Неделя 23 по Пятидесятнице. Сщмч. Зиновия и сестры его мц. Зиновии. ВСЕНОЩНОЕ БДЕНИЕ. УТРЕНЯ КАНОН
12 ноября́ 2023 гóда. Недéля 23 по Пятидеся́тнице. Священномýченика Зинóвiя, еп. Егéйскаго, и сестры́ егó мýченицы Зиновíи. Глас 6. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
Чтец: Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 6: Вóльною и животворя́щею Твоéю смéртiю, Хрїстé,/ вратá áдова сокруши́в, я́ко Бог,/ отвéрзл еси́ нам дрéвнiй рай, и воскрéс из мéртвых,// избáвил еси́ от тлéнiя живóт наш.
СТЕПЕННА, ГЛАС 6
1 АНТИФОН
Хор: На нéбо óчи моù возвожý, к Тебè, Слóве:// ущéдри мя, да живý Тебè. (Двáжды)
Поми́луй нас уничижéнных,// устроя́я благопотрéбныя Твоя́ сосýды, Слóве. (Двáжды)
Слáва Ѻтцý и Сы́ну и Святóму Дýху.
Святóму Дýху, вся́кая всеспаси́тельная винá,/ áще кóему сей по достоя́нiю дхнет,// скóро взéмлет от земны́х: восперя́ет, возращáет, устроя́ет горé.
И ны́не и прúсно и во вéки векóв. Амúнь.
Святóму Дýху, вся́кая всеспаси́тельная винá,/ áще кóему сей по достоя́нiю дхнет,// скóро взéмлет от земны́х: восперя́ет, возращáет, устроя́ет горé.
2 АНТИФОН
Áще не Госпóдь бы был в нас,/ никтóже от нас протúву возмóгл бы врáжiим брáнем одолéти:// побеждáющiи бо от зде вознóсятся. (Двáжды)
Зубы́ их да не я́та бýдет душá моя́ я́ко птенéц, Слóве:// увы́ мне, кáко и҆́мам от врагá избы́ти, грехолюби́в сый! (Двáжды)
Слáва Ѻтцý и Сы́ну и Святóму Дýху.
Святы́м Дýхом обожéнiе всем,/ благоволéнiе, рáзум, мир и благословéнiе:// равнодéтелен бо есть Отцý и Слóву.
И ны́не и прúсно и во вéки векóв. Амúнь.
Святы́м Дýхом обожéнiе всем,/ благоволéнiе, рáзум, мир и благословéнiе:// равнодéтелен бо есть Отцý и Слóву.
3 АНТИФОН
Надéющiися на Гóспода врагóм стрáшни, и всем дúвни:// горè бо зрят. (Двáжды)
В беззакóнiя рук свои́х, прáведных жрéбiй,// помóщника Тя имéя Спáсе, не простирáет. (Двáжды)
Слáва Ѻтцý и Сы́ну и Святóму Дýху.
Святáго Дýха держáва на всех:/ Емýже Вы́шняя вóинства покланя́ются,// со вся́ким дыхáнiем дóльным.
И ны́не и прúсно и во вéки векóв. Амúнь.
Святáго Дýха держáва на всех:/ Емýже Вы́шняя вóинства покланя́ются,// со вся́ким дыхáнiем дóльным.
ПРОКИМЕН
Чтец: Прокíмен, глас шесты́й: Гóсподи, воздви́гни си́лу Твою́, и прiиди́ во éже спасти́ нас. (Пс.79:3Б)
Хор: Гóсподи, воздвúгни сúлу Твою́,/ и прiидù во éже спастù нас.
Чтец: Пасы́й Iзрáиля вонми́, наставля́яй я́ко овчá Ióсифа. (Пс.79:2А)
Хор: Гóсподи, воздвúгни сúлу Твою́,/ и прiидù во éже спастù нас.
Чтец: Гóсподи, воздви́гни си́лу Твою́.
Хор: И прiидù во éже спастù нас.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Матфéя Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Мф.зач.116): Во врéмя óно, единiинáдесять ученицы́ идóша в Галiлéю, в гóру, áможе повелé им Iисýс: И ви́девше Егó, поклони́шася Емý: óви же усумнéшася. И пристýпль Iисýс, речè им, глагóля: дадéся Ми вся́ка власть на небеси́ и на земли́: Шéдше научи́те вся язы́ки, крестя́ще их во и́мя Отцá, и Сына, и Святáго Духа, учáще их блюсти́ вся, ели́ка заповéдах вам. И се, Аз с вáми есмь во вся дни, до скончáнiя вéка. Ами́нь.
