Неделя 27 по Пятидесятнице. Иконы Божией Матери "Знамение", вмч.Иакова УТРЕНЯ (окончание) ЧАС ПЕРВЫЙ
10 декабря́ 2023 гóда. Недéля 27 по Пятидеся́тнице. Iкóны Бóжiей Мáтери, именýемой «Знáменiе». Вмч. Iáкова Пéрсянина. Глас 2. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Глас 6
Хор: Пресвятáя Богорóдице, спасù нас.
Чтец: Вои́стинну сокрóвище чéстно грáду Твоемý, iкóна Твоя́, Пречи́стая, даровáся,/ ю́же и сáми зря́ще, чудесѝ удивля́емся и Сы́ну Твоемý вопiéм:// Избáвителю Бóже, благословéн есѝ.(Двáжды)
Хор: Пресвятáя Богорóдице, спасù нас.
Чтец: Я́коже иногдá Нiневíтяны/ покая́нiя рáди пощади́л есѝ, Слóве Бóжiй, прóповедiю Ióны прорóка,/ тáкожде и зде показáл есѝ óбразом Пречи́стыя Твоея́ Мáтере, Хрiстè, вопiю́щим:// Избáвителю Бóже, благословéн есѝ.(Двáжды)
Хор: Пресвятáя Богорóдице, спасù нас.
Чтец: Храм Тя Бóжiй, Влады́чице, вéдуще,/ во святéм хрáме Твоéм рýки нáша вознóсим на моли́тву:// виждь озлоблéнiе нáше и подáждь нам пóмощь.(Двáжды)
Глас 2
Хор: Святы́й великомýчениче Iáкове, молù Бóга о нас.
Чтец: Крéпостiю ýмною, терпéнiем же душéвным,/ раздробля́ему, мýчениче, твоемý тéлу,/ непрелóжен и непреклóнен был есѝ,/ вéрою укрепля́емь Божéственною и зовы́й, Iáкове:// благословéн есѝ, Гóсподи Бóже отéц нáших.
Хор: Святы́й великомýчениче Iáкове, молù Бóга о нас.
Чтец: Испрáвив твоя́ помышлéнiя к смотрéнiю вы́шняго звáнiя/ и мýками обливáемь, не потопи́лся есѝ,/ но, терпя́ удóбно я́звы беззакóнных и разсекáемь, пел есѝ:// благословéн есѝ, Гóсподи Бóже отéц нáших.
Слáва Отцý и Сы́ну и Святóму Дýху.
Тропáрь: Блажéн есѝ, и добрò тебè есть ны́не, блажéннейше,/ победи́вшу ти неукроти́мое лукáваго свирéпство/ и мучи́телеву я́рость, усéрдно зовýщу ти:// благословéн есѝ, Гóсподи Бóже отéц нáших.
И ны́не и прúсно и во вéки векóв. Амúнь.
Богорóдичен: Незаходи́маго Свéта и свещѝ Божéственнаго сiя́нiя/ яви́лася есѝ свéщник златосiя́ющ/ и мiр весь озаря́ющ зарéю честнáго дéвства и пою́щыя спасáеши:// Благословéнная, Я́же Бóга плóтiю рóждшая.
Катавáсiя Рождествá (глас 1): Óтроцы, благочéстiю совоспитáни,/ злочестúваго велéнiя небрéгше,/ óгненнаго прещéнiя не убоя́шася,/ но, посредè плáмени стоя́ще, поя́ху:// отцéв Бóже, благословéн есù.
ПЕСНЬ 8
Iрмóс: Пещь иногдà óгненная в Вавилóне дéйства разделя́ше,/ Бóжiим велéнiем халдéи опаля́ющая,/ вéрныя же орошáющая, пою́щiя:// благословúте вся делà Госпóдня, Гóспода.
Хор: Слáва, Гóсподи, Святóму Воскресéнiю Твоемý.
Чтец: Крóвiю Твоéю, Хрїстè,/ очервлéно плóти Твоея́ зря́ще одея́нiе,/ трéпетом ужасáхуся мнóгому Твоемý долготерпéнiю áнгельстiи чи́ни, зовýще:// благослови́те вся делà Госпóдня, Гóспода.
