Усекновение главы Пророка, Предтечи и Крестителя Господня Иоанна. ВСЕНОЩНОЕ БДЕНИЕ. УТРЕНЯ КАНОН
11 сентября́ 2023 гóда. Понедéльник 15-й седмúцы по Пятидеся́тнице. Усекновéнiе честны́я главы́ честнáго слáвнаго Прорóка, Предтéчи и Крестúтеля Госпóдня Iоáнна. Глас 5. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
Седáлен прáздника по полiелéи, глас 8: Предтéча, вéрнiи, Крести́тель и Áнгел всех Избáвителя,/ И҆́рода обличи́в за беззакóнiе Иродiáдино, умирáет, во главý усéчен,/ я́ко да и сýщим во áде со дерзновéнiем благовести́т,// я́ко Бог схóдит тáмо плени́ти смерть. (Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Богорóдичен из Минéи, глас 8: Слóво Ѻ́тчее на зéмлю сни́де, и Áнгел свéтел Богорóдице глагóлаше:/ рáдуйся, Благословéнная, Я́же чертóг еди́на сохрáньшая,/ зачáтiе прiéмши Превéчнаго Бóга и Гóспода,// да от прéлести, я́ко Бог, спасéт род человéческiй.
СТЕПЕННА, ГЛАС 4
1 АНТИФОН
Хор: От ю́ности моея́/ мнóзи бóрют мя стрáсти,/ но Сам мя заступù// и спасù, Спáсе мой. (Двáжды)
Ненави́дящiи Сióна,/ посрами́теся от Гóспода,/ я́ко травá бо огнéм// бýдете изсóхше. (Двáжды)
Слáва Ѻтцý и Сы́ну и Святóму Дýху.
Святы́м Дýхом/ вся́ка душá живи́тся,/ и чистотóю возвышáется,// светлéется Трóйческим еди́нством, священнотáйне.
И ны́не и прúсно и во вéки векóв, амúнь.
Святы́м Дýхом/ вся́ка душá живи́тся,/ и чистотóю возвышáется,// светлéется Трóйческим еди́нством, священнотáйне.
ПРОКИМЕН
Чтец: Прокíмен, глас четвéртый, псалóм Давíдов: Честнá пред Гóсподем смерть преподóбных Егó.(Пс.115:6)
Хор: Честнá пред Гóсподем/ смерть преподóбных Егó.
Чтец: Что воздáм Гóсподеви о всех, я́же воздадé ми? (Пс.115:3)
Хор: Честнá пред Гóсподем/ смерть преподóбных Егó.
Чтец: Честнá пред Гóсподем.
Хор: Смерть преподóбных Егó.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Матфéя Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Мф.зач.57): Во врéмя óно, услы́шав И́род четвертовла́стник слух Иису́сов, рече́ отроко́м свои́м: Сей есть Иоа́нн Крести́тель, той воскре́се от ме́ртвых, и сего́ ра́ди си́лы де́ются о нем. И́род бо есмь Иоа́нна, связа́ его́, и всади́ в темни́цу, Иродиа́ды ра́ди жены́ Фили́ппа бра́та своего́. Глаго́лаше бо ему Иоа́нн: не досто́ит ти име́ти ея́. И хотя́ше его́ уби́ти, убоя́ся наро́да, зане́ я́ко проро́ка его́ име́яху. Дни́ же бы́вшу рождества́ И́родова, пляса́ дщи́ Иродиа́дина посреде́, и угоди́ И́родови. Те́мже и с кля́твою изрече́ ей да́ти, его́же а́ще воспро́сит. Она́ же нава́ждена ма́терию свое́ю, даждь ми, рече́, зде на блю́де главу́ Иоа́нна Крести́теля. И печа́лен бысть царь: кля́твы же ра́ди, и за возлежа́щих с ним, повеле́ да́ти ей. И посла́в усе́кну Иоа́нна в темни́це. И принесо́ша главу́ его́ на блю́де, и да́ша деви́це, и отнесе́ ма́тери свое́й. И присту́пльше ученицы́ его́, взя́ша те́ло его́, и погребо́ша е, и прише́дше возвести́ша Иису́сови. И слы́шав Иису́с оты́де отту́ду в корабли́, в пу́сто ме́сто еди́н. И слы́шавше наро́ди, по Нем идо́ша пе́ши от градо́в.