[Синодальный перевод]В то время одиннадцать учеников пошли в Галилею, на гору, куда повелел им Иисус, и, увидев Его, поклонились Ему, а иные усомнились. И приблизившись Иисус сказал им: дана Мне всякая власть на небе и на земле. Итак идите, научите все народы, крестя их во имя Отца и Сына и Святого Духа, уча их соблюдать всё, что Я повелел вам; и вот, Я с вами во все дни до скончания века. Аминь.(Мф.28:16-20)
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстè, и святóе Воскресéнiе Твоé поéм и слáвим: Ты бо еси́ Бог наш, рáзве Тебè инóго не знáем, и҆́мя Твоè именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разрушѝ.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицá Твоегó, и Дýха Твоегó Святáго не отымѝ от менè. Воздáждь ми рáдость спасéнiя Твоегó, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнè мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè. (Пс.50:3)
Стiхúра, глас 6: Воскрéс Iисýс от грóба,/ я́коже проречè,/ дадè нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 6
(совмещéнный с канóном крестовоскрéсным, глас 6; Богорóдицы глас 6 и канóном ап. Iáкова брáта Госпóдня, глас 4)
ПЕСНЬ 1
Iрмóс: Я́ко по сýху пешешéствовав Iзрáиль,/ по бéздне стопáми,/ гонúтеля фараóна/ вúдя потопля́ема,// Бóгу побéдную песнь поúм, вопiя́ше.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Распростéртыма длáньма на крестè,/ отéческаго испóлнил есѝ благоволéнiя, благíй Iисýсе, вся́ческая.// тéмже побéдную песнь Тебè вси пои́м.
Хор: Слáва, Гóсподи, Святóму Воскресéнiю Твоемý.
Чтец: Стрáхом к Тебè, я́ко рабы́ня, смерть/ повелéна приступѝ Влады́це животá,// тóю подаю́щему нам безконéчный живóт и воскресéнiе.
Хор: Пресвятáя Богорóдице, спасù нас.
Богорóдичен: Своегó прiéмши Содéтеля, я́ко Сам восхотè,/ от безсéменнаго Твоегó чрéва, пáче умá воплощáема, Чи́стая,// твáрей вои́стинну яви́лася есѝ, Влады́чица.
Канон крестовоскресный, глас 6
Хор: Слáва, Гóсподи, Крестý Твоемý Честнóму и Воскресéнiю.
Чтец: Суди́лищу Пiлáтову предстои́т хотя́/ беззакóнному судý, я́ко суди́мь, Судiя́,/ и от рукѝ непрáвды по лицý заушáется Бог,// егóже трепéщут земля́, и небéсная.
Хор: Слáва, Гóсподи, Крестý Твоемý Честнóму и Воскресéнiю.
Чтец: Простéрл еси́ Божéственнеи длáни Твоѝ, Спáсе,/ на пречи́стем Твоéм и живонóснем Крестè:/ и собрáл есѝ язы́ки в познáнiе Твоè, Влады́ко,// покланя́ющыяся, Гóсподи, слáвному Твоемý распя́тiю.
Хор: Пресвятáя Богорóдице, спасù нас.
Богорóдичен: Стоя́ше, слез истóчники испущáющи, Пренепорóчная/ при Крестè Твоéм, Спáсе,/ я́же от ребрá Твоегó кáпли кровéй зря́щи, Хрїстè,// и Твою́ безприклáдную ми́лость слáвящи.
Канон Богородицы, глас 6
Хор: Пресвятáя Богорóдице, спасù нас.
Чтец: Причáщшися Éва садý, преслушáннаго брáшна, кля́тву введè:/ но сiю́ разреши́ла есѝ, Чи́стая,// благословéнiя начáток Хрїстá рóждши.
Хор: Пресвятáя Богорóдице, спасù нас.
Чтец: Я́же би́сера от божéственныя мóлнiи Хрїстá рóждши,/ страстéй мои́х мглу, и прегрешéнiй смущéнiе, Чи́стая,// разжени́ свéтом Твоея́ свéтлости.
Хор: Пресвятáя Богорóдице, спасù нас.
Чтец: Язы́ков чáянiе, Iáков из Тебè воплощáемаго/ предзря́ше тáйно ýмныма очи́ма Бóга,// избáвльшаго нас ходáтайством Твои́м.
Канон мучеников Зиновия и Зиновии, глас 8
Хор: Святíи мýченицы, молúте Бóга о нас.
Чтец: Престóлу предстоя́ Хрїстóву я́ко iерéй благопрiя́тен и мýченик изря́днейшiй,/ Зинóвiе треблажéнне,/ я́же любóвiю чествýющыя твою́ пáмять светонóсную,// житéйских избáви соблáзнов.
Хор: Святíи мýченицы, молúте Бóга о нас.
Чтец: Зарéю просвещáемь, мýдре, Трисóлнечнаго Сiя́нiя,/ мглу разори́л есѝ éллинскаго злослóвiя и, свéтом твои́х словéс вся просвети́в,// ны́не прешéл есѝ к незаходи́мому сiя́нiю.
Слáва Ѻтцý и Сы́ну и Святóму Дýху.
Тропáрь: Угль явлéн мы́сленный,/ огнéм вжигáемь Божéственнаго Дýха, всех сердцá вжегл есѝ к желáнiю Божéственному, священнотаи́нниче,// и прéлесть попали́л есѝ вся́ку.
И ны́не и прúсно и во вéки векóв. Амúнь.
Богорóдичен: Рáдуйся, пресвяты́й хрáме, рунó Богорóсное,/ запечáтанный истóчниче, безсмéртiя струя́.// Пáству Твою́, Влады́чице, сохранѝ от всех сопроти́вных невоевáну.
Катавáсiя (глас 4): Отвéрзу устá моя́,/ и напóлнятся Дýха,/ и слóво отры́гну Царúце Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéнiе.
ПЕСНЬ 3
Iрмóс: Несть свят,/ я́коже Ты, Гóсподи Бóже мой,/ вознесы́й рог вéрных Твоúх, Блáже,/ и утвердúвый нас на кáмени// исповéданiя Твоегó.