Хор: Слáва, Гóсподи, Святóму Воскресéнiю Твоемý.
Чтец: Ты моè смéртное одéял есѝ, Щéдре,/ в безсмéртiе востáнiем Твои́м./ Тéмже веселя́щеся благодáрственно воспевáют Тя/ избрáннiи лю́дiе, Хрїстè, зовýще Тебè:// пожéрта бысть вои́стинну смерть побéдою.
Хор: Пресвятáя Богорóдице, спасù нас.
Богорóдичен: Ты, И҆́же Отцý неразлýчнаго,/ во утрóбе богомýжно пожи́вша безсéменно зачалà есѝ,/ и неизречéнно родилà есѝ, Богороди́тельнице Пречи́стая:// тéмже Тя спасéнiе всех нас свéмы.
Глас 6
Хор: Пресвятáя Богорóдице, спасù нас.
Чтец: Собезначáльное Слóво Óтчее, Дéво пречи́стая, нетлéнно родилà еси́/ и от сосцý питáла еси́./ Тогò моли́, Богороди́тельнице, от обстоя́нiя врáжiя спасти́ пою́щыя Тя// и превознося́щыя во вéки.(Двáжды)
Хор: Пресвятáя Богорóдице, спасù нас.
Чтец: Егóже прови́де на Престóле превзя́тем Исáiя,/ Сегò в ложеснáх, Дéво, вмести́ла еси́ и нетлéнно родилà еси́./ Егóже моли́ спасти́ся рабóм Твои́м, пою́щим:// дéти, благослови́те, свящéннiи, пóйте и превозноси́те Егò во вéки.(Двáжды)
Хор: Пресвятáя Богорóдице, спасù нас.
Чтец: Еди́на сýщи благáя,/ преблагóе Слóво моли́ прилéжно настоя́щаго гнéва рабóм Твои́м избáвитися,/ несомнéнною вéрою Сы́ну Твоемý пою́щим:// дéти, благослови́те, свящéннiи, пóйте и превозноси́те Егò во вéки.(Двáжды)
Глас 2
Хор: Святы́й великомýчениче Iáкове, молù Бóга о нас.
Чтец: Си́лою Бóжiею укрепи́вся,/ лукáвых собóрища и ополчéнiя разори́л еси́, блажéнне,/ и, держáвно отгнáв, побéды венéц прiя́л еси́, зовы́й:/ благослови́те, вся делà Госпóдня, Гóспода,// пóйте и превозноси́те Егò во вéки.
Хор: Святы́й великомýчениче Iáкове, молù Бóга о нас.
Чтец: Отъя́тiя удéс, я́ко приложéнiя благи́х, мýчениче, зрел еси́,/ не ны́нешнiя ви́дя болéзни,/ но бýдущее смотря́я мýчеников крáсное венчáнiе,// от прáведнаго Судiи́ уготóванное.
Благословúм Отцá, и Сы́на, и Святáго Дýха, Гóспода.
Тропáрь: Устремлéнiем мнóгим тебè приложи́вся началозлóбный враг и душетлéнный/ и мучи́тели подви́гнув низложи́ти души́ твоея́ крéпость, и невозмóже, слáвне,// во всеорýжiе бо Хрiстóво одéял еси́ себè.
И ны́не и прúсно и во вéки векóв. Амúнь.
Богорóдичен: Безсмéртiя прозáрный вéмы Тя истóчник, Богорóдице,/ я́ко рóждшую Слóво безсмéртнаго Отцà,// вся смéрти избáвльшаго превознося́щыя Егò во вéки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя Рождествá (глас 1): Чýда преестéственнаго/ росодáтельная изобразù пещь óбраз:/ не бо, я́же прiя́т, палúт ю́ныя,/ я́ко нижè огнь Божествà Дéвы,/ в Ню́же внúде утрóбу./ Тем воспевáюще, воспоéм:/ да благословúт тварь вся Гóспода// и превознóсит во вся вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрè на смирéнiе рабы́ Своея́,/ се бо от ны́не ублажáт Мя вси рóди.
Я́ко сотворѝ Мне вели́чiе Си́льный,/ и свя́то И҆́мя Егò, и ми́лость Егò в рóды родóв боя́щимся Егò.
