Введение (вход) во храм Пресвятой Владычицы нашей Богородицы. УТРЕНЯ (окончание) ЧАС ПЕРВЫЙ
4 декабря́ 2023 гóда. Понедéльник 27-й седмúцы по Пятидеся́тнице. Введéнiе (Вход) во храм Пресвяты́я Влады́чицы нáшея Богорóдицы и Приснодéвы Марíи. Глас 1. Прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Припéв: Áнгели, взыгрáйте со святы́ми, дéвы, сликовствýйте:/ Богоотроковúца внúде во святáя святы́х.
Тропáрь: Богопрiя́тну предзря́, Соломóн, проповéда Тя одр Царéв,/ живы́й истóчник запечáтствован,/ из негóже немýтная нам произы́де водá, вéрою вопiю́щим:// и́стинно вы́шши всех есѝ, Дéво Чи́стая.
Припéв: Áнгели и человéцы, Дéву пéсньми да возвелúчим:/ Боголéпно бо внúде во святáя святы́х.
Тропáрь: Подаéши даровáнiй Твою́ тишинý, Богорóдице, душѝ моéй,/ точáщи жизнь Тебè чтýщим по дóлгу,/ Самá защищáющи, и покрывáющи, и соблюдáющи, вопи́ти Тебè:// и́стинно вы́шши всех есѝ, Дéво Чи́стая.
Припéв: Величáй, душè моя,/ приведéнную во храм Госпóдень и благословéнную рукáми iерéевыми.
Iрмóс: Светонóсный óблак, в óньже всех Влады́ка,/ я́ко дождь с небесè на рунó, снúде/ и воплотúся нас рáди,/ быв Человéк, Безначáльный./ Величáем вси я́ко Мáтерь Бóга нáшего Чúстую. (Двáжды)
Припéв: Величáй, душè моя́,/ приведéнную во храм Госпóдень и благословéнную рукáми iерéевыми.
Тропáрь: Из прáведных произы́де Iоакíма и Áнны/ обещáнiя плод - Богоотрокови́ца Марíя/ и, я́ко кади́ло прiя́тное, плóтiю младéнствующи,/ привóдится во святи́лище святóе// я́ко Святáя во святы́х обитáти.
Припéв: Величáй, душè моя́,/ приведéнную во храм Госпóдень и благословéнную рукáми iерéевыми.
Тропáрь: Младéнствующую естествóм и пáче естествá я́вльшуюся Мáтерь Бóжiю восхвáлим пéсньми:/ в храм бо закóнный Гóсподу днесь привóдится в воню́ благовóнiя,// прáведных я́ко плод духóвный.
Припéв: Величáй, душè моя́,/ приведéнную во храм Госпóдень и благословéнную рукáми iерéевыми.
Тропáрь: Со Áнгелом, éже рáдуйся, Богорóдице прили́чне возопiи́м, вéрнiи:/ рáдуйся, вседóбрая Невéсто;/ рáдуйся, óблаче свéтлый, из негóже нам возсiя́ Госпóдь, во тьме невéденiя седя́щим;// рáдуйся, всех Надéждо.
Припéв: Величáй, душè моя́,/ приведéнную во храм Госпóдень и благословéнную рукáми iерéевыми.
Тропáрь: Святы́х святáя и Богомáти Марíе,/ моли́твами Твои́ми, Чи́стая, свободи́ ны от сéтей врáжiих/ и всякiя éреси и скóрби,// вéрно покланя́ющiяся óбразу святáго Твоегó зрáка.
Припéв: Величáй, душè моя́,/ Трiипостáснаго и Нераздéльнаго Божествá Держáву.
Трóичен: Трiипостáсное естествó, и Нераздéльную слáву,/ и в Божествé Еди́ном поéмую непрестáнно на Небесѝ и на землѝ/ Трóицу Неразлýчную прослáвим,// с Сы́ном Отцý и Дýху покланя́ющеся благочéстно.