Хор: Слáва, Гóсподи, Святóму Воскресéнiю Твоемý.
Чтец: Бóга распинáема плóтiю зря́щи тварь, растаявáшеся стрáхом:// но содержи́тельною длáнiю нас рáди Распя́таго, крéпко держи́ма бе.
Хор: Слáва, Гóсподи, Святóму Воскресéнiю Твоемý.
Чтец: Смéртiю смерть разорéна лежи́т окая́нная без дыхáнiя:/ Животá бо не терпя́щи божéственнаго приражéнiя,// умерщвля́ется крéпкiй, и дáруется всем воскресéнiе.
Хор: Пресвятáя Богорóдице, спасù нас.
Богорóдичен: Божéственнаго рождествá Твоегó, Чи́стая,/ вся́кiй естествá чин превосхóдит чýдо:/ Бóга бо преестéственне зачалá есѝ во чрéве,// и рóждши пребывáеши при́сно Дéва.
Глас 6
Хор: Слáва, Гóсподи, Крестý Твоемý Честнóму и Воскресéнiю.
Чтец: Во грóбе триднéвствовавый/ воскреси́л есѝ животворя́щим востáнiем Твои́м прéжде умерщвлéнныя,/ и осуждéнiя разреши́вшеся, рáдостно веселя́хуся,// се избавлéнiе пришéл есѝ, Гóсподи, взывáюще.
Хор: Слáва, Гóсподи, Крестý Твоемý Честнóму и Воскресéнiю.
Чтец: Слáва Твоемý востáнiю, Спáсе наш,/ я́ко нас от áда тлéнiя, и смéрти избáвил есѝ, я́ко Всеси́лен,/ и пою́ще глагóлем:// несть свят рáзве Тебè, Гóсподи Человеколю́бче.
Хор: Пресвятáя Богорóдице, спасù нас.
Богорóдичен: Ты от Тебè рóждшагося я́ко ви́дела есѝ уя́звлена копiéм,/ уязви́лася еси́ сéрдцем, Пресвятáя всенепорóчная,/ и ужасáющися глагóлала есѝ:// что Тебè воздадè, Чáдо, нарóд пребеззакóнный?
Глас 6
Хор: Пресвятáя Богорóдице, спасù нас.
Чтец: Тлéнную мою́ плоть и смéртную, Всечи́стая Богомáти,/ из чрéва Твоегó несказáнно прiéм Благíй,// и обезтлéнив сiю́, вéчне Себè связáл есть.
Хор: Пресвятáя Богорóдице, спасù нас.
Чтец: Бóга воплощáема из Тебè зря́ще, Дéво,/ ужасáхуся стрáхом ли́цы Áнгельстiи,// и я́ко Мáтерь Бóжiю немóлчными пéсньми Тя почитáют.
Хор: Пресвятáя Богорóдице, спасù нас.
Чтец: Ужасéся, гóру ýмную ви́дев Тя прорóк Данiи́л,/ из нея́же кáмень отсечéся кромè рук:// и дéмонская кáпища, Богомáти, крéпко сокрушѝ.
Глас 8
Хор: Святíи мýченицы, молúте Бóга о нас.
Чтец: Ми́ром помáзанiя духóвнаго помáзан, Зинóвiе,/ свящéнствовал есѝ, я́ко Áнгел,// мýченическими при кончи́не украси́вся венцы́.
Хор: Святíи мýченицы, молúте Бóга о нас.
Чтец: Душ прирадéнiе прiéм,/ воздéланiем Божéственным, преподóбне, плодонóсны сiя́ показáл есѝ,// тéмже Госпóдни рáдости сподóбился есѝ.
Слáва Ѻтцý и Сы́ну и Святóму Дýху.
Тропáрь: Сестрá единокрóвная твоя́ тебè единомýдренна показáся,/ Зиновíя свящéннейшая,// спострадáти бо тебè произвóли и с тобóю наслади́тися слáвы вéчныя.
И ны́не и прúсно и во вéки векóв. Амúнь.
Богорóдичен: Трóицы Еди́наго родилá есѝ, в человéчество облéкшася,/ Пресвятáя Мáти Дéво:// Егóже моли́ спастѝ Тя воспевáющыя.
Катавáсiя (глас 4): Твоя́ песнослóвцы, Богорóдице,/ живы́й и незавúстный Истóчниче,/ лик себè совокýпльшiя, духóвно утвердù,/ в честнéм вхождéнiи Твоéм// венцéв слáвы сподóби.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Кондáк сщмч. Зинóвiя и мц. Зиновíи, глас 8: И́стины свидéтели и благочéстiя проповéдники,/ двóицу достóйно почти́м в Богодухновéнных пéснех,/ Зинóвiя вкýпе с мýдрою Зиновíею,/ кýпно жи́вшыя и отшéдшыя// и мучéнiем прiи́мшыя венéц нетлéнный.
Íкос: Дóбляго и вели́каго Зинóвiя пéсньми и пéнiи восхвáлим/ с дóброю дéвою и несквéрною Зиновíею,/ сýщею сострадáлицею,/ я́ко низложи́ша врáжiя сверéпства/ и íдольское безбóжiе обличи́ша,/ вéру же Хрїстóву уясни́ша.// Тéмже рáдостно прiя́ша ны́не венéц нетлéнный.