Сотворѝ держáву мы́шцею Своéю,/ расточѝ гóрдыя мы́слiю сéрдца их.
Низложѝ си́льныя со престóл, и вознесè смирéнныя;/ áлчущiя испóлни благ, и богатя́щiяся отпустѝ тщи.
Воспрiя́т Iзрáиля óтрока Своегò, помянýти ми́лости,/ я́коже глагóла ко отцéм нáшим, Авраáму и сéмени егò, дáже до вéка.
ПЕСНЬ 9
Iрмóс: Безначáльна Родúтеля Сын, Бог и Госпóдь,/ воплóщься от Дéвы, нам явúся,/ омрачéнная просветúти,/ собрáти расточéнная,// тем Всепéтую Богорóдицу величáем.
Хор: Слáва, Гóсподи, Святóму Воскресéнiю Твоемý.
Чтец: Я́ко в раи́ насаждéно на лóбнем, Спáсе,/ требогáтое дрéво Твоегò пречи́стаго Крестá,/ крóвiю и водóю Божéственною,/ я́ко от истóчника Божéственнаго,/ ребрá Твоегò, Хрїстè, напоя́емо,// живóт нам прозяблò есть.
Хор: Слáва, Гóсподи, Святóму Воскресéнiю Твоемý.
Чтец: Низложи́л еси́ си́льныя, распны́йся, Всеси́льне,/ и éже ни́зу лежáщее во áдове тверды́ни,/ естествò человéческое вознéс,/ на Ѻ́тчем посади́л еси́ престóле.// С Ни́мже Тебè грядýщу покланя́ющеся, величáем.
Хор: Пресвятáя Трóице, Бóже наш, слáва Тебé.
Трóичен: Еди́ницу Тричи́сленную, Трóицу Единосýщную/ правослáвно пою́ще вéрнiи, слáвим:/ непресекóмо Пребожéственное Естествò,/ трисвéтлую, невечéрнюю зарю́,// Еди́ну нетлéнную нам свет возсiя́вшую.
Глас 6
Хор: Пресвятáя Богорóдице, спасù нас.
Чтец: Милосéрдым óком свы́ше при́зри на град и лю́ди Твоя́, Пречи́стая,/ ины́я бо пóмощи не и́мамы, тóкмо Тебè, Всенепорóчная,// да Тя вси, Мáтерь Бóжiю, непрестáнно величáем.(Двáжды)
Хор: Пресвятáя Богорóдице, спасù нас.
Чтец: Едина, рóждшая Слóво воплощéнное, Дéво всепéтая,/ приснотекýщiй истóчник исцелéнiй изливáеши// вéрою притекáющим хрáму Твоемý, Пречи́стая.(Двáжды)
Хор: Пресвятáя Богорóдице, спасù нас.
Чтец: Се, раби́ Твои́, вопiéм Ти, Мáти Бóжiя:/ обы́чныя ми́лости Твоя́ на град и лю́ди Твоя́ ми́лостивно показýющи,// проти́вных обстоя́нiй нас измени́, да Тя вси непрестáнно величáем.(Двáжды)
Глас 2
Хор: Святы́й великомýчениче Iáкове, молù Бóга о нас.
Чтец: С мýченики я́ко мýченик сликовствýя, треблажéнне,/ и Престóлу предстоя́ Хрiстóву,/ совершáющыя пáмять твою́ и твой светонóсный с весéлiем днесь чтýщыя прáздник// лю́тых бед твои́ми моли́твами избáви.
Хор: Святы́й великомýчениче Iáкове, молù Бóга о нас.
Чтец: Идéже мýчеников собóри,/ идéже всех святы́х святóе упокóися мнóжество,/ идéже прáведных дýси, идéже Цéрковь перворождéнных,// ны́не на Небесéх всели́лся еси́ вои́стинну я́ко мýченик, о Iáкове!
Слáва Отцý и Сы́ну и Святóму Дýху.
Тропáрь: Испещрéнною багряни́цею, кровьми́ твои́ми очервленéвшеюся, ны́не одéян,/ со Хрiстóм цáрствуеши, Iáкове,/ страстьми́ бо безстрáстiя обрéл еси́ истóчник,// егóже наслаждáтися вéчно, всеблажéнне, сподóбился еси́.