[Русский синодальный перевод]В то время Ирод тетрарха услышал молву об Иисусе и сказал служащим при нем: это Иоанн Креститель; он воскрес из мертвых, и потому чудеса делаются им. Ибо Ирод, взяв Иоанна, связал его и посадил в темницу за Иродиаду, жену Филиппа, брата своего, потому что Иоанн говорил ему: не должно тебе иметь ее. И хотел убить его, но боялся народа, потому что его почитали за пророка. Во время же празднования дня рождения Ирода дочь Иродиады плясала перед собранием и угодила Ироду, посему он с клятвою обещал ей дать, чего она ни попросит. Она же, по наущению матери своей, сказала: дай мне здесь на блюде голову Иоанна Крестителя. И опечалился царь, но, ради клятвы и возлежащих с ним, повелел дать ей, и послал отсечь Иоанну голову в темнице. И принесли голову его на блюде и дали девице, а она отнесла матери своей. Ученики же его, придя, взяли тело его и погребли его; и пошли, возвестили Иисусу. И, услышав, Иисус удалился оттуда на лодке в пустынное место один; а народ, услышав о том, пошел за Ним из городов пешком. (Мф.14:1-13)
Хор: Слáва Тебè, Гóсподи, слáва Тебè.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отвратѝ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менé от лицá Твоегó, и Дýха Твоегó Святáго не отымѝ от менé. Воздáждь ми рáдость спасéнiя Твоегó, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами святáго слáвнаго Прорóка, Предтéчи и Крести́теля Iоáнна,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè. (Пс.50:3)
Стiхúра, глас 6: Пляса́ учени́ца вселука́ваго диа́вола/ и главу́ твою́, Предте́че, мзду взят./ О, пи́ра, испо́лнена крове́й!/ Лу́чше бе не кля́тися, И́роде беззако́нне, лжи вну́че./ А́ще ли же и кля́лся еси́,/ но не о добре́ кля́лся:/ лу́чше бе солга́вшу жизнь получи́ти,/ не́же и́стинствовавшу главу́ Предте́чеву усе́кнути./ Но мы Крести́теля, я́ко в рожде́нных жена́ми бо́льша,// досто́йно чту́ще, ублажа́ем.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ПРАЗДНИКА, ГЛАС 8
( Пéрвый канóн Предтéчи, глас 8, совмещенный со вторы́м канóном Предтéчи, глас 8)
ПЕСНЬ 1
Iрмóс: Вóду прошéд, я́ко сýшу,/ и егúпетскаго зла избежáв,/ iзрáильтянин вопiя́ше:// Избáвителю и Бóгу нáшему поúм.(Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: От утрóбы неплóдныя я́вльшася прорóка/ в ложеснáх Деви́ческих, во чрéве Носи́мому неизречéнно,// свящéннаго воспоéм Предтéчу.(Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Предéлы естествá превозшéд, прáвды соблю́л еси́ закóны,// беззакóнное смешéнiе обличáя, не убоя́вся царéва суровствá. (Двáжды)
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: Закóнным млекóм воспитáвся, законоположéнiе совокуплéнiя закóннаго,/ я́ко закóна печáть запечáтствуя,// сопроти́вился еси́ мéрзкому прелюбодея́нiю.
Хор: Пресвятáя Богорóдице, спасù нас.
Чтец: Чи́ни Тя Áнгел и человéк, Безневéстная Мáти, восхваля́ют непрестáнно:// Зижди́теля бо сих я́ко Младéнца на объя́тiих Твои́х носи́ла еси́.
Канон второй Предтечи, глас тойже
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Пусты́ни крáсное овчá,/ Захáрiин плод и Елiсавéтино пáче надéжди прозябéнiе,// предповелевáет вéрным торжествовáти честнýю егó пáмять.(Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: О, рождéнiя, испóлнена крóве!/ О, пи́ра мéрзка!/ Убíйством бо пiя́нство И҆́род раствори́,// трапéза же егó скверноубíйства гóрькаго испóлнися.(Двáжды)
Слáва Ѻтцý и Сы́ну и Святóму Дýху.