Седáлен сщмч. Зинóвiя и мц. Зиновíи, глас 1: Ми́ром честны́м помáзан, яви́лся есѝ, преблажéнне, iерéй Бóга Вы́шняго,/ И́мже укрепля́емь, iерáрше Зинóвiе,/ мýченик был есѝ и сограждани́н Áнгелов.// Тéмже днесь, всесвятýю пáмять творя́ще, поéм тя. (Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Богорóдичен из минéи, глас 1: Безневéстная Чи́стая Богорóдице Дéво,/ еди́на вéрных Предстáтельнице и покрóве,/ бед и скорбéй, и лю́тых обстоя́нiй всех избáви,/ на Тя уповáнiе, Отрокови́це, имýщих,// и дýши нáша спасѝ Божéственными моли́твами Твои́ми.
ПЕСНЬ 4
Iрмóс: Хрїстóс моя́ сúла,/ Бог и Госпóдь,/ честнáя Цéрковь/ боголéпно поéт, взывáющи,// от смы́сла чúста, о Гóсподе прáзднующи.
Хор: Слáва, Гóсподи, Святóму Воскресéнiю Твоемý.
Чтец: Дрéво процвелó есть, Хрїстè, и҆́стинныя жи́зни:/ крест бо водрузи́ся,/ и напоéн быв крóвiю и водóю от нетлéннаго Твоегó ребрá,// живóт нам прозябè.
Хор: Слáва, Гóсподи, Святóму Воскресéнiю Твоемý.
Чтец: Не ктомý змiй мне лóжне обожéнiе подлагáет:/ Хрїстóс бо богодéлатель человéческаго естествá,// ны́не невозбрáнно стезю́ животá мне отвéрзе.
Хор: Пресвятáя Богорóдице, спасù нас.
Богорóдичен: Я́ко вои́стинну неизвещáнна и непостижи́ма,/ я́же Твоегó боголéпнаго, Богорóдице, суть рождествá,// сýщим на землѝ и на небесѝ, Приснодéво, тáинства.
Глас 6
Хор: Слáва, Гóсподи, Крестý Твоемý Честнóму и Воскресéнiю.
Чтец: Честны́й крест Твой почитáем, и гвóзди, Хрїстè,/ и святóе копiè с трóстiю, венéц и́же от тéрнiй,// и́миже от áдова истлéнiя избáвихомся.
Хор: Слáва, Гóсподи, Крестý Твоемý Честнóму и Воскресéнiю.
Чтец: Гроб, Спáсе, Тя подъя́т вóлею мéртва о нас я́вльшагося,/ но никáкоже возмóже, Слóве, удержáти:// я́ко Бог бо воскрéсл есѝ, спасáя род наш.
Хор: Пресвятáя Богорóдице, спасù нас.
Богорóдичен: Богороди́тельнице Приснодéво,/ Спáса Хрїстá человéком рóждшая,/ от бед и мук избáви нас,/ прибегáющих вéрою к божéственному покрóву Твоемý.
Глас 6
Хор: Пресвятáя Богорóдице, спасù нас.
Чтец: Поéм, Пречи́стая, Тебè Всенепорóчную,/ и҆́же Тобóю спáсшiися,/ и благочéстно пою́ще взывáем:// благословéнна, я́же Бóга, Приснодéво, рóждшая.
Хор: Пресвятáя Богорóдице, спасù нас.
Чтец: Свет незаходи́мый, Дéво, родилá есѝ,/ сýщим во тьме житiя́,/ плóтiю светя́щ, Всеблажéнная, и пою́щим Тя,// рáдость, Приснодéво, источи́ла есѝ.
Хор: Пресвятáя Богорóдице, спасù нас.
Чтец: Благодáть процветè, закóн престá Тобóю, Всесвятáя:/ Ты бо, Чи́стая, родилá есѝ Гóспода,// подаю́щаго нам, Приснодéво, оставлéнiе.
Глас 8
Хор: Святíи мýченицы, молúте Бóга о нас.
Чтец: Возвы́шен яви́лся есѝ страдáнiи честны́ми, свящéннейше,/ и прiя́л есѝ венцы́ побéды, мýдре, и вéчное получи́л есѝ рáдованiе,// тем тя почитáем, óтче iерáрше Зинóвiе.
Хор: Святíи мýченицы, молúте Бóга о нас.
Чтец: На Дрéве Простéршемуся вóлею подóбяся, воздви́гся,/ не ужáслся еси́, Зинóвiе, и тлéнiя, слáвне, и умерщвлéнiя дебельствá совлéклся есѝ, óтче,// свящéнников похвалó.
Слáва Ѻтцý и Сы́ну и Святóму Дýху.
Тропáрь: Душá твоя́ крéпкая дéмонская утверждéнiя низложѝ,/ кáпища же разседóшася, твердéйшею вéрою твоéю потребля́еми,// Зинóвiе слáвне, священномýчеников похвалó.
И ны́не и прúсно и во вéки векóв. Амúнь.
Богорóдичен: Стрáнным Твои́м Рождествóм от Бóга устрани́вшiяся к Немý присвóила еси́, Всепéтая./ Тéмже велеглáсно Тя вси слáвим и вопiéм Ти вéрою:// рáдуйся, земнорóдных воззвáнiе.