Припéв: Величáй, душè моя́,/ Честнéйшую и Слáвнейшую Гóрних вóинств, Дéву Пречúстую, Богорóдицу.
Богорóдичен: Под Твое благоутрóбiе прибегáющiя вéрно/ и покланя́ющiяся благочéстно Сы́ну Твоемý, Дéво Богороди́тельнице,// я́ко Бóгу и Гóсподу мíра,/ моли́ся от тли и бед избáвити и вся́ческих искушéнiй.
Припéв: Áнгели, вхождéнiе Пречúстыя зря́ще, удивúшася:/ кáко Дéва внúде во святáя святы́х?
Катавáсiя Рождествá (глас 1): Тáинство стрáнное вúжу и преслáвное:/ Нéбо - вертéп, Престóл Херувíмскiй - Дéву,/ я́сли - вместúлище,/ в нúхже возлежè Невместúмый - Хрїстóс Бог,// Егóже, воспевáюще, величáем.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Светúлен прáздника: Ю́же дрéвле предвозвести́ прорóческое сослóвiе,/ стáмну, и жезл, и скрижáль, и несекóмую гóру,/ Марíю Богоотрокови́цу вéрно да восхвáлим:// днесь бо ввóдится во святáя святы́х воспитáтися Гóсподу.
Слáва Отцý и Сы́ну и Святóму Дýху.
Ю́же дрéвле предвозвести́ прорóческое сослóвiе,/ стáмну, и жезл, и скрижáль, и несекóмую гóру,/ Марíю Богоотрокови́цу вéрно да восхвáлим:// днесь бо ввóдится во святáя святы́х воспитáтися Гóсподу.
И ны́не и прúсно и во вéки векóв, амúнь.
Ю́же дрéвле предвозвести́ прорóческое сослóвiе,/ стáмну, и жезл, и скрижáль, и несекóмую гóру,/ Марíю Богоотрокови́цу вéрно да восхвáлим:// днесь бо ввóдится во святáя святы́х воспитáтися Гóсподу.
ХВАЛИТНЫ
Хор, глас 1: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебè подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебè подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речè, и бы́ша, Той повелè, и создáшася. Постáви я́ в век и в век вéка, повелéнiе положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царè своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
[Пропускается до стихир]Сотвори́ти в них суд напи́сан: слáва сiя бýдет всем преподóбным Егó. Хвали́те Бóга во святы́х Егó, хвали́те Егó в утвержéнiи си́лы Егó.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúры Введéнiя, глас 1: Свещенóсицы дéвы,/ Приснодéву свéтло провождáюще,/ прорóчествуют и́стинно Дýхом бýдущее:/ храм бо Бóжiй Богорóдица сýщи,/ в храм со слáвою дéвственною,// младéнствующи, ввóдится.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Обещáнiя святáго и плод благослáвный/ Богорóдица вои́стинну яви́ся ми́ру,/ я́ко всех превы́шшая:/ Я́же благочéстно приводи́ма в храм Бóжiй,/ моли́тву рóждших исполня́ет,// соблюдáема Божéственным Дýхом.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхира: Небéсным воспитáна, Дéво, хлéбом/ вéрно в хрáме Госпóдни,/ родилá eси́ мíру Жи́зни Хлеб, Слóво,/ Eмýже, я́ко храм избрáнный и всенепорóчный,/ предобручи́лася eси́ Дýхом тáинственно,// обрученá Бóгу и Oтцý.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Да отвéрзется дверь Богопрiя́тнаго хрáма:/ храм бо всех Царя́ и Престóл,/ днесь со слáвою внутрь прiéм,/ Iоакíм возлагáет, освяти́в Гóсподу// от Негó избрáнную в Мáтерь Себé.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Глас 2: Днесь в храм привóдится Всенепорóчная Дéва,/ во оби́телище Всецаря́ Бóга/ и всея́ жи́зни нáшея Питáтеля;/ днесь Чистéйшая Святы́ня,/ я́ко трилéтствующая Ю́ница,/ во святáя святы́х ввóдится;/ Той возопiи́м, я́ко Áнгел:// рáдуйся, Eди́на в женáх Благословéнная.