И ны́не и прúсно и во вéки векóв. Амúнь.
Богорóдичен: Я́ко Бóга зачéншую/ и Бóжiю Мáтерь бы́вшую и́стинно чи́стую, Тя, Богорóдицу, слáвим,/ вещéй естествý, звáнiе прили́чествующе я́сно,// и подóбно Божéственный Тебè глас принося́ще.
Катавáсiя Рождествá (глас 1): Тáинство стрáнное вúжу и преслáвное:/ Нéбо - вертéп, Престóл Херувíмскiй - Дéву,/ я́сли - вместúлище,/ в нúхже возлежè Невместúмый - Хрїстóс Бог,// Егóже, воспевáюще, величáем.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьмѝ Бог наш.
Хор: Свят Госпóдь Бог наш
Ексапостiлáрiй воскрéсный пя́тый: Живóт и путь, Хрiстóс востà из мéртвых,/ Клеóпе и Луцè спутешéствова,/ и́маже и познáся во Еммаýсе, преломля́я хлеб:/ ею́же дýши и сердцà горя́ща бя́ху,/ егдà тéма глагóлаше на пути́,/ и писáнiя скáзоваше, я́же претерпè./ С ни́маже, востà, зовéм,// яви́ся же и Петрóви.
Слáва Ѻтцý и Сы́ну и Святóму Дýху.
Светúлен вмч. Iáкова Пéрсянина: Я́ко лозý, обрéзаему мнóгими мýками, прослáви Госпóдь,/ я́ко виногрáд честны́й, винò источáющ/ от истóчник кровéй твои́х, Iáкове страстотéрпче и покрови́телю,// любóвiю всесвящéнную твою́ пáмять достóйно творя́щих.
И ны́не и прúсно и во вéки векóв. Амúнь.
Светúлен Богорóдицы «Знáменiе»: Возжелéв Твоея́ добрóты Iисýс, Пречи́стая,/ в Тя всели́ся и Тебè застýпницу грáду Твоемý Слóво Бóжiе даровà,/ егóже сохраня́й заступлéнiем Твои́м при́сно,// я́ко да Тя ублажáем, пренепорóчная Отрокови́це.
ХВАЛИТНЫ
Хор, глас 2: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебè подобáет песнь Бóгу.
Хвали́те Егò вси áнгели Егò,/ хвалите Егò вся си́лы Егò.// Тебè подобáет песнь Бóгу.
[В приходской практике пропускается до стихир]Хвали́те Егò, сóлнце и лунà, хвали́те Егò, вся звéзды и свет. Хвали́те Егó Небесà небéс и водà, я́же превы́ше небéс. Да восхвáлят и҆́мя Госпóдне: я́ко Той речè, и бы́ша, Той повелè, и создáшася. Постáви я́ в век и в век вéка, повелéнiе положѝ, и не ми́мо и҆́дет. Хвали́те Гóспода от землѝ, змíеве и вся бéздны: огнь, град, снег, гóлоть, дух бýрен, творя́щая слóво Егò, гóры и вси хóлми, древà плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiѝ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогò Еди́наго, исповéданiе Егò на землѝ и на небесѝ. И вознесéт рог людéй Свои́х, песнь всем преподóбным Егò, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егò, и сы́нове Сióни возрáдуются о Царè своéм. Да восхвáлят и҆́мя Егò в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду острѝ в рукáх их: сотвори́ти отмщéнiе во языцех, обличéнiя в лю́дех, связáти царѝ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 2: Вся́кое дыхáнiе и вся тварь,/ Тя слáвит, Гóсподи,/ я́ко Крестóм смерть упраздни́л есѝ,/ да покáжеши лю́дем, éже из мéртвых Твоè Воскресéнiе,// я́ко еди́н Человеколю́бец.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Да рекýт iудéе, кáко вóини погуби́ша стрегýщiи Царя́; почтò бо кáмень не сохрани́ кáмене жи́зни; или́ погребéннаго да дадя́т, или́ воскрéсшему да поклóнятся, глагóлюще с нáми: слáва мнóжеству щедрóт твои́х, Спáсе наш, слáва тебѣ́.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Рáдуйтеся лю́дiе и весели́теся, áнгел сѣдя́й на кáмени грóбнѣм, той нам благовѣсти́, рек: Хрїстóс воскрéсе из мéртвых, Спас мíра, и испóлни вся́ческая благоухáнiя: рáдуйтеся лю́дiе и весели́теся.