Тропáрь: Обличи́вшаго И҆́рода беззакóннующа, вéрнiи,/ и отсечéнiе главы́ претерпéвша, воспои́м Крести́теля,// я́ко за рéвность Бóжiю умерщвлéна.
И҆ ны́не и прúсно и во вéки векóв. Амúнь.
Богорóдичен: Неопи́саннаго Бóга Слóва, всегó всéльшася в Тя,/ родилá еси́, Чи́стая Богороди́тельнице,/ сугýба Тогó, я́ко еди́на сýща Сы́на,// воплощéнна из Тебé неизречéнно.
Катавáсiя (глас 8): Крест начертáв, Моисéй/ впря́мо жезлóм Чермнóе пресечè,/ Iзрáилю пешеходя́щу;/ тóже обрáтно фараóновым колесни́цам, удáрив, совокупѝ,/ вопрекѝ написáв непобеди́мое орýжiе.// Тем Хрїстý пои́м, Бóгу нáшему, я́ко прослáвися.
ПЕСНЬ 3
Iрмóс: Небéснаго крýга Верхотвóрче, Гóсподи,/ и Цéркве Зиждúтелю,/ Ты менé утвердù в любвù Твоéй,/ желáнiй крáю,/ вéрных утверждéнiе,// Едúне Человеколю́бче.(Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Дрéвних я́ко ходáтай и нóвых, Предтéче, Евáнгельских проповéданiй/ ты, предстáв, смешéнiе беззакóнное мучи́тельское обличи́л еси́,// слáвную смерть, рáдуяся, прiя́л еси́.(Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: От мáтере беззакóнныя преднаученá отрокови́ца,/ объюродéвшу пiя́нством И҆́родови речé:/ даждь на блю́де главý Iоáннову,// мáтери да подáм дар возжелéнен.(Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Обличéнiя не терпя́ безстýдный мучи́тель/ богонóснаго твоегó язы́ка, слáвне Предтéче,// отрокови́це предаéт, жéнским плясáнiем, честнýю твою́ страдáльную главý, преслáвне.
Хор: Пресвятáя Богорóдице, спасú нас.
Чтец: Всели́вся в Дéву телéсне, Гóсподи,/ яви́лся еси́ человéком, я́коже подобáше ви́дети Тя,/ Ю́же и показáл еси́ я́ко и҆́стинную Богорóдицу и вéрным пóмощь,// Еди́не Человеколю́бче.
Глас 8
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Бóлiй не востá в рождéнных женáми Iоáнна, взывáше Хрiстóс И҆́стина:/ во утрóбе бо познá создáнiе Создáвшаго,// проповéдаше мáтерним глáсом.(Двáжды)
Хор: Святы́й велúкiй Iоáнне, Предтéче Госпóдень, молù Бóга о нас.
Чтец: Пéрстом, пéрвее, показáв Áгнца/ и язы́ком, вторóе, И҆́рода обличи́л еси́,// главóю же, трéтiе, источáеши чудесá от здáнна сосýда нам.(Двáжды)
Слáва Ѻтцý и Сы́ну и Святóму Дýху.
Тропáрь: Рождéнiе слáвно, Крести́телю Хрiстóв, и житié твоé непорóчно,/ и предъизшéствiе чéстно, и показáнiе стрáнно,// смерть честнá и погребéнiе слáвно.
И҆ ны́не и прúсно и во вéки векóв. Амúнь.
Богорóдичен: Бог Сый, Сам Себé истощи́л еси́, Единорóдне,/ да спасéши, я́же создáл еси́,/ и҆́хже ра́ди вочеловéчился еси́, воплóщся от Дéвы,// и, все моé премени́в естествó, привéл еси́ Твоемý Роди́телю.