Вóзглас: Слáва Тебè, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстè, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоè во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоè во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был есѝ нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебè. Гóсподи, к Тебè прибегóх, научѝ мя твори́ти вóлю Твою́, яко Ты есѝ Бог мой, яко у Тебè истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, помúлуй нас. (3 рáза)
Хор: Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Хор: Святы́й Безсмéртный, помúлуй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помúлуй нас.
Тропáрь Введéнiя, глас 4: Днесь благоволéния Бóжiя предображéнiе/ и человéков спасéнiя проповéданiе/ в хрáме Бóжiи я́сно Дéва явля́ется/ и Хрiстá всем предвозвещáет./ Той и мы велеглáсно возопiи́м:// рáдуйся, смотрéнiя Зижди́телева исполнéнiе.
Гóсподи поми́луй (40 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи поми́луй (12раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
ОТПУСТ
Гóсподи, Iисýсе Хрїстè, Сыне Бóжій, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моè. Вонмѝ глáсу молéнiя моегó, Царю́ мой и Бóже мой, яко к Тебè помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебè лукáвнуяй, нижè пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебè лю́бящiи имя Твоè. Яко Ты благослови́ши прáведника, Гóсподи: яко орýжiем благоволéнiя венчáл есѝ нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты есѝ. Не отвратѝ человéка во смирéнiе, и рекл есѝ: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л есѝ беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя́. Испóлнихомся заýтра ми́лости Твоея́, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны есѝ, лéта в ня́же ви́дехом злáя. И при́зри на рабы́ Твоя́, и на делá Твоя́, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебè, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредè дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпè мне сéрдце стропти́во, уклоня́ющагося от менè лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредè дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Тропáрь прáздника, глас 4: Днесь благоволéнiя Бóжiя предображéнiе/ и человéков спасéнiя проповéданiе/ в хрáме Бóжiи я́сно Дéва явля́ется/ и Хрiстá всем предвозвещáет./ Той и мы велеглáсно возопiи́м:// рáдуйся, смотрéнiя Зижди́телева исполнéнiе.
И ны́не и прúсно и во вéки векóв. Амúнь.
Богорóдичен 1‑го часá: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицè Твоè просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоè.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сыне Бóжїй, поми́луй нас. Ами́нь.
КОНДАК
Кондáк прáздника, глас 4: Пречи́стый храм Спáсов,/ многоцéнный чертóг и Дéва,/ свящéнное сокрóвище слáвы Бóжiя,/ днесь ввóдится в дом Госпóдень, благодáть совводя́щи,/ Я́же в Дýсе Божéственном,/ Ю́же воспевáют Áнгели Бóжiи:// Сiя́ есть селéнiе Небéсное.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстè Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 4: Пречúстый храм Спáсов,/ многоцéнный чертóг и Дéва,/ свящéнное сокрóвище слáвы Бóжiя,/ днесь ввóдится в дом Госпóдень, благодáть совводя́щи,/ Я́же в Дýсе Божéственном,/ Ю́же воспевáют Áнгели Бóжiи:// Сiя́ есть селéнiе Небéсное.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 рáза)
Гóсподи, благословᴎ́.
Гóсподи, Iисýсе Хрїстè, Сыне Бóжій, моли́твами Пречи́стыя Своея́ Мáтере, святы́х слáвных и всехвáльных Апóстол, святы́х и прáведных богоотéц Iоакíма и Áнны, и всех святы́х, поми́лует и спасéт нас, яко Благ и Человеколю́бец. Ами́нь.
С утрá чти часы и обéдницу