшу страдáньми,/ воззрéти пáки лик апóстольскiй отчáяся:/ но пáче надéжды поклóнься,// воскрéсша повсю́ду проповéда.
Хор: Пресвятáя Богорóдице, спасù нас.
Богорóдичен: Неизречéннаго рождествá Твоегó всенепорóчнаго óбраз,/ Дéво богоневéстная, и҆́же нас рáди,/ кто от человéк сказáти возмóжет?/ Я́ко Бог неопи́санне, Слóво соедини́вся Тебè,// плоть из Тебè бысть.
Глас 2
Хор: Слáва Тебè, Бóже наш, слáва Тебè.
Чтец: Прiя́т конéц закóн, отнéлеже Хрiстóс, младéнствовав,/ исполни́тель закóна Сый, обрéзанiе воспрiя́т// и разреши́ закóнную кля́тву. (Двáжды)
Хор: Слáва Тебè, Бóже наш, слáва Тебè.
Чтец: Суббóтство, обрéзанiе же шатáнiя еврéйскаго/ я́вльшагося Хрiстà мановéнiем престà,// и возсiя́ благодáти веснá. (Двáжды)
Глас 2
Хор: Святúтелю óтче Васíлiе, молù Бóга о нас.
Чтец: Напитáл еси́ дýши, тáющiя глáдом, ни́щих оби́льно// и áлчущих сердцà вся́каго испóлнил еси́, Васíлiе, Божéственнаго весéлiя. (Двáжды)
Хор: Святúтелю óтче Васíлiе, молù Бóга о нас.
Чтец: Напитáл еси́ богáтно áлчущiя пи́щею Небéсною:/ хлеб бо Áнгельскiй есть слóво твоé, Васíлiе,// и́мже изря́ден пшеницодáвец был еси́.(Двáжды)
Хор: Святúтелю óтче Васíлiе, молù Бóга о нас.
Чтец: Собрáл еси́ пчéльный, Васíлiе, люботрýдно добродéтели вся́кiя цвет// и, худóг быв, в ни́хже ублажáешися. (Двáжды)
Хор: Слáва Отцý и Сы́ну и Святóму Дýху.
Тропáрь: Потщáлся еси́ мíра отлучи́тися и с Бóгом пожи́ти,/ тéмже нестоя́тельная и тлéнная, всеблажéнне Васíлiе, остáвль,// пребывáющая, я́ко мудр, стяжáл еси́.
Хор: И ны́не и прúсно и во вéки векóв. Амúнь.
Богорóдичен: Спаси́ от бед рабы́ Твоя́, Богорóдице,/ я́ко вси по Бóзе к Тебé прибегáем,// я́ко к Неруши́мей Стенà и Предстáтельству.
Катавáсiи Богоявлéнiя (глас 2): Глас Словесè, светúльник Свéта,/ деннúца Сóлнца, Предтéча в пусты́ни, -/ покáйтеся! - всем вопiéт лю́дем, - и предочúститеся:/ се бо предстоúт Хрїстóс,// от тли мiр избавля́яй.
Вожделéннаго я́вствова со всеблажéнным глáсом Отéц,/ Егóже из чрéва отры́гну./ Ей, - глагóлет, - Сей соестéствен Сын,/ Сый светозáрен, произнúче из человéча рóда,// Слóво же моè жúво, и Человéк промышлéнiем.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк Васíлiя Велúкаго, глас 4: Яви́лся еси́ основáнiе непоколеби́мое Цéркве,/ подая́ всем некрадóмое госпóдьство человéком,/ запечатлéя твои́ми велéньми,// небоявлéнне Васíлiе преподóбне.
Íкос: Целомýдрiя чáша, устà премýдрости/ и степéнь учéнiй, Васíлiй Вели́кiй всем облистáет мы́сленно./ Прiиди́те ýбо, и стáнем в домý Бóжiи, тéпле взирáюще,/ чудесы̀ сегó крася́щеся, я́коже лучéю, облистáвшеся житiя́,/ чи́стым дýхом прохлáждшеся,/ подóбящеся тогó вéре, и теплотé, и смирéнiю,/ и́миже дом яви́ся естествà Бóжiя./ К немýже вопiю́ще, поéм:// небоявлéнне Васíлiе преподóбне.
ПЕСНЬ 7
Iрмóс: Пещь óтроцы огнепáльну/ дрéвле росоточáщу показáша,/ Едúнаго Бóга воспевáюще и глагóлюще:/ превозносúмый отцéв Бог// и препрослáвлен.
Хор: Слáва, Гóсподи, Святóму Воскресéнiю Твоемý.
Чтец: Дрéвом умерщвля́ется Адáм, вóлею преслушáнiе содéлав:/ послушáнiем же Хрїстóвым пáки обновля́емь есть.// Менè бо рáди распинáется Сын Бóжiй, препрослáвленный.
Хор: Слáва, Гóсподи, Святóму Воскресéнiю Твоемý.
Чтец: Тебè воскрéсшаго, Хрїстè, из грóба, тварь вся воспè:/ Ты бо жизнь сýщим во áде процвéл еси́,/ мéртвым воскресéнiе,// и́же во тьме, свет препрослáвленный.
Хор: Пресвятáя Богорóдице, спасù нас.
Богорóдичен: Рáдуйся, Дщи Адáма тлéннаго./ Рáдуйся, еди́на Богоневéсто./ Рáдуйся, éюже тля изгнáна бысть, я́же Бóга рóждши:// Егóже моли́, Чи́стая, спасти́ся всем нам.
Глас 2
Хор: Слáва Тебè, Бóже наш, слáва Тебè.
Чтец: Свéтло и пресвéтло Рождествó Хрiстóво,/ и бýдущаго обновлéнiя подписáвшее тáинство днесь,/ я́ко закóнным чи́ном Спас обрéзуется,// не я́ко Бог, но я́ко Человéк и закóна исполнéнiе. (Двáжды)
Хор: Слáва Тебè, Бóже наш, слáва Тебè.
Чтец: Закóн исполня́я, закóна Творéц, плóтiю днесь вóлею обрéзуется,/ обрéзанiе содевáя грехóвныя зимы́ и звáти дáруя:// благословéн еси́, Бóже отéц нáших. (Двáжды)
Продолжéнiе здесь