Катавáсiя (глас 8): Жезл во óбраз тáйны прiéмлется,/ прозябéнiем бо предразсуждáет свящéнника;/ неплодя́щей же прéжде Цéркви/ ны́не процветè Дрéво Крестá// в держáву и утверждéнiе.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Седáлен Предтéчи, глас 8: От неплóдове просiя́в судóм Бóжiим и ýзы разреши́в язы́ка óтча,/ показáл еси́ сóлнце, денни́цу озаря́ющее,/ и лю́дем в пусты́ни Зижди́теля проповéдал еси́, Áгнца, взéмлющаго ми́ра грехи́./ Тéмже рéвностiю царя́ обличи́л еси́,/ в преслáвную главý твою́ усéчен быв, приснопáмятне, Iоáнне всехвáльне,/ моли́ся Хрiстý Бóгу согрешéнiй оставлéнiе даровáти/ прáзднующим любóвiю святýю пáмять твою́. (Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Богорóдичен из минéи, глас 8: Я́ко Дéву и еди́ну в женáх, Тя, без сéмене рóждшую Бóга плóтiю,/ вси ублажáем, рóди человéчестiи:/ огнь бо всели́ся в Тя Божествá,/ и я́ко Младéнца млекóм питáеши Зижди́теля и Гóспода./ Тем, áнгельскiй и человéческiй род, достóйно слáвим пресвятóе рождествó Твоé/ и соглáсно вопiéм Ти:/ моли́ Хрiстá Бóга согрешéнiй оставлéнiе даровáти// покланя́ющимся вéрою пресвятóму рождествý Твоемý.
ПЕСНЬ 4
Iрмóс: Ты моя́ крéпость, Гóсподи,/ Ты моя́ и сúла,/ Ты мой Бог, Ты моé рáдованiе,/ не остáвль нéдра Óтча/ и нáшу нищетý посетúв./ Тем с прорóком Аввакýмом зовý Ти:// сúле Твоéй слáва, Человеколю́бче.(Двáжды)
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: Не могíй терпéти обличéнiя дéрзости,/ и҆́же закóна томлéнiем пови́нный,/ ни дéрзость благочéстiя, и҆́же сквéрными сластьми́ растлéнный,// связáв, блюдя́ше невещéственно Гóрним прéжде концá ликóм совокупля́емаго.(Двáжды)
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: Душеврéдным пiя́нством и разжжéнiем блýдным поболéв,/ отдáн окая́нный, отрокови́цы плясáнiем ножны́м свя́зан,/ убíйца Прорóка бывáет.// Зачáт бо пiя́нство блудá мáтерь и лю́тое беззакóнiе породи́.(Двáжды)
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: Вои́стинну в тебé не солгá Божéственный глас:/ ты бо во прорóцех бóльшiй еси́,/ я́ко прорóчеству сподóбился от сáмыя утрóбы в несовершéнне телеси́,// и проречéннаго тобóю Бóга Слóва и ви́дев, и крести́в в телеси́.
Хор: Пресвятáя Богорóдице, спасú нас.
Чтец: Ты вéрных похвалá еси́, Безневéстная, Ты Предстáтельница,/ Ты и прибéжище хрiстiáн, стенá и пристáнище:/ к Сы́ну бо Твоемý мольбы́ нóсиши, Всенепорóчная,// и спасáеши от бед вéрою и любóвiю Богорóдицу Чи́стую Тебé знáющiя.
Глас 8
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: Уясни́л еси́ нам Хрiстóво Цáрство,/ показáл еси́ лю́дем пути́ покая́нiя/ и И҆́рода обличи́л еси́ беззакóннующа,// вели́кiй проповéдниче, Iоáнне мýдре.(Двáжды)
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: Не терпя́, Крести́телю, И҆́род обличéнiя,/ победи́ся гнéвом, и зáвистiю, и гóрестiю;/ и соблюдáше врéмя рождéнiя,// в нéже усечé главý твою́, проповéдниче Хрiстóв.(Двáжды)
Слáва Ѻтцý и Сы́ну и Святóму Дýху.
Тропáрь: Чуди́тся земля́ твоемý житiю́, Iоáнне,/ проповéдует нéбо непрáведное твоé заколéнiе,// и сказýет мнóжество добродéтелей твои́х Цéрковь, воспевáющи.
И҆ ны́не и прúсно и во вéки векóв. Амúнь.
Богорóдичен: Роди́вся от Мáтере, Дéвы Непорóчныя,/ сохрани́л еси́ чи́сту по рождествé,// И҆́же в моé существó Весь облéкся, грехá кромé.
Катавáсiя (глас 8): Услы́шах, Гóсподи,/ смотрéнiя Твоегó тáинство,/ разумéх делá Твоя́// и прослáвих Твоè Божествó.