Катавáсiя (глас 4): Седя́й в Слáве/ на Престóле Божествá/ во óблаце лéгце,/ прiúди Iисýс Пребожéственный,/ Нетлéнною Длáнiю/ и спасè зовýщiя:// слáва, Хрїстè, сúле Твоéй.
ПЕСНЬ 5
Iрмóс: Бóжiим свéтом Твоúм, Блáже,/ ýтренюющих Ти дýши любóвiю озарù, молю́ся,/ Тя вéдети, Слóве Бóжiй,/ úстиннаго Бóга,// от мрáка грехóвнаго взывáюща.
Хор: Слáва, Гóсподи, Святóму Воскресéнiю Твоемý.
Чтец: Уступáют мне херувíми ны́не,/ и плáменное орýжiе, Влады́ко, плещи́ мне даéт,/ Тя ви́девше, Слóве Бóжiй, и҆́стиннаго Бóга,// разбóйнику путь сотвóршаго в рай.
Хор: Слáва, Гóсподи, Святóму Воскресéнiю Твоемý.
Чтец: Не ктомý бою́ся, éже в зéмлю, Влады́ко Хрїстé, возвращéнiя:/ Ты бо от земли́ мя возвéл еси́ забвéнна,/ благоутрóбiя рáди мнóгаго,// к высотé нетлéнiя воскресéнiем Твои́м.
Хор: Пресвятáя Богорóдице, спасù нас.
Богорóдичен: И҆́же Богорóдицу Тя от души́, Влады́чице мíра благáя,/ исповéдающих спаси́:/ Тебé бо предстáтельство непобори́мое и҆́мамы,// и҆́стинную Богороди́тельницу.
Глас 6
Хор: Слáва, Гóсподи, Крестý Твоемý Честнóму и Воскресéнiю.
Чтец: Снéдiю дрéва во Едéме прельсти́выйся, в тлю поползé родоначáльник,/ преслýшавый, Гóсподи, зáповеди Твоя́, Преблагíй:/ но сегó Крестóм пáки возвéл еси́ в пéрвую добрóту,// послушли́в Отцý, Спáсе, бы́вый.
Хор: Слáва, Гóсподи, Крестý Твоемý Честнóму и Воскресéнiю.
Чтец: Твоéю смéртiю, Блáже, смéрти потреби́ся держáва,/ истóчник жи́зни нам источи́, и безсмéртiе даровáся:/ сегó рáди погребéнiю Твоемý и воскресéнiю вéрою покланя́емся,// и́мже, я́ко Бог, мир весь просвети́л еси́.
Хор: Пресвятáя Богорóдице, спасù нас.
Богорóдичен: Живы́й на небесéх и Творéц всех Госпóдь,/ во Твою́, Всенепорóчная, всели́ся неизречéнно утрóбу,/ прослáвивый Тя, превы́шшую небéс,/ и святéйшую чинóв невещéственных:// тéмже ны́не, и́же на земли́, Тя ублажáем.
Глас 6
Хор: Пресвятáя Богорóдице, спасù нас.
Чтец: Чистотóю возсiя́вши свéтло,/ Божéственное пребывáнiе Влады́ки, Всепéтая, былá еси́./ Ты бо еди́на Мáти Бóжiя яви́лася еси́,// во объя́тiих, я́ко младéнца, Сегó носи́вши.
Хор: Пресвятáя Богорóдице, спасù нас.
Чтец: Нося́щи добрóту ýмную, краснéйшiя Твоея́ души́,/ Невéста Бóжiя былá еси́,/ запечáтствована дéвством, Чи́стая,// и свéтом чистоты́ мiр просвещáющи.
Хор: Пресвятáя Богорóдице, спасù нас.
Чтец: Да рыдáет собрáнiе злочести́вых,/ не проповéдающих Тя я́ве Чи́стую Богомáтерь:/ Ты бо вратá Бóжiя свéта яви́лася еси́ нам,// мрак прегрешéнiй разгоня́ющи.
Глас 8
Хор: Святíи мýченицы, молúте Бóга о нас.
Чтец: Жéнское естествó Дýхом укрепи́ся и попрá, и́же в раи́ прамáтерь дрéвле запéншаго,/ и Божéственныя слáвы на Небесéх сподóбися,// дéвством и страдáньми сiя́ющи.
Хор: Святíи мýченицы, молúте Бóга о нас.
Чтец: Тучерóден óблак бысть язы́к твой,/ я́ко одождя́ющь благочéстiя дождь,/ и вéрных сердцá напая́ющь// и к благоплóдiю священнодéйственне путеводя́щь добродéтельных, Зинóвiе, дея́нiй.
Слáва Ѻтцý и Сы́ну и Святóму Дýху.
Тропáрь: Дéвства заря́ми сластолю́бiя тьму отгнáла еси́/ и свéтом страдáнiй безбóжiя нощь потреби́ла еси́,/ Зинови́е мýченице, Iисýсова крáсная невéсто, жили́ще Божéственнаго Дýха.
И ны́не и прúсно и во вéки векóв. Амúнь.
Богорóдичен: Грехá тя́жким всегдá обложéн есмь брéменем, Пречи́стая,/ и вопiю́ Ти: сié ходáтайством Твои́м Божéственным облегчи́,/ Ты бо еси́ Предстáтельница грéшников препрослáвленная,// Избáвителя и Спáса рóждши.