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Áнгел ýбо éже рáдуйся, прéжде твоегò зачáтiя Гóсподи, благодáтнѣй принесè: áнгел же кáмень слáвнаго твоегò грóба въ твоè воскресéнiе отвалѝ: ѻ́в ýбо в печáли мѣ́сто, весéлiя óбразы возвѣщáя: сей же въ смéрти мѣ́сто, Влады́ку жизнодáвца проповѣ́дуя нам, тѣ́мже вопiéм ти: благодѣ́телю всѣх, Гóсподи слáва тебѣ́.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхиры пресвяты́я Богорóдицы, глас 6, самоглáсны: Непокóрством рáзума и гóрдостiю разжéгшеся ненакáзаннiи/ на стадо Твоè, Пречи́стая,/ éже искорени́ти град, в нéмже пречестны́й Твой óбраз водворя́ется,/ но ýбо показáла еси́,/ я́коже иногдá Сын Твой еврéем,// достóйно в пусты́ни телесы̀ пáдшим.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Се храм пресвéтел и мéсто свящéнiя,/ идéже честнáя iкóна Мáтере Твоея́, Слóве,/ приступи́те, человéцы, и исцелéнiе почерпи́те,/ я́ко спасéнiе Тоя́ рáди нам даровáся/ и избавлéнiе от проти́вных, потреби́ти нас хотя́щих,// но тíи, по прорóку, потреби́шася.
Воскреснù, Гóсподи, в покóй Твой, Ты и Кiвóт святы́ни Твоея́. (Пс.131:8)
Стiхúра: Я́коже иногда́ крóткiй Давíд/ проти́вящагося гóрдаго Голiáфа,/ си́лою Сы́на Твоегò препоя́сався, низложи́,/ тáкожде и лю́дiе Твои́, Пречи́стая,/ имýще óбраз Твой честны́й,// преслáвно одолéнiе показáша.
Кля́тся Госпóдь Давíду и҆́стиною и не отвéржется ея́. (Пс.131:11А)
Глас 8: Чýдная побéда и ди́вное одолéнiе/ честны́я iкóны Твоея́, пречи́стая Мáти Слóва,/ удивля́ет ум и ужасáет пóмысл,/ безорýжнiи бо орýжных побеждáху/ си́лою Твоéю, Дéво всепéтая,/ и посóбiем Божéственнаго зрáка Твоегò// во спасéнiе душ нáших.
Слáва Отцý и Сыну и Святóму Дýху.
Стiхúра евáнгельская пя́тая, глас 5: О премýдрых судéб Твои́х, Хрiстè!/ Кáко Петрý ýбо плащани́цами еди́неми,/ дал еси́ разумéти Твоè воскресéнiе,/ Луцè же и Клеóпе спутешéствуя, бесéдовал еси́,/ и бесéдуяй не áбiе себè явля́еши?/ Тéмже и поноси́мь бывáеши, я́ко еди́н пришéльствуяй во Iерусали́м,/ и не причащáяйся в конéц совéта их./ Но И҆́же вся к создáнiя пóльзе стрóя,/ и я́же о Тебè прорóчествiя откры́л еси́,/ и внегдá благослови́ти хлеб, познáлся еси́ им,/ и҆́хже и прéжде тогò сердцá к познáнiю Твоемý распалáстася,/ и҆́же и ученикóм сóбранным ужè/ я́сно проповéдаста Твоè воскресéнiе,// и҆́мже поми́луй нас.
И ны́не и прúсно и во вéки векóв. Амúнь.
Глас 2: Преблагословéнна есѝ, Богорóдице Дéво,/ Воплóщшим бо ся из Тебè ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебè.
Вóзглас: Слáва Тебè, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстè, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоè во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоè во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был есѝ нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебè. Гóсподи, к Тебè прибегóх, научѝ мя твори́ти вóлю Твою́, яко Ты есѝ Бог мой, яко у Тебè истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, помúлуй нас. (3 рáза)
Хор: Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Хор: Святы́й Безсмéртный, помúлуй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помúлуй нас.