ПЕСНЬ 5
Iрмóс: Вскýю мя отрúнул есú/ от лицá Твоегó, Свéте незаходúмый,/ и покры́ла мя есть чуждáя тьма, окая́ннаго?/ Но обратú мя и к свéту зáповедей Твои́х// путú моя́ напрáви, молю́ся.(Двáжды)
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: Мáтерними наваждéньми цéну плясáнiя злодéмонскаго/ сурóвыя льви́цы суровéйшее исчáдiе испроси́,/ ю́же и звéрiе сáми в пусты́ни почитáху,// главý Предтéчи и проповéдника.(Двáжды)
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: О, твои́х неизречéнных и непости́жных судéб, Человеколю́бче!/ Я́ко во утрóбе ещé сýща мáтерни, Дýха Святáго прiя́телище бы́вша// и возрáстша целомýдрiем и чистотóю сквернáвая исплясá отрокови́ца.(Двáжды)
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: Любéзно и и҆́скренно извóли беззакóнное сопряжéнiе лю́бящему/ к рождéственным егó питiя́м и прорóче присовокупи́ти убíйство,// и чáшу, испóлнену святы́х и прорóческих кровéй, сластолю́бiем раствори́ти.
Хор: Пресвятáя Богорóдице, спасú нас.
Чтец: Мáтерне дерзновéнiе, éже к Сы́ну Твоемý имýщи, Пречи́стая,/ срóднаго промышлéнiя, éже о нас, не прéзри, мóлимся:// я́ко Тебé и еди́ну, хрiстiáне, ко Влады́це, очищéнiе ми́лостивно предлагáем.
Глас 8
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: Пусты́нное овчá и вселéнней стяжáнiе Предтéча// днесь готóвит духóвную трапéзу нам.(Двáжды)
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: Сластéй рабá и закóнов престýпника, обличи́л еси́, Iоáнне, И҆́рода,// Иродiáды гóрькаго рачи́теля.(Двáжды)
Слáва Ѻтцý и Сы́ну и Святóму Дýху.
Тропáрь: Иродiáда пля́шет, Iоáнн вя́жется и закалáется./ О, пiя́нства И҆́родова!// О, несмы́сльства души́ егó!
И҆ ны́не и прúсно и во вéки векóв. Амúнь.
Богорóдичен: Рáдуйся, Божéственная Горó,/ от Нея́же Кáмень отсечéся без рук, Пречи́стая,// усыри́вшися Бóгу и Слóву, Всенепорóчная, плóтiю.
Катавáсiя (глас 8): О треблажéнное Дрéво,/ на нéмже распя́ся Хрїстóс, Царь и Госпóдь!/ И҆́мже падè дрéвом прельсти́вый,/ тобóю прельсти́вся,/ Бóгу пригвозди́вшуся плóтiю,// подаю́щему мир душáм нáшим.
ПЕСНЬ 6
Iрмóс: Очúсти мя, Спáсе,/ мнóга бо беззакóнiя моя́,/ и из глубины́ зол возведú, молю́ся,/ к Тебé бо возопúх,/ и услы́ши мя,/ Бóже спасéнiя моегó.(Двáжды)
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: О зáповедех закóна бéдствуяй, блажéнне,/ обличéньми наказýеши беззакóнонавшаго:// не был бо еси́ трость, врáжiих вéтров колéблема дунове́ньми.(Двáжды)
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: Крóвiю заклáнiя главá кáплющи твоя́,/ принесéся блýдным пóдвигом вмéсто мзды,// И́рода обличáющи и по кончи́не, я́ко естествó смеси́вша.(Двáжды)
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: В пусты́нях ходя́, власы́ велбýжи покрывáемь,/ во óвех ýбо я́ко светосiя́нно жил еси́ цáрски,/ во óвех же, я́ко цáрску обнося́ красотý,// над страстьми́ воцари́лся еси́.
Хор: Пресвятáя Богорóдице, спасú нас.
Чтец: Да избáвимся от лют прегрешéнiй моли́твами Твои́ми, Богороди́тельнице Чи́стая,/ и да улучи́м, Пресвятáя, Божéственное сiя́нiе// из Тебé неизречéнно воплощéннаго Сы́на Бóжiя.