Катавáсiя (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла есù во утрóбе над всéми Бóга/ и родилá есù Безлéтнаго Сы́на,/ всем, воспевáющим Тя,// мир подавáющая.
ПЕСНЬ 6
Iрмóс: Житéйское мóре,/ воздвизáемое зря напáстей бýрею,/ к тúхому пристáнищу Твоемý притéк, вопiю́ Ти:/ возведù от тли живóт мой,// Многомúлостиве.
Хор: Слáва, Гóсподи, Святóму Воскресéнiю Твоемý.
Чтец: Распинáемь, Влады́ко, гвоздьми́ ýбо,/ кля́тву ю́же на нас потреби́л еси́:/ копiéм же прободáемь в ребрó,// адáмово рукописáнiе растерзáв, мíр свободи́л еси́.
Хор: Слáва, Гóсподи, Святóму Воскресéнiю Твоемý.
Чтец: Адáм низведéся, лéстiю запя́т быв, ко áдове прóпасти:/ но и҆́же естествóм Бог же и ми́лостив,/ сшел еси́ на взыскáнiе,// и на рáму понéс, совоскреси́л еси́.
Хор: Пресвятáя Богорóдице, спасù нас.
Богорóдичен: Пречи́стая Влады́чице,/ рóждшая человéком кóрмчiю Гóспода,/ страстéй мои́х непостоя́нное и лю́тое утоли́ смущéнiе,// и тишинý подáждь сéрдцу моемý.
Глас 6
Хор: Слáва, Гóсподи, Крестý Твоемý Честнóму и Воскресéнiю.
Чтец: Хрiстоубíйца и пророкоубíйца бысть еврéйское мнóжество:/ я́ко бо прорóки дрéвле, и́стины сýщiя тáйныя лучи́, уби́ти не убоя́ся:/ си́це и ны́не Гóспода, егóже проповéдаху они́ тогдá,/ зáвистiю влекóми уби́ша,// но нам бысть живóт умерщвлéнiе Егó.
Хор: Слáва, Гóсподи, Крестý Твоемý Честнóму и Воскресéнiю.
Чтец: Ят был еси́, но не удержáн, Спáсе, во грóбе,/ áще бо и вóлею вкуси́л еси́ смéрти, Слóве,/ но воскрéсл еси́, я́ко Бог безсмéртен,/ совоздви́гнувый ýзники сýщiя во áде,// и рáдость женáм вмéсто печáли прéжнiя, пáки премени́вый.
Хор: Пресвятáя Богорóдице, спасù нас.
Богорóдичен: Безчéстен Твой и скýден яви́ся вид плотскíй/ пáче человéков, во врéмя стрáсти:/ и́бо Божествá существóм, красéн добрóтою Давíду показáся:/ но жезлóм Твоегó цáрствiя врагóв сотры́й крéпость, глагóлаше Чи́стая:// о Сы́не мой и Бóже, от грóба востáни.
Глас 6
Хор: Пресвятáя Богорóдице, спасù нас.
Чтец: Вели́кiй преднаписá во прорóцех Моисéй Тя,/ ковчéг, и трапéзу, и свéщник, и рýчку,/ обрáзно назнáменуя воплощéнiе,// éже из Тебé Вы́шняго, Мáти Дéво.
Хор: Пресвятáя Богорóдице, спасù нас.
Чтец: Умерщвля́ется смерть, и тлéнiе упражня́ется/ Адáмова осуждéнiя, о Влады́чице!/ Плодý Твоемý прирази́вшееся:/ Жизнь бо родилá еси́,// от истлéнiя избавля́ющую пою́щих Тя.
Хор: Пресвятáя Богорóдице, спасù нас.
Чтец: Закóн изнемóже, и сень ми́мо и́де,/ пáче умá и смы́сла я́вльшейся ми благодáти,/ éже от Тебé, Дéво, рождествá,// Бóга и Спáса, многопéтая.
Глас 8
Хор: Святíи мýченицы, молúте Бóга о нас.
Чтец: Моли́тва Божéственныя души́ твоея́ прiя́та бысть, я́ко кади́ло, óтче:/ в воню́ бо благовóнiя, преблажéнне, страдáнiй, Зинóвiе, потéкл еси́,// Возсiя́вшаго от Жены́ и всю тварь Просвéщшаго.
Хор: Святíи мýченицы, молúте Бóга о нас.
Чтец: Крóвiю страдáнiя, блажéнне, освяти́л еси́ зéмлю,/ дух же на Небесá возшéд, перворóдных Цéрковь Божéственне уясни́, Зинóвiе,// iерáрхов и мýчеников свéтлая похвалó.
Слáва Ѻтцý и Сы́ну и Святóму Дýху.
Тропáрь: Утесни́л еси́ нечéстiе, блажéнне, прострáнством и́стиннаго благочéстiя/ и пути́, в сié ведýщiя, заблýждшим лю́дем показáл еси́,// и спасл еси́ лю́те потопля́емыя прéлести водáми.
И ны́не и прúсно и во вéки векóв. Амúнь.
Богорóдичен: Украси́ дýшу мою́, Дéво,/ безобрáзiем страстéй одержи́мую,/ и помышлéньми и́стиннаго покая́нiя окая́нное сéрдце моé утверди́,// и спаси́ мя, на Тя несомнéнно, Дéво, надéющагося.