Тропáрь воскрéсный, глас 2: Воскрéс из грóба и ýзы растерзáл еси áда,/ разруши́л еси осуждéнiе смéрти, Гóсподи,/ вся от сетéй врагá избáвивый;/ яви́вый же Себè апóстолом Твоим,/ послáл еси я на прóповедь,/ и тéми мир Твой пóдал еси вселéнней,// Еди́не Многоми́лостиве.
Гóсподи поми́луй (40 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи поми́луй (12раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
ОТПУСТ
Гóсподи, Iисýсе Хрїстè, Сыне Бóжій, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моè. Вонмѝ глáсу молéнiя моегó, Царю́ мой и Бóже мой, яко к Тебè помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебè лукáвнуяй, нижè пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебè лю́бящiи имя Твоè. Яко Ты благослови́ши прáведника, Гóсподи: яко орýжiем благоволéнiя венчáл есѝ нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты есѝ. Не отвратѝ человéка во смирéнiе, и рекл есѝ: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л есѝ беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя́. Испóлнихомся заýтра ми́лости Твоея́, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны есѝ, лéта в ня́же ви́дехом злáя. И при́зри на рабы́ Твоя́, и на делá Твоя́, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебè, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредè дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпè мне сéрдце стропти́во, уклоня́ющагося от менè лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредè дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Тропáрь воскрéсный, глас 2: Егдà снизшéл есѝ к смéрти, Животè Безсмéртный, тогдà ад умертви́л есѝ блистáнiем Божествà. Егдà же и умéршыя от преиспóдних воскреси́л есѝ, вся Си́лы Небéсныя взывáху: Жизнодáвче, Хрїстè Бóже наш, слáва Тебè.
Слáва Отцý и Сы́ну и Святóму Дýху.
Тропáрь Богорóдицы «Знáменiе», глас 4: Я́ко необори́мую стéну и истóчник чудéс стяжáвше Тя рабѝ Твоѝ, Богорóдице пречи́стая, сопроти́вных ополчéнiя низлагáем. Тéмже мóлим Тя: мир грáду Твоемý дáруй и душáм нáшим вéлiю ми́лость.
И ны́не и прúсно и во вéки векóв. Амúнь.
Богорóдичен 1‑го часá: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблà есѝ цвет нетлéнiя. Дéву, я́ко пребылà есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогò молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы̀ человéческiя, и сохраню́ зáповеди Твоя́. Лицè Твоè просветѝ на рабà Твоегò и научѝ мя оправдáнiем Твои́м.
Да испóлнятся устà моя хвалéнiя Твоегò, Гóсподи, я́ко да воспою́ слáву Твою́, весь день великолéпiе Твоè.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сыне Бóжїй, поми́луй нас. Ами́нь.
КОНДАК
Кондáк Iкóны Бóжiей Мáтери (Знáменiе), глас 4: Честнáго óбраза Твоегò знáменiе прáзднующе лю́дiе Твоѝ, Богороди́тельнице, и́мже ди́вную побéду на сопроти́вныя грáду Твоемý даровáла есѝ. Тéмже Тебè вéрою взывáем: рáдуйся, Дéво, хрїстiáн похвалò.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстè Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесà очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицà Твоегò, да в нем ýзрим Свет Непристýпный: и испрáви стопы̀ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победúтельная,/ я́ко избáвльшеся от злых,/ благодáрственная восписýем Ти рабù Твоù, Богорóдице;/ но я́ко имýщая держáву непобедúмую,/ от вся́ких нас бед свободù, да зовéм Ти:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 рáза)
Гóсподи, благословᴎ́.
Гóсподи, Iисýсе Хрїстè, Сыне Бóжій, моли́твами Пречи́стыя Своея́ Мáтере, святы́х слáвных и всехвáльных Апóстол, святы́х и прáведных богоотéц Iоакíма и Áнны, и всех святы́х, поми́лует и спасéт нас, яко Благ и Человеколю́бец. Ами́нь.
С утрá чти часы и обéдницу