Глас 8
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: Усечéнiе честны́я и всехвáльныя твоея́ главы́, Предтéче Хрiстóв, почитáюще,// слáвим твою́ приснохвáльную и всеми́рную пáмять, преблажéнне.(Двáжды)
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: О, сквéрнаго гощéнiя! О, гóрькаго рождéнiя!/ О, пiя́нства сквéрнаго И́рода беззакóннаго!/ Содержи́м бысть к беззакóнiю и обличáемь,// Прорóка уби́ти поучавáется.(Двáжды)
Слáва Ѻтцý и Сы́ну и Святóму Дýху.
Тропáрь: Плясáвши нóвая еги́птяныня посреди́ пи́ра сквéрнено, главý испроси́,// сея́ обличи́вшую роди́тельницу и И́родову налóжницу.
И҆ ны́не и прúсно и во вéки векóв. Амúнь.
Богорóдичен: И́же ны́не Сын Дéвы, пéрвее Сын Отéч показáся,/ не ин разумевáемь, от ви́димаго,// áще и пребы́сть еди́н во обою́ совершéн.
Катавáсiя (глас 8): Вóднаго звéря во утрóбе/ длáни Ióна крестови́дно распростéр,/ спаси́тельную Страсть проображáше я́ве./ Тем, триднéвен изшéд,/ премíрное Воскресéнiе прописáше/ Плóтiю пригвождéннаго Хрїстá Бóга// и триднéвным Воскресéнiем мiр просвéщшаго.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк Предтéчи, глас 5: Предтéчево слáвное усекновéнiе/ смотрéнiе бысть нéкое Божéственное,/ да и сýщим во áде Спáсово проповéсть пришéствiе./ Да рыдáет ýбо Иродíя,/ беззакóнное убíйство испроси́вши:/ не закóн бо Бóжiй, ни живы́й век возлюбѝ,// но притвóрный, приврéменный.
Íкос: Рождéнiе И҆́родово всем яви́ся непреподóбно,/ егдá посреди́ питáющихся главá постя́щагося предложи́ся, я́коже снедь:/ рáдости совокупи́ся печáль, и смéху раствори́ся гóрькое рыдáнiе,/ я́ко главý Крести́телеву на блю́де нося́, пред всéми вни́де, я́коже речé, отрокови́ца./ И кля́твы рáди рыдáнiе нападé на вся возлежáщiя тогдá с царéм:/ не бо обвесели́ óнех, нижé И҆́рода самогó./ Речé бо: оскорбéша печáлiю не и́стинною,// но притвóрною, приврéменною.
ПЕСНЬ 7
Iрмóс: Бóжiя снизхождéнiя/ огнь устыдéся в Вавилóне иногдá,/ сегó рáди óтроцы в пещù, рáдованною ногóю,/ я́ко во цвéтнице, ликýюще, поя́ху:// благословéн есù, Бóже отéц нáших.
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: Блу́дным желáнiем, лю́тым же пiя́нством вооружéн,/ прирази́вся, разсéдеся, к воздержáнiя столпу́ непреклóнному// и целомýдрiя ко грáду неразруши́мому, Хрiстóву Крести́телю, И́род беззакóнный.
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: Не ужасéся, Предтéче, не устыдéся, не ослабé научéная дiáволом,/ твою́ принося́щи честну́ю главу́ безсты́дно на блю́де,// наваждéнiем мáтерним прельсти́вши ум.
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: Я́ко свети́льник, просiя́л еси́, предпослáвся же, я́ко А́нгел;/ я́ко Прорóк, проповéдуеши А́гнца Бóжiя, я́вльшагося Хрiста́;/ я́ко мýченик, мечéм во главý усéклся еси́,// предвозвещáя Тогó и сýщим во áде мéртвым.
Хор: Пресвятáя Богорóдице, спасú нас.
Чтец: Избáвльшеся рождествóм Твои́м осуждéнiя дрéвняго падéнiя,/ явлéнную вину́ свобождéнiя, Тя, Мáти Дéво, с Сы́ном Твои́м,// дáвшим избáву о нас Себé, при́сно слáвим.
Глас 8
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: Закóн Бóжiй проповéдуя, Iоáнн/ злочести́ваго не убоя́ся И́рода беззакóннующаго уцеломýдрити:// огнь бо бе в нем грехá егó.
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: О, главы́, я́сно законополагáющiя и от земли́ И́роду провозглашáющiя:/ не достóит тебé беззакóннующу багряни́цу носи́ти,// я́ко мучи́тельскую одéжду.