Катавáсiя (глас 4): Божéственное сiè и всечестнóе/ совершáюще прáзднество,/ Богомýдрiи, Богомáтере,/ прiидúте, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 6: Живоначáльною длáнiю/ умéршiя от мрáчных удóлiй,/ Жизнодáвец воскреси́в всех Хрїстóс Бог,/ воскресéнiе подадé человéческому рóду:/ есть бо всех Спаси́тель,// Воскресéнiе и Живóт, и Бог всех.
Íкос: Крест и погребéнiе Твоé, Жизнодáвче, воспевáем вéрнiи, и покланя́емся,/ я́ко ад связáл еси́, Безсмéртне, я́ко Бог всеси́льный:/ и мéртвыя совоскреси́л еси́, и вратá смéртная сокруши́л еси́,/ и держáву áдову низложи́л еси́, я́ко Бог./ Тéмже земнорóднiи славослóвим Тя любóвiю, воскрéсшаго,/ и низложи́вшаго врáжiю держáву всепáгубную,/ и всех воскреси́вшаго в Тя вéровавших,/ и мiр избáвльшаго от стрел змiи́ных,// и от прéлести врáжiя, я́ко Бог всех.
ПЕСНЬ 7
Iрмóс: Росодáтельну ýбо пещь/ содéла Áнгел/ преподóбным отрокóм,/ халдéи же опаля́ющее/ велéнiе Бóжiе мучúтеля увещá вопúти:// благословéн есù, Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Рыдáющее во стрáсти Твоéй сóлнце, во мрак облечéся,/ и во дни по всей, Влады́ко, земли́ свет помéрче, вопiя́:// благословéн еси́ Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Облекóшася Хрїстé схождéнiем Твои́м во свет преиспóдняя,/ прáотец же весéлiя испóлнь, яви́ся ликовствýя, взыгрáся, вопiя́:// благословéн еси́, Бóже отéц нáших.
Хор: Пресвятáя Богорóдице, спасù нас.
Богорóдичен: Тобóю, Мáти Дéво,/ свет возсiя́ всей вселéнней свéтлый:/ Зижди́теля бо Ты всех родилá еси́ Бóга,/ Егóже проси́, Всечи́стая,// нам низпослáти вéрным вéлiю ми́лость.
Глас 6
Хор: Слáва, Гóсподи, Крестý Твоемý Честнóму и Воскресéнiю.
Чтец: О стрáннаго óбраза!/ Iзрáиля Избавлéй от рабóты фараóнскiя,/ распинáется вóлею от негó,/ и разрешáет вери́ги согрешéнiй./ Емýже вéрою поéм:// избáвителю Бóже, благословéн еси́.
Хор: Слáва, Гóсподи, Крестý Твоемý Честнóму и Воскресéнiю.
Чтец: Тебé, Спáса, на лóбнем распя́ша пребеззакóнных óтроцы нечести́вiи,/ вратá мéдная и вереи́ сломи́вшаго,/ во спасéнiе нас, пою́щих:// избáвителю Бóже, благословéн, еси́.
Хор: Пресвятáя Богорóдице, спасù нас.
Богорóдичен: Éвы дрéвнiя свобождéнiе, рóждшая, от кля́твы,/ разрешáеши Адáма, Дéво Чи́стая./ Тéмже со áнгелы Тя, с Сы́ном Твои́м поéм и вопiéм:// избáвителю Бóже, благословéн еси́.
Глас 6
Хор: Пресвятáя Богорóдице, спасù нас.
Чтец: Ю́нош трiéх пещь не опали́, рождествó прообразýющих Твоé:/ божéственный бо огнь Тебé не опали́в, всели́ся в Тя,/ и вся научи́ вопи́ти:// благословéн еси́, Бóже отéц нáших.
Хор: Пресвятáя Богорóдице, спасù нас.
Чтец: Блажáт концы́ Тя, Всечи́стая Мáти, я́коже прореклá еси́,/ просвещáеми светолýчными сiя́ньми Твои́ми,/ и благодáтiю пою́ще, вопiю́т:// благословéн еси́, Бóже отéц нáших.
Хор: Пресвятáя Богорóдице, спасù нас.
Чтец: Пáгубныя ýбо зýбы в мя вонзé змiй лукáвнейшiй:/ но сам Твой, Богомáти, сокруши́ Сын,/ крéпость же мне дадé вопи́ти:// благословéн еси́, Бóже отец нáших.
Глас 8
Хор: Святíи мýченицы, молúте Бóга о нас.
Чтец: Течéнiи крóвными погаси́в, всеприснопáмятне, огнь безбóжiя,/ чудесы нас всегдá орошáеши дождéм, Зинóвiе,/ Влады́ку благослóвящыя:// благословéн еси́, Гóсподи Бóже, во вéки.
Хор: Святíи мýченицы, молúте Бóга о нас.
Чтец: В Божéственный мрак вшед, Неви́димаго, я́ко мóщно, ви́дел еси́,/ дýшу и ум просвещáюща твою́, мýчениче,/ благочестивомýдренно пою́щаго:// благословéн еси́, Гóсподи Бóже, во вéки.
Слáва Ѻтцý и Сы́ну и Святóму Дýху.
Тропáрь: Даéт тебé честь Влады́ка, пострадáвшу твéрдо/ и низложи́вшу кóзни врáжiя, и пою́щу велеглáсно:/ благословéн еси́, Гóсподи Бóже, во вéки.