Слáва Ѻтцý и Сы́ну и Святóму Дýху.
Тропáрь: Орýжiи сквéрными беззакóнный И́род вооружи́вся,/ с кля́твою исполня́ше беззакóнiе,// гощéнiя пiя́нство имéя тáмо, свóинствующее томý.
И҆ ны́не и прúсно и во вéки векóв. Амúнь.
Богорóдичен: Безпло́тен сый - непрелóжно воплоти́ся;/ Безлéтен сый - во врéмени познáся от Дéвы,// всех Зижди́тель, несмéсно пребы́в, я́коже бе, и быв, я́коже не бе.
Катавáсiя (глас 8): Безýмное велéнiе мучи́теля злочести́ваго лю́ди поколебá,/ ды́шущее прещéнiе и злохулéнiе богомéрзкое,/ обáче три óтроки не устраши́ я́рость звéрская,/ ни огнь снедáяй,/ но противоды́шущу росонóсному Дýху,/ со огнéм сýще, поя́ху:// препéтый отцéв и нас Бóже, благословéн еси́.
ПЕСНЬ 8
Iрмóс: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки.
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: Предтеки́й рождество́ Твое́ и Боже́ственное страда́ние,/ в преиспо́дних мече́м быва́ет проро́к и ве́стник та́мошняго прише́ствия Твоего́,/ я́ко глас Сло́ва Иоа́нн взыва́я:/ ме́ртвии, - Животода́вца, слепи́и, - Светода́вца,// плене́ннии, - Изба́вителя Христа́ превозноси́те во вся ве́ки.
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: Деви́ческаго рождества́ предте́к от непло́дове,/ ны́не во́льнаго вся Созда́вшаго бысть распя́тия предше́ственник,/ усекнове́нием главны́м су́щим во а́де зовы́й:/ о́троцы, благослови́те, свяще́нницы, воспо́йте,// лю́дие, превозноси́те во вся ве́ки.
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: Главе́ твое́й от телесе́ отъя́те бы́вши, Предте́че,/ твое́ю пло́тию душа́ владя́щая от сея́ раздели́ся,/ но Божество́ от пло́ти Емману́ила не разлучи́ся отсю́ду,/ и кость не сокруши́ся Бо́га и Влады́ки.// Те́мже превозно́сим Его́ во ве́ки вся.
Хор: Пресвятáя Богорóдице, спасú нас.
Чтец: Господороди́тельнице Пречи́стая, души́ моея́ я́звы и гное́ния/ ми́лостивною мольбо́ю Твое́ю, Де́во, очи́сти и па́дша возста́ви./ Спаси́ мя, Всенепоро́чная, блу́днаго, спаси́:/ Ты бо ми еси́ Предста́тельница и заступле́ние,// еди́на Чи́стая и Благослове́нная во вся ве́ки.
Глас 8
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: Пропове́давый Хрiсто́во прише́ствiе сýщим во а́де,/ ве́рою возвеща́я, боле́зни реша́яй прихо́дит Госпо́дь сла́вы,// Его́же превозно́сим во вся ве́ки.
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: В темни́це тя затвори́ И́род, Iоа́нне, втора́го Илiю́,/ и, желе́зными ýзы связа́в, уби́,// покая́нiя и Ца́рствiя ве́рнаго священнопропове́дника.
Благословúм Отцá, и Сы́на, и Святáго Дýха, Гóспода.
Тропáрь: О, трапе́зы, кро́ве испо́лненныя!/ О, сне́дей, уби́йством растворе́нных!/ О, пи́ра, испо́лнена су́етства!// О, безчелове́чия и скверноуби́йства И́рода беззако́ннаго!
И҆ ны́не и прúсно и во вéки векóв. Амúнь.
Богорóдичен: Горе́ весь и до́ле весь, Сло́ве, в не́дрех О́тчих и Ма́тере Твоея́,/ весь Бог и весь естество́м Челове́к,// еди́н Ипоста́сию и сугу́б естество́м еси́, Ми́лостиве.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 8): Благослови́те, óтроцы,/ Трóицы равночи́сленнiи,/ Содéтеля Отцá Бóга,/ пóйте снизшéдшее Слóво,/ и огнь в рóсу претвóршее,/ и превозноси́те всем жизнь подавáющаго// Дýха Всесвятáго во вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Устрашúся всяк слух/ неизречéнна Бóжiя снизхождéнiя,/ я́ко Вы́шнiй вóлею снúде дáже и до плóти,/ от девúческаго чрéва быв Человéк.// Тéмже Пречúстую Богорóдицу, вéрнiи, величáем.
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: О зáповедех зако́на бéдствуяй, блажéнне,/ обличéньми наказýеши беззако́нонавшаго:// не был бо еси́ трость, врáжiих вéтров колéблема дунове́ньми.
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: Кро́вiю заклáнiя главá кáплющи твоя́,/ принесéся блýдным по́двигом вмéсто мзды,// И́рода обличáющи и по кончи́не, я́ко естество́ смеси́вша.
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: В пусты́нях ходя́, власы́ велбýжи покрывáемь,/ во о́вех ýбо я́ко светосiя́нно жил еси́ цáрски,/ во о́вех же, я́ко цáрску обнося́ красотý,// над страстьми́ воцари́лся еси́.
Хор: Пресвятáя Богорóдице, спасú нас.
Чтец: Да изба́вимся от лют прегрешéнiй моли́твами Твои́ми, Богороди́тельнице Чи́стая,/ и да улучи́м, Пресвятáя, Божéственное сiя́нiе// из Тебé неизречéнно воплощéннаго Сы́на Бо́жiя.
Глас 8
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: Усечéнiе честны́я и всехвáльныя твоея́ главы́, Предтéче Хрiсто́в, почитáюще,// слáвим твою́ приснохвáльную и всеми́рную пáмять, преблажéнне.
Хор: Святы́й велúкiй Iоáнне, Предтéче Госпóдень, молú Бóга о нас.
Чтец: О, сквéрнаго гощéнiя! О, го́рькаго рождéнiя!/ О, пiя́нства сквéрнаго И́рода беззако́ннаго!/ Содержи́м бысть к беззако́нiю и обличáемь,// Проро́ка уби́ти поучавáется.
Слáва Ѻтцý и Сы́ну и Святóму Дýху.
Тропáрь: Плясáвши но́вая еги́птяныня посреди́ пи́ра сквéрнено, главý испроси́,// сея́ обличи́вшую роди́тельницу и И҆́родову нало́жницу.
И҆ ны́не и прúсно и во вéки векóв. Амúнь.
Богорóдичен: И҆́же ны́не Сын Дéвы, пéрвее Сын Отéч показа́ся,/ не ин разумева́емь, от ви́димаго,// а́ще и пребы́сть еди́н во обою́ совершéн.
Катавáсiя (глас 8): Тáин еси́, Богорóдице, рай,/ невоздéланно возрасти́вшiй Хрiстá,/ И҆́мже крéстное живонóсное на земли́ насади́ся Дрéво./ Тем, ны́не возноси́му,// покланя́ющеся Емý, Тя величáем.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Светúлен Предтéчи: Во прорóцех бóльша познáна и апóстол предъизбрáнна бы́вша,/ песньми похвáльными венчáем Предтéчу благодáти:// во главý бо усéчен бысть закóна рáди Госпóдня. (Двáжды)
Слáва Ѻтцý и Сы́ну и Святóму Дýху,
Ин светúлен Предтéчи: Сквéрный И҆́род/ чистоты́ сади́телю, тебé, Крести́телю Спáсов,/ главý усечé льсти́вне,// обличéнiй же твоегó язы́ка посещи́ ника́коже возмóже.
И ны́не и прúсно и во вéки векóв, амúнь.
Богорóдичен из минéи: Я́же кля́тву мирску́ю Боже́ственным рождество́м Твои́м, Чи́стая, потре́бльши,/ ста́до, Тебе́ моля́щееся ве́рно, от вся́ких бед изба́ви// моли́твами Твои́ми Отрокови́це.
ХВАЛИТНЫ
Хор, глас 8: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéнiе положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
[Пропускается до стихир]Сотвори́ти в них суд напи́сан: слáва сiя бýдет всем преподóбным Егó. Хвали́те Бóга во святы́х Егó, хвали́те Егó в утвержéнiи си́лы Егó.
продолженiе зри здесь