И ны́не и прúсно и во вéки векóв. Амúнь.
Богорóдичен: Мéсто, Дéво, яви́лася еси́ свящéнiя,/ из негóже Бог яви́ся, освящáя ны вéрою, песнопою́щыя:// благословéн, Пречи́стая, Плод Твоегó чрéва.
Катавáсiя (глас 4): Не послужúша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн есù.
ПЕСНЬ 8
Iрмóс: Из плáмене преподóбным рóсу источúл есù/ и прáведнаго жéртву водóю попалúл есù:/ вся бо творúши, Хрїстè, тóкмо éже хотéти.// Тя превознóсим во вся вéки.
Хор: Слáва, Гóсподи, Святóму Воскресéнiю Твоемý.
Чтец: Iудéйскiя дрéвле пророкоубíйцы лю́ди,/ богоубíйцы зáвисть ны́не содéла,/ Тебè на крест вознéсшiя, Слóве Бóжiй:// Егóже превознóсим во вся вéки.
Хор: Слáва, Гóсподи, Святóму Воскресéнiю Твоемý.
Чтец: Небéснаго крýга не остáвил еси́,/ и во ад сошéд, всегó совоздви́гл еси́/ лежáщаго во гнóищи, Хрїстè, человéка,// Тя превознося́ща во вся вéки.
Хор: Пресвятáя Богорóдице, спасù нас.
Богорóдичен: От Свéта Светодáвца Слóва зачалá еси́,/ и рóждши неизречéнно Сегó, прослáвилася еси́:/ Дух бо в Тя, Отрокови́це, Бóжiй всели́ся.// Тéмже Тя поéм во вся вéки.
Глас 6
Хор: Слáва, Гóсподи, Крестý Твоемý Честнóму и Воскресéнiю.
Чтец: Ужасéся всяк слух,/ кáко Вы́шнiй вóлею прiи́де на зéмлю,/ áдову крéпость разруши́ти крестóм и погребéнiем,/ и вся воздви́гнути звáти:/ óтроцы благослови́те, свящéнницы воспóйте,// лю́дiе превозноси́те во вся вéки.
Хор: Слáва, Гóсподи, Крестý Твоемý Честнóму и Воскресéнiю.
Чтец: Престá áдово мучи́тельство,/ и цáрство уничижи́ся прóчее,/ на крестè бо на земли́ водрузи́вся, и́же над всéми Бог,/ сегó могýтство низложи́./ Егóже óтроцы благослови́те, свящéнницы воспóйте,// лю́дiе превозноси́те во вся вéки.
Хор: Пресвятáя Богорóдице, спасù нас.
Богорóдичен: О неизречéннаго Твоегó, Хрiстé, человеколю́бiя, и неизглагóланных благ!/ Менé бо ви́дя погибáюща во áдове темни́це,/ стрáсти претерпéвый избáвил еси́./ Тéмже Тя благослови́м, всех Влады́ку,// и превознóсим во вся вéки.
Глас 6
Хор: Пресвятáя Богорóдице, спасù нас.
Чтец: Позлащéною ри́зою, я́коже Цари́цу, Сын Твой просвети́в зарéю Дýха,/ Тебé одеснýю Себé постáви, Пречи́стая:// Егóже превознóсим во вся вéки.
Хор: Пресвятáя Богорóдице, спасù нас.
Чтец: И҆́же хотéнiем еди́ным мiр водрузи́вый,/ от пречи́стыя Твоея́ утрóбы плоть взéмлет,/ свы́ше сiю́ наздáти хотя́:// Егóже превознóсим во вся вéки.
Хор: Пресвятáя Богорóдице, спасù нас.
Чтец: Счетáнiем Слóва ко мне, человéку,/ Божéственное жили́ще былá еси́, Пречи́стая,/ просiя́вши я́ве дéвства свéтлостiю:// тéмже Тя поéм во вся вéки.
Глас 8
Хор: Святíи мýченицы, молúте Бóга о нас.
Чтец: Не убоя́лся еси́ мечá, iерáрше,/ не устраши́лся еси́ бед, не ужáслся еси́ смéрти,// безсмéртныя тя слáвы показýющiя причáстника.
Хор: Святíи мýченицы, молúте Бóга о нас.
Чтец: Священнодéйственник тáин показáлся еси́/ и, себé освяти́в, жéртва благовóнна был еси́,// и Вы́шнiя трапéзы, Зинóвiе, достóин.
Благословúм Отцá, и Сы́на, и Святáго Дýха, Гóспода.
Тропáрь: Чудодéйствы сiя́я, iерáрше,/ мýченическими лучáми свéтло облистáл еси́// и мрак прéлести до концá отгнáл еси́.
И ны́не и прúсно и во вéки векóв. Амúнь.
Богорóдичен: Не земледéланный Грозд зачéнши,/ источáющь винó, Дéво Мáти,// оставлéнiя страстéй мя пiя́нства измени́, молю́ся.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 4): Óтроки благочестúвыя в пещù/ Рождествó Богорóдичо спаслó есть;/ тогдá ýбо образýемое,/ ны́не же дéйствуемое,/ вселéнную всю воздвизáет пéти Тебè:/ Гóспода пóйте, делá,// и превозносúте Егó во вся вéки.
Вóзглас: Богорóдицу и Мáтерь Свéта в пéснех возвелúчим.
Продолжéнiе здесь